Yaa kãsem-dãmbã sã n mak naoor wʋsg n na n sõng yel-wẽn-maand sẽn na yɩl t’a tek yam n kos sugr t’a zãgs poor la b yiisd-a tigingã pʋgẽ. (2 Rĩm. 17:​12-15) A manesmã wilgdame t’a yãka yam n pa rat n tũ a Zeova noyã ye. (Tõo. 30:​19, 20) B togsda tigingã taoor t’a pa le yaa a Zeova Kaset soab ye. B sẽn maand woto wã, pa sẽn na n ning yel-wẽn-maandã yãnd ye. Yaa sẽn na yɩl tɩ tigingã neb tũ Biiblã saglgã, n ‘da le maan tũud-n-taar ne-a,’ la b ‘ra rɩ ne-a meng ye.’ (1 Kor. 5:​9-11) Pa zaalem yĩng la a Zeova sẽn kõ no-kãngã ye. Tẽn-tʋmd a Poll yeelame yaa: “Rabɩll bilf wukda zom-nagdgã tõre.” (1 Kor. 5:6) Yel-wẽn-maand sã n pa tek yam n kos sugr tɩ b basa tigingã pʋgẽ, tigingã neb a taabã tõe n tagsame tɩ pa tɩlɛ tɩ b tũ a Zeova noyã ye.—Yel. 13:20; 1 Kor. 15:33. w24.08 27 s. a 3-4

Yaa sɩd tɩ tõnd pa tõe n kõ neb a taabã pãng wa a Zeova ye. La d tõe n tũnuga ne d pãngã n sõng-ba. Wala makre, d tõe n tɩ raa bũmb n kõ d tẽed-n-taag sẽn kʋʋl wall sẽn yaa koamsa, pa rẽ bɩ d sõng-a n tʋm a zakã tʋʋma. Sã n tõe bɩ y sõngd ne Rĩungã roog yɩlgr la a yell gesgo. Tẽeg-y me tɩ y tõe n tũnuga ne y no-goamã n paas ned pãnga. Yãmb mii ned y sẽn na n pẽg tɩ naf-a bɩ? Yãmb mii ned sẽn dat belsg bɩ? Sã n yaa woto, bɩ y wilg a soabã t’a yell pak-y lame. Y tõe n tɩ kaag-a lame, n bool-a ne telefõnne, n gʋls lɛtr n tool-a, pa rẽ bɩ n gʋls-a imell wall mesaaze. Pa tɩlɛ tɩ y gom wʋsg ye. Y sã n pelg y pʋg n togs-a goam a wãn bala, tõe n kenga a raood t’a kell n maan sɩd ne a Zeova, wall kɩt t’a tẽed manegre.—Yel. 12:25; Efɛɛ. 4:29. w24.09 28 s. a 8-10

Yãmb sã n yaa kãsem-sõngd tɩ kaoos bilfu, tõe tɩ y zoe n bɩɩsa zʋg-sõma wʋsg y sẽn segd n bɩɩs tɩ b yãk-y tɩ y lebg kãsem-soabã. Yãmb dat n tʋma “tʋʋm-sõng” ning kãsem-dãmbã sẽn tʋmdã bɩ? Tʋʋm-bʋs la kãsem-soab tʋmda? A lʋɩta taoor koɛɛgã mooneg pʋgẽ, a tʋmda wʋsg n kengd a tẽed-n-taasã raood la a zãmsd-ba, la a kengd b tẽebã ne a no-goamã la a mak-sõngã. Sɩd bee bʋʋm la Biiblã sẽn boond kãsem-dãmbã sẽn tʋmd wʋsgã tɩ “kũun sẽn yaa rapã.” (Efɛɛ. 4:8) Bõe la y segd n maan tɩ b yãk-y tɩ y lebg kãsem-soaba? Bao n lebg kãsem-soab yaa toor ne tʋʋm baoobo. Naoor wʋsgo, f sã n tar minim tʋʋm ning wɛɛngẽ seka b na rɩk-f tʋʋma. La y sã n dat tɩ b yãk-y tɩ y lebg kãsem-soaba, y sã n tar minim koɛɛgã mooneg la nebã zãmsg wɛɛngẽ bal pa sek ye. Y segd n bɩɩsa zʋg-sõma nins kãsem-soab sẽn segd n bɩɩs tɩ be 1 Tɩmote 3:​1-7 ne Tɩt 1:​5-9 pʋgẽ wã. w24.11 20 s. a 1-3