യഹോ​വ​യു​ടെ ദിവസം സമീപി​ച്ചി​രി​ക്കു​ന്നു

“മൂപ്പന്മാ​രേ, ഇതു കേൾപ്പിൻ; ദേശത്തി​ലെ സകലനി​വാ​സി​ക​ളു​മാ​യു​ള്ളോ​രേ, ചെവി​ക്കൊൾവിൻ.”—യോവേൽ 1:2.

1, 2. യഹൂദ​യി​ലെ ഏതു സ്ഥിതി​വി​ശേഷം നിമി​ത്ത​മാണ്‌ ശക്തമായ പ്രവചനം നടത്താൻ യഹോവ യോ​വേ​ലി​നെ നിശ്വ​സ്‌ത​നാ​ക്കി​യത്‌?

“ആ ദിവസം അയ്യോ കഷ്ടം! യഹോ​വ​യു​ടെ ദിവസം അടുത്തി​രി​ക്കു​ന്നു. അതു സർവ്വശ​ക്തന്റെ പക്കൽനി​ന്നു സംഹാ​രം​പോ​ലെ വരുന്നു”! എത്ര ഗംഭീ​ര​മായ പ്രഖ്യാ​പനം! അതു തന്റെ ജനത്തി​നാ​യി യോവേൽ പ്രവാ​ച​ക​നി​ലൂ​ടെ പ്രഖ്യാ​പി​ക്ക​പ്പെട്ട ദൈവ​ത്തി​ന്റെ സന്ദേശ​മാ​യി​രു​ന്നു.

² യോവേൽ 1:15-ലെ ആ വാക്കുകൾ യഹൂദ​യിൽവെച്ച്‌ പൊ.യു.മു. 820-നോട​ടു​ത്തു രേഖ​പ്പെ​ടു​ത്ത​പ്പെ​ട്ടി​രി​ക്കാ​നാ​ണു സാധ്യത. അപ്പോൾ ആ ദേശം ഹരിത​മ​നോ​ഹ​ര​മായ കുന്നു​ക​ളാൽ അലങ്കൃ​ത​മാ​യി​രു​ന്നു. പഴവർഗ​ങ്ങ​ളും ധാന്യ​ങ്ങ​ളും സമൃദ്ധ​മാ​യി​രു​ന്നു. ഹരിതാ​ഭ​മായ മേച്ചിൽപ്പു​റ​ങ്ങ​ളാ​കട്ടെ വിശാ​ല​വു​മാ​യി​രു​ന്നു. എങ്കിലും, എവി​ടെ​യോ വലിയ കുഴപ്പം സംഭവി​ച്ചി​രു​ന്നു. ബാലാ​രാ​ധന യെരൂ​ശ​ലേ​മി​ലും യഹൂദാ​ദേ​ശ​ത്തും തഴച്ചു​വ​ളർന്നു. ആളുകൾ വ്യാജ​ദൈ​വ​ത്തി​ന്റെ മുമ്പിൽ കുടി​ച്ചു​കൂ​ത്താ​ടി. (2 ദിനവൃ​ത്താ​ന്തം 21:4-6, 11 താരത​മ്യം ചെയ്യുക.) ഇതെല്ലാം തുടരാൻ യഹോവ അനുവ​ദി​ക്കു​മാ​യി​രു​ന്നോ?

3. എന്തി​നെ​ക്കു​റി​ച്ചാണ്‌ യഹോവ മുന്നറി​യി​പ്പു നൽകി​യത്‌, ജനതകൾ എന്തിനാ​യി ഒരുങ്ങണം?

³ യോവേൽ എന്ന ബൈബിൾപു​സ്‌തകം ഇതിനു വ്യക്തമായ ഉത്തരം നൽകുന്നു. യഹോ​വ​യാം ദൈവം തന്റെ പരമാ​ധി​കാ​രം സംസ്ഥാ​പി​ക്കു​ക​യും തന്റെ പവി​ത്ര​നാ​മം വിശു​ദ്ധീ​ക​രി​ക്കു​ക​യും ചെയ്യു​മാ​യി​രു​ന്നു. യഹോ​വ​യു​ടെ മഹാദി​വസം സമീപി​ച്ചി​രു​ന്നു. അന്നു ദൈവം “യഹോ​ശാ​ഫാത്ത്‌ താഴ്‌വ​രയി”ലെ എല്ലാ ജനതക​ളു​ടെ​മേ​ലും ന്യായ​വി​ധി നടത്തു​മാ​യി​രു​ന്നു. (യോവേൽ 3:12) അവർ സർവശ​ക്ത​നായ യഹോ​വ​യു​മാ​യി യുദ്ധത്തിന്‌ ഒരുങ്ങട്ടെ. നാമും യഹോ​വ​യു​ടെ മഹാദി​വ​സത്തെ അഭിമു​ഖീ​ക​രി​ക്കു​ക​യാണ്‌. അതു​കൊണ്ട്‌ നമ്മുടെ കാല​ത്തെ​യും ഗതകാ​ല​ത്തെ​യും സംബന്ധിച്ച യോ​വേ​ലി​ന്റെ പ്രാവ​ച​നിക വാക്കുകൾ നമു​ക്കൊ​ന്നു സൂക്ഷ്‌മ​മാ​യി പരി​ശോ​ധി​ക്കാം.

കീടങ്ങ​ളു​ടെ ആക്രമണം

4. യോവേൽ മുന്നറി​യി​പ്പു നൽകിയ സംഭവം എത്ര വലുതാ​യി​രി​ക്കും?

⁴ തന്റെ പ്രവാ​ചകൻ മുഖാ​ന്തരം യഹോവ പറയുന്നു: “മൂപ്പന്മാ​രേ, ഇതു കേൾപ്പിൻ; ദേശത്തി​ലെ സകലനി​വാ​സി​ക​ളു​മാ​യു​ള്ളോ​രേ, ചെവി​ക്കൊൾവിൻ; നിങ്ങളു​ടെ കാലത്തോ നിങ്ങളു​ടെ പിതാ​ക്ക​ന്മാ​രു​ടെ കാലത്തോ ഇങ്ങനെ സംഭവി​ച്ചി​ട്ടു​ണ്ടോ? ഇതു നിങ്ങൾ നിങ്ങളു​ടെ മക്കളോ​ടും നിങ്ങളു​ടെ മക്കൾ തങ്ങളുടെ മക്കളോ​ടും അവരുടെ മക്കൾ വരുവാ​നുള്ള തലമു​റ​യോ​ടും വിവരി​ച്ചു​പ​റ​യേണം.” (യോവേൽ 1:2, 3) മൂപ്പന്മാർക്കും മുഴു​ജ​ന​ങ്ങൾക്കും തങ്ങളുടെ കാലത്തോ പൂർവ​പി​താ​ക്ക​ന്മാ​രു​ടെ കാലത്തോ സംഭവി​ച്ചി​ട്ടി​ല്ലാത്ത ഒന്നു പ്രതീ​ക്ഷി​ക്കാ​മാ​യി​രു​ന്നു. മൂന്നാ​മത്തെ തലമു​റ​യോ​ടു​പോ​ലും വിവരി​ക്കു​മാറ്‌ അത്ര അസാധാ​ര​ണ​മാ​യി​രി​ക്കു​മാ​യി​രു​ന്നു അത്‌! ആ ശ്രദ്ധേ​യ​മായ സംഭവം എന്തായി​രു​ന്നു? അതു മനസ്സി​ലാ​ക്കാൻ, നാം യോ​വേ​ലി​ന്റെ നാളു​ക​ളി​ലാ​ണെന്നു സങ്കൽപ്പി​ക്കാം.

5, 6. (എ) യോവേൽ പ്രവചി​ക്കുന്ന ബാധയെ വർണി​ക്കുക. (ബി) ആ ബാധയു​ടെ ഉറവ്‌ ആരായി​രു​ന്നു?

⁵ ശ്രദ്ധി​ക്കു​വിൻ! യോവേൽ അകലെ​നി​ന്നൊ​രു ഗർജനം കേൾക്കു​ന്നു. ആകാശം ഇരുളു​ന്നു, ഇരുട്ടു വ്യാപി​ക്കവേ പേടി​പ്പെ​ടു​ത്തുന്ന ആ ശബ്ദം വർധി​ച്ചു​വ​രു​ന്നു. പിന്നെ പുക​പോ​ലുള്ള ഒരു മേഘപ​ടലം താണി​റ​ങ്ങു​ന്നു. അതു കോടി​ക്ക​ണ​ക്കി​നു​വ​രുന്ന കീടങ്ങ​ളു​ടെ ഒരു സൈന്യ​മാണ്‌. എന്തൊരു വിനാ​ശ​മാണ്‌ അവ വരുത്തു​ന്നത്‌! ഇനി, യോവേൽ 1:4 പരിചി​ന്തി​ക്കുക. ഈ കീടങ്ങ​ളാ​കുന്ന ആക്രമ​ണ​കാ​രി​കൾ ദേശാ​ന്ത​ര​ഗ​മനം നടത്തുന്ന ചിറകുള്ള വെട്ടു​ക്കി​ളി​കൾ മാത്രമല്ല, നിശ്ചയം! ചിറകി​ല്ലാത്ത, ഇഴഞ്ഞു​നീ​ങ്ങുന്ന വെട്ടു​ക്കി​ളി​ക​ളു​ടെ വിശന്നു​വലഞ്ഞ ഒരു സൈന്യ​വും വരുന്നുണ്ട്‌. കാറ്റ​ത്തെ​ത്തുന്ന ഈ വെട്ടു​ക്കി​ളി​കൾ പെട്ടെന്നു വരുന്നു, രഥങ്ങളു​ടേ​തു​പോ​ലുള്ള ശബ്ദമാണ്‌ അവയ്‌ക്കു​ള്ളത്‌. (യോവേൽ 2:5) ഭയങ്കര​മായ വിശപ്പു​നി​മി​ത്തം കോടി​ക്ക​ണ​ക്കി​നു​വ​രുന്ന ഈ വെട്ടു​ക്കി​ളി​കൾക്ക്‌ ഒരു പറുദീ​സാ​സ​മാന ദേശം ക്ഷണനേ​രം​കൊണ്ട്‌ മരുഭൂ​മി​യാ​ക്കി മാറ്റാ​നാ​കും.

⁶ ലാർവാ​ദ​ശ​യി​ലുള്ള പുഴു​ക്ക​ളോ ചിത്ര​ശ​ല​ഭ​ങ്ങ​ളോ ആയ ശലഭപ്പു​ഴു​ക്ക​ളും മുന്നേ​റു​ക​യാണ്‌. വിശന്നു​വലഞ്ഞ ശലഭപ്പു​ഴു​ക്ക​ളു​ടെ മഹാ​സൈ​ന്യ​ങ്ങൾക്ക്‌ പച്ചപ്പിന്റെ അംശം​പോ​ലും ഇല്ലാതാ​കും​വരെ തുണ്ടു​ക​ളാ​യി, ഓരോ ഇലകളാ​യി ചെടികൾ തിന്നു​തീർക്കാ​നാ​കും. അവ ശേഷി​പ്പി​ക്കു​ന്ന​തിൽ അധിക​ഭാ​ഗ​വും വെട്ടു​ക്കി​ളി​കൾ തിന്നൊ​ടു​ക്കു​ന്നു. വെട്ടു​ക്കി​ളി​കൾ അവശേ​ഷി​പ്പി​ക്കു​ന്നത്‌ ദ്രുത​വേ​ഗ​ത്തിൽ നീങ്ങുന്ന പാറ്റകൾ ആഹാര​മാ​ക്കു​ന്നു. എന്നാൽ ഇതു ശ്രദ്ധിക്കൂ: യോവേൽ 2-ാമധ്യാ​യ​ത്തി​ന്റെ 11-ാം വാക്യ​ത്തിൽ വെട്ടു​ക്കി​ളി​സൈ​ന്യ​ത്തെ “തന്റെ സൈന്യ”മായി ദൈവം തിരി​ച്ച​റി​യി​ക്കു​ന്നു. അതേ, ദേശത്തെ ശൂന്യ​മാ​ക്കുന്ന വെട്ടു​ക്കി​ളി​ബാ​ധ​യു​ടെ ഉറവ്‌ അവനാ​യി​രു​ന്നു. അതു കടുത്ത ക്ഷാമത്തി​നി​ട​യാ​ക്കു​ന്നു. എപ്പോൾ? “യഹോ​വ​യു​ടെ ദിവസ”ത്തിനു തൊട്ടു​മുമ്പ്‌.

‘മദ്യപ​ന്മാ​രേ, ഉണരു​വിൻ’

7. (എ) യഹൂദ​യി​ലെ മതനേ​താ​ക്ക​ന്മാ​രു​ടെ അവസ്ഥ എന്തായി​രു​ന്നു? (ബി) ക്രൈ​സ്‌ത​വ​ലോ​ക​ത്തി​ലെ നേതാ​ക്ക​ന്മാർ ഇന്ന്‌ യഹൂദ​യി​ലെ മതനേ​താ​ക്ക​ന്മാ​രു​ടേ​തി​നോ​ടു സമാന​മായ അവസ്ഥയി​ലാ​യി​രി​ക്കു​ന്നത്‌ എങ്ങനെ?

⁷ “മദ്യപ​ന്മാ​രേ, ഉണർന്നു കരവിൻ; വീഞ്ഞു കുടി​ക്കുന്ന ഏവരു​മാ​യു​ള്ളോ​രേ, പുതു​വീ​ഞ്ഞു നിങ്ങളു​ടെ വായ്‌ക്കു അറ്റു​പോ​യി​രി​ക്ക​യാൽ മുറയി​ടു​വിൻ” എന്ന കൽപ്പന പുറ​പ്പെ​ടു​വി​ക്കു​മ്പോൾ നിന്ദ്യ​മാ​യൊ​രു കൂട്ടത്തെ, യഹൂദ​യി​ലെ മതനേ​താ​ക്ക​ന്മാ​രെ എടുത്തു​കാ​ട്ടു​ന്നു. (യോവേൽ 1:5) അതേ, യഹൂദ​യി​ലെ ആത്മീയ മദ്യപാ​നി​ക​ളോട്‌ ‘ഉണരാൻ,’ ഗൗരവ​മാ​ന​സ​രാ​കാൻ ആവശ്യ​പ്പെട്ടു. എന്നാൽ ഇതു കേവല​മൊ​രു പുരാതന ചരി​ത്ര​മാ​ണെന്നു നിരൂ​പി​ക്ക​രുത്‌. യഹോ​വ​യു​ടെ മഹാദി​വ​സ​ത്തി​നു​മുമ്പ്‌ ഇപ്പോൾ ക്രൈ​സ്‌ത​വ​ലോ​ക​ത്തി​ലെ പുരോ​ഹി​ത​വർഗം ആലങ്കാ​രി​കാർഥ​ത്തിൽ “പുതു​വീ​ഞ്ഞു” കുടിച്ചു മത്തരാ​യി​രി​ക്കു​ക​യാണ്‌. അതു​കൊണ്ട്‌, അത്യു​ന്ന​ത​നിൽനി​ന്നുള്ള ഈ ആജ്ഞയെ​ക്കു​റിച്ച്‌ അവർ ബോധ​വാ​ന്മാ​രല്ല. യഹോ​വ​യു​ടെ വലുതും ഭയജന​ക​വു​മായ ദിവസം ആത്മീയ​മാ​യി മത്തുപി​ടി​ച്ച​തു​മൂ​ല​മുള്ള മന്ദതയിൽനിന്ന്‌ അവരെ ഉണർത്തു​മ്പോൾ എന്തൊരു അമ്പരപ്പാ​യി​രി​ക്കും അവർക്കു​ണ്ടാ​കുക!

8, 9. (എ) വെട്ടു​ക്കി​ളി​ക​ളെ​യും അവ വരുത്തുന്ന ബാധയു​ടെ ഫലത്തെ​യും യോവേൽ വിവരി​ക്കു​ന്ന​തെ​ങ്ങനെ? (ബി) ഇന്ന്‌ വെട്ടു​ക്കി​ളി​കൾ ആരെ പ്രതി​നി​ധാ​നം ചെയ്യുന്നു?

⁸ ആ മഹാ വെട്ടു​ക്കി​ളി​സൈ​ന്യ​ത്തെ നോക്കൂ! “ശക്തിയു​ള്ള​തും സംഖ്യ​യി​ല്ലാ​ത്ത​തു​മാ​യോ​രു ജാതി എന്റെ ദേശത്തി​ന്റെ നേരെ വന്നിരി​ക്കു​ന്നു; അതിന്റെ പല്ലു സിംഹ​ത്തി​ന്റെ പല്ലു; സിംഹി​യു​ടെ അണപ്പല്ലു അതിന്നു​ണ്ടു. അതു എന്റെ മുന്തി​രി​വ​ള്ളി​യെ ശൂന്യ​മാ​ക്കി എന്റെ അത്തിവൃ​ക്ഷത്തെ ഒടിച്ചു​ക​ളഞ്ഞു; അതിനെ മുഴു​വ​നും തോലു​രി​ച്ചു എറിഞ്ഞു​ക​ളഞ്ഞു; അതിന്റെ കൊമ്പു​കൾ വെളു​ത്തു​പോ​യി​രി​ക്കു​ന്നു. യൌവ​ന​ത്തി​ലെ ഭർത്താ​വി​നെ​ച്ചൊ​ല്ലി രട്ടുടു​ത്തി​രി​ക്കുന്ന കന്യക​യെ​പ്പോ​ലെ വിലപിക്ക.”—യോവേൽ 1:6-8.

⁹ ഇതു യഹൂദയെ ആക്രമി​ക്കുന്ന വെട്ടു​ക്കി​ളി​ക​ളു​ടെ ഒരു ‘ജാതി’യെ, ഒരു വെട്ടു​ക്കി​ളി​സം​ഘ​ത്തെ​ക്കു​റി​ച്ചുള്ള പ്രവച​ന​മാ​ണോ? അല്ല, അതിലു​മേറെ ഇതിൽ ഉൾപ്പെ​ട്ടി​രി​ക്കു​ന്നു. യോവേൽ 1:6-ലും വെളി​പ്പാ​ടു 9:7-ലും ദൈവ​ജ​നത്തെ വെട്ടു​ക്കി​ളി​ക​ളാ​യി പ്രതി​നി​ധാ​നം ചെയ്‌തി​രി​ക്കു​ന്നു. ആധുനി​ക​കാല വെട്ടു​ക്കി​ളി​സൈ​ന്യം യഹോ​വ​യു​ടെ അഭിഷിക്ത വെട്ടു​ക്കി​ളി സേനയ​ല്ലാ​തെ മറ്റാരു​മല്ല. ഇപ്പോൾ യേശു​വി​ന്റെ “വേറെ ആടുക”ളിൽപ്പെട്ട 56,00,000-ത്തോളം പേർ അവരോ​ടു ചേർന്നി​രി​ക്കു​ന്നു. (യോഹ​ന്നാൻ 10:16) യഹോ​വ​യു​ടെ ആരാധ​ക​രു​ടെ ഈ വൻസം​ഘ​ത്തി​ന്റെ ഭാഗമാ​യി​രി​ക്കു​ന്ന​തിൽ നിങ്ങൾ ആഹ്ലാദി​ക്കു​ന്നി​ല്ലേ?

10. യഹൂദ​യു​ടെ​മേൽ ഉണ്ടായ വെട്ടു​ക്കി​ളി​ബാ​ധ​യു​ടെ ഫലമെ​ന്താണ്‌?

¹⁰ യോവേൽ 1:9-12-ൽ ഈ വെട്ടു​ക്കി​ളി​ബാ​ധ​യു​ടെ ഫലങ്ങ​ളെ​ക്കു​റി​ച്ചു നാം വായി​ക്കു​ന്നു. ഒന്നിനു​പു​റകെ ഒന്നായി വെട്ടു​ക്കി​ളി​സം​ഘങ്ങൾ ദേശത്തെ പൂർണ​മാ​യും ശൂന്യ​മാ​ക്കു​ന്നു. ധാന്യ​വും വീഞ്ഞും എണ്ണയു​മി​ല്ലാ​തെ അവിശ്വസ്‌ത പുരോ​ഹി​ത​ന്മാർക്കു തങ്ങളുടെ പ്രവർത്ത​നങ്ങൾ തുടരാ​നാ​വില്ല. നിലം​പോ​ലും വിലപി​ക്കു​ന്നു, എന്തെന്നാൽ വെട്ടു​ക്കി​ളി​കൾ ദേശത്തെ ധാന്യ​മൊ​ക്കെ​യും നശിപ്പി​ച്ചു, ഫലവൃ​ക്ഷ​ങ്ങ​ളി​ലൊ​ന്നും കനികൾ ശേഷി​ക്കു​ന്നില്ല. മുന്തി​രി​വ​ള്ളി​കൾ നശിച്ച​തോ​ടെ, ആത്മീയ മദ്യപാ​നി​കൾ കൂടി​യാ​യി​രുന്ന, ബാലിന്റെ വീഞ്ഞു​കു​ടി​യ​ന്മാർക്കു വീഞ്ഞി​ല്ലാ​താ​യി.

‘പുരോ​ഹി​ത​ന്മാ​രേ, മുറയി​ടു​വിൻ’

11, 12. (എ) ഇന്ന്‌ ദൈവ​ത്തി​ന്റെ പുരോ​ഹി​ത​ന്മാ​രെന്ന്‌ അവകാ​ശ​പ്പെ​ടു​ന്നത്‌ ആർ? (ബി) ക്രൈ​സ്‌ത​വ​ലോ​ക​ത്തി​ലെ മതപു​രോ​ഹി​ത​ന്മാ​രു​ടെ​മേൽ ആധുനി​ക​കാല വെട്ടു​ക്കി​ളി​ബാ​ധ​യു​ടെ ഫലം എങ്ങനെ​യു​ള്ള​താണ്‌?

¹¹ വഴിപി​ഴച്ച ആ പുരോ​ഹി​ത​ന്മാർക്കുള്ള ദൈവ​സ​ന്ദേശം ശ്രദ്ധി​ക്കുക: “പുരോ​ഹി​ത​ന്മാ​രേ, രട്ടുടു​ത്തു വിലപി​പ്പിൻ; യാഗപീ​ഠ​ത്തി​ന്റെ ശുശ്രൂ​ഷ​ക​ന്മാ​രേ, മുറയി​ടു​വിൻ.” (യോവേൽ 1:13) യോ​വേൽപ്ര​വ​ച​ന​ത്തി​ന്റെ പ്രാഥ​മിക നിവൃ​ത്തി​യിൽ ലേവ്യ​പു​രോ​ഹി​ത​ന്മാർ യാഗപീ​ഠ​ത്തി​ങ്കൽ സേവി​ച്ചി​രു​ന്നു. എന്നാൽ ഒടുവി​ലത്തെ നിവൃ​ത്തി​യി​ലോ? ഇന്ന്‌, ക്രൈ​സ്‌ത​വ​ലോ​ക​ത്തി​ലെ പുരോ​ഹി​ത​ന്മാർ ദൈവ​ത്തി​ന്റെ ശുശ്രൂ​ഷ​ക​രാ​ണെന്ന്‌, അവന്റെ ‘പുരോ​ഹി​ത​ന്മാ​രാ’ണെന്ന്‌ അവകാ​ശ​പ്പെ​ട്ടു​കൊണ്ട്‌ ദൈവ​ത്തി​ന്റെ യാഗപീ​ഠ​ത്തി​ങ്കൽ സേവി​ക്കു​ന്ന​തി​നുള്ള അധികാ​രം ഏറ്റെടു​ത്തി​രി​ക്കു​ന്നു. എന്നാൽ, ദൈവ​ത്തി​ന്റെ ആധുനി​ക​കാല വെട്ടു​ക്കി​ളി​കൾ മുന്നേ​റാൻ ഇടയാ​കു​മാറ്‌ ഇപ്പോൾ എന്താണ്‌ സംഭവി​ച്ചു​കൊ​ണ്ടി​രി​ക്കു​ന്നത്‌?

¹² യഹോ​വ​യു​ടെ ജനം കർമനി​ര​ത​രാ​യി​രി​ക്കു​ന്നത്‌ കാണു​ക​യും ദിവ്യ​ന്യാ​യ​വി​ധി​യെ​ക്കു​റി​ച്ചുള്ള അവരുടെ മുന്നറി​യിപ്പ്‌ കേൾക്കു​ക​യും ചെയ്യു​മ്പോൾ ക്രൈ​സ്‌ത​വ​ലോ​ക​ത്തി​ലെ “പുരോ​ഹി​ത​ന്മാർ” പരി​ഭ്രാ​ന്ത​രാ​കു​ന്നു. രാജ്യ​സ​ന്ദേ​ശ​ത്തി​ന്റെ വിനാ​ശ​ഫ​ല​ത്താൽ വലഞ്ഞ്‌ അവർ വിലപി​ക്കു​ക​യും കോപാ​ക്രാ​ന്ത​രാ​കു​ക​യും ചെയ്യുന്നു. ആടുകൾ തങ്ങളെ വിട്ടു​പോ​കു​ന്ന​തിൽ അവർ അലമു​റ​യി​ടു​ന്നു. തങ്ങളുടെ മേച്ചിൽസ്ഥ​ലങ്ങൾ തരിശാ​ക്ക​പ്പെ​ടു​ന്ന​തി​നാൽ, വരുമാ​ന​ന​ഷ്ട​ത്തെ​ക്കു​റിച്ച്‌ വിലപി​ച്ചു​കൊണ്ട്‌ രട്ടുടുത്ത്‌ അവർ രാത്രി കഴിച്ചു​കൂ​ട്ടട്ടെ. താമസി​യാ​തെ, അവർക്കു പുരോ​ഹി​ത​വൃ​ത്തി​യും നഷ്ടമാ​കും! വാസ്‌ത​വ​ത്തിൽ, അവരുടെ അന്ത്യം അടുത്തി​രി​ക്കു​ന്ന​തി​നാൽ മുഴു​രാ​ത്രി​യും വിലപി​ക്കാൻ ദൈവം അവരോ​ടു പറയുന്നു.

13. ക്രൈ​സ്‌ത​വ​ലോ​കം ഒന്നടങ്കം യഹോ​വ​യു​ടെ മുന്നറി​യി​പ്പി​നോ​ടു പ്രതി​ക​രി​ക്കു​മോ?

¹³ യോവേൽ 1:14 പറയു​ന്ന​പ്ര​കാ​രം, അവർക്കുള്ള ഏക പ്രത്യാശ അനുത​പിച്ച്‌ “സഹായ​ത്തി​നാ​യി യഹോ​വ​യോ​ടു” കരഞ്ഞ​പേ​ക്ഷി​ക്കു​ന്നതു മാത്ര​മാണ്‌. ക്രൈ​സ്‌ത​വ​ലോ​ക​ത്തി​ലെ പുരോ​ഹി​ത​വർഗം ഒന്നടങ്കം യഹോ​വ​യി​ലേക്കു തിരി​യു​മെന്നു നമുക്കു പ്രതീ​ക്ഷി​ക്കാ​നാ​കു​മോ? തീർച്ച​യാ​യു​മില്ല! അവരു​ടെ​യി​ട​യി​ലെ ചില വ്യക്തികൾ യഹോ​വ​യു​ടെ മുന്നറി​യി​പ്പി​നോ​ടു പ്രതി​ക​രി​ച്ചേ​ക്കാം. എന്നാൽ ഒരു കൂട്ട​മെ​ന്ന​നി​ല​യിൽ, ഈ മതനേ​താ​ക്ക​ന്മാ​രു​ടെ​യും അവരുടെ ഇടവക​ക്കാ​രു​ടെ​യും ആത്മീയ​ക്ഷാ​മാ​വസ്ഥ തീർച്ച​യാ​യും തുടരും. പ്രവാ​ച​ക​നായ ആമോസ്‌ ഇങ്ങനെ മുൻകൂ​ട്ടി​പ്പ​റഞ്ഞു: “അപ്പത്തി​ന്നാ​യുള്ള വിശപ്പല്ല വെള്ളത്തി​ന്നാ​യുള്ള ദാഹവു​മല്ല, യഹോ​വ​യു​ടെ വചനങ്ങളെ കേൾക്കേ​ണ്ട​തി​ന്നുള്ള വിശപ്പു​തന്നേ ഞാൻ ദേശ​ത്തേക്കു അയക്കുന്ന നാളുകൾ വരുന്നു എന്നു യഹോ​വ​യായ കർത്താ​വി​ന്റെ അരുള​പ്പാ​ടു.” (ആമോസ്‌ 8:11) നേരേ​മ​റിച്ച്‌, “വിശ്വ​സ്‌ത​നും വിവേ​കി​യു​മായ അടിമ”യിലൂടെ ദൈവം സ്‌നേ​ഹ​പു​ര​സ്സരം നമു​ക്കേ​കുന്ന സമൃദ്ധ​മായ ആത്മീയ വിരു​ന്നി​നെ​പ്രതി നാമെത്ര നന്ദിയു​ള്ള​വ​രാണ്‌!—മത്തായി 24:45-47.

14. വെട്ടു​ക്കി​ളി​ബാധ എന്തിന്റെ മുൻകു​റി​യാണ്‌?

¹⁴ അന്ന്‌ വെട്ടു​ക്കി​ളി​ബാധ ഒരു പ്രത്യേക സംഗതി​യു​ടെ മുൻകു​റി ആയിരു​ന്നു, ഇന്നുമതെ. എന്തിന്റെ? അതേക്കു​റിച്ച്‌ യോവേൽ നമ്മോടു വ്യക്തമാ​യി ഇങ്ങനെ പറയുന്നു: “ആ ദിവസം അയ്യോ കഷ്ടം! യഹോ​വ​യു​ടെ ദിവസം അടുത്തി​രി​ക്കു​ന്നു. അതു സർവ്വശ​ക്തന്റെ പക്കൽനി​ന്നു സംഹാ​രം​പോ​ലെ വരുന്നു”! (യോവേൽ 1:15) യഹോ​വ​യു​ടെ വലുതും ഭയങ്കര​വു​മായ ദിവസം സമീപി​ച്ചി​രി​ക്കു​ന്നു​വെന്നു ദൈവ​ത്തി​ന്റെ ഇന്നത്തെ വെട്ടു​ക്കി​ളി​സൈ​ന്യ​ത്തി​ന്റെ ലോക​വ്യാ​പക ആക്രമ​ണങ്ങൾ സൂചി​പ്പി​ക്കു​ന്നു. തീർച്ച​യാ​യും, ദുഷ്ടന്മാർക്കെ​തി​രെ ദിവ്യ​ന്യാ​യ​വി​ധി നടപ്പാ​ക്കി​ക്കൊണ്ട്‌ അഖിലാണ്ഡ പരമാ​ധി​കാ​രി എന്നനി​ല​യിൽ യഹോവ വിജയി​ക്കുന്ന ആ പ്രത്യേക കണക്കു​തീർപ്പിൻനാ​ളി​നാ​യി പരമാർഥ​ഹൃ​ദ​യ​രെ​ല്ലാം വളരെ​യ​ധി​കം വാഞ്‌ഛി​ക്കു​ന്നു.

15. ദേശത്തി​ന്റെ ദയനീ​യ​സ്ഥി​തി കണക്കി​ലെ​ടു​ക്കു​മ്പോൾ, ദിവ്യ​മു​ന്ന​റി​യി​പ്പു​കൾ ചെവി​ക്കൊ​ള്ളു​ന്നവർ എങ്ങനെ പ്രതി​ക​രി​ക്കു​ന്നു?

¹⁵ യോവേൽ 1:16-20 പ്രകട​മാ​ക്കു​ന്ന​തു​പോ​ലെ, പുരാതന യഹൂദ​യിൽ ഭക്ഷണം ഇല്ലാതാ​യി. സന്തോ​ഷ​വും. പണ്ടകശാ​ലകൾ ശൂന്യ​മാ​യി, കളപ്പു​രകൾ ഇടിച്ചു​ക​ള​യേ​ണ്ടി​വന്നു. വെട്ടു​ക്കി​ളി​കൾ ദേശത്തെ സസ്യങ്ങ​ളെ​ല്ലാം നശിപ്പി​ച്ച​തി​നാൽ, മേച്ചിൽസ്ഥ​ല​മി​ല്ലാ​തെ കന്നുകാ​ലി​കൾ അലഞ്ഞു​ഴന്നു നടന്നു. ആട്ടിൻപ​റ്റങ്ങൾ ചത്തൊ​ടു​ങ്ങി. എന്തൊരു ദുരന്തം! അത്തരം അവസ്ഥക​ളിൽ യോ​വേ​ലിന്‌ എന്തു സംഭവി​ച്ചു? 19-ാം വാക്യ​മ​നു​സ​രിച്ച്‌, അവൻ പറഞ്ഞു: “യഹോവേ, നിന്നോ​ടു ഞാൻ വിളി​ച്ച​പേ​ക്ഷി​ക്കാം.” ഇന്നും, ദിവ്യ​മു​ന്ന​റി​യി​പ്പു​കൾ ചെവി​ക്കൊണ്ട്‌ പലരും യഹോ​വ​യാം ദൈവത്തെ വിശ്വാ​സ​ത്തോ​ടെ വിളി​ച്ച​പേ​ക്ഷി​ക്കു​ന്നു.

‘യഹോ​വ​യു​ടെ ദിവസം വരുന്നു’

16. “ദേശത്തി​ലെ സകലനി​വാ​സി​ക​ളും” നടുങ്ങി​പ്പോ​കേ​ണ്ടത്‌ എന്തു​കൊണ്ട്‌?

¹⁶ ദൈവ​ത്തിൽനി​ന്നുള്ള ഈ കൽപ്പന ശ്രദ്ധിക്കൂ: “സീയോ​നിൽ കാഹളം ഊതു​വിൻ; എന്റെ വിശു​ദ്ധ​പർവ്വ​ത​ത്തിൽ അയ്യംവി​ളി​പ്പിൻ; . . . ദേശത്തി​ലെ സകലനി​വാ​സി​ക​ളും നടുങ്ങി​പ്പോ​കട്ടെ.” (യോവേൽ 2:1) എന്തിന്‌ ഈ വിധത്തിൽ പ്രതി​ക​രി​ക്കണം? പ്രവചനം ഇങ്ങനെ ഉത്തരം പറയുന്നു: “യഹോ​വ​യു​ടെ ദിവസം വരുന്ന​തു​കൊ​ണ്ടും അതു അടുത്തി​രി​ക്കു​ന്ന​തു​കൊ​ണ്ടും . . . ഇരുട്ടും അന്ധകാ​ര​വു​മു​ള്ളോ​രു ദിവസം; മേഘവും കൂരി​രു​ട്ടു​മു​ള്ളോ​രു ദിവസം തന്നേ. . . . പർവ്വത​ങ്ങ​ളിൽ പരന്നി​രി​ക്കുന്ന പ്രഭാ​തം​പോ​ലെ.” (യോവേൽ 2:1, 2) യഹോ​വ​യു​ടെ മഹാദി​വ​സ​ത്തിന്‌ ഒരു യഥാർഥ അടിയ​ന്തി​ര​ത​യുണ്ട്‌.

17. യഹൂദാ​ദേ​ശ​ത്തി​ന്മേ​ലും അതിലെ ജനങ്ങളു​ടെ​മേ​ലും വെട്ടു​ക്കി​ളി​ബാ​ധ​യു​ടെ ഫലം എങ്ങനെ​യു​ള്ള​താ​യി​രു​ന്നു?

¹⁷ നിർദ​യ​രായ വെട്ടു​ക്കി​ളി​കൾ യഥാർഥ​ത്തിൽ ഏദെൻതോ​ട്ടം പോലി​രുന്ന ഒരു സ്ഥലത്തെ ശൂന്യ​മായ പാഴ്‌നി​ല​മാ​ക്കി മാറ്റി​യ​പ്പോൾ പ്രവാ​ച​കന്റെ ദർശന​ത്തി​നു​ണ്ടാ​യി​രുന്ന സ്വാധീ​ന​മൊ​ന്നു വിഭാവന ചെയ്യുക. വെട്ടു​ക്കി​ളി​സൈ​ന്യ​ത്തെ​ക്കു​റി​ച്ചുള്ള വർണന ശ്രദ്ധി​ക്കുക: “അവരുടെ രൂപം കുതി​ര​ക​ളു​ടെ രൂപം​പോ​ലെ; അവർ കുതി​ര​ച്ചേ​വ​ക​രെ​പ്പോ​ലെ ഓടുന്നു. അവർ പർവ്വത​ശി​ഖ​ര​ങ്ങ​ളിൽ രഥങ്ങളു​ടെ മുഴക്കം​പോ​ലെ കുതി​ച്ചു​ചാ​ടു​ന്നു; അഗ്നിജ്വാ​ല താളടി​യെ ദഹിപ്പി​ക്കുന്ന ശബ്ദം​പോ​ലെ​യും പടെക്കു നിരന്നു​നി​ല്‌ക്കുന്ന ശക്തിയുള്ള പടജ്ജനം പോ​ലെ​യും തന്നേ. അവരുടെ മുമ്പിൽ ജാതികൾ നടുങ്ങു​ന്നു; സകലമു​ഖ​ങ്ങ​ളും വിളറി​പ്പോ​കു​ന്നു.” (യോവേൽ 2:4-6) യോ​വേ​ലി​ന്റെ നാളിലെ വെട്ടു​ക്കി​ളി​ബാ​ധ​യു​ടെ സമയത്ത്‌ ബാലാ​രാ​ധ​ക​രു​ടെ മനോ​വേദന രൂക്ഷമാ​യി. ഉത്‌ക​ണ്‌ഠ​യു​ടെ ആധിക്യം അവരുടെ മുഖത്തു ദൃശ്യ​മാ​യി​രു​ന്നു.

18, 19. ഇന്ന്‌ ദൈവ​ജ​ന​ത്തി​ന്റെ പ്രവർത്തനം വെട്ടു​ക്കി​ളി​ബാ​ധ​പോ​ലെ ആയിരു​ന്നി​ട്ടു​ള്ളത്‌ എങ്ങനെ?

¹⁸ സംഘടി​ത​രും അക്ഷീണ​രു​മായ വെട്ടു​ക്കി​ളി​കളെ യാതൊ​ന്നി​നും തടുത്തു​നിർത്താ​നാ​യില്ല. അവർ “വീരന്മാ​രെ​പ്പോ​ലെ” ഓടു​ക​യും മതിലു​കൾ കയറു​ക​യും ചെയ്‌തു. ‘അവരിൽ ചിലർ ആയുധ​ങ്ങൾക്കി​ട​യിൽ വീണാ​ലും, മറ്റുള്ളവർ താന്താന്റെ പാതയിൽ നേരെ നടക്കുന്നു.’ (യോവേൽ 2:7, 8) ദൈവ​ത്തി​ന്റെ ഇന്നത്തെ ആലങ്കാ​രിക വെട്ടു​ക്കി​ളി​സൈ​ന്യ​ത്തി​ന്റെ എത്ര വ്യക്തമായ പ്രാവ​ച​നിക ചിത്രം! ഇന്നും യഹോ​വ​യു​ടെ വെട്ടു​ക്കി​ളി​സൈ​ന്യം മുന്നേ​റി​ക്കൊ​ണ്ടി​രി​ക്കു​ന്നു. എതിർപ്പി​ന്റെ “മതിലുക”ളൊന്നും അവർക്കു തടസ്സമല്ല. ദൈവ​ത്തോ​ടുള്ള നിർമ​ല​ത​യു​ടെ കാര്യ​ത്തിൽ അവർ വിട്ടു​വീഴ്‌ച ചെയ്യു​ന്നില്ല. എന്നാൽ നാസി ജർമനി​യി​ലെ ഹിറ്റ്‌ലറെ വാഴ്‌ത്താൻ വിസമ്മ​തിച്ച്‌ ‘ആയുധ​ങ്ങൾക്കി​ട​യിൽ വീണ’ ആയിര​ക്ക​ണ​ക്കി​നു സാക്ഷി​ക​ളെ​പ്പോ​ലെ അവർ മരണം വരിക്കാൻ മനസ്സൊ​രു​ക്കം കാട്ടുന്നു.

¹⁹ ദൈവ​ത്തി​ന്റെ ആധുനി​ക​കാല വെട്ടു​ക്കി​ളി​സൈ​ന്യം ക്രൈ​സ്‌ത​വ​ലോ​ക​മാ​കുന്ന “പട്ടണത്തിൽ” സമ്പൂർണ സാക്ഷ്യം കൊടു​ത്തി​രി​ക്കു​ന്നു. (യോവേൽ 2:9) ലോക​ത്തി​ലു​ട​നീ​ളം അവർ അങ്ങനെ ചെയ്‌തി​രി​ക്കു​ന്നു. ഇപ്പോ​ഴും അനേകം പ്രതി​ബ​ന്ധങ്ങൾ തരണം ചെയ്‌തു​കൊണ്ട്‌ യഹോ​വ​യു​ടെ സന്ദേശം പ്രഖ്യാ​പി​ക്കവേ അവർ കോടി​ക്ക​ണ​ക്കി​നു ഭവനങ്ങൾ സന്ദർശി​ക്കു​ക​യും തെരു​വി​ലുള്ള ആളുകളെ സമീപി​ക്കു​ക​യും ഫോണി​ലൂ​ടെ ആളുക​ളോ​ടു സംസാ​രി​ക്കു​ക​യും സാധ്യ​മായ മറ്റു വിധങ്ങ​ളിൽ അവരു​മാ​യി ബന്ധപ്പെ​ടു​ക​യും ചെയ്യുന്നു. തീർച്ച​യാ​യും, അവർ ശതകോ​ടി​ക്ക​ണ​ക്കി​നു ബൈബിൾ പ്രസി​ദ്ധീ​ക​ര​ണങ്ങൾ വിതരണം ചെയ്‌തി​രി​ക്കു​ന്നു, പരസ്യ​മാ​യും വീടു​തോ​റും അനവരതം നടത്തി​ക്കൊ​ണ്ടി​രി​ക്കുന്ന ശുശ്രൂ​ഷ​യിൽ അവർ അനേകം പ്രസി​ദ്ധീ​ക​ര​ണങ്ങൾ ഇനിയും വിതരണം ചെയ്യും.—പ്രവൃ​ത്തി​കൾ 20:20, 21.

20. ആധുനി​ക​കാല വെട്ടു​ക്കി​ളി​കളെ പിന്തു​ണ​യ്‌ക്കു​ന്നത്‌ ആർ, എന്തു ഫലങ്ങ​ളോ​ടെ?

²⁰ വെട്ടു​ക്കി​ളി​ക​ളു​ടെ ഒരു വൻ​സൈ​ന്യം സൂര്യ​നെ​യും ചന്ദ്ര​നെ​യും നക്ഷത്ര​ങ്ങ​ളെ​യും മറയ്‌ക്കുന്ന ഒരു മേഘം പോ​ലെ​യാ​ണെന്നു യോവേൽ 2:10 പ്രകട​മാ​ക്കു​ന്നു. (യെശയ്യാ​വു 60:8 താരത​മ്യം ചെയ്യുക.) ഈ സൈന്യ​ത്തി​ന്റെ പിന്നിൽ ആരാണെന്ന കാര്യ​ത്തിൽ എന്തെങ്കി​ലും സംശയ​മു​ണ്ടോ? വെട്ടു​ക്കി​ളി​ക​ളു​ടെ ആരവ​ത്തെ​യും കവിഞ്ഞ്‌ യോവേൽ 2:11-ലെ ഈ വാക്കുകൾ നാം കേൾക്കു​ന്നു: “യഹോവ തന്റെ സൈന്യ​ത്തിൻമു​മ്പിൽ മേഘനാ​ദം കേൾപ്പി​ക്കു​ന്നു; അവന്റെ പാളയം അത്യന്തം വലുതും അവന്റെ വചനം അനുഷ്‌ഠി​ക്കു​ന്നവൻ ശക്തിയു​ള്ള​വ​നും തന്നേ; യഹോ​വ​യു​ടെ ദിവസം വലുതും അതിഭ​യ​ങ്ക​ര​വു​മാ​കു​ന്നു; സഹിക്കാ​കു​ന്നവൻ ആർ?” അതേ, തന്റെ മഹാദി​വ​സ​ത്തി​നു​മു​മ്പാ​യി യഹോ​വ​യാം ദൈവം ഇപ്പോൾ വെട്ടു​ക്കി​ളി​സൈ​ന്യ​ത്തെ അയയ്‌ക്കു​ക​യാണ്‌.

‘യഹോവ താമസി​ക്കു​ന്നില്ല’

21. ‘യഹോ​വ​യു​ടെ ദിവസം കള്ളനെ​പ്പോ​ലെ വരു​മ്പോൾ’ എന്തു സംഭവി​ക്കും?

²¹ യോ​വേ​ലി​നെ​പ്പോ​ലെ പത്രൊസ്‌ അപ്പോ​സ്‌ത​ല​നും യഹോ​വ​യു​ടെ മഹാദി​വ​സ​ത്തെ​ക്കു​റി​ച്ചു സംസാ​രി​ച്ചു. അവനെ​ഴു​തി: “കർത്താ​വി​ന്റെ [“യഹോ​വ​യു​ടെ,” NW] ദിവസ​മോ കള്ളനെ​പ്പോ​ലെ വരും. അന്നു ആകാശം കൊടു​മ്മു​ഴ​ക്ക​ത്തോ​ടെ ഒഴിഞ്ഞു​പോ​കും; മൂലപ​ദാർത്ഥങ്ങൾ കത്തിയ​ഴി​ക​യും ഭൂമി​യും അതിലുള്ള പണിക​ളും വെന്തു​പോ​ക​യും ചെയ്യും.” (2 പത്രൊസ്‌ 3:10) പിശാ​ചായ സാത്താന്റെ സ്വാധീ​ന​ത്തിൻകീ​ഴിൽ, ദുഷ്ടഗ​വൺമെൻറു​ക​ളാ​കുന്ന “ആകാശം” ദൈവ​ത്തിൽനിന്ന്‌ അന്യപ്പെട്ട മനുഷ്യ​വർഗ​മാ​കുന്ന “ഭൂമി”ക്കുമേൽ ഭരണം നടത്തു​ക​യാണ്‌. (എഫെസ്യർ 6:12; 1 യോഹ​ന്നാൻ 5:19) യഹോ​വ​യു​ടെ മഹാദി​വ​സ​ത്തി​ലെ ദിവ്യ​ക്രോ​ധ​ത്തി​ന്റെ ചൂടിനെ ഈ പ്രതീ​കാ​ത്മക ആകാശ​വും ഭൂമി​യും അതിജീ​വി​ക്കു​ക​യില്ല. പകരം, അവയുടെ സ്ഥാനത്ത്‌ “നാം അവന്റെ വാഗ്‌ദ​ത്ത​പ്ര​കാ​രം” കാത്തി​രി​ക്കുന്ന ‘നീതി വസിക്കുന്ന പുതിയ ആകാശ​വും പുതിയ ഭൂമി’യും വരും.—2 പത്രൊസ്‌ 3:13.

22, 23. (എ) യഹോവ കരുണാ​പൂർവം പ്രകട​മാ​ക്കുന്ന ക്ഷമയോ​ടു നാമെ​ങ്ങനെ പ്രതി​ക​രി​ക്കണം? (ബി) യഹോ​വ​യു​ടെ ദിവസം സമീപി​ച്ചി​രി​ക്കു​ന്ന​തി​നാൽ നാം എങ്ങനെ പ്രതി​ക​രി​ക്കണം?

²² ഇന്നത്തെ ശ്രദ്ധാ​ശൈ​ഥി​ല്യ​ങ്ങ​ളും വിശ്വാ​സ​ത്തി​ന്റെ പരി​ശോ​ധ​ന​ക​ളു​മൊ​ക്കെ നിമിത്തം കാലം സംബന്ധിച്ച അടിയ​ന്തി​ര​താ​ബോ​ധം നമുക്കു നഷ്ടപ്പെ​ട്ടേ​ക്കാം. എന്നാൽ പ്രതീ​കാ​ത്മക വെട്ടു​ക്കി​ളി​കൾ അധിക​മ​ധി​കം മുന്നേ​റി​ക്കൊ​ണ്ടി​രി​ക്കവേ, അനേക​മാ​ളു​കൾ രാജ്യ​സ​ന്ദേ​ശ​ത്തോ​ടു പ്രതി​ക​രി​ക്കു​ന്നു. ദൈവം ഇതിനു സമയം അനുവ​ദി​ച്ചി​ട്ടു​ണ്ടെ​ങ്കി​ലും, അവന്റെ ക്ഷമയെ നാം താമസ​മാ​യി തെറ്റി​ദ്ധ​രി​ക്ക​രുത്‌. “ചിലർ താമസം എന്നു വിചാ​രി​ക്കു​ന്ന​തു​പോ​ലെ കർത്താവു [“യഹോവ,” NW] തന്റെ വാഗ്‌ദത്തം നിവർത്തി​പ്പാൻ താമസി​ക്കു​ന്നില്ല. ആരും നശിച്ചു​പോ​കാ​തെ എല്ലാവ​രും മാനസാ​ന്ത​ര​പ്പെ​ടു​വാൻ അവൻ ഇച്ഛിച്ചു നിങ്ങ​ളോ​ടു ദീർഘക്ഷമ കാണി​ക്കു​ന്ന​തേ​യു​ള്ളു.”—2 പത്രൊസ്‌ 3:9.

²³ നാം യഹോ​വ​യു​ടെ മഹാദി​വ​സ​ത്തി​നാ​യി കാത്തി​രി​ക്കവേ, 2 പത്രൊസ്‌ 3:11, 12-ൽ രേഖ​പ്പെ​ടു​ത്തി​യി​രി​ക്കുന്ന പത്രൊ​സി​ന്റെ വാക്കുകൾ നമുക്കു ഗൗരവ​മാ​യെ​ടു​ക്കാം: “ഇങ്ങനെ ഇവ ഒക്കെയും അഴിവാ​നു​ള്ള​താ​യി​രി​ക്ക​യാൽ ആകാശം ചുട്ടഴി​വാ​നും മൂലപ​ദാർത്ഥങ്ങൾ വെന്തു​രു​കു​വാ​നും ഉള്ള ദൈവ​ദി​വ​സ​ത്തി​ന്റെ വരവു കാത്തി​രു​ന്നും ബദ്ധപ്പെ​ടു​ത്തി​യും​കൊ​ണ്ടു നിങ്ങൾ എത്ര വിശു​ദ്ധ​ജീ​വ​ന​വും ഭക്തിയും ഉള്ളവർ ആയിരി​ക്കേണം.” തീർച്ച​യാ​യും, അന്ത്യം വരുന്ന​തി​നു​മുമ്പ്‌ രാജ്യ​സു​വാർത്ത പ്രസം​ഗി​ക്കു​ന്ന​തിൽ ക്രമമായ, അർഥവ​ത്തായ ഒരു പങ്കുണ്ടാ​യി​രി​ക്കു​ന്ന​തി​ലൂ​ടെ നാം യഹോ​വ​യു​ടെ വെട്ടു​ക്കി​ളി​സൈ​ന്യ​ത്തി​നോ​ടൊ​പ്പം പോകു​ന്നത്‌ ഈ പ്രവൃ​ത്തി​ക​ളിൽ ഉൾപ്പെ​ടു​ന്നു.—മർക്കൊസ്‌ 13:10.

24, 25. (എ) യഹോ​വ​യു​ടെ വെട്ടു​ക്കി​ളി​സൈ​ന്യ​ത്തി​ന്റെ പ്രവർത്ത​ന​ത്തിൽ പങ്കെടു​ക്കു​ക​യെന്ന പദവി​യോ​ടു നിങ്ങ​ളെ​ങ്ങനെ പ്രതി​ക​രി​ക്കു​ന്നു? (ബി) അർഥവ​ത്തായ ഏതു ചോദ്യ​മാണ്‌ യോവേൽ ഉന്നയി​ക്കു​ന്നത്‌?

²⁴ ദൈവ​ത്തി​ന്റെ വെട്ടു​ക്കി​ളി​സൈ​ന്യ​ത്തി​ന്റെ വേല യഹോ​വ​യു​ടെ വലുതും ഭയങ്കര​വു​മായ ദിവസം​വരെ തുടരും. ഈ അപ്രതി​രോ​ധ്യ വെട്ടു​ക്കി​ളി​സേ​ന​യു​ടെ അസ്‌തി​ത്വം​തന്നെ യഹോ​വ​യു​ടെ ദിവസം സമീപി​ച്ചി​രി​ക്കു​ന്നു എന്നതിന്റെ ശ്രദ്ധേ​യ​മായ തെളി​വാണ്‌. യഹോ​വ​യു​ടെ വലുതും ഭയജന​ക​വു​മായ ദിവസ​ത്തി​നു​മു​മ്പത്തെ അവസാന ആക്രമ​ണ​ത്തിൽ ദൈവ​ത്തി​ന്റെ അഭിഷിക്ത വെട്ടു​ക്കി​ളി​ക​ളോ​ടും അവരുടെ സഹകാ​രി​ക​ളോ​ടു​മൊ​പ്പം സേവി​ക്കു​ന്ന​തിൽ നിങ്ങൾക്ക്‌ ആഹ്ലാദ​മി​ല്ലേ?

²⁵ യഹോ​വ​യു​ടെ ദിവസം എത്ര വലുതാ​യി​രി​ക്കും! അപ്പോൾ, അതു “സഹിക്കാ​കു​ന്നവൻ ആർ?” എന്ന ചോദ്യം ഉന്നയി​ക്ക​പ്പെ​ടു​ന്ന​തിൽ അതിശ​യി​ക്കാ​നില്ല. (യോവേൽ 2:11) ഈ ചോദ്യ​വും മറ്റു പല ചോദ്യ​ങ്ങ​ളും അടുത്ത രണ്ടു ലേഖന​ങ്ങ​ളിൽ പരിചി​ന്തി​ക്കു​ന്ന​താ​യി​രി​ക്കും.

നിങ്ങൾക്കു വിശദീ​ക​രി​ക്കാ​മോ?

◻ യഹൂദ​യു​ടെ​മേ​ലുള്ള കീടബാ​ധ​യെ​ക്കു​റിച്ച്‌ യഹോവ മുന്നറി​യി​പ്പു നൽകി​യത്‌ എന്തു​കൊണ്ട്‌?

◻ യോ​വേൽപ്ര​വ​ച​ന​ത്തി​ന്റെ ആധുനി​ക​കാല നിവൃ​ത്തി​യിൽ ആരാണ്‌ യഹോ​വ​യു​ടെ വെട്ടു​ക്കി​ളി​കൾ?

◻ ക്രൈ​സ്‌ത​വ​ലോ​ക​ത്തി​ലെ നേതാ​ക്ക​ന്മാർ വെട്ടു​ക്കി​ളി​ബാ​ധ​യോ​ടു പ്രതി​ക​രി​ക്കു​ന്ന​തെ​ങ്ങനെ, അവരിൽ ചിലർക്ക്‌ അതിന്റെ അനന്തര​ഫ​ല​ങ്ങ​ളിൽനിന്ന്‌ എങ്ങനെ രക്ഷപ്പെ​ടാൻ സാധി​ക്കും?

◻ 20-ാം നൂറ്റാ​ണ്ടിൽ വെട്ടു​ക്കി​ളി​ബാധ എത്ര വ്യാപ​ക​മാ​യി​രു​ന്നു, എപ്പോൾവരെ അതു തുടരും?

[9-ാം പേജിലെ ചിത്രം]

വെട്ടുക്കിളിബാധ അതി​നെ​ക്കാൾ മോശ​മായ ഒന്നിന്റെ മുൻകു​റി​യാ​യി​രു​ന്നു

[കടപ്പാട]

ഇലരഹിത വൃക്ഷം: FAO photo/G. Singh

[10-ാം പേജിലെ ചിത്രം]

ആധുനികകാല വെട്ടു​ക്കി​ളി​ബാ​ധ​യു​ടെ പിന്നിൽ യഹോ​വ​യാം ദൈവ​മാ​ണു​ള്ളത്‌

[8-ാം പേജിലെ ചിത്ര​ത്തിന്‌ കടപ്പാട]

വെട്ടുക്കിളി: FAO photo/G. Tortoli; വെട്ടുക്കിളിക്കൂട്ടം: FAO photo/Desert Locust Survey