ദൈവ​ത്തെ​പ്പോ​ലെ നിങ്ങളും ജീവനെ വില​യേ​റി​യ​താ​യി കാണു​ന്നു​ണ്ടോ?

1, 2. ദൈവ​ത്തിൽനി​ന്നുള്ള ഏതു സമ്മാന​മാണ്‌ ഇന്നു വളരെ വില​യേ​റി​യ​താ​യി​രി​ക്കു​ന്നത്‌, എന്തു​കൊണ്ട്‌?

സ്വർഗീ​യ​പി​താവ്‌ നമ്മളെ വിലതീ​രാത്ത ഒരു സ്വത്ത്‌ ഏൽപ്പി​ച്ചി​ട്ടുണ്ട്‌: ദൈവ​ത്തി​ന്റെ ഗുണങ്ങൾ പ്രതി​ഫ​ലി​പ്പി​ക്കാൻ കഴിവുള്ള, ബുദ്ധി​ശ​ക്തി​യുള്ള മനുഷ്യ​രെ​ന്ന​നി​ല​യിൽ നമ്മൾ ആസ്വദി​ക്കുന്ന ജീവൻ. (ഉൽപത്തി 1:27) വില​യേ​റിയ ആ സമ്മാനം ബൈബിൾത​ത്ത്വ​ങ്ങ​ളു​ടെ അടിസ്ഥാ​ന​ത്തിൽ കാര്യങ്ങൾ വിവേ​ചി​ക്കാൻ നമ്മളെ സജ്ജരാ​ക്കു​ന്നു. ബൈബിൾത​ത്ത്വ​ങ്ങൾ ബാധക​മാ​ക്കി​യാൽ നമ്മൾ യഹോ​വയെ സ്‌നേ​ഹി​ക്കുന്ന, ‘ശരിയും തെറ്റും വേർതി​രി​ച്ച​റി​യാ​നാ​യി തങ്ങളുടെ വിവേ​ച​നാ​പ്രാ​പ്‌തി​യെ ഉപയോ​ഗ​ത്തി​ലൂ​ടെ പരിശീ​ലി​പ്പിച്ച’ ആത്മീയ​പ​ക്വ​ത​യുള്ള വ്യക്തി​ക​ളാ​യി വളരും.—എബ്രായർ 5:14.

² ബൈബിൾത​ത്ത്വ​ങ്ങ​ളു​ടെ അടിസ്ഥാ​ന​ത്തിൽ കാര്യങ്ങൾ വിവേ​ചി​ക്കാ​നുള്ള കഴിവ്‌ ഇക്കാലത്ത്‌ വളരെ പ്രധാ​ന​മാണ്‌. കാരണം, ജീവി​ത​ത്തിൽ ഉയർന്നു​വ​ന്നേ​ക്കാ​വുന്ന എല്ലാ സാഹച​ര്യ​ങ്ങൾക്കും പറ്റിയ നിയമങ്ങൾ ഉണ്ടാക്കാൻ സാധി​ക്കാത്ത രീതി​യിൽ വളരെ സങ്കീർണ​മാ​യി​ത്തീർന്നി​രി​ക്കു​ക​യാണ്‌ ഇന്നത്തെ ലോകം. വൈദ്യ​ശാ​സ്‌ത്ര​രം​ഗം ഇക്കാര്യ​ത്തിൽ നല്ലൊരു ഉദാഹ​ര​ണ​മാണ്‌, പ്രത്യേ​കി​ച്ചും രക്തം ഉൾപ്പെ​ടുന്ന ഉത്‌പ​ന്ന​ങ്ങ​ളു​ടെ​യും ചികി​ത്സാ​രീ​തി​ക​ളു​ടെ​യും കാര്യ​ത്തിൽ. യഹോ​വയെ അനുസ​രി​ക്കാൻ ആഗ്രഹി​ക്കുന്ന എല്ലാവ​രും താത്‌പ​ര്യ​ത്തോ​ടെ​യും ഗൗരവ​ത്തോ​ടെ​യും കാണുന്ന ഒരു കാര്യ​മാണ്‌ ഇത്‌. എന്നാൽ ബന്ധപ്പെട്ട ബൈബിൾത​ത്ത്വ​ങ്ങൾ മനസ്സി​ലാ​ക്കു​ന്ന​പക്ഷം മനസ്സാ​ക്ഷി​ക്കു വിരു​ദ്ധ​മ​ല്ലാ​ത്ത​തും ദൈവ​സ്‌നേ​ഹ​ത്തിൽ നിലനിൽക്കാൻ നമ്മളെ സഹായി​ക്കു​ന്ന​തും ആയ ശരിയായ തീരു​മാ​ന​ങ്ങ​ളെ​ടു​ക്കാൻ നമുക്കു സാധി​ക്കും. (സുഭാ​ഷി​തങ്ങൾ 2:6-11) അത്തരം ചില തത്ത്വങ്ങൾ നോക്കുക.

3, 4. രക്തത്തിന്റെ പവിത്രത ആദ്യമാ​യി തിരു​വെ​ഴു​ത്തു​കൾ വ്യക്തമാ​ക്കി​യത്‌ എപ്പോൾ, ഏതു തത്ത്വങ്ങ​ളാണ്‌ അതിന്‌ ആധാര​മാ​യി​രി​ക്കു​ന്നത്‌?

³ കയീൻ ഹാബേ​ലി​നെ മൃഗീ​യ​മാ​യി കൊല​പ്പെ​ടു​ത്തി​യ​തി​നു തൊട്ടു​പി​ന്നാ​ലെ​യാണ്‌, ജീവനും രക്തവും തമ്മിലുള്ള അഭേദ്യ​മായ ബന്ധവും അവയുടെ പവി​ത്ര​ത​യും യഹോവ ആദ്യമാ​യി വ്യക്തമാ​ക്കി​യത്‌. “നിന്റെ അനിയന്റെ രക്തം നിലത്തു​നിന്ന്‌ എന്നോടു നിലവി​ളി​ക്കു​ന്നു,” ദൈവം കയീ​നോ​ടു പറഞ്ഞു. (ഉൽപത്തി 4:10) യഹോ​വ​യു​ടെ വീക്ഷണ​ത്തിൽ ഹാബേ​ലി​ന്റെ രക്തം, അകാല​ത്തിൽ പൊലി​ഞ്ഞു​പോയ ഹാബേ​ലി​ന്റെ ജീവ​നെ​യാണ്‌ അർഥമാ​ക്കി​യത്‌. അതു​കൊണ്ട്‌ ഹാബേ​ലി​ന്റെ രക്തം പ്രതി​കാ​ര​ത്തി​നാ​യി ദൈവ​ത്തോ​ടു നിലവി​ളി​ച്ചു എന്നു പറയാ​നാ​കും.—എബ്രായർ 12:24.

⁴ നോഹ​യു​ടെ കാലത്തെ പ്രളയ​ത്തെ​ത്തു​ടർന്ന്‌ ജന്തുക്ക​ളു​ടെ മാംസം കഴിക്കാൻ ദൈവം മനുഷ്യന്‌ അനുവാ​ദം കൊടു​ത്തു. എന്നാൽ രക്തം ഭക്ഷിക്ക​രു​താ​യി​രു​ന്നു. ദൈവം പറഞ്ഞു: “പ്രാണ​നായ രക്തത്തോ​ടു​കൂ​ടെ നിങ്ങൾ മാംസം തിന്നരുത്‌. നിങ്ങളു​ടെ ജീവര​ക്ത​ത്തി​നും ഞാൻ കണക്കു ചോദി​ക്കും.” (ഉൽപത്തി 9:4, 5) ഈ കല്‌പന ഇന്നു ജീവി​ക്കുന്ന നമ്മൾ ഉൾപ്പെടെ നോഹ​യു​ടെ എല്ലാ പിന്മു​റ​ക്കാർക്കും ബാധക​മാണ്‌. ദൈവം മുമ്പ്‌ കയീ​നോ​ടു സൂചി​പ്പിച്ച കാര്യ​ത്തിന്‌—എല്ലാ ജീവി​ക​ളു​ടെ​യും രക്തം അവയുടെ ജീവനെ പ്രതീ​ക​പ്പെ​ടു​ത്തു​ന്നു എന്ന വസ്‌തു​ത​യ്‌ക്ക്‌—ഇത്‌ അടിവ​ര​യി​ടു​ന്നു. ജീവന്റെ ഉറവായ യഹോവ, ജീവ​നോ​ടും രക്തത്തോ​ടും അനാദ​രവ്‌ കാണി​ക്കുന്ന എല്ലാവ​രോ​ടും കണക്കു ചോദി​ക്കു​മെ​ന്നും ആ കല്‌പന വ്യക്തമാ​ക്കു​ന്നു.—സങ്കീർത്തനം 36:9.

5, 6. രക്തം പവി​ത്ര​വും അമൂല്യ​വും ആണെന്നു മോശ​യി​ലൂ​ടെ ദൈവം നൽകിയ നിയമം വ്യക്തമാ​ക്കി​യത്‌ എങ്ങനെ? (“ജീവികളുടെ ജീവനെ മാനി​ക്കു​ക” എന്ന ചതുര​വും കാണുക.)

⁵ ഈ രണ്ട്‌ അടിസ്ഥാ​ന​സ​ത്യ​ങ്ങ​ളും മോശ​യി​ലൂ​ടെ കൊടുത്ത നിയമ​ത്തിൽ കാണാം. ലേവ്യ 17:10, 11 ഇങ്ങനെ പറയുന്നു: “(ആരെങ്കി​ലും) ഏതെങ്കി​ലും തരം രക്തം കഴിക്കു​ന്നെ​ങ്കിൽ ഞാൻ അവന്‌ എതിരെ തിരി​യും. പിന്നെ അവനെ അവന്റെ ജനത്തിന്‌ ഇടയിൽ വെച്ചേ​ക്കില്ല. കാരണം ഏതൊരു ജീവി​യു​ടെ​യും പ്രാണൻ രക്തത്തി​ലാണ്‌. ഈ രക്തമാ​ണ​ല്ലോ അതിൽ അടങ്ങി​യി​ട്ടുള്ള ജീവൻ മുഖാ​ന്തരം പാപപ​രി​ഹാ​രം വരുത്തു​ന്നത്‌. അതു​കൊണ്ട്‌ പാപപ​രി​ഹാ​രം വരുത്താൻവേണ്ടി യാഗപീ​ഠ​ത്തിൽ ഉപയോ​ഗി​ക്കാൻ ഞാൻ അതു നിങ്ങൾക്കു തന്നിരി​ക്കു​ന്നു.”a—“പാപപ​രി​ഹാ​രം വരുത്താ​നുള്ള രക്തത്തിന്റെ കഴിവ്‌” എന്ന ചതുരം കാണുക.

⁶ ഒരു മൃഗത്തി​ന്റെ രക്തം യാഗപീ​ഠ​ത്തിൽ ഉപയോ​ഗി​ക്കാ​ത്ത​പക്ഷം അതു നിലത്ത്‌ ഒഴിച്ചു​ക​ള​യ​ണ​മാ​യി​രു​ന്നു. ജീവൻ അതിന്റെ യഥാർഥ​ത്തി​ലുള്ള ഉടമയ്‌ക്കു തിരി​ച്ചു​കൊ​ടു​ക്കു​ന്ന​തി​ന്റെ പ്രതീ​ക​മാ​യി​രു​ന്നു അത്‌. (ആവർത്തനം 12:16; യഹസ്‌കേൽ 18:4) എന്നാൽ, ശരീര​ക​ല​ക​ളിൽനിന്ന്‌ രക്തം പരിപൂർണ​മാ​യി നീക്കം​ചെ​യ്യ​പ്പെ​ടു​ന്നെന്ന്‌ ഉറപ്പാ​ക്കാൻ ഇസ്രാ​യേ​ല്യർ അങ്ങേയ​റ്റത്തെ നടപടി​ക്ര​മങ്ങൾ പിൻപ​റ്റേ​ണ്ടി​യി​രു​ന്നില്ല എന്നതു ശ്രദ്ധി​ക്കുക. അറുത്ത്‌ കൊല്ലു​ക​യും ശരിയാ​യി രക്തം വാർന്നു​പോ​കാൻ അനുവ​ദി​ക്കു​ക​യും ചെയ്‌താൽ ശുദ്ധമായ മനസ്സാ​ക്ഷി​യോ​ടെ അവർക്കു മാംസം കഴിക്കാ​മാ​യി​രു​ന്നു. കാരണം, ആ നടപടി ജീവദാ​താ​വിന്‌ അർഹമായ ആദരവ്‌ നൽകു​മാ​യി​രു​ന്നു.

 7. ദാവീദ്‌ രക്തത്തിന്റെ പവി​ത്ര​ത​യോട്‌ ആദരവ്‌ കാട്ടി​യത്‌ എങ്ങനെ?

⁷ ദൈവ​ത്തി​ന്റെ “മനസ്സിന്‌ ഇണങ്ങിയ” പുരു​ഷ​നായ ദാവീ​ദി​നു രക്തം സംബന്ധിച്ച ദൈവ​നി​യ​മ​ത്തി​നു പിന്നിലെ തത്ത്വങ്ങൾ അറിയാ​മാ​യി​രു​ന്നു. (പ്രവൃ​ത്തി​കൾ 13:22) ഒരിക്കൽ ദാവീദ്‌ ദാഹിച്ച്‌ വലഞ്ഞ സാഹച​ര്യ​ത്തിൽ, കൂട്ടത്തിൽപ്പെട്ട മൂന്നു പേർ ശത്രു​പാ​ള​യ​ത്തി​ലേക്കു കടന്നു​ചെന്ന്‌ അവി​ടെ​യുള്ള ഒരു കിണറ്റിൽനിന്ന്‌ വെള്ളവു​മാ​യി മടങ്ങി​യെത്തി. ദാവീ​ദി​ന്റെ പ്രതി​ക​രണം എന്തായി​രു​ന്നു? ദാവീദ്‌ ചോദി​ച്ചു, “സ്വന്തം ജീവൻ പണയം​വെച്ച്‌ പോയ ഈ പുരു​ഷ​ന്മാ​രു​ടെ രക്തം ഞാൻ കുടി​ക്കാ​നോ!” ദാവീ​ദി​നെ സംബന്ധി​ച്ചി​ട​ത്തോ​ളം, ആ വെള്ളം അവരുടെ ജീവര​ക്ത​മാ​യി​രു​ന്നു. അതു​കൊണ്ട്‌, ദാഹം ഗണ്യമാ​ക്കാ​തെ ദാവീദ്‌ അത്‌ “യഹോ​വ​യു​ടെ സന്നിധി​യിൽ നിലത്ത്‌ ഒഴിച്ചു.”—2 ശമുവേൽ 23:15-17.

8, 9. ക്രിസ്‌തീ​യസഭ സ്ഥാപി​ത​മാ​യ​തോ​ടെ രക്തവും ജീവനും സംബന്ധിച്ച ദൈവ​ത്തി​ന്റെ വീക്ഷണ​ത്തി​നു മാറ്റം​വ​ന്നോ? വിശദീ​ക​രി​ക്കുക.

⁸ രക്തം സംബന്ധിച്ച്‌ ദൈവം നോഹ​യ്‌ക്കു കല്‌പന കൊടുത്ത്‌ ഏകദേശം 2,400 വർഷങ്ങൾക്കും നിയമ​യു​ട​മ്പടി നിലവിൽവന്ന്‌ ഏകദേശം 1,500 വർഷങ്ങൾക്കും ശേഷം, ഇങ്ങനെ എഴുതാൻ യഹോവ ആദ്യകാ​ല​ക്രി​സ്‌തീ​യ​സ​ഭ​യു​ടെ ഭരണസം​ഘത്തെ പ്രചോ​ദി​പ്പി​ച്ചു: “നിങ്ങളെ കൂടുതൽ ഭാര​പ്പെ​ടു​ത്ത​രു​തെന്നു പരിശു​ദ്ധാ​ത്മാ​വി​നും ഞങ്ങൾക്കും തോന്നി​യ​തു​കൊണ്ട്‌ പിൻവ​രുന്ന പ്രധാ​ന​കാ​ര്യ​ങ്ങൾ മാത്രം ശ്രദ്ധി​ക്കുക: വിഗ്ര​ഹ​ങ്ങൾക്ക്‌ അർപ്പിച്ചവ, രക്തം, ശ്വാസം​മു​ട്ടി ചത്തത്‌, ലൈം​ഗിക അധാർമി​കത എന്നിവ ഒഴിവാ​ക്കുക.”—പ്രവൃ​ത്തി​കൾ 15:28, 29.

⁹ രക്തം പവി​ത്ര​മാ​ണെ​ന്നും അതു ദുരു​പ​യോ​ഗം ചെയ്യു​ന്നതു വിഗ്ര​ഹാ​രാ​ധ​ന​യോ ലൈം​ഗിക അധാർമി​ക​ത​യോ പോലെ ധാർമി​ക​ത​യ്‌ക്കു നിരക്കാ​ത്ത​താ​ണെ​ന്നും ആദ്യകാ​ല​ഭ​ര​ണ​സം​ഘം തിരി​ച്ച​റി​ഞ്ഞി​രു​ന്നെന്നു വ്യക്തം. സത്യ​ക്രി​സ്‌ത്യാ​നി​കൾ ഇന്ന്‌ ആ നിലപാ​ടി​നോ​ടു പറ്റിനിൽക്കു​ന്നു. ബൈബിൾത​ത്ത്വ​ങ്ങൾക്കു ചേർച്ച​യിൽ ചിന്തി​ക്കു​ന്ന​തു​കൊണ്ട്‌ രക്തത്തിന്റെ ഉപയോ​ഗം ഉൾപ്പെ​ടുന്ന കാര്യ​ങ്ങ​ളിൽ യഹോ​വ​യ്‌ക്ക്‌ ഇഷ്ടമുള്ള തീരു​മാ​ന​ങ്ങ​ളെ​ടു​ക്കാൻ അവർക്കാ​കു​ന്നു.

10, 11. (എ) രക്തത്തി​ന്റെ​യും അതിന്റെ പ്രാഥ​മി​ക​ഘ​ട​ക​ങ്ങ​ളു​ടെ​യും ഉപയോ​ഗത്തെ യഹോ​വ​യു​ടെ സാക്ഷികൾ എങ്ങനെ കാണുന്നു? (ബി) രക്തത്തോ​ടു ബന്ധപ്പെട്ട ഏതു കാര്യ​ങ്ങ​ളിൽ ക്രിസ്‌ത്യാ​നി​കൾക്കു വ്യത്യ​സ്‌ത​മായ അഭി​പ്രാ​യങ്ങൾ ഉണ്ടായി​രു​ന്നേ​ക്കാം?

¹⁰ രക്തപ്പകർച്ച നിരസി​ക്കു​ന്ന​തും രക്തപ്പകർച്ച​യ്‌ക്കാ​യി സ്വന്തം രക്തം ദാനം​ചെ​യ്യു​ക​യോ സൂക്ഷി​ച്ചു​വെ​ക്കു​ക​യോ ചെയ്യാ​തി​രി​ക്കു​ന്ന​തും ആണ്‌ ‘രക്തം ഒഴിവാ​ക്കു​ന്ന​തിൽ’ ഉൾപ്പെ​ട്ടി​രി​ക്കു​ന്ന​തെന്ന്‌ യഹോ​വ​യു​ടെ സാക്ഷി​കൾക്ക്‌ അറിയാം. ദൈവ​നി​യ​മ​ത്തോ​ടുള്ള ആദരവ്‌ കാരണം അവർ രക്തത്തിന്റെ പ്രാഥ​മി​ക​ഘ​ട​ക​ങ്ങ​ളായ അരുണ​ര​ക്താ​ണു​ക്കൾ, ശ്വേത​ര​ക്താ​ണു​ക്കൾ, പ്ലേറ്റ്‌ലെ​റ്റു​കൾ, പ്ലാസ്‌മ എന്നിവ വർജി​ക്കു​ന്നു.

¹¹ ഈ ഘടകങ്ങളെ ഘടകാം​ശ​ങ്ങ​ളാ​യി വിഘടി​പ്പിച്ച്‌ പല വിധങ്ങ​ളിൽ ഉപയോ​ഗി​ക്കുന്ന രീതി ഇന്നു നിലവി​ലുണ്ട്‌. ഒരു ക്രിസ്‌ത്യാ​നിക്ക്‌ അത്തരം ഘടകാം​ശങ്ങൾ ഉപയോ​ഗി​ക്കാ​നാ​കു​മോ? അദ്ദേഹം അവയെ “രക്ത”മായി​ത്തന്നെ കാണണോ? അതു തീരു​മാ​നി​ക്കേ​ണ്ടത്‌ ഓരോ വ്യക്തി​യു​മാണ്‌. ഡയാലി​സിസ്‌, ഹീമോ​ഡൈ​ലൂ​ഷൻ, സെൽ സാൽവേജ്‌ എന്നിങ്ങനെ രോഗി​യു​ടെ സ്വന്തം രക്തം ഉൾപ്പെ​ടുന്ന ചികി​ത്സ​ക​ളു​ടെ കാര്യ​ത്തി​ലും (രക്തം മുന്നമേ സ്റ്റോർ ചെയ്യാ​തി​രി​ക്കു​ന്നി​ട​ത്തോ​ളം) ഇതേ തത്ത്വം ബാധക​മാണ്‌.—അനുബന്ധത്തിലെ “രക്തത്തിന്റെ ഘടകാം​ശ​ങ്ങ​ളും ശസ്‌ത്ര​ക്രി​യാ​ന​ട​പ​ടി​ക​ളും” എന്ന ഭാഗം കാണുക.

12. മനസ്സാ​ക്ഷി​പ​ര​മായ കാര്യ​ങ്ങളെ നമ്മൾ എങ്ങനെ വീക്ഷി​ക്കണം, എങ്ങനെ കൈകാ​ര്യം ചെയ്യണം?

¹² മനസ്സാ​ക്ഷി​ക്കു വിട്ടി​രി​ക്കുന്ന കാര്യ​ങ്ങ​ളിൽ നമ്മൾ എന്തു തീരു​മാ​ന​മെ​ടു​ത്താ​ലും യഹോ​വ​യ്‌ക്ക്‌ അതു പ്രശ്‌ന​മ​ല്ലെ​ന്നാ​ണോ? ഒരിക്ക​ലു​മല്ല, നമ്മുടെ ചിന്തക​ളി​ലും ഉൾ​പ്രേ​ര​ണ​ക​ളി​ലും ദൈവ​ത്തി​നു വലിയ താത്‌പ​ര്യ​മുണ്ട്‌. (സുഭാ​ഷി​തങ്ങൾ 17:3; 24:12 വായി​ക്കുക.) അതു​കൊണ്ട്‌ ഒരു മരുന്നോ ചികി​ത്സാ​രീ​തി​യോ സംബന്ധിച്ച്‌ പ്രാർഥ​നാ​പൂർവം പഠിച്ച​ശേഷം നമ്മൾ നമ്മുടെ ബൈബിൾപ​രി​ശീ​ലി​ത​മ​ന​സ്സാ​ക്ഷി​ക്കു ചേർച്ച​യിൽ തീരു​മാ​ന​മെ​ടു​ക്കണം. (റോമർ 14:2, 22, 23) നമ്മൾ എന്തു ചെയ്യണ​മെന്നു തീരു​മാ​നി​ക്കേ​ണ്ടതു മറ്റുള്ള​വരല്ല. “എന്റെ സ്ഥാനത്ത്‌ നിങ്ങളാ​യി​രു​ന്നെ​ങ്കിൽ എന്തു ചെയ്യു​മാ​യി​രു​ന്നു” എന്നു നമ്മൾ ആരോ​ടും ചോദി​ക്കാ​നും പാടില്ല. അത്തരം കാര്യ​ങ്ങ​ളിൽ ഓരോ ക്രിസ്‌ത്യാ​നി​യും ‘സ്വന്തം ചുമടു ചുമക്കണം.’b—ഗലാത്യർ 6:5; റോമർ 14:12; “രക്തത്തെ ഞാൻ പവി​ത്ര​മാ​യി കാണു​ന്നു​ണ്ടോ?” എന്ന ചതുരം കാണുക.

13. യഹോ​വ​യു​ടെ നിയമ​ങ്ങ​ളും തത്ത്വങ്ങ​ളും യഹോ​വ​യെ​ക്കു​റിച്ച്‌ എന്തു വെളി​പ്പെ​ടു​ത്തു​ന്നു? ദൃഷ്ടാ​ന്തീ​ക​രി​ക്കുക.

¹³ യഹോവ ജ്ഞാനി​യായ ഒരു നിയമ​നിർമാ​താവ്‌ മാത്രമല്ല, മക്കളുടെ ക്ഷേമത്തിൽ ആഴമായ താത്‌പ​ര്യ​മുള്ള സ്‌നേ​ഹ​വാ​നായ പിതാ​വു​മാ​ണെന്നു ബൈബി​ളി​ലെ നിയമ​ങ്ങ​ളും തത്ത്വങ്ങ​ളും വെളി​പ്പെ​ടു​ത്തു​ന്നു. (സങ്കീർത്തനം 19:7-11) ആരോ​ഗ്യ​സം​ബ​ന്ധ​മായ കാരണ​ങ്ങ​ളാൽ നൽകി​യ​ത​ല്ലെ​ങ്കി​ലും, ‘രക്തം ഒഴിവാ​ക്കുക’ എന്ന കല്‌പന രക്തപ്പകർച്ച​യു​മാ​യി ബന്ധപ്പെട്ട നിരവധി പ്രശ്‌ന​ങ്ങ​ളിൽനിന്ന്‌ നമ്മളെ സംരക്ഷി​ക്കു​ന്നു. (പ്രവൃ​ത്തി​കൾ 15:20) രക്തരഹി​ത​ശ​സ്‌ത്ര​ക്രി​യയെ ആധുനി​ക​വൈ​ദ്യ​ശാ​സ്‌ത്ര​ത്തി​ന്റെ “അത്യു​ത്ത​മ​ചി​കി​ത്സാ​വി​ധി” എന്നാണു വൈദ്യ​രം​ഗ​ത്തുള്ള അനേക​രും വിശേ​ഷി​പ്പി​ക്കു​ന്നത്‌. എന്നാൽ അത്തരം സംഭവ​വി​കാ​സങ്ങൾ യഹോ​വ​യു​ടെ അത്യഗാ​ധ​മായ ജ്ഞാന​ത്തെ​യും പിതൃ​തു​ല്യ​സ്‌നേ​ഹ​ത്തെ​യും എടുത്തു​കാ​ട്ടു​ക​യാ​ണു ചെയ്യു​ന്ന​തെന്നു സത്യ​ക്രി​സ്‌ത്യാ​നി​കൾക്ക്‌ അറിയാം.—യശയ്യ 55:9 വായി​ക്കുക; യോഹ​ന്നാൻ 14:21, 23.

14, 15. (എ) തന്റെ ജനത്തോ​ടുള്ള ദൈവ​ത്തി​ന്റെ സ്‌നേഹം ഏതു നിയമ​ങ്ങ​ളിൽ പ്രതി​ഫ​ലി​ച്ചു​കാ​ണാം? (ബി) ഈ സുരക്ഷാ​നി​യ​മ​ങ്ങൾക്കു പിന്നിലെ തത്ത്വങ്ങൾ നിങ്ങൾക്ക്‌ എങ്ങനെ പ്രയോ​ജ​ന​പ്പെ​ടു​ത്താം?

¹⁴ പുരാ​ത​ന​കാ​ലത്തെ ഇസ്രാ​യേൽ ജനതയു​ടെ ക്ഷേമത്തി​ലുള്ള ദൈവ​ത്തി​ന്റെ താത്‌പ​ര്യ​ത്തി​ന്റെ പ്രതി​ഫ​ല​ന​മാ​യി​രു​ന്നു ദൈവം അവർക്കു നൽകിയ പല നിയമ​ങ്ങ​ളും. ഉദാഹ​ര​ണ​ത്തിന്‌, വീടു​ക​ളു​ടെ ടെറസ്‌ പല കാര്യ​ങ്ങൾക്കു​വേണ്ടി ഉപയോ​ഗി​ച്ചി​രു​ന്ന​തു​കൊണ്ട്‌ അപകടങ്ങൾ ഒഴിവാ​ക്കാൻ അതിനു ചുറ്റും പാരപ്പറ്റ്‌ അഥവാ കൈമ​തിൽ ഉണ്ടാക്ക​ണ​മെന്നു ദൈവം പറഞ്ഞി​രു​ന്നു. (ആവർത്തനം 22:8; 1 ശമുവേൽ 9:25, 26; നെഹമ്യ 8:16; പ്രവൃ​ത്തി​കൾ 10:9) അപകട​കാ​രി​ക​ളായ കാളകൾ മറ്റുള്ള​വരെ ഉപദ്ര​വി​ക്കാ​തി​രി​ക്കാൻ ഉടമസ്ഥർ ശ്രദ്ധി​ക്കണം എന്നതാ​യി​രു​ന്നു മറ്റൊരു കല്‌പന. (പുറപ്പാട്‌ 21:28, 29) ഈ നിബന്ധ​നകൾ അവഗണി​ക്കു​ന്നത്‌ ഒരാൾക്കു മറ്റുള്ള​വ​രു​ടെ ക്ഷേമത്തിൽ യാതൊ​രു താത്‌പ​ര്യ​വു​മില്ല എന്നതിന്റെ തെളി​വാ​യി​രു​ന്നു, അതു രക്തം ചൊരി​ഞ്ഞ​തി​ന്റെ കുറ്റം വരുത്തി​വെ​ക്കു​ക​യും ചെയ്യു​മാ​യി​രു​ന്നു.

¹⁵ ഈ നിയമ​ങ്ങൾക്കു പിന്നിലെ തത്ത്വങ്ങൾ നിങ്ങൾക്ക്‌ എങ്ങനെ ബാധക​മാ​ക്കാം? നിങ്ങളു​ടെ വാഹനം, ഡ്രൈ​വിങ്‌ ശീലങ്ങൾ, വളർത്തു​മൃ​ഗങ്ങൾ, വീട്‌, ജോലി​സ്ഥലം, വിനോ​ദ​പ​രി​പാ​ടി​കൾ എന്നിവ​യെ​ക്കു​റിച്ച്‌ ചിന്തി​ക്ക​രു​തോ? ചില നാടു​ക​ളിൽ ചെറു​പ്പ​ക്കാർക്കി​ട​യി​ലെ മരണത്തി​ന്റെ മുഖ്യ​കാ​രണം അപകട​ങ്ങ​ളാണ്‌. മിക്ക​പ്പോ​ഴും അതിന്‌ ഇടയാ​ക്കു​ന്നതു സാഹസി​ക​ത​യും. എന്നാൽ ദൈവ​സ്‌നേ​ഹ​ത്തിൽ നിലനിൽക്കാൻ ആഗ്രഹി​ക്കുന്ന യുവാക്കൾ ജീവനെ വില​യേ​റി​യ​താ​യി കാണു​ക​യും അപകടം​പി​ടിച്ച കാര്യങ്ങൾ ചെയ്‌ത്‌ രസിക്കു​ന്നത്‌ ഒഴിവാ​ക്കു​ക​യും ചെയ്യുന്നു. ചെറു​പ്പ​ക്കാ​രായ തങ്ങൾക്ക്‌ ഒരു അപകട​വും സംഭവി​ക്കി​ല്ലെന്നു ചിന്തി​ക്കാൻമാ​ത്രം ബുദ്ധി​ഹീ​നരല്ല അവർ. അപകട​ക​ര​മായ കാര്യങ്ങൾ ഒഴിവാ​ക്കി​ക്കൊണ്ട്‌ അവർ തങ്ങളുടെ യൗവനം ആസ്വദി​ക്കു​ന്നു.—സഭാ​പ്ര​സം​ഗകൻ 11:9, 10.

16. ഗർഭച്ഛി​ദ്ര​ത്തോ​ടു ബന്ധപ്പെട്ട ബൈബിൾത​ത്ത്വം ഏതാണ്‌? (അടിക്കു​റി​പ്പും കാണുക.)

¹⁶ അജാത​ശി​ശു​ക്ക​ളു​ടെ ജീവൻപോ​ലും ദൈവ​ത്തി​ന്റെ ദൃഷ്ടി​യിൽ അമൂല്യ​മാണ്‌. പുരാ​ത​ന​കാ​ലത്ത്‌ ഇസ്രാ​യേ​ലിൽ ആരെങ്കി​ലും ഒരു ഗർഭി​ണി​യെ ക്ഷതമേൽപ്പി​ച്ച​തു​കൊണ്ട്‌ അവളോ കുട്ടി​യോ മരിച്ചു​പോ​യാൽ കുറ്റക്കാ​രനെ ദൈവം കൊല​പാ​ത​കി​യാ​യി കാണു​മാ​യി​രു​ന്നു. അയാൾ “ജീവനു പകരം ജീവൻ” കൊടു​ക്കേ​ണ്ടി​യി​രു​ന്നു.c (പുറപ്പാട്‌ 21:22, 23 വായി​ക്കുക.) ഓരോ വർഷവും എണ്ണമറ്റ അജാത​ശി​ശു​ക്കൾ സ്വാർഥ​ത​യു​ടെ​യും കുത്തഴിഞ്ഞ ലൈം​ഗി​ക​ത​യു​ടെ​യും ബലിക്ക​ല്ലിൽ നിഷ്‌ക​രു​ണം കൊല​ചെ​യ്യ​പ്പെ​ടു​ന്നതു കാണു​മ്പോൾ യഹോ​വ​യ്‌ക്ക്‌ എന്തായി​രി​ക്കും തോന്നു​ന്ന​തെന്ന്‌ ഓർത്തു​നോ​ക്കൂ!

17. ദൈവി​ക​നി​ല​വാ​രങ്ങൾ മനസ്സി​ലാ​ക്കു​ന്ന​തി​നു മുമ്പ്‌ ഗർഭച്ഛി​ദ്രം നടത്തിയ ഒരു സ്‌ത്രീ​യെ നിങ്ങൾ എങ്ങനെ ആശ്വസി​പ്പി​ക്കും?

¹⁷ ബൈബിൾസ​ത്യ​ങ്ങൾ സംബന്ധിച്ച്‌ ഒന്നും അറിയാ​തി​രുന്ന കാലത്ത്‌ ഗർഭച്ഛി​ദ്രം നടത്തിയ ഒരു സ്‌ത്രീ​യെ​ക്കു​റിച്ച്‌ എന്തു പറയാ​നാ​കും? അവരോ​ടു ദൈവം കരുണ കാണി​ക്കി​ല്ലെ​ന്നാ​ണോ? ഒരിക്ക​ലു​മല്ല. യേശു ചൊരിഞ്ഞ രക്തത്തിന്റെ അടിസ്ഥാ​ന​ത്തിൽ യഹോവ തന്നോടു ക്ഷമിക്കു​മെന്ന്‌ യഥാർഥ​മായ പശ്ചാത്താ​പ​മുള്ള ഒരാൾക്ക്‌ ഉറച്ച്‌ വിശ്വ​സി​ക്കാ​നാ​കും. (സങ്കീർത്തനം 103:8-14; എഫെസ്യർ 1:7) ക്രിസ്‌തു​തന്നെ ഇങ്ങനെ പറഞ്ഞു: “നീതി​മാ​ന്മാ​രെയല്ല, പാപി​കളെ മാനസാ​ന്ത​ര​ത്തി​ലേക്കു നയിക്കാ​നാ​ണു ഞാൻ വന്നത്‌.”—ലൂക്കോസ്‌ 5:32.

18. രക്തച്ചൊ​രി​ച്ചി​ലി​ന്റെ മുഖ്യ​കാ​ര​ണത്തെ ബൈബിൾ തിരി​ച്ച​റി​യി​ക്കു​ന്നത്‌ എങ്ങനെ?

¹⁸ നമ്മൾ മറ്റുള്ള​വരെ ദ്രോ​ഹി​ക്ക​രു​തെന്നു മാത്രമല്ല, രക്തച്ചൊ​രി​ച്ചി​ലി​നു കാരണ​മാ​കുന്ന വിദ്വേ​ഷം​തന്നെ നമ്മുടെ മനസ്സിൽനിന്ന്‌ പിഴു​തെ​റി​യണം എന്നാണ്‌ യഹോവ ആഗ്രഹി​ക്കു​ന്നത്‌. “സഹോ​ദ​രനെ വെറു​ക്കു​ന്നവൻ കൊല​പാ​ത​കി​യാണ്‌” എന്നു യോഹ​ന്നാൻ അപ്പോ​സ്‌തലൻ എഴുതി. (1 യോഹ​ന്നാൻ 3:15) അത്തര​മൊ​രാൾ തന്റെ സഹോ​ദ​രനെ ഇഷ്ടപ്പെ​ടാ​തി​രി​ക്കുക മാത്രമല്ല, അയാൾ മരിച്ചു​പോ​യി​രു​ന്നെ​ങ്കിൽ എന്ന്‌ ആശിക്കു​ക​പോ​ലും ചെയ്യുന്നു. മിക്ക​പ്പോ​ഴും, ദുഷ്ടല​ക്ഷ്യ​ത്തോ​ടെ​യുള്ള അപവാ​ദ​ത്തി​ന്റെ​യോ വ്യാജാ​രോ​പ​ണ​ങ്ങ​ളു​ടെ​യോ രൂപത്തിൽ ആ വിദ്വേ​ഷം പുറത്ത്‌ വന്നേക്കാം. ദൈവ​ത്തി​ന്റെ ശിക്ഷാ​വി​ധി അർഹി​ക്കു​ന്നത്ര ഗുരു​ത​ര​മായ എന്തെങ്കി​ലും സഹോ​ദരൻ ചെയ്‌തു എന്നതു​പോ​ലുള്ള രൂക്ഷമായ ആരോ​പ​ണ​ങ്ങ​ളാ​യി​രി​ക്കും അവ. (ലേവ്യ 19:16; ആവർത്തനം 19:18-21; മത്തായി 5:22) ഹൃദയ​ത്തിൽ ഉറഞ്ഞു​കൂ​ടി​യേ​ക്കാ​വുന്ന വിദ്വേ​ഷ​വും പകയും നമ്മൾ ഒഴിവാ​ക്കേ​ണ്ടത്‌ എത്ര പ്രധാ​ന​മാണ്‌!—യാക്കോബ്‌ 1:14, 15; 4:1-3.

19. ബൈബിൾത​ത്ത്വ​ങ്ങൾക്കു ചേർച്ച​യിൽ ജീവി​ക്കുന്ന ഒരാൾ സങ്കീർത്തനം 11:5; ഫിലി​പ്പി​യർ 4:8, 9 തുടങ്ങിയ തിരു​വെ​ഴു​ത്തു​കളെ എങ്ങനെ വീക്ഷി​ക്കു​ന്നു?

¹⁹ യഹോ​വ​യെ​പ്പോ​ലെ ജീവനെ അമൂല്യ​മാ​യി കാണു​ക​യും ദൈവ​ത്തി​ന്റെ സ്‌നേ​ഹ​ത്തിൽ നിലനിൽക്കാൻ ആഗ്രഹി​ക്കു​ക​യും ചെയ്യു​ന്നവർ എല്ലാ തരത്തി​ലു​മുള്ള അക്രമ​വും ഒഴിവാ​ക്കു​ന്നു. “അക്രമം ഇഷ്ടപ്പെ​ടു​ന്ന​വനെ ദൈവം വെറു​ക്കു​ന്നു” എന്നു സങ്കീർത്തനം 11:5 പറയുന്നു. ആ പ്രസ്‌താ​വന ദൈവ​ത്തി​ന്റെ വ്യക്തി​ത്വ​ത്തി​ലേക്കു വെളി​ച്ചം​വീ​ശുക മാത്രമല്ല ചെയ്യു​ന്നത്‌. നമ്മുടെ ജീവി​ത​ത്തി​നു വഴികാ​ട്ടി​യായ ഒരു തത്ത്വം​കൂ​ടി​യാണ്‌ അത്‌. അക്രമ​വാ​സ​ന​യ്‌ക്കു വളം​വെ​ക്കുന്ന ഏതൊരു തരം വിനോ​ദ​പ​രി​പാ​ടി​യും ഒഴിവാ​ക്കാൻ ദൈവ​ത്തോ​ടു സ്‌നേ​ഹ​മു​ള്ള​വരെ അതു പ്രചോ​ദി​പ്പി​ക്കു​ന്നു. സമാന​മാ​യി, യഹോവ “സമാധാ​ന​ത്തി​ന്റെ ദൈവ”മാണെന്ന പ്രസ്‌താ​വന, സ്‌നേഹം ജനിപ്പി​ക്കു​ന്ന​തും അത്യു​ത്ത​മ​മാ​യ​തും പ്രശം​സ​നീ​യ​മാ​യ​തും ആയ കാര്യ​ങ്ങൾകൊണ്ട്‌ മനസ്സു നിറയ്‌ക്കാൻ ദൈവ​ദാ​സ​ന്മാ​രെ പ്രേരി​പ്പി​ക്കു​ന്നു. അങ്ങനെ ചെയ്യു​ന്നതു സമാധാ​ന​ത്തി​നു കളമൊ​രു​ക്കും.—ഫിലി​പ്പി​യർ 4:8, 9 വായി​ക്കുക.

20-22. ലോക​ത്തോ​ടുള്ള ബന്ധത്തിൽ ക്രിസ്‌ത്യാ​നി​കൾ എന്തു നിലപാ​ടു സ്വീക​രി​ക്കു​ന്നു, എന്തു​കൊണ്ട്‌?

²⁰ ദൈവ​ത്തി​ന്റെ വീക്ഷണ​ത്തിൽ സാത്താന്റെ ലോകം മുഴുവൻ രക്തക്കറ പുരണ്ട​താണ്‌. ക്രൂര​മൃ​ഗങ്ങൾ എന്നനി​ല​യിൽ തിരു​വെ​ഴു​ത്തു​കൾ വിശേ​ഷി​പ്പി​ക്കുന്ന അതിന്റെ രാഷ്‌ട്രീ​യ​വ്യ​വ​സ്ഥി​തി, യഹോ​വ​യു​ടെ ദാസന്മാർ ഉൾപ്പെടെ ദശലക്ഷ​ങ്ങളെ കൊ​ന്നൊ​ടു​ക്കി​യി​രി​ക്കു​ന്നു. (ദാനി​യേൽ 8:3, 4, 20-22; വെളി​പാട്‌ 13:1, 2, 7, 8) അത്തരം മൃഗീ​യ​ശ​ക്തി​ക​ളു​മാ​യി കൈ​കോർക്കുന്ന വാണി​ജ്യ​ലോ​ക​വും ശാസ്‌ത്ര​വും, സങ്കൽപ്പി​ക്കാ​വു​ന്ന​തി​ലേ​ക്കും വിപത്‌ക​ര​മായ ആയുധങ്ങൾ നിർമി​ച്ചു​കൊണ്ട്‌ വൻലാഭം കൊയ്യു​ന്നു. “ലോകം മുഴു​വ​നും ദുഷ്ടന്റെ നിയ​ന്ത്ര​ണ​ത്തി​ലാണ്‌” എന്ന പ്രസ്‌താ​വന എത്രയോ സത്യം!—1 യോഹ​ന്നാൻ 5:19.

²¹ ‘ലോക​ത്തി​ന്റെ ഭാഗമ​ല്ലാ​ത്ത​തു​കൊ​ണ്ടും’ രാഷ്‌ട്രീ​യ​കാ​ര്യ​ങ്ങ​ളി​ലും യുദ്ധങ്ങ​ളി​ലും നിഷ്‌പക്ഷത പാലി​ക്കു​ന്ന​തു​കൊ​ണ്ടും യേശു​വി​ന്റെ അനുഗാ​മി​കൾ, വ്യക്തികൾ എന്ന നിലയി​ലും ഒരു സമൂഹം എന്ന നിലയി​ലും രക്തച്ചൊ​രി​ച്ചി​ലി​ന്റെ കുറ്റത്തിൽനിന്ന്‌ ഒഴിഞ്ഞു​നിൽക്കു​ന്നു.d (യോഹ​ന്നാൻ 15:19; 17:16) മറ്റുള്ളവർ കഠിന​മാ​യി ഉപദ്ര​വി​ക്കു​മ്പോൾ അവർ യേശു​വി​നെ​പ്പോ​ലെ ശാന്തരാ​യി നില​കൊ​ള്ളു​ന്നു. ശത്രു​ക്കളെ സ്‌നേ​ഹി​ക്കുന്ന അവർ, ശത്രു​ക്കൾക്കു​വേണ്ടി പ്രാർഥി​ക്കു​ക​പോ​ലും ചെയ്യുന്നു.—മത്തായി 5:44; റോമർ 12:17-21.

²² സർവോ​പരി, രക്തച്ചൊ​രി​ച്ചി​ലി​ന്റെ കുറ്റം ഏറ്റവും അധികം ചുമക്കുന്ന ലോക​മ​ത​സാ​മ്രാ​ജ്യ​മായ “ബാബി​ലോൺ എന്ന മഹതി”യുമാ​യുള്ള എല്ലാ ബന്ധവും സത്യ​ക്രി​സ്‌ത്യാ​നി​കൾ ഒഴിവാ​ക്കു​ന്നു. “പ്രവാ​ച​ക​ന്മാ​രു​ടെ​യും വിശു​ദ്ധ​രു​ടെ​യും ഭൂമി​യിൽ കൊല്ല​പ്പെട്ട എല്ലാവ​രു​ടെ​യും രക്തം ഈ നഗരത്തി​ലാ​ണു കണ്ടത്‌” എന്നു ദൈവ​വ​ചനം പറയുന്നു. അതു​കൊണ്ട്‌ “എന്റെ ജനമേ, . . . അവളിൽനിന്ന്‌ പുറത്ത്‌ കടക്ക്‌” എന്നാണ്‌ അതു നമുക്കു തരുന്ന മുന്നറി​യിപ്പ്‌.—വെളി​പാട്‌ 17:6; 18:2, 4, 24.

23. ബാബി​ലോൺ എന്ന മഹതി​യിൽനിന്ന്‌ പുറത്ത്‌ വരുന്ന​തിൽ എന്താണ്‌ ഉൾപ്പെ​ടു​ന്നത്‌?

²³ ബാബി​ലോൺ എന്ന മഹതിയെ വിട്ടു​പോ​രു​ന്ന​തിന്‌ അതിലെ അംഗത്വം പിൻവ​ലി​ച്ചാൽ മാത്രം പോരാ. വ്യാജ​മ​തങ്ങൾ വെച്ചു​പൊ​റു​പ്പി​ക്കു​ക​യോ പരസ്യ​മാ​യി അംഗീ​ക​രി​ക്കു​ക​യോ ചെയ്യുന്ന അധാർമി​കത, രാഷ്‌ട്രീ​യ​കാ​ര്യ​ങ്ങ​ളി​ലെ ഉൾപ്പെടൽ, പണത്തോ​ടുള്ള അത്യാർത്തി തുടങ്ങിയ തിരു​വെ​ഴു​ത്തു​വി​രു​ദ്ധ​മായ കാര്യങ്ങൾ വെറു​ക്കു​ന്ന​തും അതിൽപ്പെ​ടു​ന്നു. (സങ്കീർത്തനം 97:10 വായി​ക്കുക; വെളി​പാട്‌ 18:7, 9, 11-17) ഇവയെ​ല്ലാം എത്രമാ​ത്രം രക്തച്ചൊ​രി​ച്ചി​ലി​നു വഴി​വെ​ക്കു​ന്നു!

24, 25. (എ) രക്തച്ചൊ​രി​ച്ചി​ലി​ന്റെ കുറ്റമുള്ള ഒരാൾക്കു പശ്ചാത്താ​പ​മു​ണ്ടെ​ങ്കിൽ എന്തിന്റെ അടിസ്ഥാ​ന​ത്തിൽ ദൈവ​ത്തി​നു കരുണ കാണി​ക്കാ​നാ​കും? (ബി) ഇതു ബൈബിൾകാ​ല​ങ്ങ​ളി​ലെ ഏതു ക്രമീ​ക​ര​ണത്തെ ഓർമി​പ്പി​ക്കു​ന്നു?

²⁴ സമർപ്പിച്ച്‌ സ്‌നാ​ന​മേറ്റ്‌ സത്യാ​രാ​ധ​ക​രാ​കു​ന്ന​തി​നു മുമ്പ്‌ നമ്മൾ ഓരോ​രു​ത്ത​രും ഒരു വിധത്തിൽ അല്ലെങ്കിൽ മറ്റൊരു വിധത്തിൽ സാത്താന്റെ ഈ വ്യവസ്ഥി​തി​യെ പിന്തു​ണ​ച്ചി​രു​ന്നു, അത്‌ ഒരളവു​വരെ നമ്മുടെ മേൽ രക്തച്ചൊ​രി​ച്ചി​ലി​ന്റെ കുറ്റവും വരുത്തി​വെച്ചു. എങ്കിലും, ജീവി​ത​ത്തി​നു മാറ്റം വരുത്തു​ക​യും ക്രിസ്‌തു മോച​ന​വി​ല​യാ​യി അർപ്പിച്ച ബലിയിൽ വിശ്വാ​സം വളർത്തി​യെ​ടു​ക്കു​ക​യും ജീവിതം ദൈവ​ത്തി​നു സമർപ്പി​ക്കു​ക​യും ചെയ്‌ത​തു​കൊണ്ട്‌ ദൈവ​ത്തി​ന്റെ കരുണ​യ്‌ക്കും ആത്മീയ​സം​ര​ക്ഷ​ണ​ത്തി​നും നമ്മൾ യോഗ്യ​രാ​യി​ത്തീർന്നു. (പ്രവൃ​ത്തി​കൾ 3:19) ആ സംരക്ഷണം, ബൈബിൾകാ​ല​ങ്ങ​ളി​ലെ അഭയന​ഗ​ര​ങ്ങളെ ഓർമി​പ്പി​ക്കു​ന്നു.—സംഖ്യ 35:11-15; ആവർത്തനം 21:1-9.

²⁵ എന്തായി​രു​ന്നു ആ ക്രമീ​ക​രണം? ഒരു ഇസ്രാ​യേ​ല്യൻ യാദൃ​ച്ഛി​ക​മാ​യി മറ്റൊ​രാ​ളു​ടെ മരണത്തിന്‌ ഇടയാ​ക്കി​യാൽ അയാൾ അഭയന​ഗ​ര​ത്തി​ലേക്ക്‌ ഓടി​പ്പോ​ക​ണ​മാ​യി​രു​ന്നു. ചുമത​ല​പ്പെട്ട ന്യായാ​ധി​പ​ന്മാർ അക്കാര്യം വിചാരണ ചെയ്‌ത​തി​നു ശേഷം മഹാപു​രോ​ഹി​തന്റെ മരണം​വരെ അയാൾ അഭയന​ഗ​ര​ത്തിൽ താമസി​ക്കു​ക​യും ചെയ്യേ​ണ്ടി​യി​രു​ന്നു. പിന്നീട്‌ അയാൾ സ്വത​ന്ത്ര​നാ​കു​മാ​യി​രു​ന്നു. ദൈവ​ത്തി​ന്റെ കരുണ​യു​ടെ​യും ദൈവം മനുഷ്യ​ജീ​വനു കല്‌പി​ക്കുന്ന മൂല്യ​ത്തി​ന്റെ​യും എത്ര തിളക്ക​മാർന്ന ദൃഷ്ടാന്തം! പുരാ​ത​ന​കാ​ലത്തെ ആ അഭയന​ഗ​ര​ങ്ങ​ളെ​പ്പോ​ലെ, ജീവ​ന്റെ​യും രക്തത്തി​ന്റെ​യും പവിത്രത സംബന്ധിച്ച ദൈവ​നി​യമം അബദ്ധവ​ശാൽ ലംഘി​ക്കു​ന്ന​വരെ മരണശി​ക്ഷ​യിൽനിന്ന്‌ ഒഴിവാ​ക്കാ​നാ​യി, ക്രിസ്‌തു മോച​ന​വി​ല​യാ​യി അർപ്പിച്ച ബലിയു​ടെ അടിസ്ഥാ​ന​ത്തിൽ ദൈവം ഒരു ക്രമീ​ക​രണം ചെയ്‌തി​ട്ടുണ്ട്‌. നിങ്ങൾക്ക്‌ അതി​നോ​ടു വിലമ​തി​പ്പു തോന്നു​ന്നു​ണ്ടോ? അതു നിങ്ങൾക്ക്‌ എങ്ങനെ കാണി​ക്കാം? സംരക്ഷ​ണ​ത്തി​നാ​യുള്ള ദൈവ​ത്തി​ന്റെ ക്രമീ​ക​ര​ണത്തെ അംഗീ​ക​രി​ക്കാൻ മറ്റുള്ള​വരെ ക്ഷണിക്കു​ന്ന​താണ്‌ അതിനുള്ള ഒരു മാർഗം, പ്രത്യേ​കി​ച്ചും “മഹാകഷ്ടത” അതി​വേഗം അടുത്തു​കൊ​ണ്ടി​രി​ക്കുന്ന ഇക്കാലത്ത്‌.—മത്തായി 24:21; 2 കൊരി​ന്ത്യർ 6:1, 2.

26-28. നമ്മുടെ സാഹച​ര്യം യഹസ്‌കേൽ പ്രവാ​ച​കന്റെ നാളു​ക​ളി​ലേ​തി​നോ​ടു സമാന​മാ​യി​രി​ക്കു​ന്നത്‌ എങ്ങനെ, ദൈവ​സ്‌നേ​ഹ​ത്തിൽ നിലനിൽക്കാൻ നമുക്ക്‌ എങ്ങനെ കഴിയും?

²⁶ ഇന്നത്തെ ദൈവ​ജ​ന​ത്തി​ന്റെ സാഹച​ര്യം യഹസ്‌കേൽ പ്രവാ​ച​കന്റെ നാളു​ക​ളി​ലേ​തി​നോ​ടു സമാന​മാ​ണെന്നു കാണാം. ഇസ്രാ​യേൽഗൃ​ഹ​ത്തി​ന്റെ ആത്മീയ​കാ​വൽക്കാ​ര​നാ​യി​രുന്ന യഹസ്‌കേ​ലി​നോട്‌ യഹോവ പറഞ്ഞു: “എന്റെ വായിൽനിന്ന്‌ സന്ദേശം കേൾക്കു​മ്പോൾ നീ എന്റെ പേരിൽ അവർക്കു മുന്നറി​യി​പ്പു കൊടു​ക്കണം.” ദൈവം കൊടുത്ത ആ നിയമനം അവഗണി​ക്കു​ന്ന​പക്ഷം, യരുശ​ലേം ന്യായം വിധി​ക്ക​പ്പെ​ടു​മ്പോൾ കൊല്ല​പ്പെ​ടു​ന്ന​വ​രു​ടെ രക്തത്തിന്‌ യഹസ്‌കേൽ കണക്കു ബോധി​പ്പി​ക്കേ​ണ്ടി​വ​രു​മാ​യി​രു​ന്നു. (യഹസ്‌കേൽ 33:7-9) എന്നാൽ അനുസ​ര​ണ​പൂർവം പ്രവർത്തി​ച്ച​തു​കൊണ്ട്‌ യഹസ്‌കേ​ലി​ന്റെ മേൽ രക്തച്ചൊ​രി​ച്ചി​ലി​ന്റെ കുറ്റം വന്നില്ല.

²⁷ ഇന്നു സാത്താന്റെ മുഴു​ലോ​ക​വും നാശത്തി​ന്റെ വക്കിലാണ്‌. അതു​കൊണ്ട്‌, ദൈവ​രാ​ജ്യ​സ​ന്ദേ​ശ​ത്തോ​ടൊ​പ്പം ദൈവം “പ്രതി​കാ​രം ചെയ്യുന്ന ദിവസ​ത്തെ​യും” പ്രസി​ദ്ധ​മാ​ക്കു​ന്നത്‌ ഒരു കടമയും പദവി​യും ആയിട്ടാണ്‌ യഹോ​വ​യു​ടെ സാക്ഷികൾ കാണു​ന്നത്‌. (യശയ്യ 61:2; മത്തായി 24:14) ജീവത്‌പ്ര​ധാ​ന​മായ ഈ പ്രവർത്ത​ന​ത്തിൽ നിങ്ങൾ നന്നായി പങ്കെടു​ക്കു​ന്നു​ണ്ടോ? പൗലോസ്‌ അപ്പോ​സ്‌തലൻ തന്റെ പ്രസം​ഗ​നി​യ​മനം ഗൗരവ​മാ​യെ​ടു​ത്തു. തത്‌ഫ​ല​മാ​യി, “ആരു​ടെ​യും രക്തം സംബന്ധിച്ച്‌ ഞാൻ കുറ്റക്കാ​രനല്ല. ഒന്നും മറച്ചു​വെ​ക്കാ​തെ ദൈവ​ത്തി​ന്റെ ഉദ്ദേശ്യം മുഴുവൻ ഞാൻ നിങ്ങളെ അറിയി​ച്ചി​ട്ടുണ്ട്‌” എന്നു പൗലോ​സി​നു പറയാൻ കഴിഞ്ഞു. (പ്രവൃ​ത്തി​കൾ 20:26, 27) എത്ര നല്ലൊരു മാതൃക!

²⁸ യഹോവ വീക്ഷി​ക്കു​ന്ന​തു​പോ​ലെ ജീവ​നെ​യും രക്തത്തെ​യും വീക്ഷി​ക്കു​ന്ന​തു​കൊ​ണ്ടു​മാ​ത്രം യഹോ​വ​യു​ടെ ഊഷ്‌മ​ള​മായ പിതൃ​തു​ല്യ​സ്‌നേ​ഹ​ത്തിൽ നിലനിൽക്കാൻ നമുക്കാ​കില്ല. അടുത്ത അധ്യാ​യ​ത്തിൽ കാണാൻപോ​കു​ന്ന​തു​പോ​ലെ, നമ്മൾ യഹോ​വ​യു​ടെ ദൃഷ്ടി​യിൽ എപ്പോ​ഴും ശുദ്ധരാ​യി​രി​ക്കേ​ണ്ട​തുണ്ട്‌.