“സഹജ ജ്ഞാന”മുള്ള ജന്തുക്കൾക്കു നമ്മെ പഠിപ്പി​ക്കാൻ കഴിയു​ന്നത്‌

എയർ-കണ്ടീഷ​നിങ്‌, ആൻറി​ഫ്രീസ്‌, കടൽവെ​ള്ള​ത്തിൽനിന്ന്‌ ഉപ്പു നീക്കം ചെയ്യൽ, സോണാർ എന്നിവ 20-ാം നൂറ്റാ​ണ്ടിൽ മനുഷ്യ​വർഗ​ത്തി​നു പരക്കെ അറിയാൻ കഴിഞ്ഞ കണ്ടുപി​ടി​ത്ത​ങ്ങ​ളാണ്‌. എന്നുവ​രി​കി​ലും അവ ആയിര​ക്ക​ണ​ക്കി​നു വർഷങ്ങൾക്കു​മു​മ്പു മൃഗ​ലോ​കത്തു നിലവി​ലു​ണ്ടാ​യി​രു​ന്നു. അതേ, മനുഷ്യ​വർഗം “സഹജ ജ്ഞാനമുള്ള” അത്തരം ജന്തുക്ക​ളെ​ക്കു​റി​ച്ചു പഠിക്കു​ന്ന​തിൽനി​ന്നു പ്രയോ​ജനം നേടുന്നു. (സദൃശ​വാ​ക്യ​ങ്ങൾ 30:24-28; ഇയ്യോബ്‌ 12:7-9) ചില മൃഗങ്ങൾ മനുഷ്യ​വർഗ​ത്തി​ന്റെ സംസാ​ര​ര​ഹിത ഉപദേ​ഷ്ടാ​ക്ക​ളാ​യി​ത്തീർന്നി​രി​ക്കു​ന്നു​വെന്നു തോന്നു​ന്നു. അവയെ​ക്കു​റി​ച്ചു പഠിക്കു​ന്നതു വളരെ​യ​ധി​കം താത്‌പ​ര്യ​ജ​ന​ക​മെന്നു കണ്ടെത്താൻ നമുക്കു കഴിയും.

ചില മൃഗങ്ങ​ളു​ടെ സ്വഭാ​വ​വി​ശേ​ഷങ്ങൾ പരിചി​ന്തി​ക്കു​ന്ന​തിൽനി​ന്നു നമുക്കു പ്രയോ​ജ​ന​മ​നു​ഭ​വി​ക്കാൻ കഴിയു​മോ? കൊള്ളാം, യേശു​ക്രി​സ്‌തു തന്റെ അനുഗാ​മി​കളെ ചെമ്മരി​യാ​ടു​കൾ, പാമ്പുകൾ, പ്രാവു​കൾ, വെട്ടു​ക്കി​ളി​കൾ എന്നിവ​യോട്‌ ഉപമിച്ചു. തന്റെ അനുഗാ​മി​കളെ ആ ജന്തുക്ക​ളോട്‌ ഉപമി​ച്ച​പ്പോൾ അവന്റെ മനസ്സി​ലു​ണ്ടാ​യി​രു​ന്നത്‌ എന്തായി​രു​ന്നു? നമുക്കു കാണാം.

“എന്റെ ആടുകൾ എന്റെ ശബ്ദം കേൾക്കു​ന്നു”

ബൈബി​ളിൽ 200-ലധികം തവണ ചെമ്മരി​യാ​ടു​ക​ളെ​ക്കു​റി​ച്ചു പരാമർശി​ക്കു​ന്നുണ്ട്‌. സ്‌മി​ത്തി​ന്റെ ബൈബിൾ നിഘണ്ടു (ഇംഗ്ലീഷ്‌) വിശദീ​ക​രി​ക്കുന്ന പ്രകാരം, “ചെമ്മരി​യാ​ടു​കൾ സൗമ്യ​ത​യു​ടെ​യും ക്ഷമയു​ടെ​യും കീഴ്‌പെ​ട​ലി​ന്റെ​യും പ്രതീ​ക​മാണ്‌.” യെശയ്യാ​വു 53-ാം അധ്യാ​യ​ത്തിൽ യേശു​ത​ന്നെ​യും പ്രാവ​ച​നി​ക​മാ​യി ഒരു ചെമ്മരി​യാ​ടി​നോട്‌ ഉപമി​ക്ക​പ്പെ​ടു​ക​യു​ണ്ടാ​യി. തന്റെ അനുഗാ​മി​കളെ അവൻ അതേ മൃഗ​ത്തോട്‌ ഉപമി​ക്കു​ന്നത്‌ എത്ര അനു​യോ​ജ്യ​മാണ്‌! എന്നാൽ ചെമ്മരി​യാ​ടി​ന്റെ ഏതു പ്രത്യേക സവി​ശേ​ഷ​ത​ക​ളാണ്‌ യേശു​വി​ന്റെ മനസ്സി​ലു​ണ്ടാ​യി​രു​ന്നത്‌?

“എന്റെ ആടുകൾ എന്റെ ശബ്ദം കേൾക്കു​ന്നു; ഞാൻ അവയെ അറിക​യും അവ എന്നെ അനുഗ​മി​ക്ക​യും ചെയ്യുന്നു” എന്ന്‌ യേശു പറഞ്ഞു. (യോഹ​ന്നാൻ 10:26, 27) അങ്ങനെ അവൻ തന്റെ ശിഷ്യ​ന്മാ​രു​ടെ സൗമ്യ​ത​യും അവനെ അനുഗ​മി​ക്കാ​നുള്ള അവരുടെ ഉത്സാഹ​വും എടുത്തു​കാ​ട്ടി. അക്ഷരീയ ചെമ്മരി​യാ​ടു​കൾ തങ്ങളുടെ ഇടയന്റെ ശബ്ദം കേട്ടു മനസ്സോ​ടെ അവനെ അനുഗ​മി​ക്കു​ന്നു. ഇടയനും ആട്ടിൻകൂ​ട്ട​ത്തോട്‌ ഒരു പ്രത്യേക അടുപ്പ​മുണ്ട്‌.

ഒരു ആട്ടിൻകൂ​ട്ടം മേച്ചിൽസ്ഥ​ലത്ത്‌ അങ്ങിങ്ങാ​യാ​കും മേയു​ന്നത്‌. എന്നാൽ മൊത്തം ആട്ടിൻകൂ​ട്ട​വു​മാ​യി ഓരോ ആടും സമ്പർക്കം പുലർത്തു​ന്നു​ണ്ടാ​കും. അങ്ങനെ, ആ മൃഗങ്ങൾക്ക്‌ അരക്ഷി​ത​ത്വ​മോ പേടി​യോ തോന്നു​മ്പോൾ, “അവയ്‌ക്കു തിടു​ക്ക​ത്തിൽ കൂട്ടം​കൂ​ടാൻ കഴിയും” എന്ന്‌ അല്ലെസ്‌ ഫൂർ ഡാസ്‌ ഷാഫ്‌ (സകലതും ആടുകൾക്കു​വേണ്ടി) എന്ന പുസ്‌തകം പ്രസ്‌താ​വി​ക്കു​ന്നു. ആടുകൾ അപകട​ത്തിൽനിന്ന്‌ ഓടി രക്ഷപ്പെ​ടു​ന്നെ​ങ്കിൽ അവ ഒരു കൂട്ടമാ​യാണ്‌ അതു ചെയ്യുക. ചുറ്റു​പാ​ടു​കളെ പുനർനി​രീ​ക്ഷി​ക്കു​ന്ന​തിന്‌ ഇടയ്‌ക്കി​ടെ അവ നിൽക്കും. “പല ഘട്ടമായി ഓടു​ന്നത്‌ കുഞ്ഞാ​ടു​കൾക്കും ബലക്ഷയം വന്ന ആടുകൾക്കും കൂട്ട​ത്തോ​ടൊ​പ്പം ഓടി​യെ​ത്താൻ അവസര​മൊ​രു​ക്കു​ന്നു. ആട്ടിൻകൂ​ട്ടം അവയ്‌ക്കു പ്രത്യേക സംരക്ഷ​ണം​പോ​ലും നൽകുന്നു.” ഈ പെരു​മാ​റ്റ​ത്തിൽനി​ന്നു നമുക്ക്‌ എന്തു പഠിക്കാൻ കഴിയും?

സത്യ​ക്രി​സ്‌ത്യാ​നി​കൾ ഇന്ന്‌ ക്രൈ​സ്‌ത​വ​ലോ​ക​ത്തി​ലെ മതവി​ഭാ​ഗ​ങ്ങ​ളി​ലും പിരി​വു​ക​ളി​ലു​മാ​യി ഛിന്നി​ച്ചി​ത​റി​ക്കി​ട​ക്കു​ന്നില്ല. മറിച്ച്‌, അവ ഒറ്റ ആട്ടിൻകൂ​ട്ട​മാ​യി കൂടി​വ​ന്നി​രി​ക്കു​ന്നു. ദൈവ​ത്തി​ന്റെ ഈ ആട്ടിൻകൂ​ട്ട​ത്തോട്‌ ഓരോ ക്രിസ്‌ത്യാ​നി​ക്കും വ്യക്തി​പ​ര​മായ അടുപ്പം തോന്നു​ന്നു. അത്‌ യഹോ​വ​യു​ടെ സാക്ഷി​ക​ളു​ടെ സ്ഥാപന​ത്തി​ന്റെ ഐക്യ​ത്തി​നു സഹായി​ക്കു​ന്നു. ഗുരു​ത​ര​മായ ഒരു രോഗ​മോ യുദ്ധമോ പ്രകൃതി വിപത്തോ എന്നുവേണ്ട എന്തെങ്കി​ലും ഒരു പ്രതി​സന്ധി എപ്പോ​ഴെ​ങ്കി​ലും തലപൊ​ക്കി​യാൽ ഓരോ ആരാധ​ക​നും മാർഗ​ദർശ​ന​ത്തി​നും സംരക്ഷ​ണ​ത്തി​നു​മാ​യി എങ്ങോ​ട്ടാണ്‌ ഓടുക? ആത്മീയ സുരക്ഷി​ത​ത്വം പ്രദാനം ചെയ്യുന്ന യഹോ​വ​യു​ടെ സ്ഥാപന​ത്തി​ലേക്ക്‌.

ബൈബിൾ ബുദ്ധ്യു​പ​ദേശം എങ്ങനെ​യാ​ണു ലഭ്യമാ​ക്കു​ന്നത്‌? വീക്ഷാ​ഗോ​പു​ര​വും അതിന്റെ കൂട്ടു​മാ​സി​ക​യായ ഉണരുക!യും പോലുള്ള പ്രസി​ദ്ധീ​ക​ര​ണ​ങ്ങ​ളി​ലൂ​ടെ. ഈ മാസി​ക​ക​ളും ക്രിസ്‌തീയ യോഗ​ങ്ങ​ളും ആട്ടിൻകൂ​ട്ട​ത്തി​ലെ കുഞ്ഞാ​ടു​ക​ളെ​യും ബലക്ഷയം​വന്ന ആടുക​ളെ​യും​പോ​ലെ കൂടു​ത​ലായ പരിപാ​ലനം ആവശ്യ​മു​ള്ള​വർക്കു പ്രത്യേക സഹായം നൽകു​ക​പോ​ലും ചെയ്യുന്നു. ഉദാഹ​ര​ണ​ത്തിന്‌, ഒറ്റയ്‌ക്കുള്ള മാതാ​വി​നും പിതാ​വി​നും വിഷാ​ദ​ത്താൽ കഷ്ടപ്പെ​ടു​ന്ന​വർക്കും ശ്രദ്ധ നൽകുന്നു. തന്മൂലം, ഓരോ മാസി​ക​യും വായി​ക്കു​ന്ന​തും സഭാ​യോ​ഗ​ങ്ങൾക്കെ​ല്ലാം ഹാജരാ​കു​ന്ന​തും പഠിക്കുന്ന കാര്യങ്ങൾ നാം ബാധക​മാ​ക്കു​ന്ന​തും എത്ര ജ്ഞാനപൂർവ​ക​മാണ്‌! അങ്ങനെ, നാം സൗമ്യ​ത​യും ദൈവ​ത്തി​ന്റെ ആട്ടിൻകൂ​ട്ട​ത്തോ​ടു ശക്തമായ അടുപ്പ​വും പ്രദർശി​പ്പി​ക്കു​ന്നു.—1 പത്രൊസ്‌ 5:2.

“പാമ്പി​നെ​പ്പോ​ലെ ബുദ്ധി​യു​ള്ള​വ​രും പ്രാവി​നെ​പ്പോ​ലെ കളങ്കമി​ല്ലാ​ത്ത​വ​രും”

സ്‌മി​ത്തി​ന്റെ ബൈബിൾ നിഘണ്ടു (ഇംഗ്ലീഷ്‌) ഇങ്ങനെ പ്രസ്‌താ​വി​ക്കു​ന്നു: “പൂർവ​ദേ​ശ​ത്തു​ട​നീ​ളം പാമ്പിനെ തിന്മയു​ടെ, അനുസ​ര​ണ​ക്കേ​ടി​ന്റെ ആത്മാവി​ന്റെ പ്രതീ​ക​മാ​യാണ്‌ ഉപയോ​ഗി​ച്ചി​രു​ന്നത്‌.” നേരേ​മ​റിച്ച്‌, ‘എന്റെ പ്രാവ്‌’ എന്നതു സ്‌നേ​ഹ​പ്ര​ക​ട​ന​ത്തി​ന്റെ​തായ ഒരു പദപ്ര​യോ​ഗ​മാ​യി​രു​ന്നു. (ഉത്തമഗീ​തം 5:2) അപ്പോൾ, “പാമ്പി​നെ​പ്പോ​ലെ ബുദ്ധി​യു​ള്ള​വ​രും പ്രാവി​നെ​പ്പോ​ലെ കളങ്കമി​ല്ലാ​ത്ത​വ​രും” ആയിരി​ക്കാൻ തന്റെ അനുഗാ​മി​കളെ പ്രോ​ത്സാ​ഹി​പ്പി​ച്ച​പ്പോൾ യേശു​വി​ന്റെ മനസ്സി​ലു​ണ്ടാ​യി​രു​ന്നത്‌ എന്താണ്‌?—മത്തായി 10:16.

യേശു പ്രസം​ഗി​ക്കു​ക​യും പഠിപ്പി​ക്കു​ക​യും ചെയ്യു​ന്ന​തി​നു നിർദേ​ശങ്ങൾ നൽകു​ക​യാ​യി​രു​ന്നു. അവന്റെ ശിഷ്യ​ന്മാർക്ക്‌ ഒരു സമ്മിശ്ര പ്രതി​ക​ര​ണമേ പ്രതീ​ക്ഷി​ക്കാ​നാ​കു​മാ​യി​രു​ന്നു​ള്ളൂ. ചില​രെ​ല്ലാം താത്‌പ​ര്യം കാട്ടും എന്നാൽ, മറ്റുചി​ലർ സുവാർത്ത നിരസി​ക്കും. ചിലർ ദൈവ​ത്തി​ന്റെ ഈ യഥാർഥ സേവകരെ പീഡി​പ്പി​ക്കു​ക​പോ​ലും ചെയ്യും. (മത്തായി 10:17-23) പീഡന​ത്തോ​ടു ശിഷ്യർ എങ്ങനെ പ്രതി​ക​രി​ക്കേ​ണ്ടി​യി​രു​ന്നു?

ഡാസ്‌ എഫങ്കേ​ലി​യൂം ഡെസ്‌ മാറ്റേ​യു​സിൽ (മത്തായി​യു​ടെ സുവി​ശേഷം) ഫ്രിട്ട്‌സ്‌ റീനെക്കർ മത്തായി 10:16-നെക്കു​റിച്ച്‌ ഇങ്ങനെ പറയുന്നു: “ബുദ്ധി​കൂർമത . . . നിർമലത, ആത്മാർഥത, പരമാർഥത എന്നിവ​യു​മാ​യി ഒത്തു​ചേർന്നി​രി​ക്കണം, അല്ലാത്ത​പക്ഷം ശത്രു​ക്കൾക്കു പരാതി​ക്കു ന്യായ​മായ കാരണങ്ങൾ ഉണ്ടായി​രി​ക്ക​ത്ത​ക്ക​വണ്ണം എന്തു​വേ​ണ​മെ​ങ്കി​ലും സംഭവി​ച്ചേ​ക്കാം. യാതൊ​രു പരിഗ​ണ​ന​യും കാട്ടാത്ത, കരുണ കൂടാതെ ഏതു നിസ്സാര അവസര​ത്തി​ലും അപ്പോ​സ്‌ത​ല​ന്മാ​രെ ആക്രമി​ക്കുന്ന നിർദ​യ​രായ എതിരാ​ളി​ക​ളു​ടെ​യി​ട​യി​ലാണ്‌ യേശു​വി​ന്റെ സ്ഥാനപ​തി​കൾ. തന്മൂലം, എതിരാ​ളി​ക​ളു​ടെ​മേൽ—ഒരു പാമ്പി​നെ​പ്പോ​ലെ—ജാഗരൂ​ക​മായ ഒരു കണ്ണുണ്ടാ​യി​രി​ക്കു​ന്ന​തും കണ്ണുക​ളും ഇന്ദ്രി​യ​ങ്ങ​ളും തുറന്നു​പി​ടി​ച്ചു​കൊ​ണ്ടു സാഹച​ര്യ​ത്തെ അവലോ​കനം ചെയ്യു​ന്ന​തും അത്യാ​വ​ശ്യ​മാണ്‌; കൗശല​മോ വഞ്ചനയോ പ്രയോ​ഗി​ക്കാ​തെ, വാക്കി​ലും പ്രവൃ​ത്തി​യി​ലും ശുദ്ധി​യും സത്യവും ഉള്ളവരാ​യി​രു​ന്നു​കൊ​ണ്ടും അങ്ങനെ പ്രാവു​ക​ളെന്നു സ്വയം തെളി​യി​ച്ചു​കൊ​ണ്ടും സാഹച​ര്യ​ത്തി​ന്റെ​മേൽ നിയ​ന്ത്ര​ണ​മു​ണ്ടാ​യി​രി​ക്കേ​ണ്ടത്‌ ആവശ്യ​മാണ്‌.”

മത്തായി 10:16-ൽ കാണുന്ന യേശു​വി​ന്റെ വാക്കു​ക​ളിൽനി​ന്നു ദൈവ​ത്തി​ന്റെ ആധുനിക ദാസർക്ക്‌ എന്തു പഠിക്കാൻ കഴിയും? ഒന്നാം നൂറ്റാ​ണ്ടിൽ ആളുകൾ സുവാർത്ത​യോ​ടു പ്രതി​ക​രി​ച്ച​തിന്‌ ഏറെക്കു​റെ സമാന​മായ വിധത്തി​ലാണ്‌ ഇന്ന്‌ ആളുകൾ പ്രതി​ക​രി​ക്കു​ന്നത്‌. പീഡനത്തെ അഭിമു​ഖീ​ക​രി​ക്കു​മ്പോൾ സത്യ ക്രിസ്‌ത്യാ​നി​കൾ സർപ്പത്തി​ന്റെ ബുദ്ധി​കൂർമ​ത​യും പ്രാവി​ന്റെ നിർമ​ല​ത​യും കൂട്ടി​യി​ണ​ക്കേ​ണ്ട​തുണ്ട്‌. മറ്റുള്ള​വ​രോ​ടു രാജ്യ​സ​ന്ദേശം പ്രഖ്യാ​പി​ക്കു​മ്പോൾ ക്രിസ്‌ത്യാ​നി​കൾ ഒരിക്ക​ലും വഞ്ചനയോ കള്ളത്തര​മോ ഉപയോ​ഗി​ക്കു​ന്നില്ല മറിച്ച്‌, ശുദ്ധരും ആത്മാർഥ​രും സത്യസ​ന്ധ​രു​മാണ്‌.

ഉദാഹ​ര​ണ​ത്തിന്‌: സഹപ്ര​വർത്ത​ക​രോ സഹപാ​ഠി​ക​ളോ നിങ്ങളു​ടെ സ്വന്ത കുടും​ബാം​ഗങ്ങൾ പോലു​മോ യഹോ​വ​യു​ടെ ഒരു സാക്ഷി​യെന്ന നിലയി​ലുള്ള നിങ്ങളു​ടെ വിശ്വാ​സ​ങ്ങ​ളെ​ക്കു​റി​ച്ചു കുത്തി​നോ​വി​ക്കുന്ന അഭി​പ്രാ​യങ്ങൾ പറഞ്ഞെ​ന്നു​വ​രാം. അവരുടെ വിശ്വാ​സ​ത്തെ​ക്കു​റി​ച്ചു സമാന​മായ വിധത്തിൽ അഭി​പ്രാ​യ​പ്പെ​ട്ടു​കൊ​ണ്ടു പരുഷ​മാ​യി പ്രതി​ക​രി​ക്കാ​നാ​വും ഉടനടി തോന്നുക. എന്നാൽ അതു കളങ്കര​ഹി​ത​മെന്നു പറയാൻ കഴിയു​മോ? ഇല്ലേയില്ല. വിമർശ​ക​രു​ടെ അഭി​പ്രാ​യങ്ങൾ നിങ്ങളു​ടെ ഹൃദ്യ​മായ പെരു​മാ​റ്റ​ത്തി​നു യാതൊ​രു മാറ്റവും വരുത്തു​ന്നി​ല്ലെന്നു നിങ്ങൾ അവരെ കാട്ടു​മ്പോൾ കുത്തി​നോ​വി​ക്കുന്ന അഭി​പ്രാ​യങ്ങൾ അവർ നിർത്തി​യേ​ക്കാം. അപ്പോൾ നിങ്ങൾ ബുദ്ധി​കൂർമ​ത​യു​ള്ള​വ​രും കളങ്കര​ഹി​ത​രു​മാ​യി​രി​ക്കും—‘പാമ്പി​നെ​പ്പോ​ലെ ബുദ്ധി​യു​ള്ള​വ​രാ​യി​രി​ക്കേ പ്രാവി​നെ​പ്പോ​ലെ കളങ്കമി​ല്ലാ​ത്തവർ’തന്നെ.

“വെട്ടു​ക്കി​ളി​യു​ടെ രൂപം യുദ്ധത്തി​ന്നു ചമയിച്ച കുതി​രെക്കു സമം”

“രേഖ​പ്പെ​ടു​ത്തി​യി​ട്ടുള്ള ചരി​ത്ര​ത്തി​ലേ​ക്കും ഏറ്റവും വലിയ [വെട്ടു​ക്കി​ളി] ബാധ” 1784-ൽ ദക്ഷിണാ​ഫ്രി​ക്ക​യിൽ നാശം വിതച്ച​താ​യി ജിഇഓ മാസിക റിപ്പോർട്ടു ചെയ്യുന്നു. വെട്ടു​ക്കി​ളി​ക്കൂ​ട്ടം 5,200 ചതുരശ്ര കിലോ​മീ​റ്റർ വ്യാപി​ക്കു​ക​യു​ണ്ടാ​യി. അതു ഹോ​ങ്കോ​ങ്ങി​ന്റെ വലുപ്പ​ത്തി​ന്റെ അഞ്ചിര​ട്ടി​യാണ്‌. സ്‌മി​ത്തി​ന്റെ ബൈബിൾ നിഘണ്ടു ഇങ്ങനെ പറയുന്നു: “വെട്ടു​ക്കി​ളി​കൾ അവ സന്ദർശി​ക്കുന്ന രാജ്യ​ങ്ങ​ളി​ലെ സസ്യല​താ​ദി​കളെ ഭീതി​ദ​മാം​വി​ധം നശിപ്പി​ക്കു​ന്നു.”

“കർത്തൃ​ദി​വ​സ​ത്തിൽ” സംഭവി​ക്കാൻ പോകുന്ന കാര്യ​ങ്ങ​ളെ​ക്കു​റി​ച്ചുള്ള ദൈവദത്ത വെളി​പാ​ടിൽ യേശു ഒരു കൂട്ടം വെട്ടു​ക്കി​ളി​ക​ളെ​ക്കു​റി​ച്ചുള്ള ദർശനം ഉപയോ​ഗി​ച്ചു. “വെട്ടു​ക്കി​ളി​യു​ടെ രൂപം യുദ്ധത്തി​ന്നു ചമയിച്ച കുതി​രെക്കു സമം” എന്ന്‌ അവയെ​പ്പറ്റി പറയ​പ്പെട്ടു. (വെളി​പ്പാ​ടു 1:1, 10; 9:3-7) ആ പ്രതീ​ക​ത്തി​ന്റെ പ്രാധാ​ന്യ​മെ​ന്താ​യി​രു​ന്നു?

വെളി​പാട്‌ 9-ാം അധ്യാ​യ​ത്തി​ലെ വെട്ടു​ക്കി​ളി​കൾ ഈ നൂറ്റാ​ണ്ടിൽ ഭൂമി​യി​ലുള്ള ദൈവ​ത്തി​ന്റെ അഭിഷിക്ത ദാസരെ ചിത്രീ​ക​രി​ക്കു​ന്നു​വെന്നു യഹോ​വ​യു​ടെ സാക്ഷികൾ പണ്ടുമു​തലേ മനസ്സി​ലാ​ക്കി​യി​ട്ടുണ്ട്‌.a രാജ്യ​സ​ന്ദേശം ലോക​വ്യാ​പ​ക​മാ​യി പ്രസം​ഗി​ച്ചു ശിഷ്യരെ ഉളവാ​ക്കാ​നുള്ള ഒരു പ്രത്യേക വേല ഈ ക്രിസ്‌ത്യാ​നി​കൾക്കു നിയമി​ച്ചു കൊടു​ത്തി​രി​ക്കു​ന്നു. (മത്തായി 24:14; 28:19, 20) അത്‌ അവർ പ്രതി​ബ​ന്ധങ്ങൾ തരണം​ചെ​യ്യേ​ണ്ട​തും തങ്ങളുടെ വേലയിൽ ഉറച്ചു നിൽക്കേ​ണ്ട​തും ആവശ്യ​മാ​ക്കി​ത്തീർക്കു​ന്നു. അജയ്യമായ വെട്ടു​ക്കി​ളി​ക്ക​ല്ലാ​തെ വേറെ​ന്തിന്‌ അതിനെ മെച്ചമാ​യി ചിത്രീ​ക​രി​ക്കാൻ കഴിയും?

അഞ്ചു സെൻറി​മീ​റ്റ​റി​ലും അൽപ്പം നീളമേ കൂടു​ത​ലു​ള്ളു​വെ​ങ്കി​ലും വെട്ടു​ക്കി​ളി ദിവസം 100 മുതൽ 200 വരെ കിലോ​മീ​റ്റർ യാത്ര ചെയ്യുന്നു. മരുഭൂ വെട്ടു​ക്കി​ളി​കൾ 1,000 കിലോ​മീ​റ്റർ യാത്ര ചെയ്‌തെന്നു വരാം. “അതിന്റെ ചിറക്‌ സെക്കൻറിൽ 18 തവണ അടിക്കു​ന്നു, അതും ദിവസം 17 മണിക്കൂ​റോ​ളം—മറ്റൊരു പ്രാണി​ക്കും അതു ചെയ്യാൻ പ്രാപ്‌തി​യില്ല” എന്നു ജിഇഓ വിശദീ​ക​രി​ക്കു​ന്നു. അത്തര​മൊ​രു കൊച്ചു ജീവിയെ സംബന്ധി​ച്ചി​ട​ത്തോ​ളം എത്ര ഭീമമായ വേല!

ഒരു കൂട്ടമെന്ന നിലയിൽ യഹോ​വ​യു​ടെ സാക്ഷികൾ രാജ്യ സുവാർത്ത വ്യാപി​പ്പി​ക്കു​ന്ന​തിൽ ദൃഢചി​ത്ത​രാണ്‌. അവരി​പ്പോൾ 230-ലധികം രാജ്യ​ങ്ങ​ളിൽ പ്രസം​ഗി​ക്കു​ന്നു. ആ വേല നിർവ​ഹി​ക്കു​ന്ന​തിൽ പങ്കുപ​റ്റു​ന്ന​തിന്‌ ഈ ദൈവ​ദാ​സർ നിരവധി ബുദ്ധി​മു​ട്ടു​കൾ തരണം ചെയ്യു​ന്നുണ്ട്‌. ഏതു തരത്തി​ലുള്ള പ്രശ്‌ന​ങ്ങ​ളാണ്‌ അവർ അഭിമു​ഖീ​ക​രി​ക്കു​ന്നത്‌? മുൻവി​ധി, നിയമ​പ​ര​മായ നിയ​ന്ത്ര​ണങ്ങൾ, രോഗങ്ങൾ, നിരു​ത്സാ​ഹം, ബന്ധുക്ക​ളിൽനി​ന്നുള്ള എതിർപ്പ്‌ എന്നിവ അവയിൽ ഏതാനും ചിലതു മാത്ര​മാണ്‌. എന്നാൽ അവരുടെ മുന്നേ​റ്റത്തെ തടയാൻ ഒന്നിനും സാധി​ച്ചി​ട്ടില്ല. അവർ തങ്ങളുടെ ദൈവദത്ത വേലയിൽ ഉറച്ചു നിൽക്കു​ന്നു.

ക്രിസ്‌തീയ ഗുണങ്ങൾ പ്രകടി​പ്പി​ക്കു​ന്ന​തിൽ തുടരുക

അതേ, യേശു തന്റെ അനുഗാ​മി​കളെ ചെമ്മരി​യാട്‌, പാമ്പ്‌, പ്രാവ്‌, വെട്ടു​ക്കി​ളി എന്നിവ​യോട്‌ ഉപമിച്ചു. നമ്മുടെ നാളിൽ ഇതു തികച്ചും അനു​യോ​ജ്യ​മാണ്‌. എന്തു​കൊണ്ട്‌? എന്തു​കൊ​ണ്ടെ​ന്നാൽ ഈ വ്യവസ്ഥി​തി​യു​ടെ അന്ത്യം ആസന്നമാ​യി​രി​ക്ക​യാണ്‌. മാത്രമല്ല, പ്രശ്‌നങ്ങൾ എന്നത്തേ​ക്കാൾ അധിക​മാ​യി സമ്മർദം ചെലു​ത്തു​ക​യു​മാണ്‌.

യേശു​വി​ന്റെ ഉപമയി​ലെ വാക്കുകൾ മനസ്സിൽ പിടി​ച്ചു​കൊണ്ട്‌ സത്യ​ക്രി​സ്‌ത്യാ​നി​കൾ ദൈവ​ത്തി​ന്റെ ആട്ടിൻകൂ​ട്ട​ത്തോ​ടു പറ്റിനിൽക്കു​ക​യും യഹോ​വ​യു​ടെ സ്ഥാപന​ത്തിൽനി​ന്നുള്ള ബുദ്ധ്യു​പ​ദേശം സൗമ്യ​ത​യോ​ടെ കൈ​ക്കൊ​ള്ളു​ക​യും ചെയ്യുന്നു. തങ്ങളുടെ ക്രിസ്‌തീയ പ്രവർത്ത​ന​ങ്ങൾക്കു തടസ്സം സൃഷ്ടി​ച്ചേ​ക്കാ​വുന്ന സാഹച​ര്യ​ങ്ങൾക്കെ​തി​രെ അവർ ജാഗരൂ​ക​രാണ്‌, ഒപ്പംതന്നെ അവർ സകല കാര്യ​ങ്ങ​ളി​ലും അപവാ​ദ​മു​ക്ത​രാണ്‌. അതിനു​പു​റമേ, അവർ പ്രതി​ബ​ന്ധ​ങ്ങൾക്കു മധ്യേ​യും ദൈവ​ഹി​തം ചെയ്യു​ന്ന​തിൽ ഉറ്റിരി​ക്കു​ന്നു. കൂടാതെ, അവർ “സഹജ ജ്ഞാനമുള്ള” ഏതാനും ജന്തുക്ക​ളിൽനി​ന്നു തുടർന്നു പഠിച്ചു​കൊ​ണ്ടി​രി​ക്കു​ന്നു.

[അടിക്കു​റിപ്പ്‌]