Објавителите на Царството известуваат

Убави резултати од стрпливоста и истрајноста

ИСУС Христос претскажал дека во последните денови „љубовта на повеќето ќе олади“. Како резултат на тоа, во многу делови од светот луѓето, општо земено, се апатични кон добрата вест за Царството. Некои дури гледаат со презир на религијата (Матеј 24:12, 14).

Сепак, објавителите на Царството, со вера и стрпливост, успешно се справуваат со тој предизвик, како што покажува и следново искуство од Република Чешка.

Две жени Сведоци разговарале со една госпоѓа преку затворена врата. По некое време вратата се подотворила, се појавила една рака и ги зграпчила списанијата Стражарска кула и Разбудете се! што Сведоците ги нуделе. Еден глас рекол „благодарам“ и вратата се затворила. „Да навратиме ли повторно?“, се прашувале Сведоците. Едната од нив, која била пионер или полновремен министер, одлучила повторно да намине, но се случило истото и тоа продолжило така цела година.

Откако решила да го промени пристапот, сестрата пионерка му се молела на Јехова да ѝ помогне. Следниот пат кога нудела списанија, таа ѝ поставила неколку пријателски прашања на жената: „Како сте? Како ви се допаѓаат списанијата?“ Во почетокот немало одговор, но по неколку посети жената почнала да омекнува. Еднаш ширум ја отворила вратата но разговорот бил краток.

Со оглед на тоа што жената не сакала многу да разговара на врата, сестрата пионерка решила да ѝ напише писмо за да ѝ објасни зошто ја посетува и да ѝ понуди домашна библиска студија. На крај, по година и пол стрплив напор, пионерката успеала да воспостави библиска студија со жената. Била изненадена, но и охрабрена кога жената ѝ рекла: „Јас верувам во Бог уште од кога почна да ми носиш списанија“.

Навистина, стрпливоста и истрајноста можат да донесат наградувачки резултати во објавувањето на Царството и во делото на правење ученици (Матеј 28:19, 20).