Dholaga dhinakavihera egumihu owomela

 1. Mwahaya bwaddi iyo atene nigahowelagave thotho? (Provérbios 4:7)

AKALA onorajihaga werana yothoma yathima mwigumini mwayo, mwebaribarene wahirajhiha oloba thotho wa Yehova. Eyo sathima vanlubale. (Tia. 1:5) Mwene Salomawu ohuleba egi: ‘Thotho ethu yofuneya vanlubale.’ (Omwileri Provérbios 4:7.) Salomawu kaagana thotho bure-bure, oliye aagana thotho dhadhela wa Yehova. (Pro. 2:6) Nerege thotho dhinadhela wa Yehova, podi onikavihera wawanana makathamiho ehu a kadda labo? Hee! Siyeyo nnafunihu ohudhera musolo ola.

 2. Nnande avi okanna thotho?

² Iyo podi okanna thotho nihudheraga ni niparihedhaga mabasa dhohudhiha dhalobwanna abili yanna thotho dhowinjhiva. Oobajha, nnafuna nimuwoge Salomawu. Bibliya anihina: ‘Mulugu ahinvaha Salomawu thotho ni enonelo yohukanna manddile.’ (1 Reis 4:29) Vasogolova nnere owoga wodhela Yesu, mulobwana anna thotho dhowinjhiva akanlewo elabo yela yavati. (Mat. 12:42) Yovuhulela ya Izaiya enomuwoga yegi: ‘Muzimu wotxena wa Yehova onaakale ni oliye, muzimu wathotho ni wenonelo.’ — Isa. 11:2.

 3. Ohudhera wula nnaasuze ddi?

³ Mulugu ahinvaha Salomawu ni Yesu thotho dhowinjhiva, bumwahaya aliwa yowanda ovaha dhoolaga wodhela muselu dhathima dhinanikavihera ni iyoya. Musolo ola, nnere woona dholaga wodhela okanna monelo wapama ni korowa, mabasa ni emothu yehu.

 4. Ohiyana baani warivo ni egumi ya Salomawu ni ya Yesu?

⁴ Salomawu ahithabwa oreela, dhatedhene afuniye ahikanna. (1 Reis 10:7, 14, 15) Mbwenye Yesu, ahikanna egumi yojajala ni kanna mburo vokala. (Mat. 8:20) Naarive dhigari ndo, alobwana yala aabilene yahikanna monelo wapama ni dhoreela, mwaha thotho dhewa dhadhela wa Yehova.

 5. Monelo baani wapama Salomawu anniyena wodhela korowa?

⁵ Salomawu ohuwoga egihina: ‘Mwebaribarene thotho enobarela’ (Ecl. 7:12) Nakanna korowa, iyo podi ogula ethu-sithu nnafunihu ni ogulana ethu narabulelihu, mbwenye nihinahowelihu. Ni dhopadduwa dha mwegumini mwaye Salomawu ahinona wihina korowa kadhithabwile okanna thima. Motajhiha, oliye ohuleba: ‘Mbwenye ndina napama [obe emuthu yapama] nihikanna thima opitha dhoreela.’ (Pro. 22:1) Ohiya eyo, Salomawu woona wi athu enna korowa malabo owinjhiva kinahagalala ni dhithu enniwana. (Ecl. 5:10, 12) Oliye wenjhedhedhave egihina kanithabwege wubuwela wihina korowa si ethu dhinna thima bure mwaha kadhinalegela orimela. — Pro. 23:4, 5.

 6. Monelo baani wapama anna Yesu wodhela korowa? (Mateus 6:31-33)

⁶ Yesu ahikanna monelo wapama wodhela dhoreela. Oliye oodhiveliwa dhojha dhapama ni oong’wa malabo mamodha. (Luc 19:2, 6, 7) Eyo enowoneleyamo, mwaha matikiniho oobajha a Yesu, yari owasadula manjhe enokala vinyu apama. (João 2:10, 11) Labo akwiliye awanre dhowara dhathima. (João 19:23, 24) Mbwenye Yesu kahile wi dhoreela dhithabwe okanna thima mwigumini mwaye. Oliye ahawaddela anamaharaye egihina: ‘Kaavo ananda okala mudhaari aanabuya abili . . . Nyu kamukale adaari a Mulugu ni a dhoreela.’ (Mat. 6:24) Yesu oohudhiha wihina napweha Omwene wa Mulugu mburo wobajha, Yehova anere onivaha dhatedhene dhinanihalela.— Omwileri Mateus 6:31-33.

 7. Mareeliho baani awakenle Daniyeli mwaha osakula egumi yojajala?

⁷ Ohara dholaga dha Yehova wodhela dhoreela dhinowakavihera addibila owinjhiva narogolaya. Kasugwa yopadduwa ya ddibila anithaniwa Danieli, oliye anihina: “Miyo ngaari muzombwe gahithoma wihina dhithu dhomuzimuni dhikale dhathima mwigumini mwaaga.” Mwaha wosakula okanna egumi yojajala Daniyeli ahawenjhedhedha mabasa aye amparelihe Yehova. Ninga wapara mabasa yapadduwa ngovi, ni olaba obeteli. Daniyeli anasoriha egihina: “Ginowoga ni murima waga wamutene, kaginasinyuwa mwaha yothoma gisakunlimi. Ehe, gihinona wi gahapwasedhe osayela dhoreela gere okanna korowa dhowinjhina. Mbwenye kagakanne ofuru wowanona akwaga ginnimina peeno, teto gihidduwalaga ohagalala ginnimina mwaha onona wi ginampweha Yehova mburu wobajha.” Kawo korowa mwilaboni enaligana ni mareeliho Yehova agivahiliye. Mohanganyedha, eyo enonikavihera ni iyoya opwasedha pama dhithu dhomuzimuni ohiya othuwathuwela dhoreela.

 8. Nnonne addi wi Salomawu ahikanna monelo wapama wodhela mabasa? (Eclesiastes 5:18, 19)

⁸ Salomawu wera mabasa podi omuhagalasa muthu, oliye awithanne mabasa ninga ‘nvaho wa Mulugu.’ (Omwileri Eclesiaste 5:18, 19.) Oliye oleba egi: ‘Wapara mabasa nuuviheya winodhana mareeliho.’ (Pro. 14:23) Salomawu ahinona ethu awogiye. Oliye ahilaba vanlubale! Ahimaga nyumba dhowinjhiva, ahala mundda dha vinyedu, ahikanna ajardi, ahikanna mwego mwakoyiye manjhe. Teto, oliye ahifiyedha omagiha sidadi dhowinjhiva. (1 Reis. 9:19; Ecl. 2:4-6) Mabasa amatene ala aapanriye yahimuhagalasa vanlubale Salomawu. Mbwenye, oliye ahinona wihina kahiyo dhithu dhendha dhaamuthukulele ohagalala. Ohowela ethu emodhaya, bumwahaya oliye ahivihedhiwana ni dhithu dhomuzimuni. Oliye dari vasogolova aaholelaga mabasa oomaga tempulu yowoma ya Yehova—mabasa yamanle yaka tanu nabili epariwaga! (1 Reis. 6:38; 9:1) Ni dhithu dhowinjhiva anoniliye mwigumini mwaye, oliye wonelamo wi ethu yathima mwigumini mwa muthu, fumulabela Yehova. Oliye ohuwoga egi: ‘Muthenga ola waatene, muselu wathimaya buula: Omoovege Mulugu eebaribari ni wawiwelelege malamulo aye.’ — Ecl. 12:13.

 9. Nnonne addi wihina Yesu ahikanna monelo wapama wodhela mabasa?

⁹ Yesu oolaba vanlubale. Agaari muzombwe oliye oolaba ninga karpintero. (Marcos 6:3) Mwebaribarene, oliye owakavihera ababe yanna mutholo wokabelela murala munlubale. Teto mwaha oliye okala oologomana, owapara mabasa oologomana! Podi wera athu owinjhiva yakanna mabasiwa yomwithanesa! Yesu oodhiveliwa vanlubale mabasaye. Naari dhigari ndo, oliye oovenyihavo mudhidhi wihina ahudhere dhithu dhomuzimuni. (João 7:15) Yesu nuwawambela mabasaye oolaleya, wawaddela anamavuruwana aye egi: ‘Mulabege, mbwenye kamulabelege yojha enuudda, mbwenye yojha enakalawo malabo amatene.’ (João 6:27) Mwaha wavamwangoni, Yesu owoga egi: ‘Muugelege dhoorela odhulu.’ — Mat. 6:20.

10. Nahikala pasope podi onipadduwela ddi ni mabasihu?

¹⁰ Thotho dhinadha wa Yehova dhinonikavihera okanna monelo wapama wodhela mabasa. Makiristawu ehinona wihina enofwanelela olaba nuviheya ni wapara mabasa apama. (Efé. 4:28) Malabo mamodha, azugwihu obe ale enaniholela, enowona wi niri anamalaba enawoga ebaribari ni enalaba nuviheya ni enonitamalela vanlubale mwaha wa yeyo. Mowindo, ni efunelo yapama iyo podi wambela wawenjhedhedha mabasihu wihina azugwihu yawonege Anamoona a Yehova ninga athu apama. Akala mubuwelo wehu buyoyo, iyo podi ohikanna mudhidhi wokabelela muralihu ni owapara mabasa a Yehova. Bumwahaya sapama okanna manddile.

11. Wiliyamu ahudhere ddi wodhela okanna manddile ni mabasa?

¹¹ Ddibila dhala muzombwe anithaniwa Wiliyamu, oohudhera vanlubale ni yotajhiha ya ddibila dhala alabiyena vamodha. Wiliyamu anihina: “Ddibila ola yotajhiha yapama ya muthu anonne manddilaye. Oliye anolaba vanlubal, ni mwaha wa mabasa apama anaapariye ohukanna wandana wapama ni akliyentaye. Mbwenye txiguwo aworuwa, anorajhiha wahiya mabasaye opwasedha okabelela muralaye ni dhithu dhomuzimuni. Ohunona? Oliye di muthu oohagalala gimunonnimi!”b

12. Salomawu oneyihe addi wihna ahikanna monelo wapama wodhela emuthu yaye, ki nuvira mudhidhi yapadduwe ddi?

¹² Mudhidhi Salomawu amulabeleyi Yehova ni murimwaye wamutene, ahikanna monelo wapama wodhela emuthwaye. Bumwahaya, oliye agaari muzombwe, ahonelamo wihina dhithu dhimodha kanonne ni ahiloba nikavihero na Yehova. (1 Reis. 3:7-9) Mbwenye nuwambela othonga, Salomawu ahinona makathamiho baani enakumelela mwaha wowithukula. Oliye ohuleba egi: ‘Withukula winabajha muthuya ahinathegele ethu, teto muzimu wowihelamo onabajha muthuya ahinakwakwathuwe.’ (Pro. 16:18) Yawukulihaya sowi, nuvira mudhidhi Salomawu oddiwala ovirihamo yolaga yaye. Oliye wambela withukula ofiyedha walupa malamulo a Mulugu. Motajhiha, nlamulo nimodha nawoga wihina mamwene aamwana Ezarayeli, kiyatele ahiyana owinjhiva wihina murima wewa onadha opupuruwe. (Deut. 17:17) Salomawu olupa nlamulo nna yapudhave, ofiyera watela ahiyana 700 ni ahiyana 300 owaweddana, teto owinjhiva kayamebedha Yehova! (1 Reis 11:1-3) Podi wera Salomawu ubuwela wi dhatedhene dhanna omweddela pama, teto eyo kiyaamutotele makathamiho. Mbwenye wahifiya mudhidhi, Salomawu afwanyiwiye makathamiho owinjhiva mwaha wohimwiwelela Yehova.—1 Reis. 11:9-13.

13. Nnahudhera ddi ni ekalelo yowiyeviha ya Yesu?

¹³ Yesu kanahiyege okanna monelo wapama wodhela emuthu yaye ni okala owiyeviha. Yesu ahinathi odha ela yela yavati, ahikanna ofuru wopara dhithu dhathima wula amulabelaga Yehova. Bibliya anihina ‘wodhela oliye, dhihipaddusiwa dhego dhimodha odhulu ni dha elabo yavati.’ (Col. 1:16) Labo abaddiziwaga, Yesu ahubuwela dhithu dhatedhene apanriye agaari vamodha ni Ababe. (Mat. 3:16; João 17:5) Mbwenye Yesu kithukule nuwubuwela dhithu dhapama eriliyena. Ebaribariya sowihina kanubuwelege wihina oliye dathima wapitha athu amodha. Oliye ahawaddela anamaharaye egi: ‘Mwaana muthu kadhele olabiwa, mbwenye adhele olaba ni ovelela egumi yaye wi awobole anamwinjhi’ (Mat. 20:28) Oliye ohoniha wiyeviha waye, nuwonelamo wihina kavo ethu afwaneleliye werana. (João 5:19) Mohanganyedha, Yesu aari muthu owiyeviha vanlubale! Ohunihiyedha yotajhiha yapama.

14. Yesu awogile ddi enanikavihera okanna monelo wapama wodhela emuthu yehu?

¹⁴ Yesu ohahudhiha anamaharaye okanna monelo wapama wodhela emuthu yewa. Nlabo nimodha oliye wawaddela egi: ‘Mathithi ammuruni mweenyu ehimala okontariwa.’ (Mat. 10:30) Madhu ala enonikurumusa murima, thabwathabwa akala nihikanna ekalelo yokanna monelo wabure wodhela emuthu yehu. Madhu ala, enowoneyiha wihina Babihu Yehova, anompwatha kadda muthu wa iyo ni niri athima vamentoni vaye. Akala di Yehova ansakunle wihina nimulabegele, teto duliyene anihina wi iyo nnofwanelela okala mwilaboni exa, iyo niri aani wera wihina oliye kubuwenlevo pama.

15. a) Monelo baani wapama wodhela emuthu yehu Namasugwera asorinhiye wihina nikanne? b) Ninga dhinoniha fotu dhiri epaddi 24, naathabwaga osugwera emuthu yehu mareeliho baani nnayelelihu?

¹⁵ Yaka 15 mundduli, Namasugwera ohuwoga wodhela okanna monelo wapama ni emuthu yehu: “Mwebaribarene, kannafuna othabwaga wiwubuwela iyo yekihu ofiyera wambela withukula, newene kannafuna omorela vamurakoni vowihina kaninna mabasa, ohiya eyo nnafuna nikanne monelo wapama wodhela emuthu Yehu. Monelo wapama onadhela mwaha wa dhithu nnonnihu, ni dhithu nihinandihu opara. Muhiyana dhala ari mukiristawu anihina: ‘Miyo kagiri muthu abure, newene kagithambwe okanna thima, kagiri muthu apama newene abure ninga athu atene eriiwa.’”c Kunonelamo wi yere owomela okanna monelo wapama wodhela emuthu yehu?

16. Mwahaya bwaddi Yehova aganivaha dholaga?

¹⁶ Yehova anomulabihera Bibliya wihina anivahe dholaga dhapama. Oliye anowerana ndo mwaha anondhivela ni anafuna wi nikale athu oohagalala. (Isa. 48:17, 18) Makalelo apama oosakula fupweha mburo wobajha efunelo ya Yehova mwigumini mwehu, siyeyo enaanikavihere okanna ohagalala hwebaribari. Opweha mburo wobajha dhithu dhomuzimuni mwigumini mwehu, winere onikavihera warabela makathamiho enadha nathabwaga othuwathuwela bure korowa, mabasa ni emuthu yehu. Mowindala, wikome wihina weregena dhithudha ni thotho ni wande ohagalasa murima wa Yehova! — Pro. 23:15.