Il-​Kitba—L-​Importanza li Kellha f’Iżrael tal-​Qedem

ĠIELI qrajt xi siltiet mill-​Ilijade jew mill-​Odissea, żewġ poeżiji twal u famużi tal-​Greċja tal-​qedem? Huwa maħsub li dawn il-​poeżiji nkitbu matul id-​disaʼ jew it-​tmien seklu Q.E.K. Kif inhuma differenti dawn ix-​xogħlijiet meta mqabblin mal-​Bibbja, li bdiet tinkiteb ħafna sekli qabel? Il-​volum The Jewish Bible and the Christian Bible jgħid: “Il-​Bibbja għandha minn taʼ l-​inqas 429 referenza għall-​kitba u għal dokumenti miktubin. Dan hu sinifikanti meta wieħed jiftakar li l-​Ilijade tipprovdi biss referenza waħda għall-​kitba u lanqas referenza waħda m’hemm fl-​Odissea.”

The Oxford Encyclopedia of Archaeology in the Near East tispjega li “milli jidher, f’Iżrael tal-​qedem il-​kitba kienet parti integrali mill-​qima reliġjuża.” Per eżempju, il-​patt tal-​Liġi kien jiġi mniżżel bil-​miktub u mbagħad jinqara pubblikament fuq bażi regulari quddiem l-​irġiel, in-​nisa, u t-​tfal kollha. Ukoll, kien jinqara u jiġi studjat min-​nies kemm bħala grupp u kemm fil-​privat. Wara li kkunsidra xi fatturi tal-​Liġi, Alan Millard, lekċerer taʼ grad għoli fl-​Università taʼ Liverpool, ikkonkluda: “Milli jidher, kien maħsub li l-​qari u l-​kitba kienu parti integrali mill-​ħajja taʼ l-​Iżraelin.”​—Dewteronomju 31:​9-​13; Ġożwè 1:8; Neħemija 8:​13-​15; Salm 1:2.

L-appostlu Pawlu jispjega kif il-​Kristjani għandhom iħarsu lejn il-​kitbiet qaddisa: “Kulma nkiteb minn qabel inkiteb għall-​istruzzjoni tagħna, biex permezz tas-​sabar tagħna u permezz tal-​faraġ mill-​Iskrittura jkollna t-​tama.” Turi int personalment apprezzament għall-​Bibbja billi taqraha b’mod regulari?​—Rumani 15:4.