ക്രിസ്‌ത്യാ​നി​ക​ളും മനുഷ്യ​വർഗ​ലോ​ക​വും

“പുറത്തു​ള്ള​വ​രോ​ടു ജ്ഞാന​ത്തോ​ടെ പെരു​മാ​റു​വിൻ.”—കൊ​ലൊ​സ്സ്യർ 4:5.

1. തന്റെ അനുഗാ​മി​ക​ളെ​യും ലോക​ത്തെ​യും കുറിച്ച്‌ യേശു എന്തു പറഞ്ഞു?

തന്റെ സ്വർഗീയ പിതാ​വി​നോ​ടുള്ള പ്രാർഥ​ന​യിൽ, യേശു തന്റെ അനുഗാ​മി​ക​ളെ​ക്കു​റി​ച്ചു പറഞ്ഞു: “ലോകം അവരെ ദ്വേഷി​ച്ചി​രി​ക്കു​ന്നു, എന്തെന്നാൽ ഞാൻ ലോക​ത്തി​ന്റെ ഭാഗമ​ല്ലാ​ത്ത​തു​പോ​ലെ അവരും ലോക​ത്തി​ന്റെ ഭാഗമല്ല.” എന്നിട്ട്‌ അവൻ ഇങ്ങനെ കൂട്ടി​ച്ചേർത്തു: “ലോക​ത്തിൽനിന്ന്‌ അവരെ എടുക്കണം എന്നല്ല, ദുഷ്ടനിൽനിന്ന്‌ അവരെ കാത്തു​കൊ​ള്ളണം എന്നു ഞാൻ നിന്നോട്‌ അപേക്ഷി​ക്കു​ന്നു.” (യോഹ​ന്നാൻ 17:14, 15, NW) ക്രിസ്‌ത്യാ​നി​കൾ ലോക​ത്തിൽനി​ന്നു ശാരീ​രി​ക​മാ​യി അകന്നു​മാ​റി ആശ്രമ​ങ്ങ​ളി​ലേ​തു​പോ​ലുള്ള ഏകാന്ത​ജീ​വി​തം നയി​ക്കേ​ണ്ട​തി​ല്ലാ​യി​രു​ന്നു. മറിച്ച്‌, “ഭൂമി​യു​ടെ അററ​ത്തോ​ള​വും” തന്റെ സാക്ഷികൾ ആകേണ്ട​തി​നു ക്രിസ്‌തു ‘അവരെ ലോക​ത്തി​ലേക്കു അയച്ചു.’ (പ്രവൃ​ത്തി​കൾ 1:8; യോഹ​ന്നാൻ 17:18) അതു​കൊണ്ട്‌, “ഈ ലോക​ത്തി​ന്റെ ഭരണാ​ധി​പനാ”യ സാത്താൻ ക്രിസ്‌തു​വി​ന്റെ നാമം​നി​മി​ത്തം അവർക്കെ​തി​രെ വിദ്വേ​ഷം ഇളക്കി​വി​ടു​മെ​ന്ന​തി​നാൽ അവരെ കാത്തു​കൊ​ള്ള​ണ​മെന്ന്‌ അവർക്കു​വേണ്ടി അവൻ ദൈവ​ത്തോട്‌ അപേക്ഷി​ച്ചു.—യോഹ​ന്നാൻ 12:31, NW; മത്തായി 24:9.

2. (എ) “ലോകം” എന്ന പദം ബൈബിൾ ഉപയോ​ഗി​ക്കു​ന്ന​തെ​ങ്ങനെ? (ബി) ലോക​ത്തി​നു​നേരേ യഹോവ സമനി​ല​യുള്ള എന്തു മനോ​ഭാ​വ​മാ​ണു പ്രകട​മാ​ക്കു​ന്നത്‌?

² ബൈബി​ളിൽ “ലോകം” എന്ന പദം (ഗ്രീക്ക്‌, കോസ്‌മോസ്‌) മിക്ക​പ്പോ​ഴും സൂചി​പ്പി​ക്കു​ന്നത്‌ “ദുഷ്ടന്റെ അധീന​ത​യിൽ കിടക്കുന്ന” നീതി​കെട്ട മനുഷ്യ​സ​മൂ​ഹ​ത്തെ​യാണ്‌. (1 യോഹ​ന്നാൻ 5:19) ക്രിസ്‌ത്യാ​നി​കൾ യഹോ​വ​യു​ടെ നിലവാ​രങ്ങൾ പിൻപ​റ്റു​ന്ന​തി​നാ​ലും ലോക​ത്തോ​ടു ദൈവ​രാ​ജ്യ​സു​വാർത്ത പ്രസം​ഗി​ക്ക​ണ​മെന്ന കൽപ്പന അനുസ​രി​ക്കു​ന്ന​തി​നാ​ലും ചില​പ്പോ​ഴൊ​ക്കെ ലോക​വു​മാ​യുള്ള അവരുടെ ബന്ധത്തിന്‌ ഉലച്ചിൽ തട്ടിയി​ട്ടുണ്ട്‌. (2 തിമൊ​ഥെ​യൊസ്‌ 3:12; 1 യോഹ​ന്നാൻ 3:1, 13) എന്നിരു​ന്നാ​ലും, മനുഷ്യ​വർഗത്തെ പൊതു​വേ പരാമർശി​ച്ചു​കൊ​ണ്ടും കോസ്‌മോസ്‌ എന്ന പദം തിരു​വെ​ഴു​ത്തു​ക​ളിൽ ഉപയോ​ഗി​ക്കു​ന്നുണ്ട്‌. ഈ അർഥത്തിൽ ലോക​ത്തെ​ക്കു​റി​ച്ചു സംസാ​രി​ച്ചു​കൊണ്ട്‌, യേശു പറഞ്ഞു: “തന്റെ ഏകജാ​ത​നായ പുത്ര​നിൽ വിശ്വ​സി​ക്കുന്ന ഏവനും നശിച്ചു​പോ​കാ​തെ നിത്യ​ജീ​വൻ പ്രാപി​ക്കേ​ണ്ട​തി​ന്നു ദൈവം അവനെ നല്‌കു​വാൻ തക്കവണ്ണം ലോകത്തെ സ്‌നേ​ഹി​ച്ചു. ദൈവം തന്റെ പുത്രനെ ലോക​ത്തിൽ അയച്ചതു ലോകത്തെ വിധി​പ്പാ​നല്ല ലോകം അവനാൽ രക്ഷിക്ക​പ്പെ​ടു​വാ​ന​ത്രേ.” (യോഹ​ന്നാൻ 3:16, 17; 2 കൊരി​ന്ത്യർ 5:19; 1 യോഹ​ന്നാൻ 4:14) അതു​കൊണ്ട്‌, സാത്താന്റെ ദുഷ്ടവ്യ​വ​സ്ഥി​തി​യു​ടെ സ്വഭാവം പ്രകട​മാ​ക്കുന്ന സംഗതി​കളെ ദ്വേഷി​ക്ക​വേ​തന്നെ, എല്ലാവ​രെ​യും “മാനസാ​ന്തര”ത്തിലേക്കു വരുത്തി രക്ഷി​ക്കേ​ണ്ട​തി​നു തന്റെ പുത്രനെ ഭൂമി​യി​ലേ​ക്ക​യ​ച്ചു​കൊണ്ട്‌ യഹോവ മനുഷ്യ​വർഗ​ത്തോ​ടു സ്‌നേഹം പ്രകട​മാ​ക്കി. (2 പത്രൊസ്‌ 3:9; സദൃശ​വാ​ക്യ​ങ്ങൾ 6:16-19) ലോക​ത്തോ​ടുള്ള യഹോ​വ​യു​ടെ സമനി​ല​യി​ലുള്ള മനോ​ഭാ​വ​മാണ്‌ അവന്റെ ആരാധ​കരെ നയി​ക്കേ​ണ്ടത്‌.

യേശു​വി​ന്റെ മാതൃക

3, 4. (എ) ഭരണാ​ധി​പ​ത്യം സംബന്ധിച്ച്‌ യേശു എന്തു നിലപാ​ടു കൈ​ക്കൊ​ണ്ടു? (ബി) മനുഷ്യ​വർഗ​ലോ​കത്തെ യേശു എങ്ങനെ വീക്ഷിച്ചു?

³ തന്റെ മരണത്തിന്‌ അൽപ്പം​മുമ്പ്‌, യേശു പൊന്തി​യോസ്‌ പീലാ​ത്തൊ​സി​നോ​ടു പറഞ്ഞു: “എന്റെ രാജ്യം ഈ ലോക​ത്തി​ന്റെ ഭാഗമല്ല.” (യോഹ​ന്നാൻ 18:36, NW) ഈ വാക്കു​ക​ളോ​ടുള്ള യോജി​പ്പിൽ, ലോക​രാ​ജ്യ​ങ്ങ​ളു​ടെ​മേൽ അധികാ​രം നൽകാ​മെന്ന സാത്താന്റെ വാഗ്‌ദാ​നം യേശു നേരത്തേ നിരസി​ച്ചി​രു​ന്നു. തന്നെ രാജാ​വാ​ക്കാൻ യഹൂദർ തുനി​ഞ്ഞ​പ്പോൾ യേശു അതിനും വിസമ്മ​തി​ച്ചി​രു​ന്നു. (ലൂക്കൊസ്‌ 4:5-8; യോഹ​ന്നാൻ 6:14, 15) അതേസ​മയം യേശു മനുഷ്യ​വർഗ​ലോ​ക​ത്തോ​ടു വലിയ സ്‌നേഹം പ്രകട​മാ​ക്കി. ഇതിന്റെ ഒരു ഉദാഹ​രണം അപ്പോ​സ്‌ത​ല​നായ മത്തായി റിപ്പോർട്ടു ചെയ്‌തി​ട്ടുണ്ട്‌: “അവൻ പുരു​ഷാ​രത്തെ ഇടയനി​ല്ലാത്ത ആടുക​ളെ​പ്പോ​ലെ കുഴഞ്ഞ​വ​രും ചിന്നി​യ​വ​രു​മാ​യി കണ്ടിട്ടു അവരെ​ക്കു​റി​ച്ചു മനസ്സലി​ഞ്ഞു.” സ്‌നേ​ഹ​ത്താൽ പ്രചോ​ദി​ത​നാ​യി അവൻ പട്ടണങ്ങ​ളി​ലും ഗ്രാമ​ങ്ങ​ളി​ലു​മുള്ള ആളുക​ളോ​ടു പ്രസം​ഗി​ച്ചു. അവൻ അവരെ പഠിപ്പി​ക്കു​ക​യും അവരുടെ രോഗങ്ങൾ സുഖ​പ്പെ​ടു​ത്തു​ക​യും ചെയ്‌തു. (മത്തായി 9:36) തന്നിൽനി​ന്നു പഠിക്കാ​നെ​ത്തി​യ​വ​രു​ടെ ശാരീ​രിക ആവശ്യ​ങ്ങ​ളെ​ക്കു​റി​ച്ചും അവൻ ബോധ​വാ​നാ​യി​രു​ന്നു. നാമി​ങ്ങനെ വായി​ക്കു​ന്നു: “യേശു ശിഷ്യൻമാ​രെ അടുക്കെ വിളിച്ചു: ഈ പുരു​ഷാ​രം ഇപ്പോൾ മൂന്നു നാളായി എന്നോ​ടു​കൂ​ടെ പാർക്കു​ന്നു; അവർക്കു ഭക്ഷിപ്പാൻ ഒന്നും ഇല്ലായ്‌ക​കൊ​ണ്ടു അവരെ​ക്കു​റി​ച്ചു എനിക്കു മനസ്സലി​വു തോന്നു​ന്നു; അവരെ പട്ടിണി​യാ​യി വിട്ടയ​പ്പാൻ മനസ്സു​മില്ല; അവർ വഴിയിൽവെച്ചു തളർന്നു​പോ​യേ​ക്കും എന്നു പറഞ്ഞു.” (മത്തായി 15:32) എത്ര സ്‌നേ​ഹ​പു​ര​സ്സ​ര​മായ താത്‌പ​ര്യം!

⁴ യഹൂദ​ന്മാർക്കു ശമര്യ​ക്കാ​രെ​ക്കു​റി​ച്ചു ശക്തമായ മുൻവി​ധി​ക​ളു​ണ്ടാ​യി​രു​ന്നു, എന്നാൽ ഒരു ശമര്യ​ക്കാ​രി​യോ​ടു യേശു ദീർഘ​മാ​യി സംസാ​രി​ക്കു​ക​യും ഒരു ശമര്യ പട്ടണത്തിൽ സമ്പൂർണ സാക്ഷ്യം നൽകി​കൊണ്ട്‌ രണ്ടു ദിവസം ചെലവ​ഴി​ക്കു​ക​യും ചെയ്‌തു. (യോഹ​ന്നാൻ 4:5-42) “യിസ്രാ​യേൽഗൃ​ഹ​ത്തി​ലെ കാണാ​തെ​പോയ ആടുക​ളു​ടെ അടുക്ക”ലേക്കാണു ദൈവം തന്നെ അയച്ച​തെ​ങ്കി​ലും യഹൂ​ദേ​ത​ര​രു​ടെ വിശ്വാ​സ​ത്തോ​ടെ​യുള്ള അപേക്ഷ യേശു ചെവി​ക്കൊണ്ട സന്ദർഭ​ങ്ങ​ളു​മുണ്ട്‌. (മത്തായി 8:5-13; 15:21-28) അതേ, “ലോക​ത്തി​ന്റെ ഭാഗമാ​കാ​തി”രുന്നു​കൊ​ണ്ടു​തന്നെ മനുഷ്യ​വർഗ​ലോ​കത്തെ, അതായത്‌ ആളുകളെ, സ്‌നേ​ഹി​ക്കാ​നാ​കു​മെന്ന്‌ യേശു പ്രകട​മാ​ക്കി. നാം താമസി​ക്കു​ന്നി​ട​ത്തോ ജോലി ചെയ്യു​ന്നി​ട​ത്തോ സാധനങ്ങൾ വാങ്ങു​ന്നി​ട​ത്തോ ഉള്ള ആളുക​ളോ​ടു നാം സമാന​മാ​യി അനുകമ്പ പ്രകട​മാ​ക്കു​ന്നു​ണ്ടോ? അവരുടെ ക്ഷേമത്തിൽ—ആത്മീയ ആവശ്യ​ങ്ങ​ളിൽ മാത്രമല്ല, ന്യായ​യു​ക്ത​മായ രീതി​യിൽ നമ്മുടെ പരിമി​തി​കൾക്കു​ള്ളിൽനി​ന്നു​കൊണ്ട്‌ സഹായി​ക്കാ​നാ​കുന്ന അവരുടെ മറ്റാവ​ശ്യ​ങ്ങ​ളി​ലും—നാം താത്‌പ​ര്യം പ്രകട​മാ​ക്കു​ന്നു​ണ്ടോ? യേശു അതു ചെയ്‌തു, അങ്ങനെ ചെയ്യു​ക​വഴി അവൻ രാജ്യ​ത്തെ​ക്കു​റിച്ച്‌ ആളുകളെ പഠിപ്പി​ക്കു​ന്ന​തി​നുള്ള വഴി തുറന്നു. യേശു ചെയ്‌ത​പോ​ലെ അക്ഷരീയ അത്ഭുതങ്ങൾ പ്രവർത്തി​ക്കാൻ നമുക്കാ​വി​ല്ലെ​ന്നതു സത്യമാണ്‌. എന്നാൽ ഒരു ദയാ​പ്ര​വൃ​ത്തി ചില​പ്പോൾ മുൻവി​ധി​കൾ അകറ്റു​ന്ന​തിൽ ആലങ്കാ​രി​ക​മാ​യി അത്ഭുതം പ്രവർത്തി​ച്ചെ​ന്നു​വ​രാം.

“പുറത്തുള്ള”വരോ​ടുള്ള പൗലൊ​സി​ന്റെ മനോ​ഭാ​വം

5, 6. “പുറത്തുള്ള”വരായി​രുന്ന യഹൂദ​ന്മാ​രോ​ടു പൗലൊസ്‌ അപ്പോ​സ്‌തലൻ ഇടപെ​ട്ട​തെ​ങ്ങനെ?

⁵ തന്റെ പല ലേഖന​ങ്ങ​ളി​ലും പൗലൊസ്‌ അപ്പോ​സ്‌തലൻ യഹൂദ​ന്മാ​രോ പുറജാ​തി​ക്കാ​രോ ആയ ക്രിസ്‌ത്യാ​നി​ക​ള​ല്ലാ​ത്ത​വരെ “പുറത്തുള്ള”വരായി അല്ലെങ്കിൽ “പുറ​മെ​യുള്ള”വരായി പരാമർശി​ക്കു​ന്നുണ്ട്‌. (1 കൊരി​ന്ത്യർ 5:12; 1 തെസ്സ​ലൊ​നീ​ക്യർ 4:11; 1 തിമൊ​ഥെ​യൊസ്‌ 3:7) അത്തരക്കാ​രോട്‌ അവൻ ഇടപെ​ട്ടത്‌ എങ്ങനെ​യാ​യി​രു​ന്നു? ‘ഏതുവി​ധ​ത്തി​ലും ചിലരെ രക്ഷി​ക്കേ​ണ്ട​തിന്‌ അവൻ എല്ലാവർക്കും എല്ലാമാ​യി​ത്തീർന്നു.’ (1 കൊരി​ന്ത്യർ 9:20-22, NW) ഒരു നഗരത്തിൽ എത്തു​മ്പോൾ, അവിടെ താമസ​മാ​ക്കി​യി​ട്ടുള്ള യഹൂദ​ന്മാ​രോട്‌ ആദ്യം പ്രസം​ഗി​ക്കു​ന്നത്‌ അവന്റെ പതിവാ​യി​രു​ന്നു. അവന്റെ സമീപ​ന​മെ​ന്താ​യി​രു​ന്നു? മിശിഹാ വന്നു, ബലിമ​രണം വരിച്ചു, പുനരു​ത്ഥാ​നം പ്രാപി​ച്ചു എന്നതി​നെ​ല്ലാ​മുള്ള ശക്തമായ ബൈബിൾ തെളി​വു​കൾ അവൻ നയത്തോ​ടെ​യും ആദര​വോ​ടെ​യും അവതരി​പ്പി​ച്ചു.—പ്രവൃ​ത്തി​കൾ 13:5, 14-16, 43; 17:1-3, 10.

⁶ ഈ വിധത്തിൽ, മിശി​ഹാ​യെ​യും ദൈവ​രാ​ജ്യ​ത്തെ​യും കുറിച്ചു യഹൂദ​ന്മാ​രെ പഠിപ്പി​ക്കു​ന്ന​തി​നു​വേണ്ടി പൗലൊസ്‌ ന്യായ​പ്ര​മാ​ണ​ത്തെ​യും പ്രവാ​ച​ക​ന്മാ​രെ​യും കുറി​ച്ചുള്ള അവരുടെ പരിജ്ഞാ​നം അടിസ്ഥാ​ന​മാ​ക്കി കൂടുതൽ വിവരങ്ങൾ നൽകി. ചിലരെ ബോധ്യ​പ്പെ​ടു​ത്തു​ന്ന​തിൽ അവൻ വിജയി​ക്കു​ക​യും ചെയ്‌തു. (പ്രവൃ​ത്തി​കൾ 14:1; 17:4) യഹൂദ നേതാ​ക്ക​ന്മാ​രു​ടെ എതിർപ്പു​ണ്ടാ​യി​രു​ന്നി​ട്ടും പൗലൊസ്‌ സഹയഹൂ​ദ​രോ​ടു വാത്സല്യം പ്രകട​മാ​ക്കി, കാരണം അവൻ എഴുതി: “സഹോ​ദ​ര​ന്മാ​രേ, അവർ [യഹൂദ​ന്മാർ] രക്ഷിക്ക​പ്പെ​ടേണം എന്നു തന്നേ എന്റെ ഹൃദയ​വാ​ഞ്‌ഛ​യും അവർക്കു​വേണ്ടി ദൈവ​ത്തോ​ടുള്ള യാചന​യും ആകുന്നു. അവർ പരിജ്ഞാ​ന​പ്ര​കാ​ര​മ​ല്ലെ​ങ്കി​ലും ദൈവത്തെ സംബന്ധി​ച്ചു എരിവു​ള്ളവർ എന്നു ഞാൻ അവർക്കു സാക്ഷ്യം പറയുന്നു.”—റോമർ 10:1, 2.

യഹൂ​ദേതര വിശ്വാ​സി​കളെ സഹായി​ക്കൽ

7. പൗലൊസ്‌ പ്രസം​ഗിച്ച സുവാർത്ത​യോട്‌ അനേകം മതപരി​വർത്തി​ത​രും എങ്ങനെ പ്രതി​ക​രി​ച്ചു?

⁷ പരി​ച്ഛേ​ദ​ന​യേറ്റ്‌ യഹൂദ​മ​താ​നു​സാ​രി​ക​ളാ​യി​ത്തീർന്ന യഹൂ​ദേ​ത​ര​രാ​യി​രു​ന്നു മതപരി​വർത്തി​തർ. വ്യക്തമാ​യും, റോം, സിറിയൻ അന്ത്യൊ​ക്യ, എത്യോ​പ്യ, പിസി​ദ്യ​യി​ലെ അന്ത്യൊ​ക്ക്യ എന്നിവി​ട​ങ്ങ​ളിൽ—തീർച്ച​യാ​യും യഹൂദർ ചിതറി​പ്പാർത്തി​രു​ന്നി​ട​ങ്ങ​ളിൽ എല്ലാം—യഹൂദ മതപരി​വർത്തി​തർ ഉണ്ടായി​രു​ന്നു. (പ്രവൃ​ത്തി​കൾ 2:8-10; 6:5; 8:27; 13:14, 43; മത്തായി 23:14, 15 താരത​മ്യം ചെയ്യുക.) അനേകം യഹൂദ ഭരണാ​ധി​പ​ന്മാ​രിൽനി​ന്നു വ്യത്യ​സ്‌ത​മാ​യി, മതപരി​വർത്തി​തർ അഹങ്കാ​രി​ക​ളും തങ്ങൾ അബ്രാ​ഹാ​മി​ന്റെ പിൻഗാ​മി​ക​ളാ​ണെന്ന്‌ ഗർവോ​ടെ മേനി പറയു​ന്ന​വ​രും അല്ലായി​രു​ന്നി​രി​ക്കാം. (മത്തായി 3:9; യോഹ​ന്നാൻ 8:33) മറിച്ച്‌, യഹോ​വ​യെ​യും അവന്റെ നിയമ​ങ്ങ​ളെ​യും കുറിച്ചു കുറ​ച്ചൊ​ക്കെ പരിജ്ഞാ​നം നേടി പുറജാ​തീയ ദൈവ​ങ്ങളെ ഉപേക്ഷിച്ച്‌ താഴ്‌മ​യോ​ടെ യഹോ​വ​യി​ങ്ക​ലേക്കു തിരി​ഞ്ഞ​വ​രാ​യി​രു​ന്നു അവർ. വരാനി​രി​ക്കുന്ന ഒരു മിശി​ഹാ​യെ​ക്കു​റി​ച്ചുള്ള യഹൂദ​ന്മാ​രു​ടെ പ്രത്യാശ അവർ സ്വീക​രി​ച്ചു. തങ്ങളുടെ സത്യാ​ന്വേ​ഷ​ണ​ത്തി​നി​ട​യിൽ മാറ്റം​വ​രു​ത്താ​നുള്ള മനസ്സൊ​രു​ക്കം അതി​നോ​ട​കം​തന്നെ പ്രകട​മാ​ക്കി​യി​രുന്ന അവരി​ല​നേ​ക​രും കൂടു​ത​ലായ മാറ്റം വരുത്താ​നും പൗലൊസ്‌ അപ്പോ​സ്‌ത​ലന്റെ പ്രസം​ഗ​ത്തോ​ടു പ്രതി​ക​രി​ക്കാ​നും തയ്യാറാ​യി​രു​ന്നു. (പ്രവൃ​ത്തി​കൾ 13:42, 43) മുമ്പു പുറജാ​തീയ ദൈവ​ങ്ങളെ ആരാധി​ച്ചി​രുന്ന ഒരുവൻ മതപരി​വർത്ത​ന​ത്തി​ലൂ​ടെ ക്രിസ്‌ത്യാ​നി​ത്വ​ത്തി​ലേക്കു വരു​മ്പോൾ, ആ ദൈവ​ങ്ങളെ അപ്പോ​ഴും ആരാധി​ക്കുന്ന മറ്റു വിജാ​തീ​യ​രോ​ടു സാക്ഷീ​ക​രി​ക്കാൻ അയാൾ വിശേ​ഷാൽ സജ്ജനാ​യി​രി​ക്കും.

8, 9. (എ) മതപരി​വർത്തി​തരെ കൂടാതെ, പുറജാ​തീ​യ​രു​ടെ വേറേ ഏതു കൂട്ടം യഹൂദ മതത്തി​ലേക്ക്‌ ആകർഷി​ക്ക​പ്പെട്ടു? (ബി) പരി​ച്ഛേ​ദ​ന​യേൽക്കാഞ്ഞ ദൈവ​ഭ​യ​മുള്ള അനേകർ സുവാർത്ത​യോ​ടു പ്രതി​ക​രി​ച്ച​തെ​ങ്ങനെ?

⁸ പരി​ച്ഛേ​ദ​ന​യേറ്റ മതപരി​വർത്തി​ത​രെ​ക്കൂ​ടാ​തെ, മറ്റു യഹൂ​ദേ​ത​ര​രും യഹൂദ മതത്തി​ലേക്ക്‌ ആകർഷി​ക്ക​പ്പെട്ടു. ഇക്കൂട്ട​രിൽ ആദ്യം ക്രിസ്‌ത്യാ​നി​യാ​യത്‌ കൊർന്നേ​ല്യൊസ്‌ ആയിരു​ന്നു. ഒരു മതപരി​വർത്തി​ത​ന​ല്ലാ​യി​രു​ന്നെ​ങ്കി​ലും, അവൻ ‘ഭക്തനും ദൈവത്തെ ഭയപ്പെ​ടു​ന്ന​വ​നു​മാ​യി’രുന്നു. (പ്രവൃ​ത്തി​കൾ 10:2) പ്രവൃ​ത്തി​ക​ളു​ടെ പുസ്‌ത​ക​ത്തെ​ക്കു​റി​ച്ചുള്ള തന്റെ ഭാഷ്യ​ത്തിൽ, പ്രൊ​ഫസർ എഫ്‌. എഫ്‌. ബ്രൂസ്‌ എഴുതി: “അത്തരം വിജാ​തീ​യരെ സാധാ​ര​ണ​മാ​യി വിളി​ച്ചി​രു​ന്നത്‌ ‘ദൈവ​ഭ​യ​മു​ള്ളവർ’ എന്നാണ്‌; ഇതൊരു സാങ്കേ​തിക പദമ​ല്ലെ​ങ്കി​ലും ഒരു പ്രത്യേക സ്ഥിതി​വി​ശേ​ഷ​ത്തിന്‌ ഉപയോ​ഗി​ക്കാൻ പറ്റിയ​താണ്‌. അക്കാലത്തെ അനേകം വിജാ​തീ​യ​രും തികഞ്ഞ യഹൂദ​മ​ത​പ​രി​വർത്തി​ത​രാ​കാൻ മടി​ച്ചെ​ങ്കി​ലും (പരി​ച്ഛേ​ദ​ന​യേൽക്ക​ണ​മെന്ന നിബന്ധന പുരു​ഷ​ന്മാർക്ക്‌ വിശേ​ഷാൽ പ്രതി​ബ​ന്ധ​മാ​യി​രു​ന്നു), അവർ യഹൂദ സിന​ഗോ​ഗു​ക​ളി​ലെ ആരാധ​ന​യു​ടെ ലളിത​മായ ഏക​ദൈ​വ​വി​ശ്വാ​സ സ്വഭാ​വ​ത്തി​ലും യഹൂദ ജീവി​ത​രീ​തി​യു​ടെ ധാർമിക നിലവാ​ര​ങ്ങ​ളി​ലും ആകർഷി​ക്ക​പ്പെ​ട്ടി​രു​ന്നു. സിന​ഗോ​ഗു​ക​ളിൽ സംബന്ധി​ക്കു​മാ​യി​രുന്ന അവരിൽ ചിലർ ഗ്രീക്കു​ഭാ​ഷ​യിൽ വായിച്ചു കേൾക്കാ​റുള്ള പ്രാർഥ​ന​യു​ടെ​യും തിരു​വെ​ഴു​ത്തു പാഠങ്ങ​ളു​ടെ​യും കാര്യ​ത്തിൽ സാമാ​ന്യ​ജ്ഞാ​ന​മു​ള്ള​വ​രാ​യി​ത്തീ​രു​ക​യും ചെയ്‌തു.”

⁹ ഏഷ്യാ മൈന​റി​ലും ഗ്രീസി​ലു​മുള്ള സിന​ഗോ​ഗു​ക​ളിൽ പ്രസം​ഗി​ക്കവേ പൗലൊസ്‌ അപ്പോ​സ്‌തലൻ ദൈവ​ഭ​യ​മുള്ള അനേകരെ കണ്ടുമു​ട്ടി. പിസി​ദ്യ​യി​ലെ അന്ത്യൊ​ക്ക്യ​യിൽ അവൻ സിന​ഗോ​ഗിൽ ഒന്നിച്ചു​കൂ​ടി​യി​രു​ന്ന​വരെ “യിസ്രാ​യേൽപു​രു​ഷ​ന്മാ​രും ദൈവ​ഭ​ക്ത​ന്മാ​രും [“ദൈവ​ഭ​യ​മു​ള്ള​വ​രും,” NW] ആയു​ള്ളോ​രേ” എന്ന്‌ സംബോ​ധന ചെയ്‌തു. (പ്രവൃ​ത്തി​കൾ 13:16, 26) പൗലൊസ്‌ മൂന്നു ശബത്തോ​ളം തെസ്സ​ലൊ​നീ​ക്യ​യി​ലെ സിന​ഗോ​ഗിൽ പ്രസം​ഗി​ച്ച​തി​നു​ശേഷം “അവരിൽ [യഹൂദ​ന്മാ​രിൽ] ചിലരും ഭക്തിയുള്ള യവനന്മാ​രിൽ ഒരു വലിയ കൂട്ടവും മാന്യ​സ്‌ത്രീ​ക​ളിൽ അനേക​രും വിശ്വ​സി​ച്ചു [ക്രിസ്‌ത്യാ​നി​ക​ളാ​യി​ത്തീർന്നു] പൌ​ലൊ​സി​നോ​ടും ശീലാ​സി​നോ​ടും ചേർന്നു”വെന്നു ലൂക്കൊസ്‌ എഴുതു​ന്നു. (പ്രവൃ​ത്തി​കൾ 17:4) യവനന്മാ​രിൽ ചിലർ പരി​ച്ഛേ​ദ​ന​യേൽക്കാഞ്ഞ ദൈവ​ഭ​യ​മു​ള്ള​വ​രാ​യി​രു​ന്നി​രി​ക്കാം. അത്തരം പുറജാ​തീ​യ​രായ അനേക​രും യഹൂദ സമൂഹ​വു​മാ​യി സഹവസി​ച്ചി​രു​ന്നു​വെ​ന്ന​തി​നു തെളി​വുണ്ട്‌.

“അവിശ്വാ​സി​കൾ”ക്കിടയിൽ പ്രസം​ഗി​ക്കൽ

10. തിരു​വെ​ഴു​ത്തു പരിജ്ഞാ​ന​മി​ല്ലാ​തി​രുന്ന പുറജാ​തീ​യ​രോ​ടു പൗലൊസ്‌ പ്രസം​ഗി​ച്ച​തെ​ങ്ങനെ, ഫലമെ​ന്താ​യി​രു​ന്നു?

¹⁰ ക്രിസ്‌തീയ ഗ്രീക്കു തിരു​വെ​ഴു​ത്തു​ക​ളിൽ, “അവിശ്വാ​സി​കൾ” എന്ന പദം പൊതു​വേ ക്രിസ്‌തീയ സഭയ്‌ക്കു പുറത്തു​ള്ള​വരെ, മിക്ക​പ്പോ​ഴും പുറജാ​തീ​യരെ പരാമർശി​ക്കു​ന്നു. (റോമർ 15:30; 1 കൊരി​ന്ത്യർ 14:22, 23; 2 കൊരി​ന്ത്യർ 4:4; 6:14) ഏഥൻസിൽ തിരു​വെ​ഴു​ത്തു​ക​ളെ​ക്കു​റി​ച്ചു യാതൊ​രു അറിവു​മി​ല്ലാ​തെ ഗ്രീക്കു തത്ത്വചി​ന്ത​യിൽ വിദ്യാ​ഭ്യാ​സം നേടി​യി​രുന്ന അനേകം അവിശ്വാ​സി​ക​ളു​ണ്ടാ​യി​രു​ന്നു. അവരോ​ടു സാക്ഷീ​ക​രി​ക്കു​ന്ന​തിന്‌ ഇതു പൗലൊ​സി​നു നിരു​ത്സാ​ഹ​മാ​യോ? ഇല്ല. എന്നാൽ അവൻ തന്റെ സമീപനം അതി​നോട്‌ അനുരൂ​പ​പ്പെ​ടു​ത്തു​ക​യാണ്‌ ചെയ്‌തത്‌. അഥേന​ക്കാർക്ക്‌ അജ്ഞാത​മാ​യി​രുന്ന എബ്രായ തിരു​വെ​ഴു​ത്തു​ക​ളിൽനി​ന്നു നേരിട്ട്‌ ഉദ്ധരി​ക്കാ​തെ അവൻ ബൈബിൾ ആശയങ്ങൾ വിദഗ്‌ധ​മാ​യി അവതരി​പ്പി​ച്ചു. ബൈബിൾസ​ത്യ​വും പുരാതന സ്റ്റോയിക്ക്‌ കവികൾ പറഞ്ഞി​ട്ടുള്ള ചില ചിന്തക​ളും തമ്മിലുള്ള സാദൃ​ശ്യം അവൻ സമർഥ​മാ​യി പ്രകട​മാ​ക്കി. മരിച്ച്‌ പുനരു​ത്ഥാ​നം പ്രാപിച്ച ഒരു മനുഷ്യൻ മുഖാ​ന്തരം നീതി​യിൽ ന്യായം​വി​ധി​ക്കുന്ന, സകല മനുഷ്യ​വർഗ​ത്തി​നു​മാ​യുള്ള ഒരൊറ്റ സത്യ​ദൈ​വ​മെന്ന ആശയം അവൻ അവതരി​പ്പി​ച്ചു. അങ്ങനെ, പൗലൊസ്‌ അഥേന​ക്കാ​രോ​ടു ക്രിസ്‌തു​വി​നെ​ക്കു​റിച്ച്‌ നയപൂർവം പ്രസം​ഗി​ച്ചു. ഫലമോ? ഭൂരി​പ​ക്ഷം​പേ​രും അവനെ പരിഹ​സി​ക്കു​ക​യോ സംശയി​ക്കു​ക​യോ ചെയ്‌തെ​ങ്കി​ലും, “ചില പുരു​ഷ​ന്മാർ അവനോ​ടു ചേർന്നു വിശ്വ​സി​ക​ളാ​യി​ത്തീർന്നു; അവരിൽ അരയോ​പഗ കോടതി ന്യായാ​ധി​പ​നായ ദിയൊ​നു​സ്യോ​സും ദമരിസ്‌ എന്നു പേരു​ള്ളോ​രു സ്‌ത്രീ​യും മററു​ചി​ല​രും ഉണ്ടായി​രു​ന്നു.”—പ്രവൃ​ത്തി​കൾ 17:18, 21-34, NW.

11. കൊരിന്ത്‌ ഏതുതരം നഗരമാ​യി​രു​ന്നു, അവിടെ പൗലൊ​സി​ന്റെ പ്രസം​ഗ​പ്ര​വർത്ത​ന​ത്തിന്‌ എന്തു ഫലമു​ണ്ടാ​യി?

¹¹ കൊരി​ന്തിൽ ഗണ്യമാ​യൊ​രു കൂട്ടം യഹൂദ​ന്മാ​രു​ണ്ടാ​യി​രു​ന്നു, അതു​കൊണ്ട്‌ അവിടെ സിന​ഗോ​ഗിൽ പ്രസം​ഗി​ച്ചു​കൊണ്ട്‌ പൗലൊസ്‌ തന്റെ ശുശ്രൂഷ ആരംഭി​ച്ചു. എന്നാൽ യഹൂദ​ന്മാർ എതിർക്കാൻ തുടങ്ങി​യ​തോ​ടെ, പൗലൊസ്‌ വിജാ​തീ​യ​രു​ടെ അടുക്ക​ലേക്കു പോയി. (പ്രവൃ​ത്തി​കൾ 18:1-6) എന്തൊരു ജനാവലി! പല ദേശത്തു​നി​ന്നുള്ള ആളുകൾ വന്നും​പോ​യു​മി​രി​ക്കുന്ന തിര​ക്കേ​റിയ വാണിജ്യ നഗരമാ​യി​രുന്ന കൊരിന്ത്‌ ഗ്രീക്ക്‌-റോമാ ലോക​ത്തു​ട​നീ​ളം അഴിഞ്ഞ നടത്തയ്‌ക്ക്‌ കുപ്ര​സി​ദ്ധ​മാ​യി​രു​ന്നു. അങ്ങനെ “കൊരി​ന്ത്യ​വ​ത്‌ക​രി​ക്കുക” എന്നതിന്‌ അധാർമി​ക​മാ​യി പ്രവർത്തി​ക്കുക എന്നർഥം കൈവ​രു​ക​പോ​ലു​മു​ണ്ടാ​യി. എന്നിരു​ന്നാ​ലും, യഹൂദ​ന്മാർ പൗലൊ​സി​ന്റെ പ്രസംഗം തള്ളിയ​തി​നു​ശേ​ഷ​മാ​യി​രു​ന്നു ക്രിസ്‌തു അവനു പ്രത്യ​ക്ഷ​നാ​യി ഇങ്ങനെ പറഞ്ഞത്‌: “ഭയപ്പെ​ടാ​തെ പ്രസം​ഗിക്ക . . . ഈ പട്ടണത്തിൽ എനിക്കു വളരെ ജനം ഉണ്ടു.” (പ്രവൃ​ത്തി​കൾ 18:9, 10) അതു ശരിയാ​യി​രു​ന്നു, കൊരി​ന്തിൽ പൗലൊസ്‌ ഒരു സഭ സ്ഥാപിച്ചു. മുമ്പ്‌ “കൊരി​ന്ത്യൻ” ശൈലി​യിൽ ജീവി​ച്ചി​രുന്ന ചിലർപോ​ലും അതിന്റെ അംഗങ്ങ​ളാ​യി.—1 കൊരി​ന്ത്യർ 6:9-11.

ഇന്ന്‌ “എല്ലാത്തരം മനുഷ്യ”രെയും രക്ഷപ്പെ​ടു​ത്താൻ ശ്രമിക്കൽ

12, 13. (എ) ഇന്നത്തെ നമ്മുടെ പ്രദേശം പൗലൊ​സി​ന്റെ നാളി​ലേ​തി​നോ​ടു സാദൃ​ശ്യ​ത്തി​ലാ​യി​രി​ക്കു​ന്ന​തെ​ങ്ങനെ? (ബി) ദീർഘ​നാ​ളാ​യി ക്രൈ​സ്‌ത​വ​ലോ​ക​ത്തി​ലെ മതങ്ങൾ നിലനിൽക്കു​ന്ന​തോ അനേക​രും സംഘടിത മതത്താൽ നിരാ​ശ​രാ​യ​തോ ആയ പ്രദേ​ശ​ങ്ങ​ളിൽ നാമെന്തു മനോ​ഭാ​വം പ്രകടി​പ്പി​ക്കു​ന്നു?

¹² ഒന്നാം നൂറ്റാ​ണ്ടി​ലെ​പ്പോ​ലെ, ഇന്ന്‌ “ദൈവ​ത്തി​ന്റെ അനർഹദയ . . . എല്ലാത്തരം മനുഷ്യർക്കും രക്ഷ കൈവ​രു​ത്തു​ന്നു.” (തീത്തൊസ്‌ 2:11) സുവാർത്ത പ്രസം​ഗി​ക്കു​ന്ന​തി​നുള്ള പ്രദേശം എല്ലാ ഭൂഖണ്ഡ​ങ്ങ​ളി​ലും മിക്ക സമു​ദ്ര​ദ്വീ​പു​ക​ളി​ലു​മാ​യി വ്യാപി​ച്ചു കിടക്കു​ന്നു. തീർച്ച​യാ​യും പൗലൊ​സി​ന്റെ നാളി​ലേ​തു​പോ​ലെ, “എല്ലാത്തരം മനുഷ്യ​രു”ടെയും പക്കൽ സുവാർത്ത എത്തുന്നു. ഉദാഹ​ര​ണ​ത്തിന്‌, ക്രൈ​സ്‌ത​വ​ലോ​ക​ത്തി​ന്റെ സഭകൾ അനേകം നൂറ്റാ​ണ്ടു​ക​ളാ​യി നില​കൊ​ള്ളുന്ന രാജ്യ​ങ്ങ​ളിൽ നമ്മിൽ ചിലർ പ്രസം​ഗി​ക്കു​ന്നു. ഒന്നാം നൂറ്റാ​ണ്ടി​ലെ യഹൂദ​ന്മാ​രെ​പ്പോ​ലെ, അതിലെ അംഗങ്ങൾക്ക്‌ ശക്തമായ മതപാ​ര​മ്പ​ര്യ​ങ്ങൾ ഉണ്ടായി​രി​ക്കാം. എങ്കിലും, നല്ല ഹൃദയ​നി​ല​യു​ള്ള​വരെ അന്വേ​ഷിച്ച്‌ അവർക്കുള്ള ബൈബിൾ പരിജ്ഞാ​നം വർധി​പ്പി​ക്കാൻ നമുക്കു സന്തോ​ഷ​മേ​യു​ള്ളൂ. അവരുടെ മതനേ​താ​ക്ക​ന്മാർ നമ്മെ ചില​പ്പോൾ എതിർക്കു​ക​യോ പീഡി​പ്പി​ക്കു​ക​യോ ചെയ്‌താ​ലും നാം അവരോ​ടു തരംതാ​ണ​രീ​തി​യിൽ സംസാ​രി​ക്കു​ക​യോ അവരെ പരിഹ​സി​ക്കു​ക​യോ ചെയ്യു​ക​യില്ല. മറിച്ച്‌, സൂക്ഷ്‌മ​പ​രി​ജ്ഞാ​ന​മി​ല്ലെ​ങ്കി​ലും, അവരിൽ ചിലർ “ദൈവത്തെ സംബന്ധി​ച്ചു എരിവു​ള്ളവ”രാണെന്നു നാം തിരി​ച്ച​റി​യു​ന്നു. യേശു​വി​നെ​യും പൗലൊ​സി​നെ​യും​പോ​ലെ, നാം ആളുക​ളോ​ടു യഥാർഥ സ്‌നേഹം പ്രകട​മാ​ക്കു​ന്നു. അവർ രക്ഷിക്ക​പ്പെ​ട​ണ​മെന്ന ഉത്‌ക​ട​മായ ആഗ്രഹം നമുക്കുണ്ട്‌.—റോമർ 10:2.

¹³ പ്രസം​ഗ​വേ​ല​യ്‌ക്കി​ട​യിൽ, നമ്മില​നേ​ക​രും സംഘടിത മതത്താൽ നിരാ​ശ​രായ വ്യക്തി​കളെ കണ്ടുമു​ട്ടാ​റുണ്ട്‌. എന്നാൽ അവർ ദൈവ​ഭ​യ​മു​ള്ള​വ​രും ഒരള​വോ​ളം ദൈവ​വി​ശ്വാ​സി​ക​ളും നല്ല ജീവിതം നയിക്കാൻ ശ്രമി​ക്കു​ന്ന​വ​രു​മാ​യി​രു​ന്നേ​ക്കാം. വക്രത​യു​ള്ള​തും ദൈവ​ഭക്തി കുറഞ്ഞു​കൊ​ണ്ടി​രി​ക്കു​ന്ന​തു​മായ ഈ തലമു​റ​യിൽ, ദൈവ​ത്തിൽ കുറ​ച്ചൊ​ക്കെ വിശ്വാ​സ​മുള്ള ആളുകളെ കണ്ടുമു​ട്ടു​ന്ന​തിൽ നാം ആഹ്ലാദി​ക്കേ​ണ്ട​തല്ലേ? കാപട്യ​വും വ്യാജ​വു​മി​ല്ലാത്ത ഒരു ആരാധ​നാ​രീ​തി​യി​ലേക്ക്‌ അവരെ നയിക്കാൻ നാം ഉത്സുക​രല്ലേ?—ഫിലി​പ്പി​യർ 2:14, 15.

14, 15. സുവാർത്ത പ്രസം​ഗി​ക്കു​ന്ന​തിന്‌ ഒരു ബൃഹത്തായ വയൽ ലഭ്യമാ​യി​രി​ക്കു​ന്ന​തെ​ങ്ങനെ?

¹⁴ പ്രസം​ഗ​വേല നിർവ​ഹി​ക്കു​ന്ന​തിന്‌ ഒരു ബൃഹത്തായ പ്രദേ​ശ​മു​ണ്ടാ​യി​രി​ക്കു​മെന്ന്‌ യേശു വൻവല​യു​ടെ ഉപമയി​ലൂ​ടെ മുൻകൂ​ട്ടി​പ്പ​റഞ്ഞു. (മത്തായി 13:47-49) ഈ ഉപമ വിശദീ​ക​രി​ച്ചു​കൊണ്ട്‌, 1992 സെപ്‌റ്റം​ബർ 15 ലക്കം വീക്ഷാ​ഗോ​പു​രം 20-ാം പേജിൽ പ്രസ്‌താ​വി​ച്ചു: “നൂററാ​ണ്ടു​ക​ളിൽ ക്രൈ​സ്‌ത​വ​ലോ​ക​ത്തി​ന്റെ അംഗങ്ങൾ ദൈവ​വ​ചനം വിവർത്ത​നം​ചെ​യ്യു​ന്ന​തി​ലും പകർത്തു​ന്ന​തി​ലും വിതര​ണം​ചെ​യ്യു​ന്ന​തി​ലും ഒരു മുഖ്യ​പങ്കു വഹിച്ചി​ട്ടുണ്ട്‌. പിന്നീട്‌ സഭകൾ വിദൂ​ര​രാ​ജ്യ​ങ്ങ​ളി​ലെ ഭാഷക​ളിൽ ബൈബിൾ വിവർത്ത​നം​ചെയ്‌ത ബൈബിൾസൊ​സൈ​റ​റി​കൾ രൂപവൽക്ക​രി​ക്കു​ക​യോ അവയെ പിന്തു​ണ​ക്കു​ക​യോ ചെയ്‌തു. അവർ മെഡിക്കൽ മിഷന​റി​മാ​രെ​യും അദ്ധ്യാ​പ​ക​രെ​യും പുറ​ത്തേ​ക്ക​യ​ക്കു​ക​യും ചെയ്‌തു, അവർ ചോറ​റു​ക്രി​സ്‌ത്യാ​നി​കളെ ഉളവാക്കി. ഇത്‌ ദൈവ​ത്തി​ന്റെ അംഗീ​കാ​ര​മി​ല്ലാഞ്ഞ കൊള്ളു​ക​യി​ല്ലാത്ത നിരവധി മത്സ്യങ്ങളെ ശേഖരി​ച്ചു. എന്നാൽ അത്‌ ദശലക്ഷ​ക്ക​ണ​ക്കിന്‌ അ​ക്രൈ​സ്‌ത​വരെ ബൈബി​ളി​നോ​ടും ദുഷി​ച്ച​തെ​ങ്കി​ലും ക്രിസ്‌ത്യാ​നി​ത്വ​ത്തി​ന്റെ ഒരു രൂപ​ത്തോ​ടും സമ്പർക്ക​ത്തിൽ വരുത്തി.”

¹⁵ ക്രൈ​സ്‌ത​വ​ലോ​കം നടത്തിയ മതപരി​വർത്ത​നങ്ങൾ തെക്കേ അമേരി​ക്ക​യി​ലും ആഫ്രി​ക്ക​യി​ലും ചില സമു​ദ്ര​ദ്വീ​പു​ക​ളി​ലും വിശേ​ഷാൽ ഫലപ്ര​ദ​മാ​യി​രു​ന്നു. നമ്മുടെ നാളിൽ, സൗമ്യ​രായ അനേകരെ ഈ പ്രദേ​ശ​ങ്ങ​ളിൽ കണ്ടെത്തി​യി​ട്ടുണ്ട്‌. യഹൂദ മതപരി​വർത്തി​ത​രോ​ടു പൗലൊസ്‌ പ്രകട​മാ​ക്കി​യ​തു​പോ​ലെ, താഴ്‌മ​യുള്ള അത്തരക്കാ​രോട്‌ ശുഭാ​പ്‌തി​വി​ശ്വാ​സ​മു​ള്ള​തും സ്‌നേ​ഹ​പു​ര​സ്സ​ര​വു​മായ ഒരു മനോ​ഭാ​വം പ്രകട​മാ​ക്കു​ന്നെ​ങ്കിൽ, നമുക്കു തുടർന്നും ഏറെ നന്മ ചെയ്യാ​നാ​കും. നമ്മുടെ സഹായം ആവശ്യ​മു​ള്ള​വർക്കി​ട​യിൽ യഹോ​വ​യു​ടെ സാക്ഷി​ക​ളു​ടെ “അനുഭാ​വി​കൾ” എന്നു പറയാ​വുന്ന ലക്ഷക്കണ​ക്കി​നാ​ളു​ക​ളുണ്ട്‌. നാം അവരെ സന്ദർശി​ക്കു​ന്നത്‌ അവർക്ക്‌ എപ്പോ​ഴും സന്തോ​ഷ​മുള്ള കാര്യ​മാണ്‌. ചിലർ നമ്മോ​ടൊ​പ്പം ബൈബിൾ പഠിക്കു​ക​യും നമ്മുടെ യോഗ​ങ്ങ​ളിൽ, വിശേ​ഷിച്ച്‌ ക്രിസ്‌തു​വി​ന്റെ മരണത്തി​ന്റെ വാർഷിക സ്‌മാ​ര​ക​ത്തിൽ സംബന്ധി​ക്കു​ക​യും ചെയ്‌തി​ട്ടുണ്ട്‌. അത്തരക്കാർ രാജ്യ​സു​വാർത്താ പ്രസം​ഗ​ത്തി​നുള്ള ഒരു ബൃഹത്തായ വയലി​നെ​യല്ലേ പ്രതി​നി​ധാ​നം ചെയ്യു​ന്നത്‌?

16, 17. (എ) സുവാർത്ത​യു​മാ​യി നാം ഏതെല്ലാം തരത്തി​ലുള്ള ആളുകളെ സമീപി​ക്കു​ന്നു? (ബി) വ്യത്യ​സ്‌ത​തരം ആളുക​ളോ​ടു പ്രസം​ഗി​ക്കു​ന്ന​തിൽ നാം പൗലൊ​സി​നെ അനുക​രി​ക്കു​ന്ന​തെ​ങ്ങനെ?

¹⁶ കൂടാതെ, അ​ക്രൈ​സ്‌ത​വ​ലോക സംസ്‌കാ​ര​ങ്ങ​ളിൽനി​ന്നു​ള്ള​വരെ അവരുടെ മാതൃ​രാ​ജ്യ​ത്തു​വെ​ച്ചോ കുടി​യേ​റ്റ​ക്കാ​രാ​യി പാശ്ചാ​ത്യ​നാ​ടു​ക​ളിൽവെ​ച്ചോ കാണു​ന്നെ​ങ്കി​ലോ? മതത്തെ പാടേ തള്ളിക്ക​ളഞ്ഞ്‌ നിരീ​ശ്വ​ര​വാ​ദി​ക​ളോ അജ്ഞേയ​വാ​ദി​ക​ളോ ആയിത്തീർന്നി​രി​ക്കു​ന്ന​വ​രു​ടെ കാര്യ​മോ? പുസ്‌ത​ക​ശാ​ല​ക​ളിൽ കാണുന്ന അനേകം സ്വാശ്രയ പുസ്‌ത​ക​ങ്ങ​ളിൽ പ്രസി​ദ്ധീ​ക​രി​ക്കുന്ന ആധുനിക തത്ത്വചി​ന്ത​യോ ജനകീയ മനശ്ശാ​സ്‌ത്ര​മോ മിക്കവാ​റും അന്ധമായി ചെവി​ക്കൊ​ള്ളു​ന്ന​വ​രു​ടെ കാര്യ​മോ? രക്ഷിക്ക​പ്പെ​ടാൻ സാധ്യ​ത​യി​ല്ലെന്നു വിചാ​രിച്ച്‌ അത്തരക്കാ​രിൽ ആരെ​യെ​ങ്കി​ലും അവഗണി​ക്ക​ണ​മോ? പൗലൊസ്‌ അപ്പോ​സ്‌ത​ലനെ അനുക​രി​ക്കു​ന്നെ​ങ്കിൽ നാമങ്ങനെ ചെയ്യു​ക​യില്ല.

¹⁷ ഏഥൻസിൽ പ്രസം​ഗി​ക്കു​മ്പോൾ, പൗലൊസ്‌ ശ്രോ​താ​ക്ക​ളു​മൊത്ത്‌ തത്ത്വചി​ന്താ സംവാ​ദ​ത്തി​ന്റെ കെണി​യി​ല​ക​പ്പെ​ട്ടില്ല. എന്നാൽ തന്റെ ശ്രോ​താ​ക്കൾക്കു​വേണ്ടി അവൻ ന്യായ​വാ​ദം അനുരൂ​പ​പ്പെ​ടു​ത്തി ബൈബിൾ സത്യങ്ങൾ വ്യക്തവും യുക്തി​പൂർവ​ക​വു​മായ വിധത്തിൽ അവതരി​പ്പി​ച്ചു. സമാന​മാ​യി, നാം പ്രസം​ഗി​ക്കുന്ന ആളുക​ളു​ടെ മതങ്ങളി​ലോ തത്ത്വചി​ന്ത​ക​ളി​ലോ നാം വിദഗ്‌ധ​രാ​ക​ണ​മെ​ന്നില്ല. എന്നാൽ, സാക്ഷീ​ക​രണം ഫലകര​മാ​ക്കാൻ നമ്മുടെ സമീപനം നാം അനുരൂ​പ​പ്പെ​ടു​ത്തു​ന്നു, അങ്ങനെ നാം “എല്ലാത്തരം ആളുകൾക്കും എല്ലാ”മായി​ത്തീ​രു​ക​യാണ്‌. (1 കൊരി​ന്ത്യർ 9:22, NW) കൊ​ലൊ​സ്സ്യ​യി​ലെ ക്രിസ്‌ത്യാ​നി​കൾക്ക്‌ എഴുതി​യ​പ്പോൾ പൗലൊസ്‌ പ്രസ്‌താ​വി​ച്ചു: “സമയം തക്കത്തിൽ ഉപയോ​ഗി​ച്ചു​കൊ​ണ്ടു പുറത്തു​ള്ള​വ​രോ​ടു ജ്ഞാന​ത്തോ​ടെ പെരു​മാ​റു​വിൻ. ഓരോ​രു​ത്ത​നോ​ടു നിങ്ങൾ എങ്ങനെ ഉത്തരം പറയേണം എന്നു അറി​യേ​ണ്ട​തി​ന്നു നിങ്ങളു​ടെ വാക്കു എപ്പോ​ഴും കൃപ​യോ​ടു​കൂ​ടി​യ​തും ഉപ്പിനാൽ രുചി​വ​രു​ത്തി​യ​തും ആയിരി​ക്കട്ടെ.” (ചെരി​ച്ചെ​ഴു​ത്തു ഞങ്ങളു​ടേത്‌.)—കൊ​ലൊ​സ്സ്യർ 4:5, 6.

18. നമു​ക്കെന്ത്‌ ഉത്തരവാ​ദി​ത്വ​മുണ്ട്‌, നാമൊ​രി​ക്ക​ലും എന്തു വിസ്‌മ​രി​ച്ചു​കൂ​ടാ?

¹⁸ യേശു​വി​നെ​യും പൗലൊസ്‌ അപ്പോ​സ്‌ത​ല​നെ​യും​പോ​ലെ, നമുക്ക്‌ എല്ലാത്തരം ആളുക​ളോ​ടും സ്‌നേഹം പ്രകട​മാ​ക്കാം. വിശേ​ഷി​ച്ചും, രാജ്യ​ത്തി​ന്റെ സുവാർത്ത മറ്റുള്ള​വ​രു​മാ​യി പങ്കു​വെ​ക്കാൻ നമുക്കു പ്രത്യേക ശ്രമം ചെയ്യാം. അതേസ​മയം, യേശു ശിഷ്യ​ന്മാ​രോ​ടു പറഞ്ഞത്‌ ഒരിക്ക​ലും വിസ്‌മ​രി​ക്കാ​തി​രി​ക്കു​ക​യും ചെയ്യാം: “അവർ ലോക​ത്തി​ന്റെ ഭാഗമല്ല.” (യോഹ​ന്നാൻ 17:16, NW) ഇതു നമുക്ക്‌ എന്തർഥ​മാ​ക്കു​ന്നു​വെന്ന്‌ അടുത്ത ലേഖന​ത്തിൽ പരിചി​ന്തി​ക്കു​ന്ന​താ​യി​രി​ക്കും.

പുനര​വ​ലോ​ക​നം

□ ലോക​ത്തോട്‌ യേശു​വി​നു​ണ്ടാ​യി​രുന്ന സമനി​ല​യുള്ള മനോ​ഭാ​വം വിവരി​ക്കു​ക

□ യഹൂദ​ന്മാ​രോ​ടും മതപരി​വർത്തി​ത​രോ​ടും പൗലൊസ്‌ അപ്പോ​സ്‌തലൻ പ്രസം​ഗി​ച്ച​തെ​ങ്ങനെ?

□ പൗലൊസ്‌ ദൈവ​ഭ​യ​മു​ള്ള​വ​രെ​യും അവിശ്വാ​സി​ക​ളെ​യും സമീപി​ച്ച​തെ​ങ്ങനെ?

□ നമ്മുടെ പ്രസം​ഗ​പ്ര​വർത്ത​ന​ത്തിൽ നമുക്ക്‌ “എല്ലാത്തരം ആളുകൾക്കും എല്ലാ”മായി​ത്തീ​രാ​വു​ന്ന​തെ​ങ്ങനെ?

[10-ാം പേജിലെ ചിത്രങ്ങൾ]

അയൽക്കാർക്കു ദയാ​പ്ര​വൃ​ത്തി​കൾ ചെയ്‌തു​കൊണ്ട്‌ ക്രിസ്‌ത്യാ​നി​കൾക്കു മിക്ക​പ്പോ​ഴും മുൻവി​ധി​യ​ക​റ്റാ​നാ​കും