लाजराच्या मृत्युबद्दल येशूने जी प्रतिक्रिया प्रदर्शित केली ती देवाच्या पुत्राठायी असणाऱ्‍या अत्यंत प्रेमळ गुणास व्यक्‍त करीत होती. या प्रसंगी ज्या गहन भावना त्याच्याठायी उचंबळून आल्या त्या हे सूचित करीत होत्या की, त्याला मृतास उठविण्याची केवढी तीव्र इच्छा होती. आम्ही वाचतोः “येशू होता तेथे मरीया आल्यावर त्याला पाहून ती त्याच्या पाया पडली व त्याला म्हणाली: ‘प्रभूजी, आपण येथे असता तर माझा भाऊ मेला नसता.’ येशू तिला व तिच्याबरोबर आलेल्या यहुद्यांना रडता पाहून आत्म्यात खवळला व विव्हळ झाला, आणि म्हणालाः ‘तुम्ही त्यास कोठे ठेवले आहे?’ ते त्याला म्हणालेः ‘प्रभुजी, येऊन पाहा.’ येशू रडला. यावरुन यहूदी म्हणाले: ‘पाहा, याचे त्याजवर किती तरी प्रेम होते.’”—योहान ११:३२-३६.

ज्याचे भाषांतर “विव्हळ” असे केले तो ग्रीक भाषेतील शब्द (टारसʹसो) यापासून आहे, जो अंतःकरणाची व्यग्रता निदर्शित करतो. द न्यू थायर्स ग्रीक-इंग्लिश लेक्सिकन ऑफ द न्यू टेस्टमेंटनुसार त्याचा अर्थ “एखाद्यास अंतस्थ क्षोभ होणे, . . . दुःखाने विव्हळ होणे, शोकग्रस्त होणे” असा होता. “रडला,” ही संज्ञा ग्रीक क्रियापद (डा.क्रायʹओ) यापासून आहे व त्याचा अर्थ “अश्रू गाळणे, शांतपणे रडणे,” असा होतो. हे, योहान ११:३३ नुसार मरीया व तिजसोबत असणारे यहूदी लोक ज्याप्रकारे ‘रडले’ होते त्यासारखे नव्हते. तेथे ग्रीक भाषेतील (क्लायʹओ पासूनचा) शब्द उपयोगात आणलेला आहे, ज्याचा अर्थ मोठ्याने किंवा ऐकू जाईल असे रडणे, असा होतो.c