Организирани „пристојно и уредно“

¹ За да биде успешен еден обласен конгрес, мора да се здружат многу напори. Конгресната управа прави подготовка за соодветно место за состанување, како и за сместување. Поединците и семејствата прават планови за своето патување и сместување. А собранијата ги координираат напорите на доброволците за да ги снабдат со персонал многуте оддели што се потребни за да функционира конгресот. Целта е ‚сѐ да се случува пристојно и уредно‘ (1. Кор. 14:40).

² Додека ги координираш своите напори со напорите на конгресната организација, имај на ум дека за подготовките се потребни месеци — а понекогаш и години. Стотици браќа трошат многу време за да направат подготовки за сѐ. Тоа вклучува изнајмување објекти, наоѓање опрема и ангажирање работници. Од ваквата однапред направена подготовка произлегуваат духовни благослови за сите. Што можеме да направиме ние за да помогнеме?

³ Соработувај со подготовките за сместување: Од пресудна важност е сите да соработуваме со конгресните подготовки. Ова е особено неопходно кога правиме подготовки за нашето сместување. Ова важи за оние од нас кои бараат сместување во конгресниот град, како и за оние кои нудат сместување за браќата и сестрите што ќе дојдат. Мора со љубов да размислуваме за потребите на другите и ‚да гледаме со личен интерес не само на сопствените работи туку со личен интерес и на туѓите‘ (Фил. 2:4).

⁴ Со тоа што тесно ќе се придржуваме за упатствата од Заедницата во овој поглед ќе се избегнат непотребни проблеми кога ќе започне конгресот. На пример, ако сме се пријавиле дека можеме да сместиме гости, тогаш не треба во меѓувреме да правиме приватни договори бидејќи конгресната организација ќе смета на местата што стојат на располагање. Колку само е подобро да си стоиме на зборот, при што нашето ‚Да ќе значи да‘! (Мат. 5:37).

⁵ Исто така, ако бараме сместување, нашето барање треба да го доставиме до конгресната организација доволно рано за браќата да знаат однапред колку соби се потребни за да се сместат гостувачките делегати. Би покажал љубов ако ја известиш конгресната организација доколку си направил други договори и повеќе не ти е потребно сместување. На овој начин, местото што било резервирано за тебе ќе може да се отстапи некому кому му е потребно.

⁶ Би сакале уште еднаш да нагласиме дека нашите манири и однесување како гости во домот на нашите браќа се од пресудна важност за да се унапредува духот на љубов и единство за време на конгресот. На пример, не треба да ги земаме здраво за готово сите оброци што ќе ни ги подготват нашите домаќини. Не треба ниту да мислиме дека имаме слобода да останеме уште некој ден откако ќе заврши конгресот, освен ако не сме се договориле со домаќините. Ако имаме деца, родителите имаат одговорност да се погрижат тие да се однесуваат како што треба за време на престојот и да не им дозволуваат да си шетаат низ домот, да користат предмети што не се нивни и да пречат. Сите треба да настојуваат да се однесуваат со достоинство и почит што би се очекувале од сите обожаватели на Јехова.

⁷ Како слуги на Јехова Бог, имаме прилика да ја одразуваме неговата личност во сѐ што правиме. Ова вклучува да правиме подготовки и да присуствуваме на конгресите, каде што е вклучено Божјето име. Запомни, тој „не е Бог на неред, туку на мир“ (1. Кор. 14:33). Затоа, да бидеме одлучни сите што нѐ гледаат да ја увидат оваа Јеховина особина од она што го гледаат во нас — нашето однесување и постапување додека правиме планови и присуствуваме на Обласниот конгрес „Учители на Божјата реч“. Набљудувачите со искрени срца нека сфатат дека Јеховините собрани мноштва се организирани „пристојно и уредно“ (Псал. 68:26).