Христијанското однесување на училиште

¹ Ако си христијански младинец кој сѐ уште оди на училиште, потребна ти е силна вера за да ја зачуваш својата беспрекорност. Изложен си на лошо друштво и на ситуации кои можат да ти ја испитаат верата. Важно е да го применуваш Петровиот совет ‚да се однесуваш примерно меѓу народите, за да го прославиш Бог . . . заради твоите извонредни дела за кои тие се сведоци‘ (1. Петр. 2:12, НС). Потребна ти е храброст и решеност за да се соочиш со овој предизвик.

² Во или надвор од училиштето, бомбардиран си со заразните влијанија за предбрачен секс, срамотен говор, тутун и злоупотреба на дрога. Секој ден се соочуваш со искушенија кои се закануваат да ти го расипат угледот на особа која добро се однесува. Исто како возрасните, и ти мораш ‚да се бориш за вистинската вера‘ ако сакаш да ги поднесеш таквите искушенија (Јуда 3; види Стражарска кула од 15 јули 1991, стр. 23-26).

³ На училиште има патриотски церемонии и световни празници. Дали знаеш кои национални и религиозни празници се слават во твоето училиште? Ако дојде до предизвикувачка ситуација, можеш ли ‚да имаш добра совест, та со тоа . . . да се посрамат тие што те кудат поради твојот добар живот‘? (1. Петр. 3:16).

⁴ Можеби ќе бидеш искушан од примамливоста на училишните спортски активности или од воншколските активности. Мораш да бидеш буден за да препознаеш како можат овие навидум угодни активности да ја компромитираат твојата вера. Потребно е да избереш другари со кои ќе можеш да ‚разменуваш охрабрувања‘, при што секој од вас ќе биде изграден преку верата на другиот (Рим. 1:12, НС).

⁵ Со Јеховина помош, можеш да истраеш: Сатана постојано ја испитува твојата вера. Искушенијата кои мораш да ги поднесеш можат да бидат тешки, но наградите што следат ги прават достојни за труд (1. Петр. 1:6, 7). Не можеш успешно да истраеш ти самиот; мораш да бараш помош од Јехова. Исус ги поттикнувал своите ученици: „Бидете будни и молете се, за да не паднете во искушение“ (Мат. 26:41). За тоа се неопходни дисциплината и самосовладувањето (1. Кор. 9:27).

⁶ Секогаш мисли на тоа дека си одговорен пред Јехова за своето однесување (Проп. 11:9). Дури и ако другите можеби не го посматраат она што го правиш, Јехова е свесен за тоа и Тој ќе донесе суд (Евр. 4:13). Искрената желба да му угодиме треба да нѐ поттикне ‚со страв и трепет да го градиме нашето спасение‘ (Фил. 2:12). Секојдневното читање на Божјата Реч е голема помош. Таа е полна со извонредни совети и со прекрасни примери за имитирање (Евр. 12:1-3).

⁷ Родители, вие играте важна улога. Вие треба да ги надгледувате вашите деца, да бидат свесни за проблемите со кои тие се соочуваат и да им помогнете кога е потребно. Дали имате добар однос со своите деца? Дали сте им всадиле разбирање и ценење за Божјите закони и начела? Кога се соочени со притисоци или искушенија, дали вашите деца се цврсти или, пак, лесно се предаваат? Дали се обесхрабруваат затоа што мора да се разликуваат од своите врсници? Како родители, вам ви припаѓа одговорноста да им помогнете (5. Мој. 6:6, 7). Ако добро го вршите својот дел, можете да им помогнете да станат победници во борбата за верата (Изр. 22:6).