ദൈവ​വ​ചനം പുനർജൻമ​ത്തെ​ക്കു​റി​ച്ചു​പ​ഠി​പ്പി​ക്കു​ന്നു​വോ?

പുനർജൻമ സിദ്ധാ​ന്തത്തെ പിന്താ​ങ്ങുന്ന തെളിവു കണ്ടെത്താ​മെന്ന പ്രതീ​ക്ഷ​യോ​ടെ ബൈബിൾ പരി​ശോ​ധി​ക്കുന്ന ഏതൊ​രാ​ളും നിരാ​ശ​നാ​യി​ത്തീ​രു​മെ​ന്നു​ള്ള​തി​നു രണ്ടുപ​ക്ഷ​മില്ല. മനുഷ്യർ മുൻകാല ജീവി​തങ്ങൾ നയിച്ചി​ട്ടു​ള്ള​താ​യി ബൈബി​ളി​ലൊ​രി​ട​ത്തും നിങ്ങൾ കണ്ടെത്തു​ക​യില്ല. മാത്രമല്ല, “പുനർജൻമം,” “ആത്മാവി​ന്റെ ദേഹാ​ന്ത​ര​ഗ​മനം,” അല്ലെങ്കിൽ “അമർത്ത്യ​ദേഹി” എന്നിങ്ങ​നെ​യുള്ള പദപ്ര​യോ​ഗ​ങ്ങ​ളും നിങ്ങൾ ബൈബി​ളിൽ കണ്ടെത്തു​ക​യില്ല.

എന്നിരു​ന്നാ​ലും, പുനർജൻമം എന്ന ആശയം പുരാ​ത​ന​കാ​ല​ങ്ങ​ളിൽ വളരെ സർവസാ​ധാ​ര​ണ​മാ​യി​രു​ന്നു, അതു​കൊണ്ട്‌ ഏതെങ്കി​ലും തരത്തി​ലുള്ള വിശദീ​ക​രണം അനാവ​ശ്യ​മാ​യി​രി​ക്കു​മാ​യി​രു​ന്നു എന്നു പറഞ്ഞു​കൊണ്ട്‌ പുനർജൻമ​ത്തിൽ വിശ്വ​സി​ക്കു​ന്നവർ ബൈബിൾ തെളി​വി​ല്ലാ​യ്‌മ​യു​ടെ കാരണം വിശദീ​ക​രി​ക്കാൻ ശ്രമി​ച്ചേ​ക്കാം. പുനർജൻമ​ത്തെ​ക്കു​റി​ച്ചുള്ള പഠിപ്പി​ക്കൽ വളരെ പഴക്കമു​ള്ള​താ​ണെ​ന്നതു സത്യം​തന്നെ. എന്നാൽ അത്‌ എത്ര പഴക്കമു​ള്ള​താ​യി​രു​ന്നാ​ലും അല്ലെങ്കിൽ എത്ര സാധാ​ര​ണ​മോ അല്ലാത്ത​തോ ആയിരു​ന്നാ​ലും ഇപ്പോ​ഴും അവശേ​ഷി​ക്കുന്ന ചോദ്യം ഇതാണ്‌, ബൈബിൾ അതു പഠിപ്പി​ക്കു​ന്നു​ണ്ടോ?

2 തിമൊ​ഥെ​യൊസ്‌ 3:16, 17-ൽ പൗലോസ്‌ അപ്പോ​സ്‌തലൻ ഇപ്രകാ​രം എഴുതി: “എല്ലാതി​രു​വെ​ഴു​ത്തും ദൈവ​ശ്വാ​സീ​യ​മാ​ക​യാൽ [“ദൈവ​നി​ശ്വ​സ്‌ത​മാ​ക​യാൽ,” NW] ദൈവ​ത്തി​ന്റെ മനുഷ്യൻ സകല സൽപ്ര​വൃ​ത്തി​ക്കും വക പ്രാപി​ച്ചു തികഞ്ഞവൻ ആകേണ്ട​തി​ന്നു ഉപദേ​ശ​ത്തി​ന്നും ശാസന​ത്തി​ന്നും ഗുണീ​ക​ര​ണ​ത്തി​ന്നും നീതി​യി​ലെ അഭ്യാ​സ​ത്തി​ന്നും പ്രയോ​ജ​ന​മു​ള്ളതു ആകുന്നു.” അതേ, ബൈബിൾ ദൈവ​ത്തി​ന്റെ നിശ്വസ്‌ത വചനമാണ്‌, മാനവ​കു​ടും​ബ​ത്തോ​ടുള്ള അവന്റെ ആശയവി​നി​മ​യ​മാണ്‌. പൗലോസ്‌ എഴുതി​യ​തു​പോ​ലെ, ഭൂതകാ​ല​ത്തെ​യും വർത്തമാ​ന​കാ​ല​ത്തെ​യും ഭാവി​കാ​ല​ത്തെ​യും സംബന്ധി​ച്ച​തുൾപ്പെടെ ജീവി​തത്തെ സംബന്ധിച്ച പ്രധാ​ന​പ്പെട്ട എല്ലാ ചോദ്യ​ങ്ങൾക്കും ഉത്തരം നൽകു​ന്ന​തിന്‌ “വക പ്രാപി​ച്ചു തികഞ്ഞവൻ” ആകാൻ ആത്മാർഥ​ത​യുള്ള ഒരു അന്വേ​ഷ​കനെ അതു പ്രാപ്‌ത​നാ​ക്കു​ന്നു.

പൗലോസ്‌ ഇങ്ങനെ​യും പ്രസ്‌താ​വി​ച്ചു: ‘ഞങ്ങൾ പ്രസം​ഗിച്ച ദൈവ​വ​ചനം നിങ്ങൾ കേട്ടു, മമനു​ഷ്യ​ന്റെ വചനമാ​യി​ട്ടല്ല സാക്ഷാൽ ആകുന്ന​തു​പോ​ലെ ദൈവ​വ​ച​ന​മാ​യി​ട്ടു തന്നേ കൈ​ക്കൊ​ണ്ടു.’ (1 തെസ്സ​ലൊ​നീ​ക്യർ 2:13) ബൈബി​ളിൽ അടങ്ങി​യി​രി​ക്കു​ന്നതു മമനു​ഷ്യ​ന്റെ ചിന്തകളല്ല, പിന്നെ​യോ ദൈവ​ത്തി​ന്റെ ചിന്തക​ളാണ്‌. അതു​കൊണ്ട്‌ മമനു​ഷ്യ​ന്റെ ചിന്തകൾ വർഷങ്ങ​ളി​ലു​ട​നീ​ളം എത്ര പ്രചാ​ര​മു​ള്ള​താ​യി​രു​ന്നാൽപ്പോ​ലും ബൈബിൾ അവയോ​ടു പലപ്പോ​ഴും വിയോ​ജി​ക്കു​ന്നു എന്ന കാര്യം നമ്മെ അമ്പരപ്പി​ക്ക​രുത്‌. എന്നാൽ നിങ്ങൾ ഇങ്ങനെ പറഞ്ഞേ​ക്കാം, ‘ചിലടത്തു ബൈബിൾ പുനർജൻമം എന്ന ആശയത്തി​ന്റെ സൂചന നൽകു​ന്നി​ല്ലേ?’

തെററാ​യി മനസ്സി​ലാ​ക്കുന്ന തിരു​വെ​ഴു​ത്തു​കൾ

മത്തായി 17:11-13-ൽ ബൈബിൾ ഈ വിഷയത്തെ സ്‌പർശി​ക്കു​ന്നു​വെന്ന്‌ പുനർജൻമ​ത്തിൽ വിശ്വ​സി​ക്കു​ന്നവർ പറയാ​റുണ്ട്‌. ആ ഭാഗത്തു സ്‌നാ​പ​ക​യോ​ഹ​ന്നാ​നെ പുരാതന കാലത്തെ പ്രവാ​ച​ക​നായ ഏലിയാ​വു​മാ​യി യേശു ബന്ധപ്പെ​ടു​ത്തു​ന്നു. ആ ഭാഗം ഇങ്ങനെ വായി​ക്കു​ന്നു: ‘ഏലീയാ​വു വന്നു സകലവും യഥാസ്ഥാ​ന​ത്താ​ക്കും സത്യം. എന്നാൽ ഏലീയാ​വു വന്നു കഴിഞ്ഞു എന്നു ഞാൻ നിങ്ങ​ളോ​ടു പറയുന്നു; . . . അവൻ യോഹ​ന്നാൻസ്‌നാ​പ​ക​നെ​ക്കു​റി​ച്ചാ​ണു തങ്ങളോ​ടു പറഞ്ഞത്‌ എന്നു ശിഷ്യൻമാർ ഗ്രഹിച്ചു.’

ഇതു പറഞ്ഞ​പ്പോൾ, സ്‌നാ​പ​ക​യോ​ഹ​ന്നാൻ പ്രവാ​ച​ക​നായ ഏലിയാ​വി​ന്റെ പുനര​വ​താ​ര​മാ​യി​രു​ന്നു​വെന്ന്‌ യേശു അർഥമാ​ക്കി​യോ? ഇല്ലായി​രു​ന്നു​വെന്ന്‌ യോഹ​ന്നാ​നു​തന്നെ അറിയാ​മാ​യി​രു​ന്നു. ഒരു അവസര​ത്തിൽ ‘നീ ഏലീയാ​വോ?’ എന്ന്‌ ചോദി​ച്ച​പ്പോൾ യോഹ​ന്നാൻ ഇങ്ങനെ വ്യക്തമാ​യി ഉത്തരം നൽകി: “അല്ല.” (യോഹ​ന്നാൻ 1:21) എന്നിരു​ന്നാ​ലും, മിശി​ഹാ​യ്‌ക്കു മുമ്പായി “ഏലീയാ​വി​ന്റെ ആത്മാ​വോ​ടും ശക്തി​യോ​ടും​കൂ​ടെ” യോഹ​ന്നാൻ വരു​മെന്നു മുൻകൂ​ട്ടി​പ്പ​റ​യ​പ്പെ​ട്ടി​രു​ന്നു. (ലൂക്കൊസ്‌ 1:17; മലാഖി 4:5, 6) മററു വാക്കു​ക​ളിൽ പറഞ്ഞാൽ, ഏലിയാവ്‌ ചെയ്‌ത​തി​നോ​ടു സമാന​മായ ഒരു പ്രവർത്തനം അനുഷ്‌ഠി​ച്ചു എന്ന അർഥത്തിൽ സ്‌നാ​പ​ക​യോ​ഹ​ന്നാൻ “ഏലീയാ​വു” ആയിരു​ന്നു.

യോഹ​ന്നാൻ 9:1, 2-ൽ നാം ഇപ്രകാ​രം വായി​ക്കു​ന്നു: ‘അവൻ [യേശു] കടന്നു​പോ​കു​മ്പോൾ പിറവി​യി​ലെ കുരു​ട​നാ​യോ​രു മനുഷ്യ​നെ കണ്ടു. അവന്റെ ശിഷ്യൻമാർ അവനോ​ടു: റബ്ബീ, ഇവൻ കുരു​ട​നാ​യി പിറക്ക​ത്ത​ക്ക​വണ്ണം ആർ പാപം ചെയ്‌തു? ഇവനോ ഇവന്റെ അമ്മയപ്പൻമാ​രോ?’ ഈ മനുഷ്യൻ കുരു​ട​നാ​യി ജനിച്ച​തു​കൊണ്ട്‌ മുൻജൻമ​ത്തിൽ അവൻ പാപം ചെയ്‌തി​രി​ക്കാം എന്നു പുനർജൻമ​ത്തിൽ വിശ്വ​സി​ക്കു​ന്നവർ അഭി​പ്രാ​യ​പ്പെ​ടു​ന്നു.

എന്നാൽ, ഈ ചോദ്യം ചോദി​ക്കാൻ ശിഷ്യൻമാ​രെ പ്രേരി​പ്പി​ച്ചത്‌ എന്തായി​രു​ന്നാ​ലും യേശു​വി​ന്റെ മറുപ​ടി​യാ​യി​രി​ക്കണം പ്രധാ​ന​മായ ഘടകം. അവൻ ഇപ്രകാ​രം പ്രഖ്യാ​പി​ച്ചു: “അവൻ എങ്കിലും അവന്റെ അമ്മയപ്പൻമാ​രെ​ങ്കി​ലും പാപം ചെയ്‌തി​ട്ടല്ല.” (യോഹ​ന്നാൻ 9:3) വൈക​ല്യ​ങ്ങൾ ഒരു പൂർവ​ജൻമ​ത്തി​ലെ പാപങ്ങ​ളിൽ അടിസ്ഥാ​ന​പ്പെ​ട്ടി​രി​ക്കു​ന്നു എന്നു സൂചി​പ്പി​ക്കുന്ന പുനർജൻമ​ത്തോ​ടു വിയോ​ജി​പ്പി​ലാണ്‌ ഇത്‌. ജനിക്കു​ന്ന​തി​നു മുമ്പ്‌ ആർക്കും പാപം ചെയ്യാ​നാ​വില്ല. ഏശാവി​നെ​യും യാക്കോ​ബി​നെ​യും സംബന്ധി​ച്ചു “ജനിക്ക​യോ ഗുണമാ​കട്ടെ ദോഷ​മാ​കട്ടെ ഒന്നു പ്രവർത്തി​ക്ക​യോ ചെയ്യും​മു​മ്പെ” എന്നെഴു​തി​യ​പ്പോൾ പൗലോസ്‌ ഈ വസ്‌തുത വ്യക്തമാ​ക്കി.—റോമർ 9:11.

പുനരു​ത്ഥാ​നം, പുനർജൻമ​മല്ല

പുനർജൻമ​പ​ഠി​പ്പി​ക്ക​ലി​നെ ബൈബിൾ പിന്താ​ങ്ങു​ന്നി​ല്ലെ​ങ്കി​ലും ആർക്കും നിരാശ തോന്നേണ്ട ആവശ്യ​മില്ല. രോഗം, ദുഃഖം, വേദന, മരണം തുടങ്ങിയ കാര്യങ്ങൾ നിറഞ്ഞ ഒരു ലോക​ത്തി​ലേക്കു വീണ്ടും പിറന്നു​വീ​ഴുക എന്ന ആശയ​ത്തെ​ക്കാൾ വളരെ​യേറെ ആശ്വാ​സ​പ്ര​ദ​മായ ഒന്നാണു ബൈബിൾ വാഗ്‌ദത്തം ചെയ്യു​ന്നത്‌. ബൈബിൾ വാഗ്‌ദത്തം ചെയ്യു​ന്നത്‌ ആശ്വാ​സ​പ്ര​ദ​മാ​ണെന്നു മാത്രമല്ല ദൈവ​ത്തി​ന്റെ സ്വന്തം വചനമാ​യി​രി​ക്കു​ന്ന​തി​നാൽ അതാണു സത്യം.

പ്രോ​ത്സാ​ഹ​ജ​ന​ക​മായ ആ പഠിപ്പി​ക്കൽ പൗലോസ്‌ ഈ വാക്കു​ക​ളിൽ പ്രകട​മാ​ക്കി: “നീതി​മാൻമാ​രു​ടെ​യും നീതി​കെ​ട്ട​വ​രു​ടെ​യും പുനരു​ത്ഥാ​നം ഉണ്ടാകും എന്നു . . . ഞാനും ദൈവ​ത്തി​ങ്കൽ ആശവെ​ച്ചി​രി​ക്കു​ന്നു.” “പുനരു​ത്ഥാ​നം” എന്ന പദമോ അതിന്റെ ഏതെങ്കി​ലും രൂപമോ ക്രിസ്‌തീയ ഗ്രീക്കു തിരു​വെ​ഴു​ത്തു​ക​ളിൽ 50 പ്രാവ​ശ്യം കാണ​പ്പെ​ടു​ന്നു. ക്രിസ്‌തീയ വിശ്വാ​സ​ത്തി​ന്റെ അടിസ്ഥാന പഠിപ്പി​ക്ക​ലാ​യി പൗലോസ്‌ അതി​നെ​ക്കു​റി​ച്ചു സംസാ​രി​ക്കു​ക​യും ചെയ്യുന്നു.—പ്രവൃ​ത്തി​കൾ 24:15; എബ്രായർ 6:1, 2.

മരിച്ച​വ​രിൽനി​ന്നുള്ള പുനരു​ത്ഥാ​നം എന്നു പറയു​മ്പോൾ മരണം നിലവി​ലി​രി​ക്കു​ന്നു എന്നതു വ്യക്തമാ​ണ​ല്ലോ. മനുഷ്യന്‌ ഒരു അമർത്ത്യ​ദേഹി ഉണ്ടെന്ന എന്തെങ്കി​ലു​മൊ​രു സൂചന ബൈബി​ളി​ലൊ​രി​ട​ത്തും കാണാ​നാ​വില്ല. മരണത്തി​ങ്കൽ ശരീരത്തെ വേർപെ​ട്ടു​പോ​കുന്ന ഒരു അമർത്ത്യ​ദേഹി മനുഷ്യന്‌ ഉണ്ടായി​രി​ക്കു​ക​യും സ്വർഗ​ത്തി​ലോ നരകത്തി​ലോ ഉള്ള ഒരു നിത്യ​വി​ധി​യി​ലേക്കു മനുഷ്യൻ പോകു​ക​യും അല്ലെങ്കിൽ വീണ്ടും ജനിക്കു​ക​യും ചെയ്‌തി​രു​ന്നെ​ങ്കിൽ ഒരു പുനരു​ത്ഥാ​ന​ത്തി​ന്റെ ആവശ്യം ഉണ്ടായി​രി​ക്കു​മാ​യി​രു​ന്നില്ല. നേരേ മറിച്ച്‌, മനുഷ്യ​ദേഹി അമർത്ത്യ​മല്ല പിന്നെ​യോ മർത്ത്യ​വും നശിച്ചു​പോ​കു​ന്ന​തു​മാ​ണെന്ന്‌ ഏതാണ്ട്‌ നൂറോ​ളം ബൈബിൾ പാഠഭാ​ഗങ്ങൾ കാട്ടി​ത്ത​രു​ന്നു. അതിനു ചേർച്ച​യിൽ മരണം ജീവന്റെ നേരെ വിപരീ​ത​മാ​ണെന്ന്‌, അതായത്‌ അസ്ഥിത്വ​ത്തി​നു വിപരീ​ത​മായ അസ്ഥിത്വ​മി​ല്ലായ്‌മ ആണെന്നു ബൈബിൾ എല്ലായി​ട​ത്തും ഒരു​പോ​ലെ സംസാ​രി​ക്കു​ന്നു.

മരണം അല്ലെങ്കിൽ അസ്ഥിത്വ​മി​ല്ലായ്‌മ ആയിരു​ന്നു ദൈവ​ത്തി​നെ​തി​രെ ആദാമും ഹവ്വായും പാപം ചെയ്‌ത​തി​നു ലഭിച്ച ശിക്ഷ. അതൊരു ശിക്ഷയാ​യി​രു​ന്നു, അല്ലാതെ മറെറാ​രി​ട​ത്തുള്ള ഒരു അമർത്ത്യ​ജീ​വ​നി​ലേ​ക്കുള്ള പ്രവേ​ശ​ന​മാർഗം അല്ലായി​രു​ന്നു. അവർ എവി​ടെ​നി​ന്നു വന്നുവോ അവി​ടേ​ക്കു​തന്നെ തിരികെ പോകു​മെന്നു ദൈവം പ്രഖ്യാ​പി​ച്ചു—നിലത്തെ പൊടി​യി​ലേക്ക്‌: “നിലത്തു​നി​ന്നു നിന്നെ എടുത്തി​രി​ക്കു​ന്നു; . . . നീ പൊടി​യാ​കു​ന്നു, പൊടി​യിൽ തിരികെ ചേരും.” (ഉല്‌പത്തി 3:19) ദൈവം അവരെ സൃഷ്ടിച്ച്‌ ഭൂമി​യി​ലെ ഏദൻതോ​ട്ട​ത്തിൽ ആക്കി​വെ​ക്കു​ന്ന​തി​നു മുമ്പ്‌ അവർക്ക്‌ യാതൊ​രു അമർത്ത്യ​ദേ​ഹി​യും ഉണ്ടായി​രു​ന്നില്ല. മരണ​ശേ​ഷ​വും അവർക്ക്‌ അതുണ്ടാ​യി​രു​ന്നില്ല.

മരണത്തിൽനി​ന്നു​ള്ള പുനരു​ത്ഥാ​നം ഉറക്കത്തിൽനിന്ന്‌ അഥവാ വിശ്ര​മ​ത്തിൽനിന്ന്‌ ഉണരു​ന്ന​തി​നോ​ടു താരത​മ്യം ചെയ്യ​പ്പെ​ട്ടി​രി​ക്കു​ന്നു. ഉദാഹ​ര​ണ​ത്തിന്‌, താൻ ഉയിർപ്പി​ക്കാ​നി​രുന്ന ലാസറി​നെ​ക്കു​റി​ച്ചു യേശു ഇങ്ങനെ പറഞ്ഞു: “ലാസർ നിദ്ര​കൊ​ള്ളു​ന്നു; എങ്കിലും ഞാൻ അവനെ ഉണർത്തു​വാൻ പോകു​ന്നു.” (യോഹ​ന്നാൻ 11:11) പ്രവാ​ച​ക​നായ ദാനി​യേ​ലി​നെ​ക്കു​റി​ച്ചു നാം ഇപ്രകാ​രം വായി​ക്കു​ന്നു: “നീ വിശ്ര​മി​ച്ചു കാലാ​വ​സാ​ന​ത്തി​ങ്കൽ നിന്റെ ഓഹരി ലഭിപ്പാൻ എഴു​ന്നേ​റ​റു​വ​രും.”—ദാനീ​യേൽ 12:13.

ഭൂമി​യി​ലെ അനന്തജീ​വൻ

മരണത്തിൽനി​ന്നു പുനരു​ത്ഥാ​നം ചെയ്യു​ന്ന​വ​രു​ടെ ഭാഗ​ധേയം എന്തായി​രി​ക്കും? രണ്ടുതരം പുനരു​ത്ഥാ​ന​ങ്ങ​ളെ​ക്കു​റി​ച്ചു ബൈബിൾ പറയു​ന്നുണ്ട്‌—സ്വർഗീ​യ​വും ഭൗമി​ക​വും. എക്കാല​ത്തും ജീവിച്ചു മരിച്ചി​ട്ടു​ള്ള​വ​രിൽ ഏറിയ പങ്കി​ന്റെ​യും പ്രതി​ഫലം ഒരു ഭൗമിക പുനരു​ത്ഥാ​ന​മാ​യി​രി​ക്കും. ദൈവ​ത്തി​ന്റെ സ്വർഗീയ രാജ്യ​ത്തിൽ ക്രിസ്‌തു​വി​നോ​ടു കൂടെ ഭരണം നടത്തു​ന്ന​തി​നു വളരെ കുറച്ചു പേർക്കേ സ്വർഗീയ പുനരു​ത്ഥാ​ന​മു​ള്ളൂ. (വെളി​പ്പാ​ടു 14:1-3; 20:4) എപ്പോ​ഴാ​ണു ഭൗമിക പുനരു​ത്ഥാ​നം ആരംഭി​ക്കു​ന്നത്‌? ഇപ്പോ​ഴത്തെ ദുഷ്ട വ്യവസ്ഥി​തി​യെ ദൈവം നശിപ്പി​ക്കു​ക​യും നീതി​യുള്ള ഒരു പുതിയ മനുഷ്യ സമുദാ​യ​മായ “ഒരു പുതിയ ഭൂമി” യാഥാർഥ്യ​മാ​യി​ത്തീ​രു​ക​യും ചെയ്‌ത​ശേഷം അത്‌ ആരംഭി​ക്കും.—2 പത്രോസ്‌ 3:13, NW; സദൃശ​വാ​ക്യ​ങ്ങൾ 2:21, 22; ദാനീ​യേൽ 2:44.

“പുതിയ ഭൂമി”യിൽ മേലാൽ രോഗ​മോ ദുരി​ത​മോ ഉണ്ടായി​രി​ക്കു​ക​യില്ല. മരണം പോലും മേലാൽ ഉണ്ടായി​രി​ക്കു​ക​യില്ല, ആ സ്ഥാനത്ത്‌ അനന്തജീ​വന്റെ പ്രതീ​ക്ഷ​യാ​യി​രി​ക്കും ഉണ്ടായി​രി​ക്കുക. “[ദൈവം] അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല; ഒന്നാമ​ത്തേതു കഴിഞ്ഞു​പോ​യി.” (വെളി​പ്പാ​ടു 21:4, 5) മാത്രമല്ല, സങ്കീർത്ത​ന​ക്കാ​രൻ ഇങ്ങനെ മുൻകൂ​ട്ടി​പ്പ​റഞ്ഞു: “നീതി​മാൻമാർ ഭൂമിയെ അവകാ​ശ​മാ​ക്കി എന്നേക്കും അതിൽ വസിക്കും.” (സങ്കീർത്തനം 37:29) അതു​പോ​ലെ, “സൌമ്യ​ത​യു​ള്ളവർ ഭാഗ്യ​വാൻമാർ; അവർ ഭൂമിയെ അവകാ​ശ​മാ​ക്കും” എന്നു യേശു പ്രസ്‌താ​വി​ച്ചു.—മത്തായി 5:5.

ദൈവ​ത്തി​ന്റെ മഹത്തര​മായ ആ വാഗ്‌ദ​ത്ത​ങ്ങളെ പുനർജൻമ​പ​ഠി​പ്പി​ക്ക​ലു​മാ​യി താരത​മ്യം ചെയ്‌തു​നോ​ക്കുക. ആ ആശയമ​നു​സ​രിച്ച്‌ ദുഷിച്ച അതേ പഴയ വ്യവസ്ഥി​തി​യിൽത്തന്നെ ജീവി​ക്കാൻ നിങ്ങൾ വീണ്ടും വീണ്ടും മടങ്ങി​യെ​ത്തും. അതിന്റെ അർഥം ദുഷ്ടത, യാതന, രോഗം, മരണം എന്നിവ അടങ്ങിയ ജീവി​ത​ച​ക്ര​ത്തിന്‌ അറുതി​യു​ണ്ടാ​വില്ല എന്നതു​തന്നെ. ആ വീക്ഷണം എത്ര ആശയറ​റ​താണ്‌!

നിങ്ങൾ മുമ്പു ജീവി​ച്ചി​ട്ടു​ണ്ടോ? നിങ്ങൾ വീണ്ടും ജീവി​ക്കു​മോ? എന്നീ ചോദ്യ​ങ്ങൾക്കു ബൈബിൾ ഈ വിധത്തിൽ ഉത്തരം നൽകുന്നു: ഇല്ല, ഇപ്പോ​ഴത്തെ ജീവി​ത​മ​ല്ലാ​തെ ഒരു ജീവി​ത​വും നിങ്ങൾ നയിച്ചി​ട്ടില്ല. എന്നാൽ നിങ്ങളു​ടെ ജീവി​തത്തെ നിലനിൽക്കുന്ന ഒന്നാക്കി​ത്തീർക്കാൻ, അനന്തമായ ഒന്നാക്കി​ത്തീർക്കാൻ നിങ്ങൾക്കു സാധി​ക്കും. ഇന്ന്‌, ഇപ്പോ​ഴത്തെ വ്യവസ്ഥി​തി​യു​ടെ ഈ “അന്ത്യനാ​ളുക”ളിൽ, ലോകാ​വ​സാ​നത്തെ അതിജീ​വിച്ച്‌ മരിക്കാ​തെ​തന്നെ ദൈവ​ത്തി​ന്റെ പുതിയ ലോക​ത്തി​ലേക്കു കടക്കു​ന്ന​തി​നുള്ള പ്രത്യാശ നിങ്ങൾക്ക്‌ ഉണ്ടായി​രി​ക്കാൻ കഴിയും. (2 തിമോ​ത്തി 3:1-5, NW; വെളി​പ്പാ​ടു 7:9-15) അഥവാ ദൈവ​ത്തി​ന്റെ പുതിയ ലോകം വരുന്ന​തി​നു മുമ്പ്‌ നിങ്ങൾ മരിച്ചു​പോ​യാൽ, ഒരു പറുദീ​സാ​ഭൂ​മി​യി​ലെ അനന്തജീ​വ​നി​ലേക്കു പുനരു​ത്ഥാ​നം ചെയ്യ​പ്പെ​ടു​ന്ന​തി​ന്റെ പ്രത്യാശ നിങ്ങൾക്കു​ണ്ടാ​യി​രി​ക്കാ​വു​ന്ന​താണ്‌.—ലൂക്കൊസ്‌ 23:43.

നിങ്ങൾ യേശു​വിൽ വിശ്വാ​സം പ്രകട​മാ​ക്കു​ന്നെ​ങ്കിൽ നിങ്ങൾക്ക്‌ എന്തുതന്നെ സംഭവി​ച്ചാ​ലും, മറിയ​യു​ടെ സഹോ​ദ​ര​നായ ലാസർ മരിച്ച​പ്പോൾ യേശു അവളോ​ടു പറഞ്ഞ വാക്കുകൾ നിങ്ങൾക്കും ബാധക​മാ​കും: “ഞാൻ തന്നേ പുനരു​ത്ഥാ​ന​വും ജീവനും ആകുന്നു; എന്നിൽ വിശ്വ​സി​ക്കു​ന്നവൻ മരിച്ചാ​ലും ജീവി​ക്കും. ജീവി​ച്ചി​രു​ന്നു എന്നിൽ വിശ്വ​സി​ക്കു​ന്നവൻ ആരും ഒരുനാ​ളും മരിക്ക​യില്ല.”—യോഹ​ന്നാൻ 11:25, 26.

[8-ാം പേജിലെ ആകർഷ​ക​വാ​ക്യം]

ആദാമിന്‌ ഒരു അമർത്ത്യ​ദേഹി ഉണ്ടായി​രു​ന്നില്ല, മറിച്ച്‌ അവൻ മരിച്ച​പ്പോൾ പൊടി​യി​ലേക്കു തിരികെ പോയി

[9-ാം പേജിലെ ചിത്രം]

ദൈവവചനം പഠിപ്പി​ക്കു​ന്നത്‌ പുനരു​ത്ഥാ​ന​മാണ്‌, അല്ലാതെ പുനർജൻമ​മല്ല