Sa-sika
Tẽne, sa-sika, 1
Sã n ka ne maam, yãmb ka tõe n maan bũmb baa fɩ ye.—Zã 15:5.
Yaa neb nins sẽn tar zood sõma ne a Zeezi wã bal n na n paam n dɩ a maoongã nafa. Bõe n wilgd rẽ? A Zeezi yeelame tɩ yẽ na n ‘kõo a vɩɩmã a zo-rãmbã yĩnga.’ (Zã 15:13) Wẽn-sakdb nins sẽn maan kaalem nand t’a Zeezi wa tẽngã zugã na n paam n zãmsa bũmb wʋsg a Zeezi zugu, hal n wa nong-a. Wala makre, a Abrahaam, a Saara, a Moyiiz la a Rahaab na n vʋʋgame, la na n yɩɩ tɩlɛ tɩ b bao zood sõma ne a Zeezi n yaool n paam vɩɩm sẽn kõn sa wã, baa ne b sẽn tũ a Zeova ne b sũy fãa wã. (Zã 17:3; Tʋʋ. 24:15; Ebre. 11:8-12, 24-26, 31) D sẽn paam n naag a Zeezi n taasd nebã Wẽnnaam Rĩungã koe-noogã, la d zãmsd-bã noom-d lame. A Zeezi sẽn wa n be tẽngã zugã, a ra yaa karen-saamba. A sẽn leb saasẽ wã tɛka, a lebga tigingã taoor soaba, n ket n get koɛɛgã mooneg la nebã zãmsg yelle. A nanda modgr ning d sẽn maande, n na n sõng neb wʋsg tɩ b bãng yẽ ne a Ba wã sõma wã. Sɩd-sɩdã, yaa vẽeneg tɩ sã n pa ne a Zeova la a Zeezi sõngre, d pa tol n tõe n tʋm tʋʋm-kãnga ye.—Zã 15:4. w20.04 22 s. a 7-8
Talaato, sa-sika, 2
Rĩm-dãmb a yiibã na n zĩnd . . . n goma zĩrẽ goam ne taaba. Dãn. 11:27.
Sɩngrẽ wã, naam yʋy nins sẽn yaa “rɩtg rĩmã” la “goabg rĩmã” yaa yʋy b sẽn da kõ Israyɛll tẽngã nug rɩtg la a nug goabg rĩm-dãmbã. (Dãn. 10:14) Hal n tãag yʋʋmd 33 Pãntekotã, Israyɛll nin-buiidã n da yaa a Zeova nebã. La sẽn sɩng ne yʋʋm-kãnga, a Zeova wilga vẽeneg tɩ yaa a Zeezi karen-biis hakɩɩkã n lebg yẽ nin-buiidu. Rẽ n so tɩ Dãniyɛll sak 11 wã bãngr-gomdã zãng la bal gomd neb nins sẽn sak a Zeezi wã yell lakae, pa Israyɛll nin-buiidã yell la a gomd ye. (Tʋʋ. 2:1-4; Rom. 9:6-8; Gal. 6:15, 16) Hal pĩnd n tãag masã, rĩm-dãmb toor-toor n lebg rɩtg rĩmã la goabg rĩmã, n ledg taaba. La baa ne rẽ, bũmb wʋsg la b maan tɩ wõnd taaba. Pipi, rĩm-kãensã fãa la bal soogame, wall b nams Wẽnnaam nin-buiidã hal sõma. Yiibu, b fãa sẽn tall manesem ning ne Wẽnnaam nebã wilgame tɩ b kisa Wẽnnaam sɩd-sɩd a Zeova. La tãabo, b fãa ra wagsda taab naamã poorẽ. w20.05 3 s. a 3-4
Arba, sa-sika, 3
Mam yaa m sẽn yaa-a soabã.—Yik. 3:14.
Zeova lebgda a sẽn dat a soab fãa, n kɩt tɩ bũmb fãa yɩ, a raabã pidsg yĩnga. D tõe n lebga ebre gom-biis nins b sẽn lebg tɩ “mam yaa m sẽn yaa-a soabã” tɩ: “Mam na n lebga mam sẽn dat n lebg a soaba.” Siglgã nong n sagenda tõnd tɩ d tagsd Wẽnnaam zʋg-sõma wã sẽn sek waoogr la yɛɛsgã yelle. A Zeova tõeeme me n kɩt tɩ sẽn tũud-b yẽ wã lebg a sẽn dat a soab fãa, a raabã pidsg yĩnga, baa ne b sẽn pa zems zãngã. (Eza. 64:7) Woto, a Zeova kɩtdame t’a raabã pidsi. Bũmb pa tõe gɩdg-a t’a pa pids a bõn-daab toor-toorã ye.(Eza. 46:10, 11) D sã n bʋgs bũmb nins fãa d Ba sẽn be saasẽ wã sẽn zoe n maane, la a sẽn sõng tõnd me tɩ d tõog n maanã zugu, d sũur na n maneg n yɩɩ noog ne-a. Wala makre, d sã n bʋgs bũmb nins fãa a Zeova sẽn naan tɩ be yamleoogã zugu, na n yɩ-d-la noog hal tɩ d pẽge. (Yɩɩn. 8:4, 5) D sã n bʋgs a Zeova sẽn kɩt tɩ d yɩ a soab n tõog n maan a raabã, na n kɩtame tɩ d maneg n waoogd-a ne d sũur fãa. A Zeova yʋʋrã sɩd seka zoees la waoogre! Yʋʋrã wilgda d Ba wã sẽn yaa a soaba, a sẽn zoe n maane, la a sẽn na n wa maane.—Yɩɩn. 89:8, 9. w20.06 9-10 s. a 6-7
Lamusa, sa-sika, 4
Wẽnnaam . . . n kõt ninsaalbã fãa vɩɩm vʋʋsem la bũmb fãa.—Tʋʋ. 17:24, 25.
Ogsɩzɛnnã bɩ pems-sõngã yaa tɩlɛ ne rũmsã la ninsaalbã, bala yaa yẽ la b vʋʋsda. B geelame n mik tɩ yʋʋmd fãa, pems-sõngã bõn-vɩɩsã sẽn vʋʋsdã yaa ton milyaar koabga. Bõn-vɩɩsã sã n vʋʋsdẽ, b yiisda pems-rẽgd b sẽn boond tɩ diogsɩɩd de karbon. Baa ne rẽ fãa, pems-sõngã pa tol n tõe n sa ye. Pems-rẽgdã b sẽn yiisdã me pa pit zĩigã n loog nug ye. Bõe yĩng tɩ yaa woto? Bala, a Zeova naana moodã la tɩɩs buud toor-toorã, tɩ b kokd pems-rẽgdã la b yiisd pems-sõngã. Sẽn yɩt to-to tɩ d paamd pems-sõngã sɩd wilgdame tɩ rũndã daar vɛrse wã sẽn yetã yaa sɩda. Wãn to la d tõe n wilg tɩ d sũur nooma ne tẽngã sẽn ka to wã, la bõn-sõma nins fãa sẽn be a zugã? (Yɩɩn. 115:16.) Yaa d sẽn na n bʋgsd bũmb nins a Zeova sẽn naanã zutu. Woto na n kɩtame tɩ d pʋʋsd a Zeova bark daar fãa, bõn-sõma nins a sẽn kõt tõndã yĩnga. Sẽn paase, d sã n modgdẽ tɩ d sẽn vɩ zĩig ningã yaa yɩlemd wa d sẽn tõe tɛka, wilgdame me tɩ d sũur nooma ne tẽngã. w20.05 22 s. a 5, 7
Arzũma, sa-sika, 5
Mam na n wilgame tɩ m yʋ-kãsengã b sẽn sãam buud toay-toayã sʋkã . . .yaa yʋʋr sẽn welg toore.—Eze. 36:23.
A Zeova welga yell ning a Sʋɩtãan sẽn wa ne wã ne yam, sũ-mar la tɩrlem. A wilga naoor ka tɛk me t’a pãngã ka to ye. Sẽn yɩɩd fãa, a nonglmã pukda a sẽn maand fãa pʋgẽ. (1 Zã 4:8) A Zeova tʋmda wakat fãa a yʋʋrã waoogr yĩnga. A Sʋɩtãan ket n sãamda Wẽnnaam yʋʋrã rũndã-rũndã. A belgda nebã tɩ b sãmbd Wẽnnaam sã n sɩd yaa pãn-kãsenga, tɩrlem, yam la nonglem soaba. Wala makre, a Sʋɩtãan makdame n na n kɩt tɩ nebã tẽ tɩ pa a Zeova n naan bũmba fãa ye. La nebã sã n tẽed tɩ Wẽnnaam beeme, a Sʋɩtãan makdame n na n kɩt tɩ b tẽ tɩ Wẽnnaam yaa dem-deme, la t’a noyã tũub yaa toogo, n leb n pa zems ye. A Sʋɩtãan pʋd n zãmsda nebã t’a Zeova pa nimbãan-zoɛta, la t’a yaa nen-kɛglem soab sẽn yõogd nebã bugum yiri. Nebã sã n tẽed ziri a woto, nana-nana bala, b wat n zãgsa a Zeova naamã sẽn yaa tɩrgã. Hal t’a Zeova wa sãam a Sʋɩtãan zãng fasɩ, a Sʋɩtãan na n baoome n kɩt tɩ yãmb me kɩɩs a Zeova. Y na n basame t’a tõog-y bɩ? w20.06 5 s. 13-15
Sibri, sa-sika, 6
Gɛrk bɩ Zʋɩf kae, bãong wall moonem kae, sãan kae, Sit kae, yamb wall burkĩn me kae ye. La Kirist yaa bũmb fãa, fãa pʋgẽ.—Kol. 3:11.
D tẽed-n-taas n be tigims wʋsg pʋsẽ, n maood n na n zãms buud-gom-zẽnga. Tõe n yɩɩ toog ne-b tɩ b sõs ne-d n togs b tagsgo. La d sã n getẽ tɩ zʋʋg b sẽn gomd d buud-gomdã to-to wã, d na n yãame tɩ b sɩd nonga a Zeova, la b tʋll ne b sũy fãa n tũ-a. D sã n ne b zʋg-sõma wã, d na n sɩd nand-b lame la d nong-ba. D pa na n yeel tɩ “mam pa rat fo sõngr ye,” b sẽn pa gomd d buud-gomdã sõma wã yĩng ye. (1 Kor. 12:21) A Zeova kõo d ned kam fãa tʋʋmd sẽn tar yõod a tigingã pʋgẽ. D yaa pag tɩ d yaa raoa, d kẽe kãadem tɩ d pa kẽ me, d yaa bi-bɩɩg wall d yʋʋmã vẽsgame, pa rẽ bɩ d gomda buud-gomd ning sõma wall d pa gomd-a sõma, d fãa tara yõod wʋsg a Zeova nifẽ, la d taabã nifẽ. (Rom. 12:4, 5; Kol. 3:10) Bɩ d gũusd n get d sẽn tõe n maan n keng d tẽed-n-taasã raoodo, nand-b la d nong-ba. w20.08 31 s. 20-22
Hato, sa-sika, 7
Neb kẽer n tɩ naag-a n lebg tẽedba.—Tʋʋ. 17:34.
Baa ne Atɛn neb wʋsg sẽn da yaa bõn-naands pʋʋsdba, yoaadb la filozof-rãmbã, tʋm-tʋmd a Poll pa tags tɩ b pa tol n tõe n lebg kiris-neb ye. Sẽn paase, a kell n taas-b-la koɛɛgã, baa ne b sẽn da tʋʋd-a wã. Nand t’a Poll meng wa lebg kiris-neda, a ra yaa ‘wẽn-tʋʋsa, ned sẽn da namsd kiris-nebã, la tɩta-neda.’ (1 Tɩm. 1:13) Wa a Zeezi sẽn da kɩs sɩd t’a Poll tõe n wa lebga kiris-nedã, a Poll me ra kɩsa sɩd tɩ Atɛn nebã tõe n wa lebga a Zeezi karen-biisi. La sɩd yɩɩ wa a sẽn da tagsdã. (Tʋʋ. 9:13-15) Pipi kiris-nebã wakatẽ, neb buud toor-toor n sak n lebg a Zeezi karen-biisi. A Poll sẽn gʋls lɛtr n tool kiris-neb nins sẽn da be Gɛrɛs sẽn yaa Korẽnt tẽng a ye pʋgẽ wã, a yeelame tɩ tigin-kãng neb kẽer da yaa bi-beese, wall neb sẽn da tʋmd tʋʋm-dẽgdo. Rẽ poore, a paasame yaa: “La Wẽnnaam peka yãmb tɩ y lebg yɩlma.” (1 Kor. 6:9-11) Yãmb da tõe n tags tɩ neb a woto tõe n toeemame n wa lebg a Zeezi karen-biis sɩda? w20.04 12 s. 15-16
Tẽne, sa-sika, 8
Mam yaa n yɛɛme. Reeg-y m vɩɩmã.—1 Rĩm. 19:4.
Ned sã n wa tar sãmbs ne a Zeova tũubã sã n sɩd tara yõodo, kãsem-dãmbã pa segd n yɩ tao-tao n kao a soab bʋʋd ye. B pa segd n ning-a taal ye. B pʋd n segd n bao n wʋma a sẽn tagsd woto wã võore, la a manesmã me võore. Rẽ poor masã la b tõe n karem Biiblã vɛrse-rãmb sẽn na n keng a raoodo. Wakat n zĩnd tɩ na-pag a Zezabɛll ra baood no-rɛɛs a Eli n dat n kʋ, t’a zoe. (1 Rĩm. 19:1-3) A Eli ra tagsdame tɩ yaa yẽ sẽn yaa no-rɛɛsã bal n da tũud a Zeova, la t’a tʋʋmdã yɩɩ zaalem. A ra ratame meng n ki tɩ sa. (1 Rĩm. 19:10) La a Zeova pa ning a Eli taal ye. A pʋd n sõnga a Eli t’a bãng t’a pa a yembr n ket n tũud-a, t’a tõe n teega yẽ a Zeova pãngã, la t’a rat n kõ-a-la tʋʋm a taaba. A Zeova maana sũ-mar n kelg a Eli t’a togs-a a zu-loeesã. Rẽ poore, a kõ-a-la tʋʋm a taab n paase. (1 Rĩm. 19:11-16, 18) A Zeova sẽn maan woto wã kõta tõnd yam-bʋgo? Tõnd ned kam fãa, la sẽn yɩɩd fãa kãsem-dãmbã segd n maana sũ-mar ne d tẽed-n-taasã. D saam-biig sẽn lak n bas a Zeova nin-buiidã sã n yeel bũmb sẽn wilgd tɩ sũ-toog n tar-a, wall a tagsdẽ tɩ pa segd t’a Zeova kõ-a sugri, kãsem-dãmbã na n kelg-a lame t’a togs sẽn be a sũurẽ wã fãa. Rẽ poor masã la b na n mao n sõng-a t’a bas a yam t’a Zeova nand-a lame. w20.06 22 s. 13-14
Talaato, sa-sika, 9
F zoa hakɩɩk nong-f-la wakat fãa.—Yel. 17:17.
A Zeova naana tõnd tɩ d tõe n naagd d zakã rãmb la d zo-rãmbã n maand bũmb kẽer tɩ kõ-d sũ-noogo. (Yɩɩn. 133:1) A Zeezi ra tara zo-rãmb hakɩɩka. (Zã 15:15) Biiblã wilgda zood hakɩɩk sẽn tõe n naf tõnd to-to. (Yel. 18:24) A leb n yetame tɩ pa sõma tɩ d zãag d meng ne d taabã ye. (Yel. 18:1) Neb wʋsg tagsdame tɩ b tõe n tũnuga ne rezo sosiyo rãmbã n paam zo-rãmb wʋsgo, n da yɩ b yembr ye. La d segd n maana gũusgu. Bãngdb n maan vaeesgo, n mik tɩ neb nins sẽn kẽesd sẽk wʋsg rezo sosiyo rãmbẽ wã n get fot-rãmb nebã sẽn ningi, wall b karemd nebã sẽn gʋls be wã wat n getame tɩ b pa tar zo-rãmba, tɩ baas ne sũ-sãams bɩ deprɛsɩyõ. Bõe yĩnga? Tõe tɩ bũmb a ye yaa tɩ neb nins sẽn nong n ningd fot-rãmb rezo sosiyo rãmbẽ wã nong n tũusda b fot-neeba, wall bãmb ne b zo-rãmb fot-neeba, zĩ-neeb b sẽn kẽngẽ fot-rãmba, tɩ kɩt tɩ yaa wa b vɩɩmã tolg n yaa nuura. Nina tõe n gesa fot-kãense, n wa tagsdẽ tɩ yẽnda yẽ vɩɩmã ka neng ye. w20.07 5-6 s. 12-13
Arba, sa-sika, 10
Tʋm-tʋmdbã ne kãsem-dãmbã tigma taab n na n ges yel-kãng yelle.—Tʋʋ. 15:6.
Yʋʋmd 1988 zĩ-likr kiuug pipi daar Gũusg Gasgã pʋgẽ, b yeelame: “Kãsem-dãmbã segd n sak n deegame tɩ ne vʋʋsem sõngã maasem, Kiristã tõe n kɩtame tɩ kãsem-soab ning togs saglg sẽn yit Biiblã pʋgẽ, tɩ sõng kãsem-dãmbã sull tɩ b bãng b sẽn na n maaneg yell ning wɛɛngẽ, wall b tõog n yãk yam tɩ yɩ sõma. (Tʋʋ. 15:7-15) Yaa tigingã kãsem-dãmbã fãa la vʋʋsem sõngã sõngda, pa b nin-yend bal ye.” Kãsem-soab sã n nand a taabã, b sã n wa tigim taaba, a pa na n bao n na n soog goamã ye. A pa na n tagsdẽ tɩ yẽ sẽn na n yeelã bal la sõma ye. A pʋd n segd n togsa a sẽn tagsdã ne sik-m-menga. A segd n kelga a taabã sẽn na n yeelã neere. Sẽn yɩɩd fãa, a raab yaa a togs Biiblã sẽn yetã, la a sakd n tũud “tʋm-tʋmd sẽn tũud sɩd la sẽn tar yamã” sẽn kõt sagls ninsã. (Mat. 24:45-47) Kãsem-dãmbã sã n wa sõsd yell ning zugu, tɩ b sõsgã wilgdẽ tɩ b nonga taab la b nand taaba, Wẽnnaam vʋʋsem sõngã na n zĩnda ne-ba, n sõng-b tɩ b tõog n bãng n yãk yam tɩ zemse.—Zak 3:17, 18. w20.08 27 s. a 5-6
Lamusa, sa-sika, 11
Kell n maan sẽn yaa sõma n tõog wẽnga.—Rom. 12:21.
Tʋm-tʋmd a Poll sẽn paam zu-loees ninsã wõnda a Davɩɩd rẽndã. A Poll bɛɛbã pãng ra yɩɩd-a-la hal zĩig sẽn zãre. Naoor wʋsgo, b kɩtame tɩ b pãb a Polle, la b kẽes-a bãens roogo. Sẽn paase, neb sẽn da tog n yɩẽ a Poll zo-rãmb n wẽneg n nams-a ne wẽnem. Kẽer sẽn da be kiris-neb tigingã pʋgẽ meng n maan beem ne a Polle. (2 Kor. 12:11; Fili. 3:18) La a Poll tõoga neb nins fãa sẽn da zabd ne-a wã. Wãn to? Baa ne b sẽn bao n na n gɩdg-a wã, a Poll kell n wɩnga ne koe-moonegã. A kell n maana sɩd ne a tẽed-n-taasã, baa b sẽn da mi n sãam a sũurã. La sẽn yɩɩd fãa, a kell n maana sɩd ne Wẽnnaam hal n tãag a yõor tɛka. (2 Tɩm. 4:8) A tõog n yalsa kãn-kãe zu-loe-kãsems pʋgẽ, la pa ne a meng pãng ye. Yaa a sẽn da teeg a Zeova wã yĩnga. Yaa tɩlɛ ne yãmb tɩ y tõog toogo, neb sẽn tʋʋd-y wall b sẽn namsd-y y tũudmã yĩng bɩ? Yaa sɩd tɩ y bõn-daabã pa y lobg ned kugr tɩ võd n kẽe a rĩirẽ wã, wa a Davɩɩd sẽn maanã ye. Y sẽn datã yaa y tõog tɩ Wẽnnaam Gomdã kẽ nebã sũy sõma. Yaa y sã n tikd Biiblã sẽn yetã n leokd nebã sogsgo, la y waoogd sẽn maand-b yãmb wẽngã, la y maand nebã fãa neere, baa y bɛɛbã, la y na n tõog n maan woto.—Mat. 5:44; 1 Pɩy. 3:15-17. w20.07 17-18 s. 14-15
Arzũma, sa-sika, 12
Yãmb sik-m-mengã zẽkda maam.—2 Sãm. 22:36.
D tõe n sɩd yeelame t’a Zeova yaa sik-m-meng soab bɩ? N-ye. Bala b rũndã daar vɛrse wã sẽn yet bũmb ningã wilgdã rẽ. (Yɩɩn. 18:35, MN) A Davɩɩd ra tagsda no-rɛɛs a Sãmwɛll sẽn da wa a Davɩɩd ba wã zakẽ n na n zae ned a to t’a wa lebg Israyɛll rĩmã. Kom-dibli a nii wã sʋka, a Davɩɩd n da yaa yao-zʋʋga. Yaool n yaa yẽ la a Zeova yãk t’a na n wa ledg a Sayulli. (1 Sãm. 16:1, 10-13) Sãmbg kae t’a Davɩɩd ra na n sak n deegame, tɩ bũmb ning b sẽn yeel Yɩɩn-sõamyã 113 pʋgẽ a Zeova zugã yaa sɩda. Ad b sẽn yeelã: “Bãmb sulgd n geta saasẽ la dũniyã. Bãmb yiisda ka-pãng soab tomẽ, la b yiisda nimbãan-ned tãmpʋʋrẽ. Bãmb kɩtdame t’a zĩnd ne nin-kãsemse.” (Yɩɩn. 113:6-8) A Zeova sẽn tar manesem ning ne ninsaalbã sẽn pa zems zãngã wilgdame t’a sɩd yaa sik-m-meng soaba. A pa sak tɩ d tũud-a bal ye. A sakame tɩ d yaa a zo-rãmb me. (Yɩɩn. 25:14) A Zeova kɩtame t’a Bi-riblã wa ki tɩ yɩ maoong d yel-wẽnã yĩnga, tɩ d tõe n paam a zoodo. Ad sɩd yaa nimbãan-zoeer tɛkẽ! w20.08 8 s. a 1-3
Sibri, sa-sika, 13
[A Zeova] pa rat tɩ ned baa a ye sãam ye. B ratame tɩ nebã fãa tek yam n kos sugri.—2 Pɩy. 3:9.
A Zeova zoe n yãka daar ning a sẽn na n sãam dũni-wẽn-kãngã. (Mat. 24:36) A pa na n yãg n sãam-a tɩ daar-n-kãng pa ta ye. Yaa sɩd t’a rata ne a sũur fãa n vʋʋg sẽn ki-bã, la a maanda sũ-mare. (Zoob 14:14, 15) A gũudame tɩ wakat ning a sẽn yãkã ta t’a yaool n vʋʋg-ba. (Zã 5:28) D bee bʋʋm n na n wilg a Zeova tɩ d sũur nooma ne-a, a sũ-marã yĩnga. Yãmb we n tags n gese: A Zeova sũ-marã yĩnga, neb wʋsgo, tõnd mensã sẽn naage, paamame n “tek yam n kos sugri.” A Zeova ratame tɩ neb wʋsg wa tõog n paam n vɩɩmd wakat sẽn kõn sa. Bɩ d wilg tɩ d sũur nooma ne-a, a sũ-marã yĩnga. Wãn to? Yaa d sẽn na n modg n bao neb nins sẽn “tar yam ning sẽn zems ne vɩɩm sẽn ka sɛtã,” n sõng-b tɩ b wa nong a Zeova la b tũud-a. (Tʋʋ. 13:48) Yaa rẽ la bãmb me na n paam n dɩ a Zeova sũ-marã nafa wa tõndo. w20.08 18 s. 17
Hato, sa-sika, 14
Sẽn-Ka-Saabo, kɩt-y tɩ m bãng y soayã, zãms-y maam yãmb soayã.—Yɩɩn. 25:4.
Biibl karen-biigã sẽn zãmsd bũmb ningã pa segd n be a yamẽ wã bal tɩ noom-a ye. Segd n kẽe a sũurã me. Bõe yĩnga? D sũurã, rat n yeel tɩ d tʋlsmã la d raabã, n na n kɩt tɩ d rat n tũ d sẽn zãmsdã. A Zeezi ra zãmsda nebã bũmb wʋsgo, hal tɩ b ra nong a kelgre. Nebã sẽn da tũud-a wã yaa a goamã sẽn da kẽed-b sũyã yĩng me. (Luk 24:15, 27, 32) Y karen-biigã segd n getame t’a Zeova sɩd beeme, n yaa ned a sẽn tõe n yõg zood ne, la a get-a wa a Ba, a Wẽnnaam, la a Zoa. (Yɩɩn. 25:5) Y sã n wa zãmsd-a Biiblã, bɩ y sõng-a t’a bãng Wẽnnaam sõma. (Yik. 34:5, 6; 1 Pɩy. 5:6, 7) Sẽn yaa bũmb ning fãa zug la y sõsda, bɩ y sõng-a t’a bãng a Zeova sẽn yaa a soaba. Sõng-y-yã-a t’a bãng t’a Zeova yaa nonglem, maan-neer soaba, la nimbãan-zoɛta. A Zeezi yeelame tɩ “noor ning sẽn yaa kãseng n yɩɩdã, n yaa pipi noor” yaa “nong a Zeova sẽn yaa fo Wẽnnaamã.” (Mat. 22:37, 38) Modg-y n sõng-y karen-biigã t’a nong a Zeova ne a sũur fãa. w20.10 10 s. 12
Tẽne, sa-sika, 15
A Zeezi ra nonga a Mart ne a ma-bi-poakã, la a Lazaare.—Zã 11:5.
A Zeezi ra waoogda pagbã. (Zã 4:27) Pagb nins sẽn da maand a Ba wã raabã la a ra nand n yɩɩda. A sẽn wa n wilgd sẽn yaa neb nins n yaa a zakã nebã, pagb me ra naagame. (Mat. 12:50) A ra yaa b zoa hakɩɩka. Tẽeg-y yẽ ne a Maari la a Mart zoodã yelle. Tõe tɩ pʋg-kãensã ra pa kẽ kãadem ye. (Luk 10:38-42) Yaa vẽeneg t’a Zeezi no-goamã la a manesmã kɩtame tɩ b ra nong a zĩigẽ. Wala makre, a Maari ra nong n zĩi a Zeezi sɛɛgẽ n kelgd-a wa a karen-biiga. Daar a ye, a Mart sũur pa yɩ noog ne a Maari sẽn bas n pa sõng-a ne rɩɩbã seglgã ye. A Mart basa a yam n togs a Zeezi sẽn da be a sũurẽ. A Zeezi tũnuga ne segb-kãng n kell n sõng pagb a yiibã, tɩ b bãng bũmb wʋsgo. A leb n tɩ kaaga pʋg-kãensã ne b tão a Lazaar sasa a taaba, tɩ wilgdẽ tɩ b yell ra pak-a lame. (Zã 12:1-3) Rẽ wã, a Lazaar yĩnsã sẽn wa n zabdẽ wã, a Maari ne a Mart ra mii vẽeneg tɩ b tõe n paama sõngr a Zeezi nengẽ.—Zã 11:3. w20.09 20 s. a 3; 21 s. a 6
Talaato, sa-sika, 16
Karen-biisã ra tẽedame tɩ Wẽnnaam Rĩungã na n puka zĩig pʋgẽ.—Luk 19:11.
A Zeezi karen-biisã ra tẽedame tɩ Wẽnnaam Rĩungã na n “puka zĩig pʋgẽ,” n fãag-b Rom-dãmbã sẽn da weoogd-bã nusẽ. D gũuda ne d sũur fãa wakat ning Wẽnnaam Rĩungã sẽn na n menes wẽnemã, la a kɩt tɩ tɩrlem zĩnd dũni-paalgã a sẽn na n luglã pʋgẽ wã. (2 Pɩy. 3:13) La yaa tɩlɛ tɩ d tall sũ-mar n gũ wakat ning a Zeova sẽn yãk rẽ yĩngã. A Zeova kõo a Nowe weer tɩ sek a na tõog n ka koom koglgo, la a “yɩ tɩrlem koe-moonda.” (2 Pɩy. 2:5; 1 Pɩy. 3:20) A Zeova sẽn wa n yãk yam n na n sãam Sodom ne Gomoor sẽn da pid ne nin-wẽnsã, a Abrahaam soka a Zeova sogsg wʋsg rẽ wɛɛngẽ, la a Zeova maaga a meng n kelg-a neere. (Sɩng. 18:20-33) A Zeova talla sũ-mar sẽn ka to ne Israyɛll nebã sẽn da lebg wẽn-kɩɩsdbã, n kaoos yʋʋm kobse. (Nee. 9:30, 31) A Zeova sẽn kõt nebã weer rũndã-rũndã tɩ b tõe n ‘tek yam n kos sugrã,’ wilgda vẽeneg t’a tara sũ-mare. (2 Pɩy. 3:9; Zã 6:44; 1 Tɩm. 2:3, 4) A Zeova mak-sõngã kõta tõnd bʋʋm tɩ d tall sũ-mare, n ket n moond koɛɛgã la d zãmsd nebã Biiblã. w20.09 10 s. a 8-9
Arba, sa-sika, 17
Wẽnnaam na n vʋʋga nin-tɩrsã ne sẽn pa-b nin-tɩrsã me.—Tʋʋ. 24:15.
A Zeova sã n wa vʋʋg sẽn ki-bã, a na n lebs n kõ-b-la b pʋ-tẽerã, la a kɩt me tɩ b yɩ wa b sẽn da yaa to-to pĩndã. Tags-y n ges-y rẽ sẽn dat n yɛɛlga. A Zeova nonga yãmb wʋsgo, hal n miẽ la a tẽr yãmb sẽn tagsde, sẽn be y sũurẽ, y sẽn yete, la y sẽn maand fãa. Rẽnd a sã n wa na n vʋʋg yãmba, na n yɩɩ nana ne-a t’a lebs yãmb y pʋ-tẽerã la y yel-manesmã, wa sẽn da yaa to-to pĩndã. Rĩm a Davɩɩd ra mii vẽeneg t’a Zeova mii tõnd ned kam fãa hal sõma. (Yɩɩn. 139:1-4) Tõnd tagsg segd n yɩɩ wãna, d sẽn mi t’a Zeova mii tõnd hal sõma woto wã? D sã n bʋgsd a Zeova sẽn mi tõnd sõma to-to wã zugu, d pa segd n maand yɩɩre, n tagsdẽ tɩ yaa d pãn-komsmã la a get ye. Bõe yĩnga? Tẽeg-y tɩ tõnd yell paka a Zeova hal sõma. A getame tɩ tõnd ned kam fãa tara yõod a nifẽ. A mii yɛl nins fãa sẽn kɩt tɩ d vɩɩmã yaa a soab rũndã-rũndã wa. Ad woto sɩd kengda pɛlga! D ra tol n tags tɩ d yaa d yembr ye. Wakat fãa, a Zeova bee ne tõndo, n dat n sõng-do.—2 Kib. 16:9. w20.08 17 s. 13-14
Lamusa, sa-sika, 18
Mam na n zãmsa foom, la m wilg foom sor ning f sẽn tog n tũ.—Yɩɩn. 32:8.
A Zeova sũur noomame, a sẽn zãmsd a nin-buiidã. A ratame tɩ d bãng-a sõma, n nong-a la d wa paam n vɩɩmd wakat sẽn kõn sa. Sã n da pa a Zeova sẽn zãmsd tõndã, d ra pa tõe n bãng woto fãa ye. (Zã 17:3) A Zeova tũnuga ne pipi kiris-nebã tiging n zãms a nin-buiidã. (Kol. 1:9, 10) Vʋʋsem sõngã, sẽn yaa “sõangd” ning a Zeezi sẽn da pʋlmã sõnga kiris-nebã wʋsgo. (Zã 14:16) Sõnga karen-biisã tɩ b wʋm Wẽnnaam Gomdã võor sõma, la tẽeg-b bũmb wʋsg a Zeezi sẽn yeel la a maane, tɩ b wa gʋls rẽ fãa Evãnzill-dãmbã pʋgẽ wã. Woto fãa paasa pipi kiris-nebã tẽeb pãnga. Kɩtame me tɩ b maneg n nong Wẽnnaam ne a Biigã, la b maneg nong taab me. A Zeova pĩnd n togsame tɩ “yaoolem wakatã,” buud toɛy-toɛy neb na n kaoog n waa a tãngã zugu, rat n yeel tɩ tũudum hakɩɩkã pʋgẽ, sẽn na yɩl n zãms a soayã. (Eza. 2:2, 3) D nee gom-kãngã sẽn pidsd rũndã-rũndã. w20.10 24 s. 14-15
Arzũma, sa-sika, 19
Yam soab sã n kelge, a na paam yam n paase.—Yel. 1:5.
Bõe n tõe n kɩt tɩ ned pa sak n kelg a zoa sẽn nong-a saglse? Yaa wuk-m-menga. Wuk-m-mens rãmbã nong n datame tɩ b “salemd b tʋbã.” B ‘basda sɩdã kelgre, n kelgd soalma.’ (2 Tɩm. 4:3, 4) B tagsdame tɩ ned pa tõe n sagl-ba, bala b tẽedame tɩ b yamã yɩɩda b taabã, bɩ tɩ b sãoo b taabã. Tʋm-tʋmd a Poll yaool n yeelame tɩ “ned sã n tagsdẽ t’a yaa bũmb n yaool n pa baa fʋɩ, a belgda a menga.” (Gal. 6:3) Rĩm a Salomo kʋmsa rẽ vẽenega. A yeelame: “Biig sẽn yaa naong soab n tar yam n são rĩm-kʋdr sẽn yaa nin-yaalg n ka leb n deegd saglgo.” (Koɛ. 4:13) D ges tʋm-tʋmd a Pɩyɛɛr sẽn kõ mak-sõng ningã, tʋm-tʋmd a Poll sẽn wa n sagl-a neb sʋkã. (Gal. 2:11-14) A Pɩyɛɛr ra tõe n yika a sũur ne a Polle, n yeel t’a sẽn kõ saglgã to-to wã pa zemse, la tɩ sẽn yɩ neb sʋkã me pa zems ye. La a Pɩyɛɛr talla yam. A saka saglgã n pa tall sũ-kẽk ne a Poll ye. Kaoosg zugẽ, a pʋd n boola a Poll t’a “saam-bi-nongre.”—2 Pɩy. 3:15. w20.11 21 s. a 9, 11-12
Sibri, sa-sika, 20
Bɩ y kẽng n tɩ sõng buud fãa neb tɩ b lebg mam karen-biisi,. . . , la y zãms bãmb.—Mat. 28:19, 20.
Bõe n na n sõng Biibl karen-biig t’a tẽebã bɩ sõma? Yaa tigissã kẽnde. Zãmsg nins d sẽn paamd Biiblã pʋgẽ d tigissã sasa wã na n sõng-a lame, t’a bãng bũmb wʋsg n paase, t’a tẽebã paam pãnga, la sõng-a me t’a maneg n nong Wẽnnaam. (Tʋʋ. 15:30-32) Sẽn paase, koe-moond tõe n togsa a karen-biigã a nonglmã ne a Zeova sẽn da tar paasgã sẽn sõng-a to-to t’a tõog n sak a noyã. (2 Kor. 7:1; Fili. 4:13) Biibl karen-biig sã n bãng koe-moondb toɛy-toɛy sẽn kõt mak-sõngo, a na n dɩka yam, n bãng Kiristã noor ning sẽn yet tɩ d nong Wẽnnaam la d taabã sẽn dat n yɛɛlga. (Zã 13:35; 1 Tɩm. 4:12) A na n yãa koe-moondb sẽn maood ne yẽ zu-loeesã buudu, n bãng t’a sẽn segd n toeem bũmb nins a vɩɩmã pʋgẽ n lebg Kirist karen-biigã pa yɩɩd a pãng ye. (Tõo. 30:11) Tigingã ned kam fãa tõe n maana bũmb toor-toor n sõng Biibl karen-biig t’a tẽebã bɩ.—Mat. 5:16. w20.11 5 s. 10-12
Hato, sa-sika, 21
Mam zaba ne we-rũms Efɛɛze.—1 Kor. 15:32.
Tõe tɩ tʋm-tʋmd a Poll ra gomda we-rũms sɩd-sɩd yell a sẽn zab ne Efɛɛz tẽngã reemã zakẽ. (2 Kor. 1:8; 4:10; 11:23) Bɩ tõe t’a ra gomda zʋɩf-rãmbã la neb a taab sẽn da tar manesem sẽn yaa wa “we-rũms” manesmã yelle. (Tʋʋ. 19:26-34; 1 Kor. 16:9) Yaa vẽeneg t’a Poll paama zu-loees sẽn da tõe n tũ ne a yõore, la a kell n talla saagr tɩ manegr n wate. (1 Kor. 15:30, 31; 2 Kor. 4:16-18) Tõnd vɩɩ sasa sẽn yaa wẽng wʋsgo. D tẽed-n-taas kẽer la bi-bees nams-yã, bɩ n namsdẽ. Kẽer bee zĩig zab sẽn beẽ, tɩ yaa toog tɩ b kogl b yõyã. A taab bee tẽns b sẽn gɩdg d tũudmã, la baa ne rẽ, b ket n gẽnegda b yõy n tũud a Zeova. D tẽed-n-ta-kãensã fãa modgdame n ket n tũud a Zeova, tɩ yaa mak-sõng n kõ tõndo. B pa yɛɛsde, bala b miime tɩ baa b sã n ki masã menga, a Zeova na n wa kõ-b-la keoor sẽn ka to. w20.12 9 s. a 3-4
Tẽne, sa-sika, 22
Tõnd yaa Wẽnnaam tʋmd-n-taase. Yãmb yaa Wẽnnaam pʋʋg b sẽn koode, la Wẽnnaam doogo.—1 Kor. 3:9.
Wakat ninga, yãmb sũur mi n sãama y koe-moonegã sẽn pa womd biis yĩnga, wall y sẽn pa mikd nebã b zagsẽ wã yĩng bɩ? Sã n yaa woto, bõe la y tõe n maan n kell n tall sũ-noogo? Tara yõod wʋsg tɩ d tall tagsa sẽn zemse, koe-moonegã wɛɛngẽ. Woto rat n yeelame tɩ bõe? D tẽeg tɩ d sẽn moond koɛɛgã yaa sẽn na n sõng nebã tɩ b bãng Wẽnnaam yʋʋrã la a Rĩungã. A Zeezi yeela vẽeneg tɩ yaa neb sõor bilf bal n na n sak n tũ yẽ. (Mat. 7:13, 14) D sã n wa moond koɛɛgã fãa, d paamdame n tʋmd ne a Zeova, a Zeezi la malɛgsã, tɩ sɩd yaa zu-zẽkre. (Mat. 28:19, 20; Vẽn. 14:6, 7) A Zeova n takd neb nins sẽn dat n tũ yẽ wã n wat a nengẽ. (Zã 6:44) Rẽ wã, ned sã n pa sak n kelg tõnd rũndã, tõe t’a sak n kelg tõnd daar a to. Saam-bi-poak a Debora yell d sẽn gomã yeelame tɩ “raood komsgã yaa a Sʋɩtãan zab-teoog sẽn tar pãng wʋsgo.” La a Zeova pãngã yɩɩda a Sʋɩtãan ne a zab-teedã fãa. w20.12 26 s. 18-19; 27 s. 21
Talaato, sa-sika, 23
Bɩ d ket n nong taaba, bala nonglem yita Wẽnnaam nengẽ.—1 Zã 4:7.
Yaa tɩlɛ ne kiris-neb wʋsg tɩ b rɩk b sẽkã fãa la bal n tʋm n ges b mens la b zakã rãmb yelle. Baa ne rẽ, nin-kãensã sẽn maand sɩd ne a Zeova wã maanda b sẽn tõe fãa n teend a siglgã. Wala makre, kẽer kẽesda b toog n sõngd sabab-wẽns sẽn paamd b rãmbã, tɩ sãnda sõngd n met siglgã roto, tɩ ned kam fãa me tõe n kõ ligd n teel Rĩungã tʋʋm d sẽn tʋmd dũniyã gill zugã. B sẽn maand woto fãa wã yaa b sẽn nong b taabã yĩnga. Semen fãa, d kẽnda tigissã la d kẽesd d toogo, tɩ wilgdẽ tɩ d nonga d saam-biisã la d saam-bi-pogsã. Baa d sã n yaame, d pa vaand tigissã ye. Baa d sã n yɛɛsdame, d zẽkda d nug n leoke. Baa d ned kam fãa sẽn maood ne a zu-loeesã, d baasd n kengda taab raood nand tɩ tigissã sɩnge, la tigissã poor me. (Ebre. 10:24, 25) D sũur sɩd nooma wʋsgo, d sẽn ne d tẽed-n-taasã sẽn maand woto fãa wã! w21.01 10 s. 11
Arba, sa-sika, 24
Bɩ d ra lebg wuk-m-mens rãmb ye.—Gal. 5:26.
Yaa toog ne wuk-m-mens rãmbã tɩ b pẽg b taabã. B getame tɩ yaa bãmb mengã n tog ne pẽgre. B nong n makda b mens ne neb a taabã, la b baood n wags ne-ba. B pa baood n na n sõng neb a taabã tɩ b paam minim la b kõ-b taoor-sobend ye. B nong n yetame yaa: “F sã n dat tɩ tʋʋmd yɩ wa f sẽn date, rẽnda f tʋm f toore.” Wuk-m-meng soab nong n yaa mag-bɛd soaba, la sũ-ki-neda. Ned a woto pa wae n paamd zo-rãmb tɩ kaoos ye. D sã n wa mik tɩ wuk-m-meng n be d sũurẽ wã, baa yaa bilfu, bɩ d yɩ tao-tao n pʋʋs a Zeova n kos t’a ‘maneg d yamã tɩ kɩt tɩ d toeeme,’ tɩ zʋg-wẽn-kãngã ra wa paam pãng d sũurã pʋgẽ ye. (Rom. 12:2) Ad d sũy sɩd nooma wʋsg ne a Zeova, a sẽn kõt-d mak-sõngã! (Yɩɩn. 18:36) D neeme t’a sẽn tar manesem ning ne a nin-buiidã wilgda a sik-m-mengã, tɩ d rat n maan wa yẽ. D ratame me n tũ neb nins sẽn tũ a Zeova ne sik-m-mengã, tɩ Biiblã gomd b yellã mak-sõngo. Bɩ d ket n pẽgd a Zeova la d waoogd-a, bala a segda ne ziiri.—Vẽn. 4:11. w20.08 13 s. 19-20
Lamusa, sa-sika, 25
Neb nins sẽn kẽed kãadmã na n paama zu-loees wʋsgo.—1 Kor. 7:28.
Kãadmã yaa kũun sẽn zems zãnga, Wẽnnaam sẽn kõ-do. La ninsaalbã pa zems zãng ye. (1 Zã 1:8) Rẽ n so tɩ Wẽnnaam Gomdã wilgdẽ tɩ sẽn kẽ-b kãadmã na n paama “zu-loees wʋsgo.” A Zeova ratame tɩ sɩdb nins sẽn yaa kiris-nebã sõngd b zakã rãmb tɩ b tẽebã pãng paasdẽ, n ges tɩ b paam sũ-noogo, la bũmb nins sẽn yaa tɩlɛ ne b vɩɩmã. (1 Tɩm. 5:8) Baa ne saam-bi-pogs nins sẽn kẽ kãadmã sẽn tar tʋʋm wʋsgã, b segd n yãta sẽk daar fãa n karemd Wẽnnaam Gomdã, n bʋgsdẽ la b pʋʋsd a Zeova ne b sũur fãa me. La woto tõeeme n pa yɩ nana ye. Pagbã tara tʋʋm wʋsgo. La yaool n tara yõod wʋsg tɩ b bao sẽk n maand rẽ. Bõe yĩnga? Bala a Zeova ratame tɩ tõnd ned kam fãa kell n modg n tall zood sõma ne yẽ. (Tʋʋ. 17:27) Yaa sɩd tɩ pag segd n modga wʋsgo, sẽn na yɩl n sulgd a meng n sakd a sɩdã sẽn pa zems zãngã zu-sobendo. La yaa a sã n tõog n wʋm a Zeova sẽn dat t’a yɩ sakdã võore, la a sak n tũ rẽ, la na n yɩ nana ne-a t’a tõog n tʋmd tʋʋm nins a Zeova sẽn bobl-a zakã pʋgẽ wã. w21.02 9 s. a 3, 6-7
Arzũma, sa-sika, 26
Y tẽebã sẽn paam makr woto wã wata ne tõog-toogo.—Zak 1:3.
D tõe n dɩka zu-loeesã kiris-nebã sẽn paamd b tũudmã yĩngã n mak ne boaag bugum b sẽn tar n kut sʋʋse. Sʋʋgã sã n wɩng tɩ b los-a koomẽ t’a maage, kutã pãng paasdame. Woto me, d sã n tõog toog namsgã pʋgẽ, d tẽebã pãng paasdame. Rẽ n so t’a Zak yeel yaa: “Bɩ tõog-toog tʋm a tʋʋmd n baas tɩ yãmb pid zãnga, n yɩ sõma bũmb fãa pʋgẽ, tɩ baa fʋɩ ra paoog-y ye.” (Zak 1:4) D sã n neẽ tɩ namsgã kɩtame tɩ d tẽebã pãng paasdẽ, d tõe n tõoga toog ne sũ-noogo. A Zak sebrã pʋgẽ, a leb n wilga yɛl kẽer sẽn tõe n kɩt tɩ d wa pa le tar sũ-noog ye. Wala makre, d sã n wa pa mi d sẽn maandga. D sã n wa be namsg pʋgẽ, d segd n baoo a Zeova sõngre, n tõog n yãk yam n maan sẽn tat a yam, sẽn na n naf d tẽed-n-taasã, la sẽn na n sõng tõnd mengã tɩ d kell n maan sɩd ne-a. (Zer. 10:23) Yaa tɩlɛ tɩ d paam yam, n tõog n bãng d sẽn na n tall yel-manesem ninga, la d sẽn na n yeel sẽn namsd-b tõndã bũmb ninga. D sã n wa pa mi d sẽn maandga, d tõe n komsa raoodo, n tagsdẽ tɩ d yellã pa tar tɩɩm ye. La rẽ tõe n kɩtame tɩ d sũ-noogã sa tao-tao. w21.02 28 s. a 7-9
Sibri, sa-sika, 27
Bɩ y nong taab wʋsg ne nonglem sẽn yit sũurẽ.—1 Pɩy. 1:22.
A Zeova kõo tõnd mak-sõng rẽ wɛɛngẽ. A nonga tõnd hal wʋsgo, tɩ tõnd me sã n maand sɩd ne-a, bɩ bũmb pa tõe n wa kɩt t’a bas n pa le nong-d ye. (Rom. 8:38, 39) Gɛrk gom-bil ning b sẽn lebg tɩ ‘wʋsgã’ rat n yeelame tɩ f modg n wilg f taabã f nonglem, baa pa nana. Wakat ninga, d segd n maana modgre, n tõog n nong d tẽed-n-taasã wʋsgo. Ned sã n maan bũmb tɩ sãam d sũuri, d segd n ket n ‘maanda sũ-mar ne taab nonglem pʋgẽ. La d kɩt tɩ laafɩ kell n zĩnd tõnd ne taab sʋka, la d modg tɩ zems-n-taar ning d sẽn paam vʋʋsem sõngã maasem yĩngã kell n zĩnd d sʋka.’ (Efɛ. 4:1-3) D pa na n get d tẽed-n-taasã kongrã ye. D na n maana d sẽn tõe fãa n get-b wa a Zeova sẽn get-b to-to wã. (1 Sãm. 16:7; Yɩɩn. 130:3) Pa wakat fãa la yaa nana tɩ d wilg tɩ d nonga d saam-biisã hal wʋsgo, sẽn tɩ yɩɩd fãa, d sã n ne b kongrã. Wõnda pa yɩ nana ne pipi kiris-nebã me, wa sẽn yɩ to-to ne a Evodi la a Sẽntiisã ye. Tʋm-tʋmd a Poll sagl-b lame “tɩ b tall yam a yembr Zu-soabã pʋgẽ.”—Fili. 4:2, 3. w21.01 22-23 s. 10-11
Hato, sa-sika, 28
Kom-bɩɩse, mam gʋlsda yãmba, bala yãmb tara pãnga, la Wẽnnaam gomdã bee yãmb pʋsẽ, la yãmb tõoga wẽng soabã.—1 Zã 2:14.
Kãsembã sũur nooma ne yãmb a kom-bɩɩsã sẽn tũud a Zeova ne “yam a yembr” ne-bã. (Sof. 3:9) Yãmb sẽn modgd n tʋmd tʋʋm nins b sẽn kõ yãmbã ne yẽesem la ne y pãng fãa wã noom-b-la wʋsgo. B sũy nooma ne-yã. Kom-bɩɩse, ra tol-y n yĩm-y t’a Zeova nonga yãmb la t’a kɩs-y-la sɩd ye. A ra pĩnd n togsame tɩ yaoolem wakatã, kom-bɩɩs sẽn yaa wa tãb-biis n na n kõ-b mens ne yamleoog n tũ-a. (Yɩɩn. 110:1-3) A miime tɩ y nong-a lame, la tɩ y ratame n maan y sẽn tõe fãa n tũ-a. Woto yĩnga, bɩ y tall sũ-mar ne neb a taabã, la ne yãmb mengã. Y sã n wa tudgi, bɩ y sak saglg la kiblg ning b sẽn na n kõ yãmbã, n get rẽ wa bũmb sẽn yit a Zeova nengẽ. (Ebre. 12:6) Tʋm-y tʋʋm nins b sẽn bobl-y wã neere.—Yel. 27:11. w21.03 7 s. 17-18
Tẽne, sa-sika, 29
Fo sã n bas tɩ f raood boog yel-pakr wakate, f pãngã fãa lebga zaalem bala.—Yel. 24:10.
Bũmb wʋsg n tõe n koms d raoodo. Wala makre, d sã n tar tags-kɛg d mengã zugu, d pãn-komsmã, pa rẽ bɩ bãaga. Sẽn paase, d tõe n wa komsa raoodo, d sã n pa paam tʋʋmd d sẽn nong a Zeova siglgã pʋgẽ, wall d sã n moonda zĩig nebã sẽn pa kelgdẽ. Yaa nana tɩ d tall tags-kɛg d mengã, la d pãn-komsmã zugu. Woto yĩnga, d tõe n wa tagsdame tɩ d pãn-komsmã yĩnga, a Zeova pa na n tol n dat tõnd dũni-paalgã pʋgẽ ye. D sã n tagsd woto, tõe n waa ne yelle. Biiblã wilgdame t’a Zeezi Kirist sẽn yãk a toogo, ninsaalb fãa “maana yel-wẽna.” (Rom. 3:23) La a Zeova p feesd tõnd n dat n yã d pãn-komsmã, bɩ n dat tɩ d zems zãng ye. A yaa Ba sẽn nong a kamba, n dat n sõng-ba. A leb n yaa sũ-mar soaba. A nee tõnd sẽn modgd n na n tõog d pãn-komsmã, la tags-kɛgã d sẽn tar d mens zutã, n dat n sõng-do.—Rom. 7:18, 19. w20.12 22 s. a 1-3
Talaato, sa-sika, 30
Sẽn na n baase, m saam-biisi, bɩ y kell n kɩdem sũ-noogo, la y bas tɩ b rems yãmba.—2 Kor. 13:11.
Tõnd fãa bee so-toak zugu. D raabã yaa d wa paam n ta dũni-paalgã pʋgẽ, a Zeova naamã sẽn yaa nonglem naamã sasa. Daar ne a to fãa, d modgdame n ket n tũud sor ning sẽn debd vɩɩm sẽn kõn sa wã zĩigẽ. La wa a Zeezi sẽn yeelã, so-kãng yaa sẽka, t’a tũub yaa toog wakat ning me. (Mat. 7:13, 14) D sẽn pa zems zãngã yĩnga, yaa nana tɩ d bʋdg n bas so-kãnga. (Gal. 6:1) D sã n dat n kell n pa vɩɩm sẽn kõn sa wã sorã sẽn yaa sẽkã zugu, d segd n sakd n toeemda d tagsa wã, d yel-manesmã la d tʋʋm-tʋmdɩ wã. Tʋm-tʋmd a Poll sagla tõnd tɩ d basdẽ tɩ b remsd tõndo. Yɩl n fees d mens n bãng d tagsa wã la d yel-manesmã pa nana ye. Bala, d sũurã yaa zãmb soaba, tɩ rẽ kɩt tɩ yaa toog tɩ d bãng a sẽn tõe n tus tõnd tɩ d maan bũmb ninga. (Zer. 17:9) Yaa nana tɩ d belg d mens ne “tagsa sẽn pa sɩda.” (Zak 1:22) Rẽ wã, d segd n talla Wẽnnaam Gomdã n fees d menga. Wẽnnaam Gomdã tõe n vẽnega d sẽn sɩd yaa ned ningã, rat n yeel tɩ d ‘sũurã tagsa wã la d tʋlsem toor-toorã.’—Ebre. 4:12, 13. w20.11 18 s. a 1-3
Arba, sa-sika, 31
Yɩt-y pipi n waoogd taaba.—Rom. 12:10.
D sã n yaa sik-m-meng soaba, la d sakd n deegdẽ tɩ pa fãa la d tõe n maane, paasda d sũ-noogã. Wãn to? D sã n sak tɩ pa bũmb fãa la d tõe n maane, d sũur na n yɩɩ noog ne d sẽn paamd d taabã sõngrã. Wala makre, tẽeg-y a Zeezi sẽn wa n sãoog wãoob piigã. A yembr bal n lebg n wa pʋʋs a Zeezi bark a sẽn kɩt t’a bã-wẽngã sa wã. Yaa bũmb yẽ mengã sẽn da pa tol n tõe n maan a toor ye. Ra-kãngã sẽn yaa sik-m-meng soabã wilgame t’a sũur nooma ne a sẽn paam tɩ b sõng-a wã, tɩ kɩt t’a pẽg Wẽnnaam. (Luk 17:11-19) Naoor wʋsgo, sik-m-mens rãmbã ne neb a taabã moor noomame, la b wae n tar zood sẽn tar pãng me. Bõe yĩnga? B sak n deegame tɩ neb a taabã tara zʋg-sõma, la b kɩs-b sɩda. Sik-m-meng soab wilgda a sũ-noogo, a to sã n tõog n tʋm tʋʋmd b sẽn kõ-a. A na n yɩɩ tao-tao me n pẽg-a la a waoog-a. w20.08 12 s. 17-18