മനുഷ്യ​വർഗ​ത്തി​ന്റെ അത്ഭുത രോഗ​ശാ​ന്തി സമീപി​ച്ചി​രി​ക്കു​ന്നു

“ഇങ്ങനെ ഒരുനാ​ളും കണ്ടിട്ടില്ല.” യേശു ഒരു തളർവാ​ത​രോ​ഗിക്ക്‌ അത്ഭുത​ക​ര​മാ​യി തത്‌ക്ഷണ രോഗ​ശാ​ന്തി വരുത്തി​യ​പ്പോൾ ദൃക്‌സാ​ക്ഷി​കൾ പ്രതി​ക​രി​ച്ചത്‌ അങ്ങനെ​യാ​യി​രു​ന്നു. (മർക്കൊസ്‌ 2:12) യേശു അന്ധരെ​യും ഊമ​രെ​യും മുടന്ത​രെ​യും സുഖ​പ്പെ​ടു​ത്തി. യേശു​വി​ന്റെ അനുഗാ​മി​ക​ളും അതു​പോ​ലുള്ള കൃത്യങ്ങൾ നിർവ​ഹി​ച്ചു. ഏതു ശക്തിയാ​ലാണ്‌ യേശു അതു ചെയ്‌തത്‌? അതിൽ വിശ്വാ​സ​ത്തി​നുള്ള പങ്കെന്താ​യി​രു​ന്നു? ഒന്നാം നൂറ്റാ​ണ്ടി​ലെ ഈ സംഭവങ്ങൾ ഇന്നത്തെ അത്ഭുത രോഗ​ശാ​ന്തി​യു​ടെ​മേൽ എന്തു വെളിച്ചം വീശുന്നു?—മത്തായി 15:30, 31.

“നിന്റെ വിശ്വാ​സം നിന്നെ രക്ഷിച്ചി​രി​ക്കു​ന്നു”

12 വർഷമാ​യി രക്തസ്രാ​വം ഉണ്ടായി​രുന്ന ഒരു സ്‌ത്രീ​യെ സുഖ​പ്പെ​ടു​ത്തി​യ​തി​നു​ശേഷം യേശു അവളോ​ടു പറഞ്ഞു: “നിന്റെ വിശ്വാ​സം നിന്നെ രക്ഷിച്ചി​രി​ക്കു​ന്നു.” ഈ വാക്യ​ത്തോട്‌ അത്ഭുത രോഗ​ശാ​ന്തി ശുശ്രൂ​ഷ​കർക്ക്‌ ഒരു പ്രത്യേക മമതയാണ്‌. (ലൂക്കൊസ്‌ 8:43-48) അവളുടെ വിശ്വാ​സം നിമി​ത്ത​മാണ്‌ രോഗ​ശാ​ന്തി ലഭിച്ചത്‌ എന്നാണോ യേശു​വി​ന്റെ പ്രസ്‌താ​വന സൂചി​പ്പി​ക്കു​ന്നത്‌? ഇന്നു നടക്കു​ന്ന​തു​പോ​ലുള്ള “വിശ്വാസ രോഗ​ശാ​ന്തി”യുടെ ഒരു ദൃഷ്ടാ​ന്ത​മാ​യി​രു​ന്നോ അത്‌?

ബൈബിൾ വിവരണം ശ്രദ്ധ​യോ​ടെ വായി​ക്കു​ന്നെ​ങ്കിൽ, രോഗ​ശാ​ന്തി ലഭിക്കു​ന്ന​തി​നു രോഗി​കൾ ആദ്യം തങ്ങളുടെ വിശ്വാ​സം പ്രഖ്യാ​പി​ക്ക​ണ​മെന്ന്‌ യേശു​വും ശിഷ്യ​ന്മാ​രും മിക്ക സന്ദർഭ​ങ്ങ​ളി​ലും ആവശ്യ​പ്പെ​ട്ടി​രു​ന്നി​ല്ലെന്നു നമുക്കു കാണാ​നാ​കും. മേൽപ്ര​സ്‌താ​വിച്ച സ്‌ത്രീ വന്ന്‌, യേശു​വി​നോ​ടു യാതൊ​ന്നും സംസാ​രി​ക്കാ​തെ, പിന്നിൽനിന്ന്‌ യേശു​വി​ന്റെ വസ്‌ത്രം രഹസ്യ​മാ​യി തൊടു​ക​യാ​യി​രു​ന്നു. “ഉടനെ അവളുടെ രക്തസ്രവം നിന്നു​പോ​യി.” മറ്റൊരു സന്ദർഭ​ത്തിൽ തന്നെ അറസ്റ്റ്‌ ചെയ്യാൻ വന്നവരിൽ ഒരുവനെ യേശു സുഖ​പ്പെ​ടു​ത്തി. താൻ ആരെന്ന്‌ അറിയി​ല്ലാ​യി​രുന്ന ഒരുവ​നെ​യും യേശു സുഖ​പ്പെ​ടു​ത്തി.—ലൂക്കൊസ്‌ 22:50, 51; യോഹ​ന്നാൻ 5:5-9, 13; 9:24-34.

അപ്പോൾ, വിശ്വാ​സം വഹിച്ച പങ്കെന്ത്‌? യേശു​വും അവന്റെ ശിഷ്യ​ന്മാ​രും സോർ സീദോൻ പ്രവി​ശ്യ​യി​ലാ​യി​രു​ന്ന​പ്പോൾ, ഒരു ഫൊയ്‌നീ​ക്യ​ക്കാ​രി വന്ന്‌ ഉച്ചത്തിൽ അപേക്ഷി​ച്ചു: “കർത്താവേ, ദാവീ​ദ്‌പു​ത്രാ, എന്നോടു കരുണ തോ​ന്നേ​ണമേ; എന്റെ മകൾക്കു ഭൂതോ​പ​ദ്രവം കഠിന​മാ​യി​രി​ക്കു​ന്നു.” എന്നാൽ “കർത്താവേ, എന്നോടു കരുണ തോ​ന്നേ​ണമേ”! എന്ന്‌ അപേക്ഷി​ക്കുന്ന അവളുടെ നിരാശ എത്രമാ​ത്ര​മെന്നു വിഭാവന ചെയ്യുക. കനിവു തോന്നി യേശു മറുപടി പറഞ്ഞു: “സ്‌ത്രീ​യേ, നിന്റെ വിശ്വാ​സം വലിയതു; നിന്റെ ഇഷ്ടം​പോ​ലെ നിനക്കു ഭവിക്കട്ടെ.” അവളുടെ പുത്രിക്ക്‌ “ആ നാഴി​ക​മു​തൽ” സൗഖ്യം വന്നു. (മത്തായി 15:21-28) വ്യക്തമാ​യും, വിശ്വാ​സം ഉൾപ്പെ​ട്ടി​രു​ന്നു, എന്നാൽ ആരുടെ വിശ്വാ​സം? രോഗി​യായ കുട്ടി​യു​ടെയല്ല, മാതാ​വി​ന്റെ വിശ്വാ​സ​ത്തെ​യാ​യി​രു​ന്നു യേശു പ്രശം​സി​ച്ചത്‌. എന്തിലുള്ള വിശ്വാ​സം? യേശു​വി​നെ “കർത്താവേ, ദാവീ​ദ്‌പു​ത്രാ” എന്ന്‌ അഭിസം​ബോ​ധന ചെയ്യു​ക​വഴി, യേശു വാഗ്‌ദത്ത മിശി​ഹാ​യാ​ണെന്ന്‌ ആ സ്‌ത്രീ പരസ്യ​മാ​യി അംഗീ​ക​രി​ക്കു​ക​യാ​യി​രു​ന്നു. ദൈവ​ത്തി​ലുള്ള വിശ്വാ​സ​ത്തി​ന്റെ ലളിത​മായ പ്രകട​ന​മോ സൗഖ്യ​മാ​ക്കു​ന്ന​വന്റെ ശക്തിയി​ലുള്ള വിശ്വാ​സ​മോ ആയിരു​ന്നില്ല അത്‌. “നിന്റെ വിശ്വാ​സം നിന്നെ രക്ഷിച്ചി​രി​ക്കു​ന്നു” എന്ന്‌ യേശു പറഞ്ഞ​പ്പോൾ, അവൻ മിശി​ഹാ​യാ​ണെ​ന്നുള്ള വിശ്വാ​സ​മി​ല്ലെ​ങ്കിൽ രോഗ​ശാ​ന്തി ലഭിക്കാ​നാ​യി രോഗ​ബാ​ധി​തർ അവന്റെ അടു​ത്തേക്കു വരുമാ​യി​രു​ന്നില്ല എന്നാണ്‌ അവൻ അർഥമാ​ക്കി​യത്‌.

ഈ തിരു​വെ​ഴു​ത്തു ദൃഷ്ടാ​ന്ത​ങ്ങ​ളെ​ടു​ത്താൽ, ഇന്നു സാധാ​ര​ണ​മാ​യി കാണു​ന്ന​തോ അവകാ​ശ​പ്പെ​ടു​ന്ന​തോ ആയ അത്ഭുത രോഗ​ശാ​ന്തി യേശു പ്രവർത്തിച്ച രോഗ​ശാ​ന്തി​യിൽനിന്ന്‌ എത്രയോ വ്യത്യ​സ്‌ത​മാ​ണെന്ന്‌ നമുക്കു കാണാ​നാ​കും. ആക്രോ​ശ​ങ്ങ​ളും മന്ത്രോ​ച്ചാ​ര​ണ​വും രോദ​ന​വും മോഹാ​ല​സ്യ​വും പോലുള്ള ഭയമു​ള​വാ​ക്കുന്ന വികാ​ര​പ്ര​ക​ട​ന​ങ്ങ​ളൊ​ന്നും ആളുകൾക്കു​ണ്ടാ​യി​രു​ന്നില്ല. നാടകീ​യ​മായ ഉന്മാദ​ചേ​ഷ്ട​ക​ളൊ​ന്നും യേശു​വി​ന്റെ ഭാഗത്തും ഉണ്ടായി​രു​ന്നില്ല. അതിലു​പരി, രോഗി​കൾക്കു വിശ്വാ​സ​മി​ല്ലെ​ന്നോ കാണിക്ക പോ​രെ​ന്നോ പറഞ്ഞ്‌ രോഗ​ശാ​ന്തി വരുത്താ​തെ യേശു തടിത​പ്പി​യു​മില്ല.

ദൈവ​ശ​ക്തി​യാ​ലുള്ള സൗഖ്യ​മാ​ക്ക​ലു​കൾ

യേശു​വും ശിഷ്യ​ന്മാ​രും രോഗ​ശാ​ന്തി വരുത്തി​യ​തെ​ങ്ങനെ? “സൌഖ്യ​മാ​ക്കു​വാൻ കർത്താ​വി​ന്റെ ശക്തി അവനോ​ടു​കൂ​ടെ ഉണ്ടായി​രു​ന്നു,” ബൈബിൾ ഉത്തരം പറയുന്നു. (ലൂക്കൊസ്‌ 5:17) ഒരു രോഗ​ശാ​ന്തി നടന്ന​ശേഷം, ലൂക്കൊസ്‌ 9:43 [പി.ഒ.സി. ബൈബിൾ] പറയുന്നു: “ദൈവ​ത്തി​ന്റെ മഹത്തായ ശക്തി​യെ​ക്കു​റിച്ച്‌ എല്ലാവ​രും അത്ഭുത​പ്പെട്ടു.” ഉചിത​മാ​യും, സൗഖ്യ​മാ​ക്കു​ന്ന​വ​നെന്ന നിലയിൽ യേശു തന്നി​ലേ​ക്കു​തന്നെ ശ്രദ്ധ തിരി​ച്ചു​വി​ട്ടില്ല. ഒരു സന്ദർഭ​ത്തിൽ, ഭൂതോ​പ​ദ്ര​വ​ത്തിൽനി​ന്നു സ്വത​ന്ത്ര​നാ​ക്കിയ ഒരു മനുഷ്യ​നോട്‌ അവൻ പറഞ്ഞു: “നിന്റെ വീട്ടിൽ നിനക്കു​ള്ള​വ​രു​ടെ അടുക്കൽ ചെന്നു, കർത്താവു [“യഹോവ,” NW] നിനക്കു ചെയ്‌തതു ഒക്കെയും നിന്നോ​ടു കരുണ​കാ​ണി​ച്ച​തും പ്രസ്‌താ​വിക്ക.”—മർക്കൊസ്‌ 5:19.

യേശു​വും അപ്പോ​സ്‌ത​ല​ന്മാ​രും ദൈവ​ത്തി​ന്റെ ശക്തിയാ​ലാ​ണു രോഗ​ശാ​ന്തി വരുത്തി​യത്‌. അതു​കൊ​ണ്ടു​തന്നെ രോഗ​ശാ​ന്തി ലഭിക്കു​ന്ന​യാൾക്ക്‌ വിശ്വാ​സം എല്ലായ്‌പോ​ഴും ആവശ്യ​മാ​യി​രു​ന്നി​ല്ലെന്നു മനസ്സി​ലാ​ക്കാൻ എളുപ്പ​മാണ്‌. എന്നിരു​ന്നാ​ലും, രോഗ​ശാ​ന്തി​ക്കാ​രനു ശക്തമായ വിശ്വാ​സം ആവശ്യ​മാ​യി​രു​ന്നു. അതു​കൊണ്ട്‌, വളരെ ശക്തിയുള്ള ഒരു ഭൂതത്തെ പുറത്താ​ക്കാൻ യേശു​വി​ന്റെ അനുഗാ​മി​കൾക്കു കഴിയാ​തെ​വ​ന്ന​പ്പോൾ, യേശു അവരോട്‌ അതിന്റെ കാരണം പറയു​ക​യു​ണ്ടാ​യി: “നിങ്ങളു​ടെ അല്‌പ​വി​ശ്വാ​സം നിമി​ത്ത​മ​ത്രേ.”—മത്തായി 17:20.

അത്ഭുത രോഗ​ശാ​ന്തി​യു​ടെ ഉദ്ദേശ്യം

തന്റെ ഭൗമിക ശുശ്രൂ​ഷ​യി​ലു​ട​നീ​ളം യേശു അനേകം രോഗ​ശാ​ന്തി​കൾ വരുത്തി​യെ​ങ്കി​ലും, അവന്റേത്‌ മുഖ്യ​മാ​യും ഒരു ‘രോഗ​ശാ​ന്തി ശുശ്രൂഷ’യായി​രു​ന്നില്ല. അവനെ സംബന്ധി​ച്ചി​ട​ത്തോ​ളം “രാജ്യ​ത്തി​ന്റെ സുവി​ശേഷം പ്രസം​ഗി​ക്കു”ന്നതിനാ​യി​രു​ന്നു ഒന്നാം സ്ഥാനം. അത്ഭുത രോഗ​ശാ​ന്തി​ക്കു രണ്ടാം സ്ഥാനമേ ഉണ്ടായി​രു​ന്നു​ള്ളൂ. മാത്രമല്ല, അതിനാ​യി അവൻ ആളുക​ളോട്‌ ഒരിക്ക​ലും കൂലി​യോ സംഭാ​വ​ന​യോ ആവശ്യ​പ്പെ​ട്ടി​രു​ന്നു​മില്ല. (മത്തായി 9:35) ഒരവസ​ര​ത്തിൽ “അവൻ അവരെ കൈ​ക്കൊ​ണ്ടു ദൈവ​രാ​ജ്യ​ത്തെ​ക്കു​റി​ച്ചു അവരോ​ടു സംസാ​രി​ക്ക​യും രോഗ​ശാ​ന്തി വേണ്ടി​യ​വരെ സൌഖ്യ​മാ​ക്കു​ക​യും ചെയ്‌തു” എന്നു വിവരണം പറയുന്നു. (ലൂക്കൊസ്‌ 9:11) സുവി​ശേഷ വിവര​ണ​ങ്ങ​ളിൽ, യേശു​വി​നെ പലപ്പോ​ഴും അഭിസം​ബോ​ധന ചെയ്‌തി​രി​ക്കു​ന്നത്‌ “ഗുരോ” എന്നാണ്‌, എന്നാൽ ഒരിക്കൽപ്പോ​ലും “രോഗ​ശാ​ന്തി​ക്കാ​രാ” എന്നു വിളി​ച്ചി​ട്ടില്ല.

അപ്പോൾ, യേശു എന്തിനാണ്‌ അത്ഭുത രോഗ​ശാ​ന്തി വരുത്തി​യത്‌? മുഖ്യ​മാ​യും താൻ വാഗ്‌ദത്ത മിശി​ഹാ​യാ​ണെന്നു സ്ഥാപി​ക്കാ​നാ​യി​രു​ന്നു. സ്‌നാപക യോഹ​ന്നാൻ അന്യാ​യ​മാ​യി തടവി​ലാ​ക്ക​പ്പെ​ട്ട​പ്പോൾ, ദൈവം തന്നോട്‌ ആവശ്യ​പ്പെ​ട്ടി​രി​ക്കു​ന്നത്‌ താൻ നിവർത്തി​ച്ചി​രി​ക്കു​ന്നു​വെന്ന്‌ ഉറപ്പാ​ക്കാൻ അവൻ ആഗ്രഹി​ച്ചു. അവൻ ശിഷ്യ​ന്മാ​രെ അയച്ച്‌ യേശു​വി​നോ​ടു ചോദി​ച്ചു: ‘വരുവാ​നു​ള്ളവൻ നീയോ, ഞങ്ങൾ മറെറാ​രു​വനെ കാത്തി​രി​ക്ക​ണ​മോ?’ യോഹ​ന്നാ​ന്റെ ശിഷ്യ​ന്മാ​രോട്‌ യേശു പറഞ്ഞതു ശ്രദ്ധി​ക്കുക: “കുരുടർ കാണുന്നു; മുടന്തർ നടക്കുന്നു; കുഷ്‌ഠ​രോ​ഗി​കൾ ശുദ്ധരാ​യി​ത്തീ​രു​ന്നു; ചെകിടർ കേൾക്കു​ന്നു; മരിച്ചവർ ഉയിർക്കു​ന്നു; ദരി​ദ്ര​രോ​ടു സുവി​ശേഷം അറിയി​ക്കു​ന്നു എന്നിങ്ങനെ നിങ്ങൾ കേൾക്ക​യും കാണു​ക​യും ചെയ്യു​ന്നതു യോഹ​ന്നാ​നെ ചെന്നു അറിയി​പ്പിൻ.”—മത്തായി 11:2-5.

അതേ, യേശു രോഗ​ശാ​ന്തി മാത്രമല്ല, സുവി​ശേ​ഷ​ങ്ങ​ളിൽ രേഖ​പ്പെ​ടു​ത്തി​യി​രി​ക്കുന്ന മറ്റ്‌ അത്ഭുത​പ്ര​വൃ​ത്തി​ക​ളും നിർവ​ഹി​ച്ചു​വെന്ന വസ്‌തുത വാഗ്‌ദത്ത മിശി​ഹാ​യായ “വരുവാ​നു​ള്ളവൻ” അവൻത​ന്നെ​യെന്ന്‌ ഉറപ്പായി സ്ഥാപിച്ചു. ആരും “മറെറാ​രു​വനെ” പ്രതീ​ക്ഷി​ക്കേ​ണ്ട​തി​ല്ലാ​യി​രു​ന്നു.

ഇന്നത്തെ അത്ഭുത രോഗ​ശാ​ന്തി​യോ?

അപ്പോൾ, അത്ഭുത രോഗ​ശാ​ന്തി​യി​ലൂ​ടെ ഇന്നു ദൈവം തന്റെ ശക്തി തെളി​യി​ക്കാൻ നാം പ്രതീ​ക്ഷി​ക്ക​ണ​മോ? വേണ്ട. ദൈവ​ത്തി​ന്റെ ശക്തിയാൽ യേശു പ്രവർത്തിച്ച അത്ഭുത​ങ്ങ​ളി​ലൂ​ടെ, ദൈവം അയയ്‌ക്കു​മെന്നു വാഗ്‌ദാ​നം ചെയ്‌തി​രുന്ന മിശി​ഹാ​യാണ്‌ താനെന്ന്‌ സംശയാ​തീ​ത​മാ​യി യേശു സ്ഥാപി​ച്ചി​ട്ടുണ്ട്‌. എല്ലാവർക്കും വായി​ക്കു​ന്ന​തി​നാ​യി യേശു​വി​ന്റെ അത്ഭുതങ്ങൾ ബൈബി​ളിൽ രേഖ​പ്പെ​ടു​ത്തി​യി​ട്ടു​മുണ്ട്‌. ആളുക​ളു​ടെ ഓരോ തലമു​റ​യി​ലും അത്തരം പ്രവൃ​ത്തി​കൾ ആവർത്തി​ച്ചു​കൊണ്ട്‌ തന്റെ ശക്തി തെളി​യി​ക്കേ​ണ്ട​യാ​വ​ശ്യം ദൈവ​ത്തി​നില്ല.

രസകര​മെ​ന്നു​പ​റ​യട്ടെ, രോഗ​ശാ​ന്തി​യും മറ്റ്‌ അത്ഭുത​ങ്ങ​ളും എല്ലാവ​രി​ലും ബോധ്യം വരുത്തി​യില്ല. യേശു​വി​ന്റെ അത്ഭുതങ്ങൾ നേരിട്ടു കണ്ടവരിൽ ചിലർപോ​ലും അവനു സ്വർഗീയ പിതാ​വി​ന്റെ പിൻബ​ല​മു​ണ്ടാ​യി​രു​ന്നു​വെന്നു വിശ്വ​സി​ച്ചില്ല. “അവർ കാൺകെ അവൻ ഇത്ര വളരെ അടയാ​ള​ങ്ങളെ ചെയ്‌തി​ട്ടും അവർ അവനിൽ വിശ്വ​സി​ച്ചില്ല.” (യോഹ​ന്നാൻ 12:37) അതു​കൊ​ണ്ടാണ്‌, ഒന്നാം നൂറ്റാ​ണ്ടി​ലെ ക്രിസ്‌തീയ സഭയി​ലുള്ള പല അംഗങ്ങൾക്കും ദൈവം കൊടു​ത്തി​രുന്ന പ്രവച​ന​വരം, ഭാഷാ​വരം, രോഗ​ശാ​ന്തി​വരം ഇത്യാദി പലവിധ അത്ഭുത​വ​ര​ങ്ങ​ളെ​ക്കു​റി​ച്ചും ചർച്ച​ചെ​യ്‌ത​ശേഷം പൗലൊസ്‌ അപ്പോ​സ്‌തലൻ ഇപ്രകാ​രം എഴുതാൻ നിശ്വ​സ്‌ത​നാ​യത്‌: “പ്രവച​ന​വ​ര​മോ, അതു നീങ്ങി​പ്പോ​കും; ഭാഷാ​വ​ര​മോ, അതു നിന്നു​പോ​കും; ജ്ഞാനമോ, അതു നീങ്ങി​പ്പോ​കും. അംശമാ​യി മാത്രം നാം അറിയു​ന്നു; അംശമാ​യി മാത്രം പ്രവചി​ക്കു​ന്നു; പൂർണ്ണ​മാ​യതു വരു​മ്പോ​ഴോ അംശമാ​യതു നീങ്ങി​പ്പോ​കും.”—1 കൊരി​ന്ത്യർ 12:28-31; 13:8-10.

തീർച്ച​യാ​യും, ദൈവ​ത്തിൽ വിശ്വാ​സ​മു​ണ്ടാ​യി​രി​ക്കു​ന്നത്‌ നമ്മുടെ ക്ഷേമത്തി​നു മർമ​പ്ര​ധാ​ന​മാണ്‌. എന്നിരു​ന്നാ​ലും, രോഗ​ശാ​ന്തി സംബന്ധിച്ച വ്യാജ വാഗ്‌ദാ​ന​ങ്ങ​ളിൽ വിശ്വ​സി​ക്കു​ന്നവൻ നിരാ​ശ​നാ​കേ​ണ്ടി​വ​രും. മാത്രമല്ല, അന്ത്യകാ​ല​ത്തെ​ക്കു​റിച്ച്‌ യേശു ഈ മുന്നറി​യി​പ്പു നൽകി​യി​ട്ടുണ്ട്‌: “കള്ളക്രി​സ്‌തു​ക്ക​ളും കള്ളപ്ര​വാ​ച​കൻമാ​രും എഴു​ന്നേ​ററു കഴിയു​മെ​ങ്കിൽ വൃതൻമാ​രെ​യും തെററി​പ്പാ​നാ​യി വലിയ അടയാ​ള​ങ്ങ​ളും അത്ഭുത​ങ്ങ​ളും കാണി​ക്കും.” (മത്തായി 24:24) വമ്പുപ​റ​ച്ചി​ലി​നും തട്ടിപ്പി​നും​പു​റമേ, ഭൂതശ​ക്തി​യു​ടെ പ്രകട​ന​ങ്ങ​ളു​മു​ണ്ടാ​കാം. അതു​കൊണ്ട്‌, വിശദീ​ക​രി​ക്കാ​നാ​കാത്ത സംഭവ​ങ്ങ​ളെ​ക്കു​റി​ച്ചുള്ള അവകാ​ശ​വാ​ദങ്ങൾ നമ്മെ അമ്പരപ്പി​ക്ക​രുത്‌. തീർച്ച​യാ​യും ഇവ ദൈവ​ത്തി​ലുള്ള യഥാർഥ വിശ്വാ​സ​ത്തി​നുള്ള അടിസ്ഥാ​ന​മ​ല്ല​താ​നും.

യേശു നിർവ​ഹി​ച്ച​തു​പോ​ലുള്ള രോഗ​ശാ​ന്തി​കൾ ഇന്ന്‌ ആരും നടത്താ​ത്ത​തു​കൊണ്ട്‌, നാം പ്രതി​കൂല സാഹച​ര്യ​ത്തി​ലാ​ണെ​ന്നാ​ണോ? അല്ലേ അല്ല. വാസ്‌ത​വ​ത്തിൽ, യേശു സൗഖ്യ​മാ​ക്കി​യവർ അവസാനം രോഗി​ക​ളാ​യി. അവരെ​ല്ലാം വൃദ്ധരാ​യി മരിക്കു​ക​യും ചെയ്‌തു. അവർക്കു ലഭിച്ച രോഗ​ശാ​ന്തി ശാശ്വ​ത​മാ​യി​രു​ന്നില്ല. എങ്കിലും, യേശു​വി​ന്റെ അത്ഭുത രോഗ​ശാ​ന്തി​കൾ ഭാവി അനു​ഗ്ര​ഹ​ങ്ങ​ളു​ടെ മുൻനി​ഴ​ലാ​യ​തു​കൊണ്ട്‌ അവയ്‌ക്കു ശാശ്വ​ത​മായ അർഥമുണ്ട്‌.

അതു​കൊണ്ട്‌, ദൈവ​വ​ച​ന​മായ ബൈബിൾ പരി​ശോ​ധി​ച്ച​തി​നു​ശേഷം, മുമ്പു പരാമർശിച്ച ആലിഷാ​ന്ദ്രേ​യും ബെനഡി​റ്റ​യും ആധുനിക അത്ഭുത രോഗ​ശാ​ന്തി​യി​ലും ആത്മവി​ദ്യ​യി​ലൂ​ടെ​യുള്ള രോഗ​ശാ​ന്തി​യി​ലു​മുള്ള വിശ്വാ​സം ഉപേക്ഷി​ച്ചു. അതേസ​മയം, അത്ഭുത രോഗ​ശാ​ന്തി​കൾ കേവലം കഴിഞ്ഞ​കാല സംഭവങ്ങൾ അല്ല എന്ന്‌ അവർക്കു ബോധ്യ​പ്പെ​ടു​ക​യും ചെയ്‌തി​രി​ക്കു​ന്നു. എന്തു​കൊ​ണ്ടാണ്‌ അങ്ങനെ? ലോക​വ്യാ​പ​ക​മാ​യുള്ള ദശലക്ഷ​ക്ക​ണ​ക്കിന്‌ ആളുക​ളെ​പ്പോ​ലെ, അവർ ദൈവ​രാ​ജ്യ​ത്തിൻകീ​ഴി​ലെ രോഗ​ശാ​ന്തി​യ​നു​ഗ്ര​ഹ​ങ്ങൾക്കാ​യി പ്രതീ​ക്ഷാ​പൂർവം കാത്തി​രി​ക്കു​ന്നു.—മത്തായി 6:10.

മേലാൽ രോഗ​വും മരണവും ഇല്ല

നാം നേരത്തെ കണ്ടതു​പോ​ലെ, യേശു​വി​ന്റെ ശുശ്രൂ​ഷ​യു​ടെ മുഖ്യോ​ദ്ദേ​ശ്യം രോഗി​കളെ സുഖ​പ്പെ​ടു​ത്തു​ക​യും മറ്റ്‌ അത്ഭുതങ്ങൾ പ്രവർത്തി​ക്കു​ക​യും ചെയ്യു​ക​യെ​ന്ന​താ​യി​രു​ന്നില്ല. മറിച്ച്‌, ദൈവ​രാ​ജ്യ​ത്തെ​ക്കു​റി​ച്ചുള്ള സുവാർത്താ ഘോഷ​ണ​മാ​യി​രു​ന്നു അവന്റെ മുഖ്യ​വേല. (മത്തായി 9:35; ലൂക്കൊസ്‌ 4:43; 8:1) ദൈവം മനുഷ്യ​വർഗ​ത്തിന്‌ അത്ഭുത രോഗ​ശാ​ന്തി നൽകു​ന്ന​തും പാപവും അപൂർണ​ത​യും മാനവ​കു​ടും​ബ​ത്തി​നു വരുത്തി​യി​രി​ക്കുന്ന കേടു​പാ​ടു​ക​ളെ​ല്ലാം നീക്കു​ന്ന​തും ആ രാജ്യം മുഖേ​ന​യാണ്‌. ഇത്‌ അവൻ എങ്ങനെ, എപ്പോൾ നിവർത്തി​ക്കും?

നൂറ്റാ​ണ്ടു​കൾക്ക​പ്പു​റം ഭാവി​യി​ലേക്കു നോക്കി​ക്കൊണ്ട്‌, ക്രിസ്‌തു​യേശു തന്റെ അപ്പോ​സ്‌ത​ല​നായ യോഹ​ന്നാന്‌ ഒരു പ്രാവ​ച​നിക ദർശനം കൊടു​ത്തു: ‘ഇപ്പോൾ നമ്മുടെ ദൈവ​ത്തി​ന്റെ രക്ഷയും ശക്തിയും രാജ്യ​വും അവന്റെ ക്രിസ്‌തു​വി​ന്റെ ആധിപ​ത്യ​വും തുടങ്ങി​യി​രി​ക്കു​ന്നു!’ (വെളി​പ്പാ​ടു 12:10) 1914-ൽ ദൈവ​ത്തി​ന്റെ വലിയ എതിരാ​ളി​യായ സാത്താൻ ഭൂമി​യി​ലേക്കു വലി​ച്ചെ​റി​യ​പ്പെ​ട്ടു​വെ​ന്ന​തി​നും രാജ്യം ഒരു യാഥാർഥ്യ​മെന്ന നിലയിൽ ഇപ്പോൾ പ്രവർത്തി​ച്ചു​കൊ​ണ്ടി​രി​ക്കു​ന്നു​വെ​ന്ന​തി​നും എല്ലാ തെളി​വു​ക​ളു​മുണ്ട്‌! മിശി​ഹൈക രാജ്യ​ത്തി​ന്റെ രാജാ​വെന്ന നിലയിൽ യേശു വാഴി​ക്ക​പ്പെ​ട്ടി​രി​ക്കു​ന്നു, ഭൂമി​യിൽ വൻമാ​റ്റങ്ങൾ വരുത്താൻ അവനി​പ്പോൾ തയ്യാറാ​യി​രി​ക്കു​ക​യാണ്‌.

സമീപ​ഭാ​വി​യിൽത്തന്നെ, യേശു​വി​ന്റെ സ്വർഗീയ ഗവൺമെൻറ്‌ നീതി​നി​ഷ്‌ഠ​മായ ഒരു പുതിയ മനുഷ്യ​സ​മൂ​ഹ​ത്തി​നു​മേൽ, ഫലത്തിൽ, “പുതിയ ഭൂമി”ക്കുമേൽ ഭരണം നടത്തും. (2 പത്രൊസ്‌ 3:13) അപ്പോ​ഴത്തെ അവസ്ഥകൾ എന്തായി​രി​ക്കും? ഇതാ മഹത്താ​യൊ​രു മുൻവീ​ക്ഷണം: “ഞാൻ പുതിയ ആകാശ​വും പുതിയ ഭൂമി​യും കണ്ടു; ഒന്നാമത്തെ ആകാശ​വും ഒന്നാമത്തെ ഭൂമി​യും ഒഴിഞ്ഞു​പോ​യി . . . [ദൈവം] അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല; ഒന്നാമ​ത്തേതു കഴിഞ്ഞു​പോ​യി.”—വെളി​പ്പാ​ടു 21:1, 4, 5.

മനുഷ്യ​വർഗ​ത്തി​ന്റെ അത്ഭുത രോഗ​ശാ​ന്തി യാഥാർഥ്യ​മാ​കു​മ്പോൾ ജീവിതം എങ്ങനെ​യി​രി​ക്കു​മെ​ന്നത്‌ നിങ്ങൾക്കു വിഭാവന ചെയ്യാ​നാ​കു​മോ? “അവിടത്തെ നിവാ​സി​ക​ളി​ലാ​രും താൻ രോഗി​യാ​ണെന്നു പറയു​ക​യില്ല. അവരുടെ അകൃത്യ​ങ്ങൾക്കു മാപ്പു ലഭിക്കും.” അതേ, അത്ഭുത രോഗ​ശാ​ന്തി ശുശ്രൂ​ഷ​കർക്ക്‌ ഒരിക്ക​ലും സാധി​ക്കാ​ഞ്ഞത്‌ ദൈവം നിവർത്തി​ക്കും. “അവിടുന്ന്‌ മരണത്തെ എന്നേക്കു​മാ​യി ഗ്രസി​ക്കും.” തീർച്ച​യാ​യും, “സകലരു​ടെ​യും കണ്ണീർ അവിടുന്ന്‌ തുടച്ചു​മാ​റ്റും.”—യെശയ്യാ​വു 25:8; 33:24, പി.ഒ.സി. ബൈ.

[7-ാം പേജിലെ ചിത്രം]

ദൈവരാജ്യത്തിൻ കീഴിൽ മനുഷ്യ​വർഗം അത്ഭുത​ക​ര​മാ​യി സൗഖ്യ​മാ​ക്ക​പ്പെ​ടും