പീഡാ​നു​ഭ​വങ്ങൾ നേരി​ട്ടാ​ലും നിങ്ങളു​ടെ വിശ്വാ​സം മുറു​കെ​പ്പി​ടി​ക്കുക

“എന്റെ സഹോ​ദ​ര​ങ്ങളേ, നിങ്ങൾക്കു വിവിധ പീഡാ​നു​ഭ​വങ്ങൾ നേരി​ടു​മ്പോൾ, അതെല്ലാം സന്തോ​ഷ​മാ​യി ഗണിക്കു​വിൻ.”—യാക്കോബ്‌ 1:2, NW.

1. ഏതു സാഹച​ര്യ​ത്തെ നേരി​ട്ടു​കൊ​ണ്ടാണ്‌ യഹോ​വ​യു​ടെ ജനം അവനെ വിശ്വാ​സ​ത്തോ​ടെ​യും “ഹൃദയ​സ​ന്തോഷ”ത്തോ​ടെ​യും സേവി​ക്കു​ന്നത്‌?

യഹോ​വ​യു​ടെ ജനം അവന്റെ സാക്ഷി​ക​ളെന്ന നിലയിൽ അവനെ വിശ്വാ​സ​ത്തോ​ടെ​യും “ഹൃദയ​സ​ന്തോഷ”ത്തോ​ടെ​യും സേവി​ക്കു​ന്നു. (ആവർത്ത​ന​പു​സ്‌തകം 28:47; യെശയ്യാ​വു 43:10) അനേകം പീഡാ​നു​ഭ​വ​ങ്ങ​ളിൽപ്പെട്ട്‌ ഉഴലു​മ്പോ​ഴും അവർ അതു ചെയ്യുന്നു. പ്രയാ​സങ്ങൾ നേരി​ടു​മ്പോ​ഴും, അവർ ഈ വാക്കു​ക​ളിൽനിന്ന്‌ ആശ്വാസം കണ്ടെത്തു​ന്നു: “എന്റെ സഹോ​ദ​ര​ങ്ങളേ, നിങ്ങൾക്കു വിവിധ പീഡാ​നു​ഭ​വങ്ങൾ നേരി​ടു​മ്പോൾ, അതെല്ലാം സന്തോ​ഷ​മാ​യി ഗണിക്കു​വിൻ. അങ്ങനെ ചെയ്യു​മ്പോൾ നിങ്ങളു​ടെ വിശ്വാ​സ​ത്തി​ന്റെ ഈ പരി​ശോ​ധിത ഗുണം സഹിഷ്‌ണുത ഉളവാ​ക്കു​ന്നു​വെന്നു നിങ്ങൾക്ക്‌ അറിയാ​മ​ല്ലോ.”—യാക്കോബ്‌ 1:2, 3, NW.

2. യാക്കോബ്‌ എന്ന ലേഖന​ത്തി​ന്റെ എഴുത്തു​കാ​ര​നെ​ക്കു​റിച്ച്‌ എന്തെല്ലാം വിവര​ണങ്ങൾ ലഭ്യമാണ്‌?

² യേശു​ക്രി​സ്‌തു​വി​ന്റെ അർധസ​ഹോ​ദ​ര​നും ശിഷ്യ​നു​മായ യാക്കോബ്‌ ഏതാണ്ട്‌ പൊ.യു. 62-ൽ രേഖ​പ്പെ​ടു​ത്തി​യ​താണ്‌ ആ പ്രസ്‌താ​വന. (മർക്കൊസ്‌ 6:3) യാക്കോബ്‌ യെരൂ​ശ​ലേം സഭയിലെ ഒരു മൂപ്പനാ​യി​രു​ന്നു. വാസ്‌ത​വ​ത്തിൽ, അവനും കേഫാ​വും (പത്രൊസ്‌), യോഹ​ന്നാ​നും സഭയുടെ കരുത്തുറ്റ, അടിയു​റച്ച പിന്തു​ണ​ക്കാ​രാ​യി, “തൂണു​ക​ളാ​യി എണ്ണപ്പെ​ട്ടി​രു”ന്നു. (ഗലാത്യർ 2:9) ഏതാണ്ട്‌ പൊ.യു. 49-ൽ പരി​ച്ഛേദന സംബന്ധിച്ച പ്രശ്‌നം ‘അപ്പൊ​സ്‌ത​ല​ന്മാ​രു​ടെ​യും മൂപ്പന്മാ​രു​ടെ​യും’മുമ്പാകെ അവതരി​പ്പി​ച്ച​പ്പോൾ, യാക്കോബ്‌ പറഞ്ഞ തിരു​വെ​ഴു​ത്ത​ധി​ഷ്‌ഠിത നിർദേശം ഒന്നാം നൂറ്റാ​ണ്ടി​ലെ ഭരണസം​ഘം സ്വീക​രി​ക്കു​ക​യു​ണ്ടാ​യി.—പ്രവൃ​ത്തി​കൾ 15:6-29.

3. ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾക്കു നേരിട്ട ചില പ്രശ്‌ന​ങ്ങ​ളെ​ന്തെ​ല്ലാം, യാക്കോ​ബി​ന്റെ ലേഖന​ത്തിൽനി​ന്നു നമു​ക്കെ​ങ്ങ​നെ​യാണ്‌ ഏറ്റവും കൂടുതൽ പ്രയോ​ജനം നേടാൻ കഴിയു​ന്നത്‌?

³ ആടുക​ളിൽ തത്‌പ​ര​നായ ഒരു ആത്മീയ ഇടയനെന്ന നിലയിൽ, യാക്കോ​ബിന്‌ ‘അവയുടെ അവസ്ഥ അറിയാ​മാ​യി​രു​ന്നു.’ (സദൃശ​വാ​ക്യ​ങ്ങൾ 27:23) ക്രിസ്‌ത്യാ​നി​കൾക്ക്‌ അപ്പോൾ കൊടിയ പീഡാ​നു​ഭ​വങ്ങൾ നേരി​ടു​ക​യാ​യി​രു​ന്നെന്ന്‌ അവൻ മനസ്സി​ലാ​ക്കി. ചിലരു​ടെ ചിന്തയ്‌ക്കു പൊരു​ത്ത​പ്പെ​ടു​ത്ത​ലു​കൾ ആവശ്യ​മാ​യി​രു​ന്നു, എന്തെന്നാൽ അവർ ധനിക​രോ​ടു പക്ഷപാതം കാട്ടി. ചിലർക്ക്‌ ആരാധന വെറു​മൊ​രു ചടങ്ങാ​യി​രു​ന്നു. ചിലരു​ടെ അടക്കമി​ല്ലാത്ത നാവ്‌ ദ്രോഹം ചെയ്യു​ന്നു​ണ്ടാ​യി​രു​ന്നു. ലൗകിക മനോ​ഭാ​വം നാശക​ര​മായ ഫലങ്ങൾ ഉളവാക്കി. ക്ഷമയി​ല്ലാ​ത്ത​വ​രും പ്രാർഥി​ക്കാ​ത്ത​വ​രു​മാ​യി അനേക​രു​ണ്ടാ​യി​രു​ന്നു. വാസ്‌ത​വ​ത്തിൽ, ചില ക്രിസ്‌ത്യാ​നി​കൾ ആത്മീയ അന്ധകാ​ര​ത്തി​ലാ​യി​രു​ന്നു. യാക്കോ​ബി​ന്റെ ലേഖനം അത്തരം സംഗതി​കൾ ക്രിയാ​ത്മ​ക​മാ​യി കൈകാ​ര്യം ചെയ്യുന്നു. അവന്റെ ബുദ്ധ്യു​പ​ദേശം പൊ.യു. ഒന്നാം നൂറ്റാ​ണ്ടി​ലേ​തു​പോ​ലെ ഇന്നും പ്രാ​യോ​ഗി​ക​മാണ്‌. ഈ ലേഖനം നമുക്ക്‌ ഓരോ​രു​ത്തർക്കും​വേണ്ടി എഴുതി​യ​താ​ണെന്നു വിചാ​രി​ക്കു​ന്നതു നമുക്ക്‌ ഏറെ പ്രയോ​ജനം ചെയ്യും.a

നമുക്കു പീഡാ​നു​ഭ​വങ്ങൾ നേരി​ടു​മ്പോൾ

4. നാം പീഡാ​നു​ഭ​വ​ങ്ങളെ എങ്ങനെ വീക്ഷി​ക്കണം?

⁴ പീഡാ​നു​ഭ​വ​ങ്ങളെ വീക്ഷി​ക്കേ​ണ്ട​തെ​ങ്ങ​നെ​യെന്ന്‌ യാക്കോബ്‌ നമുക്കു കാണി​ച്ചു​ത​രു​ന്നു. (യാക്കോബ്‌ 1:1-4) ദൈവ​പു​ത്ര​നു​മാ​യുള്ള കുടും​ബ​ബ​ന്ധ​ത്തെ​ക്കു​റി​ച്ചു സൂചി​പ്പി​ക്കാ​തെ, “ദൈവ​ത്തി​ന്റെ​യും കർത്താ​വായ യേശു​ക്രി​സ്‌തു​വി​ന്റെ​യും ദാസനാ​യി” അവൻ സ്വയം വിശേ​ഷി​പ്പി​ക്കു​ന്നു. ആത്മീയ ഇസ്രാ​യേ​ലി​ന്റെ “ചിതറി​പ്പാർക്കുന്ന പന്ത്രണ്ടു ഗോ​ത്ര​ങ്ങൾക്കും” യാക്കോബ്‌ എഴുതു​ന്ന​തി​നുള്ള പ്രാഥ​മിക കാരണം പീഡന​മാണ്‌. (പ്രവൃ​ത്തി​കൾ 8:1; 11:19; ഗലാത്യർ 6:16; 1 പത്രൊസ്‌ 1:1) ക്രിസ്‌ത്യാ​നി​ക​ളെന്ന നിലയിൽ, നാമും പീഡി​പ്പി​ക്ക​പ്പെ​ടു​ന്നു, നമുക്ക്‌ “വിവിധ പീഡാ​നു​ഭ​വങ്ങൾ നേരി​ടു​ന്നു.” പീഡാ​നു​ഭ​വ​ങ്ങ​ളിൽ സഹിച്ചു​നിൽക്കു​ന്നത്‌ നമ്മുടെ വിശ്വാ​സത്തെ ബലിഷ്‌ഠ​മാ​ക്കു​ന്നു​വെന്നു നാമോർക്കു​ന്നെ​ങ്കിൽ, അതു നേരി​ടു​മ്പോൾ നാം “അതെല്ലാം സന്തോ​ഷ​മാ​യി ഗണി”ക്കും. പീഡാ​നു​ഭ​വ​ങ്ങ​ളിൽ നാം ദൈവ​ത്തോ​ടു നിർമലത കാക്കു​ന്നെ​ങ്കിൽ, അതു നമുക്കു നിലനിൽക്കുന്ന സന്തോഷം പ്രദാനം ചെയ്യും.

5. നമ്മുടെ പീഡാ​നു​ഭ​വ​ങ്ങ​ളിൽ എന്ത്‌ ഉൾപ്പെ​ട്ടേ​ക്കാം, നാം വിജയ​പ്ര​ദ​മാ​യി അവ സഹിച്ചു​നിൽക്കു​മ്പോൾ എന്തു സംഭവി​ക്കു​ന്നു?

⁵ നമ്മുടെ പീഡാ​നു​ഭ​വ​ങ്ങ​ളിൽ മനുഷ്യർക്കു പൊതു​വേ അനുഭ​വ​പ്പെ​ടുന്ന പ്രതി​കൂ​ലാ​വ​സ്ഥ​ക​ളും ഉൾപ്പെ​ടു​ന്നു. ഉദാഹ​ര​ണ​ത്തിന്‌, മോശ​മായ ആരോ​ഗ്യം നമ്മെ അലട്ടി​യേ​ക്കാം. ദൈവം ഇപ്പോൾ അത്ഭുത​രോ​ഗ​ശാ​ന്തി നൽകു​ന്നില്ല, എന്നാൽ രോഗത്തെ നേരി​ടു​ന്ന​തിന്‌ ആവശ്യ​മായ ജ്ഞാനത്തി​നും ധൈര്യ​ത്തി​നും വേണ്ടി​യുള്ള നമ്മുടെ പ്രാർഥ​ന​കൾക്ക്‌ അവൻ ഉത്തരം നൽകുന്നു. (സങ്കീർത്തനം 41:1-3) യഹോ​വ​യു​ടെ സാക്ഷി​ക​ളെന്ന നിലയിൽ പീഡി​പ്പി​ക്ക​പ്പെ​ടു​മ്പോൾ നാം നീതി​ക്കു​വേ​ണ്ടി​യും സഹിക്കു​ന്നു. (2 തിമൊ​ഥെ​യൊസ്‌ 3:12; 1 പത്രൊസ്‌ 3:14) അത്തരം പീഡാ​നു​ഭ​വ​ങ്ങ​ളിൽ നാം വിജയ​പ്ര​ദ​മാ​യി സഹിച്ചു​നിൽക്കു​മ്പോൾ, നമ്മുടെ വിശ്വാ​സം തെളി​യി​ക്ക​പ്പെ​ടു​ന്നു. അങ്ങനെ അത്‌ “പരി​ശോ​ധിത ഗുണ”മുള്ളതാ​യി​ത്തീ​രു​ന്നു. നമ്മുടെ വിശ്വാ​സം വിജയി​ക്കു​മ്പോൾ, ഇത്‌ “സഹിഷ്‌ണുത ഉളവാ​ക്കു​ന്നു.” പീഡാ​നു​ഭ​വ​ങ്ങ​ളി​ലൂ​ടെ കൂടുതൽ ശക്തമാ​ക്ക​പ്പെട്ട വിശ്വാ​സം ഭാവി പരി​ശോ​ധ​ന​ക​ളിൽ സഹിച്ചു​നിൽക്കു​ന്ന​തി​നു നമ്മെ സഹായി​ക്കും.

6. “സഹിഷ്‌ണു​തക്കു തികഞ്ഞ പ്രവൃത്തി”യുണ്ടാ​കു​ന്ന​തെ​ങ്ങനെ, പീഡാ​നു​ഭ​വങ്ങൾ നേരി​ടു​മ്പോൾ എന്തു പ്രാ​യോ​ഗിക നടപടി​കൾ കൈ​ക്കൊ​ള്ളാ​നാ​കും?

⁶ “എന്നാൽ സഹിഷ്‌ണു​തക്കു തികഞ്ഞ പ്രവൃത്തി ഉണ്ടാകട്ടെ” എന്നു യാക്കോബ്‌ പറയുന്നു. തിരു​വെ​ഴു​ത്തു​പ​ര​മ​ല്ലാത്ത മാർഗ​ങ്ങ​ളി​ലൂ​ടെ ഒരു പീഡാ​നു​ഭവം തിടു​ക്ക​ത്തിൽ അവസാ​നി​പ്പി​ക്കാൻ ശ്രമി​ക്കാ​തെ നാം അതിന്റെ സ്വാഭാ​വിക സമാപ്‌തി​ക്കാ​യി കാത്തി​രി​ക്കു​ന്നെ​ങ്കിൽ, സഹിഷ്‌ണുത നമ്മെ തികഞ്ഞ ക്രിസ്‌ത്യാ​നി​ക​ളാ​ക്കുന്ന “പ്രവൃത്തി” ചെയ്യും, നമ്മെ വിശ്വാ​സ​ത്തിൽ കുറവു​ള്ള​വ​രാ​ക്കു​ക​യില്ല. തീർച്ച​യാ​യും, ഒരു പീഡാ​നു​ഭവം നമ്മുടെ ഏതെങ്കി​ലു​മൊ​രു ബലഹീ​ന​വശം വെളി​പ്പെ​ടു​ത്തു​ന്നെ​ങ്കിൽ, അതു പരിഹ​രി​ക്കു​ന്ന​തി​നു നാം യഹോ​വ​യു​ടെ സഹായം തേടണം. ലൈം​ഗിക അധാർമി​ക​ത​യിൽ ഏർപ്പെ​ടു​ന്ന​തി​നുള്ള പ്രലോ​ഭ​ന​മെന്ന പരി​ശോ​ധ​ന​യാ​ണെ​ങ്കി​ലോ? നമുക്ക്‌ ആ പ്രശ്‌ന​ത്തെ​ക്കു​റി​ച്ചു പ്രാർഥി​ക്കു​ക​യും നമ്മുടെ പ്രാർഥ​ന​യ്‌ക്കു ചേർച്ച​യിൽ പ്രവർത്തി​ക്കു​ക​യും ചെയ്യാ​വു​ന്ന​താണ്‌. ദൈവ​ത്തോ​ടു നിർമലത കാക്കാൻ ചില​പ്പോൾ മറ്റൊരു ജോലി തിര​ഞ്ഞെ​ടു​ക്കു​ക​യോ മറ്റേ​തെ​ങ്കി​ലും നടപടി​കൾ കൈ​ക്കൊ​ള്ളു​ക​യോ ചെയ്യേ​ണ്ടി​വ​ന്നേ​ക്കാം.—ഉല്‌പത്തി 39:7-9; 1 കൊരി​ന്ത്യർ 10:13.

ജ്ഞാനം തേടൽ

7. പീഡാ​നു​ഭ​വ​ങ്ങളെ നേരി​ടു​ന്ന​തി​നു നമു​ക്കെ​ങ്ങനെ സഹായം ലഭി​ച്ചേ​ക്കാം?

⁷ ഒരു പീഡാ​നു​ഭ​വത്തെ നേരി​ടേ​ണ്ട​തെ​ങ്ങ​നെ​യെന്നു നമുക്ക​റി​യി​ല്ലെ​ങ്കിൽ എന്തു ചെയ്യണ​മെന്നു യാക്കോബ്‌ നമുക്കു കാണി​ച്ചു​ത​രു​ന്നുണ്ട്‌. (യാക്കോബ്‌ 1:5-8) ജ്ഞാനം കുറവാ​യി​രി​ക്കു​ന്ന​തി​ന്റെ​പേ​രിൽ യഹോവ നമ്മെ കുറ്റ​പ്പെ​ടു​ത്തു​ക​യില്ല, അതിനു​വേണ്ടി നാം വിശ്വാ​സ​ത്തോ​ടെ പ്രാർഥി​ക്കണം. പീഡാ​നു​ഭ​വത്തെ ഉചിത​മാ​യി വീക്ഷിച്ച്‌ സഹിഷ്‌ണുത പ്രകട​മാ​ക്കാൻ അവൻ നമ്മെ സഹായി​ക്കും. സഹവി​ശ്വാ​സി​ക​ളോ ബൈബിൾ പഠനമോ തിരു​വെ​ഴു​ത്തു​കളെ നമ്മുടെ ശ്രദ്ധയിൽ വരുത്തി​യേ​ക്കാം. ദിവ്യ​മാർഗ​നിർദേ​ശാ​നു​സൃ​തം നിയ​ന്ത്രി​ക്ക​പ്പെ​ടുന്ന സംഭവങ്ങൾ നാമെന്തു ചെയ്യണ​മെന്നു കാണാൻ നമ്മെ പ്രാപ്‌ത​രാ​ക്കി​യേ​ക്കാം. നാം ദൈവാ​ത്മാ​വി​നാൽ നയിക്ക​പ്പെ​ട്ടേ​ക്കാം. (ലൂക്കൊസ്‌ 11:13) അത്തരം പ്രയോ​ജ​നങ്ങൾ ആസ്വദി​ക്കു​ന്ന​തിന്‌, സ്വാഭാ​വി​ക​മാ​യും നാം ദൈവ​ത്തോ​ടും അവന്റെ ജനത്തോ​ടും അടുത്തു പറ്റിനിൽക്കണം.—സദൃശ​വാ​ക്യ​ങ്ങൾ 18:1.

8. സംശയാ​ലു​വി​നു യഹോ​വ​യിൽനി​ന്നു യാതൊ​ന്നും ലഭിക്കു​ക​യി​ല്ലാ​ത്ത​തെ​ന്തു​കൊണ്ട്‌?

⁸ നാം “സംശയി​ക്കാ​തെ വിശ്വാ​സ​ത്തോ​ടെ ചോദി​ച്ചു​കൊ​ണ്ടേ​യി​രി​ക്കു​ന്നെ”ങ്കിൽ (NW) പീഡാ​നു​ഭ​വങ്ങൾ നേരി​ടു​ന്ന​തി​നുള്ള ജ്ഞാനം യഹോവ നമുക്കു നൽകും. സംശയാ​ലു നിനച്ചി​രി​ക്കാ​ത്ത​നേ​രത്ത്‌ “കാററ​ടി​ച്ചു അലയുന്ന കടൽത്തി​രെക്കു സമ”നാണ്‌. ആത്മീയ​മാ​യി നാം അതു​പോ​ലെ അസ്ഥിര​രാ​ണെ​ങ്കിൽ, ‘യഹോ​വ​യിൽനി​ന്നു നമു​ക്കെ​ന്തെ​ങ്കി​ലും ലഭിക്കു​മെന്നു നാം വിചാ​രി​ക്ക​രുത്‌.’ (NW) പ്രാർഥ​ന​യി​ലോ മറ്റു വിധങ്ങ​ളി​ലോ നമുക്ക്‌ “ഇരുമ​ന​സ്സുള്ള”വരും “അസ്ഥിര”രും ആകാതി​രി​ക്കാം. പകരം, ജ്ഞാനത്തി​ന്റെ ഉറവി​ട​മായ യഹോ​വ​യിൽ നമുക്കു വിശ്വാ​സം പ്രകട​മാ​ക്കാം.—സദൃശ​വാ​ക്യ​ങ്ങൾ 3:5, 6.

സമ്പന്നർക്കും ദരി​ദ്രർക്കും ആഹ്ലാദി​ക്കാം

9. യഹോ​വ​യു​ടെ ആരാധ​ക​രെന്ന നിലയിൽ നമുക്ക്‌ ആഹ്ലാദി​ക്കാൻ കാരണ​മു​ള്ള​തെ​ന്തു​കൊണ്ട്‌?

⁹ ദാരി​ദ്ര്യം ഒരു പീഡാ​നു​ഭ​വ​മാണ്‌, എങ്കിലും ഓർക്കുക, സമ്പന്നരും ദരി​ദ്ര​രു​മായ ക്രിസ്‌ത്യാ​നി​കൾക്ക്‌ ആഹ്ലാദി​ക്കാം. (യാക്കോബ്‌ 1:9-11) യേശു​വി​ന്റെ അനുഗാ​മി​ക​ളാ​യി​ത്തീ​രു​ന്ന​തി​നു​മുമ്പ്‌, മിക്ക അഭിഷി​ക്തർക്കും കാര്യ​മായ ഭൗതി​ക​സ്വ​ത്തു​ക്കൾ ഇല്ലായി​രു​ന്നു. ലോകം അവരെ പുച്ഛി​ച്ചി​രു​ന്നു. (1 കൊരി​ന്ത്യർ 1:26) എന്നാൽ രാജ്യാ​വ​കാ​ശി​കൾ എന്ന സ്ഥാന​ത്തേ​ക്കുള്ള തങ്ങളുടെ ‘ഉയർച്ച’യെക്കു​റിച്ച്‌ അവർക്ക്‌ ആഹ്ലാദി​ക്കാൻ സാധി​ക്കു​മാ​യി​രു​ന്നു. (റോമർ 8:16, 17) നേരേ​മ​റിച്ച്‌, മുമ്പ്‌ ബഹുമാ​നി​ക്ക​പ്പെ​ട്ടി​രുന്ന ധനികർ, ക്രിസ്‌തു​വി​ന്റെ അനുഗാ​മി​ക​ളെന്ന നിലയിൽ, ലോക​ത്താൽ വെറു​ക്ക​പ്പെ​ടു​ന്ന​തു​നി​മി​ത്തം “അവമാനം” അനുഭ​വി​ക്കു​ന്നു. (യോഹ​ന്നാൻ 7:47-52; 12:42, 43) എന്നിരു​ന്നാ​ലും, യഹോ​വ​യു​ടെ ദാസന്മാ​രെന്ന നിലയിൽ, നാം ആസ്വദി​ക്കുന്ന ആത്മീയ സമ്പത്തു​മാ​യി താരത​മ്യം ചെയ്യു​മ്പോൾ, ലൗകിക സമ്പത്തി​നും ഉന്നതസ്ഥാ​ന​മാ​ന​ങ്ങൾക്കും വിലയി​ല്ലെ​ന്ന​തിൽ നമു​ക്കെ​ല്ലാ​വർക്കും ആഹ്ലാദി​ക്കാ​നാ​കും. നമുക്കി​ട​യിൽ സാമൂ​ഹിക സ്ഥാനങ്ങ​ളെ​ക്കു​റി​ച്ചുള്ള അഹന്തയ്‌ക്ക്‌ ഇടമി​ല്ലെ​ന്ന​തിൽ നാമെത്ര നന്ദിയു​ള്ള​വ​രാണ്‌.—സദൃശ​വാ​ക്യ​ങ്ങൾ 10:22; പ്രവൃ​ത്തി​കൾ 10:34, 35.

10. ഒരു ക്രിസ്‌ത്യാ​നി ഭൗതിക സമ്പത്തിനെ വീക്ഷി​ക്കേ​ണ്ട​തെ​ങ്ങനെ?

¹⁰ നമ്മുടെ ജീവൻ ആശ്രയി​ച്ചി​രി​ക്കു​ന്നത്‌ സമ്പത്തി​ലോ ലൗകിക നേട്ടത്തി​ലോ അല്ലെന്നു കാണാൻ യാക്കോബ്‌ നമ്മെ സഹായി​ക്കു​ന്നു. സൂര്യന്റെ ‘കൊടും​ചൂ​ടി’ൽ (NW) പുഷ്‌പം വാടി​പ്പോ​കാ​തി​രി​ക്കാൻ അതിന്റെ സൗന്ദര്യം സഹായി​ക്കാ​ത്ത​തു​പോ​ലെ, ധനികന്റെ സമ്പത്ത്‌ അവന്റെ ആയുസ്സ്‌ നീട്ടാൻ ഉപകരി​ക്കു​ന്നില്ല. (സങ്കീർത്തനം 49:6-9; മത്തായി 6:27) തന്റെ “ജീവി​ത​മാർഗം” തേടി​ക്കൊ​ണ്ടി​രി​ക്കവേ, ഒരുപക്ഷേ ബിസി​ന​സിൽ മുഴു​കി​യി​രി​ക്കവേ അയാൾ മരണമ​ട​ഞ്ഞേ​ക്കാം. അതു​കൊണ്ട്‌, പ്രധാ​ന​പ്പെട്ട സംഗതി “ദൈവ​വി​ഷ​യ​മാ​യി സമ്പന്നനാക”ണമെന്ന​തും രാജ്യ​താ​ത്‌പ​ര്യ​ങ്ങൾ ഉന്നമി​പ്പി​ക്കാൻ ആവുന്ന​തെ​ല്ലാം ചെയ്യണ​മെ​ന്ന​തു​മാണ്‌.—ലൂക്കൊസ്‌ 12:13-21; മത്തായി 6:33; 1 തിമൊ​ഥെ​യൊസ്‌ 6:17-19.

പീഡാ​നു​ഭ​വങ്ങൾ സഹിച്ചു​നിൽക്കു​ന്നവർ സന്തുഷ്ടർ

11. പീഡാ​നു​ഭ​വ​ങ്ങൾക്കു നടുവി​ലും തങ്ങളുടെ വിശ്വാ​സം മുറു​കെ​പ്പി​ടി​ക്കു​ന്ന​വർക്കുള്ള ഭാവി​പ്ര​തീ​ക്ഷ​ക​ളെ​ന്തെ​ല്ലാം?

¹¹ സമ്പന്നരോ ദരി​ദ്ര​രോ ആയാലും, പീഡാ​നു​ഭ​വങ്ങൾ സഹിച്ചു​നിൽക്കു​ന്നെ​ങ്കി​ലേ നമുക്കു സന്തോ​ഷ​മു​ണ്ടാ​കു​ക​യു​ള്ളൂ. (യാക്കോബ്‌ 1:12-15) പരി​ശോ​ധ​ന​ക​ളിൽ അചഞ്ചല​മായ വിശ്വാ​സ​ത്തോ​ടെ സഹിച്ചു​നിൽക്കു​ന്നെ​ങ്കിൽ, നാം സന്തുഷ്ട​രാ​യി എണ്ണപ്പെ​ടും, എന്തെന്നാൽ ദൈവ​ദൃ​ഷ്ടി​യിൽ ശരിയാ​യതു ചെയ്യു​ന്ന​തിൽ സന്തുഷ്ടി​യുണ്ട്‌. മരണം​വരെ വിശ്വാ​സം മുറു​കെ​പ്പി​ടി​ക്കുന്ന ആത്മാഭി​ഷിക്ത ക്രിസ്‌ത്യാ​നി​കൾക്ക്‌ “ജീവകി​രീ​ടം,” അതായത്‌ സ്വർഗ​ത്തി​ലെ അമർത്യത ലഭിക്കു​ന്നു. (വെളി​പ്പാ​ടു 2:10; 1 കൊരി​ന്ത്യർ 15:50) നമുക്കു ഭൗമിക പ്രത്യാ​ശ​യു​ണ്ടാ​യി​രി​ക്കു​ക​യും ദൈവ​ത്തി​ലുള്ള നമ്മുടെ വിശ്വാ​സം നിലനിർത്തു​ക​യും ചെയ്യു​ന്നെ​ങ്കിൽ, ഒരു പറുദീ​സാ ഭൂമി​യി​ലെ നിത്യ​ജീ​വ​നാ​യി നമുക്കു പ്രതീ​ക്ഷാ​പൂർവം കാത്തി​രി​ക്കാ​നാ​കും. (ലൂക്കൊസ്‌ 23:43; റോമർ 6:23) യഹോ​വ​യിൽ വിശ്വാ​സം പ്രകട​മാ​ക്കുന്ന എല്ലാവർക്കും അവൻ എത്ര നല്ലവൻ!

12. പ്രതി​കൂ​ലാ​വ​സ്ഥകൾ നേരി​ടു​മ്പോൾ, “ഞാൻ ദൈവ​ത്താൽ പരീക്ഷി​ക്ക​പ്പെ​ടു​ന്നു”വെന്നു നാം പറയരു​താ​ത്ത​തെ​ന്തു​കൊണ്ട്‌?

¹² യഹോവ നമ്മെ പ്രതി​കൂ​ലാ​വ​സ്ഥ​ക​ളാൽ പരി​ശോ​ധി​ക്കു​ന്നു​ണ്ടാ​കു​മോ? ഇല്ല. “ഞാൻ ദൈവ​ത്താൽ പരീക്ഷി​ക്ക​പ്പെ​ടു​ന്നു”വെന്നു നാം പറയരുത്‌. പാപം ചെയ്യാൻ നമ്മെ പ്രേരി​പ്പി​ക്കു​ന്ന​തി​നു യഹോവ ശ്രമി​ക്കു​ന്നില്ല, എന്നാൽ നാം വിശ്വാ​സ​ത്തിൽ അചഞ്ചല​രാ​യി നില​കൊ​ള്ളു​ന്നെ​ങ്കിൽ പീഡാ​നു​ഭ​വ​ങ്ങ​ളിൽ സഹിച്ചു​നിൽക്കു​ന്ന​തി​നാ​വ​ശ്യ​മായ ശക്തി നൽകി അവൻ നമ്മെ സഹായി​ക്കു​മെ​ന്നത്‌ ഉറപ്പാണ്‌. (ഫിലി​പ്പി​യർ 4:13) ദൈവം പരിശു​ദ്ധ​നാണ്‌, അതു​കൊണ്ട്‌ തെറ്റു ചെയ്യു​ന്ന​തി​നെ​തി​രെ​യുള്ള നമ്മുടെ ചെറു​ത്തു​നിൽക്കൽ പ്രാപ്‌തി​യെ ദുർബ​ല​പ്പെ​ടു​ത്തുന്ന സാഹച​ര്യ​ങ്ങ​ളി​ലേക്ക്‌ അവൻ നമ്മെ കൊണ്ടു​പോ​ക​യില്ല. ഒരു അവിശുദ്ധ സ്ഥിതി​വി​ശേ​ഷ​ത്തിൽ അകപ്പെട്ട്‌ നാം ഏതെങ്കി​ലും പാപം ചെയ്യു​ന്നെ​ങ്കിൽ, അവനെ കുറ്റ​പ്പെ​ടു​ത്ത​രുത്‌. എന്തെന്നാൽ “ദൈവം ദോഷ​ങ്ങ​ളാൽ പരീക്ഷി​ക്ക​പ്പെ​ടാ​ത്തവൻ ആകുന്നു; താൻ ആരെയും പരീക്ഷി​ക്കു​ന്ന​തു​മില്ല.” ശിക്ഷണം ലഭിച്ച്‌ നമുക്കു പ്രയോ​ജ​ന​മു​ണ്ടാ​കാൻ യഹോവ ഒരു പീഡാ​നു​ഭവം അനുവ​ദി​ച്ചേ​ക്കാ​മെ​ങ്കി​ലും, ദുഷ്ടല​ക്ഷ്യ​ത്തോ​ടെ അവൻ നമുക്കു പീഡാ​നു​ഭ​വങ്ങൾ വരുത്തു​ന്നില്ല. (എബ്രായർ 12:7-11) തെറ്റു ചെയ്യാൻ സാത്താൻ നമ്മെ പ്രലോ​ഭി​പ്പി​ച്ചേ​ക്കാം, എന്നാൽ ആ ദുഷ്ടനിൽനി​ന്നു നമ്മെ വിടു​വി​ക്കാൻ ദൈവ​ത്തി​നു സാധി​ക്കും.—മത്തായി 6:13.

13. തെറ്റായ ഒരാ​ഗ്ര​ഹത്തെ ദൂരീ​ക​രി​ക്കു​ന്നി​ല്ലെ​ങ്കിൽ എന്തു സംഭവി​ക്കാം?

¹³ ഒരു പ്രത്യേക സ്ഥിതി​വി​ശേഷം നമ്മെ പാപത്തി​നു പ്രേരി​പ്പി​ക്കാ​വുന്ന തെറ്റായ ആഗ്രഹ​ങ്ങ​ളി​ലേക്കു നയി​ച്ചേ​ക്കാ​മെ​ന്ന​തി​നാൽ നാം പ്രാർഥ​നാ​നി​ര​ത​രാ​യി​രി​ക്കേ​ണ്ട​തുണ്ട്‌. യാക്കോബ്‌ പറയുന്നു: “ഓരോ​രു​ത്തൻ പരീക്ഷി​ക്ക​പ്പെ​ടു​ന്നതു സ്വന്ത​മോ​ഹ​ത്താൽ ആകർഷി​ച്ചു വശീക​രി​ക്ക​പ്പെ​ടു​ക​യാൽ ആകുന്നു.” നമ്മുടെ ഹൃദയത്തെ പാപപൂർണ​മായ ആഗ്രഹ​ത്തി​ന്മേൽ തളച്ച്‌ പാപം ചെയ്‌താൽ അതിനു നമുക്കു ദൈവത്തെ കുറ്റ​പ്പെ​ടു​ത്താ​നാ​വില്ല. തെറ്റായ ആഗ്രഹത്തെ ദൂരീ​ക​രി​ക്കു​ന്നി​ല്ലെ​ങ്കിൽ, ‘അത്‌ ഗർഭം ധരിക്കു​ന്നു,’ ഹൃദയ​ത്തിൽ താലോ​ലി​ക്ക​പ്പെ​ടു​ന്നു, തുടർന്ന്‌ “പാപത്തെ പ്രസവി​ക്കു​ന്നു.” പാപം ചെയ്‌തു​ക​ഴി​യു​മ്പോൾ അതു “മരണത്തെ പെറുന്നു.” വ്യക്തമാ​യും, നാം നമ്മുടെ ഹൃദയ​ങ്ങളെ ജാഗരിച്ച്‌ പാപപൂർണ പ്രവണ​ത​കളെ ചെറു​ക്കണം. (സദൃശ​വാ​ക്യ​ങ്ങൾ 4:23) പാപം കയീനെ കീഴട​ക്കാൻ പോകു​ക​യാ​ണെന്നു മുന്നറി​യി​പ്പു ലഭിച്ചി​ട്ടും അവൻ ചെറു​ത്തു​നി​ന്നില്ല. (ഉല്‌പത്തി 4:4-8) അതു​കൊണ്ട്‌, നാം തിരു​വെ​ഴു​ത്തു​വി​രു​ദ്ധ​മായ ഒരു ഗതി പിൻപ​റ്റാൻ തുടങ്ങു​ന്നെ​ങ്കി​ലോ? ദൈവ​ത്തി​നെ​തി​രെ പാപം ചെയ്യാ​തി​രി​ക്കാൻ നമ്മെ ക്രിസ്‌തീയ മൂപ്പന്മാർ യഥാസ്ഥാ​ന​പ്പെ​ടു​ത്താൻ ശ്രമി​ക്കു​ന്നെ​ങ്കിൽ നാം തീർച്ച​യാ​യും നന്ദിയു​ള്ള​വ​രാ​യി​രി​ക്കണം.—ഗലാത്യർ 6:1.

ദൈവം—നല്ല സംഗതി​ക​ളു​ടെ ഉറവിടം

14. ദൈവ​ത്തി​ന്റെ ദാനങ്ങൾ ‘തികവു’ള്ളതാ​ണെന്നു പറയാ​നാ​കു​ന്നത്‌ ഏത്‌ അർഥത്തിൽ?

¹⁴ പീഡാ​നു​ഭ​വ​ങ്ങ​ളു​ടേതല്ല, നല്ല സംഗതി​ക​ളു​ടെ ഉറവി​ട​മാണ്‌ യഹോവ എന്നു നാം ഓർക്കണം. (യാക്കോബ്‌ 1:16-18) യാക്കോബ്‌ സഹവി​ശ്വാ​സി​കളെ “പ്രിയ​സ​ഹോ​ദ​ര​ങ്ങളേ” എന്ന്‌ സംബോ​ധന ചെയ്യു​ക​യും ദൈവം ‘എല്ലാ നല്ല ദാനങ്ങ​ളു​ടെ​യും തികഞ്ഞ വരങ്ങളു​ടെ​യും’ ദാതാ​വാ​ണെന്നു പ്രകട​മാ​ക്കു​ക​യും ചെയ്യുന്നു. യഹോ​വ​യു​ടെ ആത്മീയ​വും ഭൗതി​ക​വു​മായ ദാനങ്ങൾ “തികഞ്ഞ”വയാണ്‌, അല്ലെങ്കിൽ പൂർണ​ത​യു​ള്ള​വ​യാണ്‌, കുറവു​ള്ള​വയല്ല. അവ “ഉയരത്തിൽനി​ന്നു,” ദൈവ​ത്തി​ന്റെ വാസസ്ഥ​ല​മായ സ്വർഗ​ത്തിൽനി​ന്നു വരുന്നു. (1 രാജാ​ക്ക​ന്മാർ 8:39) സൂര്യൻ, ചന്ദ്രൻ, നക്ഷത്രങ്ങൾ ഇത്യാദി “വെളി​ച്ച​ങ്ങ​ളു​ടെ പിതാവാ”ണ്‌ യഹോവ. കൂടാതെ അവൻ നമുക്ക്‌ ആത്മീയ വെളി​ച്ച​വും സത്യവും പ്രദാനം ചെയ്യുന്നു. (സങ്കീർത്തനം 43:3; യിരെ​മ്യാ​വു 31:35; 2 കൊരി​ന്ത്യർ 4:6) നീങ്ങു​ന്ന​ത​നു​സ​രി​ച്ചു നിഴലി​നു മാറ്റം​വ​രു​ത്തു​ക​യും നട്ടുച്ച​യ്‌ക്കു​മാ​ത്രം അത്യു​ജ്ജ്വല പ്രകാശം പരത്തു​ക​യും ചെയ്യുന്ന സൂര്യ​നിൽനി​ന്നു വ്യത്യ​സ്‌ത​മാ​യി, നല്ലതു പ്രദാനം ചെയ്യു​ന്ന​തിൽ ദൈവം എല്ലായ്‌പോ​ഴും അത്യധി​കം തീക്ഷ്‌ണ​മ​തി​യാണ്‌. അവന്റെ വചനത്തി​ലൂ​ടെ​യും “വിശ്വ​സ്‌ത​നും വിവേ​കി​യു​മായ ദാസ”നിലൂ​ടെ​യും പ്രദാനം ചെയ്യ​പ്പെ​ടുന്ന അവന്റെ ആത്മീയ കരുത​ലു​കൾ നാം പൂർണ​മാ​യി പ്രയോ​ജ​ന​പ്പെ​ടു​ത്തു​ന്നെ​ങ്കിൽ, പീഡാ​നു​ഭ​വങ്ങൾ നേരി​ടാൻ അവൻ നമ്മെ തീർച്ച​യാ​യും സജ്ജരാ​ക്കും.—മത്തായി 24:45, NW.

15. യഹോ​വ​യു​ടെ അതി​ശ്രേ​ഷ്‌ഠ​മായ ദാനങ്ങ​ളി​ലൊന്ന്‌ എന്താണ്‌?

¹⁵ ദൈവ​ത്തി​ന്റെ അതി​ശ്രേ​ഷ്‌ഠ​മായ ദാനങ്ങ​ളി​ലൊന്ന്‌ എന്താണ്‌? സുവാർത്ത​യ്‌ക്ക്‌ അഥവാ “സത്യവചന”ത്തിന്‌ അനുസൃ​തം പ്രവർത്തി​ച്ചു​കൊണ്ട്‌ പരിശു​ദ്ധാ​ത്മാ​വി​നാൽ ആത്മീയ പുത്ര​ന്മാ​രെ ഉളവാ​ക്കി​യ​താണ്‌ അത്‌. ആത്മീയ​ജ​നനം പ്രാപി​ക്കു​ന്നവർ സ്വർഗീയ “രാജ്യ​വും പുരോ​ഹി​ത​ന്മാ​രു”മാകേ​ണ്ട​തിന്‌ മനുഷ്യ​വർഗ​ത്തിൽനി​ന്നു തിരഞ്ഞ​ടു​ക്ക​പ്പെട്ട “ഒരുവി​ധം ആദ്യഫ​ലമാ”ണ്‌. (വെളി​പ്പാ​ടു 5:10; എഫെസ്യർ 1:13, 14) യേശു പുനരു​ത്ഥാ​നം പ്രാപിച്ച തീയതി​യായ നീസാൻ 16-ന്‌ അർപ്പിച്ച യവത്തിന്റെ ആദ്യഫ​ല​ങ്ങ​ളെ​യും പരിശു​ദ്ധാ​ത്മാ​വു പകരപ്പെട്ട പെന്ത​ക്കോ​സ്‌തു ദിനത്തിൽ മാവു​കൊ​ണ്ടുള്ള രണ്ട്‌ അപ്പം അർപ്പി​ച്ച​തി​നെ​യും കുറിച്ച്‌ യാക്കോബ്‌ ചിന്തി​ച്ചി​രു​ന്നി​രി​ക്കാം. (ലേവ്യ​പു​സ്‌തകം 23:4-11, 15-17) അക്കാര്യ​ത്തിൽ, യേശു ആദ്യഫ​ല​വും അവന്റെ കൂട്ടവ​കാ​ശി​കൾ “ഒരുവി​ധം ആദ്യഫല”വുമാ​യി​രി​ക്കും. നമുക്കു ഭൗമിക പ്രത്യാ​ശ​യാ​ണു​ള്ള​തെ​ങ്കി​ലോ? അതു മനസ്സിൽപ്പി​ടി​ക്കു​ന്നത്‌ രാജ്യ​ഭ​ര​ണ​ത്തിൻകീ​ഴിൽ നിത്യ​ജീ​വൻ സാധ്യ​മാ​ക്കി​യി​രി​ക്കുന്ന, “എല്ലാ നല്ല ദാനങ്ങ​ളു​ടെ​യും” ദാതാ​വി​ലുള്ള വിശ്വാ​സം മുറു​കെ​പ്പി​ടി​ക്കാൻ നമ്മെ സഹായി​ക്കും.

‘വചനം പ്രവർത്തി​ക്കു​ന്നവൻ’ ആയിരി​ക്കു​വിൻ

16. ‘കേൾപ്പാൻ വേഗത​യും സംസാ​രി​പ്പാ​നും കോപി​ക്കാ​നും താമസ​മു​ള്ള​വരു’മായി​രി​ക്കേ​ണ്ട​തെ​ന്തു​കൊണ്ട്‌?

¹⁶ ഇപ്പോൾ നമുക്കു വിശ്വാ​സ​ത്തി​ന്റെ പരി​ശോ​ധ​നകൾ നേരി​ടു​ന്നു​ണ്ടെ​ങ്കി​ലും ഇല്ലെങ്കി​ലും നാം “വചനം പ്രവർത്തി​ക്കു​ന്നവർ” ആയിരി​ക്കണം. (യാക്കോബ്‌ 1:19-25, NW) നാം ദൈവ​വ​ചനം “കേൾപ്പാൻ വേഗതയു”ള്ളവരും അത്‌ അനുസ​ര​ണ​പൂർവം പ്രവർത്തി​ക്കു​ന്ന​വ​രും ആയിരി​ക്കണം. (യോഹ​ന്നാൻ 8:47) അതേസ​മയം, നമുക്കു വാക്കുകൾ ശ്രദ്ധാ​പൂർവം അളന്ന്‌ “പറവാൻ താമസ”മുള്ളവ​രു​മാ​യി​രി​ക്കാം. (സദൃശ​വാ​ക്യ​ങ്ങൾ 15:28; 16:23) നമ്മുടെ പരി​ശോ​ധ​നകൾ ദൈവ​ത്തിൽനി​ന്നു​ള്ള​താ​ണെന്നു തിടു​ക്ക​ത്തിൽ നിഗമനം ചെയ്യരു​തെന്ന്‌ യാക്കോബ്‌ നമ്മെ ഉദ്‌ബോ​ധി​പ്പി​ക്കു​ന്നു. “കോപ​ത്തി​ന്നു താമസ​വു​മുള്ള”വരായി​രി​ക്കാ​നും നമ്മെ ബുദ്ധ്യു​പ​ദേ​ശി​ക്കു​ന്നുണ്ട്‌; കാരണം “മമനു​ഷ്യ​ന്റെ കോപം ദൈവ​ത്തി​ന്റെ നീതി പ്രവർത്തി​ക്കു​ന്നില്ല.” ആരു​ടെ​യെ​ങ്കി​ലും സംസാരം നമ്മിൽ കോപം ജ്വലി​പ്പി​ക്കു​ന്നെ​ങ്കിൽ, മുഷി​ച്ച​ലോ​ടെ​യുള്ള മറുപടി ഒഴിവാ​ക്കാ​നാ​യി ‘താമസ​മുള്ള’വരായി പ്രതി​ക​രി​ക്കാം. (എഫെസ്യർ 4:26, 27) നമുക്കു പ്രശ്‌നങ്ങൾ സൃഷ്ടി​ച്ചേ​ക്കാ​വു​ന്ന​തും മറ്റുള്ള​വർക്കു പരി​ശോ​ധന​യാ​യി​ത്തീർന്നേ​ക്കാ​വു​ന്ന​തു​മായ കോപ​മ​നോ​ഭാ​വം നീതി​മാ​നായ ദൈവ​ത്തിൽ വിശ്വാ​സ​മു​ള്ള​വർക്കു ഭൂഷണമല്ല. കൂടാതെ, നാം ‘ധാരാ​ള​മാ​യി വിവേകം’ പ്രകട​മാ​ക്കു​ന്ന​വ​രാ​ണെ​ങ്കിൽ, ‘കോപ​ത്തി​നു താമസ​മുള്ള’വരായി​രി​ക്കു​ക​യും നമ്മുടെ സഹോ​ദ​രീ​സ​ഹോ​ദ​ര​ന്മാർ നമ്മി​ലേക്ക്‌ ആകർഷി​ക്ക​പ്പെ​ടു​ക​യും ചെയ്യും.—സദൃശ​വാ​ക്യ​ങ്ങൾ 14:29, NW.

17. ഹൃദയ​ത്തിൽനി​ന്നും മനസ്സിൽനി​ന്നും തിന്മ നീക്കി​ക്ക​ള​യു​ന്ന​തി​ലൂ​ടെ എന്തു നേടുന്നു?

¹⁷ നാം നിശ്ചയ​മാ​യും “എല്ലാ അഴുക്കു”കളിൽനി​ന്നും—ദൈവ​ത്തി​നു വെറു​പ്പാ​യ​തും കോപം ജ്വലി​പ്പി​ക്കു​ന്ന​തു​മായ സകലത്തിൽനി​ന്നും—മുക്തരാ​യി​രി​ക്കേ​ണ്ട​തുണ്ട്‌. മാത്ര​വു​മല്ല, ‘അനാവശ്യ സംഗതി, തിന്മ ഒഴിവാ​ക്കണം.’ (NW) നാമെ​ല്ലാ​വ​രും ജഡത്തി​ന്റെ​യോ ആത്മാവി​ന്റെ​യോ ഏതൊരു അശുദ്ധി​യും ഒഴിവാ​ക്കണം. (2 കൊരി​ന്ത്യർ 7:1; 1 പത്രൊസ്‌ 1:14-16; 1 യോഹ​ന്നാൻ 1:9) ഹൃദയ​ത്തിൽനി​ന്നും മനസ്സിൽനി​ന്നും തിന്മയെ അകറ്റി​യത്‌, ‘ഉൾനട്ട’ സത്യത്തി​ന്റെ ‘വചനം സൗമ്യ​ത​യോ​ടെ കൈ​ക്കൊ​ള്ളാൻ’ നമ്മെ സഹായി​ച്ചു. (പ്രവൃ​ത്തി​കൾ 17:11, 12) ക്രിസ്‌ത്യാ​നി​ക​ളാ​യിട്ട്‌ എത്ര നാളാ​യാ​ലും, കൂടുതൽ തിരു​വെ​ഴു​ത്തു സത്യങ്ങൾ നമ്മിൽ ഉൾനട​പ്പെ​ടാൻ നാം അനുവ​ദി​ച്ചു​കൊ​ണ്ടി​രി​ക്കണം. എന്തു​കൊണ്ട്‌? എന്തെന്നാൽ, ഉൾനട​പ്പെട്ട വചനം ദൈവാ​ത്മാ​വി​നാൽ രക്ഷ കൈവ​രു​ത്തുന്ന “പുതിയ വ്യക്തി​ത്വം” ഉളവാ​ക്കു​ന്നു.—എഫെസ്യർ 4:20-24, NW.

18. വചനം പ്രവർത്തി​ക്കു​ന്നവൻ അതു കേൾക്കു​ക​മാ​ത്രം ചെയ്യു​ന്ന​വ​നിൽനി​ന്നു വ്യത്യ​സ്‌ത​നാ​യി​രി​ക്കു​ന്ന​തെ​ങ്ങനെ?

¹⁸ വചനം നമ്മുടെ വഴികാ​ട്ടി​യാ​ണെന്നു നാമെ​ങ്ങ​നെ​യാ​ണു പ്രകട​മാ​ക്കു​ന്നത്‌? “വചനം കേൾക്കു​ന്നവർ മാത്രമല്ല,” അനുസ​ര​ണ​യോ​ടെ അതു “പ്രവർത്തി​ക്കു​ന്ന​വ​രാ​യി”രുന്നു​കൊണ്ട്‌ അതു പ്രകട​മാ​ക്കാം. (ലൂക്കൊസ്‌ 11:28, NW) അതു ‘പ്രവർത്തി​ക്കു​ന്നവർ’ക്ക്‌ ക്രിസ്‌തീയ ശുശ്രൂ​ഷ​യി​ലെ തീക്ഷ്‌ണ​ത​യുള്ള പ്രവർത്ത​ന​വും ദൈവ​ജ​ന​ത്തി​ന്റെ യോഗ​ങ്ങ​ളി​ലെ നിരന്തര പങ്കെടു​ക്ക​ലും പോലുള്ള പ്രവൃ​ത്തി​കൾ ഉളവാ​ക്കുന്ന വിശ്വാ​സ​മുണ്ട്‌. (റോമർ 10:14, 15; എബ്രായർ 10:24, 25) വചനം കേൾക്കു​ക​മാ​ത്രം ചെയ്യു​ന്നവൻ “തന്റെ സ്വാഭാ​വിക മുഖം കണ്ണാടി​യിൽ നോക്കുന്ന ആളോടു ഒക്കുന്നു.” അവൻ ഒന്നു നോക്കി​യിട്ട്‌ പുറ​പ്പെ​ട്ടു​പോ​കു​ക​യും മുഖകാ​ന്തി വർധി​പ്പി​ക്കാൻ താൻ എന്തു ചെയ്യേ​ണ്ടി​യി​രു​ന്നു​വെന്നു മറന്നു​പോ​കു​ക​യും ചെയ്യുന്നു. ‘വചനം പ്രവർത്തി​ക്കു​ന്നവർ’ എന്നനി​ല​യിൽ, ദൈവം നമ്മിൽനിന്ന്‌ ആവശ്യ​പ്പെ​ടുന്ന സകലതും അടങ്ങി​യി​രി​ക്കുന്ന അവന്റെ “തികഞ്ഞ പ്രമാണം” നാം ശ്രദ്ധാ​പൂർവം വായിച്ച്‌ പ്രാവർത്തി​ക​മാ​ക്കു​ന്നു. ഇങ്ങനെ നാം ആസ്വദി​ക്കുന്ന സ്വാത​ന്ത്ര്യം പാപത്തി​നും മരണത്തി​നു​മുള്ള അടിമ​ത്ത​ത്തി​ന്റെ നേർവി​പ​രീ​ത​മാണ്‌, എന്തെന്നാൽ അതു ജീവനി​ലേക്കു നയിക്കു​ന്ന​താണ്‌. അതു​കൊണ്ട്‌, നിരന്തരം സൂക്ഷ്‌മ​പ​ഠനം നടത്തി​ക്കൊ​ണ്ടും ബാധക​മാ​ക്കി​ക്കൊ​ണ്ടും നമുക്ക്‌ ‘തികഞ്ഞ പ്രമാ​ണ​ത്തിൽ നിലനിൽക്കാം.’ ഒന്നാ​ലോ​ചി​ച്ചു​നോ​ക്കുക! ‘കേട്ടു മറന്നു​പോ​കാ​തെ പ്രവൃത്തി ചെയ്യുന്നവ’രെന്ന നിലയിൽ, നമുക്കു ദൈവ​പ്രീ​തി​യിൽനി​ന്നു​ള​വാ​കുന്ന സന്തോ​ഷ​മുണ്ട്‌.—സങ്കീർത്തനം 19:7-11.

ഔപചാ​രിക ആരാധ​ക​രെ​ക്കാൾ വളരെ​യേ​റെ

19, 20. (എ) യാക്കോബ്‌ 1:26, 27 പറയു​ന്ന​ത​നു​സ​രിച്ച്‌, ശുദ്ധാ​രാ​ധന നമ്മിൽനിന്ന്‌ എന്ത്‌ ആവശ്യ​പ്പെ​ടു​ന്നു? (ബി) കളങ്കര​ഹിത ആരാധ​ന​യു​ടെ ചില ദൃഷ്ടാ​ന്തങ്ങൾ ഏതെല്ലാം?

¹⁹ നമുക്കു ദിവ്യ​പ്രീ​തി ലഭിക്ക​ണ​മെ​ങ്കിൽ, സത്യാ​രാ​ധന കേവലം ഔപചാ​രി​കം മാത്ര​മ​ല്ലെന്നു നാം അനുസ്‌മ​രി​ക്കേ​ണ്ട​തുണ്ട്‌. (യാക്കോബ്‌ 1:26, 27) നാം യഹോ​വ​യു​ടെ സ്വീകാ​ര്യ​രായ ‘ഔപചാ​രിക ആരാധ​കരാ’ണെന്നു വിചാ​രി​ച്ചേ​ക്കാം, എന്നാൽ അവൻ നമ്മെ ഓരോ​രു​ത്ത​രെ​യും എങ്ങനെ വിലയി​രു​ത്തു​ന്നു​വെ​ന്ന​തി​നാണ്‌ വാസ്‌ത​വ​ത്തിൽ പ്രാധാ​ന്യ​മു​ള്ളത്‌. (1 കൊരി​ന്ത്യർ 4:4) ‘നാവിനു കടിഞ്ഞാ​ണി​ടാൻ’ പരാജ​യ​പ്പെ​ടു​ന്ന​താ​കാം ഒരു ഗുരു​ത​ര​മായ പാളിച്ച. നാം മറ്റുള്ള​വരെ ദുഷി​ക്കു​ക​യോ നുണപ​റ​യു​ക​യോ മറ്റുവി​ധ​ത്തിൽ നാവ്‌ ദുരു​പ​യോ​ഗ​പ്പെ​ടു​ത്തു​ക​യോ ചെയ്‌തിട്ട്‌ നമ്മുടെ ആരാധന ദൈവ​ത്തി​നു സ്വീകാ​ര്യ​മാ​ണെന്നു വിചാ​രി​ക്കു​ന്നെ​ങ്കിൽ നാം സ്വയം വഞ്ചിക്കു​ക​യാ​യി​രി​ക്കും. (ലേവ്യ​പു​സ്‌തകം 19:16; എഫെസ്യർ 4:25) തീർച്ച​യാ​യും, എന്തെങ്കി​ലു​മൊ​രു കാരണ​ത്താൽ നമ്മുടെ “ഭക്തി [“ആരാധ​നാ​രീ​തി,” NW] “വ്യർത്ഥ”വും ദൈവ​ത്തിന്‌ അസ്വീ​കാ​ര്യ​വു​മാ​യി​ത്തീ​രാൻ നാമാ​ഗ്ര​ഹി​ക്കു​ന്നില്ല.

²⁰ യാക്കോബ്‌ ശുദ്ധാ​രാ​ധ​ന​യു​ടെ എല്ലാ വശങ്ങളും പരാമർശി​ക്കു​ന്നി​ല്ലെ​ങ്കി​ലും, അതിൽ ‘അനാഥ​രെ​യും വിധവ​മാ​രെ​യും അവരുടെ സങ്കടത്തിൽ കാത്തു​കൊ​ള്ളു​ന്നത്‌’ ഉൾപ്പെ​ടു​ന്നു​വെന്ന്‌ അവൻ പറയുന്നു. (ഗലാത്യർ 2:10; 6:10; 1 യോഹ​ന്നാൻ 3:18) വിധവ​മാർക്കു​വേണ്ടി കരുതു​ന്ന​തിൽ ക്രിസ്‌തീയ സഭ പ്രത്യേക താത്‌പ​ര്യം പ്രകട​മാ​ക്കു​ന്നു. (പ്രവൃ​ത്തി​കൾ 6:1-6; 1 തിമൊ​ഥെ​യൊസ്‌ 5:8-10) ദൈവം വിധവ​മാ​രു​ടെ​യും അനാഥ​രു​ടെ​യും സംരക്ഷ​ക​നാ​യ​തു​കൊണ്ട്‌, അവരെ ആത്മീയ​മാ​യും ഭൗതി​ക​മാ​യും സഹായി​ക്കാൻ നമ്മാലാ​കു​ന്നത്‌ ചെയ്‌തു​കൊണ്ട്‌ നമുക്ക്‌ അവനു​മാ​യി സഹകരി​ക്കാം. (ആവർത്ത​ന​പു​സ്‌തകം 10:17, 18) സാത്താന്റെ അധികാ​ര​ത്തിൻകീ​ഴിൽ കിടക്കുന്ന നീതി​നി​ഷ്‌ഠ​മ​ല്ലാത്ത മനുഷ്യ​സ​മു​ദാ​യ​മെന്ന “ലോക​ത്താ​ലുള്ള കളങ്കം പററാ​ത​വണ്ണം തന്നെത്താൻ കാത്തു​കൊ​ള്ളു​ന്ന​തും” ശുദ്ധാ​രാ​ധ​ന​യിൽ ഉൾപ്പെ​ടു​ന്നു. (യോഹ​ന്നാൻ 17:16; 1 യോഹ​ന്നാൻ 5:19) അതു​കൊണ്ട്‌ നമുക്ക്‌ ലോക​ത്തി​ന്റെ അഭക്ത നടത്തയിൽനി​ന്നു മുക്തരാ​യി നില​കൊ​ള്ളാം, അങ്ങനെ​യാ​കു​മ്പോൾ നമുക്കു യഹോ​വയെ മഹത്ത്വ​പ്പെ​ടു​ത്താ​നും അവന്റെ സേവന​ത്തിൽ ഉപയോ​ഗ​പ്ര​ദ​രാ​യി​രി​ക്കാ​നും സാധി​ക്കും.—2 തിമൊ​ഥെ​യൊസ്‌ 2:20-22.

21. യാക്കോ​ബി​ന്റെ ലേഖന​ത്തോ​ടുള്ള ബന്ധത്തിൽ, ഏതു കൂടു​ത​ലായ ചോദ്യ​ങ്ങൾ നമ്മുടെ പരിചി​ന്തനം അർഹി​ക്കു​ന്നു?

²¹ നാമി​തു​വരെ പരിചി​ന്തിച്ച യാക്കോ​ബി​ന്റെ ബുദ്ധ്യു​പ​ദേശം പീഡാ​നു​ഭ​വ​ങ്ങ​ളിൽ സഹിച്ചു​നിൽക്കാ​നും വിശ്വാ​സം മുറു​കെ​പ്പി​ടി​ക്കാ​നും നമ്മെ സഹായി​ക്കണം. അതു നല്ല ദാനങ്ങ​ളു​ടെ സ്‌നേ​ഹ​ധ​ന​നായ ദാതാ​വി​നോ​ടുള്ള നമ്മുടെ വിലമ​തിപ്പ്‌ വർധി​പ്പി​ക്കണം. യാക്കോ​ബി​ന്റെ വാക്കുകൾ നമ്മെ ശുദ്ധാ​രാ​ധ​ന​യി​ലേർപ്പെ​ടാൻ സഹായി​ക്കു​ന്നു. അവൻ മറ്റെന്തു​കൂ​ടെ നമ്മുടെ ശ്രദ്ധയിൽപ്പെ​ടു​ത്തു​ന്നു? യഹോ​വ​യിൽ യഥാർഥ വിശ്വാ​സ​മു​ണ്ടെന്നു തെളി​യി​ക്കാൻ കൂടു​ത​ലായ എന്തു നടപടി​കൾ നമുക്കു സ്വീക​രി​ക്കാ​നാ​കും?

[അടിക്കു​റി​പ്പു​കൾ]

നിങ്ങൾ എങ്ങനെ ഉത്തരം പറയും?

□ പീഡാ​നു​ഭ​വ​ങ്ങ​ളിൽ സഹിച്ചു​നിൽക്കാൻ നമ്മെ എന്തു സഹായി​ക്കും?

□ പീഡാ​നു​ഭ​വങ്ങൾ നേരി​ടു​മ്പോ​ഴും, ക്രിസ്‌ത്യാ​നി​കൾക്ക്‌ ആഹ്ലാദി​ക്കാ​നാ​കു​ന്നത്‌ എന്തു​കൊണ്ട്‌?

□ നമു​ക്കെ​ങ്ങനെ വചനം പ്രവർത്തി​ക്കു​ന്ന​വ​രാ​യി​രി​ക്കാൻ കഴിയും?

□ ശുദ്ധാ​രാ​ധ​ന​യിൽ എന്തുൾപ്പെ​ടു​ന്നു?

[9-ാം പേജിലെ ചിത്രം]

പീഡാനുഭവങ്ങൾ നേരി​ടു​മ്പോൾ, പ്രാർഥ​ന​യ്‌ക്ക്‌ ഉത്തരം നൽകാ​നുള്ള യഹോ​വ​യു​ടെ ശക്തിയിൽ വിശ്വാ​സം പ്രകട​മാ​ക്കു​ക

[10-ാം പേജിലെ ചിത്രങ്ങൾ]

‘വചനം പ്രവർത്തി​ക്കു​ന്നവർ’ ലോക​വ്യാ​പ​ക​മാ​യി ദൈവ​രാ​ജ്യം ഘോഷി​ക്കു​ന്നു