Qiegħda Ssir ir-​Rieda t’Alla?

“Tiġi saltnatek, ikun li trid int, kif fis-​sema, hekkda fl-​art.”—Mattew 6:10.

IMBIKKMIN bl-​orrur, Julio u Christina raw erbgħa minn uliedhom imutu maħruqin. Sewwieq fis-​sakra kien ħabat ġol-​karozza tagħhom li kienet ipparkjata, u din ħadet in-​nar. Marcos, il-​ħames tifel, ġie salvat minn dak l-​infern sħiħ, imma n-​nar kien ħaraqlu ġismu u sfigurah għal għomru. Kien għad kellu disaʼ snin. Missieru kellu qalbu maqsuma. Hu għamel il-​kuraġġ lilu nnifsu u lill-​familja tiegħu b’dan il-​kliem: “Din hi r-​rieda t’Alla, irridu nifhmuh dan, kemm jekk ir-​riżultat ikun tajjeb, jew ħażin, jew mod ieħor.”

Meta sseħħ traġedja bħal din, ħafna nies jirreaġixxu bl-​istess mod. ‘Jekk Alla jistaʼ kollox u jimpurtah minna,’ huma jirraġunaw, ‘dak li ġara żgur li hu għall-​ġid tagħna b’xi mod, avolja huwa diffiċli ħafna biex nifhmu għala.’ Int taqbel maʼ dan?

Din il-​ħarsa taʼ li jiġri x’jiġri, tajjeb jew ħażin, hija r-​rieda t’Alla spiss tiġi bbażata fuq il-​kliem taʼ Ġesù fit-​Talba tal-​Missierna, kwotata hawn fuq. Ir-​rieda t’Alla qiegħda ssir fis-​sema, mhux hekk? Meta nitolbu ‘Ħa jkun li trid int fl-​art,’ ma nkunux aħna qed naqblu li dak li jiġri fl-​art huwa r-​rieda t’Alla?

Ħafna wħud m’humiex ċerti minn din il-​ħarsa. Għalihom, din tpinġi lil Alla bħala wieħed insensittiv għal dak li jħossu l-​bnedmin li ħalaq. ‘Kif jistaʼ jkun li Alla li jħobb irid li jiġru affarijiet terribbli lil nies innoċenti?’ huma jistaqsu. ‘Jekk iridna nieħdu tagħlima, x’tistaʼ tkun din it-​tagħlima?’ Forsi int hekk tħossok.

Dwar dan, id-​dixxiplu Ġakbu, ħu Ġesù mill-​omm, kiteb: “Waqt li tkunu mġarrbin, araw li ħadd ma jgħid: ‘Alla qiegħed iġarrabni’ għax Alla ma jistax jiġġarrab għall-​ħażin, u anqas m’hu se jġarrab lil ħadd.” (Ġakbu 1:13) Alla m’huwiex is-​sors taʼ dak li hu ħażin. Għaldaqstant, huwa ovvju li mhux kulma jiġri fuq l-​art illum huwa r-​rieda t’Alla. L-​Iskrittura titkellem ukoll dwar ir-​rieda tal-​bniedem, ir-​rieda tal-​ġnus, u saħansitra r-​rieda tax-​Xitan. (Ġwanni 1:13; 2 Timotju 2:26; 1 Pietru 4:3, NW) Taqbel int li dak li ġara lill-​familja taʼ Julio u Christina ma setgħetx kienet ir-​rieda taʼ Missier tas-​sema mimli mħabba?

Allura, x’ried ifisser Ġesù meta għallem lid-​dixxipli tiegħu biex jitolbu: ‘Ikun li trid int’? Kienet din biss talba biex Alla jindaħal f’każijiet partikulari, jew Ġesù kien qiegħed jgħallimna nitolbu għal xi ħaġa akbar u aħjar, bidla li kulħadd jistaʼ jittama għaliha? Ejja nkomplu neżaminaw x’għandha x’tgħid il-​Bibbja.

[Sors tal-​Istampa f’paġna 3]

Karozza: Dominique Faget-STF/AFP/Getty Images; tifel: FAO photo/B. Imevbore