“Minħabba Tifel taʼ Disaʼ Snin”

KULL darba li x-​Xhieda taʼ Ġeħova marru d-​dar tagħha, Wiesława, li tgħix fin-​nofsinhar tal-​Polonja, bl-​edukazzjoni kienet tirringrazzjahom u twaqqafhom milli jkomplu jkellmuha. Darba waħda, Samuel li għandu disaʼ snin flimkien m’ommu ħabbat il-​bieb tagħha. Din id-​darba Wiesława ddeċidiet li tismaʼ l-​messaġġ tal-​Bibbja u aċċettat ir-​rivista li kienet dwar il-​Ġenna fuq l-​art.

Minħabba li t-​Tifkira tal-​mewt taʼ Ġesù kienet riesqa, Samuel xtaq jistieden lil Wiesława għal din l-​okkażjoni speċjali. Għalhekk, it-​tifel, akkumpanjat minn ommu, reġaʼ mar iżurha, din id-​darba bl-​invit stampat. Meta rat lit-​tifel liebes pulit, Wiesława skużat lilha nfisha għal mument, u daħlet ġewwa biex tilbes b’mod iktar adattat. Meta ġiet lura, hi semgħet lil Samuel, aċċettat l-​invit, u staqsietu: “Għandi niġi waħdi jew mar-​raġel tiegħi?” Imbagħad żiedet tgħid: “Anki jekk ir-​raġel ma jiġix, jien se niġi. Se nagħmel dan għalik, Samuel.” Bi pjaċir kbir għal Samuel, hi żammet kelmitha.

Matul it-​taħdita tat-​Tifkira, Samuel qagħad bil-​qiegħda maġenb Wiesława u wrieha l-​iskritturi li kienu qed jiġu kunsidrati. Dan impressjonaha. Hi ħadet pjaċir bit-​Tifkira u apprezzat li l-​ħsibijiet profondi kienu spjegati f’termini sempliċi. Ukoll hi tqanqlet mill-​mod kif ġiet milqugħa u mill-​qalb tajba li l-​kongregazzjoni wrietha. Minn dakinhar, Wiesława wriet iktar u iktar apprezzament għall-​affarijiet spiritwali, u bdiet tissieħeb max-​Xhieda taʼ Ġeħova regolarment. Reċentement hija qalet: “Inħossni imbarazzata li qabel ma kontx nagħtikom widen meta kontu tiġu d-​dar tiegħi. Irrid nammetti li smajt il-​messaġġ tagħkom biss minħabba tifel taʼ disaʼ snin, minħabba Samuel.”

Bħal Samuel fil-​Polonja, ħafna żgħażagħ oħrajn tax-​Xhieda taʼ Ġeħova jfaħħru ’l Alla bil-​fomm u bil-​manjieri u l-​imġiba tagħhom. Jekk għadek żgħir, int ukoll tistaʼ tgħin lil uħud sinċieri jifhmu l-​valuri spiritwali li huma taʼ benefiċċju.