Дали сите свештеници веруваат во она за кое поучуваат?

СОПРУГОТ на една жена штотуку умрел. Свештеникот ѝ објаснува дека нејзиниот сопруг не бил ниту доволно добар за да оди директно на небото ниту, пак, толку лош за да биде предаден на пеколниот оган. Затоа, според свештеникот, тој трпи казна сѐ додека не се квалификува за на небото. Таа му плаќа на свештеникот за да кажува молитви со цел нејзиниот сопруг поскоро да биде ослободен од чистилиштето. Вдовицата е задоволна со тоа, мислејќи дека свештеникот ги споделува нејзините искрени верувања.

Што мислиш, дали вдовицата би се разочарала доколку открие дека свештеникот всушност не верува во казна после смртта? Многумина се вознемириле кога дознале дека огромен број свештеници не веруваат во голем дел од она за кое самите поучуваат. Осврнувајќи се на она што го нарекол „подлабок свештенички проблем отколку што е сексот“, National Catholic Reporter навел: „Меѓу свештенството, општо земено, има доста кои престанале да веруваат во постоењето на Бог или во доктрината за награди и казни или, пак, во воскресението . . . свештеничката култура го носи ова неверување како дел од својата атмосфера, нешто како смог“.

И други цркви се соочуваат со слична дилема. Една анкета на викари од Англиканската црква открила дека многумина „не веруваат во основните обележја на традиционалната христијанска вера како, на пример, во раѓањето од девица, Исусовите чуда и второто доаѓање на месијата“, известува Canberra Times од Австралија.

Писателот за религија, Џорџ Р. Плејгенз, во врска со еден министер прашал како можел тој со чиста совест да изрецитира едно верују кога самиот тој не верувал во него. Министерот рекол дека тој едноставно ги заменил уводните зборови на верујуто: „Јас верувам“. Тој рекол: „Го почнав верујуто со зборовите: ‚ТИЕ веруваат во Бог, Семоќниот Татко . . .‘“ Таквото лицемерство Плејгенз го нарекол „најголемата измамничка игра во државата“.

За жал, таквото неверување и неискреност на свештениците, општо земено довело до разочарување на многу луѓе во врска со религијата. Сепак, тоа не е единствениот вознемирувачки аспект на религијата денес. Повеќето посетители на црквите се поучувани дека Библијата е Реч Божја. Дали тие би биле изненадени ако дознаат дека Библијата не учи за некои црковни доктрини кои долго време се прифатени? Следната статија ќе разгледа еден пример за тоа.