¹ Mihamanakaiky ny fotoana fampamoahana ho an’ny olombelona rehetra. Antsoin’ny Baiboly hoe “ny andron’i Jehovah” izy io. Izy io no fotoana hampiharana ny didim-pitsaran’Andriamanitra eo amin’ny ratsy fanahy; izy io koa no fotoana hanafahana ny marina. Ny olona rehetra velona amin’izay fotoana izay dia hampamoahina noho ny fomba nampiasany ny fiainany. Izany no tao an-tsain’i Petera rehefa nampipoitra fanontaniana famakafakana iray toy izao izy: “Tokony ho karazan’olona manao ahoana moa ianareo?” Nohamafisiny ny maha-zava-dehibe ny ‘fitondran-tena masina, ny asa mampiseho fifikirana amin’Andriamanitra, sy ny fitadidiana tsara ao an-tsaina ny andron’i Jehovah’, ary koa ny ilana ho ‘tsy misy pentina sy tsy misy tsiny ary ao amin’ny fihavanana’. — 2 Pet. 3:11-14, NW.

⁵ Tsy misy pentina sy tsy misy tsiny ary ao amin’ny fihavanana: Amin’ny maha-anisan’ny olona betsaka antsika, dia ‘nanasa ny akanjontsika sy namotsy izany tamin’ny ran’ny Zanak’ondry’ isika. (Apok. 7:14). Ny hoe “tsy misy pentina” àry dia midika fa tsy maintsy miaro amin’ny fomba tsy azo hozongozonina ny fiainantsika madio, voatokana, mba tsy hipitihan’ny loto avy amin’izao tontolo izao, isika. Mitoetra ho “tsy misy tsiny” hatrany isika amin’ny tsy famelana ny fikatsahan-javatra tsy araka an’Andriamanitra, mampiseho fitiavana fatratra ny zavatra ara-nofo, hanaratsy endrika ny toetrantsika kristiana. (Jak. 1:27; 1 Jaona 2:15-17). Asehontsika fa miaina “ao amin’ny fihavanana” isika amin’ny fanehoana taratry ny “fiadanan’Andriamanitra” eo amin’ny fifampiraharahana rehetra ataontsika amin’ny hafa. — Fil. 4:7; Rom. 12:18; 14:19.