ശാസ്‌ത്ര​ത്തി​നു മുമ്പു ബൈബിൾ രോഗ​ത്തോ​ടു പൊരു​തി

ഇന്നു ബൈബി​ളി​നേ​ക്കു​റി​ച്ചു പറയു​മ്പോ​ഴൊ​ക്കെ, അറിവി​ല്ലാത്ത അനേകം ആളുകൾ തങ്ങളുടെ ശ്രദ്ധയർഹി​ക്കാ​ത്ത​താ​യി അതിനെ സ്വതവെ തള്ളിക്ക​ള​യു​ന്നു. ആധുനിക മനുഷ്യൻ അടുത്ത കാലത്തു മാത്രം മനസ്സി​ലാ​ക്കി​യ​തോ ഇനിയും മനസ്സി​ലാ​ക്കേ​ണ്ടി​യി​രി​ക്കു​ന്ന​തോ ആയ കാര്യങ്ങൾ അത്‌ ആയിര​ക്ക​ണ​ക്കി​നു വർഷങ്ങൾക്കു മുമ്പു പ്രസ്‌താ​വി​ച്ചു എന്നു കണ്ടുപി​ടി​ക്കു​ന്ന​തി​നു തങ്ങളുടെ മനസ്സു​കളെ തുറക്കാൻ അവർ വിസമ്മ​തി​ക്കു​ന്നു. ലോക​സം​ഭ​വങ്ങൾ, ഗവൺമെൻറ്‌, ജ്യോ​തി​ശാ​സ്‌ത്രം, പരിസ്ഥി​തി, പ്രകൃ​തി​ച​രി​ത്രം, ശരീര​ശാ​സ്‌ത്രം, മനഃശാ​സ്‌ത്രം എന്നിവ​യു​ടെ കാര്യ​ത്തിൽ ഇതു സത്യമാണ്‌. രോഗ​ത്തി​ന്റെ കാര്യ​ത്തി​ലും ഇതു സത്യമാണ്‌.

ബൈബിൾ ജീവന്റെ ഒരു പുസ്‌ത​ക​മാണ്‌. മററു യാതൊ​രു പുസ്‌ത​കം​കൊ​ണ്ടും സാഹി​ത്യ​സ​മാ​ഹാ​രം​കൊ​ണ്ടും ജീവന്റെ ഇത്രയ​ധി​കം വശങ്ങളിൽ ഇത്ര വിപു​ല​മായ പ്രയോ​ജ​ന​മില്ല. നല്ല ആരോ​ഗ്യ​വും ജീവനും ബന്ധപ്പെ​ട്ടാ​ണി​രി​ക്കു​ന്നത്‌, അതിനാൽ ആരോ​ഗ്യ​വു​മാ​യി നേരിട്ടു ബന്ധപ്പെ​ട്ടി​രി​ക്കുന്ന അനേകം തത്ത്വങ്ങൾ ബൈബി​ളി​ലു​ണ്ടെ​ന്നു​ള്ളത്‌ അതിശ​യ​മാ​യി​രി​ക്ക​രുത്‌. കുഷ്‌ഠം, മൂലക്കു​രു, മഹോ​ദരം, ഉദര​രോ​ഗം എന്നിങ്ങ​നെ​യുള്ള അനേകം രോഗ​ങ്ങ​ളെ​ക്കു​റി​ച്ചു ബൈബിൾ പ്രതി​പാ​ദി​ക്കു​ന്നു.—ആവർത്തനം 24:8; 28:27; ലൂക്കൊസ്‌ 14:2; 1 തിമൊ​ഥെ​യോസ്‌ 5:23.

ബൈബിൾ എഴുത​പ്പെ​ട്ടതു മുഖ്യ​മാ​യും ശരീര​രോ​ഗ​ങ്ങ​ളെ​ക്കു​റി​ച്ചു നമ്മെ പ്രബോ​ധി​പ്പി​ക്കു​ന്ന​തി​നാ​യി​രു​ന്നില്ല. എന്നിരു​ന്നാ​ലും അതു നൽകുന്ന വിവരങ്ങൾ ശാസ്‌ത്രീ​യ​മാ​യി കൃത്യ​വും പുനര​വ​ലോ​ക​ന​ത്തി​നു പ്രയോ​ജ​ന​പ്ര​ദ​വു​മാണ്‌. പുരാതന സങ്കീർത്ത​ന​ക്കാ​രനെ സംബന്ധി​ച്ച​ട​ത്തോ​ളം മാനുഷ ശരീരം ഭയോ​ദ്ദീ​പ​ക​മാ​യി​രു​ന്നു. അതു സംബന്ധിച്ച്‌ അദ്ദേഹം ഇങ്ങനെ​യെ​ഴു​തി: “നീയല്ലോ എന്റെ അന്തരം​ഗ​ങ്ങളെ നിർമ്മി​ച്ചതു, എന്റെ അമ്മയുടെ ഉദരത്തിൽ നീ എന്നെ മെടഞ്ഞു. ഭയങ്കര​വും അതിശ​യ​വു​മാ​യി എന്നെ സൃഷ്ടി​ച്ചി​രി​ക്ക​യാൽ ഞാൻ നിനക്കു സ്‌തോ​ത്രം ചെയ്യുന്നു; നിന്റെ പ്രവൃ​ത്തി​കൾ അത്ഭുത​ക​ര​മാ​കു​ന്നു; അതു എന്റെ ഉള്ളം നല്ലവണ്ണം അറിയു​ന്നു. ഞാൻ രഹസ്യ​ത്തിൽ ഉണ്ടാക്ക​പ്പെ​ടു​ക​യും ഭൂമി​യു​ടെ അധോ​ഭാ​ഗ​ങ്ങ​ളിൽ നിർമ്മി​ക്ക​പ്പെ​ടു​ക​യും ചെയ്‌ത​പ്പോൾ എന്റെ അസ്ഥികൂ​ടം നിനക്കു മറവാ​യി​രു​ന്നില്ല. ഞാൻ പിണ്ഡാ​കാ​ര​മാ​യി​രു​ന്ന​പ്പോൾ നിന്റെ കണ്ണു എന്നെ കണ്ടു; നിയമി​ക്ക​പ്പെട്ട നാളു​ക​ളിൽ ഒന്നും ഇല്ലാതി​രു​ന്ന​പ്പോൾ അവയെ​ല്ലാം നിന്റെ പുസ്‌ത​ക​ത്തിൽ എഴുതി​യി​രു​ന്നു.”—സങ്കീർത്തനം 139:13-16.

ഭ്രൂണം ഗർഭാ​ശ​യ​ത്തി​ന്റെ അന്ധകാ​ര​ത്തിൽ മറയ്‌ക്ക​പ്പെ​ട്ടി​രി​ക്ക​യാ​ണെ​ങ്കി​ലും അതു രൂപം പ്രാപി​ക്കു​ന്ന​തും അതിലെ എല്ലുകൾ വളരു​ന്ന​തും യഹോവ കാണു​ന്നുണ്ട്‌. അവനെ സംബന്ധിച്ച്‌, “ഇരുട്ടും വെളിച്ചം പോലെ തന്നേ.” (വാക്യം 12) യഹോ​വ​യിൽ നിന്ന്‌ ഒളിക്ക​ലില്ല. വൈദ്യ​ശാ​സ്‌ത്ര​പ​ര​മാ​യി പറഞ്ഞാൽ, ഭ്രൂണം അമ്മയിൽ നിന്ന്‌ ഒരു മറുപി​ള്ള​യാൽ സംരക്ഷി​ക്ക​പ്പെ​ടു​ന്നു, തൻമൂ​ലും അന്യവ​സ്‌തു എന്നനി​ല​യിൽ തള്ളപ്പെ​ടു​ന്ന​തിൽനിന്ന്‌ അത്‌ ഒഴിഞ്ഞു​പോ​കു​ന്നു. എന്നിരു​ന്നാ​ലും, ഈ സങ്കീർത്തനം പ്രകട​മാ​ക്കുന്ന സത്യം വൈദ്യ​ശാ​സ്‌ത്ര​പ​രമല്ല, മറിച്ച്‌ ആത്മീയ​മാണ്‌; എങ്ങനെ​യെ​ന്നാൽ, യഹോവ എല്ലാം കാണുന്നു, ഗർഭാ​ശ​യ​ത്തി​ലെ അന്ധകാ​ര​ത്തിൽ പോലും.

ഗർഭം​ധ​രി​ക്കു​ന്ന നിമിഷം മുതൽ, അമ്മയുടെ ഗർഭാ​ശ​യ​ത്തിൽ ബീജസ​ങ്ക​ല​നം​നടന്ന അണ്ഡകോ​ശ​ത്തി​ലെ ജനിത​ക​രേ​ഖ​യിൽ ‘നമ്മുടെ ശരീര​ഭാ​ഗ​ങ്ങ​ളെ​ല്ലാം എഴുത​പ്പെ​ട്ടി​രി​ക്ക​യാണ്‌.’ ‘അവ,’ ഓരോ​ന്നും അതിന്റെ ശരിയായ ക്രമത്തിൽ, ‘നിർമ്മി​ക്ക​പ്പെ​ടേ​ണ്ടി​യി​രുന്ന നാളുകൾ സംബന്ധിച്ച’ സമയനിർണ്ണ​യ​വും ജീനു​ക​ളിൽ ആസൂ​ത്രണം ചെയ്യ​പ്പെ​ട്ടി​രി​ക്കുന്ന അനേകം ജൈവി​ക​ഘ​ടി​കാ​ര​ങ്ങ​ളാൽ തീരു​മാ​നി​ക്ക​പ്പെ​ടു​ന്നു.

ഈ ശാസ്‌ത്രീയ വിശദാം​ശ​ങ്ങ​ളൊ​ന്നും സങ്കീർത്ത​ന​ക്കാ​ര​നായ ദാവീ​ദിന്‌ അറിയി​ല്ലാ​യി​രു​ന്നു, എന്നാൽ സങ്കീർത്തനം എഴുതാൻ അവനെ നിശ്വ​സ്‌ത​നാ​ക്കിയ യഹോ​വക്ക്‌ അറിയാ​മാ​യി​രു​ന്നു. എന്തെന്നാൽ അവനാണ്‌ അവനെ സൃഷ്ടി​ച്ച​തു​തന്നെ. ദാവീ​ദി​ന്റെ ഗ്രന്ഥകർതൃ​ത്വ​ത്തെ അമിത​കൃ​ത്തി​പ്പു​കാർ തള്ളിക്ക​ള​യു​ന്നു​വെ​ങ്കി​ലും സങ്കീർത്തനം എഴുത​പ്പെ​ട്ടതു ക്രിസ്‌തു​വി​നു നൂററാ​ണ്ടു​കൾക്കു മുമ്പാ​ണെന്ന്‌ അവർപോ​ലും സമ്മതി​ക്കേ​ണ്ടി​യി​രി​ക്കു​ന്നു.

രോഗ​പ്ര​തി​രോ​ധ​ത്തിൽ ബൈബിൾ ശ്രദ്ധ കേന്ദ്രീ​ക​രി​ക്കു​ന്നു

ക്രിസ്‌തു​വി​നു 15 നൂററാ​ണ്ടു മുമ്പു മോശെ മുഖേന ഇസ്ര​യേ​ല്യർക്കു നൽകപ്പെട്ട ദൈവ​ക​ല്‌പ​നകൾ പുനഃ​പ​രി​ശോ​ധി​ക്കു​മ്പോൾ ആരോ​ഗ്യം സംബന്ധിച്ച ആ ന്യായ​പ്ര​മാ​ണ​ത്തി​ന്റെ മുഖ്യ ഊന്നൽ പ്രതി​രോ​ധ​ത്തി​ലാ​യി​രു​ന്നു​വെന്നു സ്‌പഷ്ട​മാ​യും കാണ​പ്പെ​ടു​ന്നു. ഉദാഹ​ര​ണ​ത്തിന്‌, ആവർത്തനം 23:13-ൽ അതു പറയുന്നു: “നിന്റെ ആയുധ​ങ്ങ​ളു​ടെ കൂട്ടത്തിൽ ഒരു പാരയും ഉണ്ടായി​രി​ക്കേണം; ബാഹ്യ​ത്തി​നു ഇരിക്കു​മ്പോൾ അതിനാൽ കുഴിച്ചു നിന്റെ വിസർജ്ജനം മൂടി​ക്ക​ള​യേണം.” വിസർജ്ജനം മൂടു​ന്നതു സംബന്ധിച്ച ഈ നിയമം ഈച്ചകൾ പരത്തുന്ന സാൽമ​ണെ​ല്ലോ​സിസ്‌, ഷിഗെ​ല്ലോ​സിസ്‌, ടൈ​ഫോ​യിഡ്‌ എന്നിവ​യിൽ നിന്നും ഈ തത്ത്വ​ത്തോ​ടു പററി​നിൽക്കാത്ത പ്രദേ​ശ​ങ്ങ​ളിൽ ഇന്നും ആയിര​ക്ക​ണ​ക്കി​നു ജീവന​പ​ഹ​രി​ക്കുന്ന മററ​നേകം വയറി​ള​ക്ക​രോ​ഗ​ങ്ങ​ളിൽ നിന്നും സംരക്ഷണം നൽകുന്ന ഗംഭീ​ര​മാ​യി പുരോ​ഗ​മിച്ച ഒരു പ്രതി​രോ​ധ​ന​ട​പ​ടി​യാ​യി​രു​ന്നു.

പ്രാണി​ക​ളാ​ലും കരണ്ടു തിന്നുന്ന ജന്തുക്ക​ളാ​ലും, കൂടാതെ ഏററവും പ്രധാ​ന​മാ​യി മലിന​ജ​ല​ത്തി​ലൂ​ടെ​യും രോഗ​ങ്ങൾക്കു പകരാൻ കഴിയു​മെന്നു ലേവ്യ​പു​സ്‌തകം 11-ാം അദ്ധ്യായം തത്ത്വത്തിൽ സ്ഥിരീ​ക​രി​ക്കു​ന്നു. ഈ രണ്ടാമത്തെ സംഗതി രോഗം സൂക്ഷ്‌മാ​ണു​ക്ക​ളാ​ലാണ്‌ ഉളവാ​ക്ക​പ്പെ​ടു​ന്നത്‌ എന്ന തത്ത്വത്തി​നു തെളിവു നൽകുന്നു, ബൈബിൾ ല്യൂ​വെൻഹു​ക്കി​നേ​ക്കാ​ളും (1683) പാസ്‌റ​റ​റേ​ക്കാ​ളും (19-ാം നൂററാണ്ട്‌) സഹസ്രാ​ബ്ദങ്ങൾ മുമ്പി​ലാ​ണെന്നു പ്രകട​മാ​ക്കി​ക്കൊ​ണ്ടു​തന്നെ. ലേവ്യ​പു​സ്‌തകം 13-ാം അദ്ധ്യാ​യ​ത്തിൽ കുഷ്‌ഠ​ത്തി​ന്റെ കേസു​ക​ളിൽ അനുശാ​സി​ച്ചി​രി​ക്കുന്ന സമ്പർക്ക​രോ​ധത്തെ സംബന്ധി​ച്ചും ഇതുതന്നെ പറയാൻ കഴിയും.

ലേവ്യ​പു​സ്‌ത​കം 11:13-20-ൽ രേഖ​പ്പെ​ടു​ത്തി​യി​രി​ക്കുന്ന ആഹാര​സം​ബ​ന്ധ​മായ നിരോ​ധ​ന​ങ്ങ​ളിൽ ഇരപി​ടി​യൻമാ​രായ പരുന്തു​ക​ളും, ഞാറപ്പ​ക്ഷി​ക​ളും, മൂങ്ങാ​ക​ളും മലഭു​ക്കു​ക​ളായ കാക്കയും കഴുക​നും ഉൾപ്പെ​ട്ടി​രു​ന്നു. ഭക്ഷ്യശൃം​ഖ​ല​യിൽ ഏററവും മുകളി​ലായ അവ വലിയ അളവിൽ ജീവവി​ഷങ്ങൾ ശേഖരി​ക്കു​ന്നു. ഭക്ഷ്യശൃം​ഖ​ല​യിൽ താഴെ​യുള്ള ജീവികൾ നിസ്സാ​ര​മായ തോതിൽ ഈ ജീവവി​ഷങ്ങൾ വയററി​ലാ​ക്കു​ന്നു, എന്നാൽ ഭക്ഷ്യശൃം​ഖ​ല​യിൽ മുകളി​ലു​ള്ളവ സാന്ദ്രി​ത​മായ അളവിൽ അവ സംഭരി​ക്കു​ന്നു. മോ​ശൈ​ക​ന്യാ​യ​പ്ര​മാ​ണം സസ്യഭു​ക്കു​ക​ളും ജീവവി​ഷങ്ങൾ സംഭരിച്ച ഭക്ഷ്യശൃം​ഖ​ല​യിൽ പെടാ​ത്ത​വ​യു​മായ ചില ജീവി​കളെ ഭക്ഷിക്കു​ന്ന​തി​നു അനുവ​ദി​ച്ചി​രു​ന്നു. നിരോ​ധി​ക്ക​പ്പെ​ട്ടി​രുന്ന ചിലതരം മാംസങ്ങൾ ട്രിച്ചി​നോ​സി​സ​നി​ട​യാ​ക്കിയ ഉരുളൻവിര പോലുള്ള പരോ​പ​ജീ​വി​കൾക്ക്‌ അഭയം നൽകി.

മോ​ശൈ​ക​ന്യാ​യ​പ്ര​മാ​ണ​ത്തിൽ പലേട​ത്തും കാണ​പ്പെ​ടുന്ന രക്തത്തിന്റെ ദുരു​പ​യോ​ഗ​ത്തി​നെ​തി​രെ​യുള്ള ബൈബിൾ നിരോ​ധനം 3,500 വർഷത്തി​നു​ശേഷം ഇപ്പോൾ വൈദ്യ​സം​ബ​ന്ധ​മാ​യി സയുക്തി​ക​മാ​ണെന്നു തെളി​ഞ്ഞു​കൊ​ണ്ടി​രി​ക്കു​ന്നു. (ഉല്‌പത്തി 9:4; ലേവ്യ​പു​സ്‌തകം 3:17; 7:26; 17:10-16; 19:26; ആവർത്തനം 12:16; 15:23) ഈ നിയ​ന്ത്രണം ക്രിസ്‌തീയ ഗ്രീക്കു​തി​രു​വെ​ഴു​ത്തു​ക​ളിൽ പ്രവൃ​ത്തി​കൾ 15:20, 29-ലും 21:25-ലും ആവർത്തി​ച്ചി​രി​ക്കു​ന്നു. കിഡ്‌നി ഡയാലി​സി​സി​ലും ഹൃദയ-ശ്വാസ​കോശ പമ്പുക​ളി​ലും സാധാരണ ശസ്‌ത്ര​ക്രി​യ​യി​ലും ദാനം ചെയ്യപ്പെട്ട രക്തത്തിന്റെ ഉപയോ​ഗം കുറയ്‌ക്കു​ന്ന​തി​നോ പൂർണ്ണ​മാ​യി ഒഴിവാ​ക്കു​ന്ന​തി​നോ വൈദ്യ​ശാ​സ്‌ത്രം ശ്രമി​ച്ചു​കൊ​ണ്ടി​രി​ക്ക​യാണ്‌. അനേക രൂപങ്ങ​ളി​ലുള്ള കരൾവീ​ക്ക​വും എയ്‌ഡ്‌സും സൈ​റേ​റാ​മെ​ഗാ​ലോ​വൈ​റസ്‌ രോഗാ​ണു​സം​ക്ര​മ​ണ​വും, കൂടാതെ മററ്‌ അസംഖ്യം രക്തവാ​ഹിത രോഗ​ങ്ങ​ളും ദൈവ​ത്തി​ന്റെ നിയമ​ങ്ങളെ അവഗണി​ക്കുന്ന ലോക​ജ്ഞാ​നി​കൾക്ക്‌ ഞെട്ടി​ക്കുന്ന ഓർമ്മി​പ്പി​ക്ക​ലു​ക​ളാ​യി നില​കൊ​ള്ളു​ന്നു.

വ്യായാ​മം നല്ല ആരോ​ഗ്യ​ത്തി​നു മർമ്മ​പ്ര​ധാ​ന​മാണ്‌, അതിന്റെ പ്രയോ​ജ​നങ്ങൾ ബൈബിൾ സമ്മതി​ച്ചു​പ​റ​യു​ക​യും ചെയ്യുന്നു. ഒരു തവണ 20 മിനി​ററു വീതം വാരത്തിൽ മൂന്നു പ്രാവ​ശ്യം ചെയ്യുന്ന ചുറു​ചു​റു​ക്കോ​ടെ​യുള്ള വ്യായാ​മ​ത്തി​നു ഹൃദയ​ത്തി​ന്റെ​യും രക്തചം​ക്ര​മ​ണ​ത്തി​ന്റെ​യും വിപൽസാ​ദ്ധ്യ​തയെ ലഘൂക​രി​ക്കാൻ കഴിയും. അതു കൊ​ളെ​സ്‌റെ​റ​റോ​ളി​ന്റെ സംരക്ഷ​ണാ​ത്മക എച്ച്‌ഡി​എൽ രൂപത്തെ വർദ്ധി​പ്പി​ക്കു​ന്നു, നിങ്ങളു​ടെ ഊർജ്ജ​നില മെച്ച​പ്പെ​ടു​ത്തു​ന്നു, വഴക്കവും ക്ഷേമ​ബോ​ധ​വും വർദ്ധി​പ്പി​ക്കു​ന്നു. വ്യായാ​മ​ത്തി​ന്റെ പ്രയോ​ജ​ന​ങ്ങളെ അംഗീ​ക​രി​ക്കു​മ്പോൾത്തന്നെ, അതിനെ കൂടുതൽ പ്രധാ​ന​മായ ആത്മീയ​വി​കാ​സ​ത്തി​നു പിന്നിൽ നിർത്തു​ന്നു: “ശരീരാ​ഭ്യാ​സം അല്‌പ​പ്ര​യോ​ജ​ന​മു​ള്ള​ത​ത്രേ; ദൈവ​ഭ​ക്തി​യോ ഇപ്പോ​ഴത്തെ ജീവ​ന്റെ​യും വരുവാ​നി​രി​ക്കു​ന്ന​തി​ന്റെ​യും വാഗ്‌ദ​ത്ത​മു​ള്ള​താ​ക​യാൽ സകലത്തി​ന്നും പ്രയോ​ജ​ന​ക​ര​മാ​കു​ന്നു.”—1 തിമൊ​ഥെ​യോസ്‌ 4:8.

ബൈബി​ളി​ലെ ധാർമ്മിക നിയമങ്ങൾ ലൈം​ഗി​ക​മാ​യി പകരുന്ന രോഗ​ങ്ങൾക്കെ​തി​രെ​യുള്ള മുഖ്യ സംരക്ഷ​ണ​മാ​യി ഉതകുന്നു. നിസ്സം​ശ​യ​മാ​യും ഈ രോഗങ്ങൾ മുമ്പും ഉണ്ടായി​രു​ന്നെ​ങ്കി​ലും നൂററാ​ണ്ടു​ക​ളോ​ളം പണ്ഡിതർ അവയെ തിരി​ച്ച​റി​യു​ക​യോ ഒരുപക്ഷേ സംശയി​ക്കു​ക​പോ​ലു​മോ ചെയ്‌തില്ല.—പുറപ്പാട്‌ 20:14; റോമർ 1:26, 27; 1 കൊരി​ന്ത്യർ 6:9, 18; ഗലാത്യർ 5:19.

“വളരെ കൃത്യ​മായ ഒരു ശാസ്‌ത്രീയ ഗ്രന്ഥം”

പൊ. യു. മു. (പൊതു​യു​ഗ​ത്തി​നു മുമ്പ്‌) അഞ്ചും നാലും നൂററാ​ണ്ടു​ക​ളി​ലെ ഒരു ഗ്രീക്ക്‌​വൈ​ദ്യ​നാ​യി​രു​ന്നു “ഔഷധ​ത്തി​ന്റെ പിതാവ്‌” എന്നറി​യ​പ്പെ​ടുന്ന ഹിപ്പൊ​ക്ര​റ​റീസ്‌. എന്നാൽ രോഗ​ങ്ങ​ളെ​പ്പ​ററി ബൈബിൾ പറയു​ന്ന​തി​ല​ധി​ക​വും അതിന്‌ ഒരു ആയിരം വർഷം മുമ്പു മോശെ എഴുതി​യി​രു​ന്നു. എന്നിട്ടു​പോ​ലും, ശ്രദ്ധേ​യ​മാ​യി ദ എ എം എ ന്യൂസ്‌ ഒരു ഡോക്ട​റു​ടെ കത്തു പ്രസി​ദ്ധീ​ക​രി​ച്ചു, അത്‌ ഇങ്ങനെ പ്രസ്‌താ​വി​ച്ചു: “ഇപ്പോൾ ഏററവും നല്ല വേലയി​ലേർപ്പെ​ട്ടി​രി​ക്കുന്ന ഏററവും അഭിജ്ഞ​രായ വൈദ്യ ഗവേഷകർ ബൈബിൾ . . . ഒരു കൃത്യ​മായ ശാസ്‌ത്രീയ ഗ്രന്ഥമാ​ണെന്ന നിഗമ​ന​ത്തിൽ എത്തി​ച്ചേ​രു​ന്നു. ജീവൻ, രോഗ​നിർണ്ണയം, ചികിത്സ, പ്രതി​രോധ ഔഷധം എന്നിവ സംബന്ധി​ച്ചു ബൈബി​ളിൽ നൽകി​യി​രി​ക്കുന്ന വസ്‌തു​തകൾ ഹിപ്പൊ​ക്ര​റ​റീ​സി​ന്റെ സിദ്ധാ​ന്ത​ങ്ങ​ളേ​ക്കാൾ—അവയിൽ അനേക​വും ഇപ്പോ​ഴും തെളി​യി​ക്ക​പ്പെ​ടാ​ത്ത​തും ചിലതു തീർത്തും പിശ​കെന്നു കണ്ടെത്ത​പ്പെ​ടു​ന്ന​തു​മാണ്‌—വളരെ പുരോ​ഗ​മി​ച്ച​തും ആശ്രയ​യോ​ഗ്യ​വു​മാണ്‌.”

ഡോ. റെൻഢൽ ഷോർട്ട്‌, ബൈബി​ളും ആധുനിക വൈദ്യ​ശാ​സ്‌ത്ര​വും (The Bible and Modern Medicine) എന്ന തന്റെ പുസ്‌ത​ക​ത്തിൽ പുരാതന ഇസ്ര​യേ​ലി​നു ചുററു​മു​ണ്ടാ​യി​രുന്ന ദേശങ്ങ​ളിൽ ആരോ​ഗ്യ​പ​രി​പാ​ലന നിയമങ്ങൾ ഉണ്ടായി​രു​ന്നെ​ങ്കിൽത്തന്നെ അവ വളരെ പ്രാഥ​മി​കം മാത്ര​മാ​യി​രു​ന്നു എന്നു ചൂണ്ടി​ക്കാ​ട്ടി​യ​തി​നു​ശേഷം ഇങ്ങനെ പറഞ്ഞു: “അശാസ്‌ത്രീ​യ​മെന്ന്‌ ആരോ​പി​ക്ക​പ്പെ​ടുന്ന ബൈബിൾ പോലുള്ള ഒരു ഗ്രന്ഥത്തിൽ ആരോ​ഗ്യ​പ​രി​പാ​ലന നിയമം ഉണ്ടായി​രി​ക്കു​ന്ന​താ​ണു കൂടുതൽ അതിശ​യ​കരം, അതേ​പോ​ലെ​തന്നെ അതിശ​യ​ക​ര​മാണ്‌ അടിമ​ത്ത​ത്തിൽ നിന്നു വിടു​വി​ക്ക​പ്പെ​ട്ടിട്ട്‌ അധികം നാളാ​കാഞ്ഞ, കൂടെ​ക്കൂ​ടെ ശത്രു​ക്ക​ളാൽ അതി​ക്ര​മി​ക്ക​പ്പെ​ടു​ക​യും ഇടവി​ട്ടി​ട​വിട്ട്‌ അടിമ​ത്ത​ത്തി​ലേക്കു കൊണ്ടു​പോ​ക​പ്പെ​ടു​ക​യും ചെയ്‌ത, ഒരു ജനതക്ക്‌ അതിന്റെ നിയമ​പു​സ്‌ത​ക​ങ്ങ​ളിൽ ആരോ​ഗ്യ​ത്തെ​ക്കു​റിച്ച്‌ ഇത്ര വിജ്ഞാ​ന​പ്ര​ദ​വും ന്യായ​യു​ക്ത​വു​മായ ഒരു നിയമ​സം​ഹിത ഉണ്ടായി​രി​ക്കു​ന്നത്‌.”

മാനസി​ക​മായ ഉൽപത്തി​യുള്ള ശാരീ​രിക രോഗ​പ്ര​ശ്‌ന​ങ്ങൾ

ചില ആരോഗ്യ ക്രമ​ക്കേ​ടു​ക​ളിൽ മനസ്സും ശരീര​വും തമ്മിലുള്ള ബന്ധം വൈദ്യ​ശാ​സ്‌ത്ര​രം​ഗത്തു പൊതു​വെ അംഗീ​ക​രി​ക്ക​പ്പെ​ടു​ന്ന​തി​നു വളരെ മുമ്പു ബൈബിൾ അംഗീ​ക​രി​ക്കു​ക​വഴി അതു വൈദ്യ​ശാ​സ്‌ത്ര​പ​ര​മാ​യി മുൻപ​ന്തി​യി​ലാ​ണെന്നു തെളി​യി​ച്ചി​രി​ക്കു​ന്നു. കൂടാതെ, ശാരീ​രി​ക​രോ​ഗം പ്രത്യ​ക്ഷ​മാ​കു​ന്ന​തിൽ മനസ്സി​നുള്ള പങ്കിനെ സംബന്ധിച്ച ബൈബി​ളി​ന്റെ വിശദീ​ക​രണം വ്യക്തമായ ഗ്രാഹ്യ​ത്തി​ന്റെ ഒരു മാതൃ​ക​യാ​യി നിലനിൽക്കു​ന്നു. സദൃശ​വാ​ക്യ​ങ്ങൾ 17:22 പ്രസ്‌താ​വി​ക്കു​ന്നു: “സന്തുഷ്ട​ഹൃ​ദയം നല്ലോരു ഔഷധ​മാ​കു​ന്നു; തകർന്ന മനസ്സോ അസ്ഥികളെ ഉണക്കുന്നു.” ഇവിടെ ദൈവ​വി​ധി​യാ​യി ഒന്നും ഇല്ലെന്നു ശ്രദ്ധി​ക്കുക, വസ്‌തു​ത​യു​ടെ പ്രസ്‌താ​വന മാത്ര​മേ​യു​ള്ളു. അസന്തുഷ്ട ചിന്തക​ളാ​ലും വികാ​ര​ങ്ങ​ളാ​ലും കീഴട​ക്ക​പ്പെട്ട ഒരു വ്യക്തി​യോട്‌ വിഷാ​ദി​ക്കാ​തി​രി​ക്കൂ എന്നു പറയു​ന്ന​തി​നു അവിടെ യാതൊ​രു ബുദ്ധ്യു​പ​ദേ​ശ​വു​മില്ല, അത്‌ അത്ര നിസ്സാ​ര​മാ​ണെന്ന മട്ടിൽ.

ഒരു ക്രിയാ​ത്മ​ക​മായ മനോ​ഭാ​വം സഹായ​ക​മാണ്‌; ഉത്‌ക്കണ്‌ഠ ദുർബ​ല​പ്പെ​ടു​ത്തു​ന്ന​തും വിനാ​ശ​ക​ര​വു​മാണ്‌. “മനോ​വ്യ​സനം ഹേതു​വാ​യി മനസ്സി​ടി​യു​ന്നു; ഒരു നല്ല വാക്കോ അതിനെ സന്തോ​ഷി​പ്പി​ക്കു​ന്നു.” (സദൃശ​വാ​ക്യ​ങ്ങൾ 12:25) സദൃശ​വാ​ക്യ​ങ്ങൾ 18-ാം അദ്ധ്യാ​യ​ത്തി​ന്റെ 14-ാം വാക്യം പരിചി​ന്ത​നീ​യ​മാണ്‌: “പുരു​ഷന്റെ ധീരത അവന്റെ ദീനത്തെ സഹിക്കും; തകർന്ന മനസ്സി​നെ​യോ ആർക്കു സഹിക്കാം?” ഒരളവി​ലുള്ള ശാരീ​രിക അസ്വസ്ഥത സഹിച്ചു​നി​ല്‌ക്കു​ന്ന​തി​നുള്ള ഒരുവന്റെ കഴിവ്‌ അയാളു​ടെ ആത്മീയ ബലത്തിന്റെ സഹായ​ത്തോ​ടെ വർദ്ധി​പ്പി​ക്കാൻ കഴിയു​മെന്ന്‌ ഈ തിരു​വെ​ഴു​ത്തു സൂചി​പ്പി​ക്കു​ന്നു.

യേശു​വി​ന്റെ മലമ്പ്ര​സം​ഗ​ത്തി​ന്റെ മനഃശാ​സ്‌ത്ര​പ​ര​മായ മൂല്യം സംബന്ധി​ച്ചു മനോ​രോ​ഗ​വി​ദ​ഗ്‌ദ്ധ​നായ ജയിംസ്‌ ററി. ഫിഷറി​നു പറയാ​നു​ണ്ടാ​യി​രു​ന്നത്‌ ഇതാണ്‌: “മാനസിക ആരോ​ഗ്യം എന്ന വിഷയ​ത്തെ​ക്കു​റിച്ച്‌ ഏററവും യോഗ്യ​രായ മനഃശാ​സ്‌ത്ര​ജ്ഞ​രും മനോ​രോ​ഗ​വി​ദ​ഗ്‌ദ്ധ​രും എക്കാല​വും ആധികാ​രി​ക​മാ​യി എഴുതി​യി​ട്ടുള്ള സകല ലേഖന​ങ്ങ​ളു​ടെ​യും ആകെത്തുക എടുക്കു​ക​യാ​ണെ​ങ്കിൽ—അവ മുഴുവൻ സംയോ​ജി​പ്പി​ക്കു​ക​യും പരിഷ്‌ക​രി​ക്ക​യും വാഗ്‌പെ​രു​പ്പം ഒഴിവാ​ക്കു​ക​യു​മാ​ണെ​ങ്കിൽ—കഴമ്പുള്ള വിവരങ്ങൾ എല്ലാം എടുക്കു​ക​യും ഭംഗി​വാ​ക്കു​കൾ ഒഴിവാ​ക്കു​ക​യു​മാ​ണെ​ങ്കിൽ, ജീവി​ച്ചി​രി​ക്കുന്ന ഏററം പ്രാപ്‌ത​രായ കവിക​ളെ​ക്കൊണ്ട്‌ ഈ ശുദ്ധ ശാസ്‌ത്രീയ വിജ്ഞാ​ന​ത്തി​ന്റെ കലർപ്പി​ല്ലാത്ത ശകലങ്ങൾ പ്രസ്‌താ​വി​പ്പി​ക്കു​ക​യാ​ണെ​ങ്കിൽ നിങ്ങൾക്കു ഗിരി​പ്ര​ഭാ​ഷ​ണ​ത്തി​ന്റെ വികൃ​ത​വും അപൂർണ്ണ​വു​മായ ഒരു സങ്കലന​മാ​യി​രി​ക്കും ലഭിക്കുക. തുലനം ചെയ്‌താൽ അത്‌ അത്യന്തം അപര്യാ​പ്‌ത​മാ​യി​രി​ക്കും.”—കാണാ​തായ ചില ബട്ടണുകൾ, (A Few Buttons Missing), പേജ്‌ 273.

വൈകാ​രി​ക​മാ​യ ഉല്‌പ​ത്തി​യുള്ള തോന്ന​ലു​കൾക്കു നമ്മുടെ ശാരീ​രിക അവസ്ഥയെ സ്വാധീ​നി​ക്കാൻ കഴിയും, എന്നാൽ യഥാർത്ഥ​ത്തിൽ ശാരീ​രിക രോഗ​മി​ല്ലെന്ന്‌ അത്‌ അതിൽത്തന്നെ അർത്ഥമാ​ക്കു​ന്നില്ല. അതു​കൊണ്ട്‌, ആദ്യം ശാരീ​രിക ആവശ്യ​ങ്ങ​ളിൽ സഹായി​ക്കാൻ ശ്രമി​ക്കു​ന്ന​തും കുറഞ്ഞ​പക്ഷം അസുഖം അംഗീ​ക​രി​ക്കു​ക​യെ​ങ്കി​ലും ചെയ്യു​ന്ന​തും സഹിച്ചു​നിൽക്കാൻ ഒരുവനെ സഹായി​ക്കുന്ന ക്രിയാ​ത്മ​ക​മായ ഒരു മനസ്ഥി​തി​ക്കും മനോ​ഭാ​വ​ത്തി​നും പ്രോ​ത്സാ​ഹി​പ്പി​ക്കു​ന്ന​തും പ്രധാ​ന​മാണ്‌. ഇപ്പോ​ഴത്തെ വ്യവസ്ഥി​തി​യിൽ കൃത്യ​മായ ചികിത്സ ലഭ്യമ​ല്ലാ​ത്ത​പ്പോൾ ഇതു വിശേ​ഷാൽ പ്രധാ​ന​മാണ്‌.

ആദാമി​ന്റെ പാപത്തി​നു​ശേഷം മരണം മുഴു മനുഷ്യ​വർഗ്ഗ​ത്തി​നും മുൻനിർണ്ണ​യി​ക്ക​പ്പെട്ട ഒരു ജനിതക യാഥാർത്ഥ്യ​മാണ്‌. (റോമർ 5:12) അതു​കൊണ്ട്‌, ഒരു വ്യക്തി​യു​ടെ ഒരു പ്രത്യേക രോഗം അയാളു​ടെ ആത്മീയ അവസ്ഥ​യോ​ടു ബന്ധപ്പെ​ടു​ത്തു​ന്നതു സാധാ​ര​ണ​യാ​യി ഉചിത​മാ​യി​രി​ക്കില്ല. വൈകാ​രി​ക​മാ​യി ദുർബ​ലാ​വ​സ്ഥ​യി​ലാ​യി​രി​ക്കുന്ന വ്യക്തി​ക​ളു​ടെ പ്രശ്‌നങ്ങൾ കൈകാ​ര്യം ചെയ്യു​മ്പോൾ ഇതു മനസ്സിൽ വയ്‌ക്കു​ന്നതു പ്രധാ​ന​മാണ്‌.

ഡോക്ട​റു​ടെ പങ്ക്‌

ഡോക്ടർമാ​രോ​ടും ആധുനിക വൈദ്യ​ചി​കി​ത്സ​യോ​ടും ക്രിസ്‌ത്യാ​നി​കൾക്ക്‌ എന്തു സമീപ​ന​മാ​ണു​ണ്ടാ​യി​രി​ക്കേ​ണ്ടത്‌? ബൈബിൾ പരി​ശോ​ധി​ക്കു​മ്പോൾ ഡോക്ടർമാർക്ക്‌ അനർഹ​മായ ആദരവു നൽകു​ന്ന​തി​നോ നല്ല ആരോ​ഗ്യ​ത്തി​നുള്ള അന്തിമ​പ്ര​ത്യാ​ശ​യെന്ന നിലയിൽ വൈദ്യ​സാ​ങ്കേ​തി​ക​ത്വ​ത്തി​ലേക്കു നോക്കു​ന്ന​തി​നോ യാതൊ​രു തിരു​വെ​ഴു​ത്ത​ടി​സ്ഥാ​ന​വു​മി​ല്ലെന്നു നാം കാണുന്നു. എന്നാൽ മറിച്ചാ​യി​രി​ക്കു​ന്ന​തി​നു തെളി​വുണ്ട്‌. “പല വൈദ്യൻമാ​രാ​ലും ഏറി​യോ​ന്നു സഹിച്ചു തനിക്കു​ള്ള​തൊ​ക്കെ​യും ചെലവ​ഴി​ച്ചി​ട്ടും ഒട്ടും ഭേദം വരാതെ ഏററവും പരവശ​യാ​യി തീർന്നി​രുന്ന” അനേക വർഷങ്ങ​ളാ​യി “രക്തസ്രാ​വ​മു​ണ്ടാ​യി​രുന്ന ഒരു സ്‌ത്രീ​യെ”ക്കുറിച്ച്‌ മർക്കോസ്‌ നമ്മോടു പറയുന്നു. (മർക്കൊസ്‌ 5:25-29) ഇന്ന്‌ ഈ സാധാരണ അസുഖം മിക്ക​പ്പോ​ഴും വിജയ​ക​ര​മാ​യി ചികി​ത്സി​ക്ക​പ്പെ​ടു​ന്നു​ണ്ടെ​ങ്കി​ലും അനേക രോഗ​ങ്ങ​ളും ചികി​ത്സി​ക്കാൻ കഴിയാ​ത്ത​താ​യി അവശേ​ഷി​ക്കു​ന്നു, ചികി​ത്സി​ക്കാൻ പററാത്ത ഒരു പററം പുതിയ രോഗങ്ങൾ നിരന്തരം കണ്ടുപി​ടി​ക്ക​പ്പെ​ട്ടു​കൊ​ണ്ടു​മി​രി​ക്കു​ന്നു.

എന്നിരി​ക്കി​ലും, ഒട്ടും​തന്നെ വിലയി​ല്ലാ​ത്ത​താ​യി പരമ്പരാ​ഗത വൈദ്യ​ചി​കി​ത്സയെ വീക്ഷി​ക്കുന്ന ചിലർ സ്വീക​രി​ച്ചി​രി​ക്കുന്ന ഇതിനു വിരു​ദ്ധ​മായ അങ്ങേയ​റ​റത്തെ സമീപ​നത്തെ ബൈബിൾ പിന്താ​ങ്ങു​ന്നില്ല. ചിലർ ഡോക്ടറെ തൽസ്ഥാ​നത്തു നിന്നു മാററി തങ്ങളെ​ത്ത​ന്നെ​യോ വൈദ്യ​സം​ബ​ന്ധ​മ​ല്ലാത്ത ചിന്ത കൂടാതെ പെട്ടെ​ന്നു​ണ്ടാ​യേ​ക്കാ​വുന്ന മറേറ​തെ​ങ്കി​ലും സമീപ​ന​ത്തെ​യോ ആ സ്ഥാനത്തു പുനഃ​പ്ര​തി​ഷ്‌ഠി​ക്കും. കൊ​ലൊ​സ്യർ 4:14-ൽ ലൂക്കോ​സി​നെ​ക്കു​റി​ച്ചുള്ള വൈദ്യ​നായ “പ്രിയ” എന്ന വർണ്ണന അവന്റെ വൈദ്യ​സം​ബ​ന്ധ​മായ കഴിവു​ക​ളേ​ക്കാ​ളേറെ അവന്റെ ആത്മീയ ഗുണങ്ങ​ളെ​യാണ്‌ പരാമർശി​ച്ചത്‌ എന്നതിൽ സംശയ​മില്ല. എന്നിരു​ന്നാ​ലും, തിരു​വെ​ഴു​ത്തു​ക​ളു​ടെ ഒരു ഭാഗം ദൈവ​നി​ശ്വ​സ്‌ത​ത​യോ​ടെ എഴുതു​ന്ന​തിൽ അവൻ ആസ്വദിച്ച പദവി സദാചാ​ര​പ​ര​മ​ല്ലാ​ത്ത​തോ തിരു​വെ​ഴു​ത്തു​പ​ര​മ​ല്ലാ​ത്ത​തോ ആയ വൈദ്യ​ചി​കിത്സ നടത്തുന്ന ഒരാൾക്കു നൽക​പ്പെ​ടു​ന്ന​തി​നു സാധ്യത ഉണ്ടായി​രി​ക്കു​മാ​യി​രു​ന്നില്ല.

ഹിപ്പൊ​ക്ര​റ​റീ​സി​ന്റെ സ്വാധീ​നത്തെ സൂചി​പ്പി​ക്കുന്ന സാങ്കേ​തിക ഭാഷയും വൈദ്യ​സം​ബ​ന്ധ​മായ വിവര​ണ​ങ്ങ​ളും ഉപയോ​ഗി​ച്ചു​കൊണ്ട്‌ ലൂക്കോസ്‌ തന്റെ കാലത്തു നവീന​മാ​യി​രുന്ന ചികിത്സ നടത്തി​യി​രു​ന്നു​വെന്നു സൂചി​പ്പി​ക്കുന്ന തെളി​വുണ്ട്‌. ഹിപ്പൊ​ക്ര​റ​റീസ്‌ എല്ലായ്‌പ്പോ​ഴും കൃത്യ​ത​യു​ള്ള​വ​ന​ല്ലാ​യി​രു​ന്നെ​ങ്കി​ലും തന്റെ ചികിത്സ യുക്തി​സ​ഹ​മാ​ക്കു​ന്ന​തി​നു ശ്രമി​ക്കു​ക​തന്നെ ചെയ്യു​ക​യും ചികിത്സ സംബന്ധിച്ച അന്ധവി​ശ്വാ​സ​ങ്ങ​ളേ​യും മതപര​മായ വ്യാജ​സി​ദ്ധാ​ന്ത​ങ്ങ​ളേ​യും അപലപി​ക്കു​ക​യും ചെയ്‌തു. രോഗങ്ങൾ കൈകാ​ര്യം ചെയ്യു​ന്ന​തിൽ വൈദ്യ​സം​ബ​ന്ധ​മായ അനുഭ​വ​പ​രി​ച​യ​മു​ള്ള​വർക്കു കുറെ മൂല്യ​മു​ണ്ടെന്നു അംഗീ​ക​രി​ക്ക​പ്പെ​ട്ടി​രു​ന്നി​ല്ലെ​ങ്കിൽ “ദീനക്കാർക്ക​ല്ലാ​തെ സൗഖ്യ​മു​ള്ള​വർക്കു വൈദ്യ​നെ​ക്കൊ​ണ്ടു ആവശ്യ​മില്ല” എന്ന ലൂക്കൊസ്‌ 5:31-ലെ യേശു​വി​ന്റെ ലളിത​മായ ദൃഷ്ടാ​ന്ത​ത്തി​നു യാതൊ​രർത്ഥ​വും ഉണ്ടാകു​മാ​യി​രു​ന്നില്ല.

ആൻറി​ബ​യോ​ട്ടി​ക്കു​ക​ളു​ടെ​യും ആൻറി​സെ​പ്‌റ​റി​ക്കു​ക​ളു​ടെ​യും വേദനാ​സം​ഹാ​രി​ക​ളു​ടെ​യും ഉപയോ​ഗം ആവശ്യ​മാ​ണെന്നു ചൂണ്ടി​ക്കാ​ണി​ക്ക​പ്പെ​ടു​മ്പോൾ അവയുടെ ഉപയോ​ഗത്തെ ആക്ഷേപി​ക്കു​ന്ന​തിന്‌ അങ്ങേയ​റ​റത്തെ ഒരു വീക്ഷണം സ്വീക​രി​ക്കു​ന്ന​തി​നു തിരു​വെ​ഴു​ത്ത​ടി​സ്ഥാ​ന​മില്ല. യിരെ​മ്യാ​വു 46:11-ഉം 51:8-ഉം വേദനയെ ശമിപ്പി​ക്കുന്ന സവി​ശേ​ഷ​ത​യു​ള്ള​തും ആൻറി​സെ​പ്‌റ​റി​ക്കി​ന്റെ മൂല്യ​മു​ള്ള​തു​മായ ഗിലെ​യാ​ദി​ലെ ഒരു തൈലത്തെ വർണ്ണി​ക്കു​ന്നു. മരുന്ന്‌ ഉള്ളിൽ കഴിക്കു​ന്ന​തി​നെ​തി​രെ തിരു​വെ​ഴു​ത്തു​പ​ര​മോ സിദ്ധാ​ന്ത​പ​ര​മോ ആയ യാതൊ​രു നിലപാ​ടു​മില്ല.

എന്നിരു​ന്നാ​ലും, ഈച്ചക​ളും കൊതു​കു​ക​ളും ഒച്ചുക​ളും പരത്തുന്ന രോഗ​വു​മാ​യുള്ള തുടർച്ച​യായ സമ്പർക്കത്തെ—ഇതാണ്‌ ലോക​വ്യാ​പ​ക​മായ മരണത്തി​ന്റെ ഒന്നാമത്തെ കാരണം—നേരി​ടു​ന്ന​തി​നു വലിയ അളവു​ക​ളി​ലുള്ള ആൻറി​ബ​യോ​ട്ടി​ക്കു​കൾക്കു കഴിഞ്ഞി​ട്ടില്ല. ആരോ​ഗ്യ​പ്ര​വർത്തകർ തിരി​കെ​പോ​യി സുരക്ഷി​ത​മായ മാലി​ന്യ​ന​ശീ​ക​രണം, ജലവി​ത​ര​ണ​ത്തി​ന്റെ സംരക്ഷണം, കീടവാ​ഹി​നി​കളെ നിയ​ന്ത്രി​ക്കൽ, വ്യക്തികൾ തമ്മിലും കൈയും വായും തമ്മിലുള്ള സമ്പർക്കം സംബന്ധിച്ച മുൻക​രു​തൽ എന്നിങ്ങ​നെ​യുള്ള അടിസ്ഥാന ബൈബിൾ തത്ത്വങ്ങൾ തൊട്ടു തുട​ങ്ങേ​ണ്ടി​യി​രു​ന്നു. 1970-കളോളം അടുത്ത​കാ​ലത്ത്‌, ആശുപ​ത്രി​ക​ളി​ലെ വെള്ള​ത്തൊ​ട്ടി​കൾക്കു മുകളി​ലും രോഗി​ക​ളു​ടെ കിടക്ക​കൾക്കു മുകളി​ലും സ്ഥാപി​ച്ചി​രുന്ന സൂചനാ​ബോർഡു​കൾ മൂലം നഴ്‌സു​മാ​രും ഡോക്ടർമാ​രും നിരന്ത​ര​മാ​യി ഇങ്ങനെ അനുസ്‌മ​രി​പ്പി​ക്ക​പ്പെട്ടു: “കൈകൾ കഴുകൂ”—രോഗം പകരു​ന്നതു തടയു​ന്ന​തി​നുള്ള ഒന്നാന്തരം മാർഗ്ഗം തന്നെ.

ഒരു മുന്നറി​യി​പ്പിൻ വാക്ക്‌

ആരോഗ്യ ഉപദേശം നൽകു​ന്നവർ—ഒരു ഡോക്ട​റോ, ഞരമ്പു​ചി​കി​ത്സ​ക​നോ, ഹോമി​യോ​പ്പതി ചികി​ത്സ​ക​നോ, സദു​ദ്ദേ​ശ്യ​മു​ള്ള​വ​നെ​ങ്കി​ലും വിവര​മി​ല്ലാത്ത ഒരു സുഹൃ​ത്തോ ആയാലും—അനാ​രോ​ഗ്യ​ത്തി​ലാ​യി​രി​ക്കുന്ന ആരെ​യെ​ങ്കി​ലും ഉപദേ​ശി​ക്കു​മ്പോ​ഴൊ​ക്കെ ഒരു മുഖ്യ ഉത്തരവാ​ദി​ത്തം ഏറെറ​ടു​ക്കു​ക​യാ​ണു ചെയ്യു​ന്നത്‌. അവർ നൽകുന്ന ഉപദേശം ഹാനി​ക​ര​മാ​യി​രി​ക്കു​മ്പോൾ അല്ലെങ്കിൽ മിക്ക​പ്പോ​ഴും ഫലപ്ര​ദ​മാ​യി​രു​ന്നി​ട്ടുള്ള സഹായത്തെ തിരി​ച്ചു​വി​ടു​ക​യോ അതി​നെ​തി​രെ മുൻവി​ധി ഉളവാ​ക്കു​ക​യോ അതു താമസി​പ്പി​ക്കു​ക​യോ ചെയ്യു​മ്പോൾ ഇതു പ്രത്യേ​കി​ച്ചും വാസ്‌ത​വ​മാ​യി​രി​ക്കും. സഹായ​ത്തി​നു​വേ​ണ്ടി​യുള്ള വ്യക്തി​പ​ര​മായ ഒരു സാഹസി​കാ​ന്വേ​ഷണം നടത്തു​മ്പോൾ പൊട്ട​വൈ​ദ്യ​ത്തി​നും ഭൂതവി​ദ്യ​ക്കും എതിരെ ജാഗ്രത പാലി​ക്ക​ണ​മെന്നു ബൈബി​ളിൽ മതിയായ മുന്നറി​യി​പ്പു​ക​ളുണ്ട്‌. സദൃശ​വാ​ക്യ​ങ്ങൾ 14:15 ഓർക്കുക: “അല്‌പ​ബു​ദ്ധി ഏതു വാക്കും വിശ്വ​സി​ക്കു​ന്നു; സൂക്ഷ്‌മ​ബു​ദ്ധി​യോ തന്റെ നടപ്പു സൂക്ഷി​ച്ചു​കൊ​ള്ളു​ന്നു.”

വിശുദ്ധ തിരു​വെ​ഴു​ത്തു​ക​ളിൽ വിവരി​ച്ചി​രി​ക്കുന്ന തത്ത്വങ്ങൾ ആരോ​ഗ്യം പരിര​ക്ഷി​ക്കു​ന്ന​തിന്‌ ഇന്നു പ്രയോ​ഗി​ക​മാ​ണോ? മോ​ശൈക ന്യായ​പ്ര​മാ​ണ​ത്തി​ലെ മുഖ്യ ശ്രദ്ധ രോഗ​പ്ര​തി​രോ​ധം ആയിരു​ന്ന​തു​പോ​ലെ​തന്നെ ഇന്ന്‌ ആരോ​ഗ്യ​പ​രി​പാ​ല​ന​ത്തോ​ടുള്ള പ്രതി​രോ​ധ​സ​മീ​പനം മുഖ്യ​മാ​യും ചികി​ത്സ​യിൽ അധിഷ്‌ഠി​ത​മാ​യി​രി​ക്കുന്ന സമീപ​ന​ത്തെ​ക്കാൾ വളരെ​യേറെ മൂല്യ​മു​ള്ള​താ​ണെന്നു തെളി​ഞ്ഞി​രി​ക്കു​ന്നു. അല്‌പ​വി​ക​സിത രാജ്യ​ങ്ങ​ളിൽ ആധുനി​ക​മായ ആരോ​ഗ്യ​ചി​കിത്സ നടപ്പി​ലാ​ക്കാൻ ശ്രമി​ച്ച​തി​ലുള്ള ലോകാ​രോ​ഗ്യ സംഘട​ന​യു​ടെ ആധുനി​ക​പാ​ഠ​മി​താണ്‌: “രോഗ​പ്ര​തി​രോ​ധ​മാ​ണു രോഗ​ചി​കി​ത്സ​യേ​ക്കാൾ മെച്ചം.”

അവസാ​ന​മാ​യി, നല്ല ആരോ​ഗ്യം ദൈവ​മ​ഹ​ത്വ​ത്തി​നാ​യി സന്തോ​ഷ​ക​ര​മായ രാജ്യ​വേ​ലയെ വികസി​പ്പി​ക്കു​ന്ന​തിന്‌ ഉപയോ​ഗി​ക്കുക എന്ന ലക്ഷ്യത്തിൽ ഒരു ക്രിസ്‌ത്യാ​നിക്ക്‌ ആരോ​ഗ്യം സംബന്ധിച്ച്‌ ആദര​വോ​ടെ​യുള്ള ഒരു ദീർഘ​കാ​ല​വീ​ക്ഷ​ണ​മു​ണ്ടാ​യി​രി​ക്കണം. ആ രാജ്യ​ഭ​ര​ണ​ത്തിൻ കീഴിലെ വാഗ്‌ദാ​ന​മി​താണ്‌: “‘എനിക്കു ദീനം’ എന്നു യാതൊ​രു നിവാ​സി​യും പറകയില്ല.”—യെശയ്യാ​വു 33:24. (g91 11⁄22)

[4-ാം പേജിലെ ചിത്രം]

“ഞാൻ രഹസ്യ​ത്തിൽ ഉണ്ടാക്ക​പ്പെ​ട്ട​പ്പോൾ എന്റെ അസ്ഥികൂ​ടം നിനക്കു മറവാ​യി​രു​ന്നില്ല”