Захарија

2 Погледнав нагоре и видов човек со мерно јаже во рацете. 2 Го прашав: „Каде одиш?“

А тој ми одговори: „Одам да го измерам Ерусалим за да видам колку е широк и колку е долг“.

3 Тогаш ангелот што зборуваше со мене тргна да си оди, а еден друг ангел му излезе во пресрет 4 и му рече: „Побрзај и кажи му на младиот човек: ’„Ерусалим ќе биде населен со толку многу луѓе и добиток што ќе биде како град без ѕидови. 5 А јас ќе бидам огнен ѕид околу него“, вели Јехова, „и ќе го исполнам со својата слава“‘“.

6 „’Брзо! Брзо! Бегајте од северната земја!‘, вели Јехова.

’Јас ве расеав на сите страни‘,* вели Јехова.

7 Брзо, Сионе! Бегај, ти што живееш кај вавилонската ќерка! 8 Ова го вели Јехова над војските кој, откако се прослави, ме испрати кај народите што ве ограбуваа: ’Кој ве допира вас, ја допира зеницата на моето око. 9 А сега, јас ќе кренам рака на нив, и тие ќе им станат плен на своите сопствени робови‘. И тогаш ќе знаете дека ме испрати Јехова над војските.

10 ’Извикувај радосно, ќерко сионска, бидејќи доаѓам и ќе живеам кај тебе‘, вели Јехова. 11 ’Во тој ден, многу народи ќе застанат на моја страна и ќе станат мој народ, а јас, Јехова, ќе живеам кај тебе.‘ Тогаш ќе знаеш дека Јехова над војските ме испрати кај тебе. 12 Јехова ќе го земе Јуда како свој посед во светата земја и повторно ќе го избере Ерусалим. 13 Нека молчат сите луѓе пред Јехова, бидејќи тој доаѓа од своето свето живеалиште за да ја исполни својата намера.“