Em̦m̦aan ro rej lale eklejia rej kate er ñan anõke wãween an Jeova kwal̦o̦k tũriam̦o ñe rej kajjioñ jipañ juon eo em̦õj jol̦o̦ke jãn eklejia eo. Ñan waanjoñak, Jeova ear jab kõttar an armej ro an ilo Israel ukel̦o̦k m̦okta innem ej kab jipañ er. Ijello̦kun an ãindein, e eo ear em̦m̦akũt m̦okta im kajjioñ jipañ er m̦okta jãn aer kar kwal̦o̦k bwe rekõn̦aan ukel̦o̦k. Jeova ear kwal̦o̦k an tũriam̦o ikijjeen an kar jiroñ ri-kanaan Hoseia bwe en jeorl̦o̦k an lio pãleen bõd im bar ro̦o̦l ñane meñe lio ejjañin kar bõjrak jãn an kõm̦m̦an jerawiwi. (Hos. 3:1; Mal. 3:7) Ilo aer anõke Jeova, em̦m̦aan ro rej lale eklejia relukkuun kõn̦aan bwe eo ear kõm̦m̦an jerawiwi en bar jepl̦aak, im rejjab kõm̦m̦an bwe en pen an jepl̦aak. Ilo waanjoñak eo an Jesus kõn nejin eo ejerwaan, jemãn eo ear ‘ettõrl̦o̦k im atbo̦kwõje l̦eo nejin im mejenmaiki.’ (Luk 15:20) Jej kile bwe jemãn ear jab kõttar an l̦eo nejin akwel̦ap im kajjitõk ippãn bwe en jeorl̦o̦k an bõd. Ijello̦kun an ãindein, ãinwõt juon jemãn el̦ap yokwe ippãn, e eo ear em̦m̦akũt m̦okta. w24.08 28 pãr. 7-8

Ãinwõt an eoon eo an rainin kaalikkar, Jeova ejjab dãpij mãlõtlõt eo an jãn armej ro. Ijoke, el̦ap an m̦õn̦õn̦õ in lel̦o̦k mãlõtlõt eo an ñan ro jet. Ejjab men in wõt, ak Jemes ear ba bwe ñe Jeova ej lel̦o̦k mãlõtlõt eo an ñan ro jet, “ejjab kajook er” ak “n̦otaik er.” Aet, ejjab kõn̦aan bwe jen jo̦o̦k in kajjitõke tõl eo an. Ilo m̦ool, ej rõjañ kõj bwe jen kõm̦m̦ane men in. (JK. 2:​1-6) Ta kõn kõj? Jemaroñ ke anõke Jeova im kõjerbal mãlõtlõt eo ewõr ippãd ñan jipañ ro jet? (Sam 32:8) Elukkuun lõñ iien ko repel̦l̦o̦k ñan an armej ro an Jeova jipañ ro jet kõn men ko rejel̦ã kaki. Ñan waanjoñak, ekkã ad katakin im kammineneik ri-kwal̦o̦k naan ro rekããl ilo jerbalin kwal̦o̦k naan. Em̦m̦aan ro rej lale eklejia rej kijenmej ilo aer jipañ em̦m̦aan ak likao ro jeid im jatid me em̦õj aer peptaij ekoba rej rijjipañ ilo eklejia ñan katak kilen kõm̦m̦ani eddo ko aer ilo eklejia eo. Im ro me ewõr aer imminene ilo jerbalin ekkal im kõjparok im̦õn kabuñ ko ad rej jipañ katakin im kammineneik ro edikl̦o̦k aer imminene ñan kõm̦m̦ani jerbal kein. w24.09 28-29 pãr. 11-12

Em̦m̦aan im likao ro jeid im jatid, bwe kwõn maroñ erom juon eo ej lale eklejia, kwõj aikuj juon eo “ejjel̦o̦k n̦otaan.” Mel̦el̦ein bwe em̦m̦an etam̦ ilo eklejia eo kõn wõt m̦wil ko am̦ rem̦m̦an im ejjel̦o̦k juon emaroñ n̦aruom̦ kõn kõm̦m̦an ko renana. (1 Tim. 3:2) Bareinwõt kwõj aikuj juon eo em̦m̦an etan ippãn ro ilikin. Em̦ool bwe armej ro ilo lal̦ in remaroñ jab errã kõn tõmak eo am̦, bõtab rejjab aikuj pere bwe kwõj juon armej em̦m̦an im bwe kwõj kwal̦o̦k m̦ool. (Dan. 6:​4, 5) Kajjitõk ippam̦ make, ‘Em̦m̦an ke eta ilo eklejia eo im bareinwõt ilikin eklejia eo?’ El̦aññe kwõj “juon eo ej yokwe em̦m̦an,” kwõj pukot men ko rem̦m̦an ippãn ro jet im nõbar er kõn kadkad ko aer rem̦m̦an. (Tai. 1:8) Kwõj bareinwõt m̦õn̦õn̦õ in kõm̦m̦ani men ko rem̦m̦an ñan ro jet. Joñan, kwõj m̦õn̦õn̦õ in kõm̦m̦ani men ko ro jet rejjab kõtmãne am̦ naaj kõm̦m̦ani. Etke elukkuun aorõk an em̦m̦aan ro rej lale eklejia kwal̦o̦k kadkad in? Kõnke rej kõjerbale enañin aolep iien ko aer ñan jabõte eklejia eo im kajejjeti jerbal ko aer. (1 Pit. 5:​1-3) Meñe ãindein, ak lañlõñ eo rej loe jãn aer karejar ñan ro jet el̦apl̦o̦k jãn jabdewõt men ko rej kaarmejjeteiki.—Jrb. 20:35. w24.11 20-21 pãr. 3-5