Што навистина ни е потребно за да бидеме среќни

ЈЕХОВА, „среќниот Бог“, и Исус Христос, „среќниот и единствен Моќник“, знаат подобро од сите што ни е потребно за да бидеме среќни (1. Тимотеј 1:11; 6:15). Затоа, не нѐ изненадува тоа што клучот за среќата лежи во Божјата реч, Библијата (Откровение 1:3; 22:7).

Во својата позната Проповед на гората, Исус кажува што ни е потребно за да бидеме среќни. Тој вели: „Среќни се оние“ 1) кои се свесни за своите духовни потреби, 2) кои тагуваат, 3) кои се со благ нарав, 4) кои гладуваат и жедуваат за праведност, 5) кои се милосрдни, 6) кои се со чисто срце, 7) кои се мирољубиви, 8) кои се прогонувани поради праведност, и 9) кои се укорувани и прогонувани поради него (Матеј 5:3—11).a

Дали изјавите на Исус се точни?

Потребно е малку да се дообјасни вистинитоста на некои од изјавите на Исус. Кој може да тврди дека оној што е со благ нарав, милосрден и мирољубив и што е мотивиран од чисто срце не е посреќен од оној што е гневен, воинствен и немилосрден?

Меѓутоа, можеби се прашуваме како може да се наречат среќни луѓето што гладуваат и жедуваат за праведност или кои тагуваат. Таквите лица имаат реалистично гледиште за условите во светот. Тие „тажат и плачат заради гнасностите што се прават“ денес (Езекиел 9:4). Тоа само по себе не ги прави среќни. Сепак, кога ќе дознаат дека Бог има намера да воспостави праведни услови на земјата и да им даде правда на угнетените, нивната радост нема граници (Исаија 11:4).

Љубовта кон праведноста исто така ги тера поединците да тагуваат поради тоа што и самите често пропуштаат да го прават она што е исправно. Поради тоа тие се свесни за своите духовни потреби. Тие луѓе се спремни да бараат водство од Бог бидејќи сфаќаат дека само тој може да им помогне да ги совладаат своите слабости (Пословици 16:3, 9; 20:24).

Луѓето што тагуваат, што гладуваат и жедуваат за праведност и што се свесни за своите духовни потреби знаат колку е важно да се има добар однос со Творецот. Добрите односи со луѓето можат да придонесат за среќа, но уште повеќе може да придонесе добриот однос со Бог. Да, оние кои навистина сериозно размислуваат и го сакаат она што е исправно, кои се спремни да го прифатат Божјето водство, навистина можат да се наречат среќни.

Но, можеби ти е тешко да веруваш дека некој што е прогонуван и укоруван може да биде среќен. Сепак, ова мора да е точно бидејќи самиот Исус го кажал. Тогаш како треба да се сфатат неговите зборови?

Прогонувани а среќни — како е можно тоа?

Забележи дека Исус не рекол дека укорувањето и прогонувањето сами по себе ќе водат до среќа. Тој јасно изјавил: „Среќни се оние кои се прогонувани поради праведност . . . кога поради мене ве укоруваат, и прогонуваат“ (Матеј 5:10, 11). Значи, човек ќе биде среќен само ако поднесува укор затоа што е следбеник на Христос и затоа што својот живот го обликува според праведните начела за кои поучувал Исус.

Како пример за ова може да ни послужи она што им се случило на раните христијани. Некои членови на Синедрионот, еврејскиот врховен суд, ‚ги викнале апостолите, ги истепале и им наредиле да престанат да зборуваат на темел на Исусовото име и ги пуштиле‘. Како реагирале апостолите? „Тие, пак, си заминаа од Синедрионот, радувајќи се што беа сметани за достојни да бидат посрамени поради неговото име. И секој ден во храмот и од куќа до куќа продолжија без престан да поучуваат и да ја објавуваат добрата вест за Христос, Исус“ (Дела 5:40—42; 13:50—52).

Апостол Петар ја појаснил врската помеѓу укорувањето и среќата. Тој напишал: „Ако ве прекоруваат поради Христовото име, среќни сте, бидејќи духот на славата, да, духот Божји, почива врз вас“ (1. Петрово 4:14). Да, кога страдаме како христијани затоа што го правиме она што е исправно, иако таквото страдање не е пријатно, тоа ни носи среќа бидејќи знаеме дека така се добива Божјиот свет дух. Каква врска постои помеѓу Божјиот дух и среќата?

Дела на телото или плодови на духот?

Божјиот свет дух го добиваат само оние што му се послушни на Бог како на владетел (Дела 5:32). Јехова не им го дава својот дух на оние што ги вршат „делата на телото“. Тие дела се „блуд, нечистота, распуштено однесување, идолопоклонство, вршење спиритизам, непријателства, кавги, љубомора, изливи на гнев, препирки, поделби, секти, зависти, пијанки, лумпувања и слично“ (Галатите 5:19—21). Точно, во денешниот свет „делата на телото“ можат да се видат на секој чекор. Сепак, оние што ги вршат немаат вистинска и трајна среќа. Напротив, кога ги прават тие работи, си го уништуваат добриот однос со роднините, со пријателите и со познаниците. Освен тоа, Божјата реч вели дека оние што „практикуваат такви работи нема да го наследат Божјето царство“.

За разлика од нив, Бог им го дава својот дух на оние што ги негуваат „плодовите на духот“. Особините од кои се состојат овие плодови се „љубов, радост, мир, долготрпеливост, љубезност, доброта, вера, благост, самосовладување“ (Галатите 5:22, 23). Кога ги покажуваме овие особини, градиме мирољубиви односи со другите и со Бог, и во тоа лежи вистинската среќа. (Види ја рамката.) Што е уште поважно, со тоа што покажуваме љубов, љубезност, доброта и други божествени особини, ние му угодуваме на Јехова и ја имаме среќната надеж за вечен живот во Божјиот нов свет на праведност.

Среќата е работа на избор

Кога Волфганг и Бригите, брачна двојка од Германија, почнале сериозно да ја проучуваат Библијата, поседувале многу материјални работи што луѓето мислат дека се потребни за среќа. Биле млади и здрави. Носеле скапа облека, живееле во прекрасно уреден дом и се занимавале со успешен бизнис. Поголемиот дел од времето го трошеле за да стекнат уште повеќе материјални работи, но тоа не им донело вистинска среќа. Но, по некое време, Волфганг и Бригите донеле пресудна одлука. Тие почнале да вложуваат повеќе време и труд на духовните вредности и барале начин за да се зближат уште повеќе со Јехова. Нивната одлука наскоро предизвикала промена и на нивниот став. Оваа промена, пак, ги поттикнала да го поедностават својот живот и да служат како пионери, или полновремени евангелизатори на Царството. Денес тие служат како доброволци во канцеларијата на подружницата на Јеховините сведоци во Германија. Освен тоа, учат и еден азиски јазик за да им помогнат на странците да ги дознаат вистините од Божјата реч, Библијата.

Дали оваа двојка нашла вистинска среќа? Волфганг вели: „Откако повеќе се посветивме на духовните работи, се чувствуваме посреќни и позадоволни. Тоа што од срце му служиме на Јехова ни помогна и да си го зацврстиме бракот. Имавме среќен брак и порано, но имавме и обврски и интереси што нѐ влечеа на различни страни. Сега обединето работиме на иста цел“.

Што ни е потребно за да бидеме среќни?

Со два збора: Немој да ги вршиш „делата на телото“ и негувај ги „плодовите на [Божјиот] дух“. За да бидеме среќни, треба да копнееме да имаме добар однос со Бог. Оној што се настојува да го постигне ова ќе одговара на описот на среќен човек што го дал Исус.

Затоа, немој погрешно да заклучиш дека среќата ти е надвор од дофат. Точно, можеби во моментов не си со добро здравје или можеби дури имаш и проблеми во бракот. Можеби веќе не можеш да имаш деца или, пак, се бориш да изградиш успешна кариера. Можеби паричникот не ти е толку полн со пари како порано. Сепак, не се обесхрабрувај, нема причина за очај! Владата на Божјето Царство ќе ги реши и овие и стотици други проблеми. Навистина, наскоро Јехова Бог ќе го исполни ветувањето кое го запишал псалмистот: „Твоето царство е вечно Царство . . . Ти ја отвораш Твојата рака, и ја наситуваш желбата на сѐ живо“ (Псалм 145:13, 16). Како што можат да потврдат милиони слуги на Јехова ширум светот, тоа што ќе го задржиш на ум ова охрабрувачко ветување од Јехова многу ќе придонесе за да бидеш среќен уште денес (Откровение 21:3).

[Фуснота]

[Рамка/слика на страница 6]

Фактори што придонесуваат за среќа

Љубовта ги мотивира другите за возврат да те сакаат тебе.

Радоста ти дава сила за да се справиш со предизвиците.

Мирот ти помага да немаш неслоги со другите.

Љубезноста ги привлекува другите кон тебе.

Добротата што ја покажуваш ги тера другите да ти помогнат кога ќе имаш потреба.

Верата ќе те увери дека Бог ти дава водство полно со љубов.

Благоста ти дава спокојство во срцето, во мислите и во телото.

Самосовладувањето значи дека ќе правиш помалку грешки.

[Слики на страница 7]

За да бидеш среќен, треба да си ги задоволиш духовните потреби