51 BARNABA
“Wieħed li Jinkuraġġixxi”
WARA tliet snin ’il bogħod minn Ġerusalemm, Sawl taʼ Tarsu reġaʼ mar lura biex ikun mal-aħwa t’hemmhekk. (Gal. 1:15-19) Għalkemm hu issa kien sar Kristjan, l-aħwa t’hemm bdew jibżgħu minnu għax qabel kien jippersegwitahom. Ħafna ma bdewx jemmnu li hu kien inbidel, imma kien hemm ħu li kellu l-kuraġġ u l-imħabba biex jgħin lil Sawl. Dan ir-raġel kien magħruf bħala Barnaba.
Il-Kristjani f’Ġerusalemm bdew jibżgħu jgħinu lil Sawl taʼ Tarsu, imma Barnaba b’kuraġġ għenu
Il-Bibbja tgħid li Barnaba kellu isem ieħor, Ġużeppi, imma l-aħwa kienu jgħidulu Barnaba għax dan l-isem ifisser “Wieħed li Jinkuraġġixxi.” Għala? Hu kien qalbu tajba ħafna, u dejjem kien jara kif se jinkuraġġixxi u jgħin lil oħrajn. Pereżempju, wara Pentekoste tas-sena 33 WK, hu biegħ biċċa art u l-flus tahom lill-aħwa li kienu foqra. U meta Sawl mar Ġerusalemm, fis-sena 36 WK, Barnaba ltaqaʼ miegħu u wrieh qalb tajba. Fil-fatt, il-Bibbja tgħid li “qabeż għalih u ħadu għand l-appostli.”
Minn dak iż-żmien ’il quddiem, Sawl u Barnaba saru ħbieb kbar. Waqt li Sawl kien Ġerusalemm, hu kompla jipprietka b’kuraġġ dwar Ġesù u minħabba f’hekk il-Lhud riedu joqtluh. Meta l-aħwa f’Ġerusalemm semgħu b’dan, huma bagħtuh lura Tarsu fejn kien twieled. Wara disaʼ snin, Barnaba reġaʼ ra lil Sawl. L-aħwa bagħtu lil Barnaba f’Antjokja tas-Sirja għax kien hemm ħafna nies li saru Kristjani. Hu setaʼ jinkuraġġihom għax il-Bibbja tgħid li “kien raġel sew li kellu l-ispirtu qaddis u fidi kbira.” Peress li ħafna nies f’Antjokja riedu jitgħallmu dwar l-aħbar tajba, Barnaba kellu bżonn l-għajnuna taʼ xi ħadd biex jippritkalhom u jgħallimhom. Għalhekk, mar Tarsu biex ifittex lil Sawl. Sawl mar lura miegħu Antjokja u flimkien ħadmu iebes fl-ippritkar.
Barnaba u Sawl wara vvjaġġaw lejn il-Lhudija biex jieħdu l-flus u affarijiet oħra li kienu ġabru minn Antjokja biex jgħinu l-foqra. Imbagħad l-aħwa f’Ġerusalemm bagħtu lil Sawl, li beda jissejjaħ Pawlu, u lil Barnaba flimkien fuq vjaġġ biex jippritkaw f’postijiet oħra bħala missjunarji. Għal darb’oħra, il-fidi tagħhom ġiet ittestjata. F’Ikonju, xi Lhud riedu joqtluhom. Allura, b’għaqal telqu lejn Listra. F’Listra, in-nies ħasbu li kienu allat! Imma xi Lhud minn Antjokja fil-Pisidja u Ikonju ġew u bdew jigdbu dwar Pawlu u Barnaba. In-nies f’Listra emmnu lil dawn il-Lhud u daru kontra Pawlu, tant li lil Pawlu waddbulu l-ġebel, kaxkruh barra l-belt, u ħallewh hemm għax ħasbu li kien mejjet. Hemmhekk, il-Kristjani f’Listra sabuh u ħadu r-ruħ xħin raw li ma kienx miet. Tistaʼ timmaġina kemm feraħ Barnaba meta sar jaf li l-ħabib tiegħu kien għadu ħaj? L-għada, it-tnejn li huma telqu minn Listra, imma wara ftit marru lura biex jinkuraġġixxu lill-aħwa. X’kuraġġ urew!
Barnaba u Pawlu għamlu ħafna xogħol tal-għaġeb għal Ġeħova u għaddew minn ħafna sitwazzjonijiet perikolużi. Imma darba ġara xi ħaġa u kellhom argument. Barnaba ried li fil-vjaġġ li jmiss jieħdu l-kuġin tiegħu Marku magħhom, imma Pawlu ma riedx għax fil-vjaġġ taʼ qabel, Marku kien telaqhom. Ħadd minnhom ma ried iċedi, allura spiċċaw “kellhom xi jgħidu sew,” u nfirdu.
Kien Barnaba se jibqaʼ rrabjat għal Pawlu jew kien se jaħfirlu? Hu kellu bżonn il-kuraġġ biex jagħmel il-ħaġa t-tajba u ma jibqax irrabjat. Meta jkollna xi ngħidu ma’ xi aħwa, faċli nibqgħu rrabjati, nieqfu nkellmuhom, jew nieqfu nattendu l-laqgħat. Imma hemm bżonn li jkollna l-kuraġġ biex ma nagħmlux dawn l-affarijiet. Minflok, għandna nagħmlu li nistgħu biex naħfru lill-aħwa ħalli b’hekk inferrħu lil Ġeħova.
La Barnaba u lanqas Pawlu ma ħallew dan in-nuqqas taʼ qbil iwaqqafhom milli jaqdu lil Ġeħova. Barnaba u Marku marru Ċipru fejn komplew ix-xogħol taʼ li jagħmlu dixxipli. U Pawlu mar ma’ Sila fuq il-vjaġġ li kien se jagħmel ma’ Barnaba. Bl-għajnuna taʼ Ġeħova, ippritkaw l-aħbar tajba u inkuraġġew lill-kongregazzjonijiet.
Dawn iż-żewġt irġiel baqgħu rrabjati għal xulxin? Le. Fil-fatt, Pawlu tkellem b’mod tajjeb dwar Barnaba fl-ittri tiegħu. Pereżempju, meta kiteb lill-Korintin qalilhom li Barnaba, bħalu, kien jaħdem iebes biex imantni lilu nnifsu ħalli jkun jistaʼ jkompli jipprietka. (1 Kor. 9:6) U f’ittra oħra, hu tkellem b’rispett dwar Marku, il-kuġin taʼ Barnaba, billi qal lill-kongregazzjoni biex jittrattawh b’mod tajjeb. (Kol. 4:10, 11) Veru li ma baqgħux jippritkaw flimkien, imma Pawlu u Barnaba baqgħu ħbieb. Żgur li Barnaba baqaʼ jipprietka l-aħbar tajba lin-nies u jinkuraġġihom. U waqt li kien ma’ Marku, wisq probabbli kompla jittrennjah. Fil-kapitlu li jmiss se naraw il-kuraġġ li wera Marku.
Aqra l-istorja mill-Bibbja:
Biex tiddiskuti:
Barnaba kif wera kuraġġ?
Fittex Iktar
1. Barnaba kien Levita. Skont il-Liġi taʼ Mosè, il-Leviti ma kinux jirtu art. Allura Barnaba kif kellu biċċa art? (Num. 18:20; Atti 4:36, 37; w98 4/15 20 ¶4, ntt.)
2. Barnaba għala jissejjaħ appostlu? (Atti 14:14; w98 4/15 21 ¶6)
3. F’Ċipru, Barnaba u Pawlu ppritkaw lil raġel jismu Serġju Pawlu. Luqa, il-kittieb t’Atti, irrefera għalih b’mod tajjeb meta qal li kien “prokonslu”? (Atti 13:7, 12; bt 87 ¶6, ntt.) A
Bank of Cyprus Cultural Foundation Collection
Stampa A: Munita li nstabet f’Ċipru li fuqha hemm Klawdju. Hu kien il-mexxej tal-Imperu Ruman meta Barnaba u Pawlu marru Ċipru. Din il-munita ssemmi wkoll li l-mexxej tal-gżira kien “il-prokonslu”
4. Għala ma niħduhiex bi kbira li n-nies taʼ Listra riedu jilqgħu lil Barnaba u lil Pawlu bis-sagrifiċċji? (bt 97, kaxxa)
Aħseb Fuq Dak li Tistaʼ Titgħallem
Kif nistgħu nkunu ġenerużi bħal Barnaba?
Milli jidher, l-ewwel vjaġġ bħala missjunarji organizzah Barnaba. Imma iktar tard, Pawlu kellu iktar responsabbiltajiet minn Barnaba. Minkejja dan, Barnaba ma għerx għalih. F’liema sitwazzjonijiet nistgħu nimitawh? B
Stampa B
B’liema modi tistaʼ timita l-kuraġġ li wera Barnaba?
Ħu l-Ħin Biex Taħseb Dwar Dawn il-Mistoqsijiet
Din l-istorja x’tgħallimni dwar Ġeħova?
Din l-istorja kif inhi marbuta mal-iskop taʼ Ġeħova?
Wara li studjajt dan il-kapitlu, kif tħossok li taf li Barnaba se jmexxi maʼ Ġesù fis-sema?
Tgħallem Iktar
Il-ħbiberija li kellhom Barnaba u Pawlu kif turina li nies b’karattru differenti jistgħu jaħdmu flimkien?
“Se tirranġa n-nuqqas taʼ qbil u tippromwovi l-paċi?” (w17.06 28-32)
F’dan il-vidjow, ara kif aħwa rġiel jistgħu jimitaw lil Barnaba u Pawlu meta ma jaqblux bejniethom.