Мика
5 «Дайралтад өртсөн охин оо!
Одоо чи өөрийгөө сийчиж байна.
Бид бүслэгджээ.
Тэд Израйлын шүүгчийн хацрыг саваадаж байна.
2 Бетлехем Ефрата!
Чи Иудагийн мянгатуудын тоонд* багтахад хэтэрхий өчүүхэн боловч
Миний томилох Израйлын захирагч чамаас гарна.
Түүний гарал үүсэл эртний өдрүүдээс, өнө эртнээс эхтэй.
3 Жирэмсэн эмэгтэйг амаржтал
Бурхан тэднийг орхино.
Үлдсэн ах дүүс нь израйлчууд дээр буцаж ирнэ.
4 Тэрбээр босож Еховагийн хүчээр,
Ехова Бурхныхаа агуу нэрээр тэднийг хариулна.
Тэрбээр дэлхийг бүхэлд нь захирах учир
Тэд айх аюулгүй амьдарна.
5 Тэрбээр энх тайвныг тогтооно.
Ассиричууд манай нутаг руу довтолж бэхлэгдсэн цамхгуудыг маань бяц гишгэвэл
Бид долоон хоньчныг, бүр найман ноёныг* хүмүүсийн дундаас сонгож тэдний өөдөөс босгоно.
6 Тэд Ассирийн нутгийг илдээр,
Нимродын нутгийг үүдэн дээр нь хариулна.
Ассиричууд манай нутаг руу халдан довтолбол
Тэрбээр биднийг аварна.
7 Иаковын үр удмын үлдэгсэд олон ард түмний дунд
Еховагаас ирсэн шүүдэр мэт,
Ургамал ногоон дээр буух борооны дусал мэт байх болно.
Шүүдэр, бороо нь хүнд найддаггүй.
Хүний хөвгүүдийг хүлээдэггүй.
8 Иаковын үр удмын үлдэгсэд
Олон үндэстэн, олон ард түмний дунд
Ойн араатнууд дундах арслан мэт,
Хонин сүргийн дундах залуу арслан мэт байх болно.
Тэр дайран довтолж, хэдэн хэсэг болгон тасчихад
Хэн ч тэднийг түүнээс аварч чадахгүй.
9 Чи өстнүүдийнхээ өөдөөс гар далайна.
Бүх дайсан чинь устгагдана».
10 Ехова ийн тунхаглаж байна.
«Тэр өдөр би хүлэг морьдыг чинь үгүй хийж дайны тэрэгнүүдийг чинь устгана.
11 Би танай хотуудыг устгаж
Бэхлэгдсэн бүх газрыг чинь нураана.
12 Ид шид үйлдэх явдлыг чинь таслан зогсооно.
Та нарын дунд ид шид үйлддэг хүн байхгүй болно.
13 Би та нарын сийлмэл хөргүүд, ариун багануудыг устгана.
Та нар хойшид гарынхаа бүтээлд мөргөхгүй.
14 Би та нарын ариун шонгуудыг* сугалж
Хотуудыг чинь сөнөөнө.
15 Би дуулгаваргүй үндэстнүүдээс
Хилэнтэйгээр өшөө авна».