Ekkã an kar Jeova kõjerbal ri-kanaan ro ñan kakkõl im kajim̦weik armej ro an. Ñan waanjoñak, ikijjeen Jeremaia, Anij ear ba: “Kwõn ukel̦o̦k, O Israel ejjab tiljek, . . . Iban jememe ñan kom̦, bwe Ña ijouj, . . . Ijjãmin dãpij [aõ] illu ñan indeeo. Innem kwõn kile am̦ jerawiwi—kwaar jum̦ae Jeova am̦ Anij.” (Jrm. 3:​12, 13) Ikijjeen Joel, Jeova ear ba: “Kom̦win ro̦o̦ltok ñan Eõ kõn aolepen bũruomi.” (Joel 2:​12, 13) Ear bareinwõt kõm̦akũt Aiseia bwe en ba: “Kom̦win karreoik kom̦; kom̦win jol̦o̦k kõm̦m̦an ko ami renana jãn im̦aan Meja. Bõjrak jãn ami kõm̦m̦an nana.” (Ais. 1:​16-19) Im ikijjeen Ezekiel, Jeova ear kajjitõk im ba: “Kom̦ij l̦õmn̦ak im̦õn̦õn̦õ ke in lale an juon rijjerawiwi mej? Ijjab. Ikõn̦aan wõt bwe en ukel̦o̦k im mour. Ijjab kõn̦aan bwe jabdewõt armej en mej. Kom̦win bõjrak jãn ami jerawiwi bwe kom̦win mour.” (Ezk. 18:​23, 32, UBS) Jeova elukkuun m̦õn̦õn̦õ ñe ej lo an armej ro ukel̦o̦k kõnke ekõn̦aan bwe ren wõnm̦aanl̦o̦k wõt im mour—aet, mour ñan indeeo! w24.08 9 pãr. 5-6

Jeova ej lel̦o̦k ñan aolep ri-karejar ro an ekkan ko ilo kõkkar, im ej tõl im kõjparok er aolep. Juon iaan wãween ko Jeova ej kwal̦o̦k an jab kalijekl̦o̦k ej ikijjeen an kõm̦m̦an bwe aolep armej ro ipel̦aakin lal̦ in ren maroñ riiti Baibõl̦ eo. Ilo jinoin, kar jeiki Jeje ko Rekkwõjarjar ilo jilu kajin ko: Hibru, Aramea, im Grik. Ro me remaroñ riiti Baibõl̦ eo ilo kajin kein jãn etto, epaakl̦o̦k ke kõtaan eo aer ippãn Jeova jãn ro me rejjab maroñ riiti kajin kein? Jaab. (Matu 11:25) An Jeova buñbũruon ippãd ejjab pedped ioon joñan jel̦ãl̦o̦kjen̦ ko ippãd ak ad jel̦ã kilen riiti kajin ko me kar jeiki Baibõl̦ eo ilo kar jinoin. Jeova ejjab kõm̦m̦an bwe ro wõt me el̦ap jel̦ãl̦o̦kjen̦ ko ippãer ren maroñ bõk tokjãn jãn mãlõtlõt eo an. Ijoke, ej letok jeraam̦m̦an in ñan aolep armej ro ipel̦aakin lal̦ in. Em̦õj ukote Naan eo an, Baibõl̦ eo, ñan elõñ to̦ujin kajin ko. Tokjãn men in, aolep armej ro ipel̦aakin lal̦ in remaroñ bõk tokjãn jãn katak ko ie im bareinwõt katak kõn wãween eo remaroñ erom m̦õttan.—2 Tim. 3:​16, 17. w24.06 6-7 pãr. 13-15

M̦õttan jidik enaaj kar jem̦l̦o̦k jukjukun pãd eo an ri-Ju ro, ãinwõt an kar Jesus kanaan kake. Kũrjin ro rar aikuj kõjerbale iien eo ear wõr wõt ippãer ñan kõpooj er make ikijjeen aer kõkajoorl̦o̦k tõmak eo aer im aer jel̦ã kijenmej. (Hib. 10:25; 12:​1, 2) Jej pojakin jelm̦aiki juon iien eñtaan me ekanooj in l̦apl̦o̦k jãn iien eñtaan eo me ri-Hibru ro rar iioone. (Matu 24:21; Rev. 16:​14, 16) L̦õmn̦ak kõn jet iaan naanin kakapilõk ko Jeova ear lil̦o̦k ñan Kũrjin rein me remaroñ bareinwõt jipañ kõj ilo raan kein. Rijjilõk Paul ear rõjañ rũttõmak ro m̦õttan bwe ren kũbwij Naanin Anij. (Hib. 5:14–6:1) Paul ear kõjerbal Jeje ko ilo Kajin Hibru ñan kõmel̦el̦eik ro jein im jatin kõn etke em̦m̦anl̦o̦k wãween an Kũrjin ro kabuñ ñan Jeova jãn wãween an ri-Ju ro kabuñ ñan E. Paul ear jel̦ã bwe el̦aññe Kũrjin rein renaaj kal̦apl̦o̦k aer jel̦ã im mel̦el̦e kõn m̦ool eo, renaaj maroñ kile im jum̦aik katak ko reriab im jab jebwãbwe. w24.09 8-9 pãr. 2-3; 10 pãr. 6