१४७ याहची स्तुती करा!
आपल्या देवाची स्तुती करणं चांगलं आहे;
त्याची स्तुती करणं आनंद देणारं आणि योग्यच आहे!+
२ यहोवा यरुशलेमची बांधणी करतो;+
इस्राएलच्या विखुरलेल्यांना तो पुन्हा गोळा करतो.+
३ तो दुःखी मनाच्या लोकांना बरं करतो;
तो त्यांच्या जखमांवर पट्टी बांधतो.
४ तो ताऱ्यांची संख्या मोजतो.
तो त्या सर्वांना नावाने हाक मारतो.+
५ आपला प्रभू महान आणि खूप सामर्थ्यशाली आहे;+
त्याची बुद्धी अमर्याद आहे.+
६ यहोवा दीनदुबळ्यांना उठवतो,+
पण तो दुष्टांना धुळीला मिळवतो.
७ यहोवासाठी उपकारस्तुतीचं गीत गा;
वीणेवर आपल्या देवाच्या स्तुतीचं गीत गा.
८ तो आकाशाला ढगांनी झाकतो,
तो पृथ्वीवर पाऊस पाडतो,+
तो पर्वतांवर गवत उगवायला लावतो.+
९ तो प्राण्यांची भूक भागवतो,+
कावळ्याच्या काव-काव करणाऱ्या पिल्लांना, तो अन्न देतो.+
१० घोड्याच्या ताकदीमुळे त्याला आनंद होत नाही;+
माणसाच्या दणकट पायांचं त्याला काहीच विशेष वाटत नाही.+
११ यहोवाची भीती बाळगणारे;+
त्याच्या एकनिष्ठ प्रेमाची वाट पाहणारे, त्याला प्रिय आहेत.+
१२ हे यरुशलेम, यहोवाचा गौरव कर.
हे सीयोन, आपल्या देवाची स्तुती कर.
१३ तो तुझ्या शहराच्या फाटकांचे अडसर मजबूत करतो.
तो तुझ्या मुलांना आशीर्वाद देतो.
१४ तो तुझ्या प्रदेशात शांती आणतो;+
तो तुला सर्वात उत्तम गहू देऊन तृप्त करतो.+
१५ तो पृथ्वीवर आपली आज्ञा पाठवतो;
त्याचा शब्द वेगाने धावतो.
१६ तो लोकरीसारखा बर्फ पाडतो;+
तो राखेसारखे हिमकण विखुरतो.+
१७ तो गारा, भाकरीच्या तुकड्यांसारख्या खाली पाडतो.+
त्याने पाठवलेली थंडी कोण सोसू शकतं?+
१८ तो आपला शब्द पाठवतो, तेव्हा बर्फ वितळतो.
तो वारा पाठवतो,+ तेव्हा पाणी वाहू लागतं.
१९ त्याने आपले शब्द याकोबला सांगितले,
त्याने इस्राएलला आपले कायदे आणि न्याय-निर्णय दिले.+
२० इतर कोणत्याही राष्ट्रासोबत त्याने असं केलं नाही;+
त्यांना त्याच्या न्याय-निर्णयांबद्दल काहीच माहीत नाही.
याहची स्तुती करा!+