Ја користиш ли секоја можност за да ги предупредиш другите?

Многу луѓе се воодушевени кога го гледаат немиот филм со наслов A Trip Down Market Street, во кој е прикажано каков бил животот во Сан Франциско (САД), во почетокот на 20 век. Снимателите поставиле рачна камера на предниот дел од еден трамвај и ја насочиле кон прометната улица по која се движел. На филмот се гледаат запрежни коли и автомобили од тогашно време, како и разнесувачи на весници и луѓе што пазаруваат.

Овој филм најверојатно бил снимен во април 1906 год., кратко пред разорниот земјотрес кој се случил на 18 април, како и големиот пожар кој избувнал веднаш потоа. Во оваа трагедија загинале илјадници луѓе, а тој дел од градот речиси бил опустошен. Жално е што некои од луѓето кои се гледаат на филмот биле живи уште само неколку дена. Скот Мајлс, потомок на еден од снимателите, вели: „Ги гледам тие луѓе кои воопшто не знаат што ги чека. Како може на човек да не му биде жал за нив?“

Она што се случило тогаш нѐ тера сериозно да се замислиме. И нам ни е многу жал за луѓето денес. Тие си ги вршат секојдневните обврски и воопшто не се свесни каква неволја ни претстои. Наскоро овој злобен свет ќе биде уништен, и со тоа засекогаш ќе му биде ставен крај на денешниот начин на живот. За разлика од еден земјотрес, кој не може да се предвиди, ние имаме кратко време за да ги предупредиме другите дека наскоро ќе започне Јеховиниот ден на суд. Веројатно одвојуваш време секоја седмица за да проповедаш од врата до врата. Но, дали ја користиш секоја можност за да ги предупредиш луѓето?

Исус ни оставил многу добар пример. Тој бил спремен да им проповеда на сите што ги среќавал. На пример, му сведочел на еден даночник на кој наишол по патот, но и на една жена која ја сретнал додека се одморал покрај еден бунар (Лука 19:1-5; Јован 4:5-10, 21-24). Тој спремно го жртвувал дури и времето што го одвоил за одмор само за да ги поучува другите. Од сочувство кон луѓето, Исус давал сѐ од себе за да им ја пренесе вистината (Мар. 6:30-34). Како Божјите слуги денес го следат неговиот пример?

Мелика живее во зграда со високо обезбедување. Многу од нејзините соседи се студенти од странство. Нивните телефонски броеви ги нема во ниту еден именик, а нивните имиња не се внесени во списокот на портирницата. Затоа, таа ја користи секоја прилика да им сведочи кога ќе ги сретне во ходникот или во лифтот. Мелика вели: „На некој начин, тоа е мое подрачје“. Таа носи со себе публикации на неколку јазици, и многу од станарите земаат трактати и списанија. Исто така, им ја кажува и нашата интернет-страница, jw.org. Мелика успеала да започне неколку библиски студии.

И Соња се труди да ја користи секоја можност да проповеда. Таа работи во лекарска ординација, и си поставила за цел темелно да им сведочи на сите колеги. Прво се обидува да дознае што ги интересира и какви проблеми имаат. Потоа, за време на паузите за ручек, се труди да поразговара за Библијата со секого од нив посебно. На тој начин, започнала две библиски студии. Соња има намера да користи некои од паузите за да им сведочи на пациентите додека чекаат за преглед.

Еден човек кој го преживеал земјотресот во 1906 год., рекол дека тоа било најголемата катастрофа што му се случила на некој град или држава. Но, ниту една катастрофа не може ни оддалеку да се спореди со претстојниот ден во кој Бог ќе изврши одмазда над „оние што не го познаваат“ (2. Сол. 1:8). Јехова навистина сака луѓето да направат промени во умот и во срцето, и да обрнат внимание на предупредувањето што им го даваат неговите Сведоци (2. Пет. 3:9, фус.; Отк. 14:6, 7).

Ти имаш чест да им помогнеш на луѓето да сфатат дека живееме во многу значајно време. Тие треба да ги остават своите себични цели и да почнат да го бараат Јехова (Соф. 2:2, 3). Затоа, многу е важно да ја користиш секоја можност да им проповедаш на своите колеги, соседи и на луѓето што ги сретнуваш секој ден. Ќе го сториш ли тоа?