‘യഹോവ കരുണ​യും കൃപയു​മുള്ള ദൈവം’

“യഹോവ, യഹോവ, കരുണ​യും കൃപയു​മുള്ള, കോപ​ത്തി​നു താമസ​മുള്ള, സ്‌നേ​ഹ​ദ​യ​യും സത്യവും നിറഞ്ഞ ദൈവം ആകുന്നു.”—പുറപ്പാ​ടു 34:6, NW.

1. (എ) പ്രിയ​പ്പെ​ട്ടവർ നിർമല ആരാധന വിട്ടു​പോ​കു​ന്നത്‌ കാണേണ്ടി വന്നിട്ടു​ള്ള​വർക്ക്‌ ബൈബിൾ എന്ത്‌ ആശ്വാസം പ്രദാനം ചെയ്യുന്നു? (ബി) വഴി​തെ​റ്റി​പ്പോ​യ​വരെ യഹോവ എങ്ങനെ വീക്ഷി​ക്കു​ന്നു?

“എന്റെ പുത്രി ഇനിമേൽ ക്രിസ്‌തീയ സഭയി​ലേ​ക്കി​ല്ലെന്ന്‌ എന്നോടു പറഞ്ഞു. അതിനു​ശേഷം, ദിവസ​ങ്ങ​ളോ​ളം, ആഴ്‌ച​ക​ളോ​ളം, എന്തിന്‌ മാസങ്ങ​ളോ​ളം​തന്നെ, ഞാൻ വേദന​യാൽ നീറു​ക​യാ​യി​രു​ന്നു. അതു മരണ​ത്തെ​ക്കാൾ മോശ​മാ​യി​രു​ന്നു,” ഒരു ക്രിസ്‌തീയ പിതാവ്‌ പറയുന്നു. പ്രിയ​പ്പെട്ട ആരെങ്കി​ലും നിർമല ആരാധ​ന​യു​ടെ പാത വിട്ടു​പോ​കു​ന്നതു കാണു​മ്പോൾ അതു തീർച്ച​യാ​യും വ്യസന​കരം തന്നെയാണ്‌. നിങ്ങൾക്ക്‌ അത്തരം ഒരു അനുഭവം ഉണ്ടായി​ട്ടു​ണ്ടോ? ഉണ്ടെങ്കിൽ, യഹോ​വ​യ്‌ക്കു നിങ്ങ​ളോ​ടു സമാനു​ഭാ​വം ഉണ്ടെന്ന്‌ അറിഞ്ഞ്‌ നിങ്ങൾക്ക്‌ ആശ്വസി​ക്കാ​വു​ന്ന​താണ്‌. (പുറപ്പാ​ടു 3:7; യെശയ്യാ​വു 63:9) എന്നാൽ വഴി​തെറ്റി പോകുന്ന അത്തരക്കാ​രെ അവൻ എങ്ങനെ​യാണ്‌ വീക്ഷി​ക്കു​ന്നത്‌? തന്റെ പ്രീതി​യി​ലേക്കു മടങ്ങാൻ യഹോവ അവരെ കരുണാ​പൂർവം ക്ഷണിക്കു​ന്നു​വെന്ന്‌ ബൈബിൾ പ്രകട​മാ​ക്കു​ന്നു. മലാഖി​യു​ടെ നാളിലെ മത്സരി​ക​ളായ യഹൂദ​ന്മാ​രോട്‌ അവൻ അഭ്യർഥി​ച്ചു: “എന്റെ അടുക്ക​ലേക്കു മടങ്ങി​വ​രു​വിൻ; ഞാൻ നിങ്ങളു​ടെ അടുക്ക​ലേ​ക്കും മടങ്ങി​വ​രും.”—മലാഖി 3:7.

2. കരുണ യഹോ​വ​യു​ടെ വ്യക്തി​ത്വ​ത്തി​ന്റെ ഒരു അവിഭാ​ജ്യ ഘടകം ആണ്‌ എന്ന്‌ ബൈബിൾ പ്രകട​മാ​ക്കു​ന്നത്‌ എങ്ങനെ?

² സീനായ്‌ പർവത​ത്തിൽവെച്ച്‌ മോശ​യ്‌ക്ക്‌ ദൈവ​ത്തി​ന്റെ കരുണയെ കുറിച്ച്‌ വ്യക്തമായ ധാരണ ലഭിക്കു​ക​യു​ണ്ടാ​യി. അവി​ടെ​വെച്ച്‌, യഹോവ തന്നെത്തന്നെ ‘കരുണ​യും കൃപയു​മുള്ള, കോപ​ത്തി​നു താമസ​മുള്ള, സ്‌നേ​ഹ​ദ​യ​യും സത്യവും നിറഞ്ഞ ദൈവം’ ആയി വെളി​പ്പെ​ടു​ത്തി. (പുറപ്പാ​ടു 34:6, NW) കരുണ യഹോ​വ​യു​ടെ വ്യക്തി​ത്വ​ത്തി​ന്റെ ഒരു അവിഭാ​ജ്യ ഘടകം ആണ്‌ എന്ന്‌ ഈ പ്രഖ്യാ​പനം എടുത്തു​കാ​ട്ടു​ന്നു. “എല്ലാവ​രും മാനസാ​ന്ത​ര​പ്പെ​ടു​വാൻ അവൻ ഇച്ഛി”ക്കുന്നു​വെന്ന്‌ ക്രിസ്‌തീയ അപ്പൊ​സ്‌ത​ല​നായ പത്രൊസ്‌ എഴുതി. (2 പത്രൊസ്‌ 3:9) നിശ്ചയ​മാ​യും, ദൈവ​ത്തി​ന്റെ കരുണ​യ്‌ക്കു പരിധി​യുണ്ട്‌. “യാതൊ​രു കാരണ​വ​ശാ​ലും അവൻ ശിക്ഷയിൽനിന്ന്‌ ഇളവു നൽകു​ക​യില്ല” എന്ന്‌ മോശ​യോ​ടു പറയ​പ്പെട്ടു. (പുറപ്പാ​ടു 34:7, NW; 2 പത്രൊസ്‌ 2:9, 10) എന്നിരു​ന്നാ​ലും, “ദൈവം സ്‌നേഹം ആകുന്നു,” ആ ഗുണത്തി​ന്റെ ഒരു മുഖ്യ സവി​ശേഷത കരുണ​യാണ്‌. (1 യോഹ​ന്നാൻ 4:8, NW; യാക്കോബ്‌ 3:17) യഹോവ “എന്നേക്കും കോപം വെച്ചു​കൊ​ള്ളു​ന്നില്ല; ദയയി​ല​ല്ലോ അവന്നു പ്രസാ​ദ​മു​ള്ളതു.”—മീഖാ 7:18, 19.

3. കരുണയെ കുറി​ച്ചുള്ള യേശു​വി​ന്റെ കാഴ്‌ച​പ്പാട്‌ ശാസ്‌ത്രി​മാ​രു​ടേ​തിൽനി​ന്നും പരീശ​ന്മാ​രു​ടേ​തിൽനി​ന്നും വ്യത്യ​സ്‌തം ആയിരു​ന്നത്‌ എങ്ങനെ?

³ യേശു തന്റെ സ്വർഗീയ പിതാ​വി​ന്റെ ഒരു പൂർണ പ്രതി​ഫ​ലനം ആയിരു​ന്നു. (യോഹ​ന്നാൻ 5:19) ദുഷ്‌പ്ര​വൃ​ത്തി​ക്കാ​രോട്‌ കരുണാ​പൂർവം ഇടപെ​ടുക വഴി അവൻ അവരുടെ പാപത്തെ ന്യായീ​ക​രി​ക്കുക ആയിരു​ന്നില്ല, മറിച്ച്‌ ശാരീ​രിക രോഗം ഉണ്ടായി​രു​ന്ന​വ​രോ​ടു പ്രകട​മാ​ക്കിയ അതേ ആർദ്ര​ഭാ​വം​തന്നെ അവൻ അവരോ​ടും പ്രകട​മാ​ക്കുക ആയിരു​ന്നു. (മർക്കൊസ്‌ 1:40-42 താരത​മ്യം ചെയ്യുക.) അതേ, യേശു കരുണയെ ദൈവ​ത്തി​ന്റെ ന്യായ​പ്ര​മാ​ണ​ത്തി​ലെ “ഘനമേ​റിയ” സംഗതി​ക​ളു​ടെ കൂട്ടത്തിൽ പെടുത്തി. (മത്തായി 23:23) ഇതിനു കടകവി​രു​ദ്ധം ആയിരു​ന്നു ശാസ്‌ത്രി​മാ​രു​ടെ​യും പരീശ​ന്മാ​രു​ടെ​യും രീതി. എല്ലാം നിയമ​ത്തി​ന്റെ കണ്ണിലൂ​ടെ മാത്രം കണ്ടിരുന്ന അവരുടെ ചിന്തയിൽ പൊതു​വേ കരുണ​യ്‌ക്കു സ്ഥാനമി​ല്ലാ​യി​രു​ന്നു. യേശു പാപി​ക​ളോട്‌ ഇടപെ​ടു​ന്നതു കണ്ട്‌ അവർ പരാതി​പ്പെട്ടു: “ഇവൻ പാപി​കളെ കൈ​ക്കൊ​ണ്ടു അവരോ​ടു​കൂ​ടി ഭക്ഷിക്കു​ന്നു.” (ലൂക്കൊസ്‌ 15:1, 2) ദൈവ​ത്തി​ന്റെ കരുണയെ എടുത്തു​കാ​ട്ടുന്ന മൂന്നു ദൃഷ്ടാ​ന്തങ്ങൾ ഉപയോ​ഗിച്ച്‌ യേശു അവരുടെ ആരോ​പ​ണ​ത്തി​നു മറുപടി നൽകി.

4. യേശു പറഞ്ഞ രണ്ടു ദൃഷ്ടാ​ന്തങ്ങൾ ഏവ, അവ ഓരോ​ന്നി​ന്റെ​യും പൊരുൾ എന്തായി​രു​ന്നു?

⁴ ആദ്യം, 99 ആടുക​ളെ​യും വിട്ട്‌, കാണാ​തെ​പോയ ഒന്നിനെ അന്വേ​ഷി​ച്ചു​പോയ ഒരു മനുഷ്യ​നെ കുറിച്ച്‌ യേശു പറഞ്ഞു. എന്തായി​രു​ന്നു അവൻ ഉദ്ദേശി​ച്ചത്‌? ‘മാനസാ​ന്തരം ആവശ്യ​മി​ല്ലാത്ത തൊണ്ണൂ​റ്റൊ​മ്പതു നീതി​മാ​ന്മാ​രെ​ക്കു​റി​ച്ചു​ള്ള​തി​നെ​ക്കാൾ മാനസാ​ന്ത​ര​പ്പെ​ടുന്ന ഒരു പാപി​യെ​ച്ചൊ​ല്ലി സ്വർഗ്ഗ​ത്തിൽ അധികം സന്തോഷം ഉണ്ടാകും.’ അടുത്ത​താ​യി, യേശു നഷ്ടപ്പെട്ട ഒരു ദ്രഹ്മ തിരിച്ചു കിട്ടി​യ​തി​നെ തുടർന്ന്‌ ആഹ്ലാദി​ക്കുന്ന ഒരു സ്‌ത്രീ​യെ കുറിച്ചു പറഞ്ഞു. അവൻ അത്‌ എങ്ങനെ ബാധക​മാ​ക്കി? “മാനസാ​ന്ത​ര​പ്പെ​ടുന്ന ഒരു പാപി​യെ​ക്കു​റി​ച്ചു ദൈവ​ദൂ​ത​ന്മാ​രു​ടെ മദ്ധ്യേ സന്തോഷം ഉണ്ടാകും.” ഒരു ഉപമയു​ടെ രൂപത്തിൽ യേശു തന്റെ മൂന്നാ​മത്തെ ദൃഷ്ടാന്തം വിവരി​ച്ചു.a പറയ​പ്പെ​ട്ടി​ട്ടു​ള്ള​തി​ലേ​ക്കും ഏറ്റവും ഉത്‌കൃ​ഷ്ട​മായ ചെറുകഥ ആയിട്ടാണ്‌ ചിലർ അതിനെ വീക്ഷി​ക്കു​ന്നത്‌. ദൈവ​ത്തി​ന്റെ കരുണയെ വിലമ​തി​ക്കാ​നും അനുക​രി​ക്കാ​നും ഈ ഉപമയു​ടെ പരിചി​ന്തനം നമ്മെ സഹായി​ക്കും.—ലൂക്കൊസ്‌ 15:3-10.

മത്സരി​യായ ഒരു പുത്രൻ വീടു വിട്ടു​പോ​കു​ന്നു

5, 6. യേശു​വി​ന്റെ മൂന്നാ​മത്തെ ദൃഷ്ടാ​ന്ത​ത്തി​ലെ ഇളയ പുത്രൻ കടുത്ത വിലമ​തി​പ്പി​ല്ലായ്‌മ പ്രകട​മാ​ക്കി​യത്‌ എങ്ങനെ?

⁵ “ഒരു മനുഷ്യ​ന്നു രണ്ടു പുത്ര​ന്മാർ ഉണ്ടായി​രു​ന്നു. അവരിൽ ഇളയവൻ അപ്പനോ​ടു: അപ്പാ, വസ്‌തു​വിൽ എനിക്കു വരേണ്ടുന്ന പങ്കു തരേണമേ എന്നു പറഞ്ഞു; അവൻ അവർക്കു മുതൽ പകുത്തു​കൊ​ടു​ത്തു. ഏറെനാൾ കഴിയും​മു​മ്പെ ഇളയമകൻ സകലവും സ്വരൂ​പി​ച്ചു ദൂര​ദേ​ശ​ത്തേക്കു യാത്ര​യാ​യി അവിടെ ദുർന്ന​ട​പ്പു​കാ​ര​നാ​യി ജീവിച്ച്‌ വസ്‌തു നാനാ​വി​ധ​മാ​ക്കി​ക്ക​ളഞ്ഞു [“ധൂർത്ത​ടി​ച്ചു,” “NW”].”—ലൂക്കൊസ്‌ 15:11-13.b

⁶ കടുത്ത വിലമ​തി​പ്പി​ല്ലാ​യ്‌മ​യാണ്‌ ഇവിടെ ഇളയ പുത്രൻ പ്രകട​മാ​ക്കി​യത്‌. ആദ്യം, അവൻ തന്റെ അവകാശം ചോദി​ച്ചു​വാ​ങ്ങി, എന്നിട്ട്‌ “ദുർന്ന​ട​പ്പു​കാ​ര​നാ​യി ജീവിച്ച്‌” വസ്‌തു ധൂർത്ത​ടി​ച്ചു. ‘ദുർന്ന​ട​പ്പു​കാ​ര​നാ​യി ജീവിച്ചു’ എന്ന പ്രയോ​ഗം പരിഭാ​ഷ​പ്പെ​ടു​ത്തി​യി​രി​ക്കു​ന്നത്‌ “അനിയ​ന്ത്രി​ത​മായ ഹീനജീ​വി​തം നയിക്കൽ” എന്ന്‌ അർഥമുള്ള ഗ്രീക്കു പദത്തിൽനി​ന്നാണ്‌. “ധാർമിക സ്വഭാവം പൂർണ​മാ​യി വെടി​യുക” എന്ന അർഥമാണ്‌ പ്രസ്‌തുത പദത്തിന്‌ ഉള്ളതെന്ന്‌ ഒരു പണ്ഡിതൻ പറയുന്നു. അതു​കൊ​ണ്ടു​തന്നെ, യേശു​വി​ന്റെ ഉപമയി​ലെ യുവാ​വി​നെ ധൂർത്ത പുത്രൻ എന്നു വിളി​ക്കു​ന്നു. ആ പദം ആർഭാട ജീവി​ത​ത്തി​നാ​യി വീണ്ടു​വി​ചാ​രം ഇല്ലാതെ സമ്പത്ത്‌ പാഴാ​ക്കുന്ന ഒരു വ്യക്തിയെ വർണി​ക്കു​ന്നു.

7. ഇന്നു ധൂർത്ത പുത്ര​നോട്‌ സദൃശർ ആയിരി​ക്കു​ന്നത്‌ ആർ, അത്തരത്തി​ലുള്ള അനേക​രും ‘ദൂര​ദേ​ശത്ത്‌’ സ്വാത​ന്ത്ര്യം തേടു​ന്നത്‌ എന്തു​കൊണ്ട്‌?

⁷ ധൂർത്ത പുത്ര​നോ​ടു സദൃശർ ആയിരി​ക്കുന്ന ആളുകൾ ഇന്ന്‌ ഉണ്ടോ? ഉണ്ട്‌. സങ്കടക​ര​മെന്നു പറയട്ടെ, താരത​മ്യേന ഒരു ചെറിയ കൂട്ടം ആളുകൾ നമ്മുടെ സ്വർഗീയ പിതാ​വായ യഹോ​വ​യു​ടെ സുരക്ഷിത “ഭവനം” ഉപേക്ഷി​ച്ചു പോയി​രി​ക്കു​ന്നു. (1 തിമൊ​ഥെ​യൊസ്‌ 3:15, NW) ദൈവ​ഭ​വ​ന​ത്തിൽ എന്തിനും ഏതിനും നിയ​ന്ത്ര​ണങ്ങൾ ആണെന്നും യഹോ​വ​യു​ടെ ജാഗരൂ​ക​മായ കണ്ണുകൾ സംരക്ഷ​ണ​ത്തെ​ക്കാൾ ഒരു തടസ്സമാ​ണെ​ന്നും ഇവരിൽ ചിലർക്കു തോന്നു​ന്നു. (സങ്കീർത്തനം 32:8 താരത​മ്യം ചെയ്യുക.) ബൈബിൾ തത്ത്വങ്ങൾക്കു ചേർച്ച​യിൽ വളർത്ത​പ്പെ​ട്ടവൾ ആയിരു​ന്നി​ട്ടും പിന്നീട്‌ മദ്യവും മയക്കു​മ​രു​ന്നും ഉപയോ​ഗി​ക്കു​ന്നതു ശീലമാ​ക്കിയ ഒരു ക്രിസ്‌തീയ സ്‌ത്രീ​യു​ടെ കാര്യം പരിചി​ന്തി​ക്കുക. തന്റെ ജീവി​ത​ത്തി​ലെ ആ ഇരുണ്ട ഘട്ടത്തി​ലേക്കു നോക്കി​ക്കൊണ്ട്‌, അവൾ പറയുന്നു: “എനിക്കു മെച്ചമാ​യി ജീവി​ക്കാൻ സാധി​ക്കു​മെന്നു തെളി​യി​ക്കാൻ ഞാൻ ആഗ്രഹി​ച്ചു. എന്റെ ഇഷ്ടം അനുസ​രി​ച്ചു ജീവി​ക്കാൻ ഞാൻ ആഗ്രഹി​ച്ചു. ആരും എന്നെ ഉപദേ​ശി​ക്കു​ന്നത്‌ എനിക്ക്‌ ഇഷ്ടമല്ലാ​യി​രു​ന്നു.” ധൂർത്ത പുത്ര​നെ​പ്പോ​ലെ, ഈ യുവതി സ്വാത​ന്ത്ര്യം തേടി​പ്പോ​യി. ഫലം ദുരന്ത​പൂർണം ആയിരു​ന്നു, തിരു​വെ​ഴു​ത്തു വിരു​ദ്ധ​മായ പ്രവൃ​ത്തി​കൾക്ക്‌ അവൾ ക്രിസ്‌തീയ സഭയിൽനി​ന്നു പുറത്താ​ക്ക​പ്പെട്ടു.—1 കൊരി​ന്ത്യർ 5:11-13.

8. (എ) ദൈവ​ത്തി​ന്റെ നിലവാ​ര​ങ്ങൾക്കു വിപരീ​ത​മാ​യി ജീവി​ക്കാൻ ആഗ്രഹി​ക്കു​ന്ന​വർക്ക്‌ എന്തു സഹായം നൽകാ​നാ​കും? (ബി) ആരാധ​ന​യു​ടെ കാര്യ​ത്തിൽ ഒരുവന്റെ തിര​ഞ്ഞെ​ടു​പ്പിന്‌ ഗൗരവ​മായ ശ്രദ്ധ നൽകേ​ണ്ടത്‌ എന്തു​കൊണ്ട്‌?

⁸ ഒരു സഹവി​ശ്വാ​സി ദൈവ​ത്തി​ന്റെ നിലവാ​ര​ങ്ങൾക്കു വിപരീ​ത​മാ​യി ജീവി​ക്കാ​നുള്ള ആഗ്രഹം പ്രകട​മാ​ക്കു​ന്നത്‌ ശരിക്കും ഹൃദയ​ഭേ​ദ​ക​മാണ്‌. (ഫിലി​പ്പി​യർ 3:18) ഇതു സംഭവി​ക്കു​മ്പോൾ, മൂപ്പന്മാ​രും ആത്മീയ യോഗ്യ​ത​യുള്ള മറ്റുള്ള​വ​രും ദുഷ്‌പ്ര​വൃ​ത്തി​ക്കാ​രനെ യഥാസ്ഥാ​ന​പ്പെ​ടു​ത്താൻ കഠിന ശ്രമം ചെയ്യുന്നു. (ഗലാത്യർ 6:1) എന്നിരു​ന്നാ​ലും, ക്രിസ്‌തീയ ശിഷ്യ​ത്വ​ത്തി​ന്റെ നുകം സ്വീക​രി​ക്കാൻ ആരും നിർബ​ന്ധി​ക്ക​പ്പെ​ടു​ന്നില്ല. (മത്തായി 11:28-30; 16:24) പ്രായ​പൂർത്തി​യെ​ത്തു​ന്ന​തോ​ടെ, ആരാധ​ന​യു​ടെ കാര്യ​ത്തിൽ യുവജ​ന​ങ്ങൾപോ​ലും വ്യക്തി​പ​ര​മായ തീരു​മാ​നം എടുക്കണം. ആത്യന്തി​ക​മാ​യി, നാം ഓരോ​രു​ത്ത​രും സ്വതന്ത്ര ധാർമിക കാര്യ​സ്ഥ​ന്മാ​രാണ്‌, ഓരോ​രു​ത്ത​രും ദൈവ​ത്തോ​ടു വ്യക്തി​പ​ര​മാ​യി കണക്കു ബോധി​പ്പി​ക്കേ​ണ്ട​വ​രാണ്‌. (റോമർ 14:12) നിശ്ചയ​മാ​യും, നാം “വിതെ​ക്കു​ന്നതു തന്നേ കൊയ്യും”—യേശു​വി​ന്റെ ഉപമയി​ലെ ധൂർത്ത പുത്രൻ താമസി​യാ​തെ​തന്നെ ആ പാഠം പഠിക്കാൻ പോകു​ക​യാ​യി​രു​ന്നു.—ഗലാത്യർ 6:7, 8.

ഒരു ദൂര​ദേ​ശത്ത്‌ നിരാ​ശ​യിൽ

9, 10. (എ) ധൂർത്ത പുത്രന്റെ സാഹച​ര്യ​ത്തിന്‌ എന്തു മാറ്റം വന്നു, അവൻ അതി​നോട്‌ എങ്ങനെ പ്രതി​ക​രി​ച്ചു? (ബി) ഇന്ന്‌ സത്യാ​രാ​ധന ഉപേക്ഷി​ക്കു​ന്നവർ ധൂർത്ത പുത്ര​ന്റേ​തി​നോ​ടു സമാന​മായ ശോച്യാ​വസ്ഥ അനുഭ​വി​ക്കു​ന്നത്‌ എങ്ങനെ​യെന്ന്‌ ദൃഷ്ടാ​ന്തീ​ക​രി​ക്കുക.

⁹ “എല്ലാം ചെലവ​ഴി​ച്ച​ശേഷം ആ ദേശത്തു കഠിന​ക്ഷാ​മം ഉണ്ടായി​ട്ടു അവന്നു മുട്ടു വന്നുതു​ടങ്ങി. അവൻ ആ ദേശത്തി​ലെ പൌര​ന്മാ​രിൽ ഒരുത്തനെ ചെന്നു ആശ്രയി​ച്ചു; അവൻ അവനെ തന്റെ വയലിൽ പന്നികളെ മേയ്‌പാൻ അയച്ചു. പന്നി തിന്നുന്ന വാളവ​ര​കൊ​ണ്ടു വയറു നിറെ​പ്പാൻ അവൻ ആഗ്രഹി​ച്ചു എങ്കിലും ആരും അവന്നു കൊടു​ത്തില്ല.”—ലൂക്കൊസ്‌ 15:14-16.

¹⁰ നിർധ​ന​നാ​യി​ട്ടും, ധൂർത്ത പുത്രൻ സ്വന്തം ഭവനത്തി​ലേക്കു മടങ്ങി​പ്പോ​കുന്ന കാര്യം ചിന്തി​ച്ചില്ല. പകരം, അവിടത്തെ ഒരു പൗരനെ കണ്ട്‌ പന്നികളെ മേയ്‌ക്കുന്ന ജോലി​യിൽ പ്രവേ​ശി​ച്ചു. മോ​ശൈക ന്യായ​പ്ര​മാ​ണം അനുസ​രിച്ച്‌ പന്നികൾ അശുദ്ധ മൃഗങ്ങ​ളാണ്‌. അതു​കൊണ്ട്‌ ഒരു യഹൂദനെ സംബന്ധി​ച്ചി​ട​ത്തോ​ളം ആ ജോലി അസ്വീ​കാ​ര്യം ആയിരു​ന്നി​രി​ക്കണം. (ലേവ്യ​പു​സ്‌തകം 11:7, 8) എന്നാൽ ഇവിടെ ധൂർത്ത പുത്രന്‌ മനസ്സാ​ക്ഷി​ക്കുത്ത്‌ അനുഭ​വ​പ്പെ​ട്ടാൽത്തന്നെ, അത്‌ അടിച്ച​മർത്താ​നേ നിവൃത്തി ഉണ്ടായി​രു​ന്നു​ള്ളൂ. എന്തൊ​ക്കെ​യാ​യാ​ലും, നിർധ​ന​നായ ഒരു പരദേ​ശി​യു​ടെ വികാ​ര​ങ്ങളെ ഒരു തദ്ദേശ പൗരനായ തന്റെ തൊഴി​ലു​ടമ മാനി​ക്കു​മെന്ന്‌ അവനു പ്രതീ​ക്ഷി​ക്കാ​നാ​വി​ല്ല​ല്ലോ. ഈ ധൂർത്ത പുത്രന്റെ ശോച്യാ​വസ്ഥ, ഇന്ന്‌ നിർമല ആരാധ​ന​യു​ടെ നേർഗതി ഉപേക്ഷി​ക്കുന്ന അനേക​രു​ടെ​യും അനുഭ​വ​ത്തോ​ടു സമാന​മാണ്‌. പലപ്പോ​ഴും, മുമ്പ്‌ മോശ​മാ​യി വീക്ഷി​ച്ചി​രുന്ന പ്രവർത്ത​ന​ങ്ങ​ളിൽ അത്തരക്കാർ ഏർപ്പെ​ടു​ന്നു. ഉദാഹ​ര​ണ​ത്തിന്‌, ഒരു 17 വയസ്സു​കാ​രൻ ക്രിസ്‌തീയ വളർത്ത​ലി​നെ​തി​രെ മത്സരിച്ചു. “അധാർമി​ക​ത​യും മയക്കു​മ​രു​ന്നി​ന്റെ ദുരു​പ​യോ​ഗ​വും, വർഷങ്ങ​ളോ​ള​മുള്ള ബൈബി​ള​ധി​ഷ്‌ഠിത പഠിപ്പി​ക്ക​ലു​ക​ളു​ടെ സ്വാധീ​നത്തെ ഇല്ലായ്‌മ ചെയ്‌തു” എന്ന്‌ അവൻ സമ്മതി​ക്കു​ന്നു. താമസി​യാ​തെ, ആയുധ​മേന്തി കൊല​യും കൊള്ള​യും നടത്തി​യ​തിന്‌ ഈ യുവാവ്‌ ജയിലി​ലാ​യി. പിന്നീട്‌ ആത്മീയ​മാ​യി സുഖം പ്രാപി​ച്ചെ​ങ്കി​ലും, “പാപത്തി​ന്റെ തല്‌ക്കാ​ല​ഭോഗ”ത്തിന്‌ [“താത്‌കാ​ലിക ആസ്വാ​ദ​ന​ത്തിന്‌,” NW] അവൻ ഒടു​ക്കേ​ണ്ടി​വന്ന വില എത്ര വലിയ​താ​യി​രു​ന്നു!—എബ്രായർ 11:24-26 താരത​മ്യം ചെയ്യുക.

11. ധൂർത്ത പുത്രന്റെ ദുരിതം വർധി​ച്ചത്‌ എങ്ങനെ, ഈ ലോക​ത്തി​ന്റെ വശ്യതകൾ “വെറും വഞ്ചന” ആണെന്ന്‌ ഇന്നു ചിലർ തിരി​ച്ച​റി​ഞ്ഞി​രി​ക്കു​ന്നത്‌ എങ്ങനെ?

¹¹ ‘ആരും അവന്‌ ഒന്നും കൊടു​ത്തില്ല’ എന്നതി​നാൽ അവന്റെ ദുരിതം വർധി​ക്കുക ആയിരു​ന്നു. അവനു പുതു​താ​യി കിട്ടിയ സുഹൃ​ത്തു​ക്കൾ എവിടെ ആയിരു​ന്നു? ചില്ലി​ക്കാ​ശു​പോ​ലും കയ്യിലി​ല്ലാ​തെ വന്നപ്പോൾ അവർക്ക്‌ അവനോട്‌ ‘വെറുപ്പ്‌’ തോന്നി​യി​രി​ക്കണം. (സദൃശ​വാ​ക്യ​ങ്ങൾ 14:20, പി.ഒ.സി. ബൈബിൾ) സമാന​മാ​യി, ഇന്ന്‌ വിശ്വാ​സം വിട്ടു​പോ​കു​ന്ന​വർക്ക്‌ ഈ ലോക​ത്തി​ന്റെ വശ്യത​ക​ളും വീക്ഷണ​ങ്ങ​ളും “വെറും വഞ്ചന” ആണെന്ന്‌ താമസി​യാ​തെ ബോധ്യ​മാ​കു​ന്നു. (കൊ​ലൊ​സ്സ്യർ 2:8) കുറച്ചു​കാ​ലം ദൈവ​ത്തി​ന്റെ സംഘട​ന​യിൽനി​ന്നു മാറി​നിന്ന ഒരു യുവതി പറയുന്നു: “യഹോ​വ​യു​ടെ മാർഗ​നിർദേ​ശങ്ങൾ ഇല്ലാതെ ഞാൻ ഏറെ കഷ്ടവും ഹൃദയ​വേ​ദ​ന​യും അനുഭ​വി​ച്ചു. ലോക​ത്തോട്‌ അനുരൂ​പ​പ്പെ​ടാൻ ശ്രമി​ച്ചെ​ങ്കി​ലും, ഞാൻ ശരിക്കും അവരെ​പ്പോ​ലെ അല്ലാത്ത​തു​കൊണ്ട്‌ അവർ എന്നെ നിരസി​ച്ചു. എനിക്കു വഴി​തെ​റ്റി​യെ​ന്നും എന്നെ വഴിന​യി​ക്കാൻ എനിക്ക്‌ ഒരു പിതാ​വി​നെ ആവശ്യ​മാ​ണെ​ന്നും തോന്നി. എനിക്ക്‌ യഹോ​വയെ ആവശ്യ​മാ​ണെന്ന്‌ ഞാൻ തിരി​ച്ച​റി​ഞ്ഞത്‌ അപ്പോ​ഴാണ്‌. പിന്നെ ഒരിക്ക​ലും അവനിൽനി​ന്നു സ്വത​ന്ത്ര​യാ​കാൻ ആഗ്രഹി​ച്ചി​ട്ടില്ല.” യേശു​വി​ന്റെ ഉപമയി​ലെ ധൂർത്ത പുത്ര​നും സമാന​മായ തിരി​ച്ച​റിവ്‌ ഉണ്ടായി.

ധൂർത്ത പുത്രനു സുബോ​ധം വരുന്നു

12, 13. ഇന്നു ചിലർക്കു സുബോ​ധം വരാൻ എന്തെല്ലാം സംഗതി​കൾ സഹായി​ച്ചി​രി​ക്കു​ന്നു? (ചതുരം കാണുക.)

¹² “അപ്പോൾ സുബോ​ധം വന്നിട്ടു അവൻ: എന്റെ അപ്പന്റെ എത്ര കൂലി​ക്കാർ ഭക്ഷണം കഴിച്ചു ശേഷി​പ്പി​ക്കു​ന്നു; ഞാനോ വിശപ്പു​കൊ​ണ്ടു നശിച്ചു​പോ​കു​ന്നു. ഞാൻ എഴു​ന്നേ​ററു അപ്പന്റെ അടുക്കൽ ചെന്നു അവനോ​ടു: അപ്പാ, ഞാൻ സ്വർഗ്ഗ​ത്തോ​ടും നിന്നോ​ടും പാപം ചെയ്‌തി​രി​ക്കു​ന്നു. ഇനി നിന്റെ മകൻ എന്ന പേരിന്നു ഞാൻ യോഗ്യ​നല്ല; നിന്റെ കൂലി​ക്കാ​രിൽ ഒരുത്ത​നെ​പ്പോ​ലെ എന്നെ ആക്കേണമേ എന്നു പറയും എന്നു പറഞ്ഞു. അങ്ങനെ അവൻ എഴു​ന്നേ​ററു അപ്പന്റെ അടുക്കൽ പോയി.”—ലൂക്കൊസ്‌ 15:17-20.

¹³ ധൂർത്ത പുത്രനു “സുബോ​ധം വന്നു.” കുറച്ചു കാലമാ​യി, അവൻ ഒരു സ്വപ്‌ന ലോക​ത്തിൽ എന്നപോ​ലെ സുഖ​ലോ​ലു​പ​ത​യിൽ മുഴു​കി​യി​രി​ക്കുക ആയിരു​ന്നു. എന്നാൽ ഇപ്പോൾ അവൻ തന്റെ യഥാർഥ ആത്മീയ അവസ്ഥയെ കുറിച്ച്‌ അത്യന്തം ബോധ​വാൻ ആയിരി​ക്കു​ന്നു. അതേ, വീണു​പോ​യെ​ങ്കി​ലും, ഈ യുവാ​വിന്‌ അപ്പോ​ഴും പ്രത്യാ​ശ​യ്‌ക്കു വക ഉണ്ടായി​രു​ന്നു. അവനിൽ ഏതാനും നല്ല ഗുണങ്ങൾ കാണാ​നാ​കും. (സദൃശ​വാ​ക്യ​ങ്ങൾ 24:16; 2 ദിനവൃ​ത്താ​ന്തം 19:2, 3 താരത​മ്യം ചെയ്യുക.) ഇന്ന്‌ ദൈവ​ത്തി​ന്റെ ആട്ടിൻകൂ​ട്ടം വിട്ടു​പോ​കു​ന്ന​വ​രു​ടെ കാര്യ​മോ? സകലരും തങ്ങളുടെ മത്സരഗ​തി​യാൽ ദൈവ​ത്തി​ന്റെ പരിശു​ദ്ധാ​ത്മാ​വിന്‌ എതിരാ​യി പാപം ചെയ്‌തു​വെ​ന്നും അതു​കൊണ്ട്‌ അവർക്കാർക്കും രക്ഷയി​ല്ലെ​ന്നും നിഗമനം ചെയ്യു​ന്നത്‌ ന്യായ​യു​ക്തം ആയിരി​ക്കു​മോ? (മത്തായി 12:31, 32) ആയിരി​ക്ക​ണ​മെ​ന്നില്ല. അവരിൽ പലരും തങ്ങളുടെ വഴിപി​ഴച്ച ഗതിയിൽ വേദനി​ക്കു​ന്ന​വ​രാണ്‌, കാല​ക്ര​മേണ അവരിൽ അനേകർക്കും സുബോ​ധം വരുന്നു. ദൈവ​ത്തി​ന്റെ സംഘട​ന​യിൽനിന്ന്‌ അകന്നു​നിന്ന കാലത്തെ അനുസ്‌മ​രി​ച്ചു​കൊണ്ട്‌ ഒരു സഹോ​ദരി പറയുന്നു: “ഞാൻ ഒരിക്ക​ലും, എന്തിന്‌ ഒരു ദിവസം​പോ​ലും, യഹോ​വയെ മറന്നില്ല. എന്നെങ്കി​ലും, എങ്ങനെ​യെ​ങ്കി​ലും എന്നെ സത്യത്തി​ലേക്കു തിരി​ച്ചെ​ടു​ക്ക​ണമേ എന്നായി​രു​ന്നു അവനോട്‌ ഞാൻ എന്നും പ്രാർഥി​ച്ചി​രു​ന്നത്‌.”—സങ്കീർത്തനം 119:176.

14. ധൂർത്ത പുത്രൻ എന്തു നിശ്ചയി​ച്ചു​റച്ചു, അങ്ങനെ ചെയ്യു​ന്ന​തിൽ അവൻ താഴ്‌മ പ്രകട​മാ​ക്കി​യത്‌ എങ്ങനെ?

¹⁴ എന്നാൽ വഴി തെറ്റി​യ​വർക്ക്‌ തങ്ങളുടെ സ്ഥിതി​വി​ശേഷം സംബന്ധിച്ച്‌ എന്തു ചെയ്യാൻ കഴിയും? യേശു​വി​ന്റെ ഉപമയി​ലെ ധൂർത്ത പുത്രൻ വീട്ടി​ലേക്കു മടങ്ങാ​നും പിതാ​വി​ന്റെ ക്ഷമ യാചി​ക്കാ​നും തീരു​മാ​നി​ച്ചു. “നിന്റെ കൂലി​ക്കാ​രിൽ ഒരുത്ത​നെ​പ്പോ​ലെ എന്നെ ആക്കേണമേ” എന്നു പറയാൻ ധൂർത്ത പുത്രൻ നിശ്ചയി​ച്ചു​റച്ചു. കൂലി​ക്കാ​രൻ ദിവസ​ക്കൂ​ലി​ക്കു പണി എടുക്കു​ന്ന​വ​നാണ്‌. ഒറ്റ ദിവസം​കൊണ്ട്‌ പിരി​ച്ചു​വി​ടാ​വുന്ന കൂലി​ക്കാ​രൻ അടിമ​യെ​ക്കാൾ താണവൻ ആണ്‌. എന്നാൽ അടിമ​യാ​കട്ടെ, ഒരു തരത്തിൽ പറഞ്ഞാൽ ഒരു കുടും​ബാം​ഗ​ത്തെ​പ്പോ​ലെ ആയിരു​ന്നു. അതു​കൊണ്ട്‌ ഒരു പുത്രൻ എന്ന നിലയി​ലുള്ള പഴയ സ്ഥാന​ത്തേക്ക്‌ തന്നെ തിരി​ച്ചെ​ടു​ക്ക​ണ​മെന്ന ഉദ്ദേശ്യ​മൊ​ന്നും ധൂർത്ത പുത്രന്‌ ഉണ്ടായി​രു​ന്നില്ല. പിതാ​വി​നോ​ടുള്ള തന്റെ പുതു​ക്കിയ വിശ്വ​സ്‌തത അനുദി​നം തെളി​യി​ക്കു​ന്ന​തിന്‌ ഏറ്റവും താണ സ്ഥാനം സ്വീക​രി​ക്കാൻ അവൻ തികച്ചും മനസ്സൊ​രു​ക്കം ഉള്ളവൻ ആയിരു​ന്നു. എന്നാൽ, ധൂർത്ത പുത്രന്‌ അത്ഭുത​ക​ര​മായ ഒരു വരവേൽപ്പ്‌ ലഭിക്കാൻ പോകു​ക​യാ​യി​രു​ന്നു.

ഹൃദ​യോ​ഷ്‌മ​ള​മായ വരവേൽപ്പ്‌

15-17. (എ) പുത്രനെ കണ്ടപ്പോൾ പിതാവ്‌ പ്രതി​ക​രി​ച്ച​തെ​ങ്ങനെ? (ബി) പിതാവ്‌ പുത്രനു നൽകിയ അങ്കി, മോതി​രം, ചെരിപ്പ്‌ എന്നിവ എന്ത്‌ അർഥമാ​ക്കി? (സി) പിതാവ്‌ വിരുന്ന്‌ ഒരുക്കു​ന്ന​തി​ലൂ​ടെ എന്തു പ്രകട​മാ​ക്ക​പ്പെ​ടു​ന്നു?

¹⁵ “ദൂരത്തു​നി​ന്നു തന്നേ അപ്പൻ അവനെ കണ്ടു മനസ്സലി​ഞ്ഞു ഓടി​ച്ചെന്നു അവന്റെ കഴുത്തു കെട്ടി​പ്പി​ടി​ച്ചു അവനെ ചുംബി​ച്ചു. മകൻ അവനോ​ടു: അപ്പാ, ഞാൻ സ്വർഗ്ഗ​ത്തോ​ടും നിന്നോ​ടും പാപം ചെയ്‌തി​രി​ക്കു​ന്നു; ഇനി നിന്റെ മകൻ എന്നു വിളി​ക്ക​പ്പെ​ടു​വാൻ യോഗ്യ​നല്ല എന്നു പറഞ്ഞു. അപ്പൻ തന്റെ ദാസന്മാ​രോ​ടു: വേഗം മേല്‌ത്ത​ര​മായ അങ്കി കൊണ്ടു​വന്നു ഇവനെ ധരിപ്പി​പ്പിൻ; ഇവന്റെ കൈക്കു മോതി​ര​വും കാലിന്നു ചെരി​പ്പും ഇടുവി​പ്പിൻ. തടിപ്പിച്ച കാളക്കു​ട്ടി​യെ കൊണ്ടു​വന്നു അറുപ്പിൻ; നാം തിന്നു ആനന്ദിക്ക. ഈ എന്റെ മകൻ മരിച്ച​വ​നാ​യി​രു​ന്നു; വീണ്ടും ജീവിച്ചു; കാണാതെ പോയി​രു​ന്നു; കണ്ടുകി​ട്ടി​യി​രി​ക്കു​ന്നു എന്നു പറഞ്ഞു; അങ്ങനെ അവർ ആനന്ദി​ച്ചു​തു​ടങ്ങി.”—ലൂക്കൊസ്‌ 15:20-24.

¹⁶ സ്‌നേ​ഹ​മുള്ള ഏതൊരു പിതാ​വും തന്റെ കുട്ടി​യു​ടെ ആത്മീയ പുനഃ​സ്ഥാ​പനം വാഞ്‌ഛി​ക്കും. അതു​കൊണ്ട്‌, തന്റെ പുത്രൻ മടങ്ങി​വ​രു​ന്ന​തും കാത്ത്‌ ആകാം​ക്ഷാ​പൂർവം വീട്ടു​വ​ഴി​യി​ലേക്ക്‌ ദിവസേന ഉറ്റു​നോ​ക്കുന്ന ധൂർത്ത പുത്രന്റെ പിതാ​വി​നെ നമുക്കു വിഭാവന ചെയ്യാൻ കഴിയും. ഇപ്പോൾ തന്റെ പുത്രൻ വഴിയി​ലൂ​ടെ നടന്നു വരുന്നത്‌ അവൻ കാണുന്നു! യുവാ​വി​ന്റെ വേഷവി​ധാ​ന​ങ്ങ​ളെ​ല്ലാം പാടേ മാറി​യി​രി​ക്കു​ന്നു. എന്നിട്ടും, പിതാവ്‌ അവനെ “ദൂരത്തു​നി​ന്നു തന്നേ” തിരി​ച്ച​റി​യു​ന്നു. അദ്ദേഹം കാണു​ന്നത്‌ കീറി​പ്പ​റിഞ്ഞ വസ്‌ത്ര​മോ തകർന്ന മനസ്സോ അല്ല, തന്റെ പുത്രനെ ആണ്‌, അവനെ എതി​രേൽക്കാൻ അദ്ദേഹം ഓടു​ക​യാ​യി!

¹⁷ പുത്രന്റെ അടുക്ക​ലെ​ത്തി​യ​പ്പോൾ പിതാവ്‌ അവന്റെ കഴുത്തിൽ കെട്ടി​പ്പി​ടിച്ച്‌ ആർദ്ര​മാ​യി ചുംബി​ച്ചു. എന്നിട്ട്‌ അവൻ തന്റെ ദാസന്മാ​രോട്‌ അങ്കിയും മോതി​ര​വും ചെരി​പ്പും കൊണ്ടു​വന്ന്‌ പുത്രനെ അണിയി​ക്കാൻ കൽപ്പിച്ചു. ഈ അങ്കി കേവലം ഒരു വസ്‌ത്രമല്ല, മറിച്ച്‌ “മേല്‌ത്ത​ര​മായ അങ്കി”—ഒരുപക്ഷേ വിശിഷ്ട അതിഥി​കൾക്കു നൽകാ​റു​ള്ള​തരം നല്ല ചിത്ര​ത്ത​യ്യ​ലോ​ടു​കൂ​ടിയ പുറങ്കു​പ്പാ​യം—ആയിരു​ന്നു. അടിമകൾ സാധാ​ര​ണ​മാ​യി മോതി​ര​വും ചെരി​പ്പും ധരിക്കു​മാ​യി​രു​ന്നി​ല്ലാ​ത്ത​തു​കൊണ്ട്‌, സമ്പൂർണ​മായ അർഥത്തിൽത്ത​ന്നെ​യുള്ള ഒരു കുടും​ബാം​ഗ​മാ​യി പുത്രനെ വീട്ടി​ലേക്കു സ്വീക​രി​ക്കു​ക​യാ​ണെന്ന്‌ പിതാവ്‌ വ്യക്തമാ​ക്കുക ആയിരു​ന്നു. എന്നാൽ അതു മാത്രമല്ല, പുത്രന്റെ തിരി​ച്ചു​വ​രവ്‌ ആഘോ​ഷി​ക്കാൻ അദ്ദേഹം ഒരു വിരുന്ന്‌ ഒരുക്കാ​നും കൽപ്പി​ക്കു​ന്നു. വ്യക്തമാ​യും, പുത്ര​നോട്‌ അദ്ദേഹം മനസ്സി​ല്ലാ​മ​ന​സ്സോ​ടെ, അല്ലെങ്കിൽ തിരി​ച്ചെ​ത്തി​യ​തല്ലേ, ഇനി ക്ഷമിക്കാ​തെ പറ്റില്ല​ല്ലോ എന്നമട്ടിൽ ക്ഷമിക്കുക ആയിരു​ന്നില്ല. ക്ഷമ നീട്ടി​ക്കൊ​ടു​ക്കാൻ അദ്ദേഹം ആഗ്രഹി​ച്ചു. അത്‌ അദ്ദേഹ​ത്തിന്‌ ആഹ്ലാദ​മാ​യി​രു​ന്നു.

18, 19. (എ) ധൂർത്ത പുത്രന്റെ ഉപമ യഹോ​വയെ കുറിച്ച്‌ നിങ്ങളെ എന്തു പഠിപ്പി​ക്കു​ന്നു? (ബി) യഹൂദ​യോ​ടും യെരൂ​ശ​ലേ​മി​നോ​ടു​മുള്ള ഇടപെ​ട​ലിൽ പ്രകട​മാ​ക്ക​പ്പെ​ട്ടി​രി​ക്കു​ന്ന​തു​പോ​ലെ, പാപി​ക​ളു​ടെ തിരിച്ചു വരവി​നാ​യി യഹോവ ‘കാത്തി​രി​ക്കു​ന്നത്‌’ എങ്ങനെ?

¹⁸ ധൂർത്ത പുത്രനെ കുറി​ച്ചുള്ള ഉപമ ഇതുവരെ ദൈവത്തെ കുറിച്ച്‌, അതായത്‌ നമുക്ക്‌ ആരാധി​ക്കാൻ പദവി ലഭിച്ചി​ട്ടുള്ള ദൈവത്തെ കുറിച്ച്‌, എന്തു പഠിപ്പി​ക്കു​ന്നു? ഒന്നാമത്‌, യഹോവ ‘കരുണ​യും കൃപയു​മുള്ള, കോപ​ത്തി​നു താമസ​മുള്ള, സ്‌നേ​ഹ​ദ​യ​യും സത്യവും നിറഞ്ഞ’ ഒരുവൻ ആണെന്ന്‌. (പുറപ്പാ​ടു 34:6, NW) നിശ്ചയ​മാ​യും, കരുണ ദൈവ​ത്തി​ന്റെ ഒരു പ്രമുഖ ഗുണം ആണ്‌. അത്‌ അർഹി​ക്കു​ന്ന​വ​രു​ടെ നേരെ അവൻ പ്രതി​ക​രി​ക്കുന്ന സ്വാഭാ​വിക വിധമാണ്‌ അത്‌. കൂടാതെ, യഹോവ “ക്ഷമിക്കാൻ മനസ്സൊ​രു​ക്ക​മുള്ള”വനാ​ണെന്ന്‌ യേശു​വി​ന്റെ ഉപമ നമ്മെ പഠിപ്പി​ക്കു​ന്നു. (സങ്കീർത്തനം 86:5, NW) ഒരുത​ര​ത്തിൽ പറഞ്ഞാൽ, തനിക്ക്‌ കരുണ കാണി​ക്കാ​നാ​കുന്ന അടിസ്ഥാ​നം പ്രദാനം ചെയ്യത്ത​ക്ക​വണ്ണം പാപി​ക​ളായ മനുഷ്യ​രു​ടെ ഹൃദയ​ത്തിന്‌ എന്തെങ്കി​ലും മാറ്റമു​ണ്ടോ എന്ന്‌ അവൻ ഉറ്റു​നോ​ക്കി​ക്കൊ​ണ്ടി​രി​ക്കു​ക​യാണ്‌.—2 ദിനവൃ​ത്താ​ന്തം 12:12; 16:9.

¹⁹ ഉദാഹ​ര​ണ​ത്തിന്‌, ഇസ്രാ​യേ​ലു​മാ​യുള്ള ദൈവ​ത്തി​ന്റെ ഇടപെ​ട​ലു​കളെ കുറിച്ചു ചിന്തി​ക്കുക. യഹൂദ​യ്‌ക്കും യെരൂ​ശ​ലേ​മി​നും ‘ശിരസ്സു​മു​തൽ പാദം​വരെ രോഗം ബാധി​ച്ചി​രി​ക്കുന്ന’തായി വർണി​ക്കാൻ യഹോവ പ്രവാ​ച​ക​നായ യെശയ്യാ​വി​നെ നിശ്വ​സ്‌ത​നാ​ക്കി. എന്നിട്ടും അവൻ പറഞ്ഞു: “യഹോവ നിങ്ങ​ളോ​ടു കൃപ കാണി​ക്കാ​നാ​യി കാത്തി​രി​ക്കും, അതു​കൊണ്ട്‌ അവൻ നിങ്ങ​ളോട്‌ കരുണ കാണി​ക്കാൻ എഴു​ന്നേൽക്കും.” (യെശയ്യാ​വു 1:5, 6; 30:18, NW; 55:7; യെഹെ​സ്‌കേൽ 33:11) യേശു​വി​ന്റെ ഉപമയി​ലെ പിതാ​വി​നെ​പ്പോ​ലെ, യഹോവ, ആലങ്കാ​രി​ക​മാ​യി പറഞ്ഞാൽ, ‘വഴിയി​ലേക്ക്‌ ഉറ്റു​നോ​ക്കി​ക്കൊ​ണ്ടി​രി​ക്കു​ക​യാണ്‌.’ തന്റെ ഭവനം ഉപേക്ഷി​ച്ചു പോയവർ തിരിച്ചു വരുന്ന​തു​നോ​ക്കി അവൻ പ്രതീ​ക്ഷാ​പൂർവം കാത്തി​രി​ക്കു​ന്നു. സ്‌നേ​ഹ​നി​ധി​യായ ഒരു പിതാ​വിൽനിന്ന്‌ ഇതല്ലേ നാം പ്രതീ​ക്ഷി​ക്കു​ന്നത്‌?—സങ്കീർത്തനം 103:13.

20, 21. (എ) ഏതു വിധത്തി​ലാണ്‌ ഇന്ന്‌ അനേകർ ദൈവ​ത്തി​ന്റെ കരുണ​യാൽ ആകർഷി​ക്ക​പ്പെ​ടു​ന്നത്‌? (ബി) അടുത്ത ലേഖന​ത്തിൽ എന്തു ചർച്ച ചെയ്യു​ന്ന​താ​യി​രി​ക്കും?

²⁰ സുബോ​ധം പ്രാപി​ക്കാ​നും സത്യാ​രാ​ധ​ന​യി​ലേക്കു തിരി​ച്ചു​വ​രാ​നും യഹോ​വ​യു​ടെ കരുണ വർഷം​തോ​റും അനേകരെ ആകർഷി​ക്കു​ന്നു. ഇത്‌ അവരുടെ പ്രിയ​പ്പെ​ട്ട​വർക്ക്‌ എത്രയ​ധി​കം സന്തോഷം കൈവ​രു​ത്തു​ന്നു! ഉദാഹ​ര​ണ​ത്തിന്‌, ആരംഭ​ത്തിൽ സൂചി​പ്പിച്ച ക്രിസ്‌തീയ പിതാ​വി​ന്റെ കാര്യം​തന്നെ. സന്തോ​ഷ​ക​ര​മെന്നു പറയട്ടെ, അദ്ദേഹ​ത്തി​ന്റെ പുത്രി ആത്മീയ സൗഖ്യം നേടി ഇപ്പോൾ മുഴു​സമയ ശുശ്രൂ​ഷ​ക​യാ​യി സേവി​ക്കു​ന്നു. അദ്ദേഹം പറയുന്നു: “ഈ പഴയ വ്യവസ്ഥി​തി​യിൽ ലഭിക്കാ​വു​ന്നത്ര സന്തോഷം എനിക്കുണ്ട്‌. സന്താപ കണ്ണുനീർ സന്തോഷ കണ്ണുനീർ ആയി മാറി​യി​രി​ക്കു​ന്നു.” തീർച്ച​യാ​യും, യഹോ​വ​യും ആഹ്ലാദി​ക്കു​ന്നുണ്ട്‌!”—സദൃശ​വാ​ക്യ​ങ്ങൾ 27:11.

²¹ എന്നാൽ ധൂർത്ത പുത്രന്റെ ഉപമ ഇവിടം​കൊണ്ട്‌ അവസാ​നി​ക്കു​ന്നില്ല. കഥയുടെ ശേഷഭാ​ഗ​ത്തി​ലൂ​ടെ യേശു യഹോ​വ​യു​ടെ കരുണ​യെ​യും ശാസ്‌ത്രി​മാർക്കും പരീശ​ന്മാർക്കും ഇടയിൽ സാധാ​ര​ണ​മാ​യി​രുന്ന, കർക്കശ​വും കുറ്റം​ക​ണ്ടു​പി​ടി​ക്ക​ലി​ന്റേ​തു​മായ മനോ​ഭാ​വ​ത്തെ​യും വിപരീത താരത​മ്യം ചെയ്യുന്നു. അവൻ അത്‌ എങ്ങനെ ചെയ്‌തു​വെ​ന്നും അതു നമുക്ക്‌ എന്ത്‌ അർഥമാ​ക്കു​ന്നു​വെ​ന്നും അടുത്ത ലേഖന​ത്തിൽ ചർച്ച ചെയ്യു​ന്ന​താണ്‌.

[അടിക്കു​റി​പ്പു​കൾ]

പുനരവലോകനം

□ കരുണയെ കുറി​ച്ചുള്ള യേശു​വി​ന്റെ മനോ​ഭാ​വം പരീശ​ന്മാ​രു​ടേ​തിൽനി​ന്നു വ്യത്യ​സ്‌തം ആയിരു​ന്നത്‌ എങ്ങനെ?

□ ഇന്ന്‌ ധൂർത്ത പുത്ര​നോ​ടു സദൃശർ ആയിരി​ക്കു​ന്നത്‌ ആർ, എങ്ങനെ?

□ ധൂർത്ത പുത്രനു സുബോ​ധം വരാനു​ണ്ടായ സാഹച​ര്യ​ങ്ങൾ എന്ത്‌?

□ അനുതാ​പം പ്രകട​മാ​ക്കിയ പുത്ര​നോട്‌ പിതാവ്‌ കരുണ കാട്ടി​യത്‌ എങ്ങനെ?

[11-ാം പേജിലെ ചതുരം]

അവർക്കു സുബോ​ധം വന്നു

ക്രിസ്‌തീയ സഭയിൽനി​ന്നു പുറത്താ​ക്ക​പ്പെട്ട ചിലരെ സുബോ​ധ​ത്തി​ലേക്കു വരാൻ സഹായി​ച്ചി​രി​ക്കു​ന്നത്‌ എന്താണ്‌? ഇക്കാര്യ​ത്തി​ലേക്കു വെളിച്ചം വീശു​ന്ന​താണ്‌ പിൻവ​രുന്ന അഭി​പ്രാ​യങ്ങൾ.

“സത്യം എവിടെ ഉണ്ടെന്ന്‌ എനിക്ക്‌ ഉള്ളിന്റെ ഉള്ളിൽ അറിയാ​മാ​യി​രു​ന്നു. വർഷങ്ങ​ളോ​ളം ബൈബിൾ പഠിക്കു​ക​യും ക്രിസ്‌തീയ യോഗ​ങ്ങൾക്കു പോകു​ക​യും ചെയ്‌തത്‌ എന്നിൽ ആഴമായ സ്വാധീ​നം ചെലു​ത്തി​യി​രു​ന്നു. എനിക്ക്‌ എങ്ങനെ​യാണ്‌ യഹോ​വയെ തുടർന്നും മനഃപൂർവം അവഗണി​ക്കാ​നാ​കുക? അവൻ എന്നെ അല്ല, ഞാൻ അവനെ ഉപേക്ഷി​ക്കുക ആയിരു​ന്നു. അവസാനം, ഞാൻ എത്രമാ​ത്രം തെറ്റു ചെയ്‌തെ​ന്നും ശാഠ്യം കാട്ടി​യെ​ന്നും സമ്മതിച്ചു. ‘നീ വിതയ്‌ക്കു​ന്ന​തു​തന്നെ കൊയ്യും’ എന്ന യഹോ​വ​യു​ടെ വചനം എല്ലായ്‌പോ​ഴും എത്ര ശരിയാണ്‌.”—സി. ഡബ്ലിയു.

“എന്റെ മോൾ സംസാ​രി​ക്കാൻ തുടങ്ങി. അത്‌ എന്റെ ഹൃദയത്തെ സ്‌പർശി​ച്ചു, കാരണം യഹോവ ആരെന്നും അവനോട്‌ എങ്ങനെ പ്രാർഥി​ക്ക​ണ​മെ​ന്നും പോലുള്ള സംഗതി​കൾ എനിക്ക്‌ അവളെ പഠിപ്പി​ക്കണം എന്നുണ്ടാ​യി​രു​ന്നു. എനിക്ക്‌ ഉറങ്ങാൻ കഴിഞ്ഞില്ല. ഒരിക്കൽ അർധരാ​ത്രി​യോ​ട​ടുത്ത്‌ ഞാൻ ഒരു പാർക്കി​ലേക്ക്‌ വണ്ടി​യോ​ടി​ച്ചു പോയി അവിടെ ഇരുന്നു കരഞ്ഞു. വളരെ കാലത്തെ ഇടവേ​ള​യ്‌ക്കു ശേഷം ഞാൻ കരഞ്ഞ്‌ യഹോ​വ​യോ​ടു പ്രാർഥി​ച്ചു. യഹോ​വയെ എന്റെ ജീവി​ത​ത്തി​ലേക്കു തിരിച്ചു കൊണ്ടു​വ​ര​ണ​മെന്ന ചിന്തയാ​യി​രു​ന്നു എനിക്ക്‌. അവൻ എന്നോടു ക്ഷമിക്കു​മെന്നു ഞാൻ പ്രത്യാ​ശി​ച്ചു.”—ജി.എച്ച്‌.

“മതത്തെ കുറി​ച്ചുള്ള സംസാരം പൊന്തി​വ​രു​മ്പോൾ ഞാൻ പറയു​മാ​യി​രു​ന്നു, സത്യം പഠിപ്പി​ക്കുന്ന ഒരു മതം തിര​ഞ്ഞെ​ടു​ക്കേ​ണ്ട​തു​ണ്ടെ​ങ്കിൽ, ഞാൻ ഒരു യഹോ​വ​യു​ടെ സാക്ഷി​യാ​യേ പറ്റൂ എന്ന്‌. എന്നിട്ട്‌ ഞാൻ പറയും, ഞാനും അവരിൽ ഒരുവൻ ആയിരു​ന്നു. എന്നാൽ എനിക്ക്‌ അവരുടെ നിലവാ​ര​ത്തി​നൊത്ത്‌ ഉയരാൻ ആകുമാ​യി​രു​ന്നില്ല, അതു​കൊണ്ട്‌ ഞാൻ അവരെ ഉപേക്ഷി​ച്ചു. ഈ തിരി​ച്ച​റിവ്‌, പലപ്പോ​ഴും എന്നിൽ കുറ്റ​ബോ​ധ​വും അസന്തു​ഷ്ടി​യും ഉണ്ടാക്കി. ഞാൻ ‘വല്ലാത്ത ഒരു അവസ്ഥയി​ലാണ്‌, വലിയ മാറ്റങ്ങൾ വരുത്തി​യേ തീരൂ’ എന്ന്‌ അവസാനം എനിക്കു ബോധ്യ​മാ​യി.”—സി.എൻ.

“മുപ്പത്തഞ്ചു വർഷം​മുമ്പ്‌ ഞാനും ഭർത്താ​വും സഭയിൽനി​ന്നു പുറത്താ​ക്ക​പ്പെട്ടു. അങ്ങനെ​യി​രി​ക്കെ, 1991-ൽ രണ്ടു മൂപ്പന്മാർ ഞങ്ങളെ സന്ദർശിച്ച്‌ യഹോ​വ​യി​ലേക്കു തിരി​ച്ചു​വ​രാൻ ആകു​മെന്ന്‌ ഞങ്ങളെ അറിയി​ച്ച​പ്പോൾ ഞങ്ങൾക്ക്‌ അത്ഭുത​മാ​യി. എത്ര സന്തോ​ഷ​ക​ര​മായ സംഗതി. ആറു മാസം കഴിഞ്ഞ്‌ ഞങ്ങൾ പുനഃ​സ്ഥി​തീ​ക​രി​ക്ക​പ്പെ​ട്ട​പ്പോൾ ഞങ്ങളുടെ സന്തോ​ഷ​ത്തിന്‌ അതിരി​ല്ലാ​യി​രു​ന്നു. എന്റെ ഭർത്താ​വിന്‌ ഇപ്പോൾ 79-ഉം എനിക്ക്‌ 63-ഉം വയസ്സുണ്ട്‌.—സി.എ.