Захарија

5 Потоа пак погледнав нагоре и видов свиток што лета. 2 Ангелот ме праша: „Што гледаш?“

А јас одговорив: „Гледам свиток што лета. Долг е 20 лакти,* а широк 10 лакти“.

3 Тогаш тој ми рече: „Тоа е проклетството што доаѓа на целата земја, зашто останаа неказнети сите што крадат, против кои е изречено проклетство на едната страна од свитокот, а останаа неказнети и сите што лажно се заколнуваат, против кои е изречено проклетство на другата страна од свитокот. 4 ’Јас го испратив проклетството‘, вели Јехова над војските, ’и тоа ќе влезе во куќата на крадецот и во куќата на оној што лажно се колне во мое име. И ќе остане во неговата куќа и ќе ја проголта сосе гредите и камењата‘“.

5 Потоа ангелот кој зборуваше со мене ми пријде и ми рече: „Те молам, погледни нагоре и види што е тоа што доаѓа“.

6 А јас прашав: „Што е тоа?“

Тој ми одговори: „Тоа што доаѓа е сад за мерење“.* И додаде: „Такви се злобните по целата земја“. 7 И видов како се подигна тркалезниот оловен капак на садот, а во него седеше една жена. 8 А ангелот рече: „Името на оваа жена е Зло“. Потоа ја турна назад во садот и брзо го спушти тешкиот оловен капак врз отворот.

9 Тогаш погледнав нагоре и видов две жени како доаѓаат лебдејќи на ветрот. Имаа крилја како крилја на штрк. И го кренаа садот кон небото.* 10 А јас го прашав ангелот кој зборуваше со мене: „Каде го носат садот за мерење?“

11 Тој одговори: „Во земјата Сенар,* за да ѝ изградат куќа на жената. Кога куќата ќе биде довршена, ќе ја стават жената таму каде што ѝ е местото“.