“Tafu Għala Qed Nirritornalkom il-​Flus?”

‘O, KEMM għandi bżonn il-​flus!’ ħasbet Nana, omm li qed trabbi tlett itfal subien waħedha u li toqgħod ġewwa Kaspi, fir-​Repubblika tal-​Ġeorġja. Għodwa waħda l-​ħolma li ssib xi flus saret realtà. Hi sabet 300 lari (madwar Lm68) maġenb l-​għassa tal-​pulizija. Ma kien hemm ħadd fil-​qrib. Kienet somma kbira mhux ħażin. Fil-​fatt, Nana qatt ma kienet rat karta taʼ 100 lari (madwar Lm23) fil-​ħames snin minn mindu l-​lari saret il-​munita nazzjonali. In-​negozjanti lokali ma jaqilgħux daqstant flus, lanqas wara li jkunu ħadmu għal diversi snin.

‘X’se jkolli bżonnhom il-​flus jekk nitlef il-​fidi, il-​biżaʼ t’Alla, u l-​ispiritwalità tiegħi?’ ħasbet Nana. Hi kienet ikkultivat dawn il-​kwalitajiet Kristjani, saħansitra ssaportiet persekuzzjoni ħarxa u swat minħabba t-​twemmin tagħha.

Meta marret l-​għassa tal-​pulizija, Nana rat ħames pulizija jfittxu xi ħaġa disperatament. Hi indunat li bdew ifittxu l-​flus, u għalhekk resqet lejhom u staqsiethom: “Tliftu xi ħaġa?”

“Flus,” wieġbu huma.

“Kemm?”

“Tliet mitt lari!”

“Jien sibt il-​flus tagħkom,” qalet Nana. Imbagħad staqsiet: “Tafu għala qed nirritornalkom il-​flus?” Ma kinux jafu.

“Għax jien waħda mix-​Xhieda taʼ Jehovah,” kompliet hi. “Kieku ma kontx [Xhud], ma kontx nirritorna l-​flus.”

Biex jesprimi l-​apprezzament tiegħu għall-​onestà tagħha, il-​kap tal-​pulizija li kien tilef il-​flus ta lil Nana 20 lari (madwar Lm4).

L-istorja malajr xterdet mad-​distrett kollu taʼ Kaspi. L-​għada, seftura li kienet ħierġa mill-​għassa qalet lil Nana: “[Il-kap] dejjem iżomm il-​letteratura tagħkom fl-​uffiċċju tiegħu. Naħseb li issa se japprezzaha saħansitra iktar.” Uffiċjal tal-​pulizija saħansitra qal: “Li kieku n-​nies kollha kienu Xhieda taʼ Jehovah, min kien se jikkommetti d-​delitti?”