Imwarrbin, Maltrattati, u Mdaħħlin fiż-​Żmien

HEKK kif għamel ir-​rondi tiegħu, l-​għassies taʼ bil-​lejl ma kienx lest għad-​dehra tal-​waħx li kienet qed tistennieh. Hemm, eżatt quddiem binja residenzjali lussuża, hu sab quddiem wiċċu żewġ iġsma mejtin—koppja miżżewġa anzjana li qabżet mit-​tieqa taʼ l-​appartament tagħha fit-​tmien sular. Għalkemm is-​suwiċidju tagħhom kien xokkanti, ir-​raġuni għala wettquh kienet saħansitra iktar allarmanti. Nota li sabu fil-​but tar-​raġel kienet tgħid: “Aħna qed intemmu ħajjitna minħabba l-​abbuż kontinwu u t-​trattament ħażin mit-​tifel tagħna u martu.”

Id-dettalji taʼ din l-​istorja jistgħu jidhru mhux tas-​soltu, imma dak li jinkwetana hu li r-​raġuni għala seħħet hija komuni. Tabilħaqq, l-​abbuż taʼ l-​anzjani jinsab imxerred kważi maʼ kull parti tal-​globu. Ikkunsidra dan li ġej:

• Fi studju wieħed, 4 fil-​mija mill-​Kanadiżi anzjani jirrapportaw li ġew abbużati jew sfruttati—ġeneralment minn membru tal-​familja. Madankollu, ħafna wħud imdaħħlin fiż-​żmien jistħu jew jibżgħu wisq jitkellmu dwar is-​sitwazzjoni kerha tagħhom. In-​numru fir-​realtà jistaʼ jkun eqreb l-​10 fil-​mija, jgħidu l-​esperti.

• “Il-​ġens Indjan, taħt l-​apparenza qarrieqa taʼ rabtiet sodi tal-​familja, qed jitmermer minħabba għadd li dejjem jikber t’anzjani li wliedhom ma jriduhomx,” tirrapporta r-​rivista India Today.

• Skond l-​aqwa statistiki disponibbli, “bejn miljun u żewġ miljun Amerikan li għandhom 65 sena jew iktar ġew imweġġgħin, sfruttati, jew maltrattati b’xi mod ieħor minn xi ħadd li jiddependu minnu għall-​kura jew il-​protezzjoni,” jgħid iċ-​Ċentru Nazzjonali għall-​Abbuż taʼ l-​Anzjani. Avukat deputat tad-​distrett taʼ San Diego, Kalifornja, isejjaħ l-​abbuż taʼ l-​anzjani “wieħed mill-​iktar kwistjonijiet serji li jiffaċċjaw dawk li jinforzaw il-​liġi llum.” Hu jżid: “Qed nara li l-​problema se tikber fil-​ftit snin li ġejjin.”

• F’Canterbury, New Zealand, qed jikber it-​tħassib dwar l-​anzjani li qed ikunu l-​mira tal-​membri tal-​familja—partikolarment taʼ dawk li għandhom problemi tad-​drogi, taʼ l-​alkoħol, jew tal-​logħob taʼ l-​ażżard. In-​numru rapportat taʼ każijiet t’abbuż fuq l-​anzjani f’Canterbury kiber b’mod drammatiku minn 65 fl-​2002 għal 107 fl-​2003. Il-​kap esekuttiv t’aġenzija li ġiet imwaqqfa biex tgħin ħalli tevita li jsir dan il-​maltrattament jgħid li dan in-​numru jistaʼ jirrappreżenta biss ammont żgħir mit-​total.

• Il-Federazzjoni Ġappuniża taʼ l-​Assoċjazzjonijiet taʼ l-​Avukati tagħti l-​parir li “l-​vittmi anzjani għandhom bżonn jingħataw saħansitra iktar attenzjoni minn vittmi taʼ l-​abbuż tal-​minorenni jew taʼ vjolenza domestika oħra,” tirrapporta The Japan Times. Għala? Raġuni waħda, tgħid it-​Times, hi li “meta tqabblu maʼ l-​abbuż fuq it-​tfal jew fuq l-​imseħbin fiż-​żwieġ, l-​abbuż fuq l-​anzjani għandu t-​tendenza jdum iktar ma jidher, parti mir-​raġuni hi minħabba li l-​anzjani jħossuhom responsabbli meta l-​vjolenza tkun ġejja minn uliedhom, ukoll minħabba li l-​gvern u l-​amministraturi lokali s’issa naqsu milli jieħdu ħsieb il-​problema.”

Dawn il-​ftit eżempji taʼ dak li qed jiġri madwar id-​dinja jġagħalna nistaqsu: Għala hawn tant nies imdaħħlin fiż-​żmien li jiġu mwarrbin u maltrattati? Hemm xi tama li l-​affarijiet se jmorru għall-​aħjar? X’faraġ hemm għal min hu mdaħħal fiż-​żmien?