Mijak Jeova ej mel̦el̦ein lukkuun kwal̦o̦k ad kautieje ilo ad kõjparok bwe jen jab kõm̦m̦ane jabdewõt men me eban buñbũruon kake. (JK. 16:6) Kõn men in, jej wõnm̦aanl̦o̦k wõt im kate kõj ñan l̦oor l̦õmn̦ak ko An kõn ta ko rejim̦we im ta ko rebõd me Baibõl̦ eo ej kwal̦o̦k kaki. (2 Kor. 7:1) Enaaj l̦ap ad m̦õn̦õn̦õ ñe jenaaj kõm̦m̦ani men ko Jeova ej yokwi im kõjparok jãn men ko ej diki. (Sam 37:27; 97:10; Rom 12:9) Juon armej emaroñ jel̦ã bwe ewõr an Jeova maroñ ñan pepe kõn ta ko rejim̦we im ta ko rebõd, ijoke ej aikuj bar m̦õn̦õn̦õ in l̦oor l̦õmn̦ak ko an Anij. (Rom 12:2) Jej kwal̦o̦k ikijjeen kõm̦m̦an ko ad bwe jej lukkuun tõmak bwe ad l̦oori l̦õmn̦ak ko an Jeova ilo mour ko ad ej wãween mour eo em̦m̦antata. (JK. 12:28) Kar wãween dein an Devid eñjake, eñin unin ear ba men in kõn Jeova: “Kwõnaaj ba kajjien ñan eõ ial̦an mour. Ippam̦ lañlõñ el̦aptata; ianmoon̦ũm̦ men ko menin m̦õn̦õn̦õ ñan indeeo.”—Sam 16:11. w22.10 8 pãr. 9-10

Jesus ear kõttãik wõt bũruon im dãpij wõt l̦õmn̦ak eo ejim̦we kõn e make. M̦okta jãn an kar Jesus itok ñan lal̦ in, elõñ men ko rekanooj in em̦m̦an ear kõm̦m̦ani ke ear jerbal ñan Jeova. Ikijjeen Jesus, “kar kõm̦anm̦an men otemjej ilo lañ im ilo lal̦ in.” (Kol. 1:16) Ilo iien eo ear peptaij, Jesus ear ememejtok men ko ear kõm̦m̦ani ke ear pãd ippãn Jemãn. (Matu 3:16; Jon 17:5) Bõtab ãlikin an kar jel̦ã kõn men kein, Jesus ear jab oktak im utiej bũruon. Ijello̦kun men in, ejjel̦o̦k juon iien ear kwal̦o̦k bwe em̦m̦anl̦o̦k jãn ro jet. Ear ba ñan ri-kal̦oor ro an bwe “ear jab itok [ñan lal̦ in] bwe ro jet ren jerbal ñane, ak ear itok bwe en jerbal ñan er.” (Matu 20:28) Ear bareinwõt kwal̦o̦k etta bõro ilo an kwal̦o̦k bwe ejjab maroñ kõm̦m̦ane jabdewõt men kõn maroñ eo an make. Jesus ear lukkuun ettã bũruon! Ear likũt juon joñak elukkuun em̦m̦an bwe jen l̦oore. w22.05 24 pãr. 13

Ñe Jeova ej etale el̦aññe enaaj jeorl̦o̦k an juon bõd, ej lale el̦aññe eo ear kõm̦m̦an jerawiwi ear jel̦ã bwe men eo ear kõm̦m̦ane ebõd. Jesus ear kaalikkar men in ilo Luk 12:​47, 48. Ñe juon ej bũl̦ããn in kõm̦m̦ane juon men enana im elukkuun jel̦ã bwe el̦ap an nana men in im̦aan mejãn Jeova, ak ej wõnm̦aanl̦o̦k wõt im kõm̦m̦ane, men in ej juon jerawiwi el̦ap. Jeova emaroñ pepe ñan jab jeorl̦o̦k an armej in bõd. (Mark 3:29; Jon 9:41) Ilo wãween in, ewõr ke kõjatdikdik bwe naaj jeorl̦o̦k ad bõd? Aet! Jeova ej bareinwõt lale el̦aññe eo ear kõm̦m̦an jerawiwi ej m̦ool ilo an ukel̦o̦k. Ukel̦o̦k ej mel̦el̦ein ñe juon ej “kõm̦m̦an oktak ilo wãween an l̦õmn̦ak, eñjake, ak kõttõpar eo an.” Ekitibuj an armej eo nana an mour im lukkuun bũrom̦õj kõn men ko renana ear kõm̦m̦ani ak kõn an kar jab kõm̦m̦ane men eo ejim̦we me en kar aikuj kõm̦m̦ane. Juon eo me ej kwal̦o̦k an ukel̦o̦k ejjab baj bũrom̦õj wõt kõn men ko renana ear kõm̦m̦ani, ak ej bar bũrom̦õj kõn an m̦õjn̦o̦ kõtaan eo an ippãn Jeova, im eñin unin ear kõm̦m̦ani men kein renana. w22.06 5-6 pãr. 15-17