കുറ്റകൃ​ത്യ​വി​മു​ക്ത​മായ രാജ്യം എവിടെ?

വർഷങ്ങളായി മോസ്‌ക്കോ​യിൽ നടന്നി​ട്ടു​ള്ള​തി​ലേ​ക്കും ഏറ്റവും വലിയ ശവസം​സ്‌കാ​ര​മാ​യി​രു​ന്നു അദ്ദേഹ​ത്തി​ന്റേത്‌. 1995 മാർച്ച്‌ 1-ന്‌ അവിചാ​രി​ത​മാ​യി കൊല​യാ​ളി​യു​ടെ വെടി​യു​ണ്ട​ക​ളേറ്റു ജീവൻ വെടിഞ്ഞ ആ റഷ്യൻ യുവാ​വിന്‌ അന്തി​മോ​പ​ചാ​രം അർപ്പി​ക്കാൻ വീഥി​ക​ളിൽ ആയിരങ്ങൾ അണിനി​രന്നു. ഏതാണ്ട്‌ തന്റെ വാതിൽപ്പ​ടി​ക്കൽ തന്നെ വെടി​യേ​റ്റു​മ​രിച്ച, 1994-ലെ ഏറ്റവും പ്രഗത്‌ഭ​നായ പത്ര​പ്ര​വർത്തകൻ എന്ന ബഹുമതി കരസ്ഥമാ​ക്കിയ വ്‌ളഡ്‌യി​സ്ലാഫ്‌ ലിസ്റ്റ്‌യെഫ്‌, കൂടെ​ക്കൂ​ടെ ടിവി-യിൽ സ്ഥാനം പിടിച്ച ഒരു പ്രഖ്യാ​ത​നാ​യി​രു​ന്നു.

അതിനു​ശേഷം, മൂന്ന്‌ ആഴ്‌ച പിന്നി​ട്ടില്ല, മാർച്ച്‌ 20-ന്‌ ടോക്കി​യോ​യി​ലെ ഭൂഗർഭ റെയിൽപാ​ത​യിൽ അതിരാ​വി​ലെ ഗതാഗ​ത​ത്തി​ര​ക്കുള്ള സമയത്ത്‌, ഒരു വിഷവാ​തക ആക്രമണം ഉണ്ടായി. ഒട്ടേ​റെ​പേർ മരണമ​ടഞ്ഞു; നിരവ​ധി​പേർക്കു ഗുരു​ത​ര​മാ​യി പരി​ക്കേറ്റു.

പിന്നീട്‌, ഏപ്രിൽ 19-ന്‌, ഒക്‌ലാ​ഹോമ നഗരം, ലോക​മെ​മ്പാ​ടു​മുള്ള ടെലി​വി​ഷൻ നിരീ​ക്ഷ​ക​രു​ടെ ശ്രദ്ധാ​കേ​ന്ദ്ര​മാ​യി മാറി. ബോംബ്‌ വെച്ചു തകർക്ക​പ്പെട്ട ഒരു കേന്ദ്ര​ഗ​വൺമെൻറു കെട്ടി​ട​ത്തി​ന്റെ അവശി​ഷ്ട​ങ്ങൾക്കി​ട​യിൽനി​ന്നു രക്ഷാ​പ്ര​വർത്തകർ ചിന്നി​ച്ചി​ത​റിയ ശരീരങ്ങൾ വലി​ച്ചെ​ടു​ക്കു​ന്നത്‌ അവർ ഭീതി​യോ​ടെ നോക്കി​ക്കണ്ടു. മരണനി​രക്ക്‌ 168 ആയിരു​ന്നു.

ഈ വർഷം ജൂൺ അവസാനം, സൗദി അറേബ്യ​യി​ലെ ദഹറാ​നി​ന​ടു​ത്തു​ണ്ടായ ഇത്തരത്തി​ലുള്ള മറ്റൊ​രാ​ക്ര​മ​ണ​ത്തിൽ 19 അമേരി​ക്ക​ക്കാർ കൊല്ല​പ്പെ​ടു​ക​യും ഏതാണ്ട്‌ 400 പേർക്കു പരി​ക്കേൽക്കു​ക​യും ചെയ്‌തു.

ഈ നാലു സംഭവ​ങ്ങ​ളും, കുറ്റകൃ​ത്യ​ങ്ങൾ ഒരു പുതിയ മാനം കൈ​ക്കൊ​ള്ളു​ന്ന​താ​യി ചിത്രീ​ക​രി​ക്കു​ന്നു. “പതിവു” കുറ്റകൃ​ത്യ​ങ്ങൾക്കൊ​പ്പം മൃഗീ​യ​മായ ഭീകര​പ്ര​വർത്ത​ന​ചെ​യ്‌തി​ക​ളും ഏറിവ​രു​ന്നു. ഈ നാലു സംഭവ​ങ്ങ​ളും—അവയു​ടേ​തായ രീതി​യിൽ—ഓരോ​രു​ത്ത​രും കുറ്റകൃ​ത്യ​പ​ര​മായ ആക്രമ​ണ​ങ്ങൾക്കു വിധേ​യ​രാ​കാ​നുള്ള സാധ്യത എത്രമാ​ത്ര​മെന്നു തെളി​യി​ക്കു​ന്നു. നിങ്ങൾ വീട്ടി​ലോ ജോലി​സ്ഥ​ല​ത്തോ തെരു​വി​ലോ ആയി​ക്കൊ​ള്ളട്ടെ, കുറ്റകൃ​ത്യ​ത്തിന്‌ ഇരയാ​യേ​ക്കാം. വാസ്‌ത​വ​ത്തിൽ, പത്തു വർഷം മുമ്പ​ത്തെ​ക്കാൾ തങ്ങൾ കുറ്റകൃ​ത്യ​ത്തിന്‌ ഇരയാ​വാ​നുള്ള സാധ്യത ഇപ്പോൾ കൂടു​ത​ലാ​ണെന്ന്‌ ഏതാണ്ട്‌ നാലിൽ മൂന്നു ഭാഗം ബ്രിട്ടീ​ഷു​കാർ വിശ്വ​സി​ക്കു​ന്ന​താ​യി ഒരു ബ്രിട്ടീഷ്‌ സർവേ വെളി​പ്പെ​ടു​ത്തി. നിങ്ങൾ ജീവി​ക്കു​ന്നി​ടത്തെ സാഹച​ര്യ​വും സമാന​മാ​യി​രി​ക്കാം.

നിയമാ​നു​വർത്തി​ക​ളായ പൗരന്മാർ, കുറ്റകൃ​ത്യ​ങ്ങളെ കേവലം നിയ​ന്ത്രി​ക്കു​ന്ന​തി​ല​ധി​കം ചെയ്യുന്ന ഒരു ഗവൺമെൻറി​നാ​യി വാഞ്‌ഛി​ക്കു​ന്നു. യഥാർഥ​ത്തിൽ അതിന്‌ അറുതി വരുത്തുന്ന ഒരു ഗവൺമെൻറാണ്‌ അവർക്കു വേണ്ടത്‌. ചില ഗവൺമെൻറു​കൾക്കു മറ്റുള്ള​വയെ അപേക്ഷി​ച്ചു കൂടുതൽ ഫലപ്ര​ദ​മാ​യി കുറ്റകൃ​ത്യ​ങ്ങൾ തടയാൻ സാധി​ക്കു​ന്നു​ണ്ടെന്നു കുറ്റകൃ​ത്യ​ങ്ങ​ളു​ടെ താരതമ്യ നിരക്കു കാണി​ക്കു​ന്നു​ണ്ടെ​ങ്കി​ലും, കുറ്റകൃ​ത്യ​ങ്ങൾക്കെ​തി​രെ​യുള്ള പോരാ​ട്ട​ത്തിൽ മാനുഷ ഗവൺമെൻറു​കൾ പരാജ​യ​പ്പെ​ട്ടു​കൊ​ണ്ടി​രി​ക്കു​കയാ​ണെന്ന്‌ ആകമാന വീക്ഷണം വെളി​വാ​ക്കു​ന്നു. എങ്കിൽത​ന്നെ​യും, ഗവൺമെൻറ്‌ താമസി​യാ​തെ കുറ്റകൃ​ത്യ​ങ്ങൾക്ക്‌ അറുതി വരുത്തു​മെന്നു വിശ്വ​സി​ക്കു​ന്നത്‌ അയഥാർഥ​മോ സാങ്കൽപ്പി​ക​മോ അല്ല. പക്ഷേ, ഏതു ഗവൺമെൻറ്‌? എപ്പോൾ?

[4, 5 പേജു​ക​ളി​ലെ ചതുരം/ഭൂപടം]

കുറ്റകൃ​ത്യം നിറഞ്ഞ ഒരു ലോകം

യൂറോപ്പ്‌: ഇറ്റലി​യിൽ, വസ്‌തു​വ​ക​കൾക്കു​നേ​രെ​യുള്ള കുറ്റകൃ​ത്യ​ങ്ങൾ ചുരു​ങ്ങിയ കാലം​കൊണ്ട്‌ “ഒരിക്കൽ അസംഭാ​വ്യ​മെന്നു കരുതി​യി​രുന്ന അത്യു​ച്ച​ത്തി​ലെ​ത്തി​യി​രി​ക്കുന്ന”തായി ഒരു ഇറ്റാലി​യൻ പുസ്‌തകം (“അവസര​വും കള്ളനും”) പറഞ്ഞു. 1985-ൽ 1,00,000 ജനങ്ങൾക്ക്‌ 490-ഉം 1992 ആയതോ​ടെ 922-ഉം കുറ്റകൃ​ത്യ​ങ്ങൾ മുൻ സോവി​യറ്റ്‌ യൂണി​യ​നി​ലെ റിപ്പബ്ലി​ക്കായ ഉക്രെ​യിൻ റിപ്പോർട്ടു ചെയ്‌തു. എണ്ണം വർധി​ച്ചു​കൊ​ണ്ടി​രി​ക്കു​ന്നു. ഒരു റഷ്യൻ വർത്തമാ​ന​പ​ത്രം (“വാദങ്ങ​ളും വസ്‌തു​ത​ക​ളും”) ഇങ്ങനെ എഴുതി​യ​തിൽ അതിശ​യി​ക്കാ​നില്ല: “ഈ ഭീകര കാലഘ​ട്ടത്തെ അതിജീ​വി​ക്കു​ന്ന​തി​നെ​ക്കു​റിച്ച്‌—ജീവ​നോ​ടെ​യി​രി​ക്കു​ന്ന​തി​നെക്കു​റിച്ച്‌—നാം സ്വപ്‌നം കാണുന്നു. . . . തീവണ്ടി​യിൽ യാത്ര ചെയ്യാൻ നമുക്കു ഭയം—അതു പാളം തെറ്റു​ക​യോ നശിപ്പി​ക്ക​പ്പെ​ടു​ക​യോ ചെയ്‌തേ​ക്കാം; വിമാ​ന​യാ​ത്ര ചെയ്യാൻ നമുക്കു ഭയം—വിമാ​നാ​പ​ഹ​രണം സർവസാ​ധാ​ര​ണ​മാണ്‌ അല്ലെങ്കിൽ വിമാനം തകർന്നു​വീ​ണേ​ക്കാം; ഭൂഗർഭ​യാ​ത്ര നടത്താൻ നമുക്കു ഭയം—കൂട്ടി​മു​ട്ട​ലു​ക​ളും സ്‌ഫോ​ട​ന​ങ്ങ​ളും തന്നെ കാരണം; തെരു​വി​ലൂ​ടെ നടക്കാൻ ഭയം—നിങ്ങൾ വെടി​വെ​പ്പിൽ പെട്ടു​പോ​കാ​നോ കൊള്ള​യ​ടി​ക്ക​പ്പെ​ടാ​നോ ബലാൽസം​ഗം ചെയ്യ​പ്പെ​ടാ​നോ മർദി​ക്ക​പ്പെ​ടാ​നോ കൊല്ല​പ്പെ​ടാ​നോ സാധ്യ​ത​യുണ്ട്‌; കാറിൽ യാത്ര ചെയ്യാൻ നമുക്കു ഭയം—അതു കത്തിക്ക​പ്പെ​ട്ടേ​ക്കാം, അല്ലെങ്കിൽ തകർക്ക​പ്പെ​ടു​ക​യോ മോഷ്ടി​ക്ക​പ്പെ​ടു​ക​യോ ചെയ്‌തേ​ക്കാം; അപ്പാർട്ടു​മെൻറി​ന്റെ ഇടനാഴി, റെസ്റ്ററൻറ്‌ എന്നിവി​ട​ങ്ങ​ളി​ലേക്ക്‌ അല്ലെങ്കിൽ സ്റ്റോറു​ക​ളി​ലേക്ക്‌ പോകു​വാൻ നമുക്കു ഭയം—അവിടെ എവി​ടെ​യെ​ങ്കി​ലും വെച്ച്‌ നിങ്ങൾക്കു പരി​ക്കേൽക്കു​ക​യോ നിങ്ങൾ കൊല്ല​പ്പെ​ടു​ക​യോ ചെയ്‌തേ​ക്കാം.” ഹംഗേ​റി​യൻ മാഗസി​നായ എച്ച്‌വി​ജി ഹംഗറി​യി​ലെ ചൂടുള്ള ഒരു നഗരത്തെ, “മാഫിയാ ആസ്ഥാന”ത്തോടു സാദൃ​ശ്യ​പ്പെ​ടു​ത്തി. “പുതിയ തരത്തി​ലുള്ള കുറ്റകൃ​ത്യ​ങ്ങ​ളു​ടെ​യെ​ല്ലാം ഉത്ഭവസ്ഥാ​നം” എന്നും “മാഫി​യ​ക​ളോട്‌ പൊരു​താൻ പൊലീസ്‌ സജ്ജീകൃ​ത​ര​ല്ലാ​തി​രി​ക്കു​ന്നത്‌ ആളുകൾ കാണു​മ്പോൾ ഭയത്തിന്റെ ശൃംഖലാ പ്രതി​പ്ര​വർത്തനം വളർന്നു​കൊ​ണ്ടി​രി​ക്കു​ന്നു” എന്നും അതു പറഞ്ഞു.

ആഫ്രിക്ക: ഒരു പശ്ചിമാ​ഫ്രി​ക്കൻ രാഷ്‌ട്ര​ത്തിൽ “അർഥവ​ത്തായ കലാലയ പരിശീ​ലനം നേടു​ന്നത്‌ തടയുന്ന ഘട്ടത്തോ​ളം മിക്കവാ​റും എത്തുന്ന​തരം, രഹസ്യ പ്രസ്ഥാ​ന​ങ്ങ​ളി​ലെ അംഗങ്ങൾ കെട്ടഴി​ച്ചു​വി​ടുന്ന ഭീകര​പ്ര​വർത്ത​ന​ത​രം​ഗം ഉപരി​പഠന സ്ഥാപന​ങ്ങ​ളിൽ ഉള്ളതായി” നൈജീ​രി​യ​യി​ലെ ഡെയ്‌ലി ടൈംസ്‌ റിപ്പോർട്ടു ചെയ്‌തു. അതു തുടർന്നു: “ജീവ​ന്റെ​യും വസ്‌തു​വ​ക​ക​ളു​ടെ​യും നഷ്ടത്തി​നി​ട​യാ​ക്കി​ക്കൊണ്ട്‌ ഈ തരംഗം വ്യാപ​ക​മാ​യി​ക്കൊ​ണ്ടി​രി​ക്കു​ന്നു.” മറ്റൊരു ആഫ്രിക്കൻ രാജ്യ​ത്തെ​ക്കു​റി​ച്ചു ദക്ഷിണാ​ഫ്രി​ക്ക​യി​ലെ ദ സ്റ്റാർ ഇങ്ങനെ റിപ്പോർട്ടു ചെയ്‌തു: “രണ്ടു തരത്തി​ലുള്ള അക്രമ​ങ്ങ​ളുണ്ട്‌: സമുദാ​യങ്ങൾ തമ്മിലുള്ള ഏറ്റുമു​ട്ട​ലു​ക​ളും സാധാരണ കുറ്റകൃ​ത്യ​ത്തോ​ടു ബന്ധപ്പെട്ട അക്രമ​ങ്ങ​ളും. ആദ്യ​ത്തേതു ശ്രദ്ധേ​യ​മാം​വി​ധം കുറഞ്ഞി​ട്ടുണ്ട്‌. രണ്ടാമ​ത്തേ​താ​കട്ടെ, കുതി​ച്ചു​യർന്നി​രി​ക്കു​ന്നു.”

ഓഷി​യേ​നിയ: കുറ്റകൃ​ത്യ​ങ്ങൾ നിമിത്തം ഓസ്‌​ട്രേ​ലി​യ​യിൽ “വർഷം​തോ​റും കുറഞ്ഞത്‌ 2,700 കോടി ഡോളർ അല്ലെങ്കിൽ ഓരോ പുരു​ഷ​നും സ്‌ത്രീ​ക്കും കുട്ടി​ക്കും ഏതാണ്ട്‌ 1,600 ഡോളർ വീതം” നഷ്ടം സംഭവി​ക്കു​ന്ന​താ​യി അവിടത്തെ ശിക്ഷാ​ക്ര​മ​സ്ഥാ​പനം കണക്കാ​ക്കു​ന്നു. ഇത്‌ “രാജ്യത്തെ മൊത്തം ഉത്‌പ​ന്ന​ങ്ങ​ളു​ടെ മൂല്യ​ത്തി​ന്റെ 7.2 ശതമാ​ന​ത്തോ​ളം വരും.”

അമേരിക്കകൾ: തുടർച്ച​യായ 12 വർഷം ഉൾക്കൊ​ള്ളുന്ന അടുത്ത കാലത്തെ ഒരു കാലയ​ള​വിൽ കാനഡ​യിൽ അക്രമാ​സ​ക്ത​മായ കുറ്റകൃ​ത്യം വർധി​ച്ചി​രി​ക്കു​ന്ന​താ​യി ദ ഗ്ലോബ്‌ ആൻറ്‌ മെയിൽ റിപ്പോർട്ടു ചെയ്‌തു. “കഴിഞ്ഞ ദശകത്തിൽ അക്രമ​ത്തിന്‌ 50 ശതമാനം വർധന​വു​ണ്ടാ​ക്കിയ ഒരു പ്രവണ​ത​യു​ടെ ഭാഗമാ​ണ​ത്രേ ഇവയെ​ല്ലാം.” അതേസ​മയം, അടുത്ത​യി​ടെ ഒരു വർഷത്തിൽ കൊളം​ബി​യ​യിൽ 1,714 ആളപഹ​ര​ണങ്ങൾ നടന്നതാ​യി കൊളം​ബി​യ​യി​ലെ എൽ റ്റ്‌യെ​മ്പോ റിപ്പോർട്ടു ചെയ്‌തു. “ഇതേ കാലഘ​ട്ട​ത്തിൽ ലോക​ത്തി​ന്റെ ബാക്കി ഭാഗങ്ങ​ളിൽ രേഖ​പ്പെ​ടു​ത്ത​പ്പെട്ട ആളപഹ​ര​ണ​ങ്ങ​ളു​ടെ ഇരട്ടി​യി​ലേ​റെ​യാണ്‌ ഈ സംഖ്യ.” മെക്‌സി​ക്കോ​യി​ലെ നീതി​ന്യാ​യ വകുപ്പി​ന്റെ അഭി​പ്രാ​യ​പ്ര​കാ​രം, സമീപ വർഷത്തിൽ അതിന്റെ തലസ്ഥാ​നത്ത്‌ ഓരോ നാലു മണിക്കൂ​റി​ലും ഒരു ലൈം​ഗിക കുറ്റകൃ​ത്യം നടക്കു​ക​യു​ണ്ടാ​യി. വ്യക്തി​ക​ളു​ടെ മൂല്യ​ത്തിൽ സംഭവി​ച്ചി​രി​ക്കുന്ന ഇടിവ്‌ 20-ാം നൂറ്റാ​ണ്ടി​ന്റെ സവി​ശേ​ഷ​ത​യാ​ണെന്ന്‌ ഒരു വനിതാ​വ​ക്താ​വു ചൂണ്ടി​ക്കാ​ട്ടി. “ഉപയോ​ഗ​ത്തി​നു​ശേഷം വലി​ച്ചെ​റി​യു​ക​യെന്ന മനോ​ഭാ​വ​മുള്ള ഒരു സമൂഹ​ത്തി​ലാ​ണു നാം ജീവി​ക്കു​ന്നത്‌” എന്ന്‌ അവർ നിഗമനം ചെയ്‌തു.

ലോകവ്യാപകമായി: “1970-കളിലും 1980-കളിലും ലോക​വ്യാ​പ​ക​മാ​യി കുറ്റകൃ​ത്യ​ങ്ങ​ളിൽ കുത്ത​നെ​യുള്ള ഒരു വർധന​വു​ണ്ടാ”യതായി ഐക്യ​രാ​ഷ്‌ട്ര​ങ്ങ​ളും കുറ്റകൃ​ത്യ​നി​രോ​ധ​ന​വും (ഇംഗ്ലീഷ്‌) എന്ന പുസ്‌തകം അഭി​പ്രാ​യ​പ്പെ​ടു​ന്നു. അത്‌ പറയുന്നു: “രേഖ​പ്പെ​ടു​ത്ത​പ്പെട്ട കുറ്റകൃ​ത്യ​ങ്ങൾ 1975-ൽ ഏതാണ്ട്‌ 33 കോടി​യാ​യി​രു​ന്ന​തിൽനിന്ന്‌ 1980-ൽ ഏകദേശം 40 കോടി​യാ​യി ഉയർന്നി​രി​ക്കു​ന്നു. മാത്രമല്ല, 1990-ൽ ഇത്‌ 50 കോടി​യാ​യി​ത്തീർന്നി​രി​ക്കു​ന്നു.”

[3-ാം പേജിലെ ചിത്ര​ത്തിന്‌ കടപ്പാട്‌]

Earth on pages 3, 6, and 9: NASA photo