Гилеад испраќа мисионери „до најоддалечениот дел на земјата“

ВЕЌЕ над половина век, Библиската школа Гилеад на Watchtower испраќа мисионери. На 11 септември 1999 дипломираше 107-от клас на Гилеад. Тој се состоеше од 48 студенти од 11 земји, кои беа доделени да служат во 24 земји. Тие ќе им се придружат на илјадниците други мисионери кои играат важна улога во исполнувањето на последните зборови кои ги кажал Исус пред да се вознесе на небото. Тој претскажал дека неговите ученици ќе ‚[Му] бидат сведоци . . . до најоддалечениот дел на земјата‘ (Дела 1:8, NW).

Програмата на промоцијата, која се одржа во Образовниот центар Watchtower во Патерсон (Њујорк), беше една величествена прилика во прекрасната околина. Дипломците беа многу среќни што меѓу присутните беа нивните роднини, блиски пријатели и гости. Заедно со оние кои слушаа и следеа преку аудио и видео врски во комплексите на Бруклин и Волкил, вкупниот број на присутни изнесуваше 4.992.

Верно служи му на Јехова и на ближниот

„Кој е на Јеховината страна?“ Тоа беше темата во уводните забелешки на Кери Барбер, член на Водечкото тело и претседавач на програмата за промоцијата. Тој објасни дека ова било спорно прашање со кое се соочиле Израелците во времето на Мојсеј. Дипломците и присутните беа потсетени дека многу Израелци го изгубиле животот во пустината бидејќи не останале лојално на Јеховината страна. Откако паднале како жртви на идолопоклонство, тие ‚испоседнале, па јаделе и пиеле. А потоа, станале да играат‘ (2. Мојсеева 32:1—29). Исус ги предупредил христијаните на истата опасност: „Само пазете се: вашите срца да не бидат оптоварени со прејадување и пијанство, и грижа за овој свет, за да не ве затече оној ден ненадејно“ (Лука 21:34—36).

Следниот говорник, Џин Смоли, од Одделот за пишување, ги праша дипломците: „Дали ќе се покажеш како парегорик (средство за ублажување на болки)?“ Тој објасни дека грчкиот збор парегорија е усвоен како име за една медицинска смеса која ја ублажува непријатноста. Меѓутоа, апостол Павле го употребил овој експресивен грчки збор во Колосјаните 4:11 за да ги опише своите соработници. Во преводот Нов свет овој збор е преведен како „зајакнувачка помош“.

На своите доделби дипломците можат да бидат современи парегорици на еден многу практичен начин со тоа што понизно ќе им бидат зајакнувачка помош на локалните браќа и сестри и со тоа што ќе одразуваат дух на соработка и љубов во дружењето со останатите мисионери.

Потоа зборуваше Даниел Сидлик, член на Водечкото тело, на тема „Да се живее според златното правило“. Тој објасни дека возвишеното начело кое го изложил Исус во Матеј 7:12, „сѐ она што сакате да ви прават луѓето, правете им го и вие“, вклучува да правиме позитивни работи за другите, а не само да се воздржуваме да им нанесеме штета.

За да се прави тоа успешно, потребни се три работи: око кое гледа, срце кое има сожалување и рака која помага. Резимирајќи го сето тоа, тој рече: „Ако чувствуваме желба да помогнеме, треба веднаш да помогнеме. Мораме многу да се трудиме да го правиме за другите она што сакаме тие да го прават за нас“. Ова особено ќе биде случај со мисионерите кои одат во други земји за да им помагаат на луѓето да го практикуваат вистинското христијанство.

Инструкторите даваат срдечни потсетувања

Инструкторот на Гилеад, Карл Адамс, ги охрабри дипломците — „Продолжете да растете“. Во кој поглед? Прво, во спознанието и во способноста добро да го користат. На Гилеад, студентите научија како да истражуваат за да ја дознаат заднината и амбиентот на библиските извештаи. Беа охрабрени да размислуваат како секој извештај треба да влијае врз нивниот живот. Беа поттикнати да продолжат да го прават тоа.

„Второ, продолжете да растете во љубовта. Љубовта е нешто кое, кога се негува — расте. Кога се занемарува, може да умре“, рече брат Адамс (Филипјаните 1:9). Сега, како мисионери, тие треба да растат во љубовта под поинакви околности. И трето, „Продолжете да растете во незаслужената љубезност и во спознанието за нашиот Господ и Спасител Исус Христос“ (2. Петрово 3:18, NW). „Ова е чудесната љубезност која Јехова ја покажал преку својот Син“, рече говорникот. „Како што расте нашето ценење за таа незаслужена љубезност така ќе расте и нашето задоволство во вршењето на Божјата волја и во извршувањето на она што тој ни го доделил.“

Еден друг инструктор на Гилеад, Марк Нојмар, зборуваше на тема „Прифаќај со љубов, и ќе можеш да истраеш“. Тој опомена: „Научете да ги прифаќате предизвикувачките ситуации во мисионерскиот живот со љубов, и ќе можете да истраете. Јехова им дава стега само на оние кои ги сака. Дури и ако мислите дека некој совет е непромислен, ситничарски или неправеден, љубовта кон Јехова и вашиот однос со него ќе ви помогне да го прифатите“.

Брат Нојмар истакна дека мисионерската служба вклучува многу должности. „Но, должноста без љубов ќе те направи незадоволен. Без љубов, твоите домашни должности — како што е готвење, пазарување, чистење овошје, греење вода — можат да ти станат многу здодевни. Мораш да застанеш и да се прашаш: ‚Зошто го правам сево ова?‘ Па, ако си речеш: ‚Моите напори придонесуваат за здравјето и среќата за останатите мисионери,‘ тогаш нема да ти биде тешко да истраеш.“ Во резимето тој поттикна: „Без разлика дали се работи за прифаќање стега, за исполнување на твоите мисионерски обврски или за справување со недоразбирањата, ако ги прифаќаш со љубов тоа ќе ти овозможи да истраеш на твојата доделба. ‚Љубовта никогаш не престанува‘“ (1. Коринтјаните 13:8).

Потоа инструкторот на Гилеад, Валас Ливеранс, претседаваше на повторното одигрување на неколку возбудливи искуства кои ги доживеале студентите додека работеле во локалните собранија. Освен што оделе од куќа до куќа, тие ја употребиле својата мисионерска обука барајќи ги луѓето на постојките за камиони, во јавните пералници, на железничките станици и на други места.

Искусните мисионери гарантираат

Кога новите мисионери одат во една странска земја, дали има потреба за тегобна загриженост? Дали можат да ги задоволат предизвиците на странската доделба? Што прават канцелариите на подружниците за да им помогнат на овие новодојденци да бидат успешни? За да одговори на овие и на други прашања, Стивен Лет од Службениот оддел, и Дејвид Сплејн од Одделот за пишување, интервјуираа некои браќа кои токму тогаш ја посетуваа школата на подружницата во Образовниот центар Watchtower. Браќата кои беа интервјуирани служат во одборите на подружниците во Шпанија, Хонгконг, Либерија, Бенин, Мадагаскар, Бразил и Јапонија.

Овие искусни Јеховини слуги, од кои многумина со децении служеле како мисионери, ги охрабрија дипломците, како и присутните родители и роднини. На темел на своето лично искуство и искуството на другите мисионери, тие покажаа дека е можно успешно да се справат со проблемите и грижите. Може да се соочат со голем проблем, „но, тој може да се реши, и Заедницата ни помага во тоа“, коментираше Римо Квоканен, мисионер на Мадагаскар. „Ние не ја избравме доделбата, ние ја добивме“, рече Астен Густавсон кој сега служи во Бразил. „Затоа решивме да сториме сѐ што можеме за да останеме на неа.“ Џејмс Линтон, кој служи во Јапонија, рече дека нему му помогнало „присуството на браќата кои веќе служеле на мисионерската доделба“. Мисионерската служба е среќен и задоволувачки начин да му се служи на Јехова и да се води грижа за неговите овци.

Да се избегне чумата која ја уништува духовноста

Теодор Џерес, член на Водечкото тело, и самиот дипломец на седмиот клас на Гилеад во 1946, го изнесе заклучниот говор на тема: „Предизвикот да се остане духовно жив“. Најпрвин спомнувајќи дека во различни делови на светот се случуваат ужасни свирепости, тој истакна дека човештвото, всушност, го погодуваат уште потешки несреќи.

Укажувајќи на Псалм 90, брат Џерес ги идентификува ‚заразата‘ и ‚опустошувањето‘ кои духовно разболеле и убиле милиони луѓе околу нас. Ѓаволот и неговиот злобен систем употребуваат пропаганда слична на зараза, темелена на интелектуализмот и материјализмот, за да ја ослабне и убие духовноста, но Јехова нѐ уверува дека оваа чума нема да се приближи до оној „кој живее под закрилата на Севишниот“ (Псалм 90:1—7).

„Предизвик е“, рече брат Џерес, „да се остане здрав во верата, да се остане на безбедно место. Ние не можеме да бидеме како исмејувачите ‚кои немаат духовност‘. Но, денес ова е проблем. Тоа е проблем со кој се соочуваме сите кои сме во организацијата. Со него можеш да се соочиш и ти на својата мисионерска доделба“ (Јуда 18, 19, NW). Но, на дипломците им беше речено дека можат успешно да ја задржат духовноста на своите доделби. Беа поттикнати да размислуваат, на пример, за тоа како истрајуваат нашите браќа во Русија, во Азија и во африканските земји — и покрај забрани, силно противење, исмејување, атеистичка пропаганда и лажни обвиненија. А, во многу случаи, тука се и физичките проблеми, предизвикани од етничките конфликти и недостигот на основните потреби за живот.

Онаму каде што има опаѓање на духовноста, „потребно е да обрнеш внимание на причината за проблемот и потоа да работиш на него, користејќи го советот од Божјата реч“. Беа дадени библиски примери. Исус Навин бил охрабрен да го чита својот примерок од Законот со придушен глас секој ден (Исус Навин 1:8). Кога во времето на Јосија била најдена книгата на Законот, Јехова ја благословил верната примена на неговите упатства (4. Царства 23:2, 3). Тимотеј ги знаел светите списи уште од бебе (2. Тимотеј 3:14, 15). Беријците биле повеќе отколку само добри слушатели; тие биле сметани за ‚благородни‘ бидејќи секојдневно го испитувале Писмото (Дела 17:10, 11). А Исус Христос е најистакнат пример на лице кое ја знаело и ја користело Божјата реч (Матеј 4:1—11).

На крајот, брат Џерес срдечно ги опомена новите мисионери: „Сега сте подготвени да ја извршувате својата мисионерска доделба. И ќе отидете во странство, во најдословна смисла, до најоддалечениот дел на земјата. Ако се соочиме со предизвикот да останеме духовно живи, тогаш нема да дозволиме што и да било да нѐ одврати од извршувањето на она што сме решиле да го направиме. Вие ќе проповедате со ревност, ќе ги инспирирате другите да ја имитираат вашата вера, а ние ќе се молиме заедно со вас Јехова да ги оживее оние кои ги поучувате, како што нѐ оживеал и нас. И на тој начин уште многу лица ќе ја избегнат духовната несреќа што сега беснее ширум светот. Тие ќе ни се придружуваат во сѐ поголем број за да ја вршиме Јеховината волја. И нека Јехова ве благослови за таа цел“.

Откако претседавачот ги прочита поздравите од различни земји ширум светот, дојде време да им се врачат дипломите на студентите. Потоа следеше читањето на едно срдечно писмо на ценење кое го составиле студентите. Колку само му беа благодарни на Јехова и на неговата организација за специјалната обука што ја добија и за своите доделби како мисионери одејќи „до најоддалечениот дел на земјата“! (Дела 1:8, NW).

[Рамка на страница 29]

Податоци за класот

Број на застапени земји: 11

Број на земји во кои се доделени: 24

Број на студенти: 48

Број на брачни двојки: 24

Просечна старост: 34

Просек на години во вистината: 17

Просек на години во полновремена служба: 12

[Слика на страница 26]

107-от клас кој дипломираше на Библиската школа Гилеад на Watchtower

На долнава листа, редовите се нумерирани однапред наназад, а имињата се наведени одлево надесно во секој ред.

1. Пералта, К.; Холенбек, Б.; Ша, Р.; Хасан, Н.; Мартин, Д.; Хатчинсон, А. 2. Едвардс, Л.; Визер, Т.; Серути, К.; Енцмингер, Џ.; Далоиз, Л.; Белери, Л. 3. Најт, П.; Крауз, А.; Кезуски, Д.; Роуз, М.; Фридл, К.; Најто, Р. 4. Роуз, Е.; Беказ, Т.; Тели, С.; Умбер, Д.; Бернхард, А.; Пералта, М. 5. Далоиз, А.; Умбер, Д.; Дан, Х.; Гетлин, Г.; Ша, Џ.; Серути, М. 6. Белери, С.; Крауз, Ј.; Холенбек, Т.; Мартин, М.; Бернхард, Џ.; Хатчинсон, М. 7. Беказ, А.; Дан, О.; Гетлин, Т.; Визер, Р.; Најт, П.; Хасан, О. 8. Најто, Ц.; Тели, М.; Фридл, Д.; Кезуски, А.; Едвардс, Џ.; Енцмингер, М.