ഏഹൂദ്‌ വിശ്വാ​സി​യും ധൈര്യ​ശാ​ലി​യു​മായ പുരുഷൻ

ഇസ്രാ​യേ​ല്യർ വാഗ്‌ദത്ത ദേശത്തു കാലു​കു​ത്തി​യി​ട്ടു നിരവധി വർഷങ്ങൾ പിന്നിട്ടു. മോശ​യും അവന്റെ പിൻഗാ​മി യോശു​വ​യും മരിച്ചി​ട്ടു കാലങ്ങ​ളേ​റെ​യാ​യി. വിശ്വാ​സി​ക​ളാ​യി​രുന്ന അത്തരം പുരു​ഷ​ന്മാ​രു​ടെ അഭാവ​ത്തിൽ നിർമ​ലാ​രാ​ധ​ന​യോ​ടുള്ള വിലമ​തി​പ്പി​നു കാര്യ​മായ കോട്ടം തട്ടി. ഇസ്രാ​യേ​ല്യർ ബാൽവി​ഗ്ര​ഹ​ങ്ങ​ളെ​യും അശേര​പ്ര​തി​ഷ്‌ഠ​ക​ളെ​യും പോലും സേവി​ക്കാൻ തുടങ്ങി.a തന്നിമി​ത്തം യഹോവ തന്റെ ജനത്തെ എട്ടു സംവത്സ​ര​ത്തേക്ക്‌ അരാമ്യ​രു​ടെ കൈക​ളിൽ ഏൽപ്പിച്ചു. അപ്പോൾ ഇസ്രാ​യേ​ല്യർ സഹായ​ത്തി​നാ​യി ദൈവ​ത്തോ​ടു കരഞ്ഞ​പേ​ക്ഷി​ച്ചു. കരുണാ​പൂർവം അവൻ അവർക്കു ചെവി​ചാ​യി​ച്ചു. തന്റെ ജനത്തെ രക്ഷിക്കു​ന്ന​തി​നാ​യി യഹോവ ഒരു ന്യായാ​ധി​പനെ, ഒത്‌നീ​യേ​ലി​നെ, എഴു​ന്നേൽപ്പി​ച്ചു.—ന്യായാ​ധി​പ​ന്മാർ 3:7-11.

ആ സംഭവങ്ങൾ ഇസ്രാ​യേ​ല്യ​രെ ഒരു അടിസ്ഥാന സത്യം പഠിപ്പി​ക്കേ​ണ്ട​താ​യി​രു​ന്നു—യഹോ​വ​യോ​ടുള്ള അനുസ​രണം അനു​ഗ്ര​ഹങ്ങൾ കൈവ​രു​ത്തും, അനുസ​ര​ണ​ക്കേ​ടോ നാശത്തിൽ കലാശി​ക്കും. (ആവർത്ത​ന​പു​സ്‌തകം 11:26-28) എന്നാൽ, ഇസ്രാ​യേ​ല്യർ ആ പാഠം പഠിക്കു​ന്ന​തിൽ പരാജ​യ​പ്പെട്ടു. സമാധാ​ന​പൂർണ​മായ 40 സംവത്സ​ര​ത്തി​നു​ശേഷം അവർ വീണ്ടും നിർമ​ലാ​രാ​ധന ഉപേക്ഷി​ച്ചു.—ന്യായാ​ധി​പ​ന്മാർ 3:12.

മോവാ​ബി​ന്റെ അധീന​ത​യി​ലാ​കു​ന്നു

ഇത്തവണ തന്റെ ജനം മോവാ​ബ്യ രാജാ​വായ എഗ്ലോന്റെ കൈക​ളിൽ വീഴാൻ യഹോവ ഇടയാക്കി. ബൈബിൾ അവനെ “സ്ഥൂലി​ച്ചവൻ” എന്നു വർണി​ക്കു​ന്നു. അമ്മോ​ന്യ​രു​ടെ​യും അമാ​ലേ​ക്യ​രു​ടെ​യും സഹായ​ത്തോ​ടെ എഗ്ലോൻ ഇസ്രാ​യേ​ല്യ​രെ ആക്രമി​ക്കു​ക​യും “ഈന്തപട്ടണ”മായി​രുന്ന യെരീ​ഹോ​വിൽ തനിക്കു കൊട്ടാ​രം പണിതു​യർത്തു​ക​യും ചെയ്‌തു. ഇസ്രാ​യേൽ ആദ്യമാ​യി കീഴട​ക്കിയ കനാന്യ നഗരം ഇപ്പോൾ, വ്യാജ​ദൈ​വ​മായ കെമോ​ശി​നെ ആരാധി​ച്ചി​രു​ന്ന​വന്റെ ആസ്ഥാന​മാ​യി​ത്തീർന്നത്‌ എത്രകണ്ടു വിരോ​ധാ​ഭാ​സ​മാ​യി​രു​ന്നു!b—ന്യായാ​ധി​പ​ന്മാർ 3:12, 13, 17.

അടുത്ത 18 സംവത്സരം എഗ്ലോൻ ഇസ്രാ​യേ​ല്യ​രെ പീഡി​പ്പി​ച്ചു. അത്‌ അവരു​ടെ​മേൽ ഭാരിച്ച കരം ചുമത്തി​ക്കൊ​ണ്ടാ​ണെന്നു വ്യക്തം. സമയാ​സ​മയം കാഴ്‌ച​യർപ്പി​ക്കാൻ ആവശ്യ​പ്പെ​ടു​ക​വഴി ഇസ്രാ​യേ​ലി​ന്റെ വിഭവങ്ങൾ ശോഷി​പ്പി​ക്കു​ന്ന​തി​നൊ​പ്പം മോവാബ്‌ തന്റെതന്നെ സാമ്പത്തിക സ്ഥിതി മെച്ച​പ്പെ​ടു​ത്തു​ക​യാ​യി​രു​ന്നു. ദൈവ​ജനം ആശ്വാ​സ​ത്തി​നു​വേണ്ടി യഹോ​വ​യോ​ടു നിലവി​ളി​ക്കു​ക​യും അവൻ വീണ്ടു​മൊ​രി​ക്കൽ അവർക്കു ചെവി​ചാ​യി​ക്കു​ക​യും ചെയ്‌തു​വെന്നു മനസ്സി​ലാ​ക്കാൻ സാധി​ക്കും. അവൻ അവർക്കു​വേണ്ടി മറ്റൊരു രക്ഷകനെ എഴു​ന്നേൽപ്പി​ച്ചു. ഇത്തവണ അത്‌ ബെന്യാ​മീ​ന്യ​നായ ഏഹൂദാ​യി​രു​ന്നു. ഇസ്രാ​യേ​ല്യ​രു​ടെ​മേ​ലുള്ള എഗ്ലോന്റെ ക്രൂര​ഭ​രണം അവസാ​നി​പ്പി​ക്കാൻ, അടുത്ത തവണ കാഴ്‌ച​ദ്ര​വ്യം കൊടു​ക്കുന്ന നാളിൽ നടപടി സ്വീക​രി​ക്കു​ന്ന​തിന്‌ ഏഹൂദ്‌ ആസൂ​ത്രണം ചെയ്‌തു.—ന്യായാ​ധി​പ​ന്മാർ 3:14, 15.

തന്റെ സുധീര നടപടി​ക്കുള്ള ഒരുക്ക​മെ​ന്ന​വണ്ണം ഏഹൂദ്‌ ഇരുവാ​യ്‌ത്ത​ല​യും ഒരു മുഴം നീളവു​മുള്ള ഒരു വാൾ ഉണ്ടാക്കി. അതൊരു ചെറിയ മുഴമാ​യി​രു​ന്നെ​ങ്കിൽ ആ ആയുധ​ത്തി​ന്റെ നീളം 38 സെൻറി​മീ​റ്റർ വരുമാ​യി​രു​ന്നു. അതൊരു കഠാര​യാ​യി​രു​ന്നു​വെ​ന്നാ​ണു ചിലരു​ടെ അഭി​പ്രാ​യം. വ്യക്തമാ​യും, വാളി​നും പിടി​ക്കു​മി​ട​യി​ലാ​യി കുറു​കെ​യുള്ള ഖണ്ഡം ഉണ്ടായി​രു​ന്നില്ല. തന്മൂലം, ഏഹൂദി​നു തന്റെ ചെറിയ വാൾ വസ്‌ത്ര​ത്തി​ന്റെ മടക്കി​നു​ള്ളിൽ മറച്ചു​വെ​ക്കാൻ കഴിഞ്ഞു. മാത്രമല്ല, ഏഹൂദ്‌ ഇടങ്കയ്യ​നാ​യി​രു​ന്ന​തി​നാൽ അവനു തന്റെ വാൾ വലതു​വ​ശത്തു കെട്ടി​വെ​ക്കാ​നും കഴിഞ്ഞു. സാധാ​ര​ണ​ഗ​തി​യിൽ ആയുധം വലതു​വ​ശത്തു കെട്ടി​വെ​ക്കാ​റില്ല.—ന്യായാ​ധി​പ​ന്മാർ 3:15, 16.

ഏഹൂദി​ന്റെ തന്ത്രം അപകട​ര​ഹി​ത​മാ​യി​രു​ന്നില്ല. ഉദാഹ​ര​ണ​ത്തിന്‌, രാജാ​വി​ന്റെ പരിചാ​രകർ ആയുധ​മു​ണ്ടോ​യെ​ന്ന​റി​യാൻ ഏഹൂദി​നെ പരി​ശോ​ധി​ച്ചി​രു​ന്നെ​ങ്കി​ലോ? അഥവാ അങ്ങനെ ചെയ്‌തി​ല്ലെ​ങ്കിൽത്ത​ന്നെ​യും അവർ തങ്ങളുടെ രാജാ​വി​നെ ഒരു ഇസ്രാ​യേ​ല്യ​നോ​ടൊ​പ്പം തനിച്ചാ​ക്കു​മാ​യി​രു​ന്നില്ല! എന്നാൽ എഗ്ലോനെ കൊല്ല​ത്ത​ക്ക​വണ്ണം അവനെ അവർ ഒറ്റയ്‌ക്കു വിട്ടി​രു​ന്നെ​ങ്കിൽത്ത​ന്നെ​യും ഏഹൂദിന്‌ എങ്ങനെ രക്ഷപ്പെ​ടാൻ കഴിയു​മാ​യി​രു​ന്നു? സംഭവി​ച്ച​തെ​ന്താ​ണെന്ന്‌ എഗ്ലോന്റെ പരിചാ​രകർ കണ്ടെത്തു​ന്ന​തി​നു മുമ്പ്‌ ഏഹൂദിന്‌ എത്ര ദൂരം ഓടാൻ കഴിയു​മാ​യി​രു​ന്നു?

അത്തരം വിശദാം​ശ​ങ്ങ​ളെ​ക്കു​റിച്ച്‌ ഏഹൂദ്‌ കൂലങ്ക​ഷ​മാ​യി ചിന്തി​ച്ചി​രു​ന്നു​വെ​ന്ന​തി​നു യാതൊ​രു സംശയ​വു​മില്ല. ഒരുപക്ഷേ നിരവധി ദാരുണ പ്രത്യാ​ഘാ​തങ്ങൾ അവൻ മനസ്സിൽ കണക്കു​കൂ​ട്ടി​യി​രി​ക്കണം. എന്നുവ​രി​കി​ലും, ധൈര്യ​ത്തോ​ടെ​യും യഹോ​വ​യിൽ പ്രത്യാ​ശ​യർപ്പി​ച്ചു​കൊ​ണ്ടും അവൻ തന്റെ ഉദ്യമ​വു​മാ​യി മുന്നേറി.

ഏഹൂദ്‌ എഗ്ലോനെ കണ്ടുമു​ട്ടു​ന്നു

അടുത്ത കാഴ്‌ച​യർപ്പ​ണ​ത്തി​നുള്ള ദിവസ​മെത്തി. ഏഹൂദും അവന്റെ ആളുക​ളും രാജ​കൊ​ട്ടാ​ര​ത്തി​ലെത്തി. താമസി​യാ​തെ, അവർ രാജാ​വി​ന്റെ മുന്നി​ലെത്തി. എന്നാൽ ഏഹൂദിന്‌ ആക്രമി​ക്കാ​നുള്ള സമയം വന്നെത്തി​യി​ട്ടി​ല്ലാ​യി​രു​ന്നു. കാഴ്‌ച​യർപ്പി​ച്ച​ശേഷം ഏഹൂദ്‌ ചുമട്ടു​കാ​രെ അവരുടെ വഴിക്കു പറഞ്ഞയച്ചു.—ന്യായാ​ധി​പ​ന്മാർ 3:17, 18.

എഗ്ലോനെ വീഴ്‌ത്താൻ ഏഹൂദ്‌ വൈകി​യ​തെ​ന്തു​കൊ​ണ്ടാ​യി​രു​ന്നു? അവൻ ഭയന്നു​പോ​യോ? തീർച്ച​യാ​യു​മില്ല! എഗ്ലോനെ ഒറ്റയ്‌ക്കു കണ്ടാലേ ഏഹൂദി​നു തന്റെ പദ്ധതി നടപ്പാ​ക്കാൻ കഴിയു​മാ​യി​രു​ന്നു​ള്ളൂ. ആദ്യ തവണ അവനതിന്‌ അവസരം ലഭിച്ചില്ല. കൂടാതെ, ഏഹൂദി​നു പെട്ടെ​ന്നു​തന്നെ സ്ഥലം വിടണ​മാ​യി​രു​ന്നു. കാഴ്‌ച ചുമന്നു​കൊ​ണ്ടു​വന്ന മുഴു പരിചാ​ര​ക​ഗ​ണ​ത്തോ​ടു​മൊ​പ്പം രക്ഷപ്പെ​ടു​ന്ന​തി​നെ​ക്കാൾ എളുപ്പം ഒറ്റയ്‌ക്കു രക്ഷപ്പെ​ടു​ന്ന​താണ്‌. അതു​കൊണ്ട്‌ ഏഹൂദ്‌ തക്കം പാർത്തി​രു​ന്നു. എഗ്ലോ​നു​മാ​യുള്ള ഹ്രസ്വ കൂടി​ക്കാഴ്‌ച, കൊട്ടാ​ര​ത്തി​ന്റെ കിടപ്പും രാജാ​വി​ന്റെ സുരക്ഷാ​സ​ന്നാ​ഹ​ത്തി​ന്റെ വ്യാപ്‌തി​യും മനസ്സി​ലാ​ക്കാൻ അവനെ പ്രാപ്‌ത​നാ​ക്കി.

“ഗില്‌ഗാ​ലി​ന്ന​രി​കെ​യുള്ള വിഗ്ര​ഹ​ങ്ങ​ളു​ടെ” അടുക്ക​ലെ​ത്തി​യ​പ്പോൾ ഏഹൂദ്‌ തന്റെ ആളുകളെ വിട്ട്‌ എഗ്ലോന്റെ കൊട്ടാ​ര​ത്തി​ലേക്കു മടങ്ങി. ഏതാണ്ടു രണ്ടു കിലോ​മീ​റ്റർ ദൂരത്തെ നടപ്പ്‌, തന്റെ ദൗത്യ​ത്തെ​ക്കു​റി​ച്ചു ചിന്തി​ക്കാ​നും യഹോ​വ​യു​ടെ അനു​ഗ്ര​ഹ​ത്തി​നാ​യി പ്രാർഥി​ക്കാ​നും ഏഹൂദിന്‌ അവസര​മേകി.—ന്യായാ​ധി​പ​ന്മാർ 3:19.

ഏഹൂദ്‌ മടങ്ങുന്നു

ഏഹൂദി​നു കൊട്ടാ​ര​ത്തിൽ വീണ്ടും വരവേൽപ്പു ലഭിച്ചു. ഒരുപക്ഷേ, നേരത്തെ അർപ്പിച്ച ഉദാര​മായ കാഴ്‌ച എഗ്ലോനെ സന്തോ​ഷി​പ്പി​ച്ചി​രി​ക്കണം. ആദ്യ സന്ദർശനം ഹ്രസ്വ​മാ​യി​രു​ന്നെ​ങ്കി​ലും അത്‌ ഏഹൂദി​നു രാജാ​വു​മാ​യി നല്ല ബന്ധം സ്ഥാപി​ക്കാൻ വേണ്ടത്ര അവസര​മേകി. സംഗതി എന്തുത​ന്നെ​യാ​യി​രു​ന്നാ​ലും, ഏഹൂദ്‌ വീണ്ടും എഗ്ലോന്റെ അടു​ത്തെത്തി.

“രാജാവേ, എനിക്കു ഒരു സ്വകാ​ര്യം ഉണ്ടു,” ഏഹൂദ്‌ പറഞ്ഞു. ഏഹൂദിന്‌ ഇത്ര​ത്തോ​ളം എത്താൻ കഴിഞ്ഞത്‌ യഹോവ അവനെ സഹായി​ക്കു​ന്നു​വെ​ന്ന​തി​ന്റെ തെളി​വാ​യി​രു​ന്നു. എങ്കിലും, ഒരു പ്രശ്‌നം തലപൊ​ക്കി. ഏഹൂദ്‌ കൊണ്ടു​വന്ന “സ്വകാ​ര്യം” രാജാ​വി​ന്റെ പരിചാ​ര​ക​രു​ടെ കേൾക്കെ പറയാ​നാ​വി​ല്ലാ​യി​രു​ന്നു. യഹോവ ഇടപെ​ടു​മെ​ങ്കിൽ ഏഹൂദിന്‌ ആ സഹായം ഉടനടി ആവശ്യ​മാ​യി​രു​ന്നു. “ക്ഷമിക്ക,” രാജാവ്‌ മറ്റുള്ള​വ​രോ​ടു കൽപ്പിച്ചു. ആ “സ്വകാ​ര്യം” മറ്റുള്ളവർ കേൾക്കാൻ എഗ്ലോൻ ആഗ്രഹി​ച്ചില്ല. അതു​കൊണ്ട്‌ അവൻ പരിചാ​ര​കരെ പുറത്താ​ക്കി. ഏഹൂദി​നു​ണ്ടായ ആശ്വാസം ഊഹി​ച്ചു​നോ​ക്കൂ!—ന്യായാ​ധി​പ​ന്മാർ 3:19.

എഗ്ലോൻ തന്റെ മാളി​ക​യിൽ ഇരിക്കു​ക​യാ​യി​രു​ന്നു. ഏഹൂദ്‌ അവനെ സമീപി​ച്ചു പറഞ്ഞു: “എനിക്കു ദൈവ​ത്തി​ന്റെ അരുള​പ്പാ​ടു അറിയി​പ്പാൻ ഉണ്ടു.” “ദൈവം” എന്നു പറഞ്ഞ​പ്പോൾ ഏഹൂദ്‌ കെമോ​ശി​നെ​യാ​ണോ ഉദ്ദേശി​ച്ചത്‌? എഗ്ലോൻ അങ്ങനെ വിചാ​രി​ച്ചി​രി​ക്കാം. താത്‌പ​ര്യ​പൂർവം അവൻ സിംഹാ​സ​ന​ത്തിൽനിന്ന്‌ എഴു​ന്നേ​ററ്‌, പ്രതീ​ക്ഷ​യോ​ടെ നില​കൊ​ണ്ടു. ആക്രമ​ണ​ത്തെ​ക്കു​റി​ച്ചു രാജാ​വി​നു സംശയം തോന്നാ​ത്ത​വണ്ണം ജാഗ്ര​ത​യോ​ടെ ഏഹൂദ്‌ അവനെ സമീപി​ച്ചു. പിന്നീട്‌ മിന്നൽവേ​ഗ​ത്തിൽ, “ഏഹൂദ്‌ ഇടങ്കൈ നീട്ടി വലത്തെ തുടയിൽനി​ന്നു ചുരിക ഊരി [എഗ്ലോന്റെ] വയററിൽ കുത്തി​ക്ക​ടത്തി. അലകോ​ടു​കൂ​ടെ പിടി​യും അകത്തു ചെന്നു; അവന്റെ വയററിൽനി​ന്നു ചുരിക അവൻ വലി​ച്ചെ​ടു​ക്കാ​യ്‌ക​യാൽ മേദസ്സു അലകി​ന്മേൽ പൊതി​ഞ്ഞ​ടഞ്ഞു, അതു പൃഷ്‌ഠ​ഭാ​ഗത്തു പുറ​പ്പെട്ടു.”—ന്യായാ​ധി​പ​ന്മാർ 3:20-22.

രാജാ​വി​ന്റെ പരിചാ​രകർ സമീപത്തു ചുറ്റി​പ്പറ്റി നിൽപ്പു​ണ്ടാ​യി​രു​ന്നെ​ങ്കി​ലും ബഹള​മൊ​ന്നു​മു​ണ്ടാ​ക്കി​യില്ല. എങ്കിലും ഏഹൂദ്‌ അപകടാ​വ​സ്ഥ​യി​ലാ​യി​രു​ന്നു. ഏതു നിമി​ഷ​വും എഗ്ലോന്റെ പരിചാ​രകർ ഉള്ളിൽ കടന്നു രാജാ​വി​ന്റെ മൃതശ​രീ​രം കണ്ടെത്തി​യേ​ക്കാം. ഏഹൂദ്‌ ഉടനടി സ്ഥലംവി​ടേ​ണ്ടി​യി​രു​ന്നു! മാളി​ക​യു​ടെ വാതി​ലു​കൾ പൂട്ടി​യിട്ട്‌ അതിന്റെ മേൽക്കൂ​ര​യി​ലെ കാറ്റു​കു​ഴ​ലി​ലൂ​ടെ അവൻ രക്ഷപ്പെട്ടു.—ന്യായാ​ധി​പ​ന്മാർ 3:23, 24എ.

കണ്ടെത്ത​ലും പരാജ​യ​വും

എഗ്ലോന്റെ ഭൃത്യ​ന്മാർ ജിജ്ഞാ​സു​ക്ക​ളാ​കാൻ താമസ​മു​ണ്ടാ​യില്ല. എങ്കിലും രാജാ​വി​ന്റെ സ്വകാര്യ ചർച്ചയ്‌ക്കു ഭംഗം​വ​രു​ത്തി അവന്റെ അപ്രീ​തി​ക്കു പാത്ര​മാ​കാൻ അവർ ധൈര്യ​പ്പെ​ട്ടില്ല. മാളി​ക​യു​ടെ വാതിൽ പൂട്ടി​യി​രി​ക്കു​ന്നത്‌ അവർ കണ്ടു. “അവൻ ഗ്രീഷ്‌മ​ഗൃ​ഹ​ത്തിൽ വിസർജ്ജ​ന​ത്തി​ന്നു ഇരിക്ക​യാ​യി​രി​ക്കും,” അവർ പറഞ്ഞു. എന്നാൽ സമയം കടന്നു​പോ​കും​തോ​റും ജിജ്ഞാസ ഉത്‌ക​ണ്‌ഠ​യ്‌ക്കു വഴിമാ​റി. ഇനിയും കാത്തി​രി​ക്കു​ന്നതു പന്തിയ​ല്ലെന്ന്‌ എഗ്ലോന്റെ പരിചാ​ര​കർക്കു തോന്നി. “അവർ [മാളിക വാതി​ലി​ന്റെ] താക്കോൽ എടുത്തു തുറന്നു; തമ്പുരാൻ നിലത്തു​മ​രി​ച്ചു​കി​ട​ക്കു​ന്നതു കണ്ടു.”—ന്യായാ​ധി​പ​ന്മാർ 3:24ബി, 25.

ഏഹൂദ്‌ അതി​നോ​ടകം രക്ഷപ്പെ​ട്ടി​രു​ന്നു. അവൻ ഗില്‌ഗാ​ലി​ലെ ശിലാ​വി​ഗ്ര​ഹ​ങ്ങളെ കടന്ന്‌, ഒടുവിൽ എഫ്രയീം പർവത​പ്ര​ദേ​ശ​ത്തുള്ള സെയീ​ര​യിൽ എത്തി. ഏഹൂദ്‌ ഇസ്രാ​യേല്യ പുരു​ഷ​ന്മാ​രെ കൂട്ടി​വ​രു​ത്തി മോവാ​ബ്യർക്കെ​തി​രെ​യുള്ള സംഘടിത ആക്രമ​ണ​ത്തി​നു നേതൃ​ത്വ​മേകി. “അവർ . . . മോവാ​ബ്യ​രിൽ ഏകദേശം പതിനാ​യി​രം പേരെ വെട്ടി​ക്ക​ളഞ്ഞു; അവർ എല്ലാവ​രും ബലവാ​ന്മാ​രും യുദ്ധവീ​ര​ന്മാ​രും ആയിരു​ന്നു; ഒരുത്ത​നും ചാടി​പ്പോ​യില്ല” എന്നു വൃത്താന്തം പറയുന്നു. മോവാ​ബി​നെ കീഴട​ക്കി​യ​തോ​ടെ 80 വർഷ​ത്തേക്ക്‌ ഇസ്രാ​യേ​ലിൽ സ്വസ്ഥത​യു​ണ്ടാ​യി.—ന്യായാ​ധി​പ​ന്മാർ 3:26-30.

ഏഹൂദി​ന്റെ ദൃഷ്ടാ​ന്ത​ത്തിൽനി​ന്നുള്ള പാഠം

ദൈവ​വി​ശ്വാ​സം ഏഹൂദി​നു പ്രചോ​ദ​ന​മേകി. “വിശ്വാ​സ​ത്താൽ അവർ രാജ്യ​ങ്ങളെ അടക്കി . . . യുദ്ധത്തിൽ വീരന്മാ​രാ​യ്‌തീർന്നു, അന്യന്മാ​രു​ടെ സൈന്യ​ങ്ങളെ ഓടിച്ചു” എന്ന്‌ എബ്രായർ 11-ാം അധ്യായം പറയു​മ്പോൾ അവിടെ അവനെ പേരെ​ടു​ത്തു പരാമർശി​ക്കു​ന്നില്ല. (എബ്രായർ 11:33, 34) എങ്കിലും, വിശ്വാ​സ​പൂർവം പ്രവർത്തി​ക്കു​ക​യും എഗ്ലോൻ രാജാ​വി​ന്റെ ക്രൂര​ഭ​ര​ണ​ത്തിൽനിന്ന്‌ ഇസ്രാ​യേ​ല്യ​രെ മോചി​പ്പി​ക്കു​ക​യും ചെയ്‌ത​പ്പോൾ യഹോവ അവനെ പിന്തു​ണച്ചു.

ധൈര്യം; ഏഹൂദി​ന്റെ ഗുണങ്ങ​ളി​ലൊ​ന്നാ​യി​രു​ന്നു അത്‌. ഫലപ്ര​ദ​മാ​യി വാളു​പ​യോ​ഗി​ക്കു​ന്ന​തിന്‌ അവനു ധൈര്യം വേണ്ടി​യി​രു​ന്നു. ദൈവ​ത്തി​ന്റെ ആധുനിക ദാസരെന്ന നിലയിൽ നാം അത്തരം വാളെ​ടു​ക്കു​ന്നില്ല. (യെശയ്യാ​വു 2:4; മത്തായി 26:52) എങ്കിലും നാം ദൈവ​വ​ചനം എന്ന ‘ആത്മാവി​ന്റെ വാൾ’ ഉപയോ​ഗി​ക്കു​ന്നുണ്ട്‌. (എഫെസ്യർ 6:17) തന്റെ ആയുധം ഉപയോ​ഗി​ക്കു​ന്ന​തിൽ ഏഹൂദ്‌ വിദഗ്‌ധ​നാ​യി​രു​ന്നു. രാജ്യ​സു​വാർത്ത പ്രസം​ഗി​ക്കു​മ്പോൾ നാം ദൈവ​വ​ചനം ഉപയോ​ഗി​ക്കു​ന്ന​തിൽ വിദഗ്‌ധ​രാ​യി​രി​ക്കേ​ണ്ട​തുണ്ട്‌. (മത്തായി 24:14) വ്യക്തി​പ​ര​മായ ബൈബിൾ പഠനം, ക്രിസ്‌തീയ യോഗ​ങ്ങൾക്കു ക്രമമാ​യി ഹാജരാ​കൽ, ശുശ്രൂ​ഷ​യിൽ ഉത്സാഹ​പൂർവം പങ്കെടു​ക്കൽ, സ്വർഗീയ പിതാ​വിൽ പ്രാർഥ​നാ​പൂർവം ആശ്രയി​ക്കൽ എന്നിവ ശരിക്കും വിശ്വാ​സി​യും ധൈര്യ​ശാ​ലി​യു​മായ പുരു​ഷ​നാ​യി​രുന്ന ഏഹൂദ്‌ പ്രകടി​പ്പിച്ച ഗുണങ്ങൾ അനുക​രി​ക്കാൻ നമ്മെ പ്രാപ്‌ത​രാ​ക്കും.

[അടിക്കു​റി​പ്പു​കൾ]

[31-ാം പേജിലെ ചിത്രം]

ഏഹൂദും അവന്റെ ആളുക​ളും എഗ്ലോൻ രാജാ​വി​നു കാഴ്‌ച​യർപ്പി​ച്ചു

[കടപ്പാട]

പകർപ്പെടുത്തിരിക്കുന്ന ഗ്രന്ഥം: Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s