Afrikan Umli li Kien Iħobb il-​Kelma t’Alla

MIN iżur l-​Afrika spiss jibqaʼ sorpriż meta jara kemm hu faċli li jaqbad konversazzjoni dwar suġġetti Bibliċi man-​nies lokali. Malajr issib lil min jagħtik widen meta tistaqsi mistoqsijiet bħal, “X’inhi s-​Saltna t’Alla?” jew “Hemm soluzzjoni dejjiema għall-​problemi bħan-​nuqqas taʼ ikel, il-​mard, il-​gwerer, u l-​kriminalità?” Ħafna wħud ikunu kuntenti jħallu lil xi stranġier jurihom it-​tweġibiet mill-​Bibbja. Dan spiss iwassal għal studju regulari tal-​Bibbja. U hekk kif l-​istudenti jimxu ’l quddiem spiritwalment, huma jsiru Kristjani mgħammdin.

Wieħed mill-​ewwel Afrikani li wieġeb b’dan il-​mod jissemma fil-​Bibbja f’Atti 8:​26-​40. Hu kien raġel Etjopjan li vvjaġġa lejn Ġerusalemm biex iqim lill-​Alla veru, Ġeħova.

Bħalma jidher fl-​istampa t’hawn taħt, ir-​raġel Etjopjan kien sejjer lura lejn daru fil-​karru tiegħu, waqt li kien qed jaqra minn romblu miftuħ. Stranġier imur fuqu u jistaqsih: “Qed tifhem verament x’int taqra?” Bl-​umiltà kollha, l-​Etjopjan jammetti li għandu bżonn l-​għajnuna u jitlob bil-​ħrara lill-​istranġier, l-​evanġelizzatur Kristjan Filippu, biex jitlaʼ fil-​karru. Imbagħad, hu jitlob lil Filippu biex jispjegalu t-​tifsira tas-​silta Skritturali li kien għadu kif qara. Filippu jispjegalu li hi profezija li tipponta lejn il-​mewt reċenti tal-​Messija, Ġesù Kristu. Filippu jgħidlu wkoll affarijiet oħra dwar “l-​aħbar tajba dwar Ġesù,” waqt li żgur jinkludi l-​irxoxt taʼ Ġesù.

Malli jismaʼ dawn il-​veritajiet mill-​isbaħ, l-​Etjopjan irid isir dixxiplu taʼ Ġesù u jistaqsi: “X’qed iżommni milli nitgħammed?” Wara l-​magħmudija tiegħu, dan l-​Afrikan umli jerġaʼ jaqbad triqtu lejn id-​dar ferħan se jtir, u l-​Bibbja ma tgħid xejn iktar dwaru.

Illum, ix-​Xhieda taʼ Ġeħova qed jgħinu lil miljuni taʼ nies madwar id-​dinja jitgħallmu dwar l-​istess “aħbar tajba.” Bħalissa, qed isiru madwar sitt miljun studju tal-​Bibbja bla ħlas.