‘Bħal Ħaġra Prezzjuża taʼ Lewn Aħmar’

L-​APPOSTLU Ġwanni kellu viżjoni taʼ tron glorjuż fis-​sema. Dak bil-​qiegħda fuq it-​tron kien jidher “bħal ħaġra tad-​djaspru.” Hu kien ukoll bħal “ħaġra prezzjuża taʼ lewn aħmar.” (Rivelazzjoni 4:​2, 3) X’ħaġar kien dan?

Dan ma kienx ħaġar skur bil-​wiċċ li jleqq. Fi żmien il-​qedem, il-​kelma Griega tradotta “djaspru” kienet tintuża biex tirreferi għal ħaġar taʼ kuluri differenti, inkluż il-​ħaġar prezzjuż li jkun trasparenti. Il-​“ħaġra tad-​djaspru” f’Rivelazzjoni 4:3 “żgur li [ma kinitx] id-​djaspru rħis li nsibu llum,” jgħid A. T. Robertson f’Word Pictures in the New Testament. Barra minn hekk, iktar tard fil-​ktieb tar-​Rivelazzjoni, Ġwanni jiddeskrivi l-​belt tas-​sema, Ġerusalemm, billi jgħid: “Id-​dija tagħha kienet bħal ħaġra l-​iktar prezzjuża, bħal ħaġra tad-​djaspru tleqq daqs il-​kristall.” (Rivelazzjoni 21:​10, 11) Il-​ħaġar li Ġwanni jirreferi għalih milli jidher kien ċar b’tali mod li jgħaddi d-​dawl minnu.

Dak rappreżentat bħala li hu bil-​qiegħda fuq it-​tron fil-​viżjoni taʼ Ġwanni hu l-​iktar Persuna glorjuża fl-​univers, Alla Ġeħova. Hu pur u qaddis sa l-​ogħla grad possibbli. Fi qbil maʼ dan, l-​appostlu Ġwanni kiteb: “Alla hu dawl u m’hemm ebda dlam fih.” (1 Ġwanni 1:5) Għalhekk, Ġwanni ħeġġeġ lil sħabu fit-​twemmin biex ‘jippurifikaw lilhom infushom, bħalma Ġeħova hu pur.’​—1 Ġwanni 3:3.

Xi rridu nagħmlu biex Alla jqisna puri? Huwa assolutament neċessarju li jkollna fidi fid-​demm imxerred taʼ Kristu biex jinħafrulna dnubietna. Irridu wkoll nibqgħu “nimxu fid-​dawl” billi regolarment nistudjaw il-​Bibbja u ngħixu fi qbil mat-​tagħlim tagħha.​—1 Ġwanni 1:7.