പ്രാ​ദേ​ശി​ക​മാ​യും ലോക​വ്യാ​പ​ക​മാ​യും ദൈവ​രാ​ജ്യ​പ്ര​വർത്ത​ന​ങ്ങളെ പിന്തു​ണ​യ്‌ക്കുന്ന വിധങ്ങൾ

അന്ത്യനാ​ളു​ക​ളെ​ക്കു​റി​ച്ചുള്ള യേശു​വി​ന്റെ പ്രവചനം സത്യമാ​ക്കി​ത്തീർത്തു​കൊണ്ട്‌ യഹോ​വ​യു​ടെ സാക്ഷികൾ “ഭൂമി​യു​ടെ അതിവി​ദൂ​ര​ഭാ​ഗ​ങ്ങൾവ​രെ​യും” സന്തോ​ഷ​വാർത്ത പ്രസം​ഗി​ക്കുക എന്ന തങ്ങളുടെ ശുശ്രൂഷ നിർവ​ഹി​ക്കു​ന്നു. (പ്രവൃ. 1:8; മത്താ. 24:14) ആത്മീയ​കാ​ര്യ​ങ്ങൾ മറ്റുള്ള​വരെ അറിയി​ക്കുന്ന ഈ പ്രവർത്തനം നടത്തു​ന്ന​തിന്‌ അവർ തങ്ങളുടെ സമയവും ഊർജ​വും ധാരാ​ള​മാ​യി ചെലവ​ഴി​ച്ചി​രി​ക്കു​ന്നു. തന്റെ സഹപ്ര​വർത്ത​കർക്കു​വേണ്ടി കരുതാ​നുള്ള യഹോ​വ​യു​ടെ പ്രാപ്‌തി​യിൽ പൂർണ​മാ​യി ആശ്രയി​ച്ചു​കൊണ്ട്‌ അവർ ജീവി​ത​ത്തിൽ ദൈവ​രാ​ജ്യം ഒന്നാമതു വെക്കുന്നു. (മത്താ. 6:25-34; 1 കൊരി. 3:5-9) ഇങ്ങനെ ചെയ്യു​ന്ന​തി​ലൂ​ടെ ലഭിക്കുന്ന സത്‌ഫ​ലങ്ങൾ തെളി​യി​ക്കു​ന്നത്‌ യഹോ​വ​യു​ടെ അംഗീ​കാ​ര​വും അനു​ഗ്ര​ഹ​വും ഇതി​ന്മേ​ലു​ണ്ടെ​ന്നാണ്‌.

² നമ്മൾ പ്രസം​ഗ​പ്ര​വർത്തനം നടത്തുന്ന രീതികൾ ശ്രദ്ധി​ക്കു​ക​യും ബൈബി​ളും ബൈബി​ള​ധിഷ്‌ഠി​ത​പ്ര​സി​ദ്ധീ​ക​ര​ണ​ങ്ങ​ളും വില ഈടാ​ക്കാ​തെ പൊതു​ജ​ന​ങ്ങൾക്കു നൽകു​ന്നതു കാണു​ക​യും ചെയ്യു​മ്പോൾ ചിലർ ഇങ്ങനെ ചോദി​ക്കാ​റുണ്ട്‌: “ഇതെല്ലാം എങ്ങനെ സാധി​ക്കു​ന്നു?” ബൈബി​ളു​ക​ളും ബൈബിൾപ്ര​സി​ദ്ധീ​ക​ര​ണ​ങ്ങ​ളും അച്ചടിച്ച്‌ പുറത്തി​റ​ക്കു​ന്ന​തി​നു പണച്ചെ​ല​വുണ്ട്‌, ശരിയാണ്‌. അച്ചടി​കാ​ര്യ​ങ്ങൾ നടത്തു​ക​യും പ്രസം​ഗ​പ്ര​വർത്ത​ന​ത്തി​നു മേൽനോ​ട്ടം വഹിക്കു​ക​യും സന്തോ​ഷ​വാർത്ത​യു​ടെ പുരോ​ഗ​മ​ന​ത്തി​നാ​യുള്ള മറ്റു പ്രവർത്ത​നങ്ങൾ നടത്തു​ക​യും ചെയ്യു​ന്നതു ബഥേൽഭ​വ​ന​ങ്ങ​ളി​ലുള്ള ശുശ്രൂ​ഷ​ക​രാണ്‌. ഈ ബഥേൽഭ​വ​നങ്ങൾ പണിയാ​നും നടത്തി​ക്കൊ​ണ്ടു​പോ​കാ​നും പണം കൂടിയേ തീരൂ. കൂടാതെ സർക്കിട്ട്‌ മേൽവി​ചാ​ര​ക​ന്മാർ, വയൽമി​ഷ​ന​റി​മാർ, പ്രത്യേക മുൻനി​ര​സേ​വകർ, പ്രത്യേക മുഴു​സ​മ​യ​സേ​വ​ന​ത്തി​ലുള്ള മറ്റുള്ളവർ എന്നിവരെ അവരുടെ സേവന​ത്തിൽ തുടരാൻ സഹായി​ക്കു​ന്ന​തിന്‌ ഒരു ചെറിയ തുക വീതം അലവൻസാ​യി നൽകാ​റുണ്ട്‌. അതിനും പണം വേണം. ചുരു​ക്കി​പ്പ​റ​ഞ്ഞാൽ നമ്മുടെ കാലത്ത്‌ സന്തോ​ഷ​വാർത്ത പ്രസം​ഗി​ക്ക​ണ​മെ​ങ്കിൽ, അതു പ്രാ​ദേ​ശി​ക​മോ ലോക​വ്യാ​പ​ക​മോ, എങ്ങനെ​യാ​യാ​ലും വലി​യൊ​രു തുകതന്നെ വേണം! ഇതി​നെ​ല്ലാ​മുള്ള പണം വരുന്നത്‌ എവി​ടെ​നി​ന്നാണ്‌?

³ യഹോ​വ​യു​ടെ സാക്ഷി​ക​ളു​ടെ ബൈബിൾ വിദ്യാ​ഭ്യാ​സ​പ​രി​പാ​ടി​യെ വിലമ​തി​ക്കുന്ന പലരും ഈ ലോക​വ്യാ​പ​ക​പ്ര​വർത്ത​ന​ത്തി​നു സന്തോ​ഷ​ത്തോ​ടെ സംഭാവന നൽകുന്നു. എന്നിരു​ന്നാ​ലും പ്രധാ​ന​മാ​യും നമ്മുടെ പ്രവർത്ത​നത്തെ പിന്തു​ണയ്‌ക്കു​ന്നത്‌ യഹോ​വ​യു​ടെ സാക്ഷികൾ തന്നെയാണ്‌. അവരിൽ ചിലർ, സ്വമന​സ്സാ​ലെ നൽകുന്ന സംഭാ​വ​നകൾ യഹോ​വ​യു​ടെ സാക്ഷി​ക​ളു​ടെ പ്രാ​ദേ​ശിക ബ്രാ​ഞ്ചോ​ഫീ​സി​ലേക്ക്‌ അയയ്‌ക്കു​ന്നു. ദൈവ​ത്തി​ന്റെ മുൻകാ​ല​ദാ​സ​ന്മാർ യഹോ​വ​യു​ടെ ആരാധ​നയ്‌ക്കുള്ള ആലയം നിർമി​ക്കാൻ ഉദാര​മായ പിന്തുണ നൽകി. അതേ മനസ്സൊ​രു​ക്ക​മാണ്‌ ഇന്നുള്ള യഹോ​വ​യു​ടെ ജനവും കാണി​ക്കു​ന്നത്‌. (പുറ. 35:20-29; 1 ദിന. 29:9) ചിലർ സ്വത്തുക്കൾ നൽകാൻ വിൽപ​ത്ര​ങ്ങ​ളിൽ വ്യവസ്ഥ ചെയ്യുന്നു. മറ്റു സംഭാ​വ​നകൾ വ്യക്തി​ക​ളിൽനി​ന്നും സഭകളിൽനി​ന്നും സർക്കി​ട്ടു​ക​ളിൽനി​ന്നും ചെറിയ തുകക​ളാ​യി ലഭിക്കു​ന്നു. എല്ലാം​കൂ​ടി ചേരു​മ്പോൾ ശുശ്രൂഷ നിർവ​ഹി​ച്ചു​കൊ​ണ്ടു​പോ​കാ​നുള്ള ഫണ്ടുകൾ സംഭാ​വ​ന​യാ​യി കിട്ടുന്നു.

⁴ തങ്ങളുടെ പണവും മറ്റു വസ്‌തു​വ​ക​ക​ളും പ്രസം​ഗ​പ്ര​വർത്ത​ന​ത്തി​ന്റെ പുരോ​ഗ​തി​ക്കു​വേണ്ടി ഉപയോ​ഗി​ക്കു​ന്നത്‌ ഒരു പദവി​യാ​യി​ട്ടാണ്‌ യഹോ​വ​യു​ടെ സാക്ഷികൾ കാണു​ന്നത്‌. യേശു​വി​നും ശിഷ്യ​ന്മാർക്കും കൂടി ഒരു പണപ്പെ​ട്ടി​യു​ണ്ടാ​യി​രു​ന്ന​താ​യി തിരു​വെ​ഴു​ത്തു​കൾ പറയുന്നു. അതിൽനി​ന്നുള്ള പണം ഉപയോ​ഗി​ച്ചാണ്‌ അവർ ചെലവു​കൾ നടത്തി​യി​രു​ന്നത്‌. (യോഹ. 13:29) യേശു​വി​നെ​യും ശിഷ്യ​ന്മാ​രെ​യും തങ്ങളുടെ വസ്‌തു​വ​ക​കൾകൊണ്ട്‌ പരിച​രി​ച്ചു​പോ​ന്നി​രുന്ന ചില സ്‌ത്രീ​ക​ളെ​ക്കു​റിച്ച്‌ ബൈബിൾ പറയു​ന്നുണ്ട്‌. (മർക്കോ. 15:40, 41; ലൂക്കോ. 8:3) സന്തോ​ഷ​വാർത്ത വ്യാപി​പ്പി​ക്കു​ന്ന​തി​നു താത്‌പ​ര്യ​മു​ള്ള​വ​രും ശുശ്രൂ​ഷ​യിൽ ഒരു പങ്കുണ്ടാ​യി​രി​ക്കാൻ ആഗ്രഹി​ച്ച​വ​രും സ്‌നേ​ഹ​പൂർവം നൽകിയ സാമ്പത്തി​ക​പി​ന്തു​ണ​യും സഹായ​വും പൗലോസ്‌ അപ്പോസ്‌തലൻ നന്ദി​യോ​ടെ സ്വീക​രി​ച്ചി​രു​ന്നു. (ഫിലി. 4:14-16; 1 തെസ്സ. 2:9) തീക്ഷ്‌ണ​ത​യോ​ടെ സേവി​ക്കു​ന്ന​തി​ന്റെ​യും ഔദാ​ര്യ​ത്തോ​ടെ കൊടു​ക്കു​ന്ന​തി​ന്റെ​യും ഈ മുൻകാ​ല​മാ​തൃ​കകൾ ഇന്നത്തെ യഹോ​വ​യു​ടെ സാക്ഷികൾ പിന്തു​ട​രു​ന്നു. അങ്ങനെ എല്ലായി​ട​ത്തു​മുള്ള ശുദ്ധഹൃ​ദ​യർക്കു “ജീവജലം സൗജന്യ​മാ​യി” നൽകാൻ കഴിയു​ന്നു.​—വെളി. 22:17.

⁵ പ്രാ​ദേ​ശി​ക​സ​ഭ​ക​ളു​ടെ ചെലവു​ക​ളും സ്വമന​സ്സാ​ലെ​യുള്ള സംഭാ​വ​ന​കൾകൊ​ണ്ടാ​ണു നടക്കു​ന്നത്‌. ഇവിടെ പണപ്പി​രി​വു​ക​ളില്ല, ഓരോ​രു​ത്ത​രും എത്ര നൽകണ​മെ​ന്നുള്ള ഒരു കണക്കു വെക്കു​ന്നില്ല, പണാഭ്യർഥ​ന​ക​ളു​മില്ല. യോഗ​സ്ഥ​ല​ങ്ങ​ളിൽ സംഭാ​വ​ന​പ്പെ​ട്ടി​കൾ വെച്ചി​ട്ടുണ്ട്‌. “ഓരോ​രു​ത്ത​രും ഹൃദയ​ത്തിൽ നിശ്ചയി​ച്ച​തു​പോ​ലെ” കൊടു​ക്കു​ന്നു.​—2 കൊരി. 9:7.

⁶ സംഭാ​വ​ന​യാ​യി കിട്ടുന്ന പണത്തിൽനിന്ന്‌ ആദ്യം രാജ്യ​ഹാ​ളി​ന്റെ പ്രവർത്ത​ന​ത്തി​നും പരിപാ​ല​ന​ത്തി​നും വേണ്ടത്‌ എടുക്കു​ന്നു. സംഭാ​വ​ന​ത്തു​ക​യിൽ കുറെ ഭാഗം ലോക​വ്യാ​പ​ക​പ്ര​വർത്ത​ന​ത്തി​നാ​യി യഹോ​വ​യു​ടെ സാക്ഷി​ക​ളു​ടെ പ്രാ​ദേ​ശിക ബ്രാ​ഞ്ചോ​ഫീ​സിന്‌ അയച്ചു​കൊ​ടു​ക്കാൻ മൂപ്പന്മാ​രു​ടെ സംഘം തീരു​മാ​നി​ച്ചേ​ക്കാം. ഇതി​ലേ​ക്കുള്ള ഒരു പ്രമേയം സഭ അംഗീ​ക​രി​ക്കു​ന്നു. ഈ വിധത്തിൽ പല സഭകളും ലോക​വ്യാ​പ​ക​പ്ര​വർത്ത​ന​ത്തി​നു പതിവാ​യി സംഭാ​വ​നകൾ നൽകുന്നു. പ്രാ​ദേ​ശി​ക​സ​ഭ​ക​ളിൽ ഓരോ​രോ സമയങ്ങ​ളി​ലു​ണ്ടാ​കുന്ന ആവശ്യങ്ങൾ സംബന്ധിച്ച്‌ എല്ലാവ​രും ശ്രദ്ധയു​ള്ള​വ​രാ​ണെ​ങ്കിൽ സംഭാ​വ​ന​യെ​പ്പറ്റി കൂടെ​ക്കൂ​ടെ അറിയി​പ്പു​കൾ നടത്തേ​ണ്ടി​വ​രില്ല.

⁷ രണ്ടു സഹോ​ദ​ര​ന്മാർ ഓരോ യോഗ​ത്തി​നു ശേഷവും സംഭാ​വ​ന​പ്പെ​ട്ടി​ക​ളി​ലുള്ള തുകകൾ ശേഖരിച്ച്‌ അതിന്റെ രേഖയു​ണ്ടാ​ക്കു​ന്നു. (2 രാജാ. 12:9, 10; 2 കൊരി. 8:20) തുക ബ്രാ​ഞ്ചോ​ഫീ​സി​ലേക്ക്‌ അയയ്‌ക്കു​ക​യോ സഭയുടെ ആവശ്യ​ങ്ങൾക്ക്‌ ഉപയോ​ഗി​ക്കു​ക​യോ ചെയ്യു​ന്ന​തു​വരെ സുരക്ഷി​ത​മാ​യി സൂക്ഷി​ക്കാ​നുള്ള ക്രമീ​ക​ര​ണങ്ങൾ മൂപ്പന്മാ​രു​ടെ സംഘം ചെയ്യുന്നു. സഭാക​ണ​ക്കു​കൾ കൈകാ​ര്യം ചെയ്യുന്ന സഹോ​ദരൻ സംഭാ​വ​ന​യു​ടെ വിവരങ്ങൾ സഭയെ അറിയി​ക്കു​ന്ന​തിന്‌ എല്ലാ മാസവും ഒരു സ്റ്റേറ്റു​മെന്റ്‌ തയ്യാറാ​ക്കു​ന്നു. മൂപ്പന്മാ​രു​ടെ സംഘത്തി​ന്റെ ഏകോ​പകൻ മൂന്നു മാസം കൂടു​മ്പോൾ സഭാക​ണ​ക്കു​കൾ ഓഡിറ്റ്‌ ചെയ്യു​ന്ന​തി​നുള്ള ക്രമീ​ക​ര​ണ​വും ഏർപ്പെ​ടു​ത്തും.

⁸ സമ്മേള​ന​ങ്ങൾക്കും സർക്കി​ട്ടി​ന്റെ മറ്റ്‌ ആവശ്യ​ങ്ങൾക്കും ആയുള്ള ചെലവു​കൾ ആ സർക്കി​ട്ടി​ലെ സഹോ​ദ​രങ്ങൾ നൽകുന്ന സംഭാ​വ​ന​ക​ളാ​ലാ​ണു നിർവ​ഹി​ക്ക​പ്പെ​ടു​ന്നത്‌. സർക്കി​ട്ടി​നു വേണ്ട സംഭാ​വ​നകൾ നൽകാൻ ആഗ്രഹിക്കുന്നവർക്കായി സമ്മേളനസ്ഥലങ്ങളിൽ സംഭാ​വ​ന​പ്പെ​ട്ടി​കൾ വെച്ചി​ട്ടു​ണ്ടാ​കും. കൂടാതെ, സർക്കി​ട്ടി​ന്റെ ചെലവു​കൾക്കാ​യി മറ്റു സമയങ്ങ​ളിൽ സഭകൾക്കും സംഭാ​വ​നകൾ നൽകാ​വു​ന്ന​താണ്‌.

⁹ സാധാ​ര​ണ​ഗ​തി​യിൽ സർക്കി​ട്ടി​ന്റെ ചെലവു​കൾക്കുള്ള പണം കണ്ടെത്താൻ അതാതു സർക്കി​ട്ടു​കൾക്കു​തന്നെ സാധി​ച്ചേ​ക്കും. സർക്കി​ട്ടി​ന്റെ ആവശ്യ​ങ്ങൾക്കു വേണ്ടി​വ​രു​ന്ന​തി​ലും അധികം തുക കൈയി​ലു​ണ്ടെ​ങ്കിൽ അതു ലോക​വ്യാ​പ​ക​പ്ര​വർത്ത​ന​ങ്ങൾക്കാ​യി അയച്ചു​കൊ​ടു​ക്കും. സമ്മേള​ന​ത്തി​ന്റെ ചെലവു​കൾ വഹിക്കാ​നോ അടുത്ത സമ്മേള​ന​ത്തി​ന്റെ പ്രാരം​ഭ​ചെ​ല​വു​കൾക്കോ വേണ്ട പണം (അതായത്‌ ഹാളോ മറ്റോ ബുക്കു ചെയ്യാ​നുള്ള സെക്യൂ​രി​റ്റി നൽകാ​നുള്ള പണം) സർക്കി​ട്ടി​ന്റെ അക്കൗണ്ടി​ലി​ല്ലെ​ങ്കിൽ സംഭാവന നൽകാ​നുള്ള പദവി​യെ​പ്പറ്റി സഭകളെ അറിയി​ക്കാൻ സർക്കിട്ട്‌ മേൽവി​ചാ​രകൻ നിർദേ​ശി​ച്ചേ​ക്കാം. സർക്കിട്ട്‌ ഫണ്ടി​ലേക്കു സഭയു​ടേ​താ​യി എത്ര തുക നൽകാൻ കഴിയു​മെന്നു മൂപ്പന്മാ​രു​ടെ ഓരോ സംഘവും ചർച്ച ചെയ്‌ത്‌ തീരു​മാ​നി​ക്കും. തുടർന്ന്‌ ഒരു പ്രമേയം സഭയിൽ അവതരി​പ്പിച്ച്‌ ആ തുക നൽകു​ന്ന​തി​നു സഭയുടെ അനുമതി തേടും.

¹⁰ സർക്കി​ട്ടി​ലെ മൂപ്പന്മാ​രു​ടെ ശ്രദ്ധയിൽപ്പെ​ടു​ത്തേണ്ട ഏതെങ്കി​ലും സാമ്പത്തി​ക​കാ​ര്യ​ങ്ങൾ ഉയർന്നു​വ​രു​ന്നെ​ങ്കിൽ സർക്കിട്ട്‌ സമ്മേളനം നടക്കുന്ന ദിവസം സർക്കി​ട്ടി​ലെ മൂപ്പന്മാ​രു​ടെ ഒരു യോഗം നടത്തും. സർക്കിട്ടിന്റെ പതിവു​ചെ​ല​വു​കൾ ഒഴികെ മറ്റ്‌ എന്തെങ്കി​ലും കാര്യ​ങ്ങൾക്കു പണം ചെലവാ​ക്കാ​നുള്ള എല്ലാ തീരു​മാ​ന​ങ്ങ​ളും പ്രമേ​യ​ങ്ങ​ളാ​യി അവതരി​പ്പിച്ച്‌ മൂപ്പന്മാ​രു​ടെ അംഗീ​കാ​രം തേടണം. ഈ പ്രമേ​യ​ങ്ങ​ളി​ലെ തുകകൾ കൃത്യ​സം​ഖ്യ​തന്നെ ആയിരി​ക്കണം. സർക്കി​ട്ടി​ന്റെ പണം ഇങ്ങനെ ചെലവ​ഴി​ക്കുന്ന ഓരോ സന്ദർഭ​ത്തി​ലും അത്‌ അംഗീ​കാ​ര​ത്തി​നാ​യി സമർപ്പി​ക്കേ​ണ്ട​താണ്‌.

¹¹ സർക്കി​ട്ടി​ന്റെ അക്കൗണ്ടു​കൾ ക്രമമാ​യി ഓഡിറ്റ്‌ ചെയ്യാ​നുള്ള ക്രമീ​ക​രണം ചെയ്‌തി​ട്ടുണ്ട്‌.

¹² യേശുവിനും ശിഷ്യന്മാർക്കും ഒരു പണപ്പെട്ടിയുണ്ടായിരുന്നതായി നമ്മൾ കണ്ടല്ലോ. അതിന്റെ ഒരു ഉദ്ദേശ്യം ദരി​ദ്രരെ സഹായി​ക്കുക എന്നതാ​യി​രു​ന്നു. (മർക്കോ. 14:3-5; യോഹ. 13:29) ആ ക്രിസ്‌തീയ ഉത്തരവാദിത്വം ഇന്നുമുണ്ട്‌. കാരണം യേശു പറഞ്ഞു: “ദരിദ്രർ എപ്പോ​ഴും നിങ്ങളു​ടെ​കൂ​ടെ​യു​ണ്ട​ല്ലോ.” (മർക്കോ. 14:7) യഹോ​വ​യു​ടെ സാക്ഷികൾ ഇന്ന്‌ ഈ ഉത്തരവാ​ദി​ത്വം നിർവ​ഹി​ക്കു​ന്നത്‌ എങ്ങനെ​യാണ്‌?

¹³ ചില​പ്പോൾ, സഭയിലെ വിശ്വസ്‌ത​രായ സഹോ​ദ​ര​ങ്ങൾക്കു സാമ്പത്തി​ക​പി​ന്തു​ണ​യും മറ്റും ആവശ്യ​മാ​യി​വ​ന്നേ​ക്കാം. പ്രായാ​ധി​ക്യ​മോ, രോഗ​വും വൈക​ല്യ​വും മൂലമുള്ള അവശത​യോ അവരുടെ നിയ​ന്ത്ര​ണ​ത്തിൽപ്പെ​ടാത്ത മറ്റു ദുരി​ത​ങ്ങ​ളോ ഒക്കെയാ​കാം കാരണം. കുടും​ബാം​ഗ​ങ്ങ​ളും ബന്ധുക്ക​ളും ഇങ്ങനെ​യൊ​രു ആവശ്യ​ത്തെ​ക്കു​റിച്ച്‌ അറിയുന്ന മറ്റുള്ള​വ​രും ഒക്കെ അവരെ സഹായി​ക്കാൻ ആഗ്രഹി​ച്ചേ​ക്കാം. യോഹ​ന്നാൻ അപ്പോസ്‌ത​ലന്റെ വാക്കു​കൾക്കു ചേർച്ച​യി​ലാണ്‌ ഇത്‌: “ഒരാൾക്കു വസ്‌തു​വ​ക​ക​ളു​ണ്ടാ​യി​ട്ടും, സഹോ​ദരൻ ബുദ്ധി​മു​ട്ടി​ലാ​ണെന്നു മനസ്സി​ലാ​ക്കു​മ്പോൾ അനുകമ്പ കാണി​ക്കു​ന്നി​ല്ലെ​ങ്കിൽ അയാൾക്കു ദൈവസ്‌നേ​ഹ​മു​ണ്ടെന്ന്‌ എങ്ങനെ പറയാൻ പറ്റും? കുഞ്ഞു​ങ്ങളേ, വാക്കു​കൊ​ണ്ടും നാക്കു​കൊ​ണ്ടും അല്ല, പ്രവൃ​ത്തി​യി​ലും സത്യത്തി​ലും ആണ്‌ നമ്മൾ പരസ്‌പരം സ്‌നേ​ഹി​ക്കേ​ണ്ടത്‌.” (1 യോഹ. 3:17, 18; 2 തെസ്സ. 3:6-12) സാമ്പത്തി​ക​സ​ഹാ​യ​വും മറ്റും ആവശ്യ​മുള്ള വിശ്വസ്‌ത​രായ സഹോ​ദ​ര​ങ്ങളെ സഹായി​ക്കു​ന്ന​തും സംരക്ഷി​ക്കു​ന്ന​തും സത്യാ​രാ​ധ​ന​യിൽ ഉൾപ്പെ​ടു​ന്നു.​—യാക്കോ. 1:27; 2:14-17.

¹⁴ തിമൊ​ഥെ​യൊ​സി​നുള്ള ആദ്യ​ലേ​ഖ​ന​ത്തിൽ പൗലോസ്‌ അപ്പോസ്‌തലൻ അർഹത​യു​ള്ള​വർക്കു ഭൗതി​ക​സ​ഹാ​യം നൽകേ​ണ്ടത്‌ എങ്ങനെ​യെന്നു വിശദീ​ക​രി​ച്ചി​ട്ടുണ്ട്‌. ഈ ഉപദേശം നിങ്ങൾക്ക്‌ 1 തിമൊ​ഥെ​യൊസ്‌ 5:3-21-ൽ വായി​ക്കാം. സ്വന്തം കുടും​ബാം​ഗ​ങ്ങൾക്കു​വേണ്ടി കരുതാ​നുള്ള പ്രാഥ​മി​ക​മായ ഉത്തരവാ​ദി​ത്വം ഓരോ ക്രിസ്‌ത്യാ​നി​ക്കു​മാണ്‌. അതു​കൊണ്ട്‌ പ്രായാ​ധി​ക്യ​വും അവശത​യും ഉള്ള സഹോ​ദ​ര​ങ്ങൾക്ക്‌ അവരുടെ മക്കൾ, കൊച്ചു​മക്കൾ, അടുത്ത ബന്ധുക്കൾ എന്നിവ​രൊ​ക്കെ സഹായം കൊടു​ക്കേ​ണ്ട​തുണ്ട്‌. ചില​പ്പോൾ ഗവൺമെ​ന്റി​ന്റെ​യോ സാമൂ​ഹ്യ​ക്ഷേ​മ​പ​ദ്ധ​തി​ക​ളു​ടെ​യോ കീഴിൽ സാമ്പത്തി​ക​സ​ഹാ​യ​വും മറ്റും ലഭ്യമാ​യി​രി​ക്കാം. അതിനു​വേണ്ടി അപേക്ഷി​ക്കാൻ ബന്ധുക്കൾക്കും മറ്റുള്ള​വർക്കും അവരെ സഹായി​ക്കാ​നാ​കും. ചില അവസര​ങ്ങ​ളിൽ സഭ ഒന്നാകെ ഏതെങ്കി​ലും തരത്തി​ലുള്ള സഹായം നൽകേണ്ട സാഹച​ര്യ​വു​മു​ണ്ടാ​യേ​ക്കാം. ദീർഘ​കാ​ലം വിശ്വസ്‌ത​രാ​യി സേവിച്ച സഹോ​ദ​രീ​സ​ഹോ​ദ​ര​ന്മാ​രു​ടെ കാര്യ​ത്തി​ലാണ്‌ ഇത്‌. കുടും​ബാം​ഗ​ങ്ങ​ളും മറ്റു ബന്ധുക്ക​ളും സഹായ​ത്തി​നി​ല്ലാ​തെ​വ​രി​ക​യോ ഗവൺമെ​ന്റിൽനിന്ന്‌ മതിയായ സഹായം കിട്ടാ​തെ​വ​രി​ക​യോ മറ്റോ ചെയ്യുന്ന സാഹച​ര്യ​ങ്ങ​ളിൽ, അങ്ങനെ​യുള്ള വ്യക്തി​കൾക്കു വേണ്ടത​ര​ത്തി​ലുള്ള സഹായം നൽകാൻ മൂപ്പന്മാ​രു​ടെ സംഘം തീരു​മാ​നി​ച്ചേ​ക്കാം. തങ്ങളുടെ വസ്‌തു​വ​കകൾ സഹായം ആവശ്യ​മു​ള്ള​വ​രു​മാ​യി പങ്കു​വെ​ക്കു​ന്നത്‌ ഒരു പദവി​യാ​യി​ട്ടാ​ണു ക്രിസ്‌ത്യാ​നി​കൾ കാണു​ന്നത്‌.

¹⁵ ഈ അന്ത്യനാ​ളു​ക​ളിൽ സർവസാ​ധാ​ര​ണ​മാ​യി​രി​ക്കുന്ന ഉപദ്ര​വങ്ങൾ, യുദ്ധങ്ങൾ, ഭൂകമ്പങ്ങൾ, വെള്ള​പ്പൊ​ക്കം, ക്ഷാമം, മറ്റു ദുരന്തങ്ങൾ തുടങ്ങി​യ​വ​മൂ​ലം മിക്ക സഹോ​ദ​ര​ങ്ങൾക്കും എപ്പോ​ഴെ​ങ്കി​ലു​മൊ​ക്കെ സഹായം ആവശ്യ​മാ​യി വന്നേക്കാം. (മത്താ. 24:7-9) ഇതു​പോ​ലുള്ള സാഹച​ര്യ​ങ്ങ​ളിൽ പ്രാ​ദേ​ശി​ക​സ​ഭ​കൾക്കു പരസ്‌പരം പങ്കു​വെ​ക്കാൻ ഒന്നും കണ്ടെന്നു​വ​രില്ല. അങ്ങനെ​യു​ള്ള​പ്പോൾ ഭരണസം​ഘം മറ്റു സ്ഥലങ്ങളി​ലുള്ള സഹോ​ദ​ര​ങ്ങളെ ഏകോ​പി​പ്പിച്ച്‌ ആവശ്യ​മായ സഹായം നൽകുന്നു. ഒരു ക്ഷാമകാ​ലത്ത്‌ യഹൂദ്യ​യി​ലുള്ള സഹോ​ദ​ര​ങ്ങൾക്ക്‌ ഏഷ്യാ​മൈ​ന​റി​ലെ ക്രിസ്‌ത്യാ​നി​കൾ ഭക്ഷണം എത്തിച്ചു​കൊ​ടു​ത്ത​തു​പോ​ലെ​യാണ്‌ ഇത്‌. (1 കൊരി. 16:1-4; 2 കൊരി. 9:1-5) അവരുടെ മാതൃക അനുക​രി​ക്കു​മ്പോൾ സഹോ​ദ​ര​ങ്ങ​ളോ​ടുള്ള നമ്മുടെ സ്‌നേഹം നമ്മൾ തെളി​യി​ച്ചു​കാ​ണി​ക്കു​ക​യാണ്‌! നമ്മൾ യേശു​ക്രിസ്‌തു​വി​ന്റെ യഥാർഥ​ശി​ഷ്യ​ന്മാ​രാ​ണെന്നു കാണി​ച്ചു​കൊ​ടു​ക്കു​ക​യാണ്‌!​—യോഹ. 13:35.

¹⁶ ദൈവ​രാ​ജ്യ​സ​ന്ദേശം വ്യാപി​പ്പി​ക്കു​ന്ന​തിൽ ബൈബി​ളും ബൈബി​ള​ധിഷ്‌ഠി​ത​പ്ര​സി​ദ്ധീ​ക​ര​ണ​ങ്ങ​ളും ഒരു പ്രധാ​ന​പങ്കു വഹിക്കു​ന്നുണ്ട്‌. സഭയിൽ പ്രസി​ദ്ധീ​ക​ര​ണ​ങ്ങ​ളു​ടെ കാര്യം നോക്കാൻ മൂപ്പന്മാ​രു​ടെ സംഘം സാധാ​ര​ണ​യാ​യി ഒരു ശുശ്രൂ​ഷാ​ദാ​സനെ നിയമി​ക്കു​ന്നു. അത്തരം ചുമത​ല​യുള്ള സഹോ​ദ​ര​ന്മാർ അവരുടെ ഉത്തരവാ​ദി​ത്വം ഗൗരവ​മാ​യി എടുക്കണം. അവർ കൃത്യ​മായ രേഖകൾ സൂക്ഷി​ക്കണം. അങ്ങനെ​യാ​കു​മ്പോൾ സഭയുടെ ആവശ്യം നിറ​വേ​റ്റാൻ മതിയായ അളവിൽ പ്രസി​ദ്ധീ​ക​ര​ണങ്ങൾ എപ്പോ​ഴും സ്റ്റോക്കു​ണ്ടാ​കും.

¹⁷ സമർപ്പി​ത​ക്രിസ്‌ത്യാ​നി​ക​ളെന്ന നിലയിൽ നമ്മുടെ സമയം, മാനസി​ക​വും ശാരീ​രി​ക​വും ആയ കഴിവു​കൾ, പ്രത്യേ​ക​പ്രാപ്‌തി​കൾ, വസ്‌തു​വ​കകൾ, എന്തിന്‌ ജീവൻപോ​ലും ദൈവ​ത്തിൽനി​ന്നുള്ള ദാനങ്ങ​ളാ​ണെ​ന്നും ഇവയെ​ല്ലാം ദൈവ​സേ​വ​ന​ത്തിൽ ഉപയോ​ഗി​ക്കാ​നു​ള്ള​താ​ണെ​ന്നും നമ്മൾ തിരി​ച്ച​റി​യു​ന്നു. (ലൂക്കോ. 17:10; 1 കൊരി. 4:7) നമ്മുടെ വസ്‌തു​വ​ക​ക​ളും മറ്റു വിഭവ​ങ്ങ​ളും ഉചിത​മാ​യി ഉപയോ​ഗി​ക്കു​മ്പോൾ നമ്മൾ യഹോ​വ​യോ​ടുള്ള സ്‌നേ​ഹ​ത്തി​ന്റെ ആഴം പ്രകടി​പ്പി​ക്കു​ക​യാണ്‌. നമ്മുടെ വില​യേ​റിയ വസ്‌തു​ക്കൾകൊണ്ട്‌ യഹോ​വയെ ബഹുമാ​നി​ക്കാൻ നമ്മൾ ആഗ്രഹി​ക്കു​ന്നു. മുഴു​ദേ​ഹി​യോ​ടെ​യുള്ള സമർപ്പ​ണ​ത്തി​ന്റെ​യും ഭക്തിയു​ടെ​യും തെളി​വാ​യി നമ്മൾ നൽകു​ന്നത്‌ എന്തും യഹോ​വയെ പ്രസാ​ദി​പ്പി​ക്കു​മെ​ന്നും നമുക്ക്‌ അറിയാം. (സുഭാ. 3:9; മർക്കോ. 14:3-9; ലൂക്കോ. 21:1-4; കൊലോ. 3:23, 24) യേശു ഇങ്ങനെ പറഞ്ഞു: “സൗജന്യ​മാ​യി നിങ്ങൾക്കു ലഭിച്ചു; സൗജന്യ​മാ​യി​ത്തന്നെ കൊടു​ക്കുക.” (മത്താ. 10:8) ഇങ്ങനെ നമുക്കുള്ള സകലവും, നമ്മെത്ത​ന്നെ​യും, യഹോ​വ​യു​ടെ സേവന​ത്തിൽ വിട്ടു​കൊ​ടു​ക്കു​മ്പോൾ അതിരറ്റ സന്തോ​ഷ​വും ചാരി​താർഥ്യ​വും നമുക്കു ലഭിക്കും.​—പ്രവൃ. 20:35.