10, 11. (എ) വേറെ ആടുകളുടെ മുമ്പാകെ വെച്ചിരിക്കുന്ന പ്രത്യാശ എന്ത്‌? (ബി) ഭൗമിക പ്രത്യാശ സഫലമാകുന്നത്‌ ക്രിസ്‌തുവിനോടും “ദൈവപുത്രന്മാരുടെ വെളിപ്പെട”ലിനോടും ബന്ധപ്പെട്ടിരിക്കുന്നത്‌ എങ്ങനെ?

¹⁰ ക്രിസ്‌തുവിനോടൊപ്പം ‘കൂട്ടവകാശികൾ’ ആയിരിക്കാൻ, ആത്മജനനം പ്രാപിച്ച ‘ദൈവപുത്രന്മാർക്കുള്ള’ മഹത്തായ പ്രത്യാശയെക്കുറിച്ച്‌ പൗലോസ്‌ അപ്പൊസ്‌തലൻ എഴുതി. തുടർന്ന്‌ എണ്ണമറ്റ വേറെ ആടുകൾക്ക്‌ യഹോവ നൽകിയിരിക്കുന്ന ശ്രേഷ്‌ഠമായ പ്രത്യാശയെക്കുറിച്ചും അവൻ പറയുകയുണ്ടായി: “(മനുഷ്യ)സൃഷ്ടി (അഭിഷിക്തരായ) ദൈവപുത്രന്മാരുടെ വെളിപ്പെടലിനായി അത്യാകാംക്ഷയോടെ കാത്തിരിക്കുന്നു. സൃഷ്ടിതന്നെയും ജീർണതയുടെ അടിമത്തത്തിൽനിന്നു സ്വതന്ത്രമാക്കപ്പെട്ട്‌ ദൈവമക്കളുടെ മഹത്തായ സ്വാതന്ത്ര്യം പ്രാപിക്കുമെന്ന പ്രത്യാശയോടുകൂടെ വ്യർഥതയ്‌ക്കു വിധേയമാക്കപ്പെട്ടു; അതിന്റെ സ്വന്തം ഇഷ്ടപ്രകാരമല്ല, അതിനെ വിധേയമാക്കിയവന്റെ ഇഷ്ടപ്രകാരംതന്നെ.”—റോമർ 8:14-21.

12. അഭിഷിക്തരുടെ വെളിപ്പെടൽ മനുഷ്യവർഗത്തിന്‌ മഹത്തായ എന്തൊക്കെ പ്രയോജനങ്ങൾ കൈവരുത്തും?

¹² ക്രിസ്‌തുവിന്റെ ആയിരംവർഷ വാഴ്‌ചയുടെ സമയത്ത്‌ മനുഷ്യ“സൃഷ്ടി”ക്ക്‌ എത്ര വലിയ ആശ്വാസമായിരിക്കും ലഭിക്കുക! ക്രിസ്‌തുവിനോടൊപ്പം പുരോഹിതന്മാരായി സേവിക്കവെ മറുവിലായാഗത്തിന്റെ പ്രയോജനം മനുഷ്യവർഗത്തിനു ലഭിക്കാൻ ഇടയാക്കിക്കൊണ്ട്‌ ആ സമയത്ത്‌ ‘ദൈവപുത്രന്മാർ’ വേറൊരു വിധത്തിലും ‘വെളിപ്പെടും.’ സ്വർഗീയ രാജ്യത്തിന്റെ പ്രജകളെന്ന നിലയിൽ മനുഷ്യ“സൃഷ്ടി” പാപത്തിന്റെയും മരണത്തിന്റെയും കെടുതികളിൽനിന്നുള്ള വിടുതൽ അനുഭവിച്ചുതുടങ്ങും. അനുസരണമുള്ള മനുഷ്യർ ക്രമേണ ‘ജീർണതയുടെ അടിമത്തത്തിൽനിന്നു സ്വതന്ത്രരാക്കപ്പെടും.’ ആയിരംവർഷ വാഴ്‌ചക്കാലത്തുടനീളവും അതിന്റെ ഒടുവിലുള്ള അന്തിമ പരിശോധനയിലും യഹോവയോടു വിശ്വസ്‌തരായി നിലനിൽക്കുന്നെങ്കിൽ അവരുടെ പേരുകൾ “ജീവന്റെ പുസ്‌തക”ത്തിൽ എന്നെന്നേക്കുമായി രേഖപ്പെടുത്തും. അവർ “ദൈവമക്കളുടെ മഹത്തായ സ്വാതന്ത്ര്യം” പ്രാപിക്കും. (വെളി. 20:7, 8, 11, 12) എത്ര ഉദാത്തമായ പ്രത്യാശ!