ശരിയാ​യ​തരം സന്ദേശ​വാ​ഹ​കനെ തിരി​ച്ച​റി​യി​ക്കൽ

“തന്റെ ദാസന്റെ വചനം സത്യമാ​ക്കു​ന്ന​വ​നും തന്റെ സ്വന്തം സന്ദേശ​വാ​ഹ​ക​രു​ടെ ഉപദേശം പൂർണ​മാ​യി നിവർത്തി​ക്കു​ന്ന​വ​നും . . . ഞാനാ​കു​ന്നു.”—യെശയ്യാ​വു 44:25, 26, NW.

1. യഹോവ ശരിയാ​യ​തരം സന്ദേശ​വാ​ഹ​കരെ തിരി​ച്ച​റി​യി​ക്കു​ന്ന​തെ​ങ്ങനെ, അവൻ വ്യാജ​സ​ന്ദേ​ശ​വാ​ഹ​കരെ തുറന്നു​കാ​ട്ടു​ന്ന​തെ​ങ്ങനെ?

യഹോവ തന്റെ യഥാർഥ സന്ദേശ​വാ​ഹകർ ആരെന്നു തിരി​ച്ച​റി​യി​ക്കുന്ന മഹാ​ദൈ​വ​മാണ്‌. താൻ അവരി​ലൂ​ടെ അറിയി​ക്കുന്ന സന്ദേശങ്ങൾ സത്യമാ​ക്കി​ക്കൊ​ണ്ടാണ്‌ അവൻ അവരെ തിരി​ച്ച​റി​യി​ക്കു​ന്നത്‌. യഹോവ വ്യാജ​സ​ന്ദേ​ശ​വാ​ഹകർ ആരെന്നു തുറന്നു​കാ​ട്ടുന്ന മഹാ​ദൈ​വ​വു​മാണ്‌. എങ്ങനെ​യാണ്‌ അവൻ അവരെ തുറന്നു​കാ​ട്ടു​ന്നത്‌? അവൻ അവരുടെ അടയാ​ള​ങ്ങ​ളെ​യും ഭാവി​ക​ഥ​ന​ങ്ങ​ളെ​യും നിഷ്‌ഫ​ല​മാ​ക്കു​ന്നു. അവർ സ്വയം പ്രവാ​ച​ക​ന്മാ​രാ​യി ചമയു​ക​യാ​ണെ​ന്നും വാസ്‌ത​വ​ത്തിൽ അവരുടെ വികല​മായ യുക്തി​ചി​ന്ത​യിൽ—അതേ, അവരുടെ ഭോഷ​ത്ത​വും ജഡിക​വു​മായ ചിന്തയിൽ—ഉദിച്ച സന്ദേശ​ങ്ങ​ളാണ്‌ അവയെ​ന്നും അവനങ്ങനെ പ്രകട​മാ​ക്കു​ന്നു!

2. ഇസ്രാ​യേ​ല്യ​രു​ടെ കാലത്ത്‌ സന്ദേശ​വാ​ഹ​കർക്കി​ട​യിൽ ഏത്‌ ആശയ സംഘട്ടനം നടന്നു?

² യഹോ​വ​യാം ദൈവ​ത്തി​ന്റെ സന്ദേശ​വാ​ഹ​ക​രാ​ണെന്ന്‌ അവകാ​ശ​പ്പെ​ട്ട​വ​രാ​യി​രു​ന്നു യെശയ്യാ​വും യെഹെ​സ്‌കേ​ലും. വാസ്‌ത​വ​ത്തിൽ അവരങ്ങനെ ആയിരു​ന്നു​വോ? നമുക്കു നോക്കാം. യെശയ്യാവ്‌ പൊ.യു.മു. (പൊതു​യു​ഗ​ത്തി​നു​മുമ്പ്‌) ഏതാണ്ട്‌ 778 മുതൽ 732-നുശേഷം കുറച്ചു​കാ​ലം​വരെ യെരൂ​ശ​ലേ​മിൽ പ്രവചി​ച്ചി​രു​ന്നു. യെഹെ​സ്‌കേ​ലാ​കട്ടെ പൊ.യു.മു. 617-ൽ ബാബി​ലോ​നി​ലേക്കു നാടു​ക​ട​ത്ത​പ്പെട്ടു. അവിടെ അവൻ തന്റെ യഹൂദ സഹോ​ദ​ര​ന്മാർക്കി​ട​യിൽ പ്രവചി​ച്ചു. യെരൂ​ശ​ലേം നശിപ്പി​ക്ക​പ്പെ​ടു​മെന്നു രണ്ടു പ്രവാ​ച​ക​ന്മാ​രും സധൈ​ര്യം പ്രഖ്യാ​പി​ച്ചു. മറ്റു പ്രവാ​ച​ക​ന്മാ​രാ​കട്ടെ, ഇതു സംഭവി​ക്കാൻ ദൈവം അനുവ​ദി​ക്കി​ല്ലെ​ന്നും പറഞ്ഞു. ശരിയാ​യ​ത​ര​ത്തി​ലുള്ള പ്രവാ​ച​ക​ന്മാ​രാ​ണെന്നു തെളി​ഞ്ഞത്‌ ആരായി​രു​ന്നു?

യഹോവ വ്യാജ​പ്ര​വാ​ച​ക​ന്മാ​രെ തുറന്നു​കാ​ട്ടു​ന്നു

3, 4. (എ) ബാബി​ലോ​നി​ലെ ഇസ്രാ​യേ​ല്യർക്ക്‌ ഏതു വിപരീത സന്ദേശങ്ങൾ നൽക​പ്പെട്ടു, യഹോവ ഒരു വ്യാജ​സ​ന്ദേ​ശ​വാ​ഹ​കനെ തുറന്നു​കാ​ട്ടി​യ​തെ​ങ്ങനെ? (ബി) കള്ളപ്ര​വാ​ച​ക​ന്മാർക്ക്‌ എന്തു സംഭവി​ക്കു​മെ​ന്നാണ്‌ യഹോവ പറഞ്ഞത്‌?

³ യെരൂ​ശ​ലേം ആലയത്തി​നു​ള്ളിൽ സംഭവി​ക്കു​ന്ന​തി​നെ​ക്കു​റി​ച്ചെ​ല്ലാം യെഹെ​സ്‌കേ​ലി​നു ബാബി​ലോ​നിൽവെച്ച്‌ ഒരു ദർശനം ലഭിച്ചു. അതിന്റെ കിഴക്കേ കവാട​ത്തി​ങ്കൽ 25 പുരു​ഷ​ന്മാർ. അവർക്കി​ട​യിൽ രണ്ടു പ്രഭു​ക്ക​ന്മാർ. യയസന്യാ​വും പെലത്യാ​വും. യഹോവ അവരെ എങ്ങനെ​യാ​ണു വീക്ഷി​ച്ചത്‌? യെഹെ​സ്‌കേൽ 11:2, 3 [NW] ഉത്തരം നൽകുന്നു: “മനുഷ്യ​പു​ത്രാ, ഇവർ ഈ നഗരത്തി​നെ​തി​രെ ദോഷം നിരൂ​പി​ച്ചു ദുരാ​ലോ​ചന കഴിക്കുന്ന പുരു​ഷ​ന്മാ​രാ​കു​ന്നു. ‘വീടു​കളെ പണിവാൻ സമയം അടുത്തി​ട്ടി​ല്ലേ?’ എന്ന്‌ അവർ പറയുന്നു.” ധിക്കാ​രി​ക​ളായ ഈ സമാധാന സന്ദേശ​വാ​ഹകർ പറഞ്ഞത്‌ ഇതാണ്‌, ‘യെരൂ​ശ​ലേ​മിന്‌ യാതൊ​രു കുഴപ്പ​വും സംഭവി​ക്കാൻ പോകു​ന്നില്ല. വാസ്‌ത​വ​ത്തിൽ അവിടെ നാം കൂടുതൽ വീടുകൾ പണിയാൻ പോകു​ക​യാണ്‌!’ അതു​കൊണ്ട്‌ നുണപ​റ​യുന്ന ഈ പ്രവാ​ച​ക​ന്മാർക്കെ​തി​രെ എതിർപ്ര​വ​ചനം നടത്താൻ ദൈവം യെഹെ​സ്‌കേ​ലി​നോട്‌ ആവശ്യ​പ്പെട്ടു. 11-ാം അധ്യാ​യ​ത്തി​ന്റെ 13-ാം വാക്യ​ത്തിൽ, അവരി​ലൊ​രാൾക്ക്‌ എന്തു സംഭവി​ച്ചു​വെന്നു യെഹെ​സ്‌കേൽ നമ്മോടു പറയുന്നു: “ഞാൻ പ്രവചി​ച്ചു​കൊ​ണ്ടി​രി​ക്കു​മ്പോൾ തന്നേ ബെനാ​യാ​വി​ന്റെ മകനായ പെലത്യാ​വു മരിച്ചു.” ഇതു സംഭവി​ച്ചതു പെലത്യാവ്‌ ഏറ്റവും പ്രാമു​ഖ്യ​ത​യും സ്വാധീ​ന​വു​മുള്ള പ്രഭു​വും ഒന്നാം​കിട വിഗ്ര​ഹാ​രാ​ധ​ക​നും ആയിരു​ന്ന​തു​കൊ​ണ്ടാ​കാം. പെട്ടെ​ന്നുള്ള മരണം അവൻ കള്ളപ്ര​വാ​ച​ക​നാ​യി​രു​ന്നു​വെ​ന്ന​തി​നുള്ള തെളി​വാ​യി!

⁴ യഹോവ പെലത്യാ​വി​നെ വധിച്ചി​ട്ടും മറ്റു കള്ളപ്ര​വാ​ച​ക​ന്മാർ ദൈവ​ത്തി​ന്റെ നാമത്തിൽ വ്യാജം പറയു​ന്നതു നിർത്തി​യില്ല. ഈ വഞ്ചകർ ദൈവ​ഹി​ത​ത്തി​നെ​തി​രെ പ്രവചി​ക്കുന്ന ഭ്രാന്തൻഗതി തുടർന്നു. അതു​കൊണ്ട്‌ യഹോ​വ​യാം ദൈവം യെഹെ​സ്‌കേ​ലി​നോ​ടു പറഞ്ഞു: “സ്വന്തമ​ന​സ്സി​നെ​യും കണ്ടിട്ടി​ല്ലാത്ത കാര്യ​ങ്ങ​ളെ​യും പിന്തു​ട​രുന്ന ബുദ്ധി​കെട്ട പ്രവാ​ച​ക​ന്മാർക്കു അയ്യോ കഷ്ടം!” പെലത്യാ​വി​നെ​പ്പോ​ലെ, “സമാധാ​ന​മി​ല്ലാ​തി​രി​ക്കെ” യെരൂ​ശ​ലേ​മി​നു ധിക്കാ​ര​പൂർവം “സമാധാ​ന​ദർശ​ന​ങ്ങളെ ദർശി​ക്കുന്ന”വർ ‘ഇല്ലാ’താകും.—യെഹെ​സ്‌കേൽ 13:3, 15, 16.

5, 6. സകല വ്യാജ​സ​ന്ദേ​ശ​വാ​ഹ​ക​രിൽ നിന്നും വ്യത്യ​സ്‌ത​നാ​യി യെശയ്യാവ്‌ യഥാർഥ പ്രവാ​ച​ക​നാ​ണെന്നു തെളി​ഞ്ഞ​തെ​ങ്ങനെ?

⁵ യെശയ്യാ​വി​ന്റെ കാര്യ​ത്തി​ലാ​ണെ​ങ്കിൽ, യെരൂ​ശ​ലേ​മി​നെ​ക്കു​റി​ച്ചുള്ള അവന്റെ എല്ലാ ദിവ്യ​സ​ന്ദേ​ശ​ങ്ങ​ളും സത്യമാ​യി​ത്തീർന്നു. പൊ.യു.മു. 607-ലെ വേനൽക്കാ​ലത്ത്‌, ബാബി​ലോ​ന്യർ നഗരം നശിപ്പിച്ച്‌ യഹൂദ​ശേ​ഷി​പ്പി​നെ ബാബി​ലോ​നി​ലേക്കു തടവു​കാ​രാ​യി പിടി​ച്ചു​കൊ​ണ്ടു​പോ​യി. (2 ദിനവൃ​ത്താ​ന്തം 36:15-21; യെഹെ​സ്‌കേൽ 22:28; ദാനീ​യേൽ 9:2) ഈ ദുരന്തങ്ങൾ നിമിത്തം കള്ളപ്ര​വാ​ച​ക​ന്മാർ ദൈവ​ജ​ന​ത്തോട്‌ പൊട്ട​ച്ചൊ​ല്ലു​കൾ ചൊരി​യു​ന്നതു നിർത്തി​യോ? ഇല്ല, നുണപ​റ​യുന്ന ആ സന്ദേശ​വാ​ഹകർ അതു തുടർന്ന​തേ​യു​ള്ളൂ!

⁶ ഇതും​പോ​രാഞ്ഞ്‌, ഇസ്രാ​യേല്യ പ്രവാ​സി​കൾക്കു ബാബി​ലോ​ന്റെ പൊങ്ങ​ച്ച​ക്കാ​രായ ഭാഗ്യം​പ​റ​ച്ചി​ലു​കാ​രു​ടെ​യും പ്രശ്‌ന​ക്കാ​രു​ടെ​യും ജ്യോ​തി​ഷ​ക്കാ​രു​ടെ​യും സ്വാധീ​ന​വ​ല​യ​ത്തി​ലാ​കാ​നുള്ള സാഹച​ര്യ​വു​മു​ണ്ടാ​യി​രു​ന്നു. എന്നിരു​ന്നാ​ലും, യഹോവ തിരി​ച്ച​ടി​ന​ടത്തി ഈ സകല വ്യാജ​സ​ന്ദേ​ശ​വാ​ഹ​ക​രും പരാജി​ത​രായ ഭോഷ​ന്മാ​രാ​ണെന്നു തെളി​യി​ച്ചു. എന്നാൽ തക്കസമ​യത്ത്‌ യെശയ്യാ​വി​നെ​പ്പോ​ലെ യെഹെ​സ്‌കേ​ലും തന്റെ യഥാർഥ സന്ദേശ​വാ​ഹ​ക​നാ​ണെന്ന്‌ അവൻ പ്രകട​മാ​ക്കി. അവരി​ലൂ​ടെ അരുളി​ച്ചെയ്‌ത തന്റെ എല്ലാ വചനങ്ങ​ളും വാഗ്‌ദാ​നം ചെയ്‌തി​രു​ന്ന​തു​പോ​ലെ​തന്നെ യഹോവ നിവർത്തി​ച്ചു: “ഞാൻ ജല്‌പ​ക​ന്മാ​രു​ടെ ശകുന​ങ്ങളെ വ്യർത്ഥ​മാ​ക്കു​ക​യും പ്രശ്‌ന​ക്കാ​രെ ഭ്രാന്ത​ന്മാ​രാ​ക്കു​ക​യും ജ്ഞാനി​കളെ മടക്കി അവരുടെ ജ്ഞാനത്തെ ഭോഷ​ത്വ​മാ​ക്കു​ക​യും ചെയ്യുന്നു. ഞാൻ എന്റെ ദാസന്റെ വചനം നിവർത്തി​ച്ചു എന്റെ ദൂതന്മാ​രു​ടെ ആലോചന അനുഷ്‌ഠി​ക്കു​ന്നു [“സന്ദേശ​വാ​ഹ​ക​രു​ടെ ഉപദേശം പൂർണ​മാ​യി നിവർത്തി​ക്കു​ന്നു,” NW].”—യെശയ്യാ​വു 44:25, 26.

ബാബി​ലോ​നെ​യും യെരൂ​ശ​ലേ​മി​നെ​യും കുറിച്ച്‌ അമ്പരപ്പി​ക്കുന്ന സന്ദേശങ്ങൾ

7, 8. ബാബി​ലോ​നു​വേണ്ടി യെശയ്യാ​വിന്‌ എന്തു നിശ്വസ്‌ത സന്ദേശ​മു​ണ്ടാ​യി​രു​ന്നു, അവന്റെ വാക്കുകൾ എന്തർഥ​മാ​ക്കി?

⁷ യഹൂദ​യും യെരൂ​ശ​ലേ​മും 70 വർഷ​ത്തേക്കു മനുഷ്യ​വാ​സ​മി​ല്ലാ​തെ ശൂന്യ​മാ​ക്ക​പ്പെ​ടാൻ പോകു​ക​യാ​യി​രു​ന്നു. എന്നിരു​ന്നാ​ലും, താൻ മുൻകൂ​ട്ടി​പ്പ​റ​ഞ്ഞി​രി​ക്കുന്ന കൃത്യ​സ​മ​യ​ത്തു​തന്നെ നഗരം പുനർനിർമി​ത​മാ​കു​മെ​ന്നും പ്രദേ​ശത്ത്‌ ആൾപ്പാർപ്പു​ണ്ടാ​കു​മെ​ന്നും യെശയ്യാ​വി​ലൂ​ടെ​യും യെഹെ​സ്‌കേ​ലി​ലൂ​ടെ​യും യഹോവ പ്രഖ്യാ​പി​ച്ചു! ഇതു വിസ്‌മ​യാ​വ​ഹ​മായ ഒരു പ്രവച​ന​മാ​യി​രു​ന്നു. എന്തു​കൊണ്ട്‌? എന്തെന്നാൽ തടവു​കാ​രെ സ്വത​ന്ത്ര​രാ​ക്കുന്ന ഒരു പതിവ്‌ ബാബി​ലോന്‌ ഇല്ലായി​രു​ന്നു. (യെശയ്യാ​വു 14:4, 15-17) അതു​കൊണ്ട്‌ ഈ തടവു​കാ​രെ ആർ മോചി​പ്പി​ക്കും? കൂറ്റൻ മതിലു​ക​ളും നദി-പ്രതി​രോധ സംവി​ധാ​ന​വു​മുള്ള പ്രബല ശക്തിയായ ബാബി​ലോ​നെ ആർ തോൽപ്പി​ക്കും? സർവശ​ക്ത​നായ യഹോ​വ​യ്‌ക്കു സാധി​ക്കു​മാ​യി​രു​ന്നു! താനത്‌ ചെയ്യു​മെന്ന്‌ അവൻ പറഞ്ഞു: “ഞാൻ ആഴി​യോ​ടു [അതായത്‌ നഗരത്തി​ന്റെ ജലപ്ര​തി​രോ​ധ​ത്തോട്‌] ഉണങ്ങി​പ്പോക; നിന്റെ നദികളെ ഞാൻ വറ്റിച്ചു​ക​ള​യും എന്നു കല്‌പി​ക്കു​ന്നു. കോ​രെശ്‌ എന്റെ ഇടയൻ അവൻ എന്റെ ഹിത​മൊ​ക്കെ​യും നിവർത്തി​ക്കും എന്നും യെരൂ​ശ​ലേം പണിയ​പ്പെ​ടും, മന്ദിര​ത്തി​നു അടിസ്ഥാ​നം ഇടും എന്നും ഞാൻ കല്‌പി​ക്കു​ന്നു.”—യെശയ്യാ​വു 44:25, 27, 28.

⁸ അതേക്കു​റി​ച്ചൊ​ന്നു ചിന്തി​ച്ചു​നോ​ക്കുക! മനുഷ്യ​നു ശരിക്കും ദുർഗമ പ്രതി​ബ​ന്ധ​മാ​യി​രുന്ന യൂഫ്ര​ട്ടീസ്‌ നദി. പക്ഷേ യഹോ​വ​യ്‌ക്ക്‌ അതു ചുട്ടു​പ​ഴുത്ത പ്രതല​ത്തി​ലെ ഒരു നീർത്തു​ള്ളി പോ​ലെ​യാ​യി​രു​ന്നു. പെട്ടെന്ന്‌ അതിലെ വെള്ളം ആവിയാ​കും! ബാബി​ലോൻ വീഴും. പേർഷ്യ​ക്കാ​ര​നായ കോ​രെ​ശി​ന്റെ ജനനത്തി​നു 150 വർഷം മുമ്പാ​യി​രു​ന്നെ​ങ്കി​ലും, ഈ രാജാവ്‌ ബാബി​ലോ​നെ പിടി​ച്ച​ടക്കി യഹൂദ തടവു​കാ​രെ മോചി​പ്പി​ക്കു​ക​യും യെരൂ​ശ​ലേ​മും അതിന്റെ ആലയവും പുനർനിർമി​ക്കു​ന്ന​തി​നാ​യി മടങ്ങി​പ്പോ​കാൻ അവരെ അനുവ​ദി​ക്കു​ക​യും ചെയ്യു​മെന്ന്‌ യഹോവ യെശയ്യാ​വി​നെ​ക്കൊണ്ട്‌ മുൻകൂ​ട്ടി​പ്പ​റ​യി​ച്ചി​രു​ന്നു.

9. ബാബി​ലോ​നെ ശിക്ഷി​ക്കു​ന്ന​തി​നുള്ള അധികൃ​ത​നാ​യി യഹോവ ആരുടെ പേർ ചൂണ്ടി​ക്കാ​ട്ടി?

⁹ യെശയ്യാ​വു 45:1-3-ൽ നാം ഈ പ്രവചനം കാണുന്നു: “യഹോവ തന്റെ അഭിഷി​ക്ത​നായ കോ​രെ​ശി​നോ​ടു ഇപ്രകാ​രം അരുളി​ച്ചെ​യ്യു​ന്നു—അവന്നു ജാതി​കളെ കീഴടക്കി . . . കതകുകൾ അവന്നു തുറന്നി​രി​ക്കേ​ണ്ട​തി​ന്നും വാതി​ലു​കൾ അടയാ​തി​രി​ക്കേ​ണ്ട​തി​ന്നും ഞാൻ അവന്റെ വലങ്കൈ പിടി​ച്ചി​രി​ക്കു​ന്നു—: ഞാൻ നിനക്കു മുമ്പായി ചെന്നു ദുർഘ​ട​ങ്ങളെ നിരപ്പാ​ക്കു​ക​യും താമ്ര​വാ​തി​ലു​കളെ തകർത്തു ഇരി​മ്പോ​ടാ​മ്പ​ലു​കളെ ഖണ്ഡിച്ചു​ക​ള​ക​യും ചെയ്യും. നിന്നെ പേർ ചൊല്ലി വിളി​ക്കുന്ന ഞാൻ യഹോവ, യിസ്രാ​യേ​ലി​ന്റെ ദൈവം തന്നേ എന്നു നീ അറി​യേ​ണ്ട​തി​ന്നു ഞാൻ നിനക്കു ഇരുട്ടി​ലെ നിക്ഷേ​പ​ങ്ങ​ളെ​യും മറവി​ട​ങ്ങ​ളി​ലെ ഗുപ്‌ത​നി​ധി​ക​ളെ​യും” തരും.

10. ഏതു വിധത്തി​ലാണ്‌ കോ​രെശ്‌ “അഭിഷി​ക്തനാ”യിരു​ന്നത്‌, അവന്റെ ജനനത്തി​നു നൂറി​ല​ധി​കം വർഷം​മുമ്പ്‌ യഹോ​വ​യ്‌ക്ക്‌ അവനോ​ടു സംസാ​രി​ക്കാൻ കഴിഞ്ഞ​തെ​ങ്ങനെ?

¹⁰ ജീവി​ച്ചി​രി​ക്കുന്ന ഒരു വ്യക്തി​യോ​ടെ​ന്ന​പോ​ലെ​യാണ്‌ യഹോവ കോ​രെ​ശി​നോ​ടു സംസാ​രി​ക്കു​ന്നത്‌ എന്ന കാര്യം ശ്രദ്ധി​ക്കുക. ഇതു യഹോവ “ഇല്ലാത്ത​തി​നെ ഉള്ളതി​നെ​പ്പോ​ലെ വിളിക്കു”ന്നു എന്ന പൗലൊ​സി​ന്റെ പ്രസ്‌താ​വ​ന​യു​മാ​യി യോജി​ക്കു​ന്നു. (റോമർ 4:17) കൂടാതെ, ദൈവം കോ​രെ​ശി​നെ “അഭിഷി​ക്ത​നായ” ഒരുവ​നാ​യി തിരി​ച്ച​റി​യി​ക്കു​ന്നു. അവൻ അതു ചെയ്‌ത​തെ​ന്തു​കൊണ്ട്‌? എന്തൊ​ക്കെ​യാ​യാ​ലും, യഹോ​വ​യു​ടെ മഹാപു​രോ​ഹി​തൻ കോ​രെ​ശി​ന്റെ ശിരസ്സിൽ ഒരിക്ക​ലും അഭി​ഷേ​ക​തൈലം ഒഴിച്ചി​ല്ല​ല്ലോ. ശരിയാണ്‌, എങ്കിലും ഇതൊരു പ്രാവ​ച​നിക അഭി​ഷേ​ക​മാണ്‌. ഒരു പ്രത്യേക പദവി​യിൽ അവരോ​ധി​ക്കു​ന്ന​തി​നെ​യാണ്‌ അതു സൂചി​പ്പി​ക്കു​ന്നത്‌. അതു​കൊണ്ട്‌ താൻ കോ​രെ​ശി​നെ മുന്നമേ നിയമി​ച്ച​തി​നെ അഭി​ഷേ​ക​മെന്നു പറയാൻ ദൈവ​ത്തി​നു കഴിഞ്ഞു.—1 രാജാ​ക്ക​ന്മാർ 19:15-17-ഉം 2 രാജാ​ക്ക​ന്മാർ 8:13-ഉം താരത​മ്യം ചെയ്യുക.

തന്റെ സന്ദേശ​വാ​ഹ​ക​രു​ടെ വാക്കുകൾ ദൈവം നിറ​വേ​റ്റു​ന്നു

11. ബാബി​ലോ​നി​ലെ നിവാ​സി​കൾക്കു സുരക്ഷി​ത​ത്വം തോന്നി​യത്‌ എന്തു​കൊണ്ട്‌?

¹¹ തങ്ങൾ വളരെ സുരക്ഷി​ത​രും നിർഭ​യ​രു​മാ​ണെന്നു ബാബി​ലോ​ന്റെ പൗരന്മാർ വിചാ​രി​ച്ചി​രുന്ന സമയത്താ​യി​രു​ന്നു കോ​രെശ്‌ ബാബി​ലോ​നെ​തി​രെ നീങ്ങി​യത്‌. യൂഫ്ര​ട്ടീസ്‌ നദിനി​മി​ത്തം അവരുടെ നഗരത്തി​നു ചുറ്റും നല്ല ആഴത്തി​ലും പരപ്പി​ലും വെള്ളമുള്ള പ്രതി​രോധ കിടങ്ങു​ക​ളു​ണ്ടാ​യി​രു​ന്നു. നഗരത്തി​ലൂ​ടെ നദി ഒഴുകിയ സ്ഥലങ്ങളിൽ നദിയു​ടെ കിഴക്കേ തീരത്ത്‌ കപ്പൽ അടുക്കു​ന്ന​തി​നുള്ള സൗകര്യ​മു​ണ്ടാ​യി​രു​ന്നു. അതിനെ നഗരത്തിൽനി​ന്നു വേർതി​രി​ക്കു​ന്ന​തിന്‌, നെബൂ​ഖ​ദ്‌നേസർ “ഒരു വൻമതിൽ” നിർമി​ച്ചി​രു​ന്നു. “മലയോ​ളം ഉയരത്തിൽ പണിതി​രി​ക്കുന്ന ഇതിനെ . . . മലയെ​പ്പോ​ലെ നീക്കാ​നാ​വാത്ത വൻമതിൽ” എന്ന്‌ അവൻ വിളി​ച്ചി​രു​ന്നു.a ഈ മതിലി​നു കൂറ്റൻ താമ്ര​വാ​തി​ലു​കൾ ഘടിപ്പിച്ച കവാട​ങ്ങ​ളു​ണ്ടാ​യി​രു​ന്നു. ഒരാൾക്ക്‌ അതിൽ പ്രവേ​ശി​ക്കാൻ, നദീത​ട​ത്തിൽനി​ന്നുള്ള ചരിവി​ലൂ​ടെ മുകളി​ലേക്കു കയറണം. ബാബി​ലോ​നി​ലെ തടവു​കാർക്കു സ്വത​ന്ത്ര​രാ​ക്ക​പ്പെ​ടു​മെന്ന പ്രതീ​ക്ഷ​യ്‌ക്കു വകയി​ല്ലാ​തി​രു​ന്ന​തിൽ അതിശ​യി​ക്കാ​നില്ല!

12, 13. കോ​രെശ്‌ ബാബി​ലോ​നെ പിടി​ച്ച​ട​ക്കി​യ​പ്പോൾ, സന്ദേശ​വാ​ഹ​ക​നായ യെശയ്യാ​വി​ലൂ​ടെ യഹോവ നൽകിയ വചനങ്ങൾ സത്യമാ​യി​ത്തീർന്ന​തെ​ങ്ങനെ?

¹² എന്നാൽ യഹോ​വ​യിൽ വിശ്വാ​സ​മു​ണ്ടാ​യി​രുന്ന യഹൂദ തടവു​കാർ അങ്ങനെ വിചാ​രി​ച്ചില്ല! അവർക്കു ശോഭ​ന​മായ ഒരു പ്രത്യാ​ശ​യു​ണ്ടാ​യി​രു​ന്നു. തന്റെ പ്രവാ​ച​ക​ന്മാ​രി​ലൂ​ടെ ദൈവം അവരെ മോചി​പ്പി​ക്കു​മെന്നു പ്രവചി​ച്ചി​രു​ന്നു. ദൈവം ഈ വാഗ്‌ദാ​നം എങ്ങനെ നിവർത്തി​ച്ചു? ബാബി​ലോ​നു വടക്ക്‌ കുറെ കിലോ​മീ​റ്റ​റു​കൾ അകലെ​യുള്ള ഒരു സ്ഥലത്തു​വെച്ച്‌ യൂഫ്ര​ട്ടീസ്‌ നദിയു​ടെ വെള്ളം തിരി​ച്ചു​വി​ടാൻ കോ​രെശ്‌ സൈന്യ​ത്തോ​ടു കൽപ്പിച്ചു. അങ്ങനെ, നഗരത്തി​ന്റെ പ്രധാന പ്രതി​രോ​ധ​മാ​യി​രു​ന്നത്‌ ഇപ്പോൾ താരത​മ്യേന ഉണങ്ങിയ ഒരു നദീത​ട​മാ​യി. ആ നിർണാ​യക രാത്രി​യിൽ, ബാബി​ലോ​നി​ലെ കുടി​ച്ചു​കൂ​ത്താ​ട്ട​ക്കാർ യൂഫ്ര​ട്ടീ​സി​നോ​ടു ചേർന്നുള്ള നദീമു​ഖത്തെ ഇരട്ടപ്പാ​ളി വാതി​ലു​കൾ അശ്രദ്ധ​മാ​യി തുറന്നി​ട്ടി​രു​ന്നു. യഹോവ അക്ഷരാർഥ​ത്തിൽ താമ്ര​വാ​തി​ലു​കൾ തകർത്തു തിരി​പ്പ​ണ​മാ​ക്കി​യില്ല; അവയെ അടച്ചി​രുന്ന ഇരി​മ്പോ​ടാ​മ്പ​ലു​കളെ ഖണ്ഡിച്ചു​മില്ല. എന്നാൽ അവ തുറന്നി​രി​ക്കാ​നും ഓടാ​മ്പ​ലു​കൾ പൂട്ടി​വെ​ക്കാ​തി​രി​ക്കാ​നും തക്കവണ്ണം അവൻ സംഗതി​കൾ അത്ഭുത​ക​ര​മാ​യി ഇണക്കി​യത്‌ അതേ ഫലംതന്നെ ഉളവാക്കി. ബാബി​ലോ​ന്റെ മതിലു​കൾ ഉപയോ​ഗ​പ്ര​ദ​മാ​യില്ല. ഉള്ളിൽ പ്രവേ​ശി​ക്കാൻ കോ​രെ​ശി​ന്റെ സൈന്യ​ത്തി​നു മതിലു കയറേ​ണ്ടി​വ​ന്നില്ല. യഹോവ മുമ്പേ പോയി “ദുർഘ​ട​ങ്ങളെ”യെല്ലാം നീക്കി. അതേ, എല്ലാ പ്രതി​ബ​ന്ധ​ങ്ങ​ളെ​യും. യെശയ്യാവ്‌ ദൈവ​ത്തി​ന്റെ യഥാർഥ സന്ദേശ​വാ​ഹ​ക​നാ​ണെന്നു തെളിഞ്ഞു.

¹³ നഗരം കോ​രെ​ശി​ന്റെ പൂർണ നിയ​ന്ത്ര​ണ​ത്തി​ലാ​യ​തോ​ടെ ഇരുട്ടി​ലെ നിക്ഷേ​പ​ങ്ങ​ളും മറവി​ട​ങ്ങ​ളി​ലെ ഗുപ്‌ത​നി​ധി​ക​ളു​മുൾപ്പെടെ അതിലെ നിധി​ക​ളെ​ല്ലാം അവന്റെ കൈക​ളി​ലാ​യി. യഹോ​വ​യാം ദൈവം കോ​രെ​ശിന്‌ ഇതു ചെയ്‌തു​കൊ​ടു​ത്തത്‌ എന്തു​കൊണ്ട്‌? ‘തന്നെ പേർ ചൊല്ലി വിളി​ക്കുന്ന’വനായ യഹോവ സത്യമായ പ്രവച​നങ്ങൾ നടത്തുന്ന ദൈവ​മാ​ണെ​ന്നും അഖിലാ​ണ്ഡ​ത്തി​ന്റെ പരമാ​ധീശ കർത്താ​വാ​ണെ​ന്നും അവൻ അറിയു​ന്ന​തി​നു​വേ​ണ്ടി​യാ​യി​രു​ന്നു. തന്റെ ജനമായ ഇസ്രാ​യേ​ലി​നെ മോചി​പ്പി​ക്കു​ന്ന​തി​നാ​യി തന്നെ അധികാ​ര​ത്തി​ലെ​ത്തി​ച്ചത്‌ ദൈവ​മാ​ണെന്ന്‌ അവൻ അറിയ​ണ​മാ​യി​രു​ന്നു.

14, 15. കോ​രെശ്‌ ബാബി​ലോ​നെ കീഴട​ക്കി​യ​തി​ന്റെ മഹത്ത്വം യഹോ​വ​യ്‌ക്കു​ള്ള​താ​ണെന്നു നമു​ക്കെ​ങ്ങനെ അറിയാം?

¹⁴ കോ​രെ​ശി​നോ​ടുള്ള യഹോ​വ​യു​ടെ വാക്കുകൾ ശ്രദ്ധി​ക്കുക: “എന്റെ ദാസനായ യാക്കോ​ബ്‌നി​മി​ത്ത​വും എന്റെ വൃതനായ യിസ്രാ​യേൽനി​മി​ത്ത​വും ഞാൻ നിന്നെ പേർ ചൊല്ലി വിളി​ച്ചി​രി​ക്കു​ന്നു; നീ എന്നെ അറിയാ​തെ ഇരിക്കെ ഞാൻ നിന്നെ ഓമന​പ്പേർ ചൊല്ലി വിളി​ച്ചി​രി​ക്കു​ന്നു. ഞാൻ യഹോ​വ​യാ​കു​ന്നു; മറെറാ​രു​ത്ത​നു​മില്ല; ഞാനല്ലാ​തെ ഒരു ദൈവ​വു​മില്ല; നീ എന്നെ അറിയാ​തെ​യി​രി​ക്കെ ഞാൻ നിന്റെ അര മുറു​ക്കി​യി​രി​ക്കു​ന്നു. സൂര്യോ​ദ​യ​ത്തി​ങ്ക​ലും അസ്‌ത​മാ​ന​ത്തി​ങ്ക​ലും ഉള്ളവർ ഞാനല്ലാ​തെ മറെറാ​രു​ത്ത​നും ഇല്ല എന്നറി​യേ​ണ്ട​തി​ന്നു തന്നേ; ഞാൻ യഹോ​വ​യാ​കു​ന്നു; മറെറാ​രു​ത്ത​നും ഇല്ല. ഞാൻ പ്രകാ​ശത്തെ നിർമ്മി​ക്കു​ന്നു, അന്ധകാ​ര​ത്തെ​യും സൃഷ്ടി​ക്കു​ന്നു; ഞാൻ [തന്റെ പ്രവാ​സി​ക​ളായ ജനത്തിന്‌] നന്മയെ [“സമാധാ​നം,” NW] ഉണ്ടാക്കു​ന്നു, [ബാബി​ലോന്‌] തിന്മ​യെ​യും സൃഷ്ടി​ക്കു​ന്നു യഹോ​വ​യായ ഞാൻ ഇതൊ​ക്കെ​യും ചെയ്യുന്നു.”—യെശയ്യാ​വു 45:4-7.

¹⁵ കോ​രെശ്‌ ബാബി​ലോൻ പിടി​ച്ച​ട​ക്കി​യ​തി​ന്റെ മഹത്ത്വം യഹോ​വ​യ്‌ക്കു​ള്ള​താണ്‌, ആ ദുഷ്ട നഗരത്തി​നെ​തി​രെ തന്റെ ഹിതം നിവർത്തി​ക്കു​ന്ന​തി​നും തടവു​കാ​രായ തന്റെ ജനത്തെ മോചി​പ്പി​ക്കു​ന്ന​തി​നും അവനെ ശക്തീക​രി​ച്ചത്‌ യഹോ​വ​യാ​യി​രു​ന്നു. അതു ചെയ്യു​ന്ന​തി​നാ​യി, ദൈവം ആകാശ​ത്തോട്‌ നീതി​നി​ഷ്‌ഠ​മായ സ്വാധീ​ന​ങ്ങളെ അഥവാ സേനകളെ അയയ്‌ക്കാൻ ആജ്ഞാപി​ച്ചു. അവൻ ഭൂമി​യോട്‌ നീതി​നി​ഷ്‌ഠ​മായ സംഭവങ്ങൾ ഉളവാക്കി പ്രവാ​സി​ക​ളായ തന്റെ ജനത്തെ രക്ഷിക്കാൻ ആജ്ഞാപി​ച്ചു. അവന്റെ പ്രതീ​കാ​ത്മക ആകാശ​വും ഭൂമി​യും ഈ കൽപ്പന​യോ​ടു പ്രതി​ക​രി​ച്ചു. (യെശയ്യാ​വു 45:8) യെശയ്യാവ്‌ മരണമ​ടഞ്ഞ്‌ നൂറി​ല​ധി​കം വർഷത്തി​നു​ശേഷം, അവൻ യഹോ​വ​യു​ടെ യഥാർഥ പ്രവാ​ച​ക​നാ​യി​രു​ന്നു​വെന്നു തെളിഞ്ഞു!

സീയോ​നു സന്ദേശ​വാ​ഹ​കന്റെ സുവാർത്ത!

16. ബാബി​ലോൻ പരാജ​യ​ത്തി​ല​മർന്ന​പ്പോൾ, ശൂന്യ​മാ​ക്ക​പ്പെട്ട യെരൂ​ശ​ലേം നഗരത്തിൽ എന്തു സുവാർത്ത പ്രഘോ​ഷി​ക്കാ​മാ​യി​രു​ന്നു?

¹⁶ അതു മാത്രമല്ല, യെരൂ​ശ​ലേ​മിന്‌ ഒരു സുവാർത്ത​യു​മു​ണ്ടാ​യി​രു​ന്നു. അതി​നെ​ക്കു​റിച്ച്‌ യെശയ്യാ​വു 52:7 പറയുന്നു: “സമാധാ​നത്തെ ഘോഷി​ച്ചു നന്മയെ സുവി​ശേ​ഷി​ക്ക​യും രക്ഷയെ പ്രസി​ദ്ധ​മാ​ക്കു​ക​യും സീയോ​നോ​ടു: നിന്റെ ദൈവം വാഴുന്നു എന്നു പറകയും ചെയ്യുന്ന സുവാർത്താ​ദൂ​തന്റെ കാൽ പർവ്വത​ങ്ങ​ളി​ന്മേൽ എത്ര മനോ​ഹരം!” പർവത​ങ്ങ​ളിൽനിന്ന്‌ ഒരു സന്ദേശ​വാ​ഹകൻ യെരൂ​ശ​ലേ​മി​നെ സമീപി​ക്കു​ന്നതു കാണു​ന്നത്‌ എത്ര പുളക​പ്ര​ദ​മാണ്‌. അതൊന്നു വിഭാവന ചെയ്‌തു​നോ​ക്കൂ! അയാളു​ടെ കൈവശം ഒരു വാർത്ത ഉണ്ടായി​രി​ക്കണം. എന്താണത്‌? സീയോന്‌ ആനന്ദക​ര​മായ വാർത്ത​യാ​ണത്‌. സമാധാ​ന​ത്തെ​ക്കു​റി​ച്ചുള്ള വാർത്ത, അതേ, ദൈവ​ത്തി​ന്റെ സന്മനസ്സി​നെ​ക്കു​റി​ച്ചുള്ള വാർത്ത. യെരൂ​ശ​ലേ​മും അവിടത്തെ ആലയവും പുനർനിർമി​ക്ക​പ്പെ​ടും! വിജയ​ശ്രീ​ലാ​ളിത ആവേശ​ത്തോ​ടെ ആ സന്ദേശ​വാ​ഹകൻ ഉദ്‌ഘോ​ഷി​ക്കു​ന്നു: “നിന്റെ ദൈവം വാഴുന്നു!”

17, 18. ബാബി​ലോ​ന്റെ​മേ​ലുള്ള കോ​രെ​ശി​ന്റെ ജയിച്ച​ട​ക്ക​ലി​നു യഹോ​വ​യു​ടെ നാമത്തി​ന്മേൽ എന്തു സ്വാധീ​ന​മു​ണ്ടാ​യി​രു​ന്നു?

¹⁷ യഹോവ ദാവീ​ദി​ന്റെ രാജവം​ശ​ത്തി​ലെ രാജാ​ക്ക​ന്മാർ ഇരുന്ന പ്രതീ​കാ​ത്മക സിംഹാ​സ​നത്തെ മറിച്ചി​ടാൻ ബാബി​ലോ​നെ അനുവ​ദി​ച്ച​പ്പോൾ, അവൻ മേലാൽ രാജാ​വ​ല്ലെന്ന പ്രതീതി ഉളവാ​യി​രു​ന്നി​രി​ക്കാം. പകരം, ബാബി​ലോ​ന്റെ മുഖ്യ​ദേ​വ​നായ മർദൂക്‌ രാജാ​വാ​യി കാണ​പ്പെട്ടു. എന്നിരു​ന്നാ​ലും, സീയോ​ന്റെ ദൈവം ബാബി​ലോ​നെ വീഴ്‌ത്തി​യ​പ്പോൾ, അവൻ തന്റെ അഖിലാണ്ഡ പരമാ​ധി​കാ​രം—താൻ ഏറ്റവും വലിയ രാജാ​വാ​ണെന്ന്‌—പ്രകട​മാ​ക്കി. ഈ വസ്‌തു​ത​യ്‌ക്ക്‌ അടിവ​ര​യി​ടു​ന്ന​തിന്‌, “മഹാരാ​ജാ​വി​ന്റെ നഗര”മായ യെരൂ​ശ​ലേം, അതിന്റെ ആലയം സഹിതം, പുനഃ​സ്ഥാ​പി​ത​മാ​കേ​ണ്ടി​യി​രു​ന്നു. (മത്തായി 5:35) അത്തരം സുവാർത്ത കൊണ്ടു​വന്ന സന്ദേശ​വാ​ഹ​കന്റെ കാര്യ​മാ​ണെ​ങ്കി​ലോ, അവന്റെ പാദങ്ങൾ ചതഞ്ഞതും പൊടി​പറ്റി അഴുക്കാ​യ​തു​മാ​ണ​ങ്കി​ലും, സീയോ​നെ സ്‌നേ​ഹി​ക്കു​ന്ന​വ​രു​ടെ​യും അവളുടെ ദൈവ​ത്തി​ന്റെ​യും ദൃഷ്ടി​യിൽ അവ അതിമ​നോ​ഹ​ര​മാ​യി​രു​ന്നു!

¹⁸ പ്രാവ​ച​നി​ക​മാ​യി, ബാബി​ലോ​ന്റെ വീഴ്‌ച ദൈവ​രാ​ജ്യം സ്ഥാപി​ത​മാ​യെ​ന്നും സുവാർത്താ​വാ​ഹകൻ ആ വസ്‌തു​ത​യു​ടെ ഒരു പ്രഘോ​ഷ​ക​നാ​ണെ​ന്നും അർഥമാ​ക്കി. കൂടാതെ, യെശയ്യാ​വി​ലൂ​ടെ മുൻകൂ​ട്ടി​പ്പ​റ​യ​പ്പെട്ട ഈ പുരാതന സന്ദേശ​വാ​ഹകൻ കൂടുതൽ മഹത്തായ ഒരു സുവാർത്താ​ദൂ​തന്റെ പൂർവ​ചി​ത്രം പ്രദാനം ചെയ്‌തു. അതിന്റെ അതിവി​ശിഷ്ട ഉള്ളടക്ക​വും രാജ്യ​ത്തെ​ക്കു​റി​ച്ചുള്ള വിവര​ങ്ങ​ളും വിശ്വാ​സി​ക​ളായ സകലയാ​ളു​കൾക്കു​മുള്ള വിസ്‌മ​യാ​വ​ഹ​മായ അനു​ഗ്ര​ഹ​ങ്ങ​ളും കണക്കി​ലെ​ടു​ക്കു​മ്പോൾ അതു മഹത്തരം​ത​ന്നെ​യാണ്‌.

19. ഇസ്രാ​യേൽദേ​ശ​ത്തെ​ക്കു​റി​ച്ചു യഹോവ യെഹെ​സ്‌കേൽ മുഖാ​ന്തരം എന്തു സന്ദേശം കൊടു​ത്തു?

¹⁹ പുനഃ​സ്ഥാ​പനം സംബന്ധിച്ച ശോഭ​ന​മായ പ്രവച​നങ്ങൾ യെഹെ​സ്‌കേ​ലി​നും ലഭിച്ചു. അവൻ പ്രവചി​ച്ചു: “യഹോ​വ​യായ കർത്താവു ഇപ്രകാ​രം അരുളി​ച്ചെ​യ്യു​ന്നു: . . . നിങ്ങളു​ടെ പട്ടണങ്ങ​ളിൽ ഞാൻ ആളെ പാർപ്പി​ക്കും; ശൂന്യ​സ്ഥ​ല​ങ്ങ​ളെ​യും പണിയും. ശുന്യ​മാ​യ്‌ക്കി​ട​ന്നി​രുന്ന ദേശം ഏദെൻതോ​ട്ടം പോ​ലെ​യാ​യ്‌തീർന്നു​വ​ല്ലോ . . . എന്നു അവർ പറയും.”—യെഹെ​സ്‌കേൽ 36:33, 35.

20. യെശയ്യാവ്‌ യെരൂ​ശ​ലേ​മിന്‌ ആഹ്ലാദ​പൂർവ​ക​മായ ഏത്‌ ഉദ്‌ബോ​ധനം നൽകി?

²⁰ ബാബി​ലോ​നിൽ അടിമ​ത്ത​ത്തി​ലാ​യി​രു​ന്ന​പ്പോൾ, ദൈവ​ജനത സീയോ​നെ​ക്കു​റി​ച്ചു വിലപി​ച്ചി​രു​ന്നു. (സങ്കീർത്തനം 137:1) ഇപ്പോൾ അവർക്ക്‌ ആഹ്ലാദി​ക്കാ​നാ​കു​മാ​യി​രു​ന്നു. യെശയ്യാവ്‌ ഉദ്‌ബോ​ധി​പ്പി​ച്ചു: “യെരൂ​ശ​ലേ​മി​ന്റെ ശൂന്യ​പ്ര​ദേ​ശ​ങ്ങളേ, പൊട്ടി ആർത്തു​കൊൾവിൻ; യഹോവ തന്റെ ജനത്തെ ആശ്വസി​പ്പി​ച്ചു, യെരൂ​ശ​ലേ​മി​നെ വീണ്ടെ​ടു​ത്തി​രി​ക്കു​ന്നു​വ​ല്ലോ. സകല ജാതി​ക​ളും കാൺകെ യഹോവ തന്റെ വിശു​ദ്ധ​ഭു​ജത്തെ നഗ്നമാ​ക്കി​യി​രി​ക്കു​ന്നു; ഭൂമി​യു​ടെ അററങ്ങ​ളൊ​ക്കെ​യും നമ്മുടെ ദൈവ​ത്തി​ന്റെ രക്ഷയെ കാണും.”—യെശയ്യാ​വു 52:9, 10.

21. ബാബി​ലോ​ന്റെ പരാജ​യ​ത്തെ​ത്തു​ടർന്ന്‌, യെശയ്യാ​വു 52:9, 10-ലെ വചനങ്ങൾ നിവൃ​ത്തി​യേ​റി​യ​തെ​ങ്ങനെ?

²¹ അതേ, യഹോ​വ​യു​ടെ തിര​ഞ്ഞെ​ടുത്ത ജനത്തിന്‌ ആഹ്ലാദി​ക്കാൻ നല്ല കാരണ​മു​ണ്ടാ​യി​രു​ന്നു. ഒരിക്കൽ ശൂന്യ​മാ​യി​രുന്ന ആ സ്ഥലങ്ങളിൽ അവരി​പ്പോൾ വീണ്ടും പാർക്കാൻ പോകു​ക​യാണ്‌, അവയെ ഏദെൻ തോട്ടം​പോ​ലെ​യാ​ക്കാൻ പോകു​ക​യാണ്‌. യഹോവ അവർക്കാ​യി “തന്റെ വിശു​ദ്ധ​ഭു​ജത്തെ നഗ്നമാക്കി.” ആലങ്കാ​രി​ക​മാ​യി, അവരെ തന്റെ പ്രിയ​പ്പെട്ട സ്വദേ​ശ​ത്തേക്കു തിരി​ച്ചു​കൊ​ണ്ടു​വ​രു​ക​യെന്ന ലക്ഷ്യത്തിൽ പ്രവർത്തി​ക്കാൻ അവൻ തന്റെ കുപ്പാ​യ​ക്കൈകൾ തെറു​ത്തു​ക​യറ്റി. ചരി​ത്ര​ത്തിൽ ഇതു കേവല​മൊ​രു നിസ്സാര, അപ്രധാന സംഭവ​മാ​യി​രു​ന്നില്ല. ഇല്ല, ഒരു ജനതയ്‌ക്ക്‌ അതിശ​യ​ക​ര​മായ രക്ഷ കൈവ​രു​ത്തു​ന്ന​തി​നു​വേണ്ടി മനുഷ്യ​രു​ടെ കാര്യാ​ദി​ക​ളിൽ ശക്തി പ്രയോ​ഗി​ച്ചു​കൊണ്ട്‌ ദൈവം ‘ഭുജത്തെ നഗ്നമാക്കി’യത്‌ അന്നു ജീവി​ച്ചി​രുന്ന എല്ലാ ആളുക​ളും കണ്ടു. യെശയ്യാ​വും യെഹെ​സ്‌കേ​ലും യഹോ​വ​യു​ടെ യഥാർഥ സന്ദേശ​വാ​ഹ​ക​രാ​യി​രു​ന്നു​വെ​ന്ന​തി​നുള്ള സുവ്യ​ക്ത​മായ തെളിവ്‌ അവർക്കു നൽക​പ്പെട്ടു. സർവഭൂ​മി​യി​ലും ജീവനുള്ള സത്യ​ദൈവം സീയോ​ന്റെ ദൈവം മാത്ര​മാ​ണെ​ന്ന​തിന്‌ ആർക്കും സംശയ​മു​ണ്ടാ​കു​മാ​യി​രു​ന്നില്ല. യെശയ്യാ​വു 35:2-ൽ [NW] നാം വായി​ക്കു​ന്നു: “യഹോ​വ​യു​ടെ മഹത്വ​വും നമ്മുടെ ദൈവ​ത്തി​ന്റെ തേജസ്സും കാണു​ന്നവർ ഉണ്ടായി​രി​ക്കും.” യഹോ​വ​യു​ടെ ദൈവ​ത്വ​ത്തി​ന്റെ ഈ തെളിവു സ്വീക​രി​ച്ചവർ അവന്റെ ആരാധ​ന​യി​ലേക്കു വന്നു.

22. (എ) നാമിന്ന്‌ ഏതു കാര്യ​ത്തെ​പ്രതി നന്ദിയു​ള്ള​വ​രാ​യി​രി​ക്കണം? (ബി) യഹോവ വ്യാജ​സ​ന്ദേ​ശ​വാ​ഹ​കരെ തുറന്നു​കാ​ട്ടു​ന്ന​തിൽ നമുക്കു വിശേ​ഷാൽ നന്ദിയു​ണ്ടാ​യി​രി​ക്കേ​ണ്ടത്‌ എന്തു​കൊണ്ട്‌?

²² യഹോവ തന്റെ യഥാർഥ സന്ദേശ​വാ​ഹ​കരെ തിരി​ച്ച​റി​യി​ക്കു​ന്ന​തിൽ നാം എത്ര നന്ദിയു​ള്ള​വ​രാ​യി​രി​ക്കണം! അവൻ തീർച്ച​യാ​യും “തന്റെ ദാസന്റെ വചനം സത്യമാ​ക്കി​ത്തീർക്കു​ന്ന​വ​നും തന്റെ സ്വന്തം സന്ദേശ​വാ​ഹ​ക​രു​ടെ ഉപദേശം പൂർണ​മാ​യി നിവർത്തി​ക്കു​ന്ന​വനു”മാണ്‌. (യെശയ്യാ​വു 44:26, NW) അവൻ യെശയ്യാ​വി​നും യെഹെ​സ്‌കേ​ലി​നും കൊടുത്ത പുനഃ​സ്ഥി​തീ​കരണ പ്രവച​നങ്ങൾ അവന്റെ മഹത്തായ സ്‌നേ​ഹ​ത്തെ​യും അനർഹ​ദ​യ​യെ​യും തന്റെ ദാസന്മാ​രോ​ടുള്ള കരുണ​യെ​യും മഹത്ത്വീ​ക​രി​ക്കു​ന്നു. തീർച്ച​യാ​യും, യഹോവ ഇതി​നെ​ല്ലാം നമ്മുടെ സ്‌തുതി അർഹി​ക്കു​ന്നുണ്ട്‌! അവൻ വ്യാജ​സ​ന്ദേ​ശ​വാ​ഹ​കരെ തുറന്നു​കാ​ട്ടു​ന്ന​തിൽ നാമിന്നു വിശേ​ഷാൽ നന്ദിയു​ള്ള​വ​രാ​യി​രി​ക്കണം, വിശേ​ഷി​ച്ചും ലോക​ത്തിൽ ഇന്ന്‌ അത്തരക്കാർ അനേക​രുള്ള സ്ഥിതിക്ക്‌. അവരുടെ ഘനഗം​ഭീ​ര​മായ സന്ദേശങ്ങൾ യഹോ​വ​യു​ടെ പ്രഖ്യാ​പിത ഉദ്ദേശ്യ​ങ്ങളെ അവഗണി​ക്കു​ന്നു. ആ വ്യാജ​സ​ന്ദേ​ശ​വാ​ഹ​കരെ തിരി​ച്ച​റി​യാൻ നമ്മെ സഹായി​ക്കു​ന്ന​താണ്‌ അടുത്ത ലേഖനം.

[അടിക്കു​റി​പ്പു​കൾ]

നിങ്ങൾക്കു വിശദീ​ക​രി​ക്കാ​മോ?

□ യഹോവ തന്റെ യഥാർഥ സന്ദേശ​വാ​ഹ​കരെ തിരി​ച്ച​റി​യി​ക്കു​ന്ന​തെ​ങ്ങനെ?

□ ബാബി​ലോ​നെ കീഴട​ക്കാ​നുള്ള അധികൃ​ത​നാ​യി യഹോവ, യെശയ്യാവ്‌ മുഖാ​ന്തി​രം ആരുടെ പേർ സൂചി​പ്പി​ച്ചു?

□ ബാബി​ലോ​ന്റെ പരാജ​യത്തെ വർണി​ക്കുന്ന യെശയ്യാ​വി​ന്റെ പ്രവച​നങ്ങൾ നിവൃ​ത്തി​യേ​റി​യ​തെ​ങ്ങനെ?

□ ബാബി​ലോ​ന്റെ പരാജയം യഹോ​വ​യു​ടെ നാമത്തി​ന്മേൽ എന്തു സത്‌ഫ​ല​മു​ണ്ടാ​ക്കി?

[9-ാം പേജിലെ ചിത്രം]

യെഹെസ്‌കേലിന്റെ നാളിലെ രാഷ്‌ട്ര​ങ്ങൾക്കു ബാബി​ലോൻ അജയ്യമാ​യി തോന്നി​യി​രു​ന്നു