ലോകത്തെ വീക്ഷിക്കൽ

എലിയും മനുഷ്യ​നും തമ്മിൽ ആഹാര​ത്തി​നു മത്സരം

ലോക​വ്യാ​പ​ക​മാ​യി, ഒരു മനുഷ്യ​ക്കു​ഞ്ഞു ജനിക്കു​മ്പോൾ പത്ത്‌ എലിക്കു​ഞ്ഞു​ങ്ങ​ളും ജനിക്കു​ന്നു​വെന്ന്‌ ‘ഓസ്‌​ട്രേ​ലി​യൻ കോമൺവെൽത്ത്‌ ശാസ്‌ത്ര-വ്യാവ​സാ​യിക ഗവേഷക സംഘടന’ (സിഎസ്‌ഐ​ആർഒ) പറയുന്നു. അതിന്റെ അർഥം ദിവസ​വും, പുതു​താ​യി ജനിക്കുന്ന 3,60,000 മനുഷ്യ​ശി​ശു​ക്കളെ പോ​റ്റേ​ണ്ട​തു​ണ്ടെ​ന്നി​രി​ക്കെ 36,00,000 എലികൾക്കും കൂടെ ഭക്ഷണം ആവശ്യ​മാ​യി വരുന്നു എന്നാണ്‌. ഉദാഹ​ര​ണ​ത്തിന്‌, ഏതാണ്ട്‌ 23 കോടി ജനങ്ങളുള്ള ഇന്തൊ​നീ​ഷ്യ​യിൽ 60 ശതമാ​ന​ത്തോ​ളം പേരും ദിവസ​വും അരിഭ​ക്ഷ​ണ​മാ​ണു കഴിക്കു​ന്നത്‌. എന്നാൽ ആ രാജ്യത്ത്‌ കൃഷി​ചെ​യ്യുന്ന നെല്ലിന്റെ ഏകദേശം 15 ശതമാനം വർഷം​തോ​റും എലികൾ തിന്നു​തീർക്കു​ന്നു. “അതിന്റെ അർഥം രണ്ടു കോടി​യി​ല​ധി​കം ഇന്തൊ​നീ​ഷ്യ​ക്കാർക്ക്‌ ഒരു വർഷം മുഴുവൻ കഴിക്കാ​നുള്ള അരി എലികൾ അകത്താ​ക്കു​ന്നു എന്നാണ്‌” എന്ന്‌ സിഎസ്‌ഐ​ആർഒ ശാസ്‌ത്രജ്ഞൻ ഡോ. ഗ്രാന്റ്‌ സിംഗൾട്ടൺ പറയുന്നു. (g02 6/22)

കോഴി സൂപ്പ്‌—ജലദോ​ഷ​ത്തിന്‌ ഒരു പ്രകൃ​തി​ജന്യ പ്രതി​വി​ധി

ജലദോ​ഷം പോ​ലെ​യുള്ള ശ്വസന സംബന്ധ രോഗ​ങ്ങൾക്കുള്ള നാടൻ ചികി​ത്സ​യെന്ന നിലയിൽ കോഴി സൂപ്പ്‌ കാലങ്ങ​ളാ​യി ഉപയോ​ഗി​ച്ചു വന്നിട്ടുണ്ട്‌. ആഹാരം—നിങ്ങളു​ടെ അത്ഭുത ഔഷധം (ഇംഗ്ലീഷ്‌) എന്ന പുസ്‌ത​ക​ത്തിൽ റിപ്പോർട്ടു ചെയ്‌ത പ്രകാരം, ലോസാ​ഞ്ച​ല​സി​ലുള്ള കാലി​ഫോർണിയ സർവക​ലാ​ശാ​ല​യി​ലെ ശ്വാസ​കോശ വിദഗ്‌ധൻ ഡോ. ഇർവിൻ സിമെന്റ്‌ അതിന്റെ പ്രവർത്തനം എങ്ങനെ​യെന്നു വിശദീ​ക​രി​ച്ചു: “മാംസ്യം അടങ്ങി​യി​ട്ടുള്ള മിക്ക ഭക്ഷ്യപ​ദാർഥ​ങ്ങ​ളെ​യും പോലെ കോഴി​യി​റ​ച്ചി​യി​ലും സിസ്റ്റീൻ എന്ന പ്രകൃ​തി​ജന്യ അമിനോ അമ്ലം അടങ്ങി​യി​ട്ടുണ്ട്‌. സൂപ്പ്‌ ഉണ്ടാക്കു​മ്പോൾ അതു സ്വത​ന്ത്ര​മാ​ക്ക​പ്പെ​ടു​ന്നു. ശ്വാസ​നാള വീക്കവും (bronchitis) ശ്വസന സംബന്ധ രോഗ​ങ്ങ​ളും ഉള്ള രോഗി​കൾക്ക്‌ ഡോക്ടർമാർ കുറി​ച്ചു​കൊ​ടു​ക്കുന്ന അസറ്റിൽസി​സ്റ്റീൻ എന്ന മരുന്നു​മാ​യി സിസ്റ്റീന്‌ രാസപ​ര​മാ​യി വളരെ​യ​ധി​കം സാമ്യ​മുണ്ട്‌.” കോഴി​യു​ടെ തൂവലിൽനി​ന്നും തൊലി​യിൽനി​ന്നും തയ്യാറാ​ക്കുന്ന ഈ മരുന്ന്‌ മൂക്കി​ലെ​യും തൊണ്ട​യി​ലെ​യും ശ്വാസ​കോ​ശ​ത്തി​ലെ​യും കഫം ഇളക്കി പുറത്തു കൊണ്ടു​വ​രു​ന്നു. കോഴി സൂപ്പും ഏതാണ്ട്‌ അതു​പോ​ലെ തന്നെയാ​ണു പ്രവർത്തി​ക്കു​ന്നത്‌. കഫക്കെ​ട്ടി​നെ​തി​രെ​യുള്ള സൂപ്പിന്റെ ഫലപ്ര​ദ​ത്വം വർധി​പ്പി​ക്കാൻ അതിൽ വെളു​ത്തു​ള്ളി, സവാള, മുളക്‌ എന്നിവ ചേർക്കാൻ ഡോ. സിമെന്റ്‌ നിർദേ​ശി​ക്കു​ന്നു. (g02 6/22)

ഏറ്റവും പഴക്കമുള്ള അച്ചടിച്ച പരസ്യം

ലോക​ത്തിൽ അറിയ​പ്പെ​ടു​ന്ന​തി​ലേ​ക്കും ഏറ്റവും പുരാ​ത​ന​മായ അച്ചടിച്ച പരസ്യങ്ങൾ ചൈനീസ്‌ പുരാ​വ​സ്‌തു ഗവേഷകർ കണ്ടെത്തി​യി​രി​ക്കു​ന്നു എന്ന്‌ ഇന്റർനെ​റ്റി​ലെ ചൈന​യു​ടെ ‘പീപ്പൾസ്‌ ഡെയ്‌ലി’ റിപ്പോർട്ടു ചെയ്യുന്നു. ചൈന​യി​ലെ ഹൂനാൻ പ്രവി​ശ്യ​യി​ലെ ഒരു ശവകു​ടീ​ര​ത്തിൽനിന്ന്‌ എണ്ണച്ചായ വർണകം പൊതി​യാൻ ഉപയോ​ഗിച്ച ഏതാണ്ട്‌ 700 വർഷം പഴക്കമുള്ള രണ്ട്‌ കടലാസു കഷണങ്ങൾ കണ്ടെടു​ക്ക​പ്പെട്ടു. “കടലാ​സി​ന്റെ മുകളിൽ വലത്തു ഭാഗത്ത്‌ ഉത്‌പ​ന്ന​ത്തി​ന്റെ വൈവി​ധ്യം, ഗുണമേന്മ, സവി​ശേ​ഷ​തകൾ എന്നിവ വിവരി​ക്കുന്ന 70 ചൈനീസ്‌ അക്ഷരങ്ങൾ ഉണ്ട്‌. കൂടാതെ കടയുടെ വിലാ​സ​വും അതിൽ അച്ചടി​ച്ചി​ട്ടുണ്ട്‌” എന്നു റിപ്പോർട്ടു പറയുന്നു. പരസ്യ​ത്തിൽ ഉപയോ​ഗി​ച്ചി​രി​ക്കുന്ന ചില വാചക​ങ്ങൾക്ക്‌ ആധുനിക പരസ്യ​ങ്ങ​ളോ​ടുള്ള സമാനത അപാര​മാണ്‌. ഭാഗി​ക​മാ​യി അത്‌ ഇങ്ങനെ വായി​ക്കു​ന്നു: “മറ്റ്‌ എണ്ണച്ചാ​യ​ങ്ങ​ളോ​ടുള്ള താരത​മ്യ​ത്തിൽ ഞങ്ങളുടെ ഉത്‌പ​ന്ന​ത്തി​ന്റെ നിറം അനുപ​മ​മാണ്‌.” കടലാസ്‌ യൂറോ​പ്പിൽ എത്തിയത്‌ 12-ാം നൂറ്റാ​ണ്ടിൽ മാത്ര​മാണ്‌, ഗുട്ടൻബർഗ്‌ അച്ചടി​വി​ദ്യ കണ്ടുപി​ടി​ച്ച​താ​കട്ടെ 15-ാം നൂറ്റാ​ണ്ടി​ലും. ഈ വസ്‌തു​ത​യു​ടെ വീക്ഷണ​ത്തിൽ റിപ്പോർട്ട്‌ ഇപ്രകാ​രം പറയുന്നു: “പൊ.യു. 105-ൽ ചൈ ല്വുൻ ആദ്യമാ​യി ഒരു ഷീറ്റ്‌ കടലാസ്‌ ഉണ്ടാക്കി​യ​പ്പോൾ ചൈന​യിൽ കടലാസു നിർമാ​ണം തുടങ്ങി. അച്ചടി​യു​ടെ കാര്യ​മെ​ടു​ത്താൽ, ഒരു മരപ്പല​ക​യിൽ അക്ഷരങ്ങൾ കൊത്തി​യു​ണ്ടാ​ക്കു​ക​യും അതിന്മേൽ മഷി പുരട്ടി​യ​ശേഷം ഒരു കടലാ​സ്സിൽ അമർത്തി അതിന്റെ പകർപ്പെ​ടു​ക്കു​ക​യും ചെയ്യുന്ന വിദ്യ 9-ാം നൂറ്റാ​ണ്ടിൽത്തന്നെ ചൈന​യിൽ നിലവിലുണ്ടായിരുന്നു.”(g02 6/22)

പള്ളികൾ ബിസി​ന​സ്സി​ലേക്ക്‌

ഹാജർ വർധി​ക്കാ​ത്ത​തും സംഭാ​വ​നകൾ കുറയു​ന്ന​തും നിമിത്തം ഐക്യ​നാ​ടു​ക​ളി​ലെ പള്ളിക​ളെ​ല്ലാം ചെലവു നടത്തു​ന്ന​തിന്‌ ലൗകിക ബിസി​ന​സ്സു​ക​ളി​ലേക്കു തിരി​യു​ക​യാണ്‌. “മുൻ​കൈ​യെ​ടു​ത്തു പ്രവർത്തി​ക്കുന്ന ഏതൊരു പള്ളിയും അതു ചെയ്യും” എന്ന്‌ ഇൻഡ്യാ​ന​യി​ലെ മുൻസ്റ്റ​റി​ലുള്ള ഫാമിലി ക്രിസ്റ്റ്യൻ സെന്ററി​ലെ സീനിയർ പാസ്റ്റർ സ്റ്റീവൻ മുൻസി പറയുന്നു. ദ വാൾ സ്‌ട്രീറ്റ്‌ ജേർണൽ പറയു​ന്നത്‌ അനുസ​രിച്ച്‌ പള്ളിയു​ടെ ബിസി​നസ്‌ പ്രവർത്ത​ന​ങ്ങ​ളിൽ പള്ളിത്തി​ണ്ണ​യിൽ കാപ്പി​യും ഡോന​ട്ടു​ക​ളും വിൽക്കു​ന്നതു മുതൽ കെട്ടിട ടെറസിൽ പൂർണ സജ്ജീകൃത റെസ്റ്ററ​ന്റു​കൾ നടത്തു​ന്നതു വരെ ഉൾപ്പെ​ടു​ന്നു. ഫ്‌ളോ​റി​ഡ​യി​ലെ ജാക്‌സൺവി​ല്ലിൽ ഉള്ള ഒരു പള്ളി അതിന​ടുത്ത്‌ ഒരു ഷോപ്പിങ്‌ സെന്റർ തുടങ്ങി. അതിൽ ഒരു ട്രാവൽ ഏജൻസി, ബ്യൂട്ടി സലൂൺ, രാജ്യ​ത്തി​ന്റെ തെക്കു​ഭാ​ഗത്തെ കറുത്ത അമേരി​ക്ക​ക്കാ​രു​ടെ പരമ്പരാ​ഗത ഭക്ഷണം കിട്ടുന്ന ഒരു റെസ്റ്ററന്റ്‌ എന്നിവ​യെ​ല്ലാം ഉണ്ട്‌. പള്ളിയു​ടെ സ്ഥാപക​നായ ബിഷപ്പ്‌ വോൺ മക്ലാഫ്‌ലിൻ പറയുന്നു: “യേശു​വി​ന്റെ ആഗ്രഹം, അവൻ തരുന്ന ദാനങ്ങൾ ഞങ്ങൾ സ്വീക​രിച്ച്‌ അതു​കൊണ്ട്‌ ലാഭം ഉണ്ടാക്കണം എന്നതാ​യി​രു​ന്നു.” 2000-ാമാണ്ടിൽ പള്ളിയു​ടെ ബിസി​ന​സ്സു​ക​ളിൽനിന്ന്‌ 20 ലക്ഷത്തി​ല​ധി​കം ഡോളർ (10 കോടി​യി​ല​ധി​കം രൂപ) ആദായം ലഭി​ച്ചെന്ന്‌ അദ്ദേഹം കൂട്ടി​ച്ചേർക്കു​ന്നു. (g02 6/22)

ചാവു​കടൽ ചുരു​ളു​ക​ളു​ടെ പ്രകാ​ശ​നം

“യഹൂദ്യ മരുഭൂ​മി​യി​ലെ ഗുഹക​ളിൽ ചാവു​കടൽ ചുരു​ളു​കൾ കണ്ടെത്തി അര നൂറ്റാ​ണ്ടി​ലേറെ പിന്നി​ട്ടി​രി​ക്കെ, പണ്ഡിത​ന്മാർ 2,000 വർഷം പഴക്കമുള്ള മത എഴുത്തു​ക​ളിൽ അവസാ​ന​ത്തേ​തി​ന്റെ പ്രകാ​ശനം ആഘോ​ഷി​ക്കു​ക​യാണ്‌” എന്ന്‌ യു.എസ്‌.ന്യൂസ്‌ & വേൾഡ്‌ റിപ്പോർട്ട്‌ പറയുന്നു. ചുരു​ളു​കൾ പഠനവി​ധേ​യ​മാ​ക്കിയ പണ്ഡിത സംഘത്തി​നു നേതൃ​ത്വം നൽകിയ പ്രൊ​ഫസർ ഇമ്മാനു​വൽ ടോവ്‌, 37 വാല്യ​ങ്ങ​ളുള്ള ഈ പരമ്പര പ്രകാ​ശനം ചെയ്‌ത​താ​യി അറിയി​ച്ചു. ഇതിന്റെ പൂർത്തീ​ക​ര​ണ​ത്തി​നുള്ള ബഹുമതി ഡിജിറ്റൽ ഫോ​ട്ടോ​ഗ്രഫി, ബഹുസ്‌പെ​ക്‌ട്ര ഇമേജിങ്‌ തുടങ്ങിയ ആധുനിക സാങ്കേ​തി​ക​വി​ദ്യ​കൾക്കാ​ണു നൽക​പ്പെ​ട്ടത്‌. കാരണം, ഈ ചുരു​ളു​ക​ളി​ലെ മങ്ങലേറ്റ എഴുത്തു​കൾ മനസ്സി​ലാ​ക്കാൻ പണ്ഡിത​ന്മാർക്ക്‌ കഴിഞ്ഞത്‌ അവയുടെ സഹായ​ത്തോ​ടെ ആണ്‌. എബ്രായ, അരമായ, ഗ്രീക്ക്‌, ലത്തീൻ ഭാഷക​ളിൽനി​ന്നു വിവർത്തനം ചെയ്‌ത എഴുത്തു​കൾ പൊ.യു.മു. 250 മുതൽ പൊ.യു. 70 വരെയുള്ള കാലഘ​ട്ട​ത്തി​ലേ​താ​ണെന്നു കണക്കാ​ക്ക​പ്പെ​ടു​ന്നു. (g02 6/8)

അനിശ്ചി​ത​ത്വ​ങ്ങളെ വിജയ​ക​ര​മാ​യി നേരിടൽ

ഐക്യ​നാ​ടു​ക​ളി​ലെ തീവ്ര​വാ​ദി ആക്രമ​ണ​ങ്ങൾക്കു ശേഷം കാനഡ​യി​ലെ ‘ക്രിസ്റ്റ്യൻ ബുക്ക്‌സെ​ല്ലേ​ഴ്‌സ്‌ അസോ​സി​യേഷൻ’ അംഗങ്ങ​ളു​ടെ ബൈബിൾ വിൽപ്പനാ നിരക്കിൽ 30 ശതമാനം വർധന ഉണ്ടായി​ട്ടു​ള്ള​താ​യി കാനഡ​യു​ടെ ഗ്ലോബ്‌ ആൻഡ്‌ മെയിൽ വർത്തമാ​ന​പ്പ​ത്രം റിപ്പോർട്ടു ചെയ്യുന്നു. “ആളുകൾ വിശദീ​ക​ര​ണ​ങ്ങൾക്കാ​യി തിരയു​ക​യാണ്‌” എന്ന്‌ സംഘട​ന​യു​ടെ എക്‌സി​ക്യൂ​ട്ടിവ്‌ ഡയറക്ടർ മാർലിൻ ലോക്ലിൻ പറയുന്നു. “ഇതിൽ ഉൾപ്പെ​ട്ടി​രി​ക്കുന്ന ഒരു ഘടകം ആശങ്കയാണ്‌. ജനങ്ങളു​ടെ മനസ്സി​ലും ഹൃദയ​ത്തി​ലും ഉത്തരം കിട്ടാത്ത പല ചോദ്യ​ങ്ങൾ ഉണ്ട്‌.” ചെറിയ പുസ്‌ത​ക​ശാ​ല​ക​ളിൽ പോലും “ദുരന്ത​സം​ഭ​വ​ങ്ങൾക്കു വിശദീ​ക​രണം നൽകാൻ സഹായി​ച്ചേ​ക്കു​മെന്നു തോന്നുന്ന മതപര​മായ എല്ലാത്തി​ന്റെ​യും വിൽപ്പന വർധി​ച്ചി​ട്ടു​ള്ള​താ​യി” റിപ്പോർട്ട്‌ പറയുന്നു. ടൊറ​ന്റോ സർവക​ലാ​ശാ​ല​യി​ലെ ഒരു ദൈവ​ശാ​സ്‌ത്ര പ്രൊ​ഫ​സ​റു​ടെ അഭി​പ്രാ​യ​ത്തിൽ ഇത്തരം പ്രതി​ക​രണം സാധാ​ര​ണ​മാണ്‌. “വലിയ അനിശ്ചി​ത​ത്വ​ത്തി​ന്റെ സമയങ്ങ​ളിൽ ആളുകൾ അടിസ്ഥാ​ന​പ​ര​മായ മത ചോദ്യ​ങ്ങൾ ചോദി​ക്കാൻ തുടങ്ങു​ന്നു. ഉത്തരങ്ങൾക്കാ​യി ബൈബി​ളിൽ പരതു​ന്നതു സഹായ​ക​മാ​യി​രു​ന്നേ​ക്കാം” എന്ന്‌ അവർ പറഞ്ഞു. (g02 6/8)

എയ്‌ഡ്‌സ്‌—ദക്ഷിണാ​ഫ്രി​ക്ക​യി​ലെ ഒന്നാം നമ്പർ കൊല​യാ​ളി

“എയ്‌ഡ്‌സ്‌ ദക്ഷിണാ​ഫ്രി​ക്ക​യി​ലെ മരണങ്ങ​ളു​ടെ മുഖ്യ കാരണം ആയിത്തീർന്നി​രി​ക്കു​ന്നു, അത്‌ ഏറ്റവും രൂക്ഷമാ​യി ബാധി​ക്കു​ന്നതു യുവാ​ക്ക​ളെ​യാണ്‌,” ദക്ഷിണാ​ഫ്രി​ക്ക​യു​ടെ വൈദ്യ​ശാ​സ്‌ത്ര ഗവേഷക സമിതി​യു​ടെ ഒരു പഠനത്തെ പരാമർശി​ച്ചു​കൊണ്ട്‌ ദ ന്യൂ​യോർക്ക്‌ ടൈംസ്‌ പറയുന്നു. അടുത്ത പതിറ്റാ​ണ്ടിൽ ദക്ഷിണാ​ഫ്രി​ക്ക​യിൽ 50 ലക്ഷത്തി​നും 70 ലക്ഷത്തി​നും ഇടയ്‌ക്ക്‌ ആളുകൾ എയ്‌ഡ്‌സ്‌ പിടി​പെട്ടു മരിക്കു​മെന്ന്‌ ഗവേഷകർ കണക്കാ​ക്കു​ന്നു. തങ്ങളുടെ 20-കളിൽ ആയിരി​ക്കുന്ന യുവതി​ക​ളു​ടെ മരണനി​രക്ക്‌ 60-കളിൽ ആയിരി​ക്കുന്ന സ്‌ത്രീ​ക​ളെ​ക്കാൾ കൂടു​ത​ലാണ്‌. “എയ്‌ഡ്‌സി​നു കാരണ​മായ വൈറസ്‌, അതായത്‌ എച്ച്‌.ഐ.വി. ബാധി​ച്ചി​ട്ടു​ള്ളവർ ലോക​ത്തിൽ ഏറ്റവും കൂടുതൽ ഉള്ളത്‌” ദക്ഷിണാ​ഫ്രി​ക്ക​യി​ലാണ്‌ എന്ന്‌ ലേഖനം തുടർന്നു പറയുന്നു. മൊത്തം ദക്ഷിണാ​ഫ്രി​ക്ക​ക്കാ​രിൽ ഒമ്പതിൽ ഒരാൾ വീതവും മുതിർന്ന ആളുക​ളിൽ [30-നും 34-നും ഇടയ്‌ക്ക്‌ പ്രായ​മു​ള്ളവർ] നാലിൽ ഒരാൾ വീതവും എച്ച്‌.ഐ.വി. വാഹക​രാ​ണെന്നു കരുത​പ്പെ​ടു​ന്ന​താ​യി ഗവൺമെന്റ്‌ ഉദ്യോ​ഗസ്ഥർ പറയുന്നു.”(g02 6/8)

നഗര ജീവിതം

“ലണ്ടൻ, ന്യൂ​യോർക്ക്‌, പാരീസ്‌, ബെർലിൻ, ഷിക്കാ​ഗോ എന്നിവ​യാ​യി​രു​ന്നു 1900-ത്തിലെ ഏറ്റവും വലിയ നഗരങ്ങൾ” എന്ന്‌ ലണ്ടനിലെ ദ സൺഡേ ടൈംസ്‌ പറയുന്നു. എന്നാൽ പുതിയ കണക്കു​കൂ​ട്ട​ലു​കൾ അനുസ​രിച്ച്‌ “2015 ആകു​മ്പോ​ഴേ​ക്കും പാശ്ചാത്യ നഗരങ്ങൾക്ക്‌ അവയുടെ സ്ഥാനം നഷ്ടപ്പെ​ടും. ടോക്കി​യോ, ബോംബെ, ലാഗോസ്‌, ബംഗ്ലാ​ദേ​ശി​ലെ ധാക്കാ, ബ്രസീ​ലി​ലെ സാവൊ പൗലോ എന്നിവ ആയിരി​ക്കും ഏറ്റവും വലിയ നഗരങ്ങൾ.” ഇവ ഓരോ​ന്നി​ലും മറ്റ്‌ 25 നഗരങ്ങ​ളിൽ ഓരോ​ന്നി​ലും താമസി​ക്കു​ന്ന​വ​രു​ടെ എണ്ണം രണ്ടു കോടി കവിയും. എന്നിരു​ന്നാ​ലും “2015 ആകു​മ്പോൾ ഏറ്റവും കൂടുതൽ ജനപ്പാർപ്പുള്ള 30 നഗരങ്ങ​ളിൽ ഒന്ന്‌ എന്ന സ്ഥാനവും ലണ്ടന്‌ നഷ്ടമാ​കും എന്നു കണക്കുകൾ കാണി​ക്കു​ന്നു, മുൻപ​ന്തി​യിൽ നിന്ന നഗരങ്ങ​ളിൽ ജനസംഖ്യ കുറയുന്ന ഏക നഗരം അതായി​രി​ക്കും” എന്ന്‌ ടൈംസ്‌ പറയുന്നു. ത്വരി​ത​ഗ​തി​യി​ലുള്ള വളർച്ച പല പ്രശ്‌ന​ങ്ങ​ളും സൃഷ്ടി​ക്കു​ന്നു. “ചില പ്രദേ​ശ​ങ്ങ​ളിൽ ദരി​ദ്ര​രു​ടെ എണ്ണം വർധിച്ചു വരിക​യും അവിട​ങ്ങ​ളിൽ കുറ്റകൃ​ത്യ​വും അക്രമ​വും സാമൂ​ഹിക ക്രമ​ക്കേ​ടും പെരു​കു​ക​യും ചെയ്യും” എന്ന്‌ യു.എസ്‌.എ.-യിലുള്ള പെൻസിൽവേ​നിയ സർവക​ലാ​ശാ​ല​യി​ലെ മാനവ​സ​മു​ദായ ശാസ്‌ത്ര പ്രൊ​ഫസർ ഡഗ്ലസ്‌ മാസി പറഞ്ഞു. ടോക്കി​യോ​യി​ലെ വളർച്ച—അവിടത്തെ ജനസംഖ്യ 2.6 കോടി​യിൽനിന്ന്‌ പെട്ടെ​ന്നു​തന്നെ 3 കോടി​യിൽ എത്തു​മെന്നു പ്രതീ​ക്ഷി​ക്കു​ന്നു—താരത​മ്യേന മന്ദഗതി​യി​ലാ​യി​രു​ന്ന​തി​നാ​ലും അവിടെ വേണ്ടത്ര അടിസ്ഥാന സൗകര്യ​ങ്ങ​ളും സേവന​ങ്ങ​ളും ഉള്ളതി​നാ​ലും നഗരത്തിന്‌ അതു താങ്ങാൻ കഴിഞ്ഞി​ട്ടുണ്ട്‌. മാസി പറയു​ന്ന​ത​നു​സ​രിച്ച്‌ റോമൻ കാലത്തി​നും വിക്ടോ​റി​യൻ കാലഘ​ട്ട​ത്തി​നും ഇടയ്‌ക്ക്‌ ലോക ജനസം​ഖ്യ​യു​ടെ 5 ശതമാനം വരെ മാത്ര​മാ​ണു നഗരങ്ങ​ളിൽ ജീവി​ച്ചി​രു​ന്നത്‌. എന്നാൽ 2015 ആകു​മ്പോ​ഴേ​ക്കും അത്‌ 53 ശതമാനം ആകു​മെന്ന്‌ അദ്ദേഹം കണക്കാ​ക്കു​ന്നു. (g02 6/8)

പുകവലി സ്ഥിരമാ​യി ഉപേക്ഷി​ക്കുക!

“പുകവ​ലി​ക്കു​ന്നവർ എല്ലാവ​രും അതു നിറു​ത്താൻ ശ്രമി​ക്കണം. അതിൽ വിജയി​ക്കു​ന്നെ​ങ്കിൽ വീണ്ടും ആ ശീലം തുടങ്ങു​ന്നി​ല്ലെന്ന്‌ ഉറപ്പു വരുത്തുക” എന്ന്‌ സ്വീഡ​നി​ലെ സ്റ്റോക്ക്‌ഹോ​മി​ലുള്ള ‘നാഷണൽ ഇൻസ്റ്റി​റ്റ്യൂട്ട്‌ ഫോർ വർക്കിങ്‌ ലൈഫി’ലെ ബോ ല്യൂൻബാഹ്‌ മുന്നറി​യി​പ്പു നൽകുന്നു. എന്തു​കൊണ്ട്‌? കാരണം, ഒരിക്കൽ പുകവ​ലി​ച്ചി​രു​ന്നവർ അതു നിറു​ത്തി​യിട്ട്‌ വീണ്ടും ആ ശീലം തുടങ്ങു​മ്പോൾ അത്‌ പുകവലി ഒരിക്ക​ലും ഉപേക്ഷി​ക്കാ​തി​രു​ന്ന​വ​രെ​ക്കാൾ അധിക​മാ​യി അവരുടെ ശ്വാസ​കോശ പ്രവർത്ത​നത്തെ തകരാ​റി​ലാ​ക്കി​യേ​ക്കാം. 35-നും 68-നും ഇടയ്‌ക്കു പ്രായ​മുള്ള 1,116 സ്‌ത്രീ​പു​രു​ഷ​ന്മാ​രെ ഉൾപ്പെ​ടു​ത്തി നടത്തിയ പത്തു വർഷത്തെ ഒരു പഠനം ആ കാലഘ​ട്ട​ത്തി​ലു​ട​നീ​ളം പുകവ​ലി​ച്ച​വ​രു​ടെ ശ്വാസ​കോശ പ്രവർത്ത​ന​ത്തി​നു 3 ശതമാനം തകരാറു സംഭവി​ച്ച​താ​യി കാണി​ച്ച​പ്പോൾ ഒരു വർഷ​ത്തേ​ക്കോ അതി​ലേറെ കാല​ത്തേ​ക്കോ പുകവലി നിറു​ത്തി​യിട്ട്‌ അതു വീണ്ടും തുടങ്ങി​യ​വ​രു​ടെ കാര്യ​ത്തിൽ അത്‌ 5 ശതമാനം ആയിരു​ന്നു. “മുമ്പ്‌ പുകവ​ലി​ച്ചി​രു​ന്ന​യാൾ അതു വീണ്ടും തുടങ്ങു​മ്പോൾ ആദ്യത്തെ ഏതാനും വർഷങ്ങ​ളിൽ ശ്വാസ​കോശ പ്രവർത്ത​ന​ത്തി​ലു​ണ്ടാ​കുന്ന തകരാറു വളരെ വലുതാണ്‌,” ല്യൂൻബാഹ്‌ മുന്നറി​യി​പ്പു നൽകി. “തങ്ങളുടെ ശ്വാസ​കോശ പ്രവർത്ത​ന​ത്തിൽ ഉണ്ടാകുന്ന തകരാറ്‌ പുകവ​ലി​ക്കു​ന്ന​വർക്ക്‌ ഒരിക്ക​ലും പരിഹ​രി​ക്കാൻ കഴിയില്ല.” പത്തു വർഷത്തെ പഠന കാലഘ​ട്ട​ത്തിൽ പുകവ​ലി​ശീ​ലം ഉപേക്ഷി​ക്കു​ന്ന​തിൽ വിജയി​ച്ച​വ​രു​ടെ ശ്വാസ​കോശ പ്രവർത്ത​ന​ത്തിൽ 1 ശതമാനം തകരാറേ സംഭവി​ച്ചു​ള്ളൂ എന്ന്‌ ലണ്ടനിലെ ദ ടൈംസ്‌ റിപ്പോർട്ടു ചെയ്യുന്നു. (g02 6/8)