നിങ്ങളു​ടെ പ്രവൃത്തി അഗ്നിയെ ചെറു​ത്തു​നിൽക്കു​മോ?

“[അടിസ്ഥാ​ന​ത്തി​ന്മേൽ] താൻ എങ്ങനെ നിർമി​ക്കു​ന്നു എന്ന്‌ ഓരോ​രു​ത്ത​നും ശ്രദ്ധി​ച്ചു​കൊ​ണ്ടി​രി​ക്കട്ടെ.”—1 കൊരി​ന്ത്യർ 3:10, NW.

1. വിശ്വ​സ്‌ത​രായ ക്രിസ്‌ത്യാ​നി​കൾക്ക്‌ ഭാവി ശിഷ്യരെ കുറിച്ച്‌ എന്തു പ്രത്യാ​ശ​യാണ്‌ ഉള്ളത്‌?

ഒരു ക്രിസ്‌തീയ ദമ്പതികൾ തങ്ങളുടെ നവജാത ശിശു​വി​നെ ഉറ്റു​നോ​ക്കു​ന്നു. ഒരു രാജ്യ​പ്ര​സാ​ധകൻ തന്റെ ബൈബിൾ വിദ്യാർഥി​യു​ടെ മുഖത്ത്‌ ഉത്സാഹ​ത്തി​ന്റെ​യും താത്‌പ​ര്യ​ത്തി​ന്റെ​യും ഒരു സ്‌ഫു​രണം ദർശി​ക്കു​ന്നു. സ്റ്റേജിൽനി​ന്നു പഠിപ്പി​ക്കുന്ന ഒരു ക്രിസ്‌തീയ മൂപ്പൻ സദസ്സിൽ ഒരു പുതു താത്‌പ​ര്യ​ക്കാ​രൻ ശുഷ്‌കാ​ന്തി​യോ​ടെ ബൈബി​ളിൽ വാക്യങ്ങൾ മറിച്ചു​നോ​ക്കു​ന്നതു കാണുന്നു. യഹോ​വ​യു​ടെ ഈ വിശ്വസ്‌ത ദാസന്മാ​രു​ടെ​യെ​ല്ലാം ഹൃദയം പ്രത്യാ​ശാ​നിർഭ​ര​മാണ്‌. അവർ സ്വാഭാ​വി​ക​മാ​യും ഇങ്ങനെ ചിന്തി​ക്കു​ന്നു: ‘ഈ വ്യക്തി യഹോ​വയെ സ്‌നേ​ഹി​ക്കു​ക​യും സേവി​ക്കു​ക​യും അങ്ങനെ വിശ്വ​സ്‌ത​നാ​യി നില​കൊ​ള്ളു​ക​യും ചെയ്യു​മോ?’ തീർച്ച​യാ​യും അത്തര​മൊ​രു ഫലം യാന്ത്രി​ക​മാ​യി ഉണ്ടാകു​ന്നതല്ല. അതിന്‌ ശ്രമം ആവശ്യ​മാണ്‌.

2. പൗലൊസ്‌ അപ്പൊ​സ്‌തലൻ എബ്രായ ക്രിസ്‌ത്യാ​നി​കളെ പഠിപ്പി​ക്കൽ വേലയു​ടെ പ്രാധാ​ന്യം സംബന്ധിച്ച്‌ അനുസ്‌മ​രി​പ്പി​ച്ചത്‌ എങ്ങനെ, എന്ത്‌ ആത്മപരി​ശോ​ധന നടത്താൻ ഇതു നമ്മെ പ്രേരി​പ്പി​ച്ചേ​ക്കാം?

² ഒരു പ്രഗത്ഭ ഉപദേ​ഷ്ടാ​വായ പൗലൊസ്‌ അപ്പൊ​സ്‌തലൻ പിൻവ​രുന്ന പ്രകാരം എഴുതി​ക്കൊണ്ട്‌, പഠിപ്പിച്ച്‌ ശിഷ്യ​രാ​ക്കുന്ന വേലയു​ടെ പ്രാധാ​ന്യ​ത്തിന്‌ അടിവ​ര​യി​ടു​ന്നു: “നിങ്ങൾ ഇതി​നോ​ടകം ഉപദേ​ഷ്ടാ​ക്ക​ന്മാർ ആകേണ്ട​താ​യി​രു​ന്നു.” (എബ്രായർ 5:12, NIB) അവൻ അഭിസം​ബോ​ധന ചെയ്‌ത ക്രിസ്‌ത്യാ​നി​കൾ വിശ്വാ​സി​കൾ ആയിത്തീർന്ന​തി​നു ശേഷം കടന്നു​പോയ സമയം കണക്കി​ലെ​ടു​ക്കു​മ്പോൾ അവർ കാര്യ​മായ പുരോ​ഗതി വരുത്തി​യി​രു​ന്നില്ല. അവർ മറ്റുള്ള​വരെ പഠിപ്പി​ക്കാൻ സജ്ജർ ആയിരു​ന്നി​ല്ലെന്നു മാത്രമല്ല, സത്യത്തി​ന്റെ അടിസ്ഥാന സംഗതി​കൾപോ​ലും അവരെ അനുസ്‌മ​രി​പ്പി​ക്കേണ്ട അവസ്ഥയും ഉണ്ടായി​രു​ന്നു. ഇന്ന്‌, ഉപദേ​ഷ്ടാ​ക്ക​ന്മാർ എന്ന നിലയി​ലുള്ള നമ്മുടെ പ്രാപ്‌തി സംബന്ധിച്ച്‌ നാം എല്ലാവ​രും ഇടയ്‌ക്കി​ടെ ഒരു പരി​ശോ​ധന നടത്തി നമുക്ക്‌ എങ്ങനെ പുരോ​ഗതി വരുത്താ​നാ​കും എന്നു നോക്കു​ന്നത്‌ നല്ലതാണ്‌. ആളുക​ളു​ടെ ജീവൻ അപകട​ത്തി​ലാണ്‌. നമുക്ക്‌ എന്തു ചെയ്യാൻ കഴിയും?

3. (എ)ഒരു ക്രിസ്‌തീയ ശിഷ്യനെ ഉളവാ​ക്കുന്ന വേലയെ പൗലൊസ്‌ അപ്പൊ​സ്‌തലൻ എന്തി​നോട്‌ ഉപമിച്ചു? (ബി) ക്രിസ്‌തീയ നിർമാ​താ​ക്കൾ എന്ന നിലയിൽ, നമുക്ക്‌ ഏതു വലിയ പദവി ഉണ്ട്‌?

³ വ്യാപ​ക​മായ അർഥത്തിൽ ദൃഷ്ടാ​ന്തീ​ക​രി​ക്കവേ, ശിഷ്യ​രാ​ക്കൽ വേലയെ ഒരു കെട്ടി​ട​നിർമാണ വേല​യോട്‌ പൗലൊസ്‌ ഉപമിച്ചു. അവൻ ഇങ്ങനെ പറഞ്ഞു​കൊണ്ട്‌ തുടങ്ങി: “ഞങ്ങൾ ദൈവ​ത്തി​ന്റെ കൂട്ടു​വേ​ല​ക്കാർ ആകുന്നു; നിങ്ങൾ ദൈവ​ത്തി​ന്റെ കൃഷി​യി​ടം, ദൈവ​ത്തി​ന്റെ നിർമി​തി ആകുന്നു.” (1 കൊരി​ന്ത്യർ 3:9, NW) അതു​കൊണ്ട്‌, നാം ഒരു നിർമാ​ണ​വേ​ല​യിൽ ഏർപ്പെ​ടു​ന്നു; ക്രിസ്‌തു​ശി​ഷ്യർ ആയിത്തീ​രാൻ ആളുകളെ സഹായി​ച്ചു​കൊണ്ട്‌ അവരി​ലാണ്‌ നാം പണിയു​ന്നത്‌. “സകലത്തി​ന്റെ​യും നിർമ്മാ​താവ്‌” ആയവന്റെ കൂട്ടു​വേ​ല​ക്കാർ എന്ന നിലയി​ലാണ്‌ നാം അപ്രകാ​രം ചെയ്യു​ന്നത്‌. (എബ്രായർ 3:4, പി.ഒ.സി. ബൈബിൾ) അത്‌ എന്തൊരു പദവി​യാണ്‌! നമ്മുടെ വേലയിൽ കൂടുതൽ വിദഗ്‌ധർ ആയിത്തീ​രാൻ കൊരി​ന്ത്യർക്കുള്ള പൗലൊ​സി​ന്റെ നിശ്വസ്‌ത ബുദ്ധ്യു​പ​ദേശം നമ്മെ എങ്ങനെ സഹായി​ക്കു​മെന്നു നോക്കാം. നാം വിശേ​ഷി​ച്ചും നമ്മുടെ “പഠിപ്പി​ക്കൽ കല”യിൽ ആയിരി​ക്കും ശ്രദ്ധ കേന്ദ്രീ​ക​രി​ക്കുക.—2 തിമൊ​ഥെ​യൊസ്‌ 4:2, NW.

ശരിയായ അടിസ്ഥാ​നം ഇടൽ

4. (എ)ക്രിസ്‌തീയ നിർമാണ വേലയിൽ പൗലൊ​സി​ന്റെ പങ്ക്‌ എന്തായി​രു​ന്നു? (ബി) യേശു​വി​നും അവന്റെ ശ്രോ​താ​ക്കൾക്കും നല്ല അടിസ്ഥാ​ന​ത്തി​ന്റെ പ്രാധാ​ന്യം അറിയാ​മാ​യി​രു​ന്നു എന്നു പറയാ​വു​ന്നത്‌ എന്തു​കൊണ്ട്‌?

⁴ ഒരു കെട്ടിടം ഉറപ്പു​ള്ള​തും നിലനിൽക്കു​ന്ന​തും ആയിരി​ക്ക​ണ​മെ​ങ്കിൽ, അതിന്‌ നല്ല അടിസ്ഥാ​നം വേണം. അതു​കൊണ്ട്‌ പൗലൊസ്‌ എഴുതി: “എനിക്കു ലഭിച്ച ദൈവ​കൃ​പെക്കു ഒത്തവണ്ണം ഞാൻ ജ്ഞാനമു​ള്ളോ​രു പ്രധാ​ന​ശി​ല്‌പി​യാ​യി അടിസ്ഥാ​നം ഇട്ടിരി​ക്കു​ന്നു.” (1 കൊരി​ന്ത്യർ 3:10) സമാന​മായ ഒരു ദൃഷ്ടാന്തം യേശു​ക്രി​സ്‌തു​വും ഉപയോ​ഗി​ക്കു​ക​യു​ണ്ടാ​യി. നിർമാ​താവ്‌ ഉറപ്പുള്ള അടിസ്ഥാ​നം തിര​ഞ്ഞെ​ടു​ത്തി​രു​ന്ന​തു​കൊണ്ട്‌ കൊടു​ങ്കാ​റ്റി​നെ അതിജീ​വിച്ച ഒരു വീടിനെ കുറിച്ച്‌ അവൻ പറഞ്ഞു. (ലൂക്കൊസ്‌ 6:47-49) അടിസ്ഥാ​ന​ത്തി​ന്റെ പ്രാധാ​ന്യം യേശു​വിന്‌ നന്നായി അറിയാ​മാ​യി​രു​ന്നു. യഹോവ ഭൂമി​യു​ടെ​തന്നെ അടിസ്ഥാനംa ഇട്ടപ്പോൾ അവൻ സന്നിഹി​തൻ ആയിരു​ന്നു. (സദൃശ​വാ​ക്യ​ങ്ങൾ 8:29-31) യേശു​വി​ന്റെ ശ്രോ​താ​ക്കൾക്കും നല്ല അടിസ്ഥാ​ന​ത്തി​ന്റെ പ്രാധാ​ന്യം അറിയാ​മാ​യി​രു​ന്നു. നല്ല അടിസ്ഥാ​നം ഉള്ള വീടു​കൾക്കു മാത്രമേ ചില​പ്പോ​ഴൊ​ക്കെ പാലസ്‌തീ​നിൽ ഉണ്ടാകു​മാ​യി​രുന്ന വെള്ള​പ്പൊ​ക്ക​ത്തെ​യും ഭൂമി​കു​ലു​ക്ക​ത്തെ​യും അതിജീ​വി​ക്കാൻ ആകുമാ​യി​രു​ന്നു​ള്ളൂ. എന്നാൽ പൗലൊ​സി​ന്റെ മനസ്സിൽ ഉണ്ടായി​രുന്ന അടിസ്ഥാ​നം എന്തായി​രു​ന്നു?

5. ക്രിസ്‌തീയ സഭയുടെ അടിസ്ഥാ​നം ആരാണ്‌, ഇത്‌ എങ്ങനെ മുൻകൂ​ട്ടി പറയ​പ്പെ​ട്ടി​രു​ന്നു?

⁵ പൗലൊസ്‌ എഴുതി: “യേശു​ക്രി​സ്‌തു എന്ന ഇട്ടിരി​ക്കുന്ന അടിസ്ഥാ​ന​മ​ല്ലാ​തെ മറെറാ​ന്നു ഇടുവാൻ ആർക്കും കഴിക​യില്ല.” (1 കൊരി​ന്ത്യർ 3:11) യേശു​വി​നെ ഒരു അടിസ്ഥാ​ന​ത്തോട്‌ ഉപമി​ക്കു​ന്നത്‌ ഇത്‌ ആദ്യമാ​യി അല്ലായി​രു​ന്നു. വാസ്‌ത​വ​ത്തിൽ, യെശയ്യാ​വു 28:16 ഇങ്ങനെ മുൻകൂ​ട്ടി പറഞ്ഞി​രു​ന്നു: “യഹോ​വ​യായ കർത്താവു ഇപ്രകാ​രം അരുളി​ച്ചെ​യ്യു​ന്നു: ഇതാ, ഞാൻ സീയോ​നിൽ ഉറപ്പുള്ള അടിസ്ഥാ​ന​മാ​യി​ട്ടു ശോധ​ന​ചെയ്‌ത കല്ലും വില​യേ​റിയ മൂലക്ക​ല്ലും ആയി ഒരു അടിസ്ഥാ​ന​ക്കല്ലു ഇട്ടിരി​ക്കു​ന്നു.” തന്റെ പുത്രൻ ക്രിസ്‌തീയ സഭയുടെ അടിസ്ഥാ​നം ആയിത്തീ​രു​മെന്ന്‌ യഹോവ വളരെ മുമ്പു​തന്നെ ഉദ്ദേശി​ച്ചി​രു​ന്നു.—സങ്കീർത്തനം 118:22; എഫെസ്യർ 2:19-22; 1 പത്രൊസ്‌ 2:4-6.

6. പൗലൊസ്‌ കൊരി​ന്ത്യ ക്രിസ്‌ത്യാ​നി​ക​ളിൽ ശരിയായ അടിസ്ഥാ​നം ഇട്ടത്‌ എങ്ങനെ?

⁶ വ്യക്തി​പ​ര​മാ​യി ഓരോ ക്രിസ്‌ത്യാ​നി​യു​ടെ​യും അടിസ്ഥാ​നം എന്താണ്‌? പൗലൊസ്‌ പറഞ്ഞതു​പോ​ലെ, ദൈവ​വ​ച​ന​ത്തിൽ വ്യക്തമാ​ക്കി​യി​രി​ക്കുന്ന യേശു​ക്രി​സ്‌തു എന്ന അടിസ്ഥാ​നം അല്ലാതെ സത്യ ക്രിസ്‌ത്യാ​നിക്ക്‌ മറ്റൊരു അടിസ്ഥാ​ന​വും ഇല്ല. പൗലൊസ്‌ നിശ്ചയ​മാ​യും അത്തരം ഒരു അടിസ്ഥാ​നം ഇട്ടു. തത്ത്വചി​ന്ത​യ്‌ക്കു പ്രാമു​ഖ്യത ഉണ്ടായി​രുന്ന കൊരി​ന്തിൽ, ലൗകിക ജ്ഞാനത്താൽ ആളുക​ളിൽ മതിപ്പു​ള​വാ​ക്കാൻ അവൻ ശ്രമി​ച്ചില്ല. മറിച്ച്‌, “ദണ്ഡനസ്‌തം​ഭ​ത്തിൽ തറയ്‌ക്ക​പ്പെട്ട ക്രിസ്‌തു​വി​നെ” കുറി​ച്ചാ​യി​രു​ന്നു പൗലൊസ്‌ പ്രസം​ഗി​ച്ചത്‌; ജനതകൾക്ക്‌ അതു “ഭോഷത്തം” ആയിരു​ന്നു. (1 കൊരി​ന്ത്യർ 1:23) യഹോ​വ​യു​ടെ ഉദ്ദേശ്യ​ങ്ങ​ളിൽ യേശു​വി​നു കേന്ദ്ര​സ്ഥാ​ന​മാണ്‌ ഉള്ളതെന്ന്‌ പൗലൊസ്‌ പഠിപ്പി​ച്ചു.—2 കൊരി​ന്ത്യർ 1:20; കൊ​ലൊ​സ്സ്യർ 2:2, 3.

7. പൗലൊസ്‌ തന്നെത്തന്നെ “ജ്ഞാനമു​ള്ളോ​രു പ്രധാ​ന​ശി​ല്‌പി” എന്നു പരാമർശി​ച്ച​തിൽനിന്ന്‌ നമുക്ക്‌ എന്തു മനസ്സി​ലാ​ക്കാം?

⁷ താൻ “ജ്ഞാനമു​ള്ളോ​രു പ്രധാ​ന​ശി​ല്‌പി​യാ​യി” അത്തരം പഠിപ്പി​ക്കൽ നിർവ​ഹി​ച്ചു എന്ന്‌ പൗലൊസ്‌ എഴുതി. അതിലൂ​ടെ അവൻ ആത്മപ്ര​ശംസ നടത്തുക ആയിരു​ന്നില്ല. യഹോവ തന്നെ ഭരമേൽപ്പി​ച്ചി​രി​ക്കുന്ന വേല സംഘടി​പ്പി​ക്കുക അല്ലെങ്കിൽ അതിനു നേതൃ​ത്വം നൽകുക എന്ന മഹത്തായ ദാനത്തെ അവൻ അംഗീ​ക​രി​ച്ചു​പ​റഞ്ഞു എന്നു മാത്രം. (1 കൊരി​ന്ത്യർ 12:28) ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾക്കു നൽകപ്പെട്ട അത്ഭുത​വ​രങ്ങൾ ഇന്നു നമുക്ക്‌ ഇല്ല എന്നതു ശരിതന്നെ. നാം സമർഥ​രായ ഉപദേ​ഷ്ടാ​ക്ക​ളാണ്‌ എന്ന ചിന്തയും നമുക്ക്‌ ഇല്ലായി​രി​ക്കാം. എന്നാൽ ഒരു പ്രധാ​ന​പ്പെട്ട അർഥത്തിൽ നാം അങ്ങനെ​യാണ്‌. ഇതു പരിചി​ന്തി​ക്കുക: നമ്മെ സഹായി​ക്കാ​നാ​യി യഹോവ നമുക്കു പരിശു​ദ്ധാ​ത്മാ​വി​നെ നൽകുന്നു. (ലൂക്കൊസ്‌ 12:11, 12 താരത​മ്യം ചെയ്യുക.) നമുക്കു യഹോ​വ​യോ​ടു സ്‌നേഹം ഉണ്ട്‌, അവന്റെ വചനത്തി​ലെ അടിസ്ഥാന പഠിപ്പി​ക്ക​ലു​കളെ കുറിച്ചു പരിജ്ഞാ​ന​വും ഉണ്ട്‌. മറ്റുള്ള​വരെ പഠിപ്പി​ക്കു​മ്പോൾ ഉപയോ​ഗി​ക്കാ​വുന്ന മഹത്തായ ദാനങ്ങ​ളാണ്‌ അവ. ശരിയായ അടിസ്ഥാ​നം ഇടുന്ന​തിന്‌ അവ ഉപയോ​ഗി​ക്കാൻ നമുക്കു ദൃഢനി​ശ്ചയം ചെയ്യാം.

8. ഭാവി ശിഷ്യ​രിൽ നാം ക്രിസ്‌തു​വി​നെ അടിസ്ഥാ​ന​മാ​യി ഇടുന്നത്‌ എങ്ങനെ?

⁸ നാം ക്രിസ്‌തു​വി​നെ അടിസ്ഥാ​ന​മാ​യി ഇടു​മ്പോൾ, നാം അവനെ പുൽത്തൊ​ട്ടി​യി​ലെ നിസ്സഹാ​യ​നായ ഒരു ശിശു​വോ ഒരു ത്രിത്വ​ത്തി​ലെ യഹോ​വ​യ്‌ക്കു തുല്യ​നായ ഒരുവ​നോ ആയിട്ടല്ല അവതരി​പ്പി​ക്കു​ന്നത്‌. തിരു​വെ​ഴു​ത്തു വിരു​ദ്ധ​മായ അത്തരം ആശയങ്ങൾ വ്യാജ ക്രിസ്‌ത്യാ​നി​കൾക്കാണ്‌ അടിസ്ഥാ​ന​മാ​യി വർത്തി​ക്കു​ന്നത്‌. മറിച്ച്‌, അവൻ ജീവി​ച്ചി​രു​ന്നി​ട്ടു​ള്ള​തി​ലേ​ക്കും ഏറ്റവും മഹാൻ ആയിരു​ന്നു എന്നും നമുക്കു​വേണ്ടി പൂർണ​ത​യുള്ള തന്റെ ജീവൻ അർപ്പിച്ചു എന്നും ഇപ്പോൾ സ്വർഗ​ത്തിൽ യഹോ​വ​യു​ടെ നിയമിത രാജാവ്‌ ആയി വാഴു​ക​യാണ്‌ എന്നും നാം പഠിപ്പി​ക്കു​ന്നു. (റോമർ 5:8; വെളി​പ്പാ​ടു 11:15) കൂടാതെ, യേശു​വി​ന്റെ കാലടി​ക​ളിൽ നടക്കാ​നും അവന്റെ ഗുണങ്ങൾ അനുക​രി​ക്കാ​നും നാം നമ്മുടെ വിദ്യാർഥി​കളെ പ്രചോ​ദി​പ്പി​ക്കാൻ ശ്രമി​ക്കു​ന്നു. (1 പത്രൊസ്‌ 2:21) ശുശ്രൂ​ഷ​യോ​ടുള്ള യേശു​വി​ന്റെ തീക്ഷ്‌ണത, താഴേ​ക്കി​ട​യി​ലു​ള്ള​വ​രോ​ടും പീഡി​ത​രോ​ടു​മുള്ള അവന്റെ അനുകമ്പ, കുറ്റഭാ​ര​ത്താൽ ഞരങ്ങുന്ന പാപി​ക​ളോ​ടുള്ള അവന്റെ കരുണ, പരി​ശോ​ധ​ന​കൾക്കു മുമ്പിൽ അവൻ പ്രകട​മാ​ക്കിയ അചഞ്ചല​മായ ധൈര്യം എന്നിവ​യൊ​ക്കെ അവരെ ആഴത്തിൽ പ്രചോ​ദി​പ്പി​ക്കാൻ നാം ആഗ്രഹി​ക്കു​ന്നു. സത്യമാ​യും, യേശു മഹത്തായ ഒരു അടിസ്ഥാ​നം​തന്നെ. എന്നാൽ അടുത്ത​താ​യി എന്താണ്‌?

ശരിയായ വസ്‌തു​ക്കൾകൊണ്ട്‌ നിർമി​ക്കൽ

9. പൗലൊസ്‌ മുഖ്യ​മാ​യും അടിസ്ഥാ​നം ഇടുന്ന​യാൾ ആയിരു​ന്നെ​ങ്കി​ലും, താൻ പഠിപ്പിച്ച സത്യം സ്വീക​രി​ച്ച​വ​രു​ടെ കാര്യ​ത്തിൽ അവന്‌ എന്തു താത്‌പ​ര്യം ഉണ്ടായി​രു​ന്നു?

⁹ പൗലൊസ്‌ എഴുതി: “ആ അടിസ്ഥാ​ന​ത്തിൻമേൽ ആരെങ്കി​ലും പൊന്നു, വെള്ളി, വില​യേ​റിയ കല്ലു, മരം, പുല്ലു, വൈ​ക്കോൽ എന്നിവ പണിയു​ന്നു എങ്കിൽ അവനവന്റെ പ്രവൃത്തി വെളി​പ്പെ​ട്ടു​വ​രും; ആ ദിവസം അതിനെ തെളി​വാ​ക്കും; അതു തീയോ​ടെ വെളി​പ്പെ​ട്ടു​വ​രും; ഓരോ​രു​ത്തന്റെ പ്രവൃത്തി ഇന്നവിധം എന്നു തീ തന്നേ ശോധന ചെയ്യും.” (1 കൊരി​ന്ത്യർ 3:12, 13) പൗലൊസ്‌ എന്താണ്‌ അർഥമാ​ക്കി​യത്‌? പശ്ചാത്തലം പരിചി​ന്തി​ക്കുക. പൗലൊസ്‌ മുഖ്യ​മാ​യും അടിസ്ഥാ​നം ഇടുന്ന​യാൾ ആയിരു​ന്നു. മിഷനറി യാത്ര​ക​ളിൽ അവൻ നഗരങ്ങൾതോ​റും യാത്ര ചെയ്‌ത്‌ ക്രിസ്‌തു​വി​നെ കുറിച്ചു കേട്ടി​ട്ടി​ല്ലാത്ത അനേക​രോ​ടു പ്രസം​ഗി​ച്ചു. (റോമർ 15:20) അവൻ പഠിപ്പിച്ച സത്യം ആളുകൾ സ്വീക​രി​ച്ച​പ്പോൾ സഭകൾ രൂപീ​ക​രി​ക്ക​പ്പെട്ടു. പൗലൊസ്‌ ഈ വിശ്വ​സ്‌ത​രു​ടെ കാര്യ​ത്തിൽ നല്ല ശ്രദ്ധ പ്രകട​മാ​ക്കി. (2 കൊരി​ന്ത്യർ 11:28, 29) എന്നിരു​ന്നാ​ലും, ശുശ്രൂഷ നിമിത്തം അവനു യാത്ര തുട​രേ​ണ്ട​തു​ണ്ടാ​യി​രു​ന്നു. അതു​കൊണ്ട്‌ കൊരി​ന്തിൽ അടിസ്ഥാ​ന​മി​ടാൻ 18 മാസങ്ങൾ ചെലവ​ഴി​ച്ച​ശേഷം അവൻ പ്രസം​ഗി​ക്കാ​നാ​യി മറ്റു നഗരങ്ങ​ളി​ലേക്ക്‌ പോയി. അപ്പോ​ഴും, താൻ തുടങ്ങി​വെച്ച വേല മറ്റുള്ളവർ എങ്ങനെ തുടരു​ന്നു എന്നറി​യാൻ അവൻ ആഴമായ താത്‌പ​ര്യം പ്രകട​മാ​ക്കി.—പ്രവൃ​ത്തി​കൾ 18:8-11; 1 കൊരി​ന്ത്യർ 3:6.

10, 11. (എ)പൗലൊസ്‌ വ്യത്യ​സ്‌ത​തരം നിർമാണ വസ്‌തു​ക്കളെ വിപരീത താരത​മ്യം ചെയ്‌തത്‌ എങ്ങനെ? (ബി) ഏതുതരം അക്ഷരീയ കെട്ടി​ടങ്ങൾ പുരാതന കൊരി​ന്തിൽ ഉണ്ടായി​രു​ന്നി​രി​ക്കാം? (സി) ഏതുതരം കെട്ടി​ട​ങ്ങ​ളാണ്‌ അഗ്നിബാ​ധയെ അതിജീ​വി​ക്കാൻ കൂടുതൽ സാധ്യത ഉള്ളത്‌, ക്രിസ്‌തീയ ശിഷ്യ​ന്മാ​രെ ഉളവാ​ക്കു​ന്ന​വർക്ക്‌ അതു നൽകുന്ന പ്രാ​യോ​ഗിക പാഠം എന്ത്‌?

¹⁰ പൗലൊസ്‌ കൊരി​ന്തിൽ ഇട്ട അടിസ്ഥാ​ന​ത്തി​ന്മേൽ ചിലർ നല്ല രീതി​യിൽ നിർമി​ക്കു​ക​യാ​യി​രു​ന്നില്ല എന്നു തോന്നു​ന്നു. പ്രശ്‌നം തുറന്നു​കാ​ട്ടു​ന്ന​തി​നാ​യി, പൗലൊസ്‌ രണ്ടുതരം നിർമാണ വസ്‌തു​ക്കളെ വിപരീത താരത​മ്യം ചെയ്യുന്നു: സ്വർണം, വെള്ളി, വില​യേ​റിയ കല്ലുകൾ എന്നിവ ഒരു വശത്തും മരം, പുല്ല്‌, വൈ​ക്കോൽ എന്നിവ മറുവ​ശ​ത്തും. നല്ലതും ഈടു​റ്റ​തു​മായ അഗ്നി​പ്ര​തി​രോധ വസ്‌തു​ക്കൾകൊണ്ട്‌ ഒരു കെട്ടിടം പടുത്തു​യർത്താം; അല്ലെങ്കിൽ താത്‌കാ​ലി​ക​മാ​യും ഒരു വീടു തട്ടിക്കൂ​ട്ടാം. അതിന്‌ ഒറ്റ ഉപയോ​ഗം​കൊ​ണ്ടു നശിക്കു​ന്ന​തും തീപി​ടി​ക്കു​ന്ന​തു​മായ വസ്‌തു​ക്കൾ മതിയാ​കും. കൊരിന്ത്‌ പോലുള്ള ഒരു വലിയ നഗരത്തിൽ ഈ രണ്ടുത​ര​ത്തി​ലു​മുള്ള കെട്ടി​ടങ്ങൾ നിസ്സം​ശ​യ​മാ​യും ധാരാളം ഉണ്ടായി​രു​ന്നു. വിലപി​ടി​പ്പുള്ള കൂറ്റൻ കല്ലുകൾകൊണ്ടുb തീർത്ത, ഒരുപക്ഷേ ഭാഗി​ക​മാ​യി സ്വർണ​വും വെള്ളി​യും പതിച്ച​തോ അല്ലെങ്കിൽ അവകൊണ്ട്‌ അലങ്കരി​ച്ച​തോ ആയ പ്രൗഢ​ഗം​ഭീര ആലയങ്ങൾ ഉണ്ടായി​രു​ന്നു. കെട്ടി​യു​ണ്ടാ​ക്കിയ, പുല്ലു​മേഞ്ഞ മരക്കു​ടി​ലു​കൾക്കും ഷെഡ്ഡു​കൾക്കും പീടി​ക​കൾക്കും ഇടയിൽ ഈടു​നിൽക്കുന്ന ഈ സൗധങ്ങൾ തലയെ​ടു​പ്പോ​ടെ നിന്നി​രി​ക്കാം.

¹¹ അഗ്നിബാധ ഉണ്ടായാൽ ഈ കെട്ടി​ട​ങ്ങൾക്ക്‌ എന്തു സംഭവി​ക്കും? പൗലൊ​സി​ന്റെ നാളി​ലേ​തു​പോ​ലെ, ഇന്നും ഉത്തരം വ്യക്തമാണ്‌. വാസ്‌ത​വ​ത്തിൽ, പൊ.യു.മു. 146-ൽ റോമൻ ജനറൽ മമ്മിയസ്‌ കൊരിന്ത്‌ നഗരം പിടി​ച്ച​ടക്കി അതിനെ അഗ്നിക്കി​ര​യാ​ക്കി​യി​രു​ന്നു. മരം, പുല്ല്‌, വൈ​ക്കോൽ എന്നിവ കൊണ്ട്‌ ഉണ്ടാക്കിയ അനേകം കെട്ടി​ടങ്ങൾ തീർച്ച​യാ​യും പാടേ നശിച്ചി​രു​ന്നു. വെള്ളി​യും സ്വർണ​വും​കൊണ്ട്‌ അലങ്കരി​ച്ച​തും കല്ലുകൾകൊ​ണ്ടു നിർമി​ച്ച​തു​മായ ഉറപ്പുള്ള കെട്ടി​ട​ങ്ങ​ളു​ടെ കാര്യ​മോ? അവ നിസ്സം​ശ​യ​മാ​യും നിലനി​ന്നു. എന്നാൽ ഈടു കുറഞ്ഞ അയൽകെ​ട്ടി​ട​ങ്ങളെ പണ്ടേതന്നെ നിരപ്പാ​ക്കിയ ദുരന്ത​ങ്ങ​ളി​ലും നിലനിന്ന അത്തരം ഗംഭീര കെട്ടി​ട​ങ്ങ​ളു​ടെ സമീപ​ത്തു​കൂ​ടെ കൊരി​ന്തി​ലെ പൗലൊ​സി​ന്റെ വിദ്യാർഥി​കൾ ദിവസ​വും കടന്നു​പോ​യി​രി​ക്കാം. അപ്പോൾ, എത്ര സജീവ​മാ​യാണ്‌ പൗലൊസ്‌ തന്റെ ആശയം വ്യക്തമാ​ക്കി​യത്‌! പഠിപ്പി​ക്കു​മ്പോൾ നാം നമ്മെത്തന്നെ നിർമാ​താ​ക്കൾ ആയി കരു​തേ​ണ്ട​തുണ്ട്‌. സാധ്യ​മാ​യി​രി​ക്കു​ന്നി​ട​ത്തോ​ളം ഏറ്റവും നല്ലതും ഈടു​നിൽക്കു​ന്ന​തു​മായ വസ്‌തു​ക്കൾകൊണ്ട്‌ നിർമി​ക്കാ​നാ​ണു നാം ആഗ്രഹി​ക്കു​ന്നത്‌. അങ്ങനെ​യെ​ങ്കിൽ നമ്മുടെ പ്രവൃത്തി കൂടുതൽ കാലം നിലനി​ന്നേ​ക്കാം. ഈടു​നിൽക്കുന്ന ആ വസ്‌തു​ക്കൾ എന്തെല്ലാ​മാണ്‌, അവ ഉപയോ​ഗി​ക്കു​ന്നത്‌ മർമ​പ്ര​ധാ​നം ആയിരി​ക്കു​ന്നത്‌ എന്തു​കൊണ്ട്‌?

നിങ്ങളു​ടെ പ്രവൃത്തി അഗ്നിയെ ചെറു​ത്തു​നിൽക്കു​മോ?

12. ചില കൊരി​ന്ത്യ ക്രിസ്‌ത്യാ​നി​കൾ അശ്രദ്ധ​മാ​യി നിർമി​ച്ചി​രു​ന്നത്‌ ഏതെല്ലാം വിധങ്ങ​ളിൽ?

¹² വ്യക്തമാ​യും, കൊരി​ന്തി​ലെ ചില ക്രിസ്‌ത്യാ​നി​കൾ താണതരം വസ്‌തു​ക്കൾകൊണ്ട്‌ നിർമി​ക്കു​ക​യാ​ണെന്ന്‌ പൗലൊ​സി​നു തോന്നി. എന്തായി​രു​ന്നു കുഴപ്പം? സന്ദർഭം പ്രകട​മാ​ക്കു​ന്ന​തു​പോ​ലെ, സഭയെ വിഭാ​ഗീ​യത ബാധി​ച്ചി​രു​ന്നു, അതായത്‌ ആളുകൾ വ്യക്തി​ത്വ​ങ്ങ​ളിൽ ആകൃഷ്ട​രാ​യി അവർക്കു പിന്നാലെ പോകു​ക​യാ​യി​രു​ന്നു. അതു സഭയുടെ ഐക്യത്തെ അപകട​പ്പെ​ടു​ത്തു​ന്നു​ണ്ടാ​യി​രു​ന്നു. ചിലർ “ഞാൻ പൌ​ലൊ​സി​ന്റെ പക്ഷക്കാരൻ” എന്നു പറയു​മ്പോൾ മറ്റു ചിലർ “ഞാൻ അപ്പൊ​ല്ലോ​സി​ന്റെ പക്ഷക്കാരൻ” എന്നു പറയു​ക​യാ​യി​രു​ന്നു. ചിലർ തങ്ങളുടെ സ്വന്തം ജ്ഞാനത്തെ കുറിച്ച്‌ അഹങ്കരി​ച്ചി​രു​ന്ന​താ​യി തോന്നു​ന്നു. അപ്പോൾ ജഡിക ചിന്തയു​ടെ​യും ആത്മീയ അപക്വ​ത​യു​ടെ​യും കടുത്ത ‘ഈർഷ്യ​യു​ടെ​യും പിണക്ക​ത്തി​ന്റേ​തും’ ആയ ഒരു അന്തരീക്ഷം ഉടലെ​ടു​ത്ത​തിൽ അത്ഭുത​പ്പെ​ടാ​നില്ല. (1 കൊരി​ന്ത്യർ 1:12; 3:1-4, 18) ഈ മനോ​ഭാ​വങ്ങൾ സഭയിലെ പഠിപ്പി​ക്ക​ലി​ലും ശുശ്രൂ​ഷ​യി​ലും നിശ്ചയ​മാ​യും പ്രതി​ഫ​ലി​ച്ചി​രു​ന്നു. ഫലമോ, അവരുടെ ശിഷ്യ​രാ​ക്കൽ വേല അശ്രദ്ധ​മാ​യി​ത്തീർന്നു, താണതരം വസ്‌തു​ക്കൾകൊണ്ട്‌ നിർമി​ക്കു​ന്ന​തു​പോ​ലെ. അത്‌ ‘അഗ്നി’യെ (പി.ഒ.സി. ബൈബിൾ) അതിജീ​വി​ക്കു​ന്നത്‌ ആയിരു​ന്നില്ല. പൗലൊസ്‌ ഏത്‌ അഗ്നിയെ കുറിച്ചു സംസാ​രി​ക്കു​ക​യാ​യി​രു​ന്നു?

13. പൗലൊ​സി​ന്റെ ദൃഷ്ടാ​ന്ത​ത്തി​ലെ അഗ്നി എന്തിനെ പ്രതി​നി​ധാ​നം ചെയ്യുന്നു, എല്ലാ ക്രിസ്‌ത്യാ​നി​ക​ളും എന്ത്‌ അറിഞ്ഞി​രി​ക്കണം?

¹³ നാമെ​ല്ലാം ജീവി​ത​ത്തിൽ അഭിമു​ഖീ​ക​രി​ക്കുന്ന ഒരു അഗ്നി ഉണ്ട്‌—നമ്മുടെ വിശ്വാ​സ​ത്തി​ന്റെ പരി​ശോ​ധ​നകൾ. (യോഹ​ന്നാൻ 15:20; യാക്കോബ്‌ 1:2, 3) നാം സത്യം പഠിപ്പി​ക്കുന്ന സകലർക്കും പരി​ശോ​ധന നേരി​ടും എന്നു നാം ഇന്ന്‌ അറി​യേ​ണ്ട​തു​പോ​ലെ കൊരി​ന്തി​ലെ ക്രിസ്‌ത്യാ​നി​ക​ളും അറി​യേ​ണ്ടി​യി​രു​ന്നു. നാം ഗുണ​മേ​ന്മ​യോ​ടെ പഠിപ്പി​ക്കു​ന്നി​ല്ലെ​ങ്കിൽ, പരിണ​ത​ഫലം മോശ​മാ​യി​രു​ന്നേ​ക്കാം. പൗലൊസ്‌ ഇങ്ങനെ മുന്നറി​യി​പ്പു നൽകി: “ഒരുത്തൻ പണിത പ്രവൃത്തി നിലനി​ല്‌ക്കും എങ്കിൽ അവന്നു പ്രതി​ഫലം കിട്ടും. ഒരുത്തന്റെ പ്രവൃത്തി വെന്തു​പോ​യെ​ങ്കിൽ അവന്നു ചേതം വരും; താനോ രക്ഷിക്ക​പ്പെ​ടും; എന്നാൽ തീയിൽകൂ​ടി എന്നപോ​ലെ അത്രേ.”c—1 കൊരി​ന്ത്യർ 3:14, 15.

14. (എ)ക്രിസ്‌തീയ ശിഷ്യരെ ഉളവാ​ക്കു​ന്ന​വർക്ക്‌ “നഷ്ടം സഹി​ക്കേണ്ടി” വന്നേക്കാ​വു​ന്നത്‌ എങ്ങനെ, എന്നിരു​ന്നാ​ലും അഗ്നിയി​ലൂ​ടെ​യെ​ന്ന​വണ്ണം അവർ രക്ഷ പ്രാപി​ച്ചേ​ക്കാ​വു​ന്നത്‌ എങ്ങനെ? (ബി) നമുക്ക്‌ എങ്ങനെ നഷ്ടസാ​ധ്യത കഴിയു​ന്നത്ര കുറയ്‌ക്കാം?

¹⁴ നിശ്ചയ​മാ​യും ഗൗരവ​മായ വാക്കു​കൾതന്നെ! കഠിന ശ്രമം ചെയ്‌ത്‌ ഒരാളെ ശിഷ്യൻ ആയിത്തീ​രാൻ സഹായി​ച്ച​തി​നു ശേഷം അയാൾ പ്രലോ​ഭ​ന​ത്തി​നോ പീഡന​ത്തി​നോ വശംവ​ദ​നാ​യി അവസാനം സത്യത്തി​ന്റെ വഴി വിട്ടു​പോ​കുന്ന കാഴ്‌ച വളരെ വേദനാ​ക​ര​മാണ്‌. അത്തരം സന്ദർഭ​ങ്ങ​ളിൽ നമുക്കു നഷ്ടം വരുന്നു എന്നു പറഞ്ഞു​കൊണ്ട്‌ പൗലൊസ്‌ സമ്മതി​ക്കു​ന്നത്‌ അതുത​ന്നെ​യാണ്‌. ‘അഗ്നിയി​ലൂ​ടെ​യെ​ന്ന​വണ്ണം’ എന്നു നമ്മുടെ രക്ഷയെ വർണി​ച്ചി​രി​ക്കു​ന്ന​തി​നാൽ ആ അനുഭവം, അഗ്നിബാ​ധ​യിൽ സകലതും നഷ്ടപ്പെ​ട്ടെ​ങ്കി​ലും കഷ്ടിച്ചു രക്ഷപ്പെട്ട ഒരാ​ളെ​പ്പോ​ലെ, അങ്ങേയറ്റം വേദനാ​ക​ര​മാ​യി​രി​ക്കാം. എന്നാൽ നമ്മുടെ കാര്യ​ത്തിൽ, നമുക്ക്‌ എങ്ങനെ നഷ്ടസാ​ധ്യത കഴിയു​ന്നത്ര കുറയ്‌ക്കാം? ഈടു​നിൽക്കുന്ന വസ്‌തു​ക്കൾകൊണ്ട്‌ നിർമി​ക്കുക! ജ്ഞാനം, വിവേകം, യഹോ​വാ​ഭക്തി, യഥാർഥ വിശ്വാ​സം എന്നിങ്ങ​നെ​യുള്ള അമൂല്യ ക്രിസ്‌തീയ ഗുണങ്ങൾ വിലമ​തി​ക്കാൻ പ്രേരി​ത​രാ​കും​വി​ധം നാം നമ്മുടെ വിദ്യാർഥി​ക​ളു​ടെ ഹൃദയ​ത്തിൽ എത്താൻ പാകത്തിൽ പഠിപ്പി​ക്കു​ന്നെ​ങ്കിൽ, നാം നിർമി​ക്കു​ന്നത്‌ ഈടു​നിൽക്കുന്ന, അഗ്നി​പ്ര​തി​രോധ വസ്‌തു​ക്കൾകൊ​ണ്ടാ​യി​രി​ക്കും. (സങ്കീർത്തനം 19:9, 10; സദൃശ​വാ​ക്യ​ങ്ങൾ 3:13-15; 1 പത്രൊസ്‌ 1:6, 7) ഈ ഗുണങ്ങൾ ആർജി​ച്ചെ​ടു​ക്കു​ന്നവർ ദൈവ​ഹി​തം പ്രവർത്തി​ക്കു​ന്ന​തിൽ തുടരും; അവർക്ക്‌ എന്നേക്കും ജീവി​ക്കു​ന്ന​തി​നുള്ള ഉറച്ച പ്രത്യാശ ഉണ്ട്‌. (1 യോഹ​ന്നാൻ 2:17) അങ്ങനെ​യെ​ങ്കിൽ, പൗലൊ​സി​ന്റെ ദൃഷ്ടാന്തം നമുക്ക്‌ എങ്ങനെ പ്രാ​യോ​ഗി​ക​മാ​ക്കാം? ചില ഉദാഹ​ര​ണങ്ങൾ പരിചി​ന്തി​ക്കുക.

15. നമ്മുടെ ബൈബിൾ വിദ്യാർഥി​ക​ളു​ടെ കാര്യ​ത്തിൽ നാം അശ്രദ്ധ​മായ നിർമാ​ണം ഒഴിവാ​ക്കു​ന്നു എന്ന്‌ ഏതെല്ലാം വിധങ്ങ​ളിൽ ഉറപ്പാ​ക്കാം?

¹⁵ ബൈബിൾ വിദ്യാർഥി​കളെ പഠിപ്പി​ക്കു​മ്പോൾ, നാം ഒരിക്ക​ലും യഹോ​വ​യെ​ക്കാൾ ഉപരി മനുഷ്യ​രി​ലേക്കു ശ്രദ്ധ തിരി​ക്ക​രുത്‌. നമ്മുടെ ലക്ഷ്യം ജ്ഞാനത്തി​ന്റെ പ്രാഥ​മിക ഉറവായി നമ്മെ വീക്ഷി​ക്കാൻ അവരെ പഠിപ്പി​ക്കുക എന്നതല്ല. അവർ മാർഗ​നിർദേ​ശ​ത്തി​നാ​യി യഹോ​വ​യി​ലേ​ക്കും അവന്റെ വചനത്തി​ലേ​ക്കും അവന്റെ സംഘട​ന​യി​ലേ​ക്കും നോക്കാൻ നാം ആഗ്രഹി​ക്കു​ന്നു. അതു​കൊ​ണ്ടു​തന്നെ, അവരുടെ ചോദ്യ​ങ്ങൾക്കു നാം കേവലം നമ്മുടെ വീക്ഷണങ്ങൾ നൽകു​ക​യില്ല. മറിച്ച്‌, ബൈബി​ളും “വിശ്വ​സ്‌ത​നും വിവേ​കി​യു​മായ ദാസൻ” പ്രദാനം ചെയ്‌തി​രി​ക്കുന്ന പ്രസി​ദ്ധീ​ക​ര​ണ​ങ്ങ​ളും ഉപയോ​ഗിച്ച്‌ ഉത്തരങ്ങൾ കണ്ടെത്താൻ നാം അവരെ പഠിപ്പി​ക്കു​ന്നു. (മത്തായി 24:45-47, NW) സമാന​മായ കാരണ​ങ്ങ​ളാൽ, നമ്മുടെ ബൈബിൾ വിദ്യാർഥി​ക​ളു​ടെ മേൽ നാം അവകാ​ശ​ബോ​ധം കാട്ടാ​തി​രി​ക്കാ​നും ശ്രദ്ധി​ക്കണം. മറ്റുള്ളവർ അവരിൽ താത്‌പ​ര്യം പ്രകട​മാ​ക്കു​മ്പോൾ നീരസ​പ്പെ​ടു​ന്ന​തി​നു​പ​കരം, സഭയിൽ സാധി​ക്കു​ന്ന​ത്ര​യും സഹോ​ദ​ര​ങ്ങളെ അടുത്ത​റി​യാ​നും വിലമ​തി​ക്കാ​നും ശ്രമി​ച്ചു​കൊണ്ട്‌ തങ്ങളുടെ പ്രീതി​യു​ടെ കാര്യ​ത്തിൽ “വിശാ​ല​ത​യു​ള്ള​വ​രാ​യി​രി”ക്കാൻ നാം നമ്മുടെ ബൈബിൾ വിദ്യാർഥി​കളെ പ്രോ​ത്സാ​ഹി​പ്പി​ക്കണം.—2 കൊരി​ന്ത്യർ 6:12, 13.

16. മൂപ്പന്മാർക്ക്‌ അഗ്നി​പ്ര​തി​രോധ വസ്‌തു​ക്കൾകൊണ്ട്‌ എങ്ങനെ നിർമി​ക്കാ​വു​ന്ന​താണ്‌?

¹⁶ ശിഷ്യരെ നിർമി​ക്കു​ന്ന​തിൽ ക്രിസ്‌തീയ മൂപ്പന്മാ​രും മർമ​പ്ര​ധാ​ന​മായ ഒരു പങ്കു വഹിക്കു​ന്നു. സഭയിൽ പഠിപ്പി​ക്കു​മ്പോൾ, അവർ അഗ്നി​പ്ര​തി​രോധ വസ്‌തു​ക്കൾകൊണ്ട്‌ നിർമി​ക്കാൻ ശ്രമി​ക്കു​ന്നു. അവരുടെ പഠിപ്പി​ക്കൽ പ്രാപ്‌തി, അനുഭവ പരിചയം, വ്യക്തി​ത്വം എന്നിവ ഏറെ വ്യത്യാ​സ​പ്പെ​ട്ടി​രു​ന്നേ​ക്കാം, എന്നാൽ അവർ ഈ വ്യത്യാ​സ​ങ്ങളെ മുത​ലെ​ടു​ത്തു​കൊണ്ട്‌ ശിഷ്യരെ തങ്ങളി​ലേക്കു വശീക​രി​ക്കു​ന്നില്ല. (പ്രവൃ​ത്തി​കൾ 20:29, 30 താരത​മ്യം ചെയ്യുക.) “ഞാൻ പൌ​ലൊ​സി​ന്റെ പക്ഷക്കാരൻ” എന്നോ “ഞാൻ അപ്പൊ​ല്ലോ​സി​ന്റെ പക്ഷക്കാരൻ” എന്നോ കൊരി​ന്തി​ലെ ചിലർ പറഞ്ഞത്‌ എന്തു​കൊ​ണ്ടെന്നു നമുക്കു കൃത്യ​മാ​യും അറിയില്ല. എന്നാൽ ഈ വിശ്വസ്‌ത മൂപ്പന്മാർ ആരും​തന്നെ നിശ്ചയ​മാ​യും അത്തരം വിഭാ​ഗീയ ചിന്താ​ഗതി ഉന്നമി​പ്പി​ച്ചില്ല എന്നു നമുക്ക്‌ ഉറപ്പു​ണ്ടാ​യി​രി​ക്കാൻ കഴിയും. കാരണം അത്തരം വികാര പ്രകട​ന​ങ്ങ​ളി​ലൊ​ന്നും പൗലൊസ്‌ വീണില്ല; അവയെ ശക്തമായി ഖണ്ഡിക്കു​ക​യാണ്‌ അവൻ ചെയ്‌തത്‌. (1 കൊരി​ന്ത്യർ 3:5-7) സമാന​മാ​യി ഇന്നും, തങ്ങൾ “ദൈവ​ത്തി​ന്റെ ആട്ടിൻകൂ​ട്ടത്തെ” ആണ്‌ മേയി​ക്കു​ന്ന​തെന്ന്‌ മൂപ്പന്മാർ മനസ്സിൽ പിടി​ക്കു​ന്നു. (ചെരി​ച്ചെ​ഴു​ത്തു ഞങ്ങളു​ടേത്‌.) (1 പത്രൊസ്‌ 5:2) അത്‌ ഒരു മനുഷ്യ​ന്റെ​യും സ്വന്തമല്ല. അതു​കൊണ്ട്‌ ആരെങ്കി​ലും ആട്ടിൻകൂ​ട്ട​ത്തി​ന്റെ​യോ മൂപ്പന്മാ​രു​ടെ സംഘത്തി​ന്റെ​യോ മേൽ മേധാ​വി​ത്വം പുലർത്താൻ ശ്രമി​ക്കു​ന്ന​തി​നെ​തി​രെ മൂപ്പന്മാർ ശക്തമായ നിലപാട്‌ എടുക്കു​ന്നു. സഭയെ സേവി​ക്കുക, ആടുക​ളു​ടെ ഹൃദയ​ത്തിൽ എത്തി​ച്ചേ​രുക, മുഴു​ഹൃ​ദ​യ​ത്തോ​ടെ യഹോ​വയെ സേവി​ക്കാൻ അവരെ സഹായി​ക്കുക എന്നിങ്ങ​നെ​യുള്ള എളിയ ആഗ്രഹ​ത്താൽ പ്രചോ​ദി​തർ ആയിരി​ക്കു​ന്നി​ട​ത്തോ​ളം​കാ​ലം, മൂപ്പന്മാർ അഗ്നി​പ്ര​തി​രോധ വസ്‌തു​ക്കൾകൊണ്ട്‌ നിർമി​ക്കു​ക​യാണ്‌.

17. ക്രിസ്‌തീയ മാതാ​പി​താ​ക്കൾ അഗ്നി​പ്ര​തി​രോധ വസ്‌തു​ക്കൾകൊണ്ട്‌ നിർമി​ക്കാൻ ശ്രമി​ക്കു​ന്നത്‌ എങ്ങനെ?

¹⁷ ക്രിസ്‌തീയ മാതാ​പി​താ​ക്ക​ളും ഇക്കാര്യ​ത്തിൽ ആഴമായ താത്‌പ​ര്യം ഉള്ളവർ ആണ്‌. തങ്ങളുടെ കുട്ടികൾ നിത്യ​മാ​യി ജീവി​ക്കു​ന്നത്‌ കാണാൻ അവർ എത്ര ഉത്‌ക​ട​മാ​യി ആഗ്രഹി​ക്കു​ന്നു! അതു​കൊ​ണ്ടാണ്‌ അവർ തങ്ങളുടെ കുട്ടി​ക​ളു​ടെ ഹൃദയ​ങ്ങ​ളിൽ ദൈവ​വ​ച​ന​ത്തി​ലെ തത്ത്വങ്ങൾ “ഉൾനടാൻ” കഠിന ശ്രമം ചെയ്യു​ന്നത്‌. (ആവർത്ത​ന​പു​സ്‌തകം 6:6, 7) തങ്ങളുടെ കുട്ടികൾ സത്യം അറിയ​ണ​മെന്ന്‌ അവർ ആഗ്രഹി​ക്കു​ന്നു, കേവലം ഒരു കൂട്ടം നിയമ​ങ്ങ​ളോ വസ്‌തു​ത​ക​ളോ ആയിട്ടല്ല, മറിച്ച്‌ സംതൃ​പ്‌ത​വും പ്രതി​ഫ​ല​ദാ​യ​ക​വും സന്തുഷ്ട​വു​മായ ഒരു ജീവി​ത​രീ​തി ആയിട്ട്‌ അവർ അത്‌ അറിയണം. (1 തിമൊ​ഥെ​യൊസ്‌ 1:11) തങ്ങളുടെ കുട്ടി​കളെ ക്രിസ്‌തു​വി​ന്റെ വിശ്വസ്‌ത ശിഷ്യ​രാ​യി നിർമി​ക്കു​ന്ന​തി​നു​വേണ്ടി, സ്‌നേ​ഹ​നി​ധി​ക​ളായ മാതാ​പി​താ​ക്കൾ അഗ്നി​പ്ര​തി​രോധ വസ്‌തു​ക്കൾ ഉപയോ​ഗി​ക്കാൻ ശ്രമി​ക്കു​ന്നു. അവർ ക്ഷമാപൂർവം തങ്ങളുടെ കുട്ടി​കൾക്കൊ​പ്പം പ്രവർത്തി​ച്ചു​കൊണ്ട്‌ യഹോവ വെറു​ക്കുന്ന ഗുണങ്ങൾ പിഴു​തു​ക​ള​യാ​നും അവൻ ഇഷ്ടപ്പെ​ടുന്ന ഗുണങ്ങൾ നട്ടുവ​ളർത്താ​നും അവരെ സഹായി​ക്കു​ന്നു.—ഗലാത്യർ 5:22, 23.

ആരാണ്‌ ഉത്തരവാ​ദി?

18. ഒരു ശിഷ്യൻ ആരോ​ഗ്യാ​വ​ഹ​മായ പഠിപ്പി​ക്കൽ നിരസി​ക്കു​മ്പോൾ, അത്‌ അവനെ പഠിപ്പി​ക്കു​ക​യും പരിശീ​ലി​പ്പി​ക്കു​ക​യും ചെയ്‌ത​വ​രു​ടെ കുറ്റമാ​ക​ണ​മെ​ന്നില്ല എന്നു പറയാ​വു​ന്നത്‌ എന്തു​കൊണ്ട്‌?

¹⁸ ഈ ചർച്ച ഒരു പ്രധാ​ന​പ്പെട്ട ചോദ്യം ഉയർത്തു​ന്നു. നാം സഹായി​ക്കാൻ ശ്രമി​ക്കുന്ന ഒരാൾ സത്യത്തിൽനി​ന്നു വീണു​പോ​കു​ന്നെ​ങ്കിൽ, അതിനർഥം ഉപദേ​ഷ്ടാ​ക്കൾ എന്ന നിലയിൽ നാം പരാജ​യ​പ്പെട്ടു, അല്ലെങ്കിൽ നാം താണതരം വസ്‌തു​ക്കൾകൊ​ണ്ടാണ്‌ നിർമി​ച്ചി​രി​ക്കു​ന്നത്‌ എന്നാണോ? ആയിരി​ക്ക​ണ​മെ​ന്നില്ല. ശിഷ്യരെ നിർമി​ക്കു​ന്ന​തിൽ പങ്ക്‌ ഉണ്ടായി​രി​ക്കു​ന്നത്‌ ഒരു വലിയ ഉത്തരവാ​ദി​ത്വം ആണ്‌ എന്ന്‌ പൗലൊ​സി​ന്റെ വാക്കുകൾ നിശ്ചയ​മാ​യും നമ്മെ അനുസ്‌മ​രി​പ്പി​ക്കു​ന്നു. നന്നായി നിർമി​ക്കാൻ ആവുന്ന​തെ​ല്ലാം ചെയ്യാൻ നാം ആഗ്രഹി​ക്കു​ന്നു. എന്നാൽ നാം സഹായി​ക്കാൻ ശ്രമി​ക്കു​ന്നവർ സത്യത്തിൽനി​ന്നു വീണു​പോ​കു​മ്പോൾ മുഴു ഉത്തരവാ​ദി​ത്വ​വും ഏറ്റെടുത്ത്‌ അതിന്റെ കുറ്റഭാ​ര​വും പേറി​ന​ട​ക്കാൻ ദൈവ​വ​ചനം നമ്മോടു പറയു​ന്നില്ല. നിർമാ​താ​ക്കൾ എന്ന നിലയിൽ നമുക്കുള്ള പങ്ക്‌ കൂടാതെ മറ്റു ഘടകങ്ങ​ളും ഉൾപ്പെ​ടു​ന്നുണ്ട്‌. ഉദാഹ​ര​ണ​ത്തിന്‌, അശ്രദ്ധ​മാ​യി നിർമിച്ച ഉപദേ​ഷ്ടാവ്‌ ആയിരു​ന്നി​ട്ടു​കൂ​ടി അവനെ കുറിച്ച്‌ പൗലൊസ്‌ പറയു​ന്നതു ശ്രദ്ധി​ക്കുക: “അവൻ നഷ്ടം സഹി​ക്കേണ്ടി വരും; എങ്കിലും . . . അവൻ രക്ഷ പ്രാപി​ക്കും.” (1 കൊരി​ന്ത്യർ 3:15) ഈ വ്യക്തി അവസാനം രക്ഷ പ്രാപി​ക്കു​ക​യും അതേസ​മയം അയാൾ തന്റെ വിദ്യാർഥി​യിൽ നിർമി​ക്കാൻ ശ്രമിച്ച ക്രിസ്‌തീയ വ്യക്തി​ത്വം അഗ്നി പരി​ശോ​ധ​ന​യിൽ ‘അഗ്നിക്കി​ര​യാ​കുന്ന’തായി ചിത്രീ​ക​രി​ക്കു​ക​യും ചെയ്‌തി​രി​ക്കു​ന്നെ​ങ്കിൽ, നാം എന്തു നിഗമനം ചെയ്യണം? നിശ്ചയ​മാ​യും, ഒരു വിശ്വസ്‌ത ഗതി പിൻപ​റ്റ​ണ​മോ വേണ്ടയോ എന്നതു സംബന്ധിച്ച തീരു​മാ​ന​ങ്ങൾക്ക്‌ യഹോവ മുഖ്യ​മാ​യും വിദ്യാർഥി​യെ ഉത്തരവാ​ദി​യാ​യി കാണുന്നു എന്ന്‌.

19. നാം അടുത്ത ലേഖന​ത്തിൽ എന്തു പരിചി​ന്തി​ക്കു​ന്ന​താണ്‌?

¹⁹ വ്യക്തി​പ​ര​മായ അല്ലെങ്കിൽ ഓരോ വ്യക്തി​ക്കു​മുള്ള ഉത്തരവാ​ദി​ത്വം വലിയ പ്രാധാ​ന്യ​മുള്ള സംഗതി​യാണ്‌. അതു നമ്മെ ഓരോ​രു​ത്ത​രെ​യും ബാധി​ക്കു​ന്നു. പ്രത്യേ​കിച്ച്‌, ഇക്കാര്യം സംബന്ധിച്ച്‌ ബൈബിൾ എന്തു പഠിപ്പി​ക്കു​ന്നു? അടുത്ത ലേഖനം ഇതു പരിചി​ന്തി​ക്കു​ന്ന​താണ്‌.

[അടിക്കു​റി​പ്പു​കൾ]

നിങ്ങൾ എങ്ങനെ ഉത്തരം പറയും?

□ ഒരു സത്യ ക്രിസ്‌ത്യാ​നി​യി​ലെ “അടിസ്ഥാ​നം” എന്താണ്‌, അത്‌ എങ്ങനെ ഇടപ്പെ​ടു​ന്നു?

□ വ്യത്യ​സ്‌ത​തരം നിർമാണ വസ്‌തു​ക്ക​ളിൽനിന്ന്‌ നമുക്ക്‌ എന്തു പഠിക്കാ​വു​ന്ന​താണ്‌?

□ ‘അഗ്നി’ എന്തു പ്രതി​നി​ധാ​നം ചെയ്യുന്നു, ചിലർ “നഷ്ടം സഹി​ക്കേണ്ടി വരാ”നിടയാ​കു​ന്നത്‌ എങ്ങനെ?

□ ബൈബിൾ ഉപദേ​ഷ്ടാ​ക്കൾ, മൂപ്പന്മാർ, മാതാ​പി​താ​ക്കൾ എന്നിവർക്ക്‌ അഗ്നി​പ്ര​തി​രോധ വസ്‌തു​ക്കൾകൊണ്ട്‌ നിർമി​ക്കാ​വു​ന്നത്‌ എങ്ങനെ?

[9-ാം പേജിലെ ചിത്രം]

അനേകം പുരാതന നഗരങ്ങ​ളി​ലും അഗ്നി​പ്ര​തി​രോധ കല്ലുകൾകൊണ്ട്‌ നിർമിച്ച കെട്ടി​ട​ങ്ങ​ളും താണതരം വസ്‌തു​ക്കൾകൊ​ണ്ടു നിർമിച്ച കെട്ടി​ട​ങ്ങ​ളും ഉണ്ടായി​രു​ന്നു