D segd n modgd n maanda a Zeova zo-rãmb a taabã neere, la d waoogd-ba. (Rom. 12:10) Wãn to? Sã n yaa ne Yɩɩn-sõamyã 15:​4, bũmb a ye yaa tɩ ned sẽn sig a Zeova fu-roogẽ wã “sã n maan pʋlenga, a pa lebsd a noorã poorẽ, baa sã n wa yaa toog ne-a” ye. Yaa vẽeneg tɩ d sã n pʋlem n pa pidsi, sãamda neb a taabã sũuri. (Mat. 5:37) Wala makre a Zeova ratame t’a zo-rãmb nins sẽn kẽ kãadmã pids pʋleng ning b sẽn maan b kãadmã daarã. Roagdbã sã n modgd n pids bũmb nins b sẽn pʋlemd b kambã me, nooma a Zeova. D sẽn nong Wẽnnaam la d taabã yĩnga, d na n maanda d sẽn tõe fãa n pidsd d pʋlemsã. Bũmb a to d sẽn tõe n maan n waoog Wẽnnaam zo-rãmbã yaa d sẽn na n yaa kõatb la neb sẽn nong sãamb reegre. (Rom. 12:13) D sã n naagd d tẽed-n-taasã n kokd pemsem, paasda tõnd ne bãmb zoodã, la tõnd ne a Zeova zoodã pãnga. Sẽn paase, d sã n nong sãamb reegre, d rɩkda a Zeova togs-n-taare. w24.06 12 s. 15-16

Yaa sik-m-mens rãmbã la a Zeova sõngd tɩ b bãng sɩdã. (Mat. 11:25) Tõnd sika d meng n sak tɩ b sõng-d tɩ d bãng sɩdã. (Tʋʋ. 8:​30, 31) Baa ne rẽ, d segd n gũusame n da wa lebg wuk-m-meng soab ye. D sã n yaa wuk-m-meng soaba, d tõe n wa tagsdame tɩ tõnd sẽn get yɛlã to-to wã yaa sõma, wa Biiblã saglsã la sagls nins a Zeova siglgã sẽn kõt tõndã. D sã n dat n kell n yɩ sik-m-meng soaba, d segd n tẽegdame t’a Zeova taoore tõnd pa zem baa fʋɩ. (Yɩɩn. 8:​3, 4) Sẽn paase, d tõe n pʋʋsa a Zeova n kos t’a sõng-d tɩ d bɩɩs sik-m-menga, la d yɩ ned sẽn sakd tɩ b zãms-a. A Zeova na n sõnga tõnd tɩ d sũur noom ne a saglsã a sẽn tũnugd ne a Gomdã la a siglgã n kõt tõndã n yɩɩd tõnd mengã tagsa wã. Y sã n karemd Biiblã, bɩ y gẽesd kaset toor-toor sẽn wilgd t’a Zeova nonga sik-m-menga, la t’a kisa wuk-m-meng la tɩtaam. B sã n kõ-y tʋʋmd sẽn kɩt tɩ y tar zu-sobendo, y segd n maneg n modgame sẽn na yɩl n kell n yɩ sik-m-meng soaba. w24.07 10 s. a 8-9

Yʋʋmd 1919 wã tɛka, a Zeezi tũnugda ne rap sul-bil sẽn yaa neb sẽn paam vʋʋsem sõngã zaeebo, n sigind koɛɛgã moonego, la a sõngd a karen-biisã tɩ b paamd bũmb nins sẽn yaa tɩlɛ b tẽebã kengr yĩngã. (Luk 12:42) Yaa vẽeneg t’a Zeova ningda sul-kãng tʋʋmdã barka. (Eza. 65:​13, 14) D sã n da pa sigl sõma, d pa na n tõog n tʋm tʋʋmd ning a Zeezi sẽn kõ-dã ye. (Mat. 28:​19, 20) Wala makre, b sã n da pa yãk zĩig tiging fãa sẽn segd n moone, yɛlã ra na n yɩɩ wãna? Ned fãa ra na n moonda a sẽn datẽ. Koe-moondbã ra na n moona zĩis kẽer naoor wʋsgo, tɩ zĩis sãnda pa paam mooneg ye. Yãmb nee bũmb a taab wɛɛngẽ d sẽn sigl sõma wã sẽn nafd-d bɩ? A Zeezi sẽn maan bũmb nins a sẽn wa n be tẽngã zugã wilgda a sẽn sigind tõnd rũndã-rũndã to-to. w24.04 8-9 s. a 2-4