निर्गम
३८ मग बसालेलने बाभळीच्या लाकडापासून होमार्पणाची वेदी बनवली; ती चौकोनी होती आणि तिची लांबी पाच हात,* रुंदी पाच हात आणि उंची तीन हात होती.+ २ त्यानंतर, त्याने तिच्या चारही कोपऱ्यांवर शिंगं बनवली; शिंगं वेदीचाच भाग होती. मग त्याने वेदी तांब्याने मढवली.+ ३ नंतर त्याने वेदीची सगळी भांडी, म्हणजे बादल्या, फावडी, वाट्या, काटे आणि धूप जाळण्याची पात्रं* बनवली. ही सगळी भांडी त्याने तांब्याची बनवली. ४ तसंच, त्याने वेदीसाठी तांब्याची जाळी बनवली आणि ती किनारीच्या खाली, वेदीच्या आत मधोमध बसवली. ५ त्याने त्या तांब्याच्या जाळीजवळ वेदीच्या चार टोकांवर, दांडे घालण्यासाठी साच्यात ओतून चार कड्या बनवल्या. ६ यानंतर, त्याने बाभळीच्या लाकडापासून दांडे बनवले आणि त्यांना तांब्याने मढवलं. ७ वेदी उचलून नेण्यासाठी त्याने ते दांडे वेदीच्या बाजूला असलेल्या कड्यांमध्ये घातले. त्याने वेदी फळ्यांपासून बनवलेल्या पोकळ पेटीसारखी बनवली.
८ मग त्याने तांब्याचं मोठं भांडं*+ आणि त्याची तांब्याची बैठक बनवली; यासाठी त्याने भेटमंडपाच्या प्रवेशाजवळ व्यवस्थेप्रमाणे सेवा करणाऱ्या स्त्रियांचे आरसे* वापरले.
९ मग त्याने अंगण बनवलं.+ दक्षिणेकडे, त्याने अंगणाला चांगल्या प्रतीच्या मलमलीचे पडदे लावले. त्यांची लांबी १०० हात होती.+ १० पडद्यांसाठी २० खांब आणि खाच असलेल्या २० तांब्याच्या बैठका* होत्या. खांबांचे आकडे आणि कड्या* चांदीच्या होत्या. ११ उत्तरेकडेही १०० हात लांबीचे पडदे होते. त्यांचे २० खांब आणि खाच असलेल्या २० बैठका तांब्याच्या होत्या. त्यांचे आकडे आणि कड्या* चांदीच्या होत्या. १२ पण पश्चिमेकडचे पडदे ५० हात लांबीचे होते. त्यांच्यासाठी दहा खांब आणि खाच असलेल्या दहा बैठका होत्या आणि त्यांचे आकडे आणि कड्या* चांदीच्या होत्या. १३ सूर्य उगवण्याच्या दिशेला, म्हणजेच पूर्वेकडे अंगणाची रुंदी ५० हात होती. १४ प्रवेशद्वाराच्या एका बाजूला १५ हात लांबीचे पडदे, त्यांचे तीन खांब आणि त्यांच्या खाच असलेल्या तीन बैठका होत्या. १५ तसंच, अंगणाच्या प्रवेशद्वाराच्या दुसऱ्या बाजूलाही १५ हात लांबीचे पडदे, त्यांचे तीन खांब आणि त्यांच्या खाच असलेल्या तीन बैठका होत्या. १६ अंगणाभोवती लावलेले सगळे पडदे चांगल्या प्रतीच्या मलमलीचे होते. १७ खांबांच्या खाच असलेल्या बैठका तांब्याच्या होत्या. त्यांचे आकडे आणि कड्या* चांदीच्या असून खांबांची टोकं चांदीने मढवलेली होती. शिवाय, अंगणाच्या सर्व खांबांना चांदीचे सांधे होते.+
१८ अंगणाच्या प्रवेशद्वाराचा पडदा निळं सूत, जांभळी लोकर, गडद लाल रंगाचं कापड आणि चांगल्या प्रतीची मलमल यांपासून बनवलेला होता. अंगणाच्या इतर पडद्यांप्रमाणेच हा पडदाही २० हात लांब आणि पाच हात उंच होता.+ १९ त्याचे चार खांब आणि खाच असलेल्या चार बैठका तांब्याच्या होत्या. त्यांचे आकडे आणि कड्या* चांदीच्या होत्या आणि त्यांची टोकं चांदीने मढवलेली होती. २० उपासना मंडपाच्या, तसंच अंगणाभोवती लावलेल्या सर्व खुंट्या तांब्याच्या होत्या.+
२१ उपासना मंडपाच्या, म्हणजेच साक्षपेटीच्या मंडपाच्या+ बांधकामासाठी वापरलेल्या सर्व वस्तूंची यादी पुढे दिली आहे. मोशेच्या आज्ञेप्रमाणे अहरोन याजकाचा मुलगा इथामार+ याच्या मार्गदर्शनाखाली, लेव्यांनी+ ही यादी बनवण्याची जबाबदारी पार पाडली. २२ यहोवाने मोशेला आज्ञा दिल्याप्रमाणे, यहूदा वंशातल्या हूरचा नातू, म्हणजे उरीचा मुलगा बसालेल+ याने सगळ्या गोष्टी बनवल्या. २३ दान वंशातल्या अहिसामाकचा मुलगा अहलियाब+ हासुद्धा त्याच्यासोबत होता. तो एक उत्तम कारागीर, भरतकाम करणारा, तसंच निळं सूत, जांभळी लोकर, गडद लाल रंगाचं सूत आणि चांगल्या प्रतीची मलमल विणणारा होता.
२४ पवित्र ठिकाणाच्या कामासाठी वापरलेलं सगळं सोनं, ओवाळण्याच्या अर्पणात देण्यात आलेल्या सोन्याइतकं,+ म्हणजे २९ तालान्त* आणि पवित्र ठिकाणाच्या ठरलेल्या शेकेलप्रमाणे* ७३० शेकेल* इतकं होतं. २५ इस्राएलमधल्या नावनोंदणी झालेल्या पुरुषांनी दिलेली चांदी १०० तालान्त आणि पवित्र ठिकाणाच्या ठरलेल्या शेकेलप्रमाणे* १,७७५ शेकेल इतकी होती. २६ नावनोंदणी झालेल्या, २० वर्षं आणि त्यापेक्षा जास्त वयाच्या एकूण ६,०३,५५० पुरुषांनी+ अर्धा शेकेल दिला. प्रत्येकाने द्यायचा अर्धा शेकेल हा पवित्र ठिकाणाच्या ठरलेल्या शेकेलप्रमाणे* अर्धा शेकेल होता.+
२७ पवित्र ठिकाणासाठी आणि पडद्यांसाठी साच्यात ओतून ज्या खाच असलेल्या बैठका बनवण्यात आल्या, त्यांसाठी १०० तालान्त चांदी लागली; एका बैठकीसाठी एक तालान्त, याप्रमाणे १०० बैठकांसाठी १०० तालान्त चांदी वापरण्यात आली.+ २८ त्याने १,७७५ शेकेल चांदीतून खांबांचे आकडे बनवले, तसंच त्यांची टोकं चांदीने मढवून ते एकत्र जोडले.
२९ अर्पण केलेलं* तांबं ७० तालान्त आणि २,४०० शेकेल इतकं होतं. ३० या तांब्यापासून त्याने भेटमंडपाच्या प्रवेशाच्या खाच असलेल्या बैठका, तांब्याची वेदी व तिची तांब्याची जाळी, वेदीची सगळी भांडी, ३१ अंगणासाठी खाच असलेल्या बैठका, अंगणाच्या प्रवेशद्वाराच्या खाच असलेल्या बैठका, तसंच, उपासना मंडपाच्या आणि अंगणाच्या सगळ्या खुंट्या बनवल्या.+