Mistoqsijiet mill-​Qarrejja

Fl-​ittra tiegħu lill-​Ebrej, l-​appostlu Pawlu tkellem dwar “it-​tqegħid taʼ l-​idejn.” Kien hu qed jirreferi għall-​ħatra taʼ l-​anzjani jew għal xi ħaġa oħra?—Ebr. 6:2.

M’hemmx għalfejn inkunu dommatiċi, imma Pawlu x’aktarx li kien qed jirreferi għat-​tqegħid taʼ l-​idejn sabiex jingħataw l-​għotjiet taʼ l-​ispirtu.

Il-Bibbja ma titkellimx dwar it-​tqegħid taʼ l-​idejn f’konnessjoni mal-​ħatriet teokratiċi. Meta Mosè ħatar lil Ġożwè bħala s-​suċċessur tiegħu, hu ‘qiegħed idejh fuqu.’ (Dt. 34:9) Fil-​kongregazzjoni Kristjana, xi rġiel kwalifikati nħatru bit-​tqegħid taʼ l-​idejn. (Atti 6:6; 1 Tim. 4:14) Pawlu ta l-​parir biex l-​idejn ma jitqegħdux malajr fuq raġel.—1 Tim. 5:22.

Madankollu, Pawlu ħeġġeġ lill-​Kristjani Ebrej biex, issa li telqu “d-​duttrina elementari,” ‘jirsistu lejn il-​maturità.’ Imbagħad hu ta lista taʼ “ndiema minn għemejjel mejtin, u l-​fidi f’Alla, it-​tagħlim fuq il-​magħmudijiet u t-​tqegħid taʼ l-​idejn.” (Ebr. 6:1, 2) Hija l-​ħatra taʼ l-​anzjani sempliċement xi ħaġa elementari li mindu jiħduha l-​Kristjani għandhom jibdew jirsistu, jew jagħmlu progress? Le. Il-​fatt li tkun anzjan tal-​kongregazzjoni huwa mira li l-​aħwa maturi għandhom jirsistu għaliha u mbagħad japprezzawha.—1 Tim. 3:1.

Imma kien hemm raġuni oħra għat-​tqegħid taʼ l-​idejn. Fl-​ewwel seklu, Ġeħova ċaħad lil Israel naturali bħala l-​poplu tiegħu u għażel lil Israel spiritwali, il-​kongregazzjoni taʼ Kristjani midlukin. (Mt. 21:43; Atti 15:14; Gal. 6:16) Għotjiet mirakolużi taʼ l-​ispirtu, bħalma hu li titkellem bl-​ilsna, kienu evidenza taʼ din il-​bidla. (1 Kor. 12:4-11) Meta Kornelju u n-​nies taʼ daru bdew jemmnu, dawn l-​uħud ġodda rċivew l-​ispirtu qaddis, kif wera l-​fatt li bdew “jitkellmu bl-​ilsna.”—Atti 10:44-46.

Kultant, l-​għotjiet mirakolużi kienu jingħataw permezz tat-​tqegħid taʼ l-​idejn. Meta Filippu xandar l-​aħbar tajba fis-​Samarija, ħafna tgħammdu. Il-​ġemgħa li tiggverna bagħtet lill-​appostli Pietru u Ġwanni hemmhekk. Għala? Naqraw: “Imbagħad [dawn it-​tnejn] qiegħdu idejhom [fuq in-​nies li kienu għadhom kif tgħammdu], u bdew jirċievu l-​ispirtu qaddis.” Wisq probabbli dan kien ifisser li huma kienu rċivew l-​għotjiet taʼ l-​ispirtu, abbiltajiet li setgħu jidhru. Dan nafuh għax Xmun, li qabel kien jipprattika l-​arti tal-​maġija, ra l-​ispirtu jaħdem u b’regħba pprova jixtri l-​abbiltà li jqiegħed idu fuq oħrajn sabiex jagħtihom l-​ispirtu qaddis biex dawn l-​individwi jkollhom il-​qawwa li jwettqu l-​mirakli. (Atti 8:5-20) Iktar tard tgħammdu 12-il persuna f’Efesu. Naqraw: “Meta Pawlu qiegħed idejh fuqhom, l-​ispirtu qaddis ġie fuqhom, u bdew jitkellmu bl-​ilsna u jipprofetizzaw.”—Atti 19:1-7; qabbel it-​2 Timotju 1:6.

Għalhekk, f’Ebrej 6:2, mid-​dehra Pawlu kien qed jirreferi għat-​tqegħid taʼ l-​idejn sabiex l-​għotjiet taʼ l-​ispirtu jingħataw lil uħud ġodda li bdew jemmnu.