Apocalipse​—Anatapulela ddi wodhela egumawo osongolo

 1. Yothoma baani yathima athu enahoweliwa werana?

KADDA muthu anofwanelela werana yothoma yathima. Omukavihera Yehova Mulugu ninga namathonga a elabo yatene, obe okala epaddi wamwiddani aye abure, Saddana Diyabo? Dhiriwo dhosakula ndha biili baahi. Kadda muthu anofwanelela osakula epaddi anafuniye okalawo, mwaha yothoma ela enere omuthukulela muthu okanna egumi obe okwa. (Mat. 25:31-33, 46) Muwari mwa ‘yohoseya enlubale,’ athu enere ogawiwa, akala enere ovulusiwa obe enere okwa. — Apo. 7:14; 14:9-11; Eze. 9:4, 6.

 2. a) Hebreus 10:35-39 ananikongomedha wera ddi? b) Livuru na Apocalipse ninaanikavihere addi?

² Omwileri Hebreus 10:35-39. Akala we osakunle okavihera onamathonga wa Yehova, oherana yothoma yapama. Mwebaribarene, onofuna wakavihera athu owinjhiva osakula ethu yapama. Mowindala, we podi olabihera livuru na Apocalipse wihina waakaviherena athu yala. Livuru nna notikiniha, nnowoniha ethu enaapadduwele amwiddani a Yehova, teto livuru nimodhave nnowawoga mareeliho enawakele ale eri oororomeleya wa Yehova. Ola muselu wathima nnafwanelelihu ohudhera. Mwaha nerana yeyo, nnere wanda okalave txithi wihina nikale oororomeleya wa Yehova. Ohiya eyo, iyo podi olabihera ndhe nihudherihu wihina naakaviherena amodha werana yothoma yapama ni odidelave omulabela Yehova.

 3. Yohudhera ela nnoone ddi?

³ Yohudhera ela, nnere wawakula makoho ala: Ale enakavihera Omwene wa Mulugu enaawakele mareeliho baani? Ki ale enamukavihera mwanenyama owopiha oofila alebiwe va livuru na Apocalipse, enaapadduwele ddi?

 4. Nikuru baani onne Juwawu odhulu vamodha ni Yesu?

⁴ Murumiwi Juwawu ahawoona makuru menli enakavihera Omwene wa Mulugu ni enaakele egumi yohimala. Nikuru nobajha eri athu owakwana 144 000. (Apo. 7:4) Aliwa esakuliwe elabo yavati wihina ekalege odhulu ni okasa epaddi wa Omwene wa Mulugu. Egaari odhulu, aliwa enerege wanda othonga elabo yavati. (Apo. 5:9, 10; 14:3, 4) Wodhela woona waye, Juwawu woona nikuru nna na 144 000 egimenle vamodha ni Yesu mwango wosiyawu. — Apo. 14:1.

 5. Oothikitheliwa enaahale elabo yavati wafiya ohoseya winlubale enaapadduwele ddi?

⁵ Obajha mudhidhi warumiwi ofiyera mudhidhi yola wehu, athu owinjhiva ehisakuliwa wihina ekale epaddi ya 144 000. (Lucas 12:32; Rom. 8:17) Mbwenye wodhela woona waye, Juwawu onona wi nikuru nig’ono nna, obe a 144 000 amodha yakale elabo yavati malabo ookuthula. A 144 000 ala yaahale elabo yavati, yere wakela selu enatonyihedha orumedhiwa ni Yehova ohoseya winlubale ohunafiye. (Apo. 7:2, 3; 12:17) Vano, wafiya ohoseya winlubale, aliwa enere othukuleliwa odhulu, wengo enere witaganyihedha ni oothikitheliwa amodha yaari oororomeleya ofiyera okwa wewa. Wengo enerege othonga elabo yavati vamodha ni Yesu Kiristhu. — Mat. 24:31; Apo. 5:9, 10.

6-7. a) Numala woona nikuru nne nobajha, voharela Juwawu oonile nikuru baani, ki iyo nnonne ddi wodhela nikuru nna nanabili? b) Mwahaya bwaddi kapitulu 7 ya Apocalipse egafwanelelaga wathukula murima addibila oothikitheliwa enakale elabo yela yavati vamodha ni ‘muthithi munlubale’ waathu?

⁶ Numala wawoona oothikitheliwa ala, voharela Juwawu woona ‘muthithi munlubale.’ Mohiyana ni a 144 000, Bibliya kanaasoriya athu angasi enakosa epaddi wa muthithi munlubale. (Apo. 7:9, 10) Iyo nnonne ddi wodhela muthithi ola waathu? Apocalipse 7:14 anihina: ‘Ala bale ekumme muhoseyani winlubale, aliwa ehafula malaya ewa oolapa ni ehabwiniha munikamehi mwa Nimbila.’ (Apo. 7:14) Yavuluwa muhoseyani winlubale, ‘muthithi waathu’ onere okala elabo yela yavati ni yawakele mareeliho amalabo amatene. — Sal. 37:9-11, 27-29; Pro. 2:21, 22; Apo. 7:16, 17.

⁷ Akala we osakuliwe wihina wathongege vamodha ni Yesu odhulu obe okala elabo yela yavati, we onowanda wiwoona wengo wawakelaga mareeliho yala? Nnohowela werana yeyo. Ola onaakale mudhidhi wohagalasa wa makuru yala menli! Mwebaribarene, nnere ohagalala vanlubale mwaha osakula okavihera onamathonga wa Yehova. Ki dhithu dhimodha dhinawoga livuru na Apocalipse wodhela ohoseya winlubale siivi? — Mat. 24:21.

 8. Yopadduwa baani enaathukulele ohoseya winlubale, ki athu owinjhiva enerege ddi?

⁸ Ninga nonilihu musolo nihudherihu mundduli, anamathonga eelabo yela, vohilegela enere omugujhula Babiloniya munddimuwa, anatapulela dhigereja dhatedhene dhowoota. (Apo. 17:16, 17) Ogujhuliwa wula, winere othukulela wihina ohoseya winlubale wambele. Eyo enere wathukulela athu wambela omulabela Yehova? Naari, kahi yeyo enafuna wereya. Apocalipse kapitulu 6 anowoniha wihina mudhidhi yola worusa, athu ehinamulabela Yehova enaajege nikavihero mmadani mwanamathonga ni mwaliba waweddana malondda a elabo yela. Ayo enaliganihiwa ni mwango, mwaha wohikavihera Omwene wa Mulugu, aliwa enere okala amwiddani a Yehova.—Lucas 11:23; Apo. 6:15-17.

 9. Mwahaya bwaddi ohoseya wafiya nikuru na Yehova kannasitheyege, mwaha wa yeyo enaapadduwele ddi?

⁹ Ohoseya winlubale wafiya, adhari oororomeleya a Yehova kinasitheyege. Aliwa binakale nikuru nnahale elabo yela yavati enamwebedha Yehova ni ehinarumedha omukavihera ‘mwanenyama owopiha.’ (Apo. 13:14-17) Ororomeleya wewa wa Yehova winere watatamula amwiddaniwa wanyanyuwela. Bumwahaya, nikuru napolitika nelabo nnere otugumana nnere wegeredha nikugu wihina nigujhule nikuru nanamona a Yehova elabo yatene, Bibliya anithana nikuru nno Gogi amagogi. — Eze. 38:14-16.

10. Mowiwanana ni Apocalipse 19:19-21, Yehova anaakale avi oona nlogo naaye nigujhuliwaga?

¹⁰ Yehova anere ddi oona nlogo naaye nigujhuliwaga? Oliye anihina: ‘Owali waaga onere otatamuwa.’ (Eze. 38:18, 21-23) Kapitulu 19 ya Apocalipse enowoga ethu enaapadduwe vasongolova. Yehova anere omuruma mwanaye wihina abarele nlogo naye ni aagujhule amwiddanaye. Yesu vamodha ni anyakoddo oodhulu enegeredhiwa ni angero oorormeleya a Yehova ni a 144 000, enere owana ni Gogi amagogi. (Apo. 17:14; 19:11-15) Koddo ela enatatamule ddi? Athu atene ni nlogo natene nihiri epaddi ya Mulugu enere ogujhuliwa moheddeliwa thagaraga. — Omwileri Apocalipse 19:19-21.

11. Mutoma wa livuru na Apocalipse buvi?

¹¹ Kubuwela ohagalala enaakanne adhaari a Yehova mwaha ovuluwa ni wawoona amwiddani a Yehova egamanle opiwa. Mwebaribarene, ola onaakale mudhidhi wohagalasa vanlubale. Ogujhuliwa wa Babiloniya munddimuwa onere wahagalasa angero odhulu. (Apo. 19:1-3) Ethu emodhaya enaadhihe ohagalala bi ‘matelo a Nimbila,’ ola bumutomaya onasoriha livuru na Apocalipse. — Apo. 19:6-9.

12. Mowiwanana ni Apocalipse 21:1, 2, matelo a Nimbila enereye alini?

¹² Matelo ala enereye alini? Nihinona wi atene yale enakosa epaddi ya 144 000, enaakale odhulu wihina ewanihe koddo ya Armajedo. Mbwenye matelo ala kinereye mudhidhi yola. (Omwileri Apocalipse 21:1, 2.) Matelo a Nimbila, enereye yavira koddo ya Armajedo ni yapiwa amwiddani atene a Mulugu. — Sal. 45:3, 4, 13-17.

13. Matelo a Nimbila yereyaga enaapadduwe ddi?

¹³ Matelo a Nimbila yereyaga enaapadduwe ddi? Vamateloni enomugumaniha mulobwana ni muhiyana. Ni makalelo, mamodhave, matelo a Nimbila enere omugumaniha Mwene, Yesu Kiristu, nnamwalaye eri a 144 000. Yopadduwa ela yathima, enere otikitedha Omwene muxa onaakabelele elabo yavati muwari mwa yaka 1000. — Apo. 20:6.

14-15. Kapitulu 21 ya Apocalipse enaaliganiha a 144 000 ninddi? (Osugwe fotu eri vakapani.)

¹⁴ Kapitulu 21 ya Apocalipse, enaliganiha nikuru nna na 144 000 ni sidade yowooma enithaniwa ‘Jeruzale muxa.’ (Apo. 21:2, 9) Sidadi ela, yakaviheriwa ni mabwe owakwana 12 yanna ‘mandina aarumiwi 12 a Nimbila.’ Mwahaya bwaddi makalelo ala oowoga edhe edahinyege murima wa Juwawu? Mwaha oliye ahona ndina naye nigalebiwe va nibwe vevale. Ola oneeti munlubale vamentoni vaye!— Apo. 21:10-14; Efé. 2:20.

¹⁵ Sidadi ela yoladdanihiwa, sohiyana ni sidadi dhimodha. Dila enlubaleya ya sidadi yele, yaari ya oru, ni sidadiya ehikanna musiwo 12 dhisasanyiwe ni mabwe oojerimela, alisersiya ni txingaya esasayiwe ni mabwe owinjhiva ni athima, mpimo dhatedhene dha sidadi yele sologomana. (Apo. 21:15-21) Mbwenye Juwawu woonelamo wihina akala ethu yahala! Kaasugwe madhu aawongiye: ‘Kagoonilewo newene tempulu modha, mwaha Yehova Mulugu akopolo dhatedhene vamodha ni Nimbila, si tempulu yewa. Sidadiya kinahowela nduwa obe mweri wihina emoneyelegemo, mwaha nthithimiho na Mulugu, thinamoneyamo, teto lampada newa di Nimbila.’ (Apo. 21:22, 23) Ale enakosa epaddi ya Jeruzale muxa enere okanna ofuru womwaddamela Yehova. (Heb. 7:27; Apo. 22:3, 4) Mowindala, Yehova vamodha ni Yesu biri tempulu ya sidadi yele.

16. Muwari mwa yaka 1000 enaapadduwe ddi naathu a elabo yela yavati?

¹⁶ Mwebaribarene, ale eri oothikitheliwa enohagalala vanlubale yubuwelaga sidadi yela. Teto naleya enna ejhehero yokala elabo yela yavati, naliwaya yonege sidadi ela ninga ethu yathima. Mwahaya? Mwaha muwari mwa yaka 1000 Jeruzale muxa, anere wadhana mareeliho owinjhiva elabo yela yavati. Juwawu woona ‘muhinjhe wegumi’ onatapulela mareeliho yala. Dhipaddi dhabilidhene wa muhinjhe ola dhahikalawo ‘mithanko dhowima’, matakuru a mithanko ndha, dhinalabiheriwa wihina ‘evulumusiwena malogo.’ (Apo. 22:1, 2) Athu atene eelabo yavati, enere okanna oneti wowakela mareeliho yala. Vag’ono vag’ono, athu enere wambela ologomana. Kunadha okalawo oredda, woona goyi, newene omoriha mintori mwaha wowukuuwa. — Apo. 21:3-5.

17. Mowiwanana ni Apocalipse 20:11-13, muwari mwa yaka ndha 1000 baani anaawakele mareeliho?

¹⁷ Baani anawaakele mareeliho ala? Atene yale enaavuluwe mukoddoni ya Armagedo, teto podi wera nahimaya enaabaliwe mwilaboni exa. Mbwenye Apocalipse kapitulu 20 enororomeliha wi anookwa enovenyihiwa muukwani. (Omwileri Apocalipse 20:11-13.) Adhaari owoogowa ekwile enere ovenyihiwa muukwani wihina ekalege elabo yela yavati vamodha ni athu ohogowa, ale yahanna ofuru wohudhera wodhela Yehova. (Atos 24:15) Eyo enatapulela wi athu atene ekwile, enere ovenyihiwa mukwani wihina ekalege elabo yela muwari mwa yaka 1000? Naari. Ale enakanne ofuru womulabela Yehova mbwenye esakula ohumulabela kinakanne ofuru yoyo. Aliwa yahikanna ofuru wohudhera wodhela Yehova, mbwenye wodhela dhoweriha dhewa wooniha wihina kinafuna okala elabo yela yavati. — Mat. 25:46; 2 Tes. 1:9; Apo. 17:8; 20:15.

18. Dhavira yaka 1000 athu enaakale avi?

¹⁸ Omagomihero wa yaka 1000, athu atene enaakale elabo yela yavati enere ologomana. Yothega edhele wa Adawu kidha ekalawo, kaavo anonege goyi mwaha wa yothega. (Rom. 5:12) Dhavira yaka 1000, athu atene a elabo yavati enere ohogolowela okala oologomana. — Apo. 20:5.

19. Ofuru baani enakanne athu atene oologomana yafiya yoweha yogomihera?

¹⁹ Nihinona wihina Yesu aari owimela txithi naari eehiwaga ni Saddana. Teto aari oororomeleya. Nerege athu atene oologomana egaherana emodhave, naarive yehiwaga ni Saddana? Kadda muthu anere okanna ofuru yowoniha ororomeleya waye wa Yehova, mudhidhi yoyo Saddana akumihiwa mukadeya avokedhiwiyemo dhavira yaka 1000. (Apo. 20:7) Ale enonihe wi bororomeleya wodhela yoweha ela yogomihera, enere wakela egumi yohimala ni egumi yebaribari. (Rom. 8:21) Mbwenye ale ehiniwelele, enere otolosiwa vamodha ni Saddana. — Apo. 20:8-10.

20. Vano mubuwelo wawo ori avi nuwona dhovuhulela ndha dhotikiniha dha Apocalipse?

²⁰ Vano mubuwelo wawo ori avi nupendda muselu ola onawogiwa livuru na Apocalipse? Kahiyo ethu yotikiniha wihina nihiyoyo nnokosa epaddi yowakwaneliha ya yovuhulela ela ya Apocalipse? Kunakanna efunelo yowakavihera amodha naliwaya omwebedha Yehova? (Apo. 22:17) Mwebaribarene dhohudhera ndha, dhihagalasa vanlubale murima dhehu wodhela wubuwela ejhehero ninnihuna osongolo. Ninga murumiwi Juwawu, nihiyoya nnokanna efunelo yowoga: ‘Amem! Mudhe, Nabwiya Yesu.’ — Apo 22:20.