“Persegwitat Minħabba l-​Fidi Tiegħu”

FIR-​RAĦAL taʼ Cernobbio fit-​tramuntana taʼ l-​Italja twaqqaf monument fi ġnien lokali sabiex ifakkar il-​vittmi li d-​drittijiet tagħhom ġew miksurin. Waħda mill-​plakek hi dedikata lil Narciso Riet. Riet twieled il-​Ġermanja imma l-​ġenituri tiegħu kienu Taljani u sar wieħed mix-​Xhieda taʼ Ġeħova fis-​snin tletin. Matul ir-​reġim taʼ Hitler, ix-​Xhieda taʼ Ġeħova kienu persegwitati minħabba li rrifjutaw li jġibu lil Hitler qabel Alla, Ġeħova.

Meta l-​Gestapo skopra li Riet kien involut f’li jġib il-​kopji tat-​Torri taʼ l-​Għassa fil-​kamp tal-​konċentrament, hu ħarab lejn Cernobbio. Hemmhekk, hu ġie mitlub jittraduċi t-​Torri taʼ l-​Għassa għat-​Taljan u biex iqassmu lil sħabu fit-​twemmin li kienu joqogħdu fil-​viċin. L-​attivitajiet mimlijin enerġija tiegħu malajr ġew notati. Uffiċjal taʼ l-​SS u s-​suldati tiegħu daħlu jiġru fid-​dar taʼ Riet, arrestawh, u ħatfu l-​evidenza “kriminali”​—żewġ Bibbji u ftit ittri! Riet ġie deportat lejn il-​Ġermanja, mitfugħ fil-​kamp tal-​konċentrament taʼ Dachau, u ngħata l-​mewt ftit qabel ma ntemmet it-​tieni gwerra dinjija. Hu ġie “persegwitat minħabba l-​fidi tiegħu” tgħid il-​plakka li hemm f’Cernobbio.

Il-fidi taʼ Narciso Riet u taʼ mijiet taʼ Xhieda oħra li saru vittmi tal-​persekuzzjoni min-​Nazi tinkuraġġixxi lill-​Kristjani taʼ llum biex jibqgħu leali lejn Ġeħova, l-​unika Wieħed fl-​univers li jistħoqqlu l-​qima. (Rivelazzjoni 4:11) Ġesù qal: “Henjin dawk li ġew persegwitati minħabba s-​sewwa.” Alla se jiftakar l-​għemejjel tagħhom u se jberikhom għall-​kuraġġ tagħhom.—Mattew 5:10; Ebrej 6:10.