പുരുഷന്മാരേ, നിങ്ങൾ ക്രിസ്‌തുവിന്റെ ശിരഃസ്ഥാനത്തിന്‌ കീഴ്‌പെട്ടിരിക്കുന്നുവോ?

“ഏതു പുരുഷന്റെയും ശിരസ്സ്‌ ക്രിസ്‌തു.”—1 കൊരി. 11:3.

1. യഹോവ ‘കലക്കത്തിന്റെ ദൈവമല്ല, സമാധാനത്തിന്റെ ദൈവമാണെന്ന്‌’ എന്തു കാണിക്കുന്നു?

“ഞങ്ങളുടെ ദൈവമായ യഹോവേ, നീ സകലവും സൃഷ്ടിച്ചവനും എല്ലാം നിന്റെ ഹിതപ്രകാരം ഉളവായതും സൃഷ്ടിക്കപ്പെട്ടതും ആകയാൽ മഹത്ത്വവും ബഹുമാനവും ശക്തിയും കൈക്കൊള്ളുവാൻ നീ യോഗ്യൻ” എന്ന്‌ വെളിപാട്‌ 4:11-ൽ നാം വായിക്കുന്നു. സകലത്തിന്റെയും സ്രഷ്ടാവായതുകൊണ്ട്‌ യഹോവയാം ദൈവത്തിന്‌ തന്റെ സൃഷ്ടികളുടെമേലെല്ലാം അധികാരമുണ്ട്‌, അവനാണ്‌ അഖിലാണ്ഡപരമാധികാരി. തന്റെ ദൂതഗണത്തെ യഹോവ സംഘടിപ്പിച്ചിരിക്കുന്ന വിധത്തിൽനിന്ന്‌ അവൻ ‘കലക്കത്തിന്റെ ദൈവമല്ല, സമാധാനത്തിന്റെ ദൈവമാണ്‌’ എന്നു മനസ്സിലാക്കാൻ കഴിയും.—1 കൊരി. 14:33; യെശ. 6:1-3; എബ്രാ. 12:22, 23.

2, 3. (എ) ആരാണ്‌ യഹോവയുടെ ആദ്യ സൃഷ്ടി? (ബി) പിതാവിനോടുള്ള ബന്ധത്തിൽ ആദ്യജാതന്റെ സ്ഥാനമെന്ത്‌?

² സൃഷ്ടിക്രിയ തുടങ്ങുന്നതിനുമുമ്പ്‌ അനന്തകോടി വർഷങ്ങൾ ദൈവം തനിച്ചുണ്ടായിരുന്നു. ദൈവത്തിന്റെ ആദ്യ സൃഷ്ടി ഒരു ആത്മജീവിയായിരുന്നു. ദൈവത്തിന്റെ വക്താവായി പ്രവർത്തിച്ചിരുന്നതിനാൽ അവൻ “വചനം” എന്നറിയപ്പെട്ടു. മറ്റെല്ലാം അസ്‌തിത്വത്തിൽ വന്നത്‌ “വചനം” മുഖാന്തരമാണ്‌. പിന്നീട്‌ ഈ വചനം യേശു എന്ന പേരിൽ പൂർണമനുഷ്യനായി ഭൂമിയിൽ വന്നു.—യോഹന്നാൻ 1:1-3, 14 വായിക്കുക.

³ ദൈവത്തിന്റെയും അവന്റെ ആദ്യജാതനായ പുത്രന്റെയും സ്ഥാനത്തെക്കുറിച്ച്‌ തിരുവെഴുത്തുകൾ എന്താണ്‌ പറയുന്നത്‌? നിശ്വസ്‌തതയിൽ പൗലോസ്‌ അപ്പൊസ്‌തലൻ ഇങ്ങനെ എഴുതി: “ഏതു പുരുഷന്റെയും ശിരസ്സ്‌ ക്രിസ്‌തു; സ്‌ത്രീയുടെ ശിരസ്സ്‌ പുരുഷൻ; ക്രിസ്‌തുവിന്റെ ശിരസ്സ്‌ ദൈവം. ഇതു നിങ്ങൾ മനസ്സിലാക്കണമെന്നു ഞാൻ ആഗ്രഹിക്കുന്നു.” (1 കൊരി. 11:3) ക്രിസ്‌തു പിതാവിന്റെ ശിരഃസ്ഥാനത്തിൻകീഴിലാണ്‌. വാസ്‌തവത്തിൽ, ബുദ്ധിശക്തിയുള്ള സൃഷ്ടികൾക്കിടയിൽ സമാധാനവും ക്രമവും നിലനിൽക്കണമെങ്കിൽ ശിരഃസ്ഥാനവും അതിനോടുള്ള കീഴ്‌പെടലും അനിവാര്യമാണ്‌. മറ്റെല്ലാം സൃഷ്ടിക്കപ്പെട്ടത്‌ ആരു മുഖാന്തരമാണോ ആ പുത്രൻപോലും ദൈവത്തിന്റെ ശിരഃസ്ഥാനത്തിനു കീഴ്‌പെട്ടിരിക്കണം.—കൊലോ. 1:16.

4, 5. യഹോവയുടെ ശിരഃസ്ഥാനത്തിനു കീഴ്‌പെട്ടിരിക്കുന്നതിനെ യേശു എങ്ങനെയാണ്‌ വീക്ഷിച്ചത്‌?

⁴ യഹോവയുടെ ശിരഃസ്ഥാനത്തിനു കീഴ്‌പെട്ടുകൊണ്ട്‌ ഭൂമിയിലേക്കു വരുന്നതിനെക്കുറിച്ച്‌ യേശുവിന്‌ എന്താണ്‌ തോന്നിയത്‌? “അവൻ ദൈവസ്വരൂപത്തിൽ ആയിരുന്നിട്ടും ദൈവത്തോടു സമത്വം സ്വന്തമാക്കണമെന്നു ചിന്തിക്കാതെ തനിക്കുള്ളതെല്ലാം വിട്ട്‌ ദാസരൂപം എടുത്ത്‌ മനുഷ്യനായിത്തീർന്നു. മനുഷ്യരൂപത്തിൽ ആയിരിക്കെ അവൻ തന്നെത്തന്നെ താഴ്‌ത്തി മരണത്തോളം, ദണ്ഡനസ്‌തംഭത്തിലെ മരണത്തോളംതന്നെ അനുസരണമുള്ളവനായിത്തീർന്നു” എന്ന്‌ ബൈബിളിൽ നാം വായിക്കുന്നു.—ഫിലി. 2:5-8.

⁵ യേശു എല്ലായ്‌പോഴും താഴ്‌മയോടെ പിതാവിന്റെ ഇഷ്ടത്തിനു കീഴ്‌പ്പെട്ടു. അവൻ ഇങ്ങനെ പറഞ്ഞു: “എനിക്കു സ്വയമായി ഒന്നും ചെയ്യാൻ കഴിയുന്നതല്ല. . . . എന്റെ വിധി നീതിയുള്ളതാകുന്നു; എന്തെന്നാൽ ഞാൻ എന്റെ ഇഷ്ടമല്ല, എന്നെ അയച്ചവന്റെ ഇഷ്ടമത്രേ ചെയ്യാൻ ഇച്ഛിക്കുന്നത്‌.” (യോഹ. 5:30) ‘ഞാൻ എപ്പോഴും അവനു (എന്റെ പിതാവിനു) പ്രസാദകരമായതു ചെയ്യുന്നു’ എന്ന്‌ അവൻ പ്രസ്‌താവിച്ചു. (യോഹ. 8:29) തന്റെ ഭൗമിക ജീവിതത്തിന്റെ അവസാനത്തോടടുത്ത്‌ അവൻ പിതാവിനോട്‌ ഇങ്ങനെ പ്രാർഥിച്ചു: “നീ എനിക്കു ചെയ്യാൻ തന്ന വേല പൂർത്തിയാക്കിക്കൊണ്ട്‌ ഞാൻ ഭൂമിയിൽ നിന്നെ മഹത്ത്വപ്പെടുത്തിയിരിക്കുന്നു.” (യോഹ. 17:4) പിതാവിന്റെ ശിരഃസ്ഥാനം അംഗീകരിക്കുന്നതിനും അതിനു കീഴ്‌പെട്ടിരിക്കുന്നതിനും യേശുവിന്‌ ഒരു ബുദ്ധിമുട്ടും തോന്നിയിരുന്നില്ല എന്നാണ്‌ ഇതെല്ലാം കാണിക്കുന്നത്‌.

പിതാവിനോടുള്ള കീഴ്‌പെടൽ കൈവരുത്തിയ പ്രയോജനങ്ങൾ

6. യേശു പ്രകടമാക്കിയ ഹൃദ്യമായ ചില ഗുണങ്ങളേവ?

⁶ ഭൂമിയിലായിരിക്കെ യേശു ഹൃദ്യമായ പല ഗുണങ്ങളും പ്രകടമാക്കി. അതിലൊന്ന്‌, പിതാവിനോട്‌ അവനുണ്ടായിരുന്ന ആഴമായ സ്‌നേഹമാണ്‌. “ഞാൻ പിതാവിനെ സ്‌നേഹിക്കുന്നു” എന്ന്‌ അവൻ പറഞ്ഞു. (യോഹ. 14:31) ആളുകളോടും അവന്‌ ആഴമായ സ്‌നേഹമുണ്ടായിരുന്നു. (മത്തായി 22:35-40 വായിക്കുക.) അവൻ ദയയും പരിഗണനയും ഉള്ളവനായിരുന്നു. ആളുകളോട്‌ അവൻ പരുഷമായി പെരുമാറുകയോ അവരുടെമേൽ മേധാവിത്വംപുലർത്തുകയോ ചെയ്‌തില്ല. “ക്ലേശിതരും ഭാരം ചുമക്കുന്നവരും ആയുള്ളോരേ, എന്റെ അടുക്കൽ വരുവിൻ; ഞാൻ നിങ്ങൾക്ക്‌ ഉന്മേഷം പകരും. എന്റെ നുകം ഏറ്റുകൊണ്ട്‌ എന്നിൽനിന്നു പഠിക്കുവിൻ. ഞാൻ സൗമ്യതയും താഴ്‌മയും ഉള്ളവനാകയാൽ നിങ്ങൾ ഉന്മേഷം കണ്ടെത്തും; എന്തെന്നാൽ എന്റെ നുകം മൃദുവും എന്റെ ചുമട്‌ ലഘുവും ആകുന്നു,” അവൻ പറഞ്ഞു. (മത്താ. 11:28-30) ചെമ്മരിയാടുതുല്യരായവർക്ക്‌, വിശേഷാൽ അടിച്ചമർത്തപ്പെട്ടിരുന്നവർക്ക്‌, പ്രായഭേദമെന്യേ യേശുവിന്റെ ഊഷ്‌മളമായ വ്യക്തിത്വവും സന്ദേശവും ഏറെ ആശ്വാസംപകർന്നു.

7, 8. രക്തസ്രാവമുണ്ടായിരുന്ന സ്‌ത്രീക്ക്‌ ന്യായപ്രമാണ നിയമമനുസരിച്ച്‌ എന്തു വിലക്കുണ്ടായിരുന്നു? എന്നാൽ യേശു എങ്ങനെയാണ്‌ അവളോട്‌ ഇടപെട്ടത്‌?

⁷ യേശു സ്‌ത്രീകളോട്‌ ഇടപെട്ടിരുന്നത്‌ എങ്ങനെയെന്നു ചിന്തിക്കുക. പുരുഷന്മാരിൽ പലരും സ്‌ത്രീകളോട്‌ മോശമായി പെരുമാറിയതിന്റെ ചരിത്രമാണുള്ളത്‌. പുരാതന ഇസ്രായേലിലെ മതനേതാക്കന്മാരുടെ കാര്യവും വ്യത്യസ്‌തമായിരുന്നില്ല. എന്നാൽ യേശു സ്‌ത്രീകളോട്‌ ആദരവോടെയാണ്‌ പെരുമാറിയത്‌. 12 വർഷമായി രക്തസ്രാവത്താൽ വലഞ്ഞിരുന്ന ഒരു സ്‌ത്രീയോട്‌ യേശു ഇടപെട്ട വിധം ഇതിന്‌ ഒരു ഉദാഹരണമാണ്‌. അവൾ പല വൈദ്യന്മാരുടെയും അടുത്തു പോയി “വളരെ കഷ്ടപ്പെടുകയും” തനിക്കുള്ളതെല്ലാം ചികിത്സയ്‌ക്കായി ചെലവഴിക്കുകയും ചെയ്‌തു. ഇതെല്ലാം ചെയ്‌തിട്ടും ‘പ്രയോജനമൊന്നും ഉണ്ടായില്ല.’ ന്യായപ്രമാണമനുസരിച്ച്‌ അവൾ അശുദ്ധയായിരുന്നു. അവളെ ആരെങ്കിലും തൊട്ടാൽ അവരും അശുദ്ധരാകുമായിരുന്നു.—ലേവ്യ. 15:19, 25.

⁸ യേശു രോഗങ്ങൾ സൗഖ്യമാക്കുന്നുവെന്നു കേട്ടറിഞ്ഞ അവൾ ജനക്കൂട്ടത്തിനിടയിലൂടെ അവന്റെ അടുത്തെത്തി. “അവന്റെ വസ്‌ത്രത്തിലൊന്നു തൊട്ടാൽ മതി ഞാൻ സുഖം പ്രാപിക്കും” എന്ന്‌ അവളുടെ മനസ്സു പറഞ്ഞു. യേശുവിനെ തൊട്ട ഉടനെ അവളുടെ അസുഖംമാറി. അവൾ തന്റെ വസ്‌ത്രത്തിൽ തൊടാൻ പാടില്ലാത്തതാണെന്ന്‌ യേശുവിന്‌ അറിയാമായിരുന്നു. എന്നിട്ടും അവൻ അവളോട്‌ ദേഷ്യപ്പെട്ടില്ല. പകരം അവൻ അവളോട്‌ ദയാപൂർവം ഇടപെട്ടു. അത്രയും നാൾ ഈ രോഗവുമായി മല്ലിട്ടിരുന്ന അവളുടെ മാനസികാവസ്ഥ യേശു മനസ്സിലാക്കി. ഏതുവിധേനയും സുഖംപ്രാപിക്കാനുള്ള അവളുടെ ആഗ്രഹം യേശു തിരിച്ചറിഞ്ഞു. അനുകമ്പയോടെ യേശു അവളോട്‌ ഇങ്ങനെ പറഞ്ഞു: “മകളേ, നിന്റെ വിശ്വാസം നിന്നെ സൗഖ്യമാക്കിയിരിക്കുന്നു. സമാധാനത്തോടെ പൊയ്‌ക്കൊള്ളുക; . . . ആരോഗ്യത്തോടെ ജീവിക്കുക.”—മർക്കോ. 5:25-34.

9. കുട്ടികൾ തന്റെ അടുത്തുവരുന്നത്‌ ശിഷ്യന്മാർ വിലക്കിയപ്പോൾ യേശു എങ്ങനെ പ്രതികരിച്ചു?

⁹ കുട്ടികൾക്കുപോലും യേശുവിന്റെ അടുക്കൽ സ്വാതന്ത്ര്യം തോന്നിയിരുന്നു. ഒരിക്കൽ ആളുകൾ കുട്ടികളെ അവന്റെ അടുക്കൽ കൊണ്ടുവന്നപ്പോൾ ശിഷ്യന്മാർ അവരെ ശാസിച്ചു. കുട്ടികൾ യേശുവിന്‌ ഒരു ശല്യമായിത്തോന്നും എന്നായിരിക്കാം ശിഷ്യന്മാർ കരുതിയത്‌. പക്ഷേ യേശു അങ്ങനെയല്ല കരുതിയത്‌. തിരുവെഴുത്തു വിവരണം ഇങ്ങനെ പറയുന്നു: “ഇതുകണ്ട്‌ അമർഷം തോന്നി യേശു അവരോടു (ശിഷ്യന്മാരോടു) പറഞ്ഞത്‌: ‘ശിശുക്കൾ എന്റെ അടുക്കൽ വന്നുകൊള്ളട്ടെ; അവരെ തടയരുത്‌. ദൈവരാജ്യം ഇങ്ങനെയുള്ളവരുടേതത്രേ.’” പിന്നെ “അവൻ കുട്ടികളെ കൈകളിലെടുത്ത്‌ അവരുടെമേൽ കൈവെച്ച്‌ അവരെ അനുഗ്രഹിച്ചു.” യേശുവിന്‌ കുട്ടികൾ ശല്യമായി തോന്നിയില്ലെന്നു മാത്രമല്ല അവൻ അവരോടു വാത്സല്യത്തോടെ ഇടപെടുകയും ചെയ്‌തു.—മർക്കോ. 10:13-16.

10. ഭൂമിയിലായിരിക്കെ യേശു പ്രകടിപ്പിച്ച ഗുണങ്ങൾ അവൻ എങ്ങനെയാണ്‌ നേടിയെടുത്തത്‌?

¹⁰ ഭൂമിയിലായിരിക്കെ യേശു പ്രകടിപ്പിച്ച ഗുണങ്ങൾ അവൻ എങ്ങനെയാണ്‌ നേടിയെടുത്തത്‌? മനുഷ്യനാകുന്നതിനുമുമ്പ്‌ യുഗങ്ങളോളം തന്റെ സ്വർഗീയ പിതാവിനെ അടുത്തു നിരീക്ഷിക്കാനുള്ള അവസരം യേശുവിനുണ്ടായിരുന്നു. അങ്ങനെ അവൻ ദൈവത്തിന്റെ വഴികൾ പഠിച്ചെടുത്തു. (സദൃശവാക്യങ്ങൾ 8:22, 23, 30 വായിക്കുക.) യഹോവ തന്റെ സകല സൃഷ്ടികളുടെയുംമേൽ സ്‌നേഹപുരസ്സരം ശിരഃസ്ഥാനം പ്രയോഗിക്കുന്നത്‌ എങ്ങനെയെന്ന്‌ സ്വർഗത്തിലായിരിക്കെ യേശു നിരീക്ഷിച്ചു, അവൻ ആ രീതി സ്വായത്തമാക്കി. യഹോവയ്‌ക്ക്‌ കീഴ്‌പെട്ടിരുന്നില്ലായിരുന്നെങ്കിൽ യേശുവിന്‌ അതിനു കഴിയുമായിരുന്നോ? പിതാവിന്‌ കീഴ്‌പെട്ടിരിക്കുന്നത്‌ യേശുവിന്‌ സന്തോഷമുള്ള കാര്യമായിരുന്നു. ഇങ്ങനെയൊരു പുത്രനോടൊപ്പമായിരിക്കുന്നതിൽ യഹോവയും സന്തോഷിച്ചു. പിന്നീട്‌, ഭൂമിയിൽ വന്നപ്പോൾ യേശു തന്റെ സ്വർഗീയ പിതാവിന്റെ അനുപമമായ ഗുണങ്ങൾ പൂർണമായും പ്രതിഫലിപ്പിച്ചു. സ്വർഗീയ രാജ്യത്തിന്റെ രാജാവായി ദൈവം നിയമിച്ചിരിക്കുന്ന ഈ ക്രിസ്‌തുവിന്‌ കീഴ്‌പെട്ടിരിക്കുക എന്നത്‌ എത്ര വലിയൊരു പദവിയാണ്‌!

ക്രിസ്‌തുവിന്റെ ഗുണങ്ങൾ അനുകരിക്കുക

11. (എ) ആരെ അനുകരിക്കാൻ നാം നല്ല ശ്രമം ചെയ്യണം? (ബി) യേശുവിനെ അനുകരിക്കാൻ ക്രിസ്‌തീയ പുരുഷന്മാർ പ്രത്യേകം ശ്രമിക്കേണ്ടത്‌ എന്തുകൊണ്ട്‌?

¹¹ ക്രിസ്‌തുവിന്റെ ഗുണങ്ങൾ അനുകരിക്കാൻ സഭയിലെ എല്ലാ അംഗങ്ങളും, പ്രത്യേകിച്ച്‌ പുരുഷന്മാർ നല്ല ശ്രമം ചെയ്യണം. കാരണം, നാം മുമ്പു കണ്ടതുപോലെ, “ഏതു പുരുഷന്റെയും ശിരസ്സ്‌ ക്രിസ്‌തു”വാണെന്ന്‌ ബൈബിൾ പറയുന്നു. ക്രിസ്‌തു തന്റെ ശിരസ്സായ സത്യദൈവത്തെ അനുകരിച്ചതുപോലെ ക്രിസ്‌തീയ പുരുഷന്മാർ അവരുടെ ശിരസ്സായ ക്രിസ്‌തുവിനെ അനുകരിക്കേണ്ടതുണ്ട്‌. ക്രിസ്‌ത്യാനിയായിത്തീർന്നശേഷം പൗലോസ്‌ അപ്പൊസ്‌തലൻ അതാണ്‌ ചെയ്‌തത്‌. “ഞാൻ ക്രിസ്‌തുവിന്റെ അനുകാരിയായിരിക്കുന്നതുപോലെ നിങ്ങൾ എന്റെ അനുകാരികളാകുവിൻ” എന്ന്‌ അവൻ സഹവിശ്വാസികളെ ഉദ്‌ബോധിപ്പിച്ചു. (1 കൊരി. 11:1) “അതിനായിട്ടല്ലോ നിങ്ങളെ വിളിച്ചിരിക്കുന്നത്‌; എന്തെന്നാൽ ക്രിസ്‌തുവും നിങ്ങൾക്കുവേണ്ടി കഷ്ടം സഹിക്കുകയും നിങ്ങൾ അവന്റെ കാൽച്ചുവടുകൾ അടുത്തു പിന്തുടരുവാൻ ഒരു മാതൃക വെക്കുകയും ചെയ്‌തിരിക്കുന്നു” എന്ന്‌ അപ്പൊസ്‌തലനായ പത്രോസും എഴുതി. (1 പത്രോ. 2:21) ക്രിസ്‌തുവിനെ അനുകരിക്കാനുള്ള ഉദ്‌ബോധനത്തിന്‌ പുരുഷന്മാർ വിശേഷാൽ ശ്രദ്ധനൽകണം എന്നു പറയാൻ മറ്റൊരു കാരണവുമുണ്ട്‌: മൂപ്പന്മാരും ശുശ്രൂഷാദാസന്മാരും ആകാനുള്ളവരാണ്‌ അവർ. യഹോവയെ അനുകരിക്കുന്നതിൽ യേശു സന്തോഷം കണ്ടെത്തിയതുപോലെ ക്രിസ്‌തുവിനെ അനുകരിക്കുന്നതിലും അവന്റെ ഗുണങ്ങൾ പകർത്തുന്നതിലും ക്രിസ്‌തീയ പുരുഷന്മാർ സന്തോഷം കണ്ടെത്തണം.

12, 13. തങ്ങളുടെ പരിരക്ഷണയിലുള്ള ആടുകളോട്‌ മൂപ്പന്മാർ എങ്ങനെ ഇടപെടണം?

¹² മൂപ്പന്മാർക്ക്‌ ക്രിസ്‌തുവിനെ അനുകരിക്കാനുള്ള കടപ്പാടുണ്ട്‌. പത്രോസ്‌ അവർക്ക്‌ പിൻവരുന്ന നിർദേശം നൽകി: “നിങ്ങളുടെ പരിപാലനത്തിലുള്ള ദൈവത്തിന്റെ ആട്ടിൻകൂട്ടത്തെ മേയ്‌ക്കുവിൻ; നിർബന്ധത്താലല്ല, മനസ്സോടെയും ദുർല്ലാഭമോഹത്തോടെയല്ല, താത്‌പര്യത്തോടെയും ദൈവത്തിന്‌ അവകാശപ്പെട്ടവരുടെമേൽ ആധിപത്യം നടത്തിക്കൊണ്ടല്ല, അജഗണത്തിനു മാതൃകകളായിക്കൊണ്ടുംതന്നെ.” (1 പത്രോ. 5:1-3) ക്രിസ്‌തീയ മൂപ്പന്മാർ സ്വേച്ഛാധിപതികളെപ്പോലെ മേധാവിത്വംപുലർത്തുന്നവരോ കടുംപിടുത്തക്കാരോ പരുഷമായി പെരുമാറുന്നവരോ ആയിരിക്കരുത്‌. തങ്ങളുടെ സംരക്ഷണയിലുള്ള ആടുകളോട്‌ ഇടപെടുമ്പോൾ, ക്രിസ്‌തുവിനെ അനുകരിച്ചുകൊണ്ട്‌ സ്‌നേഹവും പരിഗണനയും താഴ്‌മയും ദയയും ഉള്ളവരായിരിക്കാൻ അവർ ശ്രമിക്കും.

¹³ സഭയിൽ നേതൃത്വമെടുക്കുന്ന പുരുഷന്മാർ അപൂർണരാണ്‌; അവർ എപ്പോഴും അക്കാര്യം മനസ്സിൽപ്പിടിക്കണം. (റോമ. 3:23) അതുകൊണ്ട്‌ യേശുവിനെക്കുറിച്ച്‌ പഠിക്കാനും അവന്റെ സ്‌നേഹം അനുകരിക്കാനും അവർ ഉത്സാഹമുള്ളവരായിരിക്കണം. ദൈവവും ക്രിസ്‌തുവും ആളുകളോട്‌ ഇടപെടുന്ന വിധത്തെക്കുറിച്ച്‌ അവർ ചിന്തിക്കുകയും ആ മാതൃക പിൻപറ്റാൻ ശ്രമിക്കുകയും വേണം. പത്രോസ്‌ ഈ നിർദേശം നൽകി: “അന്യോന്യം ഇടപെടുന്നതിൽ നിങ്ങൾ എല്ലാവരും താഴ്‌മ ധരിച്ചുകൊള്ളുവിൻ; എന്തെന്നാൽ ദൈവം ഗർവികളോട്‌ എതിർത്തു നിൽക്കുന്നു; താഴ്‌മയുള്ളവരുടെമേൽ അവൻ കൃപ ചൊരിയുന്നു.”—1 പത്രോ. 5:5.

14. മൂപ്പന്മാർ മറ്റുള്ളവരെ ഏതളവോളം ബഹുമാനിക്കണം?

¹⁴ ദൈവത്തിന്റെ ആട്ടിൻകൂട്ടത്തോട്‌ ഇടപെടുമ്പോൾ സഭയിലെ നിയമിത പുരുഷന്മാർ സദ്‌ഗുണങ്ങൾ പ്രകടമാക്കണം. “സഹോദരസ്‌നേഹത്തിൽ അന്യോന്യം ആർദ്രതയുള്ളവരായിരിക്കുവിൻ. പരസ്‌പരം ബഹുമാനിക്കുന്നതിൽ മുന്നിട്ടുനിൽക്കുവിൻ” എന്ന്‌ റോമർ 12:10 പറയുന്നു. മൂപ്പന്മാരും ശുശ്രൂഷാദാസന്മാരും മറ്റുള്ളവരോട്‌ ആദരവോടെ ഇടപെടണം. “ശാഠ്യത്താലോ ദുരഭിമാനത്താലോ ഒന്നും ചെയ്യാതെ താഴ്‌മയോടെ മറ്റുള്ളവരെ നിങ്ങളെക്കാൾ ശ്രേഷ്‌ഠരായി കരുതുവിൻ” എന്ന ക്രിസ്‌ത്യാനികൾക്കുള്ള ബുദ്ധിയുപദേശം ഇവരും ബാധകമാക്കണം. (ഫിലി. 2:3) നേതൃത്വമെടുക്കുന്നവർ മറ്റുള്ളവരെ തങ്ങളെക്കാൾ ശ്രേഷ്‌ഠരായി വീക്ഷിക്കണം. അങ്ങനെ ചെയ്യുന്നെങ്കിൽ പൗലോസിന്റെ ഈ നിർദേശത്തിനു ചേർച്ചയിൽ പ്രവർത്തിക്കുകയായിരിക്കും അവർ: “ശക്തരായ നാം അശക്തരുടെ ബലഹീനതകളെ ചുമക്കണം; നമ്മെത്തന്നെ പ്രീതിപ്പെടുത്തുകയല്ല വേണ്ടത്‌. നാം ഓരോരുത്തരും അയൽക്കാരന്റെ നന്മയ്‌ക്കായി, അവന്റെ ആത്മീയവർധനയ്‌ക്കായിത്തന്നെ പ്രവർത്തിച്ചുകൊണ്ട്‌ അവനെ പ്രസാദിപ്പിക്കണം. ക്രിസ്‌തുതന്നെയും സ്വയം പ്രീതിപ്പെടുത്തിയില്ല.”—റോമ. 15:1-3.

‘ഭാര്യമാരെ ആദരിക്കുക’

15. ഭർത്താവ്‌ ഭാര്യയോട്‌ ഇടപെടേണ്ടത്‌ എങ്ങനെയാണ്‌?

¹⁵ വിവാഹിതരായ പുരുഷന്മാർക്ക്‌ പത്രോസ്‌ ഈ നിർദേശം നൽകി: “ഭർത്താക്കന്മാരേ, നിങ്ങളുടെ പ്രാർഥനകൾ തടസ്സപ്പെടാതിരിക്കേണ്ടതിന്‌ സ്‌ത്രീജനം ഏറെ ബലഹീനമായ പാത്രം എന്നോർത്ത്‌ അവരെ (നിങ്ങളുടെ ഭാര്യമാരെ) ആദരിച്ച്‌ വിവേകപൂർവം അവരോടൊപ്പം വസിക്കുവിൻ.” (1 പത്രോ. 3:7) ഒരാളെ ആദരിക്കുക എന്നു പറഞ്ഞാൽ, വിലപ്പെട്ട ഒരാളായി ആ വ്യക്തിയെ കാണുക എന്നാണ്‌ അർഥം. അങ്ങനെയാകുമ്പോൾ നിങ്ങൾ അയാളുടെ അഭിപ്രായങ്ങളും ആവശ്യങ്ങളും ആഗ്രഹങ്ങളും പരിഗണിക്കും; തക്കതായ കാരണമൊന്നുമില്ലെങ്കിൽ അതിനു വഴങ്ങിക്കൊടുക്കും. ഒരു ഭർത്താവ്‌ ഭാര്യയോട്‌ ഇടപെടേണ്ടത്‌ ഇങ്ങനെയാണ്‌.

16. ദൈവവചനം ഭർത്താക്കന്മാർക്ക്‌ എന്തു മുന്നറിയിപ്പു നൽകുന്നു?

¹⁶ ഭർത്താക്കന്മാരോട്‌, അവരുടെ “പ്രാർഥനകൾ തടസ്സപ്പെടാതിരിക്കേണ്ടതിന്‌” ഭാര്യമാരെ ആദരിക്കാൻ പത്രോസ്‌ പറയുന്നു. (1 പത്രോ. 3:7) ഭർത്താവ്‌ ഭാര്യയോട്‌ എങ്ങനെ പെരുമാറുന്നു എന്നതിനെ യഹോവ എത്ര ഗൗരവമായി കാണുന്നുവെന്ന്‌ ഈ വാക്കുകൾ വ്യക്തമാക്കുന്നു. പത്രോസ്‌ നൽകുന്ന മുന്നറിയിപ്പ്‌ ഇതാണ്‌: ഭാര്യക്ക്‌ ആദരവുനൽകിയില്ലെങ്കിൽ ഭർത്താവിന്റെ പ്രാർഥന തടസ്സപ്പെടാം! മാത്രമല്ല, ഭർത്താക്കന്മാർ ആദരവോടെ ഇടപെടുമ്പോൾ ഭാര്യമാർ നല്ല പെരുമാറ്റം കാഴ്‌ചവെക്കാനുള്ള സാധ്യത കൂടുതലാണ്‌, ശരിയല്ലേ?

17. ഭർത്താവ്‌ ഭാര്യയെ എത്രത്തോളം സ്‌നേഹിക്കണം?

¹⁷ ഭർത്താവ്‌ ഭാര്യയെ സ്‌നേഹിക്കേണ്ടത്‌ എങ്ങനെയെന്ന്‌ ദൈവവചനം പറയുന്നു: “ഭർത്താക്കന്മാരും തങ്ങളുടെ ഭാര്യമാരെ സ്വന്തം ശരീരത്തെപ്പോലെ സ്‌നേഹിക്കേണ്ടതാകുന്നു. . . . ആരും ഒരിക്കലും സ്വന്തം ശരീരത്തെ വെറുക്കുകയില്ലല്ലോ; ക്രിസ്‌തു സഭയെ എന്നതുപോലെ അതിനെ പരിപോഷിപ്പിക്കുകയും പരിപാലിക്കുകയുമത്രേ ചെയ്യുന്നത്‌. . . . നിങ്ങളിൽ ഓരോരുത്തനും തന്റെ ഭാര്യയെ തന്നെപ്പോലെതന്നെ സ്‌നേഹിക്കണം.” (എഫെ. 5:28, 29, 33) ഭർത്താവ്‌ ഭാര്യയെ എത്രത്തോളം സ്‌നേഹിക്കണം? പൗലോസിന്റെ വാക്കുകൾ ശ്രദ്ധിക്കുക: “ഭർത്താക്കന്മാരേ, ക്രിസ്‌തു സഭയെ സ്‌നേഹിച്ചതുപോലെ നിങ്ങളുടെ ഭാര്യമാരെ സ്‌നേഹിക്കുവിൻ.” ക്രിസ്‌തു “സഭയ്‌ക്കുവേണ്ടി തന്നെത്തന്നെ ഏൽപ്പിച്ചുകൊടുത്തു.” (എഫെ. 5:25, 27) അതെ, ഭർത്താവ്‌ ഭാര്യക്കുവേണ്ടി ജീവൻ വെടിയാൻപോലും തയ്യാറായിരിക്കണം, ക്രിസ്‌തു ചെയ്‌തതുപോലെ. ഒരു ക്രിസ്‌തീയ ഭർത്താവ്‌ ഭാര്യയോട്‌ ആർദ്രതയോടും പരിഗണനയോടും നിസ്സ്വാർഥതയോടും കൂടെ ഇടപെടുന്നെങ്കിൽ അദ്ദേഹത്തിന്റെ ശിരഃസ്ഥാനത്തിനു കീഴ്‌പെട്ടിരിക്കാൻ ഭാര്യക്ക്‌ എളുപ്പമായിരിക്കും.

18. വൈവാഹിക ഉത്തരവാദിത്വങ്ങൾ നിറവേറ്റാൻ പുരുഷന്മാർക്ക്‌ എന്തു സഹായമുണ്ട്‌?

¹⁸ ഭാര്യമാരെ ഈ വിധത്തിൽ ആദരിക്കുന്നത്‌ ഭർത്താക്കന്മാർക്കു സാധിക്കാത്ത ഒരു കാര്യമാണോ? അല്ല. നമുക്ക്‌ അസാധ്യമായ ഒരു കാര്യം ചെയ്യാൻ യഹോവ ഒരിക്കലും ആവശ്യപ്പെടില്ല. തന്നെയുമല്ല, യഹോവയുടെ ആരാധകർക്ക്‌ അഖിലാണ്ഡത്തിലെ ഏറ്റവും പ്രബലശക്തിയായ പരിശുദ്ധാത്മാവിന്റെ സഹായവും ലഭിക്കും. യേശു പറഞ്ഞു: “മക്കൾക്കു നല്ല ദാനങ്ങൾ നൽകാൻ ദോഷികളായ നിങ്ങൾക്ക്‌ അറിയാമെങ്കിൽ സ്വർഗസ്ഥനായ പിതാവ്‌ തന്നോടു ചോദിക്കുന്നവർക്കു പരിശുദ്ധാത്മാവിനെ എത്രയധികം നൽകും!” (ലൂക്കോ. 11:13) ഭാര്യയോടും മറ്റുള്ളവരോടും നന്നായി ഇടപെടാനുള്ള സഹായത്തിനായി പരിശുദ്ധാത്മാവിനെ നൽകാൻ ഭർത്താക്കന്മാർക്ക്‌ യഹോവയോടു പ്രാർഥിക്കാവുന്നതാണ്‌.—പ്രവൃത്തികൾ 5:32 വായിക്കുക.

19. അടുത്ത ലേഖനത്തിൽ എന്തു ചർച്ചചെയ്യും?

¹⁹ ക്രിസ്‌തുവിനു കീഴ്‌പെട്ടിരിക്കാനും അവൻ ശിരഃസ്ഥാനം പ്രയോഗിച്ച വിധം അനുകരിക്കാനുമുള്ള വലിയൊരു ഉത്തരവാദിത്വമാണ്‌ പുരുഷന്മാർക്കുള്ളത്‌. എന്നാൽ സ്‌ത്രീകൾക്ക്‌, വിശേഷാൽ, ഭാര്യമാർക്ക്‌ എന്ത്‌ ഉത്തരവാദിത്വമുണ്ട്‌? യഹോവയുടെ ക്രമീകരണത്തിൽ സ്‌ത്രീകളുടെ പങ്കെന്താണ്‌? അടുത്ത ലേഖനത്തിൽ ഇതാണ്‌ ചർച്ചചെയ്യുന്നത്‌.

സ്‌ത്രീകളേ, നിങ്ങൾ ശിരഃസ്ഥാനത്തിനു കീഴ്‌പെടേണ്ടത്‌ എന്തുകൊണ്ട്‌?

“സ്‌ത്രീയുടെ ശിരസ്സ്‌ പുരുഷൻ.”—1 കൊരി. 11:3.

1, 2. (എ) യഹോവ വെച്ചിരിക്കുന്ന ശിരഃസ്ഥാന ക്രമീകരണത്തെയും അതിനോടുള്ള കീഴ്‌പെടലിനെയും കുറിച്ച്‌ പൗലോസ്‌ എന്താണ്‌ എഴുതിയത്‌? (ബി) ഏതെല്ലാം ചോദ്യങ്ങൾക്കുള്ള ഉത്തരം ഈ ലേഖനത്തിലുണ്ട്‌?

അപ്പൊസ്‌തലനായ പൗലോസ്‌ എഴുതി: “ഏതു പുരുഷന്റെയും ശിരസ്സ്‌ ക്രിസ്‌തു; . . . ക്രിസ്‌തുവിന്റെ ശിരസ്സ്‌ ദൈവം.” (1 കൊരി. 11:3) ഈ ശിരഃസ്ഥാന ക്രമീകരണം സ്ഥാപിച്ചത്‌ യഹോവയാണ്‌. യേശുവിന്‌ തന്റെ ശിരസ്സായ യഹോവയാം ദൈവത്തിനു കീഴ്‌പെട്ടിരിക്കുന്നത്‌ സന്തോഷമുള്ള കാര്യമായിരുന്നെന്നും അവൻ അതിനെ ഒരു പദവിയായി കണ്ടെന്നും കഴിഞ്ഞ ലേഖനത്തിൽ നാം പഠിച്ചു. ക്രിസ്‌തീയ പുരുഷന്മാരുടെ ശിരസ്സ്‌ ക്രിസ്‌തുവാണെന്നും നാം കാണുകയുണ്ടായി. ക്രിസ്‌തു ആളുകളോട്‌ ആത്മത്യാഗപരമായാണ്‌ ഇടപെട്ടത്‌; അവന്‌ അവരോടു ദയയും ആർദ്രതയും അനുകമ്പയും ഉണ്ടായിരുന്നു. ക്രിസ്‌തീയ പുരുഷന്മാരും ഇതേവിധത്തിലാണ്‌ മറ്റുള്ളവരോട്‌ ഇടപെടേണ്ടത്‌, പ്രത്യേകിച്ചും ഭാര്യമാരോട്‌.

² എന്നാൽ സ്‌ത്രീകളുടെ കാര്യമോ? ആരാണ്‌ അവരുടെ ശിരസ്സ്‌? “സ്‌ത്രീയുടെ ശിരസ്സ്‌ പുരുഷൻ” എന്ന്‌ പൗലോസ്‌ എഴുതി. ഈ നിശ്വസ്‌ത വചനത്തെ സ്‌ത്രീകൾ എങ്ങനെയാണ്‌ കാണേണ്ടത്‌? ഭർത്താവ്‌ അവിശ്വാസിയാണെങ്കിലും ഭാര്യ ഈ തത്ത്വം അനുസരിക്കേണ്ടതുണ്ടോ? ഭർത്താവിന്റെ ശിരഃസ്ഥാനത്തിനു കീഴ്‌പെടുക എന്നാൽ ഭാര്യക്ക്‌ അഭിപ്രായ സ്വാതന്ത്ര്യം ഇല്ലെന്നോ തീരുമാനങ്ങളെടുക്കുമ്പോൾ അവൾ മിണ്ടാതിരിക്കണം എന്നോ ആണോ ഉദ്ദേശിക്കുന്നത്‌? സ്‌ത്രീക്ക്‌ എങ്ങനെ പ്രശംസനേടിയെടുക്കാനാകും?

“ഞാൻ അവന്നു തക്കതായൊരു തുണ ഉണ്ടാക്കിക്കൊടുക്കും”

3, 4. ദാമ്പത്യത്തിൽ ശിരഃസ്ഥാന ക്രമീകരണത്തിന്റെ പ്രയോജനമെന്ത്‌?

³ ശിരഃസ്ഥാന ക്രമീകരണത്തിന്റെ ഉപജ്ഞാതാവ്‌ യഹോവയാം ദൈവമാണ്‌. ആദാമിനെ സൃഷ്ടിച്ചശേഷം ദൈവം ഇങ്ങനെ പറഞ്ഞു: “മനുഷ്യൻ ഏകനായിരിക്കുന്നതു നന്നല്ല; ഞാൻ അവന്നു തക്കതായൊരു തുണ ഉണ്ടാക്കിക്കൊടുക്കും.” യഹോവ ഹവ്വായെ സൃഷ്ടിച്ചപ്പോൾ തനിക്കൊരു തുണയെ, സഹായിയെ കിട്ടിയതിൽ ആദാം അത്യധികം ആഹ്ലാദിച്ചു. അവൻ പറഞ്ഞു: “ഇതു ഇപ്പോൾ എന്റെ അസ്ഥിയിൽനിന്നു അസ്ഥിയും എന്റെ മാംസത്തിൽനിന്നു മാംസവും ആകുന്നു.” (ഉല്‌പ. 2:18-24) മഹത്തായ പദവിയാണ്‌ ആദാമിനും ഹവ്വായ്‌ക്കും ഉണ്ടായിരുന്നത്‌: ഭൂമിയിലെ പറുദീസയിൽ എന്നേക്കും സന്തോഷത്തോടെ ജീവിക്കേണ്ട പൂർണരായ മനുഷ്യമക്കൾക്കു ജന്മംനൽകാനുള്ള പദവി!

⁴ നമ്മുടെ ആദ്യമാതാപിതാക്കളുടെ മത്സരംമൂലം, പിഴവറ്റ രീതിയിൽ ശിരഃസ്ഥാന ക്രമീകരണം പിൻപറ്റാനുള്ള പ്രാപ്‌തി മനുഷ്യരാശിക്കു കൈമോശംവന്നു. (റോമർ 5:12 വായിക്കുക.) പക്ഷേ, ആ ക്രമീകരണത്തിന്‌ മാറ്റമുണ്ടായില്ല. ശരിയാംവണ്ണം പിൻപറ്റുന്നെങ്കിൽ അത്‌ ധാരാളം അനുഗ്രഹങ്ങൾ കൈവരുത്തും, വിവാഹജീവിതം സന്തുഷ്ടവുമായിരിക്കും. പിതാവിന്റെ ശിരഃസ്ഥാനത്തിനു കീഴടങ്ങിയിരുന്നപ്പോൾ യേശു അനുഭവിച്ച സന്തോഷത്തെക്കുറിച്ച്‌ ഒന്നോർത്തുനോക്കൂ. ഭൂമിയിൽ വരുന്നതിനുമുമ്പ്‌ യേശു “ഇടവിടാതെ അവന്റെ (യഹോവയുടെ) മുമ്പിൽ വിനോദിച്ചു”കൊണ്ടിരുന്നു എന്ന്‌ തിരുവെഴുത്തുകൾ പറയുന്നു. (സദൃ. 8:30) ആ സന്തോഷം നിങ്ങൾക്കും അനുഭവിക്കാനാകും. അപൂർണതനിമിത്തം ഒരു പുരുഷനും പിഴവറ്റ രീതിയിൽ ശിരഃസ്ഥാനം പ്രയോഗിക്കാൻ കഴിയില്ല; ഒരു സ്‌ത്രീക്കും അതിന്‌ സമ്പൂർണമായി കീഴ്‌പെടാനും കഴിയില്ല. എന്നാൽ ഭാര്യയും ഭർത്താവും ഈ ക്രമീകരണത്തിനു ചേർച്ചയിൽ പ്രവർത്തിക്കാൻ പരമാവധി ശ്രമിക്കുന്നെങ്കിൽ വിവാഹജീവിതത്തിൽ ഇക്കാലത്ത്‌ ലഭിക്കാവുന്നത്ര സന്തോഷവും സംതൃപ്‌തിയും നേടാനാകും.

5. റോമർ 12:10-ൽ കാണുന്ന നിർദേശം ഭാര്യയും ഭർത്താവും അനുസരിക്കേണ്ടത്‌ എന്തുകൊണ്ട്‌?

⁵ “സഹോദരസ്‌നേഹത്തിൽ അന്യോന്യം ആർദ്രതയുള്ളവരായിരിക്കുവിൻ. പരസ്‌പരം ബഹുമാനിക്കുന്നതിൽ മുന്നിട്ടുനിൽക്കുവിൻ.” (റോമ. 12:10) എല്ലാ ക്രിസ്‌ത്യാനികൾക്കുമുള്ള ഈ ഉപദേശം ദമ്പതികൾ വിശേഷാൽ ബാധകമാക്കേണ്ടതാണ്‌; ദാമ്പത്യ വിജയത്തിന്‌ അത്‌ അനിവാര്യമാണ്‌. “തമ്മിൽ ദയയും ആർദ്രാനുകമ്പയും ഉള്ളവരായി . . . അന്യോന്യം ഉദാരമായി ക്ഷമിക്കു”ന്നവരായിരിക്കാനും ഭാര്യയും ഭർത്താവും യത്‌നിക്കണം.—എഫെ. 4:32.

ഇണ അവിശ്വാസിയാണെങ്കിൽ. . .

6, 7. വിശ്വാസത്തിലില്ലാത്ത ഭർത്താവിന്‌ ഭാര്യ കീഴ്‌പെട്ടിരിക്കുന്നതിന്റെ പ്രയോജനമെന്ത്‌?

⁶ നിങ്ങളുടെ ഇണ യഹോവയെ ആരാധിക്കുന്ന ഒരാളല്ലെങ്കിലോ? പലപ്പോഴും, ഭർത്താവായിരിക്കും വിശ്വാസത്തിലില്ലാത്തത്‌. അതാണ്‌ സാഹചര്യമെങ്കിൽ ഭാര്യ അദ്ദേഹത്തോട്‌ എങ്ങനെ ഇടപെടണം? അതിനുള്ള ഉത്തരം ബൈബിൾ നൽകുന്നു: “ഭാര്യമാരേ, നിങ്ങളുടെ ഭർത്താക്കന്മാർക്കു കീഴ്‌പെട്ടിരിക്കുവിൻ. അങ്ങനെ, അവരിൽ ആരെങ്കിലും വചനം അനുസരിക്കാത്തവരായിട്ടുണ്ടെങ്കിൽ ഭയാദരവോടെയുള്ള നിങ്ങളുടെ നിർമലമായ നടപ്പു കണ്ടിട്ട്‌ ഒരു വാക്കും കൂടാതെ നിങ്ങളുടെ നടപ്പിനാൽ വിശ്വാസികളായിത്തീരാൻ ഇടവന്നേക്കാം.”—1 പത്രോ. 3:1, 2.

⁷ വിശ്വാസത്തിലില്ലാത്ത ഭർത്താവിനു കീഴ്‌പെട്ടിരിക്കാൻ ദൈവവചനം ഭാര്യയെ ഉദ്‌ബോധിപ്പിക്കുന്നു. ഭാര്യ ഇത്ര നന്നായി പെരുമാറാനുള്ള കാരണമെന്താണെന്നു ചിന്തിക്കാൻ അവളുടെ സത്‌പെരുമാറ്റം ഭർത്താവിനെ പ്രേരിപ്പിച്ചേക്കാം. ഫലമോ? ഭാര്യയുടെ വിശ്വാസങ്ങളെക്കുറിച്ചു കൂടുതൽ മനസ്സിലാക്കാനും പിന്നീട്‌ അദ്ദേഹം സത്യം സ്വീകരിക്കാനും അത്‌ ഇടയാക്കിയേക്കാം.

8, 9. തന്റെ നല്ല പെരുമാറ്റം അവിശ്വാസിയായ ഭർത്താവിന്‌ മാറ്റമുണ്ടാക്കുന്നില്ലെങ്കിൽ ഭാര്യക്ക്‌ എന്തു ചെയ്യാനാകും?

⁸ അവിശ്വാസിയായ ഭർത്താവിന്‌ മാറ്റമുണ്ടാകുന്നില്ലെങ്കിലോ? എല്ലാ സാഹചര്യങ്ങളിലും, ബുദ്ധിമുട്ടുള്ളപ്പോൾപ്പോലും, ക്രിസ്‌തീയ ഗുണങ്ങൾ പ്രകടിപ്പിക്കാൻ തിരുവെഴുത്തുകൾ വിശ്വാസിയായ ഭാര്യയെ പ്രോത്സാഹിപ്പിക്കുന്നു. ഉദാഹരണത്തിന്‌, “സ്‌നേഹം ദീർഘക്ഷമ”യുള്ളതാണെന്ന്‌ 1 കൊരിന്ത്യർ 13:4 പറയുന്നു. അതുകൊണ്ട്‌, ‘തികഞ്ഞ വിനയത്തോടും സൗമ്യതയോടും’ കൂടെ ഭർത്താവിനോട്‌ ഇടപെടാനും “ദീർഘക്ഷമ”യോടെ സ്‌നേഹപൂർവം സഹിച്ചുനിൽക്കാനും ക്രിസ്‌തീയ ഭാര്യ തുടർന്നും ശ്രമിക്കണം. (എഫെ. 4:2) ദൈവത്തിന്റെ പ്രവർത്തനനിരതമായ ശക്തിയുടെ സഹായത്താൽ, പ്രയാസകരമായ സാഹചര്യങ്ങളിൽ ക്രിസ്‌തീയ ഗുണങ്ങൾ പ്രകടിപ്പിക്കാൻ ഭാര്യക്കു കഴിയും.

⁹ “എന്നെ ശക്തനാക്കുന്നവൻ മുഖാന്തരം സകലവും ചെയ്യാൻ ഞാൻ പ്രാപ്‌തനാണ്‌” എന്ന്‌ പൗലോസ്‌ എഴുതി. (ഫിലി. 4:13) സ്വന്തം പ്രാപ്‌തിയാൽ കഴിയാത്ത പല കാര്യങ്ങളും ചെയ്യാൻ ക്രിസ്‌തീയ ഭാര്യയെ ദൈവാത്മാവ്‌ സഹായിക്കും. ഒരു സാഹചര്യം നോക്കുക. ഭർത്താവിന്റെ മോശമായ പെരുമാറ്റം, അതേ നാണയത്തിൽ തിരിച്ചടിക്കാൻ ഭാര്യയെ പ്രേരിപ്പിച്ചേക്കാം. എന്നാൽ ക്രിസ്‌ത്യാനികളോട്‌ ബൈബിൾ ഇങ്ങനെ പറയുന്നു: “ആർക്കും തിന്മയ്‌ക്കു പകരം തിന്മ ചെയ്യരുത്‌. . . . ‘യഹോവ അരുളിച്ചെയ്യുന്നു: പ്രതികാരം എനിക്കുള്ളത്‌; ഞാൻ പകരം ചെയ്യും.’” (റോമ. 12:17-19) 1 തെസ്സലോനിക്യർ 5:15-ഉം നമ്മോടു പറയുന്നു: “നിങ്ങളിൽ ആരും തിന്മയ്‌ക്കു പകരം തിന്മ ചെയ്യരുത്‌; നിങ്ങൾ തമ്മിൽത്തമ്മിലും കൂടാതെ മറ്റുള്ളവർക്കും സദാ നന്മ ചെയ്യുവിൻ.” ഈ ബുദ്ധിയുപദേശം ബാധകമാക്കാൻ പ്രയാസമാണെന്നു നിങ്ങൾക്കു തോന്നിയേക്കാം. എന്നാൽ യഹോവയുടെ പരിശുദ്ധാത്മാവിന്റെ പിന്തുണയുണ്ടെങ്കിൽ, സ്വന്തം ശക്തിയാൽ അസാധ്യമായ കാര്യങ്ങൾ സാധ്യമാകും. നമ്മുടെ കുറവുകൾ പരിഹരിക്കാൻ ദൈവത്തിന്റെ പരിശുദ്ധാത്മാവിനുവേണ്ടി പ്രാർഥിക്കേണ്ടത്‌ എത്ര പ്രധാനമാണ്‌!

10. തന്നോടു മോശമായി പെരുമാറിയവരോട്‌ യേശു എങ്ങനെ ഇടപെട്ടു?

¹⁰ തന്നോടു മോശമായി പെരുമാറിയവരോട്‌ യേശു ഇടപെട്ടവിധം തികച്ചും ശ്രദ്ധേയമാണ്‌. “അധിക്ഷേപിക്കപ്പെട്ടപ്പോൾ പകരം അധിക്ഷേപിക്കുകയോ കഷ്ടത സഹിച്ചപ്പോൾ ഭീഷണിപ്പെടുത്തുകയോ ചെയ്യാതെ, നീതിയോടെ വിധിക്കുന്നവന്റെ പക്കൽ അവൻ തന്നെത്തന്നെ ഭരമേൽപ്പിക്കുകയത്രേ ചെയ്‌തത്‌” എന്ന്‌ 1 പത്രോസ്‌ 2:23-ൽ അവനെക്കുറിച്ച്‌ നാം വായിക്കുന്നു. നാം ആ നല്ല മാതൃക അനുകരിക്കണം. മറ്റുള്ളവരുടെ മോശമായ പെരുമാറ്റം നമ്മെ പ്രകോപിപ്പിക്കരുത്‌. “ദ്രോഹത്തിനു ദ്രോഹവും അധിക്ഷേപത്തിന്‌ അധിക്ഷേപവും പകരം നൽകുന്നവരായിരിക്കാതെ” “മനസ്സലിവും താഴ്‌മയും ഉള്ളവരായി”രിക്കാൻ ക്രിസ്‌ത്യാനികളോട്‌ പറഞ്ഞിരിക്കുന്നു.—1 പത്രോ. 3:8, 9.

അഭിപ്രായ സ്വാതന്ത്ര്യം ഇല്ലാത്തവരോ?

11. ചില സ്‌ത്രീകൾക്ക്‌ എന്തിനുള്ള മഹത്തായ പദവിയുണ്ട്‌?

¹¹ ഭർത്താവിന്റെ ശിരഃസ്ഥാനത്തിനു കീഴ്‌പെടണം എന്നതിന്റെ അർഥം കുടുംബത്തോടു ബന്ധപ്പെട്ടോ അല്ലാതെയോ ഉള്ള കാര്യങ്ങളിൽ ഭാര്യയുടെ അഭിപ്രായത്തിനു വിലയില്ലെന്നാണോ? ഒരിക്കലുമല്ല. പുരുഷന്മാർക്കും അതുപോലെ സ്‌ത്രീകൾക്കും യഹോവ പല പദവികളും നൽകിയിരിക്കുന്നു. ക്രിസ്‌തു ഭൂമിയെ ഭരിക്കുമ്പോൾ അവനോടൊപ്പം സ്വർഗത്തിൽ രാജാക്കന്മാരും പുരോഹിതന്മാരുമായി സേവിക്കാൻ 1,44,000 പേർക്കു ലഭിച്ചിരിക്കുന്ന പദവിയെക്കുറിച്ച്‌ ചിന്തിച്ചുനോക്കുക. ആ പദവി ലഭിച്ചവരിൽ സ്‌ത്രീകളുമുണ്ട്‌. (ഗലാ. 3:26-29) അതെ, തന്റെ ഹിതം നടപ്പാക്കുന്നതിൽ യഹോവ സ്‌ത്രീകളെ ഉപയോഗിക്കുന്നു, അവർക്ക്‌ അതിൽ സജീവമായ പങ്കുണ്ട്‌.

12, 13. സ്‌ത്രീകൾ പ്രവചിച്ചിരുന്നു എന്നതിന്‌ എന്തു തെളിവുണ്ട്‌?

¹² ഉദാഹരണത്തിന്‌, ബൈബിൾക്കാലങ്ങളിൽ ചില സ്‌ത്രീകൾ പ്രവചിച്ചിരുന്നു. യോവേൽ 2:28, 29-ൽ ഇങ്ങനെ മുൻകൂട്ടിപ്പറഞ്ഞു: “ഞാൻ സകലജഡത്തിന്മേലും എന്റെ ആത്മാവിനെ പകരും; നിങ്ങളുടെ പുത്രന്മാരും പുത്രിമാരും പ്രവചിക്കും; . . . ദാസന്മാരുടെ മേലും ദാസിമാരുടെമേലും കൂടെ ഞാൻ ആ നാളുകളിൽ എന്റെ ആത്മാവിനെ പകരും.”

¹³ എ.ഡി. 33-ലെ പെന്തെക്കൊസ്‌ത്‌ ദിവസം യെരുശലേമിലെ മാളികമുറിയിൽ കൂടിവന്ന, യേശുവിന്റെ 120 ശിഷ്യന്മാരുടെ കൂട്ടത്തിൽ സ്‌ത്രീകളും പുരുഷന്മാരും ഉണ്ടായിരുന്നു. അവരുടെ എല്ലാവരുടെയുംമേൽ ദൈവാത്മാവ്‌ പകരപ്പെട്ടു. അതുകൊണ്ടാണ്‌, പ്രവാചകനായ യോവേലിന്റെ വാക്കുകൾ പത്രോസിന്‌ ആ സ്‌ത്രീകൾക്കും പുരുഷന്മാർക്കും ബാധകമാക്കാനായത്‌. അവൻ പറഞ്ഞു: “ഇത്‌ വാസ്‌തവത്തിൽ, യോവേൽ പ്രവാചകൻ മുഖാന്തരം പറഞ്ഞിട്ടുള്ളതത്രേ. ‘ദൈവം അരുളിച്ചെയ്യുന്നു: “അന്ത്യകാലത്തു ഞാൻ സകലതരം ആളുകളുടെമേലും എന്റെ ആത്മാവിനെ പകരും. നിങ്ങളുടെ പുത്രന്മാരും പുത്രിമാരും പ്രവചിക്കും. . . . അന്നാളിൽ എന്റെ ദാസന്മാരുടെമേലും എന്റെ ദാസിമാരുടെമേലും ഞാൻ എന്റെ ആത്മാവിനെ പകരും; അവരും പ്രവചിക്കും.”’”—പ്രവൃ. 2:16-18.

14. ഒന്നാം നൂറ്റാണ്ടിൽ ക്രിസ്‌ത്യാനിത്വത്തിന്റെ വ്യാപനത്തിൽ സ്‌ത്രീകൾ എന്തു പങ്കുവഹിച്ചു?

¹⁴ ഒന്നാം നൂറ്റാണ്ടിൽ ക്രിസ്‌ത്യാനിത്വത്തിന്റെ വ്യാപനത്തിൽ സ്‌ത്രീകൾ വലിയൊരു പങ്കുവഹിച്ചു. അവർ ദൈവരാജ്യത്തെക്കുറിച്ച്‌ പ്രസംഗിക്കുകയും പ്രസംഗപ്രവർത്തനത്തോടു ബന്ധപ്പെട്ട മറ്റു കാര്യങ്ങൾ ചെയ്യുകയും ചെയ്‌തു. (ലൂക്കോ. 8:1-3) ഉദാഹരണത്തിന്‌, ഫേബയെ “കെംക്രെയ സഭയിലെ ശുശ്രൂഷക” എന്ന്‌ പൗലോസ്‌ വിശേഷിപ്പിച്ചു. സഹവിശ്വാസികൾക്ക്‌ സ്‌നേഹാശംസകൾ അറിയിച്ച കൂട്ടത്തിൽ പൗലോസ്‌ വിശ്വസ്‌തരായ ചില സ്‌ത്രീകളുടെ പേരും എടുത്തു പറഞ്ഞു. ‘കർത്താവിൽ കഠിനാധ്വാനം ചെയ്‌ത സ്‌ത്രീകളായ ത്രുഫൈനയും ത്രുഫോസയും’ അക്കൂട്ടത്തിൽപ്പെടും. “കർത്താവിൽ വളരെ അധ്വാനിച്ചവളായ നമ്മുടെ പ്രിയ പെർസിസിനെ സ്‌നേഹം അറിയിക്കുക” എന്നും പൗലോസ്‌ എഴുതി.—റോമ. 16:1, 12.

15. ഇക്കാലത്ത്‌ ക്രിസ്‌ത്യാനിത്വത്തിന്റെ വ്യാപനത്തിൽ സ്‌ത്രീകൾ എന്തു പങ്കുവഹിക്കുന്നു?

¹⁵ ഇന്ന്‌ ലോകമെമ്പാടും ദൈവരാജ്യ സുവാർത്ത ഘോഷിക്കുന്ന എഴുപതുലക്ഷത്തിലധികംവരുന്ന സാക്ഷികളിൽ വലിയൊരു പങ്കും പല പ്രായക്കാരായ സ്‌ത്രീകളാണ്‌. (മത്താ. 24:14) അവരിൽ പലരും മുഴുസമയശുശ്രൂഷകരാണ്‌; അതിൽ ചിലർ മിഷനറിമാരോ ബെഥേൽ അംഗങ്ങളോ ആയി സേവിക്കുന്നു. സങ്കീർത്തനക്കാരനായ ദാവീദ്‌ ഇങ്ങനെ പാടി: “കർത്താവു ആജ്ഞ കൊടുക്കുന്നു; സുവാർത്താദൂതികൾ വലിയോരു ഗണമാകുന്നു.” (സങ്കീ. 68:11) ഈ വാക്കുകൾ ഇന്ന്‌ എത്ര സത്യമാണ്‌! സുവാർത്ത പ്രസംഗിക്കുന്നതിലും തന്റെ ഉദ്ദേശ്യം നിവർത്തിക്കുന്നതിലും സ്‌ത്രീകൾ വഹിക്കുന്ന പങ്കിനെ യഹോവ അതിയായി വിലമതിക്കുന്നു. ക്രിസ്‌തീയ സ്‌ത്രീകൾ കീഴടങ്ങിയിരിക്കണം എന്ന്‌ ആവശ്യപ്പെടുമ്പോൾ, അവർ മിണ്ടാതിരിക്കണമെന്നല്ല ദൈവം അർഥമാക്കുന്നത്‌ എന്നല്ലേ ഇതെല്ലാം കാണിക്കുന്നത്‌?

അഭിപ്രായം തുറന്നുപറഞ്ഞ രണ്ടു സ്‌ത്രീകൾ

16, 17. ഭാര്യമാർക്ക്‌ അഭിപ്രായ സ്വാതന്ത്ര്യമുണ്ടെന്ന്‌ സാറായുടെ ദൃഷ്ടാന്തം തെളിയിക്കുന്നത്‌ എങ്ങനെ?

¹⁶ യഹോവ സ്‌ത്രീകൾക്ക്‌ പല പദവികളും നൽകുന്നസ്ഥിതിക്ക്‌ ഗൗരവമേറിയ തീരുമാനങ്ങളെടുക്കുന്നതിനുമുമ്പ്‌ ഭർത്താവ്‌ ഭാര്യയുടെ അഭിപ്രായം ആരായേണ്ടതല്ലേ? അങ്ങനെ ചെയ്യുന്നെങ്കിൽ അത്‌ വിവേകത്തിന്റെ ലക്ഷണമാണ്‌. ഭർത്താവ്‌ ആവശ്യപ്പെടാതെതന്നെ മുൻകൈയെടുത്തു പ്രവർത്തിക്കുകയോ തങ്ങളുടെ അഭിപ്രായം പറയുകയോ ചെയ്‌ത ഭാര്യമാരെക്കുറിച്ച്‌ തിരുവെഴുത്തുകൾ പരാമർശിക്കുന്നുണ്ട്‌. അത്തരത്തിലുള്ള രണ്ടുപേരുടെ മാതൃക നമുക്കിപ്പോൾ പരിശോധിക്കാം.

¹⁷ ഗോത്രപിതാവായ അബ്രാഹാമിന്റെ ഭാര്യ സാറായുടേതാണ്‌ ഒരു ദൃഷ്ടാന്തം. അബ്രാഹാമിന്റെ രണ്ടാം ഭാര്യയുടെയും മകന്റെയും ആദരവില്ലാത്ത പെരുമാറ്റംനിമിത്തം അവരെ വീട്ടിൽനിന്നു പറഞ്ഞുവിടാൻ സാറാ അബ്രാഹാമിനോട്‌ ആവശ്യപ്പെട്ടുകൊണ്ടിരുന്നു. “ഈ കാര്യം അബ്രാഹാമിന്നു അനിഷ്ടമായി.” എന്നാൽ യഹോവ അതിനെ അങ്ങനെയല്ല വീക്ഷിച്ചത്‌. അവൻ അബ്രാഹാമിനോട്‌, “ബാലന്റെ നിമിത്തവും ദാസിയുടെ നിമിത്തവും നിനക്കു അനിഷ്ടം തോന്നരുതു; സാറാ നിന്നോടു പറഞ്ഞതിലൊക്കെയും അവളുടെ വാക്കു കേൾക്ക” എന്നു കൽപ്പിച്ചു. (ഉല്‌പ. 21:8-12) അബ്രാഹാം യഹോവ പറഞ്ഞത്‌ അനുസരിച്ചു; സാറായുടെ വാക്കുകേട്ട്‌, അവൾ ആവശ്യപ്പെട്ടതുപോലെ ചെയ്‌തു.

18. അബീഗയിൽ മുൻകൈയെടുത്തു പ്രവർത്തിച്ചത്‌ എങ്ങനെ?

¹⁸ നാബാലിന്റെ ഭാര്യയായ അബീഗയിലിന്റേതാണ്‌ മറ്റൊരു ദൃഷ്ടാന്തം. അസൂയാലുവായിരുന്ന ശൗൽ രാജാവിന്റെ അടുത്തുനിന്ന്‌ ഓടിപ്പോന്ന ദാവീദ്‌ നാബാലിന്റെ ആട്ടിൻപറ്റങ്ങൾക്കരികെ പാളയമടിച്ചിരിക്കുകയായിരുന്നു. ധനികനായ നാബാലിന്റെ വസ്‌തുവകകൾ കൊള്ളയടിക്കുന്നതിനുപകരം ദാവീദും അവന്റെ ആളുകളും അവ സംരക്ഷിക്കുകയാണു ചെയ്‌തത്‌. എന്നാൽ നാബാൽ “നിഷ്‌ഠുരനും ദുഷ്‌കർമ്മിയും ആയിരുന്നു.” ഒരിക്കൽ ദാവീദിന്റെ ആളുകൾ ഭക്ഷണസാധനങ്ങൾ ചോദിച്ചുകൊണ്ട്‌ നാബാലിന്റെ അടുക്കൽച്ചെന്നു. പക്ഷേ, ‘ദുസ്സ്വഭാവിയും ഭോഷനും’ ആയ നാബാൽ അവരെ ‘ശകാരിച്ച്‌ അയയ്‌ക്കുക’യാണുണ്ടായത്‌. സംഭവം അറിഞ്ഞപ്പോൾ അബീഗയിൽ എന്തു ചെയ്‌തു? നാബാലിനോടു ചോദിക്കാതെതന്നെ അവൾ ഉടനെ “ഇരുനൂറു അപ്പവും രണ്ടു തുരുത്തി വീഞ്ഞും പാകം ചെയ്‌ത അഞ്ചു ആടും അഞ്ചു പറ മലരും നൂറു ഉണക്ക മുന്തിരിക്കുലയും ഇരുനൂറു അത്തിയടയും എടുത്തു”കൊണ്ടുപോയി ദാവീദിനും അവന്റെ ആളുകൾക്കും കൊടുത്തു. അബീഗയിൽ ചെയ്‌തത്‌ ശരിയായിരുന്നോ? “യഹോവ നാബാലിനെ ദണ്ഡിപ്പിച്ചു, അവൻ മരിച്ചുപോയി” എന്ന്‌ വിവരണം പറയുന്നു. ദാവീദ്‌ പിന്നീട്‌ അബീഗയിലിനെ വിവാഹംകഴിച്ചു.—1 ശമൂ. 25:3, 14-19, 23-25, 38-42.

‘പ്രശംസ നേടുന്ന സ്‌ത്രീ’

19, 20. സ്‌ത്രീയെ യഥാർഥത്തിൽ പ്രശംസാർഹയാക്കുന്നത്‌ എന്താണ്‌?

¹⁹ യഹോവയ്‌ക്ക്‌ ഇഷ്ടമുള്ള വിധത്തിൽ കാര്യങ്ങൾ ചെയ്യുന്ന ഭാര്യമാരെ ബൈബിൾ അഭിനന്ദിക്കുന്നു. “സാമർത്ഥ്യമുള്ള ഭാര്യയെ” പ്രശംസിച്ചുകൊണ്ട്‌ സദൃശവാക്യങ്ങളുടെ പുസ്‌തകം ഇങ്ങനെ പറയുന്നു: “അവളുടെ വില മുത്തുകളിലും ഏറും. ഭർത്താവിന്റെ ഹൃദയം അവളെ വിശ്വസിക്കുന്നു; അവന്റെ ലാഭത്തിന്നു ഒരു കുറവുമില്ല. അവൾ തന്റെ ആയുഷ്‌കാലമൊക്കെയും അവന്നു തിന്മയല്ല നന്മ തന്നേ ചെയ്യുന്നു. അവൾ ജ്ഞാനത്തോടെ വായ്‌ തുറക്കുന്നു; ദയയുള്ള ഉപദേശം അവളുടെ നാവിന്മേൽ ഉണ്ടു. വീട്ടുകാരുടെ പെരുമാറ്റം അവൾ സൂക്ഷിച്ചുനോക്കുന്നു; വെറുതെ ഇരുന്നു അഹോവൃത്തി കഴിക്കുന്നില്ല. അവളുടെ മക്കൾ എഴുന്നേറ്റു അവളെ ഭാഗ്യവതി എന്നു പുകഴ്‌ത്തുന്നു; അവളുടെ ഭർത്താവും അവളെ പ്രശംസി”ക്കുന്നു.—സദൃ. 31:10-12, 26-28.

²⁰ സ്‌ത്രീയെ യഥാർഥത്തിൽ പ്രശംസാർഹയാക്കുന്നത്‌ എന്താണ്‌? “ലാവണ്യം വ്യാജവും സൗന്ദര്യം വ്യർത്ഥവും ആകുന്നു; യഹോവാഭക്തിയുള്ള സ്‌ത്രീയോ പ്രശംസിക്കപ്പെടും” എന്ന്‌ സദൃശവാക്യങ്ങൾ 31:30 പറയുന്നു. യഹോവാഭക്തിയിൽ, ശിരഃസ്ഥാനം എന്ന ദിവ്യക്രമീകരണത്തിനു മനസ്സോടെ കീഴ്‌പെടുന്നത്‌, അതായത്‌, ‘ഏതു പുരുഷന്റെയും ശിരസ്സ്‌ ക്രിസ്‌തുവും’ ‘ക്രിസ്‌തുവിന്റെ ശിരസ്സ്‌ ദൈവവും’ ആയിരിക്കുന്നതുപോലെ ‘സ്‌ത്രീയുടെ ശിരസ്സ്‌ പുരുഷനാണെന്ന്‌’ അംഗീകരിക്കുന്നത്‌ ഉൾപ്പെടുന്നു.—1 കൊരി. 11:3.

വിവാഹം—ഒരു ദിവ്യസമ്മാനം

21, 22. (എ) വിവാഹിതരായ ക്രിസ്‌ത്യാനികൾക്ക്‌ ദൈവത്തോടു നന്ദിയുള്ളവരായിരിക്കാൻ എന്തെല്ലാം കാരണങ്ങളുണ്ട്‌? (ബി) യഹോവ വെച്ചിരിക്കുന്ന അധികാരവും ശിരഃസ്ഥാനവും നാം മാനിക്കേണ്ടത്‌ എന്തുകൊണ്ട്‌? (17-ാം പേജിലെ ചതുരം കാണുക.)

²¹ വിവാഹിതരായ ക്രിസ്‌ത്യാനികൾക്ക്‌ ദൈവത്തിനു നന്ദിപറയാൻ എത്രയോ കാരണങ്ങളുണ്ട്‌! ജീവിതപാതയിൽ സന്തോഷത്തോടെ കൈകോർത്തുനീങ്ങാൻ അവർക്കാകും. ഭാര്യക്കും ഭർത്താവിനും ഒന്നുചേർന്ന്‌ ദൈവത്തോടൊപ്പം നടക്കാനുള്ള അമൂല്യമായ അവസരമാണ്‌ വിവാഹത്തിലൂടെ ലഭിക്കുന്നത്‌. അതുകൊണ്ട്‌ ദൈവം നൽകിയ വിവാഹമെന്ന ഈ അമൂല്യ സമ്മാനത്തിന്‌ അവർ ദൈവത്തോട്‌ നന്ദിയുള്ളവരായിരിക്കണം. (രൂത്ത്‌ 1:9; മീഖാ 6:8) വൈവാഹിക സന്തുഷ്ടിക്ക്‌ യഥാർഥത്തിൽ എന്താണ്‌ ആവശ്യമായിരിക്കുന്നതെന്ന്‌ വിവാഹത്തിന്റെ കാരണഭൂതനായ യഹോവയ്‌ക്കറിയാം. അതുകൊണ്ട്‌ എപ്പോഴും അവൻ പറയുന്നതുപോലെ ചെയ്യുന്നെങ്കിൽ, പ്രശ്‌നപൂരിതമായ ഈ ലോകത്തിലും “യഹോവയിങ്കലെ സന്തോഷം നിങ്ങളുടെ ബലം” ആയിരിക്കും.—നെഹെ. 8:10.

²² ഭാര്യയെ ജീവനുതുല്യം സ്‌നേഹിക്കുന്ന ഒരു ക്രിസ്‌തീയ ഭർത്താവ്‌ ആർദ്രതയോടും പരിഗണനയോടും കൂടെയായിരിക്കും ശിരഃസ്ഥാനം പ്രയോഗിക്കുക. അദ്ദേഹത്തെ പിന്തുണയ്‌ക്കുകയും വളരെയേറെ ബഹുമാനിക്കുകയും ചെയ്യുന്ന ഭാര്യ അദ്ദേഹത്തിന്റെ സ്‌നേഹം നേടിയെടുക്കും. എല്ലാറ്റിലും ഉപരി, എല്ലാ സ്‌തുതിക്കും അർഹനായ യഹോവയാം ദൈവത്തിന്‌ മഹത്ത്വം കരേറ്റുന്നതായിരിക്കും ആ ദാമ്പത്യം.