Изреки

19 Подобро е човек да биде сиромашен и да живее беспрекорно

отколку да биде глупав и да се служи со лаги.

 2 Не е добро човек да нема знаење,

и кој постапува брзоплето,* прави грев.

 3 Глупавоста го води човекот на погрешен пат,

а потоа тој му се лути на Јехова во своето срце.

 4 Богатиот има многу пријатели,

а сиромашниот останува и без својот пријател.

 5 Лажниот сведок нема да си помине без казна,

и оној кој лаже штом ќе отвори уста нема да се извлече.

 6 Многумина се трудат да ја стекнат наклоноста на великодушниот човек,*

и секој му е пријател на оној што дава подароци.

 7 Сиромашниот го мразат сите негови браќа,

а колку повеќе го избегнуваат неговите пријатели!

 9 Лажниот сведок нема да си помине без казна,

и оној кој лаже штом ќе отвори уста, ќе биде уништен.

10 На безумник не му прилега да живее во раскош,

а уште помалку на слуга да владее над кнезови!

11 Оној што има разбирање не се лути лесно;

и му носи чест тоа што преминува преку навредата.*

12 Гневот на царот е како рикање на лав,

а неговата наклоност е како роса по тревата.

13 Глупавиот син му носи неволји на својот татко,

а жена кавгаџика* е како покрив што прокиснува без престан.

14 Куќата и богатството се наследуваат од таткото,

а разборитата жена е дар од Јехова.

15 Мрзливиот човек тоне во длабок сон,

и кој не сака да работи, ќе гладува.

16 Кој ја држи заповедта, си го чува животот,

а кому не му е грижа како постапува, ќе умре.

17 Кој му помага на сиромавиот, му дава заем на Јехова,

и Бог ќе му врати* за тоа што го прави.

18 Дисциплинирај* го своето дете додека има надеж за него,

за да не бидеш одговорен за* неговата смрт.

19 Кој лесно избувнува, ќе си плати за тоа;

ако еднаш го поштедиш, ќе треба да го правиш тоа секогаш одново.

20 Слушај совет и прифати укор*

за да станеш мудар.

21 Многу планови има во срцето на човекот,

но што ќе науми Јехова, тоа и ќе се исполни.

22 Кај човекот се цени неговата верна љубов,

и подобро е да се биде сиромашен отколку лажливец.

23 Стравопочитта кон Јехова води во живот;

кој ја има, спие мирно и не го снаоѓа зло.

24 Мрзливиот ја става раката во чинијата,

но го мрзи да си ја принесе до устата.

25 Удри го потсмевачот за неискусниот да се опамети,

и укори го разумниот за да стекне поголемо знаење.

26 Синот што го малтретира својот татко и ја брка својата мајка

постапува срамно и нечесно.

27 Сине мој, ако престанеш да ги слушаш опомените,*

ќе застраниш од патеката на знаењето.

28 Нечесниот сведок ѝ се потсмева на правдата,

и злобните уживаат во злото.

29 Казната е за потсмевачите,

а ќотекот е за грбот на глупавите.