Il-​Faqar Qatt Se Jintemm?

“RAJT il-​maħqurin jibku bla ma għandhom min ifarraġhom; rajt il-​qawwa li biha jaħqruhom u li ma hemmx min ifarraġhom,” qal l-​għaref Sultan Salamun taʼ Iżrael tal-​qedem. (Koħèlet 4:1) Żgur li ħafna minn dawk il-​maħqurin li hu kellu f’moħħu kienu foqra wkoll.

Il-​faqar ma jistax jitkejjel bil-​flus biss. Skond l-​informazzjoni li pprovda l-​Bank Dinji f’Ġunju taʼ l-​2002, “huwa kalkulat li fl-​1998 1.2 biljun ruħ madwar id-​dinja għexu b’inqas minn dollaru (42ċ) kuljum . . . u 2.8 biljuni għexu b’inqas minn żewġ dollari (84ċ) kuljum.” Ġie notat li għalkemm dawn l-​ammonti kienu inqas mill-​kalkoli li saru qabel, “xorta juru li għad hemm ħafna bnedmin li qed ibatu.”

Il-​faqar qatt se jintemm? Ġesù Kristu qal lid-​dixxipli tiegħu: “Il-​foqra dejjem issibuhom magħkom.” (Ġwann 12:8) Iżda jfisser dan li l-​faqar u l-​konsegwenzi ħorox li jġib miegħu se jibqgħu għal dejjem? Le, għax għalkemm Ġesù ma wegħedx lis-​segwaċi tiegħu li kollha kienu se jsiru għonja materjalment, m’għandniex nikkonkludu minn kliemu li m’hemmx tama għall-​foqra.

Minkejja l-​isforzi tal-​bnedmin u l-​fatt li l-​wegħdi biex itemmu l-​faqar qatt ma rnexxew, il-​Kelma t’Alla, il-​Bibbja, tiżgurana li dalwaqt mhux se jkun għad hawn nies fil-​bżonn. Fil-​fatt, Ġesù ddikjara “l-​bxara t-​tajba lill-​fqajrin.” (Luqa 4:18) Din il-​bxara t-​tajba tinkludi l-​wegħda li l-​faqar se jiġi eliminat għalkollox. Dan se jseħħ meta s-​Saltna t’Alla ġġib kundizzjonijiet ġusti fuq l-​art.

Kemm se tkun dinja differenti! Is-​Sultan tas-​sema Ġesù Kristu “jħenn għad-​dgħajjef u għall-​fqajjar; il-​ħajja tal-​fqajrin isalva.” Tabilħaqq, “jeħlishom mill-​qerq u mill-​moħqrija.”—Salm 72:​13, 14.

Dwar dak iż-​żmien Mikea 4:4 jgħid: “Kull wieħed jinsab taħt id-​dielja tiegħu, u taħt is-​siġra tat-​tin tiegħu; u ma jkunx hemm min iwerwirhom, għax fomm il-​Mulej taʼ l-​eżerċti tkellem.” Is-​Saltna t’Alla se ssolvi l-​problemi kollha li jnikktu lill-​bnedmin, saħansitra se tneħħi l-​mard u l-​mewt għalkollox. Alla “jeqred il-​mewt għal dejjem, jixxotta Sidi l-​Mulej id-​dmugħ minn fuq kull wiċċ.”—Isaija 25:8.

Int tistaʼ tpoġġi l-​fiduċja tiegħek f’dawn il-​wegħdi għaliex huma ispirati minn Alla nnifsu. Għala ma teżaminax l-​evidenza li turi li l-​profeziji tal-​Bibbja huma taʼ min joqgħod fuqhom?

[Tagħrif f’paġna 32]

www.watchtower.org

[Sors tal-​Istampa f’paġna 32]

FAO photo/M. Marzot