10 УРОК
Чын религийым кузе пален налаш?
1. Чын религий икте гына мо?
«Шояк пророк-влак деч шекланыза» (МАТФЕЙЫН 7:15).
Иисус ик религийлан гына негызым пыштен — чын религийлан. Тиде религийым курымашлык илышыш наҥгайыше корно дене таҥастараш лиеш. Иисусын каласымыж почеш шагалынже тиде корным кычал муыт (Матфейын 7:14). Юмо тыгай гына кумалмым йӧрышылан шотла, кудо тудын Мутеш, Библиеш, негызлалтеш. Чыла чын христиан-влак Юмылан ик семын ӱшанат. (Иоаннын 4:23, 24; 14:6; Ефесян-влаклан 4:4, 5 лудын лекса.)
«Юмылан чыла религий йӧрышӧ мо?» видеороликым ончалза.
2. Шоя христиан-влак нерген Иисус мом каласен?
«Нуно Юмым палена маныт, но пашашт дене Юмым палыдымыштым ончыктат» (ТИТЛАН 1:16).
Иисус шижтарен: шоя пророк-влак лектыт да христианствыш шоя туныктымашым пуртат. Нуным чын христиан деч ойырен мошташ южгунам куштылго огыл. Вет нуно шкеныштым христианлан шотлат, шке черкыштым христиан черке маныт. Но кузе пален налаш, кӧ чын христиан, а кӧ чын огыл? Чын христиан-влакым койышышт да пашашт гыч палаш лиеш. (Матфейын 7:13—23 лудын лекса.)
3. Чын христиан-влакым кузе пален налаш?
Вич палым ончен лектына.
Чын христиан-влак Библийым Юмын Мутшылан шотлат. Нуно библийысе принцип-влак почеш илаш тыршат. Тидын дене чын религий моло религий деч чот ойыртемалтеш. Вет моло религий еҥ-влакын туныктымашеш негызлалтеш (Матфейын 15:7—9). Чын христиан-влак Библий почеш туныктат да шкештат тидын дене келшышын илат. (Иоаннын 17:17; 2 Тимофейлан 3:16, 17 лудын лекса.)
Христосын чын тунемшыже-влак Юмын Иегова лӱмжым чапландарат. Иисус еҥ-влак дене мутланымыж годым Юмын лӱмжым чӱчкыдын кучылтын. Тыге тудо Ачан лӱмжым чапландарен. Тудо еҥ-влаклан Юмо нерген каласкален да Юмын лӱмжӧ мокталтше манын кумалаш туныктен (Матфейын 6:9). Тендан кундемыштыда Юмын лӱмжӧ нерген кӧ каласкала? (Иоаннын 17:26; Римлян-влаклан 10:13, 14 лудын лекса.)
Чын христиан-влак Юмын Кугыжаныш нерген каласкалат. Юмо Иисусым Кугыжаныш нерген поро уверым каласкалаш колтен. Юмын Кугыжаныш гына айдеме тукымын нелылыкшым кораҥден кертеш. Иисус тидын нерген колымо кечыже марте каласкален (Лукан 4:43; 8:1; 23:42, 43). Тудын почеш кайыше-влак тидымак ышташ тӱҥалыт манын, Иисус каласен. Могай религийын еҥже-влак Юмын Кугыжаныш нерген таныклат? (Матфейын 24:14 лудын лекса.)
Иисусын тунемшыже-влак тиде осал тӱня дене кылым огыт кучо. Нуным тыгай паша дене пален налаш лиеш: нуно политикыш огыт пуро да власть кучышо-влак ваштареш огыт шого (Иоаннын 17:16; 18:36). Ты тӱняште кумдан шарлыше осал паша ден койыш деч кораҥыт, яндарын илаш тыршат. (Иаковын 4:4 лудын лекса.)
Чын христиан-влак икте-весыштым чынжымак йӧратат. Юмын Мутшо нуным тӱрлӧ калык гыч еҥ-влакым йӧраташ туныктен. Шоя религий чӱчкыдын сар-влакым вӱдаш полша да эл ден эл кокласе кучедалмашыш пура, а чын христиан-влак тидым огыт ыште (Михей 4:1—3). Чын христиан-влак, калыклан полшаш да нуным лыпландараш манын, шке жапыштым да мо улмыштым огыт чамане. (Иоаннын 13:34, 35; 1 Иоаннын 4:20 лудын лекса.)
4. Чын религийым кузе пален налаш?
Могай религий Юмын Мутшо почеш туныкта, Юмын лӱмжым чапландара да айдеме тукымын чыла нелылыкшым Юмын Кугыжаныш гына кораҥда манын таныкла? Ӱшаныше-влак кокла гыч кӧ икте-весым чынжымак йӧрата да сар дене кылым огеш кучо? Тендан шонымаште, чыла тидым кӧ ышта? (1 Иоаннын 3:10—12 лудын лекса.)